رواية الشيهانة الفصل الثاني عشر 12 - بقلم Shaqraa

مساء الورد

الشيهانة
الجزء الحادي عشر

آنه الـ عاشگچ والـ گد كلمتي
بديت وياچ من أمي وحلقتي
مدري شكم علگ بالحضره ☘️💚شديت ؟
حتى عيونچ يصيرن قسمتي..

ماما اخذت جنطتها وراحت للغرفة وضايجة..
انا كعدت يم بابا ابتسملي وحجه..جوعانة بابا
مو..
يعني شوية بعدني توة كاعدة..
اي صحصحي وكومي تعشي دزتلج حنين
اكل..
امم ماريد تمن بس سوب اكو ويا..
اي سوب لحم وتمن وتبسي هواي
سألت عنج..
اي فدوة لعمرها مشتاقتلها..

رفع راسه حسن وشاركنا الحديث..شاها
بعدين رايدج بسالفة..
انا هم رايدها بسالفة خلينا وحدنا..حجه بابا..
ورا ماكام حسن حجه بابا بعد تنهيدة..
حنين ماحاجتج بشي؟؟
لا يعني مثل شنو؟
جر نفس بابا وحجه..

اليوم حماها حاجاني..
انا بلعت ريك وتوترت..وهو كمل كلامه..
خطبج من عندي..كال انا شايل الزواج من بالي
وتدري بيه الوالدة..بس هي ماردات تخسر كريمتكم
وخطبتها لخالي..وهو هم من عرف عتب
عليها هواي..

وانا بصراحة شفتها البنية ذهب صافي
ورايد اكمل نص ديني وياها وعد عينك حجي..
شوفي بابا هو الولد خوش وزلمة حوك..
يختلف عن اخوه كلش ..بس مايناسبنا وضعهم
احنا من بيئة وهم من بيئة..وبعدج مامكملة
دراستج بمكن يجيج احسن منه..

انا رفضته ..صح كشخص ماينرفض ..بس
قسمة بيها هواي عوائق ماتفيدنا..
كتله انت والنعم منك ..بي بتي ما تريد زواج هسه..
تريد تكمل دراستها وتاخذ الماجستير..
ولا عبالك هذا الجواب مني..بس هي هذا
ردها لكل الخطبوها..ماافضلهم عليك ..بس
خطبوها هواي ناس وماينرفضون..
عندي ابن بت عم امها من شبت وخاطبها كم مرة..

بس احنا من نحجي كدامها بهيج موضوع..
هو كال انتظرها تخلص واتقدملها..وهي من جسينا
نبضها بهيج موضوع .. رفضت
وجان جوابها واحد..انا طالبة ابد مااتزوج..
اخلص ماجستير وانضج حسب حجايتها..
تالي افكر..

لا عبالك رفضتك نقص منك حشاك..
بس بعد هي هالوحدة عندي ومااظلمها..
من تخلص دراستها وتحس نفسها مستعدة..
ساعتها احاجيها بموضوع الزواج..
وانت البنات يتسابقن عليك..حال ومال وكلش
كافي اخلاقك وطيبتك..
وانشالله تحصل بت الحلال التسعدك..

هو كال الله كريم يصير خير لوقتها..
الله يقدم البي خير..اعذرني حجي اخذت
من وقتك ..وترخص وراح..
ومن حجيت لامج وافقتني كالت حيدر ينتظرها تخلص
ويخطبها..
يعني حيدر ابن خالة خطبني ؟
اي من قبل بابا..

بس بابا صح هسه ماريد زواج لان طالبة..
بس حيدر حتى لو خلصت مااقبل بي..
ليش شعجب؟
شخصيته كلش ماتناسبني ولا اتوافق ويا بابا
عفية..
بابا هسه قابل جبرتج المن خفتي..

لا تردي شنو يعني..
مو ماما خاف تزعل مني..
هو الزواج بس زعل بعد..هذا مصيرج انت
تقرري..
احنا نساعدج ونوعيج ونرشدج للافضل..
بس مانفرض عليج شي هاي حياتج انت..

الله كريم بابا ..حجيتها بيأس من شفت رأيه
مقارب لرأي ماما..
صح مو نفس التهجم..بس النتيجة وحدة..
بس من شفته محترم حيادر ومارافضه لشخصه..
يعني شبه طمنت نفسي..

كام وكال تصبحين ع خير وروحي اكلي..
جاوبته وانت بخير ورحت للمطبخ..
بس نفسي مسدودة ماشتهي شي..دخلت الاكل
بالثلاجة..
توضيت وصليت ورجعت لفراشي..
راسلت حسن اخوي..ها شنو ردت مساع؟
رد بسرعة..تعاي لغرفتي عفية اريد مساعدة..

عفت الفون بالفون ع فراشي وكمت ..
صعدت لغرفة حسن ودكيت الباب..
تعاي شيشة تعاي بعد اخوووج..
فتحت الباب وابتسمت..
احس اكو ان بالوضوع شنوو..؟
تعاي كعدي وتعرفين..

كعدت يمه ع جرباية ورفعت حواجبي
بأستفهام..
اكلج تعرفين عيال حنين..بناتهم يعني..
امم لا يعني كلها مرتين يمكن شفتهم ليش؟
باعي شفت وحدة بس قنبلة..دخلت براسي
كلش..
وين سفتها هن مبركعات ولك..
لا مالابسة بركع ..لابسة فستان احمر طويل
وهي طويلة تشك شك..

يا يا ولك وين شفتها فهمني شلون..
طلعت وي مرة جبيرة من بيت عيال حنين
وراحت لبيت بصفهم..
بقيت مرابط برا انتظر بلكي ترجع ..شفتها
رجعت ورا شوية..بس شنو من طول وبياض
جنها سيرين عبدالنور..

زين انت عجبتك يعني شنو تريد؟
اريد تبطلين ثول شوية..
عابت..
الج..اريد معلومات عنها شنو ماشنو ..حتى
اذا كلشي مثل ماريد اخطبها..
صددك..واخيراً راح تسوولنا
عرس نتونس بي ملينا من عنوستكم..
ههه لا فاتت مزاجي كلش..

نشوفها لعد ليش لا..بس عزا بس لا تطلع متزوجة ..
لا امبينة مامتزوجة من نعومتها و..انت
معليج احنا نعرف المتزوجة..
ادري تاخذولها سونار ..
هسه انت شعليج طلعتينا من موضوعنا المهم..

راسلي حنين كليلها تدزلج الصور..
ونشوف اذا لكيناها بيهن نسال عنها واحاجي اهلي..
مالكيناها نحاول نعرف منو هي ويصير خير..
بسيطة تدلل..بس كون حنين تدز صور..
بعد اعتمد عليج حبابة انطيني الاخبار..
اوكي راح اراسلها هسه ومن تجاوبني اكلك..
لان احتمال مافارغة هسه هوسة وعرس..
ماشي اعتمد عليج..

طلعت من يمه وانا فرحانة..ياريت صدك
وتطلع من اهلهم..حتى اذا تزوجها حسن
تتسهل ارتباطي بحيادر وينفتحلي الطريق..
نزلت لغرفتي وراسلت حنين..ما جاوبت بالاول..
ورا ساعة يلا ردت عليه..

حجينا شوية بالعرس وتسالني شخبارج ومن هالامور..
بس ماحجيتلها عن اتصال حيادر وخطبته
الي من بابا..
ماريد اسمع لوم ولا اريد معارضة ..
بقينا نسولف ودزتلي صور العرسان..البنية ماجنها
١٢ شكلها اكبر مني..بس حلوين والولد
يشبه حيادر..

كتلها دزيلي اذا عندج صور وي بناتهم
اريد اشوفهن..
دزت هواي صور بس كلهن بلا حجاب..
احتاريت شلون زين حسن يريد يشوف..
باوعت بالصور ..شفت هواي لابسات احمر..
بس وحدة رفيعة وطويلة..شعرها طويل
حيل وحلوة تشبه عيون حيادر هيج مجرورات
ومبتسمات..

ههه الله يرحم ..ايام جنت اضوج من عيون
مبتسمات..
هسه كمت اذا سديت عيوني اول شي اتخيلهن كدامي..
كبرت الصورة ع البنية بس مامتاكدة هي او لا..
شخبطت ع شعرها وكبرت الصورة ع وجهها..
كمت صعدت لحسن..خطية بس دكيت
الباب اجه فتحه ركض..

دخلت وانا لازمة الفون..جبتلك صورة بس
ما متاكدة..
مد راسه وانا افتح الفون..اوكف خل اكبرها
حتى لا تشوف شعرها لو جسمها ..انا شخبطت
بس مو عدل..
يلا استعجلي لعد ..
قربتله الصورة ع وجهه..مد راسه وكمز..

اويييلي ..جر الفون من ايدي ويباوع..
حسن لا تباوعلها بدون حجاب حراام عليك
تصير بذمتنا..
امشي غير شوفة شرعية شبييج..
جريت الفون من ايده وسديته..لا تشوف غير
صور حرام علينا..

جرني لحضنه حيل وباسني..مشكورة
شيشة طلعتي بيج فايدة..
ههه تدلل شنو تريد بس كلي..
هسه الاريده سالي عنها منو وبت منو
يعني جيبي معلومات حتى احاجي امي..
اوكي بس باجر لان حنين راحت نامت..
انتظرج حبوبة ..
اوكي يلا تصبح ع خير..
وانت من اهله..

رجعت لغرفتي وانا احس صار
عندي امل جديد..
موضوع حسن احسه راح يفيدني..
دخلت بفراشي وفتحت قران خليته
باذني وغمضت ..بقيت اسمع لحد
مانمت..

يوم ثاني كعدتني امي من الصبح..
كعدي ورنا سفرة وي بيت خالتج..وفتحت
الضوا وتحجي حتى اكعد..
كلت بداخلي ماروح هالسفرة مهما كان
الثمن..

فتحت عيوني ع كيف..ماما..
تقربت مني ها ماما ؟
ماما بطني حيل تاذيني عفية بس لا زائدة..
شلووون..فزت بوجهي وكعدتني وتفحص
ببطني..
من يمتى تاذيج ..خاف لان ماماكلة شي
اذا انت بلا عشى نايمة..

حجيت ع اساس متاذية..
احسها تمغصني من الصفحة فدوة دهنيها..
رجعت تمددت وهي تدهن ببطني وتقرا
عليه وتسمي..
انا امثل بس مقهورة عليها..احس بذنب..
بس ماريد اروح وياهم واشوف حيدرماريد..

بعدها كمت للحمام غسلت ورجعت تمددت بالصالة..
وهي صاحت لبابا وكال امشي اخذج
للمستفشى..
بس كتلهم صرت احسن..لازم ابقى متمددة..
صدك بقيت وهي جابتلي بيضة سلك وحليب
بارد..
كعدت اكلت وهي خابرت خالة ام حيدر
واعتذرت منهم..

هنا ارتاحيت لان خلصت من هالطلعة..
بعدين شوية وكمت كتلها خف الالم..
بس هي عبالها صدك ماحست بيه جذبت..

للعصر راسلت حنين وسالتها عن البنية..
كالت بت حماها تصير اخت العريس..اسمها
هاجر وعمرها
١٦ سنة..استغربت شعجب مامزوجيها
من وكت..
طلعت جانت مخطوبة وخطيبها ذابي من العشيرة
بسبب عركة ماعرف شنو..ومطلكيها
منه غصب عنه..

خطية قهرتني وكرهتهم وكرهت عقولهم
التعبانة..
وحنين طبعا ماعبرت عليها السالفة..كتلها
عاجبة حسن ونريد نخطبها..
وفرحت كلش كالت علواه لان شابعة حجي
بحجة مطلكة ومحد يريدها..
كتلها بعد اكل لحسن ونشوف..

من اجه حسن وحجيتله ..كال هذا هو
البنية رايدها وراح احاجي امي وابوي..
جان فرحان كلش وفرحته فرحتني..
بس جنت انتظر ردة فعل امي..بس ماعتقد
ترفض ..
لان حسن طبيعته الشي اليريده يقنع
المقابل بي..

ورا كم يوم كعدت الفجر ع صوت صريخ..
كمت وانا اركض ماندل طريقي..
فتحت الباب وكمت اصرخ من يمي
طحت بباب غرفتي..
انفتح باب غرفة ماما وطلعو هي وبابا
يركضون عليه..
وانا ارجف واحس بلعومي نشف..

بسرعة اجو شالوني ويحاجوني شبيج
وشصار..بس انا فاصلة..
تالي شوية شوية رجعت لوعيي..
يمكن جنت حلمانة بصوت صريخ
وتداخل الحلم والحقيقة..
بس خفت حيل وحتى قلبي ضل يدك كلش
بسرعة..

بقت امي يمي تقرا ع راسي وحاطتني
بحضنها..
هدأت واستقرت نفسيتي ..بس كتلها
لا تطفون الضوا اخاف..مادري ليش
هو مجرد صوت بس لان ربط بين حلمي
وواقعي خوفني كلش..

بعدها نمت ..فزيت الصبح لكيت الساعة عشرة
ونص..
كعدت لحيلي وانا استرجع الصار الفجر..
مو كلش اتذكر بس ببالي الصار ..
كمت طلعت للحمام غسلت..
اجتلي ماما تتطمن ..كتلها مابيه شي
بس الفجر لان شبه واعية هيجي تأثرت..

بس اشوفها تصفن كلساع وتستغفر..
بعدين سوتلي حرمل وجابته..فرته داير
مدايري وتنفض ملابسي وتصلي على
محمد وال محمد..
كوة خلصت نفسي منه ومن ريحته..

وبقت طول اليوم كلساع تجيلي للغرفة
وتكلي شتحسين خو مابيج شي..
وانا اطمنها مابيه شي..
لح الليل ورا العشا..
حسن راسلني ..اكلج شاها عفية انا كلت
لامي وابوي..بس امي ماعجبها
الموضوع..

باجر من ارجع من الشغل راح احجي
كدامكم كلكم..
انت ومحمد اربدكم تساعدوني
بالحجي..
اي زين ميخالف كلت لمحمد؟
اي كتله كال اوك شتريد وياك..
بس المهم نقنع امي..هو ابوي وافق
تقريبا..
بس امي احسها ماراغبة الموضوع لازم
اخذ منها الموافقة ورضاتها اهم شي..
اوكي باجر نحجي وياها ونشوف..

طبعا ماتوقعت ماما حتى اذا ناخذ منهم
بنية ترفض..يعني هسه انا اوكي مايناسبني
وضعهم..بس البنية اصلا رح تجي هنا
يعني مو حسن اليروح عدهم يعيش ..بعد ليش
ماقابلة يعني..
نشوف باجر شتكول بعد..

نمت بيومها بسرعة..لان غمضت عيوني
وسولفت وي حيادر بداخلي وبسرعة نمت..
وكعدت الفجر ..بس هالمرة صوت الصريخ
اقوى وجاي من غرفة ماما..

للحكاية بقية
بقلم شقراء(قمر كانون)

ادوخكم بمنتجاتي اصلا الحفرة مامتوفرة بس بامزون🤣🤣🤣

خية لو تبقى عليه بسيطة نتفاهم..بس اهله شلون بيهم وخطارهم شلون
بي..ادعولي استقل وحدي..اكتبلكم رواياتي القديمة كلها واسوي النشر يومي..
عاد سوولي حملة دعاء جماعية اطلع وحدي🤣حتى تشبعون قصص

ههههههه تحليلج عبقري..لا اليضة او الجضة يعني الهوسة

🤣🤣🤣احسن نصيحة