رواية اماً لهن الفصل الرابع والثلاثون 34 - بقلم مريم السعدي

#أماً_لهُن

بارت ٣١

#مريم_السعدي

ياعشگ تالي العمر خضر عروك الشيب
ياعمر وين العمر شو يمك تعذر

جاي اراهق جاي اون واوكع دخيل
جاي احس كل ذره بيه تنفست عنبر

رغم طبع البيه ماعيد الغلط مرتين
بس منك حلاوه الخطأ يتكرر
بس عدك حلاته الغلط يتقشمر
بس يمك حلاوه الغلط يتعفررر

بقلم مريم السعدي

انور : شسويتي بيه الهام شبيه تخبلللت
الهام : اول كلمه كالها بهدرء وتعب شوي شوي عصب من كال تخبلت

- ليش هيج تحجي
احجي مغمضه و روحي مثل الزيت عبالك مراهقه

- استغفر الله علي حسج متتت يمره اني بصوتك اعيش عالم ثاني ومن اشوفح في اربعه احس روحي مو انور الي انغدر وانداس احس روحي بكبر يحيى الهام شسوي فهميني

- شبيك انور
- اااخ ربي...
سكت واني سكتت محروك دمه و خايف حقه بكلشي
ختم المكالمه بهمسه

- تصبحين على خير
واني مضغطت عليه تركته
- وانت من اهله

كملت المكالمه دقايق تشرح عذابه اللي اني كان بالنسبه الي نعيم

تركته يختار جانب اللي يريحه
نزلت جوه افتر ببيته هذا اخر اسبوع هنا شكد ارتاحيت رغم يوميه اكثر من نص ساعه روحه نص ساعه رجعه للدوام والا احلى عيشه هنا

دااقفل الباب سمعت بالحمام صوت كحه تصنطت ازل طلعت من الغرفه عالصوت باوعتلي واكفه مستغربه

همست
- منو هاي عسوله
- جج عسل نايمه هاي رسل
- شبيها

ازل : احساسي انفزع من اي احد يتمرض تقربت بلهفه فتحت باب الحمام قافلتها

- رسل فتحي شبيييح
رسل : مابيه شي عوفوني

تركتها وطبيت للغرفه عمه الهام طتنا خبر نتحضر واني لميت. غراضي القليله
بعد الحريق
مبقالي كل ذكريات حتى صور بابا وماما مبقت اضطريت اروح بيت جدو اهل ماما القديم هسه كاعد بي ابن خالي ومرته وطلعت غراض بيبي وبيها الالبوم اخذته ورجعت

لميت غراضي وتحضرت.. وسناء اكثر من مره اتصلت تتأكد باجر شحتاج منها
سنه التخرج هاي ابشع سنه

جنت محضره تفاصيلها العام. اني وروحي وكلشي تخربط.
كلها تحضر واني مبتعده. عنهم محد تجرا يحجي ويايه.

لبسي الاسود وعيوني التعبانه والمكان الفارغ بصفي عمره ماانترس. محد تجرا يملي جنت احط كتبي بي مثل مجنت قبل

تخليها بي وتكولي حجزي المقعد
محتاجتج اساور
محتاجه احجي كلشي والله لو ترجعين احجيلج كلشي تعاركي ويايه وكرهيني. ادري. تردين ترجعين بس ماريد اضم عليج شي

.
.

نفسي مطفيه بتعب بس الله يعلم بي
يغفى على الجرح طعم الملح يذبح

انا الداريت عشكي بنظرة گلب ولسان
انا اللي تندم من ما وضحت واشرح

لو ترجع اكولك شنو الحسيت
ومنو صاحب عذابي اللي بالنفس يجرح

.
.

مثل كل يوم نمت واخر ذكرى صورتها وضحكتها بعيوني صارت

حسيت الصبح بدلت
عسل اللي تفتر وتنكت واني وللومه صافنين عليها نبتسم طلعنا سوه بس رسل قبلنا

رجعت تداوم بعد غيبه اسبوع عشر ايام منعرف شنو فلمها

كان عدي امتحان ب١٠ رحت كبل للشركه مو عادتي اجي بهالوقت

ب٨ توني اوقع وطب سيدار نزع نظارته
وكف بصفي يوقع

همس
- لك شنو الشمس اللليوم
- ابتسمت صباح النور استاذ سيدار
- صباح الخير عيني

طبيت ويمشي ورايه وينطي اوامر راكان بعد ممبين طب للمكتب وميل راسه

- لحكيني فدوه مضل وكت عالمعمل والله وهذا عالمرتاح يجي
- اي ماشي جيت

ذبيت جنطتي وطبيت للمكتب هو كاعد عالكرسي واني بصفه يسأل وين القوائم واني ادلي وننسخ ينكت واني اضحك برزانه

اخر شي كال
- متريكه. ؟ ورفع عينه باوعلي
- دننزل القوائم هسه
دااشر عالقائمه سد اللاب توب على ايدي ورفع عينه ابتسم

شال الفون
دزيتهن كلهن للمعمل ليضل بالج عايني
باوعت لجهازه مصور وداز
- لعد ليش خليتني اجي انسخ

- حجه
كالها برزانه وعقج عينه
ابتعدت افتريت وره الميز افتر ويايه كعد كدامي واصبعه جوه خده

سألته ابتسم
- محتاج مني شي بعد
- جوعان...
كالها بنتره وطريقه خربت ضحك
دااضحك وايدي على وجهي والباب انفتح توقعته راكان

وافز ويفز كل جرح بيه كل يوم بدونها كل مكان بالشركه فز ويايه

- عمو رائد
طب وباوعلنا باهت راكان وراه كال

- ترااا شون مفاجأه بالخوه

سيدار وكف مرحب بوسه وباوعلي

- استحقينا ريوك ازوله موبله

بقيت اباوعله مداصدك وكفته بالشركه وهو ماعرف ليش احس عيونه تعتب

ابتسمت هزيت راسي
- اي اي هسه اطيب ريوك نتريك

باوعلي اتقدم كباله
- شونك عمو شون صرت

بلع ريك يباوع بعتب همس
- جان كدرتي تسالين بتلفون ولو عمي موالي عالحجيه بس الظاهر ملتهيه.. ملتهيه بالشغل يحجي ويهز راسه معاتب

سيدار كسرها وكال
- عمي امتحانات خطيه

يحجي سيدار يحجي راكان وهو عيونه بعيني تعتب هي اسبوعين متصلت بي هلكد اثرت بي ليش هلكد يعتب ويباوعلي هالنظره والله تعبت

طلعت اوصي ريوك وجاي وصيت كلشي جتي وسناء شافتني مبتهجه ابتسمت

يمكن وجهي معرف يضم فرحتي بي يمكن انترست الشركه ريحه قبل ريحه اساور من تفتر وياه وتضحك

طبيت الصينيه والباكيتات بيدي جانو يحجون سيدار وراكان وياه ملتمين اللي بيده قوائم واللي ياشر عالشاشه مال حاسبه وهو لازم راسه ويعاين بتعب

طبيت نترت بيهم

- شو شو شويه وخروا حتخلوا يتندم داوم باوعلي بعتب ورد نصه عالحاسبه

- يله عزلو خل ناكل

سيدار : جبتي من هذا الجبن مال مكعبات اللي احبه
ازل : جبته استاذ وانت راكان جبت مناقيش
راكان : عاشت ايدج ام الزلازل

عمو جان بس تفتر عيونه علينا من واحد لواحد ويعاين لكرسيها فارغ قدمتله الجاي ونوعت بالريوك مناقيش جبن وزعتر ولفه جبن

- يله عمو بسم الله
جر نفس باوعلي ومد ايده سيدار حجه

- اكلي ازوله
- اي راح اكل

راكان جان ياكل وصافن بغير عالم كل لكمه ياكلها يعاين للمناقيش ويجر نفس عبالك يمها مويمنا

دااشرب جاي كام سيدار جر الخاشوكه من كوبي
نترت بالضحك جنت احاول اضحك الطف الجو

- هاي لييش جيبها
- ماعدي عروسه والله
- اي روح جيبلك
- يابه غير انتي الحايببببه الريووك هاي غير معزبه

- اهوو بيش اخوط اني
تقربت ادور بالصينيه اليم عمو رفع عينه عمو يباوعلي بحيره ساكت ذبحني سكوته
اخذت من كوب راكان خطت ورجعته
كملنا وكلمن طش لشغله راكان بقه يم عمو طبت وسناء بيدها الشغل الوصيتها عليه

راكان ديشرب جايه جان خلت الغراض وسلمت اشرلها خليها هنا هنااا

باوعتله خزرته
غمض عبس حلكه ودار وجهه صفح
شالتها البنيه وخلتها كدامه بالمكان الكالت علي
صدك وتدفع الكوب بالسجلات على حضها وانجب الجاي بحضن راكان عاط عيطه مبالغه بيها بحيث بجت

- شبييييج شبييييج عميييه من عمه العماااج امشي ولي ولييييوللللي ينعل حظ الوضفج همممم غبيه غبيه يامحممممد غبببيه

يحجي وياشر يصيح
وهي تتعذر
اسفه والله مادري والله استاذ اعتذر امسحه هسه. اغسل سترتك وهو يصيح

طلعت مرتبكه وعيونها غركانه دمع
عمو بقه صافن واني خازرته لراكان

كعد راكان ويدردم لزم راسه
تقربت منه وحجيت بعصبيه بس صوتي هاديء احتراما لعمو بس غديت جهنم

- راكاننن اعتقد حذرتك ان متهينها صح لووو لا
- متشوفيها شون مطيه

- اولاا كلش زين تعرف بيها تخاف وترتبك. البنيه. وانت مسويلها رعب
- شمسوي يابه كالها باستهزاء
- والله خويه شوف نفسك شبيك وياها

- شوي سكتي ازل
- الوش اسكت البنيه جايه لخاطري

- ديله عيني مو جانت قاطعته
- معليك جانت خبازه خياطه منظفه انت مالك دخل بيها يابه البنيه دتشتغل فوك شغلها قاطين

- اي الزمال يموت بكروته
- راكااان لتزعلني منك والقران ازعل عليك

- يابه شمسوي اوووه متشوفيها صمطتني
- اصلا الجاي بارد انت تحبه وهاك بس بطارف الستره اجه شصار شدعوه

سكت عمو صافن علينا كلشي محجه راكان عاف الغرفه وطلع متذمر سد الباب وعمو يباوعلي

ميلت راسي
- ها عمو ساكت شو
مرد عليه بس يباوعلي

- محتاج شي حطلع اكمل شغل
دااطلع همس

- ازل
التفتت
- ها عيني عمو كول

بقه ساكت مضيق عينه هز راسه.
هيج عمو روحي
نصه راسه طلعت
اعرف بي شي
اكو شي مراضي عنه
اكو شي ضايج منه ممرتاح ممرتاح. اني اعرفه. غير حزنه على اسو اكو شي

كملت شغلي واني راسي. ميت. فكره وفكره تاليها كملت ورجعت للمكتب علمود اروح امتحن اخذ اذن
وسناء جانت كاعده

- يله كومي امتحان عدنا
- خاف ميقبل المدير اطلع عفيه
- لج ببابا احنا موظفين اهليه. ويدرون بدراستنا. يله كومي

طبيت للمكتب عمو كاعد وكباله راكان وسيدار من طبيت كال

- بت حلال بذكرها
- بالخير ان شاء الله
- ليش انتي هم تنذكرين بالشر تعاي تعاي

- لا داروح
باوعت لعمو يعاينلي بقلق ويعاين لسيدار
تقربت منهم

يله عمو داروح للجامعه وباوعت لراكان بغضب
واخذ وسناء ويايه للعلم يعني
راكان : ديله خطيه مو شايله الشركه على راسها

- هاااا بدينا انت تالي وياك
- ياب دطيري
طلعت كبل للجامعه
وكت رجعتي للبيت اتصلت بيه للومه كالت تعاي لبيتنا القديم احنا هناك يابه ردت روحي رجعت لهناك لكيت عمو انور واكف ينزل الغراض كلهن جديده

وللومه جوه
- سلام عمو كلتها وابتسمت
جاوب وياشر بعينه فوتي جوه لان العمال عيونهم صوكرت
- هله يابه

طبيت للومه جانت تطلع المواعين من الكارتونه وعسل تغسلهن وتخلي بالكاونترات الجديده

- هاي شنووو
كله كاونترات جديده وثلاجه جديده وطباخ. بجيسه. وعسل راح تحركنااااا هيييي وخري الجيس يله شغلي لج عيني ايدها اخذت عالنار. كملت مبتسمه اباوعلها عيونها بره بالطرمه على عمو انور همست مبتسمه وللومه جديده ابتسمت ونصت
كالت مبتسمه بخجل

- عابتلج
عسل جاوبت تضحك
- خطيه انشلع كلبه. ميخليها تشيل شي يخاف عليها عيني
ازل : يا الله. عرس عدنا
عسل : اي هههه اخذ موعد من عمنا السبع العصر يجيب عمامه وجاي

ازل : دبستي الرجال للومه. صدك تحجين
للومه خجلت منهم طبيت وهي تصيح
وكع بالدبس والله الله يعينه عليج وعلى طيبتج عمي خي عونه

عسل : لج اشش ليسمع
ازل : فدوه لايكلها الخجل خطيه الله يعوضها بي ياربي

عسل : جريت نفس جاوبت ان شاء الله
عسل : ازل طبت تتفحص البيت واني كلسا داز رساله وافوت للحمام اقراها

- عسوله
شفتي البيت؟
عجبج؟
انتي وين ليش متردين؟
عسلل— عسل يمعوده

رديت
- ها ها ها هياني
- وينج
- هياني ببيتنا ههه يخبل صار يحيى
- ههه الف عافيه غزالي
- ههه حلوه. هالكلمه
- انتي غزالي بس كون موشارد
- لا مااشرد لتخاف روح خل اروح للومه خطيه وحدها

- اوكفي عايني
- ها
- ياغرفه غرفتج
- شون

- غرفتج غرفتج ياهو منهم
- جوه الدرج صغيرونه كلش
- همم توقعت
- شنو توقعت جاي للبيت انت

- يله رروحي من تردين تنامين دكيلي
- اوك باي
- هلاو

عسل.....
تغيرنا هواي للومه وقربها مني مود الخلاها عمو انور بي خلتها كل شوي تحضنني

الغرفه الجبيره الها صارت
رسل وازل فد غرفه اساسا ازل كانت تنام بالهول واني خلتني بالغرفه جوه الدرج

كلشي جديد وكانما انولدنا من جديد وي ضحكه للومه وفرحتها كل كلمه ورددت رب ضاره نافعه الحمد لله

ايمانها وصلاتها وقرانها اللي ارتبطت بيها كلش كامت تركض ورانا
بنات اذن
بنات صلاه ميفيدنا تأخير صلاتنا

كملنا كلشي بيومها ورتبنا البيت
اني وازل ورسل وحتى للومه منادر ننام عليها. وسلات للهدوم نخليه بيها ماعدنا جرابي ولاكناتير
اللي جهز المطبخ والهول بس قنفات وكاونترات وطباخ وبنكات

والبيت كله كاربت فد كصه. فصال فصله عمو
بيومها العصر راح لعم ابويه بس كان بغير محافظه و تأجلت خطبه للومه لباجر

رسل ابد مو على وضعها عصبيتها ووجهه التعبان دوامها القاطعته منعرف شبيها

ورجعت للومه حاولت وياها تتقرب متقبلت اخرتها ازل طبت يمها مطلعت بعد من تصنت عليهم عرفت انه ديحجون كيفت لان صار سنين قاطعين لغه الحوار

طبينا نمنا اني وللومه
اني بغرفتي وعالمي الصغير
وهي بعالمها

كل منا فرحان بكلبه عشق يداوي جروحنا القديمه
طلعت فوني دزيتله رساله

نمت؟
راسا رد
لالا منتضرج نكول الو
اوك يله
ودكيت رد متلهف

غزالي
ههههه شجلبت بيها
اااخ انتي وين
يحجي ويرجف
شبيك بردان

لالا نايم متغطي انتي وين
اني بغرفتي
دتسوين
داصفط هدومي
ممم زين خوش كملتي

اي هاي اخر شي
يله كملت
حلو غرفتج الجوه الدرج مو
اي
هو وين اكو درج ههههه مطفيه انتي
اااي قصدي القديم من جان

هههههه اي فهمت زين فتحي الشباك
ليش
دفتحي ياعسل
اوك
فتحته

اممم اكو ورقه مطبكه صغيرونه
وين
بالتريشه شوي دوري
هاا هاي شمدريك داافتحها همس
دقيقه عسل

همم
فتحي كام
ليش
اشوف وجهج من تقرين فدوه
طاب لبيتنا؟

ههه دفتحي فتحي
فتحت لتباوع جهرتي وصخه وخلص مي السخان
همس بهدووء مطلق
كمر
هه شكرا

افتح الورقه اللي مادري شون طبببت هنا
افتحيها وفري الكام عليج
فتحتها كدام الكام مكتوب
طفي الضوه ميحتاج ضوه خدج منور

هههههه هاي شنو
اسمعي كلام ونفذي
وينك ليش مفاتح كام
فاتح بس طافي الضوه
اي اريد اشوفك شو

هاي فكيت فلاش شفتيني
اي هههه هلاو
هلاو يله نفذي
شون طبت الورقه هنا شجابها

نفذي اول يله اجاوبج
اوك
طفيت الضوه وانصدم بمنضر الحايط
يضوي بكتابه. شعريه فسفوريه

ان كان للغزل معنى فقد تجسد بحروفك ورسمك وبسمه شفاك
غزالي
انني في عشق اذوب بحلاوته رويداًرويدا

شهكت وافتر واقره.
هاي هاي شنووووو
همس بصوت ناعم

كلما تطفين الضوه تذكريني
شنو هاي ششون سويتها. جنت هنا انت
امم الأسبوع الاخير وي العماله صاحبي الكهربائي
عفيه تخبللل تجنن
مومثل حلاوتج

باوعتله دمعت عيني انت. انت ليش هيج دتسوي
تلاشت ملامحه وكعد. عدل عدل شعره هز راسه باستفهام
شبيج عسل
اني مابيه درت وجهي همس
لتسدين الكام فدوه احجيلي شبيج

ليش هيج دتسوي بيه ليش هلكد تهتم حموت من وراك كل يوم شغله جديده تخبل اكثر من مااحب واتمنى

ميل راسه يباوع بحنان همس
تستاهلين عيوني انتي
ليش بس كولي شنطيتك
كلشي لتنطين عسوله وجودج كافيني

تحبني يحيى
غمض وارتجى عالحايط ضرب راسه ورد باوعلي بابتسامه تعبانه

همس
دا اذوب عشق بكلشي بيج
ضحكتج شعرج هذا التضوجين منه وتشيلي كبه ليفوك عيونج من اكذب من تصدك من تنعس من تتفاجأ
ومن
ومن
ومن تباوعلي ااااخ. ربي دخيلك من تباوعلي
والله احبج والله
وحك حيلي الراح وحك وكفتي. وطولي اموت عليج بيش احلف بعد

هاهي بس ليش راح حيلك
غمض وهز راسه موافق معليج حجي هذا كلي قوه. كالها وقبض ايده قوي
ابتسمت مميله راسي

همس
اعشقج غزالي
هههه نصيت راسي ورديت باوعتله
بله لو طلعت مو غرفتي
سالت انور

اي وكلك هاي الها
اي
ها زين عرفت بيهم
منو عمتج وانور
اي

اي ادري كال بالخير علي شكو منها بس كون تكدر تعيش وياه
ليش شبي عمو تره حباب

امم اي عادي شكلت اني
زين هو يعيش هنا ويانا
اي كال عمتج متقبل
وانت متجي

ويين هههههه وين اجي ام لسان انور كعيدي اني شنو تكماله عدد
غير ابوك
امم وشعليها هاي بهاي

هههههه هيج فكرت
لتفكرين احسن موزين عليج تره اجي اخذ غرفتج
لاعيني ماه
فدوه لكلبج شكد صافي وين حتنامين كال ماكو اسره

اي عالمندر عادي
باجر ادزلج سريري
لاماريد ازاعلك والله

ماشي هز راسه مبتسم بقه ثواني صافن واني اباوعله واباوع للكتابه
باس طرف ايده وخلاها عالشاشه
هاي شنو
غلسي وانسي

اوك
روحي نامي غزالي نوم العافيه
بباي
الله وياج

سديته منه وافتر بالغرفه تخبل نمت وخليت صوره على اسم غزالي حتى متشوفه للوم خاف تطب

عسل...
عشت ايام حسيت روحي خلص اكتملت النقص الجان بيه انسددد
سده يحيى كل يوم اداوم اكول هسه يصير بوجهي هسه اشوفه

محاضراتي مااكتب اي شي بس انتبه وادزله صورها توصلي للباب وي حسن من يوصلني

فتره مرت لوزه احجيلها كلشي ماكانت تعلق تسكت تكلي عالولد لغززز جبير

كل ليله قبل لانام يسألني
غزالي هم يجي يوم تعوفيني
واني ارد بكل ثقه

اببد انت نصي الثاني اصلا انت ثلث ارباعي اني جنت ربع بس وانت كملتني

اكيده واذا صار شي اذا عرفتي عني شي يعني ميعجبج

مثليش باوع شغله وحده اعوفك بكل برود وبساطه انك تعوفني

مره بليل من داخ بيه كلش همس
غزالي اني مريض شون حتعيشين ويايه

فزيت من احساسي الجان محاوطني بي همساته وغزله ولهفته وهو يعاين بوجهي

شنووقصدك مريض شنو البيك
شنو علوش
سمعتك صح مسطوره بس سمعتك احجيلي

بلع ريك مرتبك هز راسه بالرفض بله صوت

احجي والله ماعوفك موتكولي شتحبين بس اشري شتريدين بس كولي موتكولي انتي بنيتي ومن روحي ليش تضم عليه

خله ايده على كصته مغمض يفركها وايده ترجف همس احد حجالج شي

جج

للحضه تخيلت يشكي من مرض السكري

راسا كلتها
بيك سكري

التفت متفاجئ
ابتسمت بيك سكري مو

خله ايده جوه خده همس
فالنفرض تعرفيني؟

لو اموت ماعوفك الا اذا بدلتتي بثانيه
غمض يهمس بتعب

بكد ماوفه انور اوفيلج بس لتصيرين سهام
بكد ماضل بيه عافيه وحيل اصونج واخلص لج
بس لتصدميني بيج
انتي.... انتي بالنسبه الي شايفه هذا المثل الشمس الصغيره تطير واخاف الزمها تعدم
مثل ذرات نبات القطن خوفي عليج كد خوفي من الشارع الاكرهه واخاف اطب بي

ياشارع
غمض وهز راسه بالرفض
احجي ياشارع
هيج متسوه

سكتت مغمضه وهو مغمض ثواني وهمس
احبج وحك لوعه. اول ليله لفراك امي

سكتت دمعت عيني
سكتنا لحد ما غفينا باوجاعنا والامنا قنعت روحي انه مصاب بالسكري من فزته وواعدت روحي اوكف وياه من كل عقلي كمت احاسبه على اكله. اخاف لا افقده

وبيوم من الايام واني بالدوام بعد يومين كان مقرر مشيه للومه لوزه يمي واكفه داحاجيها والعب بطرف. كصيبتي جنت احجيلها عنه وعن امتحاني ومحاضراتي اللي يطبعها ويدزها دااتباها بي كدامها
فات يزن ولد ارعن من بدايه السنه لاحضت تصرفاته الرعنه

بنص الهوسه مال طلعه الطلاب
بحركه. تلعب النفس ولا كانه طالب جامعه ابن شوارع قليله يحقه
تحرش بيه فزيت وعطت
اول مره شخص غريب يلمسني بل حتى قريب
ابشع احساس نسيت اني بالكليه شلت اللفكس ضربته بي

خشب والملازم والكتب بي تطشرت غراضي واصيح
كلب حقير نكس

لوزه جرتني وخلتني وراها صيحت شسوالج
انتبهت

الطلاب كلها صافنه علينا وهو مسوي روحه متفاجئ نتر
مخبله هاي منو يمج شبيييج انرعصتي
لوزه تباوعلي بغضب ارجف ومخنزره عليه كل قوتي لوزه همست

احجي شسوالج امرده جوه قندرتي هسه
تتتتحرش بيه
مكملت حجايتي والتفتت لوزه همست

ملكانا بالعماده
وجرتني وراها

واني مثل المدوهنه نصيت راسي ومشيت وراها تمشي وتغلط عليه
طبت للعماده محترك دمها

دكت الباب وطبت حتى منتظرت يكولون تفضل
راسا على رئيس القسم مالتنا كالت

- استااااذ احنا جاييين ندرسسس هنا وانت رئيس قسمنا واحنا يتامى. وانت ابونا هنا صح لولا

وكف الدكتور مال مفزوع
- شبيج بابا منو وياج شصاير

- دكتور اني وصديقتي واكفين بالسنتر يفوت واحد قليل تربيه يتحرش بينا واحنا بنص الجاااااامعه

- على كيفج بنتي تعاي كعدي تعاي
- مااكعد تعاي عسل احجي

ارتعش رعش ساعه اندم ساعه اكول هذا هو يطبه طوب ساعه اكول شون حطلع والطلاب تباوعلي

الدكتور طلع بطل مي من الثلاجه همس تفضلو هاج شربي شوي. ارتاحي احجيلي شصاير منو متحرش طيني اسمه

نترت لوزه
- يزن عناد اذا مجبتولنا حقنا اني ماداوم بعد استاذ
نترر
- وين وووين صارت الحادثه تعاي بابا لتخافين احجي

بلعت ريك
- ببالسنتر استاذ
بجيت ارجف واحجي
ماعدي ضهر شسويت بروحي اسكت يتماده شسوي جاوبته

- استاذ فدوه الطلاب صرت فرجه
- والله لا ارقن قيده هالقليل الادب

طلع راسا ولوزه وراه راح للكامرات رجع قبل شوي الصار وشافه باوع للشرطي المسؤول نتر بي

سحبلي عالمقطع ودزه على فايبري باوعلنا
روحو بابا للقسم هسه اجي خجلت اطلع توني طلعت فتحت خطي الجنت قافلته لان محاضره راسا دك يحيى

رديت محاوله مابين ضعفي.
الو
انتتتتي ووووين

اني بال بالجامعه
اطلعي اططططلعي حسن بالباب اليوم. لااخلي سنه يعلج بسنونه الساققققط اليوم احرك عشيرته

بلعت ريكي همست
- شمدريك
- اطططططلعي ويييي. حسسسسسن فضييييها

- اوك
سالفه تافهه متسوه صارت جبيره خفت حيل باوعت للوزه

- حبابه لوزه اطلعي ويايه حسن بالباب
- امشي
مشت كدامي بشموخ رجل واني وراها منصيه صار بوجهي يزن

انفه ينزف واصدقاءه لازمي ويصيح
ماعرفه اجه تحرش وضربني والله محجيت شي وياه هو ضربني

واصدقاءه يهمسون
معقوله خاف اخو عسل عمران
سرعت مشيتي صيح ورايه

- اذا ماطلع ابوج من كبره اخلي يفزعلج مو ابن ابويه بسيطه. عسللل بسيططه
ورجعتله لوزه

- تهددددد خضرتك تهددددد تشهدون ياطلاب الجامعه ديهددددد

سكت يباوعلها بغضب
صيحت

- حضر روحك اليوم اخوتي تسعتهم ببيتكم اريد اشوف منو يكدر يهدددني امشيييي لج

طلعت ركض وصعدت بالسياره حسن كبل طلع عفت لوزه مادري وين تتعارك رجعت للعماده مادري مادري
كبرت السالفه هواي متوقعت هيج خفت تندمت رفعت راسي ابجي وحسن حسه مطلع من رفعت راسي شفته مزنبر دك تلفونه رد

هااااا اي اي اي اي فهمت دبس لتصيح
كسر غضبه
كافي يابه هاي ويايه كلشي مبيها هدي خالي هذي
لك كسرروا الولد اي والله شبيك
مابيها شي والله عسل

ها رفعت راسي وابجي
نهه المكالمه

- منيلج هاي الوكحه
- منو

احجي واشهك
- هاي الرزلته تهدده
- لوزه صديقتي

- بس والله تهدد خرسته
- تسع اخوه عدها و٣ منهم كصاصيب

- ههههه الله يحفضهم لتضوجين اخذنا حقج
- شون حداوم بعد
- مالج دخل
- اخجل

- لا يابه شالقضيه هو اليخجل
دز على يزن

من رجعت مكدرت ارد على اتصالات يحيى
خفت ليكول شسوالج ذاك الوكت لازم اكذب محد عرف بالسالفه لاللومه ولاازل

للضهر حدما اتصلت لوزه على للومه
رديت اني كالت

- هاشونج
- زينه سولفيلي شصار
- شصار الدكتور دز على يزن وترقن قيده. وتعارك بالعمادة ويم رئيس القسم وخبص الدنيا تالي السكيورتي طلعوا. بره

- ياا
- اي والله
- شكال عليه

- خيولي معليج بي
- الله عليج شكال
- جرت نفس همست واحد ساقط هذا

سكتت وداخلي خايف من الجاي ماعرف ليش. ممرتاحه ابد ممرتاحه توه السنه ثلث شهور بعدكم يوم امتحانات النصفيه

واني بحيرتي وخوفي يحيى يددددك ويرسل رسايل واني مارد
بيومها صارت كعدة للومه
.
.
يتبع
.
.
نرجع كما كان سابقاً يومين نشر يوم استراحة واحاول اكتب بما يسمحلي من وقت فراغي

تحياتي #مريم_السعدي