رواية انا انثى ولكن الفصل الثالث عشر 13 - بقلم lxvcr3

** البارت الثاني عشر **
**
**
**
**
**
**
**
**
**
**
**
**
**
**
**
عادل مد الملف اللي بيده .. انا جاي اتوظف ..

الجازي بصدمه .. تتوظف ؟؟..

عادل . ايه ما اتوقع هذا الشي ممنوع ..

الجازي كانت راح تتكلم بس مالك سبقها ..

مالك اخذ الملف من عادل وهو يفتحه .. طيب كان بامكانك انك عاطيته السكرتير ليه طلبت مقابله المدير شخصيا .. ..

في هالوقت رن تلفون المكتب ورفعه مالك .. نعم .. هلا طال عمرك .. ايه عندي .. ان شاء الله الحين جاي .. وقفل التلفون ولف على عادل .. المدير وصل انا راح اخذ ملفك له انت انتظرني هنا ..

عادل وهو يجلس على الكرسي اللي مقابل لكرسي الجازي .. ان شاء الله راح انتظرك ..

مالك طلع من المكتب ..

الجازي بحقد .. ممكن اعرف ليه جاي وانت عارف ومتاكد ان جدي ماراح يقبل بك ..

عادل بابتسامه خبث .. بالضبط متاكد مثل ما انا متاكد انك انتي اللي ورا اختفاء صورك من عندي..

الجازي بثقه .. وايش هو دليلك ..

عادل .. راح يجي يوم ويكون عندي الدليل .. ووقف ..بس ابيك تحطين ببالك اني مستحيل اتركك بحالك وترا مو عادل بن فهد اللي ينلعب عليه .. اوك .. ولف عنها بيتجه للباب .. وعلى فكره انا جيتي هنا كلها عشان .. ولف لها .. اشوف الحلوه وهي مقهوره ومعصبه .. ورجع لف للباب .. باي ياحلو .. وطلع من المكتب بعد ما ترك وراه بركان قابل للانفجار ..

الجازي بعد ما طلع ضربت بيدها بقوه على المكتب .. جد خسيس ..

في هالحظه دخل مالك للمكتب .. واستغرب لما ما شاف عادل .. لف على الجازي اللي كان باين عليها العصبيه .. وينه ..

الجازي من غير ما تناظره .. طلع ..

مالك .. انسه الجازي فيك شي ..

الجازي اخذت نفس عميق وزفرته ولفت على مالك .. لا مافيني شي .. ايش قال جدي ..

مالك .. انا ابي اعرف مين يكون هذا لان العم عبد العزيز رفضه من اول ما قلت اسمه حتى ما شاف ملفه ..

الجازي باستغراب . انت ما عرفته ..

مالك .. لا .. مين يكون ؟؟..

الجازي .. انت تعرف ابو فهد ال ..

مالك .. ايه هذا واحد من اكبر منافسينا .. لحظه لحظه هذا اللي اسمه عادل من نفس العايله .. ورفع الملف اللي بيده وقرا الأسم مره ثانيه .. هذا حفيده .. ورفع عيونه للجازي .. غريبه ليه جاي لعندنا هو ما يعرف اننا من منافسين شركه جده ؟؟..

الجازي .. الا اكيد يعرف وجيته لهنا كانت لسبب ثاني .. ماعليك لا تشيل هم اهم شي انه راح .. والحين خلنا نكمل شغل ..

مالك .. اوك يلا ..

ورجعو يكملون شغلهم ..

.................................................. .............

الساعه 1 الظهر ..

بشركه ابو محمد ..

كان وقت الغدا ..

الجازي حطت الملف على الطاوله .. وخلصنا من اخر ملف يخص الأساسيات ..

مالك .. ماشاء الله عليك ما توقعتك ذكيه لهذي الدرجه قدرتي تتعلمين الأساسيات بسرعه ..

الجازي ابتسمت .. الحمد الله هذي نعمه من ربي .. والحين دور ايش ..

مالك .. راح نعمل لك اختبار وهو عباره عن تدريب عملي في كل اسبوع راح تكونين بقسم والقسم اللي تبرعين فيه اكثر راح نوظفك فيه ..

الجازي .. حلو .. وهذا متى راح ابداه ..

مالك .. من بكرا ان شاء الله ..

الجازي .. ان شاء الله .. طيب الحين باقي وقت طويل على انتهاء الدوام ايش راح اسوي فيه ..

مالك .. اذا حابه ترجعين للبيت.. عادي مافيه مشكله ..

الجازي .. لا راح اطفش .. مافيه شي اضافي تعطيني اقراه ..

مالك ابتسم .. لا كذا كثير .. انتي متاكده انك بنت عربيه ..

الجازي ردت له الأبتسامه باستغراب .. ايه وليه ؟؟..

مالك .. لاني اول مره اشوف بنت وعربيه كمان تحب الشغل ..

الجازي .. اما اول مره .. غريبه .. يمكن لاي كنت عايشه كل عمري بامريكا واخذت اطباعهم ..

مالك .. بس هذا انا عشت بامريكا ست سنوات بس ما تتطبعت باطباعهم لهذي الدرجه ..

الجازي ابتسمت .. بس انا من لما كان عمري سنه وانا هناك توي هذي السنه رجعت للسعوديه .. شكلك ما تعرف عن حياه جدي الخاصه شي ..

مالك ابتسم .. ماشاء الله .. لا بصراحه العم عبدالعزيز دومه وهو يفصل الشغل عن الخصوصيات .. محد يعرف عن حياته الخاصه شي بهذي الشركه حتى الموظفين انفسهم ما يعرفون عن بعض شي بحياتهم الخاصه ..

الجازي .. حلو لان الشغل شغل ..

مالك .. صح .. ووقف .. طيب وش رايك اعطيك ملف حسابات الشركه لهذي السنه ..

الجازي .. اوك .. وفي هالوقت رن جوالها .. طلعته من الشنطه وشافت المتصل البراء.. رفعت راسها لمالك .. عن اذنك ..مالك اشر لها بمعنى خذي راحتك . ردت على الجوال ..مرحبا ..

البراء.. مرحبتين .. كيفك ؟؟..

الجازي .. بخير ولله الحمد .. انت كيفك ؟؟.

البراء.. بخير ..ليكون ازعجتك او شي ..

الجازي .. لا عادي .. بس وش فيك ؟؟..

البراء استغرب من سؤالها .. مافيني شي .. ليه ؟؟..

الجازي تناظر الملف اللي حطه مالك قدامها .. لا بس على بالي عندك شي عشان كذا اتصلت .. طيب انا لما ارجع البيت اكلمك الحين انا مشغوله شوي اوك ..

البراء بنبره حزن حاول يخفيها .. اوك .. سلام .

الجازي .. سلام .. قفلت منه ورجعت الجوال بالشنطه واخذت الملف .. هذا حسابات هذي السنه بس ..

مالك وهو يجلس على مكتبه . ايه مثل ما عرفتي ان حنا كل سنه نحصي الحسابات اللي صارت طول السنه عشان نشوف وين وصلنا ونقارنها بالسنوات اللي راحت ..

الجازي .. ايه صح ... وفتحت الملف وبدت تتصفحه ..

اندق الباب .. ولفو اثنينهم لجهته وهو كان مفتوح ..

الجازي بابتسامه .. هلا جدي حياك ..

ابو محمد دخل .. الله يحييك ها كيف الشغل ..

مالك وقف .. الحمد الله كل شي ماشي تمام .. تفضل طال عمرك ..

ابو محمد .. لا انا مو جاي اتفضل بس استغربت لما شفت كل الموظفين طالعين للغدا الا انتو ليه ما طلعتو ..

مالك يناظر الساعه .. يوه ما انتبهت للوقت ..

الجازي .. حتى انا ما انتبهت على الوقت ..

ابو محمد .. باين انك مبسوطه بالتعليم ..

مالك .. ماشاء الله على حفيدتك خلصت كل اساسيات الشركه بيومين بس ..

ابو محمد بفخر .. ايه هذي حفيدتي ذكيه ماشاء الله عليها ..

الجازي .. طالعه عليك يبه ..

ابو محمد .. اكيد .. طيب الحين يلا تعالو تغدو معي بعدها ارجعو كملو شغل ..

مالك والجازي .. طيب ..وطلعو كلهم من المكتب واتجهو للغرفه الطعام الخاصه بابو محمد .. وجلسو يتغدون ..

ابو محمد .. يبه الجازي توي مجتمع مع جدانك واتفقنا اننا نطلع للشرقيه لشاليهنا اللي هناك باخر الأسبوع ..

الجازي .. اوه وناسه من زمان عن البحر .. وكلنا بنروح صح ..

ابو محمد .. ايه ان شاء الله كلنا بنروح .. ولف على مالك .. حتى انت ياولدي معزوم عندنا ..

مالك .. تسلم يا عمي بس وش دخلني بينكم انتو كلكم اهل ..

ابو محمد .. وليه انت تعتبر نفسك غريب يعني .. تراك مثل ولدي يعني من الأهل ..

مالك .. لي الشرف والله انك تكون ابوي بس احسها صعبه ..

ابو محمد .. لا صعبه ولا شي اخواني يعرفونك واكيد ماراح يقولون شي الا بالعكس راح يرحبون فيك .. وتقدر تجيب اهلك معك لو راح تحس بالغربه ..

مالك .. بس يا عمي ..

ابو محمد .. ها راح تردني يا مالك ..

مالك ابتسم .. لا ما اقدر اردك طبعا .. خلاص راح اقول للاهل وارد لك خبر ..

ابو محمد رد له الأبتسامه .. على خير ان شاء الله ..

وبعد ما خلصو غدا ..

الجازي .. يلا يبه عن اذنك بروح اكمل شغلي ..

ابو محمد .. اذنكم معكم ..

طلعو مالك والجازي من عند ابو محمد وراحو للمكتب وكملو شغلهم ..

.................................................. .....

بعد يومين ..

يوم الخميس ..

الساعه 2 الظهر ..

قصر ابو محمد ..

كانت الجازي توها نازله للصاله ومعها شنطتها الليحطت فيها كم لبس للشاليه ..شافت جدها وجدتها ينتظرونها .. يلا خلصت ..

ابو محمد .. الحمد الله على السلامه لك ساعه تقولين بتنزلين ..

الجازي .. وش اسوي كل شوي متذكره شي .. يلا الحين صدق جاهزه ..

ام محمد .. اجل يلا توكلنا على الله ..

وطلعو من القصر وركبو مع السواق واتجهو للشرقيه ..

وبعد ساعتين وصلو للشاليه وكانو الكل موجودين هم اخر الواصلين ..

نزلو ام محمد والجازي واتجهو لجهه شاليه الحريم اما ابو محمد راح للقسم الرجال ..

** وقفه **

راح اوصف لكم الشاليه عشان تقدرون تعيشون الأحداث اللي راح تصير فيه .

الشاليه كبير جدا وعند البحر مباشره ما يبعد عن البحر الا مسافه بسيطه .. ينقسم الى قسمين .. قسم رجال وقسم حريم ..

اول شي لما ندخل من بوابه الشاليه الكبيره راح تقابلنا ساحه خضراء كبيره يتوسطها ممر للسيارات وهذا الممر يمتد الى الفلل وكل جزء في الساحه الخضراء موجود نافوره متوسطه الحجم تزينها بعض الأنوار الجميله والورود الملتفه حولها .. ويوجد جزء فيه مراجيح والعاب للاطفال .. وبجانب شاليه الحريم فيه مسبح كبير مغطى بالجدران الزجاجيه .. وموجود نفسه بجانب شاليه الرجال بس مفتوح .. نجي لداخل الفله ... تتكون الفله من دورين الدور الأول فيه صاله كبيره ومجلس ومطبخ وغرفه للاكل ام الدور الثاني يتكون من غرف نوم عدده 20 غرفه .. طبعا الفلتين نفس التصميم بالضبط ..ومن ورا الشاليه يجي البحر وفيه باب في كل فله يطلع لجهه البحر ..

.. اتمنى فهمتو الوصف ..

** نكمل **

بفله الحريم ..

دخلو ام محمد والجازي وشافو كل الحريم والبنات متجمعات بالصاله .. السلام عليكم ..

الكل .. وعليكم السلام ..

ام محمد .. واخيرا جينا للشاليه .. ماشاء الله تغير كثير عن اخر مره جيناه ..

الجده ام سعد .. ايه عاد انتي لك 20 سنه ما جيتيه .. حياكم حياكم ..

الجازي بعد ما سلمت على الكل .. يمه وين احط شنطتي ..

ريوف وقفت .. تعالي ادليك على غرفنا ..

البنات كلهم وقفو معها ..

ريوف تناظرهم .. خير وقفتو .

ريماس .. نبي نوريها غرفنا عشان تعرف ايش تختار ..

ريوف .. نشبه اعوذ بالله .. يلا تعالو ..

وطلعو كل البنات للدور الثاني ..

ريوف .. شوفي يالجازي حنا خممسه وانتي السادسه .. المفروض كل ثلاث بغرفه .. الحين صارو رهف ورغد وريماس بغرفه وانا وديم بغرفه تبين تجين معنا ولا تبادلين مع وحده من بنات الغرفه الثانيه ..

الجازي .. اممم ايش الغرفه الأكثر فله ..

رهف .. اكيد غرفتنا ..

الجازي تناظرهم .. الام الحنونه والبيبي فيس والعصبيه .. وين الفله بالموضوع ..

ريوف وديم .. هههههههههههههههههههههههه ..

صح نسيت اقول لكم ان ديم خلاص تاقلمت على الموضوع وعرفت ان الاحساس اللي كانت تحسه اتجاه سلطان كان اعجاب وبس واعترفت بهالشي للجازي وهم الحين صارو صديقات ..

رهف .. مالت .. وانتي للحين ما نسيتي ..

رغد .. من جد .. المفروض حتى انتي الشباب يطلعون لك لقب خلاص صرتي منا ..

ريماس .. من جد خلاص راح اقول لفيصل ..

الجازي .. لا تكفون انا اعرفهم ماورا القابهم خير ..

البنات .. هههههههههههههههههههه ..

ريوف .. ها الجازي وش قررتي ..

الجازي لفت على ريوف وديم .. لحظه انا ابي اعرف الحين انتو كيف صرتو بغرفه وحده .. عربجيه ودلوعه ما يركب ..

ديم لفت على ريوف .. كانها لفت علينا ..

ريوف .. تلاحظين .. ولفت على الجازي .. ها يا مس الجازي باين مو عاجبك حد ..

الجازي .. هههههههههههه .. ياختي امزح معكم وش فيكم .. خلاص راح اكون مع ريوف وديم بالغرفه ..

ريوف .. اوك واخيرا .. يلا تعالي ..

وراحو كل البنات لغرفه ريوف وديم والجازي ..

الجازي دخلت واشرو لها على السرير اللي راح تنام فيه .. رمت نفسها عليه .. تصدقون اول مره اسافر بالسياره ..

ريوف تجلس على سريرها .. ياحليلك والله .. المهم وش رايك نفرجك على الشاليه ..

الجازي .. اممم كم الساعه الحين .. ورفعت يدها وشافتها الساعه 4 .. اوك يلا الحين خفت الشمس ..

رهف .. بس لا تنسون تلبسون عباياتكم عشان لو صادفنا الشباب ولا شي ..

البنات .. اوك ..

وقامو كلهم لبسو عباياتهم ونزلو لتحت ..

ام محمد .. على وين يابنات ..

رهف .. راح نفرج الجازي على الشاليه ..

ام محمد .. اوك وانتبهو لانفسكم ..

البنات .. ان شاء الله ..

وتلثمو كلهم ما عدا الجازي وطلعو لبرا من جهه المسبح ..

الجازي .. واااو المسبح خطير ..

ريماس .. وش رايكم بالليل نسبح فيه ..

رغد .. اذا كان الجو مو بارد نسبح ..

الجازي تناظر بعيد .. كان هناك فيه مراجيح ..

رهف .. ايه تبين تروحين هناك ..

الجازي .. ايه من زمان مالعبت مراجيح ..

ديم .. بس ترا راح نطلع للرجال ..

ريماس .. مو مشكله مادامنا لابسين عباياتنا ..

ريوف .. اجل يلا مشينا ..

وطلعو من قسم الحريم وراحو للمراجيح وكل وحده جلست على مرجيحه وبدو يلعبون ..

الجازي .. ماشاء الله ما توقعته كبير لهذي الدرجه ..

رغد .. انتي للحين ما شفتي جهه البحر هناك المكان اجمل ..

ريماس .. من جد وبالليل يكون احلى ..

الجازي .. حمستوني اشوفه .. خلاص بالليل نروح ..

في هالوقت دخلت سياره للقصر ..

ريوف .. بنات سياره مين هذي ..

ديم .. انا اول مره اشوفها ..

رهف .. حتى انا ..

ريماس .. واضح انه شخص غريب ..

الجازي .. خلونا نصبر ونشوف مين ..

وقفت السياره بالباركنق اللي كان بالجهه الثاني المقابله للمراجيح .. ونزل منها شاب ..

الجازي بسرعه .. اوه هذا مالك ..

البنات كلهم لفو عليها ..

ريماس .. مالك مين ؟؟..

رهف .. اخ مزيون ماشاء الله .. من وين تعرفينه جازيوه ..

الجازي .. هذا يشتغل مع جدي بالشركه .. توقعو ايش منصبه ..

ريوف .. اكيد السكرتير او مدير الحسابات بالغالب هم اللي يكونون قريبين من المدير ..

الجازي .. لا هذا هو نائب المدير ..

رغد .. احلفي .. كيف ناءب وهو باين انه صغير ..

ديم .. الا هو كم عمره ..

الجازي .. مدري بس اتوقع في اواخر العشرين .. اما سالفه كيف صار نائب .. جدي تعرف عليه في امريكا .... وقالت لهم السالفه ..

رهف .. ماشاء الله عليه والله يحق له عمي عبد العزيز يوظفه كانائب له ..

الجازي .. وغير كذا معلم محترف هو اللي يعلمني امور الشركه الحين ..

ريوف .. ياحظك اذا تشوفين هالوسيم كل يوم ..

الجازي ابتسمت ..

قاطع سوالفهم صوت بسام اللي كان متجه لهم . مرحبا يا بنات العم ..

لفو البنات جهته وشافو الشباب وراه ..

طبعا الشباب اول مره يتجمعون مع البنات من بعد ما صارت الجازي بنت ..

الجازي ابتسمت ونزلت راسها ..

ريوف .. ترا ما اشتقنا لكم ..

بسام .. على اساس حنا اللي اشتقنا بس جينا نسلم والسلام لله ..

مشاري .. وبالمره نتعرف على بنت عمنا الجديده وناظر الجازي وابتسم ..

البنات كلهم لفو على الجازي ينتظرون رده فعلها ..

الجازي بنفسها .. خلاص يا الجازي الى متى راح تتحسسين من الموضوع هذا واقع ولازم تتقبلينه مثل ما تقبلتي انك بنت ..رفعت راسها وابتسمت بعد ما اخذت نفس .. اهلين .. ونزلت من على المرجيحه ..احم اعرفكم بنفسي انا الجازي بنت محمد بن عبدالعزيز ال ..ابلغ من العمر 20 سنه الا شهر اتدرب حاليا بشركه جدي عبدالعزيز وللحين مدري ايش راح تكون وظيفتي ..

الشباب بوقت واحد صفقوو ..

البنات لفو عليهم وضحكو ..

مشاري .. والنعم .. كفيتي ووفيتي مابقى شي ما قلتيه ..

الجازي .. ايه مو انتو جايين تتعرفون علي لازم اقول كل شي ..

بسام .. لا تعرفين دورك ماشاء الله .. وطبعا تعرفينا ما يحتاج نعرف بانفسنا ..

الجازي .. اكيد ..

فيصل .. ممكن استفسار انسه الجازي ..

الجازي رجعت تجلس على المرجيحه .. تفضل استاذ فيصل ..

الشباب والبنات يناظرونهم باستغراب ..

فيصل .. ليه تتدربين بالشركه بدل من انك تدرسين بالجامعه ..

الجازي .. سؤال وجيه .. لاني ابي اساعد جدي ..

بسام .. هيه انت معها ليكون مفكرين نفسكم في مؤتمر او لقائ صحفي ..

الجازي وفيصل يناظرون بعض ..

الجازي .. هو بدا وانا كملت معه .

فيصل .. والله طريقه تعيفك بنفسك حسستني اننا بلقاء صحفي ..

بسام .. لا تهوشو احسن .. الزبده .. ولف على الجازي .. مو انتي كان ودك علم نفس كيف غيرتي رايك ..

الجازي .. اممم شفت نفسي راح ابدع بالاداره اكثر .. وبعدين ليه ماسكينها تحقيق معي خلاص ..

مشاري .. من جد من جيتو وانتو مستلمينها اسءله ..

ريوف .. الا وين المزيون عنكم ..

الشباب يناظرون بعض باستغراب ..

الجازي ابتسمت .. ريوف قصدها مالك ..

مشعل .. وانتي ايش عرفك فيه هاه ..

الجازي .. طبعي راح اعرفه مادامه هو معلمي ..

بسام .. احلفي ..

الجازي .. ايه والله .. ليه ..

عزوز .. وكيف عمي سامح لك تتعلمين عند شاب مثل مالك ..

الجازي باستغراب .. ليه وش فيه ..

البراء كان طول الوقت ساكت ويناظر الجازي بس .. ويفكر ليه هي متغيره عليه طول الفتره اللي راحت من اخر مره كلمها بالشركه صارت مكالماتهم قليله وصارت ما تفضى له

فيصل .. قصدهم انتي بنت بعمر الزهور وهو شاب وسيم وكمان بعمر الزهور كيف تكونون مع بعض ..

الجازي اللي للحين مو فاهمه لهم .. طيب ووين المشكله ترا حنا نشتغل ..

مشاري .. اوك تشتغلون بس تبين تقنعيني ان كل وقتكم شغل ..

الجازي ببرائه .. لا احيانا ناخذ وقت استراحه ونجلس نسولف ..

بسام لا انتي سالفتك طويله .. اجلسو شباب ..

جلسو الشباب على العشب مقابل البنات اللي جالسين على المراجيح ..

بسام .. وايش تسولفون عنه في وقت الأستراحه ..

الجازي .. يوه مو منجدكم انتو ليه التحقيق .. عادي نسولف عن اي شي بالحياه مافيه شي معين ..

فيصل .. ما توقعت ان عمي متفتح لهذي الدرجه ..

الجازي .. هيه انتو لا تحسسوني اني جالسه اسوي شي غلط ..

مشاري .. جلستك لحالك مع شاب وبمكان مغلق تتوقعين انها شي صح ..

الجازي .. لحظه كان المساله انقلبت جد ..

مشعل .. جاوبي على سؤال مشاري ..

الجازي .. اول شي انا اجلس معه للشغل وبعدين طول ما حنا جالسين بالمكتب الباب يكون مفتوح مهما كان انا اعرف العادات والتقاليد .. وحتى السوالف اللي تكون بينا في وقت الأستراحه مثل ما قلت لكم سوالف عاديه جدا اي حد يسوالف فيها ..

البراء كان منصت للموضوع كويس كان يهمه يعرف كل هذي الأشياء وماكان يقدر يسال الجازي عنها ..

عزوز .. طيب والى متى راح يدربك ..

الجازي .. اتفا جدي معه شهرين بس انا اتوقع راح نخلص بشهر ..

بسام ... اوما شهرين .. شكل عمي مره واثق فيه ..

الجازي .. وليه انتو ماخذين عنه فكره شينه لهذي الدرجه .. انتو جلستو معه عرفتو شخصيته وكيف يفكر ؟؟..

الشباب يناظرون بعض ..

الجازي .. لا .. صح .. اجل كيف تحكمون عليه كذا ..

مشاري .. حنا صحيح ما قد جلسنا معه واليوم اول مره نشوفه كنا دايم نسمعه عنه من عمي عبد العزيز بس ما ارتحنا له ..

الجازي .. لا مو ما ارتحتو له انتو بس غيرانين منه ..

الشباب بوقت واحد .. اييش ..

الجازي .. هذي الحقيقه .. لان مابينكم وبينه الا كم سنه وشوفوه هو وين وصل وانتو وين ..

الشباب سكتو ..

الجازي .. اشوفكم سكتو .. ادري ان هو اللي سابق عمره واشتغل على نفسه من بدري وانتو ماشين صح مثل اي حد بعمركم بس مو صح الفكره اللي اخذتوها عنه يعني بمجرد انكم تحسدونه على اللي هو فيه هذا الغلط ..

مشعل ابتسم .. ماتغيرتي نفس تفكير وكلام سلطان اللي عرفناه ..دايم يقنعنا ويفحمنا ..

عزوز ابتسم .. ودايم واثق من كلامه ويقول لنا اذا غلطنا بس بطريقه لطيفه ..

مشاري ابتسم .. ودايم يوضح لنا كل تصرفاته اللي نتوقعها غلط بشكل مقنع ..

فيصل ابتسم .. ودايم ينهي كلامه بحكمه او فايده تنغرس بعقولنا بسبب اسلوبه المميز ..

بسام ابتسم .. سلطان راح عنا بالأسم والشكل بس الأطباع والشخصيه هو معنا ..

الجازي ابتسمت .. مدري اذا ينفع اقول ان كلامكم هذا يفرحني ويساعدني اكثر اني اتقبل حقيقه كوني بنت او اني احزن لانكم جالسين تذكروني ايام سلطان ..

بسام .. لا لا تحزنين لان سلطان ما عودنا اننا نشوف حزنه او نحس فيه واكيد الجازي مثله ..

الجازي .. اممم طيب اقدر اقول شكرا ..

مشاري .. اكيد ..

ريوف .. اقول ما كانكم سحبتو علينا ..

رهف .. ريوف شفتي المشهد اللي من شوي اتوقع انه كان يتكرر يوميا لما كانت الجازي سلطان ..

ريماس .. من جد شوفي قد ايش منسجمين ..

الجازي .. بنات ياحلوات غيرو الموضوع ممكن ..

ريوف .. على ذا الخشم ..

بسام توه بيتكلم بس قاطعه صوت .. السلام ..

كلهم لفو جهه الصوت . ولما شافوه .. وعليكم السلام ..

الجازي ابتسمت .. حياك استاذ مالك ..

مالك ابتسم لها .. حنا مو في الشركه الحين يعني تقدرين تناديني مالك بس ..

الجازي .. طيب.. تعرفت على عيال عماني ..

مالك .. ايه عرفني عليهم العم عبد العزيز ..

الجازي .. حلو .. ادري انهم ما يستحون تركوك مع الشياب وجاو لهنا عادي امسحها بوجهي ..

مالك .. ههههههههههههههههههه .. لا وش دعوه .. اصلا كنا نتكلم بالشغل وشكلهم ما يحبون هالمواضيع عشان كذا طلعو .. وعذرا لو تطفلت عليكم بس العم عبدالعزيز قال لي اناديكم لان المغرب اذن عشان نصلي ..

الشباب وقفو ..

الجازي .. اوك اجل نلتقي بوقت اخر ..

الشباب .. اوك .. وراحو عنهم ..

ريماس .. الجازي انتي وناسه ..

الجازي لفت عليها .. يعني كيف ..

ريماس .. احسك تفلينها مع الشباب عادي ..

الجازي .. طيب حتى انتو ..

ريوف .. لا قصدها لما جا مالك انتي الوحيده اللي تكلمتي ..

الجازي ابتسمت .. يمكن لاني تعودت عليه بالشغل .. المهم يلا خلونا ندخل نصلي ..

البنات .. يلا ..
ودخلو البنات للشاليه ..
..................................

بعد ساعه ..
في قسم الرجال ..

كانو الشباب جالسين عند المسبح ومعهم مالك .. بدو يغيرون نظرتهم له من بعد كلام الجازي ..

بسام .. اقول شباب تذكرون المقلب اللي كنا راح نسويه بالبنات واجلناه ..

مشاري .. تقصد مقلب الليمون ..

بسام .. بالضبط .. وش رايكم ننفذه الحين ..

البراء .. انا مو معكم مالي خلق ..

مشعل لف عليه .. جد البراء ملاحظك من اليوم مالك خلق سوالف واحسك مغصوب على الجيه وش فيك ..

البراؤ اللي كان شاغل نفسه بجواله ولا يناظر حد .. ما فيني شي بس شوي تعبان ..

فيصل .. ومن ايش تعبان .. رجلك تعورك ..

البراء .. لا بس مصدع شوي ..

عزوز .. طيب روح ارتاح بغرفتك احسن من الأزعاج والدوشه اللي هنا ..

البراء .. لو رحت الغرفه راح انام وانا مابي انام ..

مالك .. اجل تحتاج مساج عشان يخف الصداع ..شف لك حد شاطر بالتدليك وخله يسوي لك مساج ..

البراء هنا على طول تذكر سلطان وتذكر انه كان دايم يسوي له مساج لما يصدع راسه .. رفع عيونه لمالك وهو يحس بالقهر منه بس ما يدري ليه .. شكرا على النصيحه بس انا ما يفيد معي مساج .. ورجع يناظر الجوال ..

مالك استغرب نبره البراء معه بالبدايه بعدها طنش ..

بسام .. براحتك البراء .. طيب عيال كلكم معي ..

مشاري .. اكيد .. ولف على مالك .. انت معنا ..

مالك .. لا وش معكم انا مالي بالمقالب والحوسه خلوني متفرج بس ..

بسام .. بكيفك .. يلا شباب قومو نجهز للمقلب ..
........................................

بقسم الحريم ..

البنات كانو متجمعات بوحده من الغرف ..

الجازي اللي كانت منسدحه على السرير .. فيني النوووووووووووووم ..

رهف .. وش نومه انتي هالوقت ترا لسا ما بدت السهره ..

الجازي لفت عليها .. وش سهرته بعد ..

ريوف .. الله يسلمك حنا كل مره نتجمع فيها بالشاليه لزم اخر الليل لما ينامون الشياب نتجمع حنا والشباب عند البحر ونلعب او نسولف ..

الجازي .. احس بيكون وناسه بس وش يطير هالنوم اللي فيني ..

ريماس .. ما يبي لها قهوه ..

الجازي ضبطت جلستها .. اجل وش رايكم ننزل لتحت ونسوي لنا قهو امريكيه لاني ما احب القهوه العربيه ..

رغد .. يلا سرينا ..

نزلو البنات لتحت ودخلو المطبخ وبدو يسووون القهوهه .. او بالاصح الجازي هي اللي تسويها والباقي يتفرجون عليها ..

الجازي .. خير ان شاء الله انتي معها وش فيكم جالسين تناظروني كذا ما تقومون تساعدون ..

ديم .. ترا كلها قهوه بتخترعين الذره انتي ما يحتاج نساعدك ..

الجازي .. وحضرتكم ليه نازلين معي اجل مادامكم راح تتفرجون بس ..

ريوف .. عشان نسليك ..

الجازي .. شكرا ما احتاج تسليتكم .. يلا اطلعو من المطبخ ..

ريماس .. من شوي طردتي الخدم والحين بتطردينا ..

الجازي .. انا طردت الخدم عشان ناخذ راحتنا وحنا نشتغل بس انتو ما وراكم شغل ..

رهف وقفت .. وذي بس تهزء انا اطلع ازين لي ..

الجازي .. ويلا انتو وراها اشوف ..

ريوف .. حنا الغلطانين اللي فكرنا نسليك .. وطلعت ووراها باقي البنات ماعدا ديم ..

الجازي تناظرها .. وش تنتظرين انتي بعد ..

ديم .. لا قلت يعني تحتاجين مساعده ولا شي ..

الجازي .. لا شكرا .. يلا وراهم اشوف ..

ديم طلعت وهي تضحك على شكل الجازي اللي باين انها عصبت من البنات ..

الجازي تتحلطم .. بنات ما يجون الا بالعين الحمرا ..بدت تجهز الأغراض اللي تحتاجها .. وبدت تشتغل ... وفي وسط اندماجها بصنع القهوه اللي تحبها سمعت دق على الباب ومن غير ما تشيل عينها عن اللي بيدها .. مو قلت ما ابي حد يدخل ...

سمعت صوت خلاها تلف لجهته بسرعه ..

البراء .. مين معصبك يا بنت العم ..

الجازي ارتاحت لما شافت الباب مسكر والصوت جاي من ورا الباب .. ابتسمت وقربت من الباب .. هلا البراء بغيت شي ترا الخدم مو فيه ..

البراء.. كنت ابيهم يصلحون قهوه وشاي .. بس الحمد الله اني حصلتك هنا ..

الجازي باستغراب .. ليه فيه شي ..

البراء .. ممكن تردين على جوالك بعد نص ساعه راح اقولك كل شي ..

الجازي .. قلقتني البراء وش فيه ..

البراء .. لما اكلمك راح تعرفين .. والحين بروح ولا تنسين تقولين للخدم يصلحون القهوه والشاي .. سلام .. وراح ..

الجازي رجعت لعند القهوه اللي كانت على النار وهي تفكر باللي يبي يقوله البراء .. طفت النار وشالت القهوه وصبتها بالأكواب ومن غير ما تنتبه جات يدها على الأبريق الحار وصرخت من الألم .. ااااااااااااااااااااااااااااا.. رفعت يدها بسرعه وشافتها حمرا بقوه راحت للمغسله وفتحت المويه البارده وخلتها تنزل على يدها ..

في هذا الوقت انفتح الباب وكانو البنات ووراهم الحريم اللي جاو لما سمعو الصرخه ..

ام محمد راحت للجازي .. يمه بسم الله وش فيك تصارخين ..

الجازي ابتسمت رغم الألم اللي تحسه بكف يدها اليسار .. ولا شي يمه انا بخير بس حرق بسيط ..

ريوف تسحب يد الجازي من تحت المويه .. اي حرق بسيط شوفيه كيف محمر .. تعالي اعالجه لك .. ولفت على رهف ... رهف جيبي علبه الأسعافات الأوليه ..

رهف .. طيب .. وطلعتها من الدرج وجابتها ..

الجازي .. وش فيكم مكبرين الموضوع كلها حرق بسيط ..

ريماس .. ريوف لا تنسين تحطين مرهم الحروق عشان ما يبقى اثر ..

ريوف .. اي اكيد ..

ام محمد .. الله يهديك يا يمه ليه ما خليتي الخدم هم اللي يسوون لك اللي تبينه ..

الجازي .. يمه ليه مكبره الموضوع ترا ما صار لي شي انا بخير .. وبعدين حبيت اسوي القهوه بنفسي وش فيها ..

ام محمد .. الله يهديك بس .. ولفت على ريوف .. تحتاج للمستشفى ..

ريوف .. لا ان شاء الله ما تحتاج مستشفى المرهم راح يكفي باذن الله .. .. حطت المرهم على كف الجازي اللي حست بالم لان المرهم حرقها .. وبعدها لفتها ..

رغد تجيب للجازي مويه .. خذي اشربي ..

الجازي اخذت المويه وشربتها .. مشكوره ..

الحريم طلعو بعد ما تطمنو على الجازي ومعهم ام محمد ..

ديم .. الجازي تبين تروحين للغرفه ترتاحين ..

الجازي .. لا خلونا نطلع لبرا الجو باين انه حلو وبالمره نشرب القهوه ..

رهف .. انا صدق اني ما احبها بس راح اشربها غصب بعد اللي صار لك اكيد تعبتي فيها ..

الجازي .. من جد راح اذبحكم لو ما شربتوها انحرقت بسببكم ..

رغد .. ماراح اتكلم لانك مصابه الحين ..

البنات .. ههههههههههههههههههههههه ..

الجازي .. مالت عليك .. اقول بس روحو جيبو عبياتكم وعبايتي معكم عشان نطلع نجلس برا ..

البنات .. اوك ..

وبعد دقايق طلعو البنات لبرا وجلسو عند وحده من النوافير ..

الجازي لما جلست تذكرت ان البراء راح يتصل عليها .. فتشت بجيوبها بس ما شافت جوالها وتذكرت انه بالغرفه .. وقفت ..

ريماس .. على وين ..

الجازي .. بروح اجيب جوالي نسيته ..

ديم .. اقول يا بزنز ومن اجلسي مين راح يتصل عليك ..

الجازي ابتسمت .. يمكن نوفوه تتصل ما كلمتها اليوم ..

رهف .. وليه لازم كل يوم تكلمينها .. اقول اجلسي بس ترا حنا ما نشوفك دايم ..

الجازي ما قدرت تقول شي وجلست .. اوك ..

في هالوقت جاو الشباب لهم حتى مالك بس البراء مو معهم ..

بسام .. وانتو بس جالسين برا ما تعرفون تجلسون من الحريم ..

ريوف كانت تبي تتكلم بس وجود مالك يخليها تسكت ..

الجازي ابتسمت وهي تشوف ريوف ولفت على بسام .. تقولك ريوف ترا حتى الكلام ينطبق عليكم ما تجلسون مع الرجال ..

بسام .. وليه ريوف ما تتكلم انبلع لسانها مثلا ... المهم ما ودكم نلعب ..

الجازي .. ووش اللعبه ..

بسام نسوي تحدي بينا وبينكم اسرع فريق يخلص صحن الكيك ..

الجازي .. حلو .. طيب وين الكيك ..

بسام .. الحين نجيبه بس كلكم موافقين ..

البنات هزو روسهم ..

بسام .. اوك .. ولف على مشاري .. مشاري روح جيب الكيك ..

مشاري بابتسامه خبث .. اوك ..

ودقايق جاب الصحنين وجا .. حط للبنات صحن وللشباب اللي جلسو مقابلهم صحن ..

بسام .. لحظه حنا كم .. اممم حنا خمسه وانتو سته ما ينفع كذا راح يكون غش ..

الجازي .. ليه خمسه .. وتوها تنتبه ان البراء مو معهم .. وين البراء ..

مشاري .. بغرفته يقول مصدع ..

الجازي .. اها ما يشوف شر .. ولفت على مالك .. طيب مالك معكم يعني انتو سته ..

بسام .. مالك ما يبي يلعب .. لازم وحده منكم تطلع ..

ريوف بحيا ..الجازي تطلع ..

الجازي لفت عليها .. وليه اطلع انا .. ليه ما تطلع رهف هي اصغر وحده فينا ..

رهف .. لا لانك مصابه ما ينفع تلعبين ..

الشباب لفو باستغراب جهه الجازي ..

فيصل .. مصابه .. ليه وش فيك ..

مالك انتبه بيد الجازي الملفوفه .. وش فيها يدك ؟؟..

الشباب ناظرو يد الجازي ..

مشاري .. سلامات الجازي وش فيك ..

الجازي .. ولا شي حرق بسيط .. يلا ما تبون تبدون اللعبه ..

بسام بنفسه .. اذا الجازي ما اكلت المقلب ماراح نستفيد شي .. لا خلاص راح ناجل اللعبه بعدين ما ينفع ما تلعبين ..

الجازي .. ومين قالك اني ماراح العب انا يدي المصابه مو فمي .. يلا بس خلونا نلعب ورهف هي اللي رح تطلع ..

بسام ابتسم .. اوك يلا .. مالك هو الحكم ..

مالك .. اوك .. يلا .. 1..2..3.. ابدا ..

بدو الشباب يكلون الكيكه اللي كانت مقسمه على خمسه وكان الوضع طبيعي ..

اما البنات اول وحده بدت تاكل كانت الجازي .. واول ما حطت الكيكه بفمها وقبل ما تبلعها على طول طلعتها .. اييييييييش هذااا ..

البنات اللي لسا ما اكلو كانو يناظرون الجازي باستغراب ..

اما الشباب .. هههههههههههههههههههههههههههههههههههه ..

بسام .. وش رايك بكيكه الليمون ..

الجازي .. لحظه لحظه يعني الحين انتو سويتو فينا مقلب ..

مشاري .. بالضبط والحمد الله جات فيك انتي لاننا كنا مستقصدينك .. هههههههههههههه ..

الجازي .. اهاا مستقصديني اجل .. اوك .. اخذت علبه المويه اللي على الطاوله وشربت منها شوي عشان توخر طعم الحموضه اللي بفمها .. ووقفت .. شكلكم نسيتو ايش كانت مقالب سلطان ..

مشعل .. الجازي تكفين انا كنت معارض الفكره طلعيني من السالفه ..

الجازي .. بس اشوفك ضحكت معهم ومبسوط .. انتظرو ردي عليكم بس .. ومشت عنهم والبنات وراها ..

فيصل .. الله يستر باين انها معصبه جد ..

بسام ..اقول شباب ليكون وقت المقلب كان غلط ..

عزوز .. شكله غلط مو يقولون انها مصابه يمكن كان الحرق يالمها وحنا كملنا عليها ..

مشاري .. يووووووووه اجل الله يعينا ..

مالك . جد الله يعينكم ..

بسام .. البراء .. هو الحل اكيد راح يهديها .. لا تنسون ان هم كانو اصحاب كثير .. تعالو .. وطلعو كلهم لقسم الشباب وراحو لغرفه البراء ..
.................................

عند البنات بالغرفه ..

الجازي .. انا اوريهم هذا وقت مقلب بالله ..

ريوف .. من جد فاضين ..

ريماس .. الجازي الحرق يالمك ..

الجازي .. لا بس ابي ارتاح شوي ممكن تتركوني لحالي ..

البنات طلعو من الغرفه ..

ريوف .. باين انها تضايقت ..

رهف .. تتوقعون من حركه الشباب ..

ديم .. لا ما اتوقع هي اصلا شكلها كانت متضايقه من قبل او فيه شي شاغل بالها ولا كيف حرقت نفسها ..

رغد .. من جد والعيال جاو وزادوها ..

ريماس .. خلونا ننزل لتحت ولو سالونا عنها بنقول مصدعه وتبي ترتاح ..

البنات .. اوك ..

..
..
..
..
في داخل الغرفه ..

الجازي اخذت جوالها اللي كان بجنب المخده وشافت 5 مكالمات من البراء .. اتصلت عليه على طول .. ورن ورن ورن لين ما قفل ومارد .. نزلت الجوال من على اذنها وهي مستغربه .. وبنفسها .. غريبه ليه ما يرد .. معقوله نام ..
........................

عند الشباب بغرفه البراء ..

البراء .. بسم الله وش فيكم هاجمين علي كذا ..

بسام يجلس بجنبه على السرير .. نبيك تكلم الجازي ..

البراء اللي كان منسدح ضبط جلسته ولف عليهم باستغراب . اكلم الجازي ؟!.. ليه ؟؟..

مشاري .. لانها زعلانه ..

البراء زاد استغرابه ..زعلانه ؟!!..

فيصل .. ايه سوينا فيهم مقلب وهي الوحيده اللي اكلته وزعلت علينا ..

البراء .. طيب البنات دايم يزعلون لما تسوون لهم مقلب .. لي الحين مهتمين بزعل الجازي ..

عزوز .. لان حنا المره هذي غلطنا ما اخترنا الوقت المناسب للمقلب ..

البراء .. كيف يعني ..

مشعل .. الجازي كانت يدها ملفوفه وتقول حرق بسيط بس شكله مو بسيط وكان يالمها وحنا زدنا عليها لما سوينا المقلب هي هددتنا انها راح ترد لنا المقلب قوي وفوق كذا زعلت منا ..

البراء قلق عليها لما عرف انها انحرقت ..

بسام .. وبصراحه حنا نعرف قد ايش كانت علاقتكم قويه لما كانت سلطان واكيد هذي العلاقه ماراح تنقطع بيوم وليليه عشان كذا جيناك نبيك تكلمها وتعتذر منها بالنيابه عنا ..

في هالوقت رن جوال البراء ولما رفعه شافه الجازي حطه صامت ورجع يناظر العيال .. وكيف تبوني اكلمها تراها خلاص صارت بنت ..

مشاري .. طيب انت مراح تسوي شي غلط بس راح تعتذر منها بالنيابه عنا ..

البراء .. وليه مو واحد منكم يكلمها ..

بسام .. انت اكثر واحد يعرفها ويعرف كيف يخليها ترضى ..

البراء نزل عيونه لجواله .. طيب بس اطلعو ..

عزوز .. وليه نطلع نبي نسمع وش راح تقول ..

البراء رفع عيونه لهم .. ياخي انا اول مره اكلمها من صارت بنت اكيد راح انحرج بالبدايه .. خلوني على راحتي ..

بسام وقف .. صدق خلوه على راحته اهم شي الجازي ما تصدمنا بمقلب يجيب اجلنا ..

الشباب كلهم وقفو وطلعو من الغرفه .. طبعا مالك ما كان معهم كان جالس مع الرجال تحت ..

..
..
..
داخل بالغرفه ..
البراء رفع جواله واتصل على الجازي .. ثواني وجاه صوتها .. اهلين ..

الجازي .. وش فيك ما ترد ليكن كنت نايم وازعجتك ..

البراء .. لا بس كانو الشباب عندي .. سلامات وش فيها يدك يقولون انك انحرقتي ..

الجازي .. الكل مكبر الموضوع وهو مجرد حرق بسيط .. المهم ايش الموضوع اللي كنت راح تقوله لي ..

البراء .. قبل الموضوع .. الشباب جاييني وطالبين مني اني اعتذر لك بالنيابه عنهم على المقلب يقولون ما كانو يدرون انه مو وقته ..

الجازي ابتسمت .. اكيد خافو من التهديد .. ماعليك انت قول لهم اني قبلت اعتذارهم وبس ..

البراء .. يعني راح تنفذين تهديدك ..

الجازي .. اكيد .. المهم قولي الموضوع ..

البراء .. اممم بصراحه من دخلتي للشركه وانا احسك متغيره علي ماصرتي تسولفين معي مثل قبل ولا تردين على اتصلاتي ودايما مشغوله .. احس حتى اسلوبك متغير معي .. ليكون انا مضايقك بشي من غير مدري ..

الجازي .. لا ابدا بس تعرف دخولي للشركه يعتبر تجربه جديده بحياتي واكيد راح تاخذ اغلب وقتي وغير كذا انا بوقت تعليم الحين وهذ يخليني اركز اكثر بالشركه .. وانت ابد ما جا منك شي واتوقع تعرفني لو فيه شي كان قلت لك ..

البراء ابتسم .. ريحتيني كنت شايل هم وخايف ليكون مضايقك .. اذا كذا الموضوع اجل الله يوفقك وتتوظفين باللي تحبين بالاخير ..

الجازي ابتسمت .. امين ..

البراء بتردد .. امم ممكن اسالك سؤال ؟؟..

الجازي .. اكيد .. من متى حنا نستاذن من بعض عشان نسال ..

البراء .. لان السؤال يعتبر خاص ..

الجازي .. طيب اسال ..

البراء .. اممم الى اي مدى توصل علاقتك بمالك ؟؟..

الجازي مستغربه من سؤاله .. سؤالك غريب بس راح اجاوبك .. وانا قلت هذا الكلام اليوم قدام الشباب .. علاقتي معه ما تتعدى الشغل بس ومستحيل يكون فيه مجال اصلا انها تمتد اكثر من كذا ..

البراء براحه .. اممم طيب .. وعذرا على اللقافه ..

الجازي .. ههههههههههههههه .. البراء بسم الله عليك وش فيك صاير غريب اليوم تستاذن وتعتذر وش جايك ليكون الصداع ماثر على مخك ..

البراء ابتسم .. يمكن ..طيب اخليك ترتاحين اكيد ان الحرق يالمك مهما كان بسيط هو يالم .. لا تكابرين ..

الجازي . يعني شوي الحين راح اخاذ مسكن وان شاء الله يخف ..

البراء .. ان شاء الله .. يلا مع السلامه ..

الجازي .. مع السلامه ..

قفلت الجازي من البراء وصارت تدور مسكن بجنبها مالقت نزلت لتحت وماشافت حد بالصاله استغربت .. راحت للمطبخ وسالت الخدم وقالو لها انهم طلعو عند المسبح يشوون .. اخذت مسكن من المطبخ ورجعت لغرفتها راحت لعند الشباك فتحته وكان يطل على البحر استنشقت هوى البحر اللي يرد الروح على قولتهم وبعدها صارت تتفرج على البحر اللي كان هادي وصوته مريح للاعصاب انتبهت بشخص جالس على الشاطء وكان ماسك شي بيده مو باين ايش ويرسم على الرمل.. كان معطيها ظهره ..ما خمنت مين يكون ولا فكرت كل اللي جا ببالها انها تبي تجلس عند الشاطئ مثله تتوقع انها راح تحس براحه لما تروح لهناك .. قررت وسكرت الشباك اخذت عبايتها ونزلت لتحت وطلعت من الباب الخلفي للفله اللي يطلع على الشاطء .. تقدمت للشاطء وشافت الشاب اللي شافته من شباك غرفتها وكان بعيد عنها بمسافه ما اهتمت مين يكون وكملت طريقها للبحر .. جلست على الرمل وصارت تناظر البحر وتفكر بكل شي .. سمعت صوت من وراها قاطع تفكيرها لفت بابتسامه لما عرفت الصوت ..

مالك .. ليه جالسه هنا لحالك ..
الجازي انتبهت بلبسه وعرفت ان هو اللي كان جالس على البحر .. ولا شي بس حبيت اجلس عند البحر شوي ..

مالك .. اها .. انا لما طلعت ماكان فيه حد ولما جيت بدخل انتبهت فيك ما حسيت فيك لما طلعتي ..

الجازي .. شكلك كنت مندمج بالرسم ..

مالك ابتسم .. شفتيني وانا ارسم ..

الجازي .. ايه ..ماكنت اعف مين تكون توي عرفتك ..

مالك .. اها .. طيب مو حابه تدخلين ..

الجازي .. لا راح اجلس شوي ..

مالك .. اوك براحتك انا راح ادخل عن اذنك ..

الجازي بابتسامه ...اذنك معك ..

مالك لف بيمشي بس انصدم لما شاف البراء واقف وراهم وباين على ملامحه العصبيه .. البراء ؟!!..

الجازي لفت بسرعه لما سمعت مالك يقول البراء ووقفت وبصدمه من عصبيته .. البراء ؟!!..
**
**
**
**
**
**
**
**
**
**
**
**
**
**
**
**
**
** انتهى البارت الثاني عشر **