أنسام اللهيب الفصل الحادي والعشرون 21 - بقلم زينب الشمري

#أنسام_اللهـيب

بقلمي أنا زيـنب خالــد

حبايبي هذا الباررررت ناريييي فجرو تعليقات وتصويت ولتنسون تابعون
حسابـي واتبـاد ⁦.♥⁩

𖦆 𖦆 𖦆 𖦆 𖦆 𖦆 𖦆 𖦆 𖦆 𖦆

أنســام - ملت بجسمي
؏َ الگاشي البارد أحس عظامي تأذيني من البرودة
وأيدي احس نيران الدنياااا ڪلها
شابه بيها اتصارع وية الوجع ماينحمل

أيدها وهي تضغط بشوگه ؏َ أيدي لخاطر
تلچمني أذتني ڪِلش
صوت صياحي الي أحس نبح حسي من وراه
أتذكر أكثر من مرة حتركت أيدي
إني واطبخ بس ولا مرة لچمتني مثل هاي

لأن حديد ونار صار الوچع مايحمله إنسان
الاذية القوى والي مو بس
أيدي حرگتها لا نار وگبت بضلوعي

أحس بالخيبــة من المنظر إلي شَفتــه
بمُجــرد ما تعالت أصوات الأذان وصوتــه وهو ينطق بصوت جهوي عالـي بي
خشوع

" اللّٰـه أكبـــر اللّٰـه أكبــــر "

شمرت الشوگه من أيدها تقربت ؏َ المغسلة فتحت الحَنفية ساعتها نسيت ڪل
وجع وروحـي الي تفرفرح مثل طير
مذبوح يتلوى ؏َ الگاع ڪدام چتالـة

توضت بكل بساطــة وراحت
تصلي ..

أحس شفايفي ترجف سڪري علگ
جسمي يختض من الوجع مَــادري شسوي
زحفت عليــة ودق تباوعلي
بـ حَـــيرة تمسح ؏َ وجهي تشيل الشعر عنه

ڪالت بحرگه ڪلب
:- منين الزمج أخاف الجمچ !!

باوعت ؏َ أنهار الي تباوعلي وعيونها
مفتوحات ؏َ وسعهن
شفايفها بيض وجهه أصفر مامستوعبة الموقف ولا بشاعته

ودق : عينوني اسندها
نصعدها فوگ أيدها حترگت
احطلها شي تحرڪن

حطت أيدي ؏َ متنها من شافت
ماكو إستجابة لا من بتول ولا أنهار أحس بروحـي تشوغ لله الوجـع ماينحمل
يختلف ؏َــن أي وجع

تحركت أنهار بسرعــة تسندني صعدني فوك رجعت رأسي ؏َ القنفة وإني ارافس
من الوجع لازمة طرف دشداشتي قوي
عصرتها بيدي من لزمت أيدي المحترگه ودق

رفعت عينها المتروسة دموع تباوعلي بقلة حيلـــة
ودق : بس تحملي الوجع
تحملي شوي

حطت ؏َ أيدي دهن بارد صحت بصوت عاليي أحس بلعومي تجرح من صوت الصرخة
أنهار : مو هيج ودق
ناخذها للمستشفى

ودق : لاااا أسكتي اعرف
مو أول مرة هاي

دخلت بتول تباوعلي مصدومة ڪامت
ودق تجيب شاش تلف بي
أيدي لزمتها بتول من أكتافها تهز بيها

بتول : لتكولين لخالي
لتكولين ودق

دفعتها ودق قوي من صدرها
وخزرتها
ودق : ونخليها بهذا
بطشها والله جبيرة والها حرمتها

ضحكت ودق بأستهزاء علت صوتها
متقصدة تسمع صبرية
ودق : ڪولي لـ أمج خلي
تستعد هل مرة لهيب مراح يعديها ؏َ خير

بتول : يذبحنا ڪلنا هذا
مخبل مخبل

ماحس الى براجدي ؏َ وجهه بتــول
سكتها ماشفت شي بعــد غمضت عيوني لأن أحس جسمي مو حمــل هذا الوجع
ڪله

رجعت فتحتها من حَسيته بعطره بخشمي
باوعت ؏َ أيدي لافيها
فتحت عيوني زين إني بغرفتـه عيني ؏َ سگف

همست بصوت ناصي
أنسام : لهيب
لـهيب : أمي وابوية أنـتِ
كولي حبيبتي أكو شي يوجعج
گلبج يأذيج سكرج؟ لو الحرگ بنيتي؟

التفت ؏َ مصدر الصوت تجمعت
الدموع بعيني ڪاعد فوگ رأسي يمسح ؏َ شعري بهدوء

رفعت أيدي توجهت عيونة عليها ورجع يباوع لـ عيوني باس أيدي من مكان الحرگ
؏َ الخفيف يخاف لا يأذيني

لـهيب : توجعج بنيتي؟
أنسام : حيل توجعني
حرگتني بدون متخاف تخيل

أبتسم بقهر وعيونة مغيم عليهم الحزن ڪال بهدوء وهو يباوع عليه أصابعة
يمشيهن ؏َ حواجبي
لهـيب : هي تريد تأذيج
ليش تخاف

رمشت بعيوني مرات متتالية ذبيت حَـــسرة حدقت بأيدي صارت دموعي تنزل ؏َ
خـدي مسحهن ببهامه

لـهيب : عليش هل دموع
بعدهي توجعج

هزيت رأسي بـ لا وإني أمسح الدموع بأيدي السليمة

لـهيب : المفروض يسموج
دموع مو أنسام

مارديت سكتت ماكلت أكو بعد وجع أخاف يسوي مشاكل جر حَـسرة تحرك جاب
علاگه مال صيدلية

عگدت حواجبي : هاي شنو!

لـهيب : إبرة انسولين

رجعت أبجي من جديد
لـهيب : يا الهي شبيج
بعيونج تانگي مال دموع عليش تبجين هسه؟

أنسام : ماحب الإبر!

سحب نَفس بعمق تقرب علية ڪال
: إني اضربج متحسين بيها
لحدما تتعلمين

فتحت عيوني مصدومة
أنسام : ليش أنت عيب
لـهيب : يجوز رجلج ؟

أنسام : وين تضربني

لـهيب : بفخذج بطنج
زندچ أي مكان عادي يلا شو

أنسام : ليش اضرب
ماريد لشكد اضل هيج

لـهيب : قبل ڪل وجبة
متشوفين روحج بس تتخربطين
سڪرج من درجة الأولى

بجيت بحرگه وبقهر بصوت عالي مثل الجهال
ضرب أيد بأيد بيأس
لـهيب : يامحمد العربي
ليش تبجين بنيتي شو باوعيلي أنسام

حط أيدة جوه حنجي رفع وجهي
أبتسم ؏َ ملامحـي ڪال
: حَلوه ملامحج

سكتت عن البجي اباوعله بصدمة
نزل رأسة يفتح بالإبرة
أنسام : يااا

من حجيتها باوعلي وطگها ضحكـة ضليت صافنة عليه هدوئة يخوف معقولة
حيتغاضى عن الموضوع لأن أخته
زين شلون ليش يسكت عن حقي مو خطية اني!!!

لـهيب : وين نضربها ؟
أنسام : هنا
حجيتها وإني أشر ؏َ بطنـي هز رأسة
يباوعلي ڪأنه ينتظرني

عفست وجهي
أنسام : شنو !
لـهيب : ارفعي الدشداشة
خلي اضربج

رمشت بعيوني ممستوعبـة وجع أيدي
والخجل احس بروحـي أريد
أموت واخلص من هلمواقف

أنسام : لهيب إني لابسة دشداشة شبيك!
أبتسم بطرف شفته ڪال
لهـيب : شحلات أسمي بشفايفج

أنسام : يا شبيك اليوم
طكها بضحكة ڪال بنفاذ صبر
لـهيب : يلا بنيتي حتى تأكلين
موزين عليج

أنسام : ماكدر عيب
خلي وحده من البنات تضربني لو اني
لهـيب : ميعرفون
هسه من اضربج تتعلمين أنـتِ

أنسام : خلي أبدل لـعد
أحسن

رفع حواجبة اثنينهم ضحك وكام من
يمي ڪال وهو يحط الإبرة ؏َ
العلاگة فوك الميز

لـهيب : اي بوية لـعد لـعد
تلوكلك
أنسام : شنوو؟

عاط بنفاذ صبر مال واحـد زهگانه روحـة
لـهيب : اثول ثولة
أنـتِ يلا طالع بدلي مو تتصفنين
راح اصيح أنهار تعاونج لأن أيدج

حجاها دفعة وحده ورگع الباب قوي هذا شبي فوگ ما أيدي توجعني ومحترگه
هيج يعاملني شوي وأنفتحت الباب
دخلت أنهار تباوعلي بقلق

وكفت قريب ؏َ جربايـة ڪالت
أنهار : آسفة خفت
مَــادري شصار بية توقعت ڪلشي إلى
انو يوصل بيها الاستكح** لهنا

أنسام : يااا
بعدهي أيدي توجعني حيل تدرين
بس مو نفس أول مرة هسه خف شوية مو هواي

هزت رأسها ومبين عليها شكد
مقهورة بس وضعها مو تمـام ڪأنها تخفي
عني شي هذول مو خواتي
بناتي أنا مربيتهم أعرف حتى النَفس الي يتنفسون إذا ياذيهم لو لا

لبست التراڪ قبل لا تطلع وكفتها
أنسام : أنهار
التفت عليـه تباوع بتسأول : ها

بلعت ريگي متوترة بس جَان بنفسي
أعرف إذا هوَ سوه
شي لو لا إلها لأن حرڪتني حتى لو بس يحجي عليها لأن أذتني ردت أشوف

أنسام : لـهيب ماسو شي لصبرية؟
حجيتها بتررد واني أعصر أصابيعي
باوعت ؏َ ملامحـي لفترة
طويلة ڪانت ساكته تحدق بيه ڪأنها محتارة تجاوب نطقت بعد صمت

أنهار : لاااا ماحجه شي
ڪال تضل أكبر مني ماكدر

باوعت عليها بعدم تصديق شي من شعور
الخيبة أحتل گـــلبي
شجنت متوقعة يعني امداني أتوقعة يحبني ويتعارك علمودي ويخبص روحـة

طلعت وسدت الباب ڪعدت ؏َ جرباية لميت رجلية لصدري احس أريد ابجي من جَديد
انفتحت الباب دخل بهدوء باوع ؏َ وضعيتي بـ خيبة حگ لحيته تقدم أخذ الإبرة

ڪعد ڪدامي سحب رجلية ثبتهم بأيده
شال التيشرت درت
وجهي غمضت عيوني قوي خايفة من الإبرة ماشفت وجهه بس أحس بأيده الخشنه
حاوطت بطني لازمتها تمسح ؏َ المكان
الي حَيضرب بي

أسمع ذب حَــسرة بعدها حقن الإبرة
عقجت وجهي من حسيت بألم طفيف بعدها سحب الإبرة أحس المكان يحرگني
فتحت عيوني أباوع ؏َ المكان وهو يباوعلي ڪاتم ضحكته

لـهيب : الحَمدُللّٰـه ؏َ سلامة
تخلفين شلون أنـتِ
أنسام : شنو!
عض شفته ورفع الإبرة بمعنى أضربج بيها واني مفاهمه
أحس مكان الإبرة بدة يحگني
چفلت من حَسيت بأيده بعدها ؏َ بطني
يحرك أصابعة بعشوائية

دفعتها ونزلت التيشريت ڪام شمر الإبرة لم شفته للداخل يخفي أبتسامته
لـهيب : مع الأسف مافتحتي
عيونج حتى اعلمج شلون تضربينها

أنسـام : يااا راحت من بالي
حَرامات
هز رأسة وعض شفته متوعـد
لـهيب : واحد غيري جان حط وگتلج
؏َ هاي الفهاوة

مارديت شوي وجابلي أكل هو
يوكلني مثل الجهال
وراها جاب گلاص مي

لـهيب : اشربي ڪله يلا
أنسام : بس اني ماعطشانة

لـهيب : ميخالف يلا
ڪله دفعة وحده خلصي يلا أنسام
لتشلعين گــلبي عندي
شغل عايفة لخاطرج

أخذت الگلاص من أيده شربته ڪله
دفعة وحده نفس ما ڪال
عاينت عليه تنفس بـراحــة شوي أقل العشر دقايق وبديت أقفل حسيت
بـ نعاس مو طبيعي

ڪام من يمي راد يطلع وكف ڪأنه
تذكر شي اندار
صفن عليـة شوي وڪاال
لـهيب : ضجتي
لأن حرگت أيدج

بلعت ريگي وإني عيوني تغمض
من وحدها حجيت
بصوت ذبلان
أنسام : ماغثني حرگتني
الغثني صلاتها ورة أذيتي ..

حجيتها ومددت ؏َ الجرباية مغمضة عيوني
مستسلمة
سمعت ذب حَــسرة وڪال
لـهيب : صوتج خربط
احوالي

أحس جسمي ڪله خدر مَــادري
شوكت نمت
بس الي اعرفه إني نمت بعمق ڪأني
منايمـة من سنين ..

❛❜ ❛❜ ❛❜ ❛❜ ❛❜ ❛❜ ❛❜ ❛❜ ❛❜ ❛❜ ❛❜ ❛❜ ❛❜

ودق : ڪاعدة ؏َ القنفة
اهز برجلي أصهب ڪاعد ڪدامي ڪل
شوي يطلع يجيب
شغلة ويرجع للغرفــة وردة فعله حرگتني حرگ
هذا برودة مخوفني

رفعت عيني للساعــة بـ 9:30 نزلت جوه
للحديقة أجيب ڪتاب
نوران الي عافته برة وخايفة تنزل
صارت بوجهي صبرية

ضحكت بانتصار ڪالت
صبرية : وين إبن الفصلية
ساكت شنو هذا الهدوء لو خايف

دنگت شلت الكتاب من الگاع نفضت الوصخ عَنه
ضحكت بـ حقارة مثلها انداريت
عليها
ودق : هذا مو الهدوء ماقبل
العاصفة هذا الهدوء ماقبل الإعصار
الي راح تكون رياحـه مثل لهيب تـسعر بوجهج
استعدي هاي مو أي وحـدة
نسيتي لو اذكرج شصار آخر مرة أذيتي بيها أنسام !

باوعت عليـــة من فوك ليجوة
بقرف مالحكت ترجع لان انفتحت الباب الفوك
وصوت خطواتة ؏َ درج
بلعت ريگي ماعندي جُراة أرفع عيني لعيونة وإني ماصنت الأمانة

حدقت بيها مهما تحاول تنكـر
لكن الخوف واضــح ؏َ ملامح وجهه
بلعت ريگها تعاين عليه بصمت نزل هي بسرعــة راحت للبيتها وقفلت الباب

لم شفته للداخل هز رأسة بـ أسف
لـهيب : له له ليش
تحبين تشلعين گـــلبي أول
تالي حتأكلين خرا عليش تطوليها

عبرني راح سحب الكرگ حطه ؏َ متنه تقدم بكل برود دك ؏َ الباب بطرقات خَفيفة
ڪال بصوت هادئ
لـهيب : صبرية تتذكرين من جنه
صغار شكول الج؟

ماكو رد رجع ضرب بالگرك قوي ؏َ الباب
يگسر القفل ضحك بصوت عالي
ڪال
لـهيب : صبرية المطية !

بحجايته هاي انفتحت الباب طلع أصهب نزل يباوع ؏َ الوضع مابيده حيلة طلعت وراه أنهار
خايفة شنو ذنبهن انگلبت حياتهن
بيوم وليلة

صبرية : روح مناااا لا اخابر
هشام واخلي يطيح حظك

هز رأسة بعد ما تأكد أنو مراح تفتح البـاب
ضل يضرب بالباب بالگرك لحد
ما ڪسرها روحـي أرتعدت من الخوف وإني أتذكر آخر مرة شصار

جر حَـسرة شمر الگرك بالگاع
انتچـه ؏َ الباب طلع من جيب بنطرونـة
جكاير ولزم الجداحة

حط الجكارة؏َ طرف شفته حاوط الجداحة
بأيده وشغلها سَحب نَفس
وزفره بالهوى طلع تلفونـة مدري شيسوي
ڪل هذا بهدوء

شغل أغنية وحط تلفونة ؏َ جهه
:- نسولف ؏َ الخوة هنا
؏َ رأس الصاحب شلنا
والجان يشمر بالصوت من صار طگ فشلنا

عاط بصوت عالي وهو يدخل ؏َ البيت
لـهيب : خايب ڪتلك بطل
لا تلح أنه مو ياهو الجاااااان
أكعد راحـة وعوف الرفشة
لا أخليك تذب الوان

ڪلمات الأغنية مستمـرة دخلت وراه بسرعــة
رادت تدخل للغرفة وتسد الباب
حط رجله ؏َ الباب مانعها دفر الباب برجله قوي عصرها بين الباب والحايط

حسيت بخطوات وراي
شفت أصهب يأكل تفاحـة ويباوع مستمتع
تقدمت عليه بتول عاطت بصوت عالي
بتول : سوووي شي
ليششش صاااافن

أصهب : شعليه خال ولد
عم بنية إخوان بينهم يتصرفون

رفع أيده بتهديد قضم التفاحـة ڪال وهو يحذرها
أصهب : إذا أسمع بيج
مخابرة خالي هشام ڪتلچ
يصير عَمل شعبي

نزيت ؏َ صوت صراخ صبريــة وإني اشوف خاالي لهيب لازمها يعت بيها
لاف شعرها ؏َ ايده يسحل بيعا بالبيت وهي لازمه أيده
تريده يهدها وهو يدخن
ممهتم ؏َ صوت صريخها

شمرها بالمطبـخ ؏َ وجهه
من رفعت رأسها شفتـها طگت دم تباوعلة وعيونها الحقد يتطاير منهن أبتسم بانتصار
رفع الطاوة إلها ڪال
لـهيب : لگيتها

حطها ؏َ النار مدري شيسوي منتچي ؏َ الكاونتر
مرجـع أيدي ليورة
يدخن ويحدق بيها بأبتسامة خَبيثة

صبرية : اذبحهم واحـد واحـد
ڪدام عيونك بس تفكر تأذيني
لـهيب : يلا بيج زود
ڪومي

حجاها وطگها ضحكة تقرب عليها شدها من شعرها مقربها عليه طفه الجگارة برگبتها
عاطت بوجع تدفع بي وهو مبتسم ؏َ ردة فعلها
عافها وراح سحب الطاوة لزمها
من گفاها

وكف بثبات ڪدامهم وهي روحـي تشوغ
من وجع الجگارة
لـهيب : يا أيد حرگتيها بيها ؟

مجاوبت متوجعة تفرگ بمكان جگارة
عاط بصوت عالي خنس ڪل الواكفين وهو گاز ؏َ سنونة
لـهيب : يااااااا أيييييدددددددد

أنهار : أيدها اليمين
توجهت انظار الكل الها خزرتها صبرية وهي
حادة سنونها عليهن هز رأسه
بثقة ڪعد ثاني رگبته وصل لمستواها سحب أيدها قوي

أبتسم وڪال
لـهيب : قبل لا تبــرد الطاوة
توسعت عيوني بذهول وإني اشوفة يحط أصابعها إصبع إصبع ؏َ طاوة وهي تصرخ
بصوت عالي تغيرت ملامحـة شرايين رگبته برزت من العصبية
عيونة صارت بگصته

شمر الطاوة بالگاع قريب عليها
لزمها من فگها عصرة قوي سد حلگها وحط أيدها ڪلها ؏َ طاوة وهي حاررة من نار
لـ أيدها

ماتحملت أبتعدت لكيت نوران واكفة بالباب
تباوع بخوف صارت عيونها
؏َ أصهب إلي ڪاعد ؏َ القنفة حاط رجل ؏َ رجل يأكل تفاح

نوران : اللّٰـه ياخذك

فتح عيونة مصدوم يباوعلها ويأشر ؏َ روحــة هي بمُجرد ما نطقتها طلعت بـــرة
هو طفر وراها

فززني صوت خالي وهو يغني وية الأغنية
لـهيب : هَسه الدنيا ترييييد تفرني
وانه مدوخها من الويل
والجان يخدم جوة أيدي
جاي يسولفلي ؏َ الحيل
ورثت روحييي وصارت نار عادي اترادم ويه حجارر

راد يگوم مدري شيجيب عاطت أنهار بسرعة
أنهار : خلي الباقي
عليـه هي ضربتها وآثار أيدها
بخد أختي لسة عوف هذا الي

باوعلها بأستنكار ممقتنع بعدها رفع حواجبة اثنينهم بمعنى يلا هي اخذتها أشارة وفعلاً
تولتها ضرب خلتها گوة تسحب النَفس
طلع خالي ماعرف وين راح

باوعت ؏َ بتــول ڪاعدة تبجي بزاوية
تعقدت من ورة أمها
صارت تخاف من ڪلشي حسبي الله ونعم الوكيل

أنهار : صبريييية المطططططية
انعلبوج بت الجلب بت الكو**
اخخخخ ولججج اخخخخ ڪون اگطعج بسنوني

حجتها ودفرتها بخاصرتها وذيج گوه
تچر النفَس تقدمت أنهار
تلهث بتعب
أنهار : تعبت شنو هاي
جنها هايشة شكبرها

حجتها وطلعت بقينا بس إني وبتول
ڪاعدين نباوع إلها ماعرف منو مخابر خالي هشام واجه يركض
من شاف وضعها ضل يستغفر
أخذها ؏َ المستشفى بسرعـــة ...

❛❜ ❛❜ ❛❜ ❛❜ ❛❜ ❛❜ ❛❜ ❛❜ ❛❜ ❛❜ ❛❜ ❛❜ ❛❜

نـــوران : بس يصيحون أصواتهم
تأذي أذني ماريد هيج
ماريـــد أريد أرجع لحياتي ذيج

حجيت بغضب وإني اصعد ؏َ درج
شهگت بـ ذُعر من حَسيت بأيد حاوطت
معصم أيدي لفني عليــــة
انضرب جسمي بالحايط حاصرني حاط أيده اليسرة ؏َ الحايط يمنعني أتحرك

وايده اليمين يأكل التفاحـة بيها ويباوع
عليــه بـ شغَف هو أطول
مني اوصل اصدرة مدنگ ويباوعلي قرب التفاحة ؏َ شفايفي ڪال
أصهب : تردين؟
نوران : شكد ماتستحي
وخر لا أصيح خالك يگتلك

من حجيتها فتح عيونة وكام يضحك بصوت
عالـي لدرجـة عيونة دمعت من الضحك
أصهب : شبيج أنـتِ؟

نوران : مابية وخر ماحبك
أحسك مكروه وغثيث
ومتنبلع وخبيث هم و.. صفنت أفكر بعد شنو
وهو عيونة تتنقل بين عيوني

ڪال بصوت ذبلان
أصهب : تخيلي تحبيني
من يسئلوج شلون تعرفتو ڪولي
دعمني وحبيته

نوران : وخررر راح اصيح
أنهار انتتتت ابدددد ماتستحي

ميل برأسة نظراته تتوزع بين عيوني وشفايفي
خَفت حيل تجمعت الدموع بعيني
هوَ من شافني هيــج أبتعد عني يمسح بوجهه جر قميصة قوي ڪال
أصهب : الجو صار حار حيل حار

طلع برة البيت بكبرة ڪعدت ؏َ درج خايفة يمة لو جان راح يسويلي شي
حَضنت جسمي قوي ضامة رأسي بين رجلية
سمعت صوت قريب
يهمس عليــة رفعت رأسي ببطئ شفته علي ڪاعد ڪدامي

مديت أيدي اتلمس ملامحـة غمض عيونة
وبمحض ثواني اختفى طيفة من أمام
ناظري نزلت رأسي بـ خيبة

لـهيب : ميصير نعيش ؏َ طيف
شخص ميت راح نعذبة

چفلت من صوتة صديت لكيته واكف
يباوعلي بصمت تقرب صعد ڪم
باية ڪعد قريب عليـــة
يدخن ويباوع بالفراغ وإني أسمع صوت أنهار تگفخ بصبريـــة

نوران : هو يجيني
مو إني ماڪله اني هو من وحَده
يجي

حجيتها وإني اباوع عليـه بقهر زفر نفَس
من الجگارة أبتسم وڪال
لـهيب : تفكرين بي هـواي
تتخيلينه عقلج يوهملج هاي الشغلات أنو
هو موجود وهو من فوڪ يشوفج
ويتعذب دتأذين اخوج نوران ..

فتحت عيوني والحزن سيطر عليـــة
ذب حَــسرة وڪال : تصلين نوران ؟

دنگت رأسي بـ خجل
نوران : لااا
لـهيب : ليش استحيتي مني
من سئلوج لو اللّٰـه يسئلج شتسوين

صفنت أفكر بـ ڪلامة فعلاً إني أخاف
العالـم تعرف إني ماصلي
بس ما أخاف من اللّٰـه

لـهيب : لتصلين اللّٰـه ميريدج
ممحتاجج هو خليج
هيـچ اغرگي بذنوبج بس لا تطلبين منه يساعدج

نوران : ليش ميريدني
بس إني احب اللّٰـه !

ضحك بخفة ذب الجگارة طفاها بالگاع ڪال
لـهيب : وين أكو واحد يحب
اللّٰـه ومايصليلة متحبين تشوفينه
هو يحب يشوفج !

سكتت ماجاوبت ؏َ ڪلامة لأن
ڪله منطقي وفعلاً إني الغلطانــة
أردف مكمل بنبرة دافية
لـهيب : الصبح من عندج امتحان
ويدگ منبهج مو تكومين للامتحان لأن مچبورة متردين ترسبين ؟

هزيت رأسي بـ أي
لـهيب : زين شلون عقلتيها تردين
تنجحين بدرجات الدنيا والآخرة ممهتمتلها
حَلوه يعني تكعدين علمود امتحان المدرسة وامتحان رب العالمين يلااا ميخالف بعدين
بعدني صغيرة أقضيهن بعدين

فرگت أيدي قوي ڪلامة أنب ضميري
أريد أبجي أحس بنفسي انانية
نهض بهدوء نفض ملابسة باوعلي بثبات وكال وهو يصعد فوگ تحت انظاري
لـهيب : ما الومج هي هاي طبيعتنا
البشر منهتم للأشياء البعيدة ومنحسبلها حَساب
بس صدكي أكو مثل قبل يكول
ضَم الفلس الأحمر لليوم الأسود هاي الدنيا عَبارة عن مكان نجمع بي حَسنات
للاخره

حگ لحيته صفن بوجهي وڪال
لـهيب : مرة الإمام علـي ڪال
" من أمن بالدُنيـــا أحمق "

فتح الباب يحدق ؏َ البيت من الداخل
لـهيب : أخير نصيحة لا تصلين
لأن تخافين منه صلي لأن تحبينه راح
تكون الها طعم ثاني هاي الصلاة ..

نوران : أنت تسمع أغاني
هاي مو حرام !

ضحك بخفة
لـهيب : محد ڪلج
اني معمم هم عندي ذنوب
لا ابشرج ذنوبي متخلص منورة اختج

نوران : شنوو
هز رأسة بـ يأس ڪال
لـهيب : ڪلهن نفس الثول
يا علي

راد يدخل حجيت بسرعة
نوران : إذا لزمني ولد
اللّٰـه يزعل مني؟

عگد حواجبة احتدت ملامحة ڪال
لـهيب : منو لازمج؟
نوران : هذا أصهب المستهتر
قبل شوية لزمني من أيدي منا شوف

حجيتها ورفعت أيدي اراوي عض شفته السفلية وابتسامة خفيفة
ظهرت ؏َ ثغرة ڪال
لـهيب : أصهب المستهتر
شوف اللّٰـه اني أربي هذا الساقط

حجاها ودخــل للبيت وسد الباب نهضت
بسرعـة ؏َ المغسلة غسلت
أيدي إلي لزمني منها وتوضيت ڪعدت صليت العشا وأحس براحـة نمت ؏َ سجادة

نوران : اني آسفة
اعرف اني مو خوش بنية
واسوي شغلات موزينه هواي بس إني
احبك أن شاءلله تحبني

حجيتها وكمت لميت السجادة حطيتها
؏َ جهه طلعت برة لكيت ودق
مسوية عشه ڪلها ڪاعدة ؏َ سفــرة بس أنسام ولهـيب حتى أصهب
رحت أكلـــت وياهم وبعدها ڪملت دراستي

رفعت رأسي من دخلت أنهار
أبتسمت اليــة بـ تعب واضح عليها شكد
هي مقهورة وضايجة بس ماعرف
؏َ شنــو

نوران : أنهار أكو احد برة
عطشانة واستحي

تمغطت وشمرت روحها ؏َ جرباية
ڪالت وهي وجهه بالمخـدة
أنهار : ماكو ڪلها بغرفتها بس أصهب
ڪاعد يطحن جگاير

نوران : لعــد ماطلع
أنهار : ليشش!!
اكوم اني

نوران : لاااا لااا
هسه اكوم إني هو مي قابل شيصير

حطيت الشال ؏َ شعري مديت رأسي
من البـاب البيت
أظلم مابية ضوة ڪلها مطفية الاضوية

شربت مي وإني أباوع بارجاء
المكان وينة شو ماكو مو ڪالت موجود حطيت الگلاص ؏َ الميز
التفت فزيت من شفته واڪف وراي
يباوعلي رافع حاجبة خزرته رأساً

مشيت بسرعــــة أسمعة يحجي
وراي
أصهب : باردة جنها ثلاجــة
يالله وإني مشتعل جـد جدي

ماهتميت الـة ولا فهَمت شنو
قصدة بـ ڪلامة هذا دخلت لغرفتي نمت
يم أنهار...

❛❜ ❛❜ ❛❜ ❛❜ ❛❜ ❛❜ ❛❜ ❛❜ ❛❜ ❛❜ ❛❜ ❛❜ ❛❜

أنســـام : تحركت بأنزعاج
من حسيت بشي يضايقني ؏َ خـدي
شي خشن

فتحت عيوني بنعاس ماكو احد
يمي مسحت ؏َ
خـدي قوي سمعت صوت أحد هَمس : شوف الزقچة

اغمض عيوني وافتحهم فرگتهم
قوي أحس بنعاس مو طبيعي
صحت بصوت ممسموع
أنسام : أريد انااام
لـهيب : نامي نامي منو
يمج

مَــادري شلون يسمعني رغم أهمس
هَمس رجعت غمضت عيني حاولت أنام ماكدر رغم جسمي أحس ذبلان ومابية اتحرك
الغرفة ضلمة ماينشاف شي

عدلت ڪعدتي اباوع أريد
اشوفة وين خاف طلع ! زين هسه بيش الساعة ؟
حسيت بثگل ؏َ جرباية
ت

لمست الجرباية لزمت ڪتفة

لـهيب : لتتحارشين بنصاص
اليالي مو عيب

سحبت أيدي بسرعــة
أنسام : يا آسفة مَــادري
شوف باوع أكلك تسمعني

أحس بحرگته اندار عليه بس ماشوف شي ظلمـة هَندس اباوع مثل الثولة
لـهيب : هسه شسوي بضبط
أباوع اشوف أسمع شتردين؟

أنسام : أريد يم أنهار

لـهيب : ليش بيه ريحة
والله سابح

أنسام : لـهيببببب أخاف
سكت مارد عليه
أسمعة يجر حسرات ويستغفر مَــادري شيسوي

أنسام : لتروح وتعوفني
أخاف بس شغل ضوة مو حتى سكري
أحس صعد

ماحس الى بأيده الخَشنة ؏َ حلگي لازمة قوي
عصر شفايفي بيده عَصر
لـهيب : بس أسكتي هذا
صوتج استغفر الله استغفر الله
للتنعوصين بعد

خَفت من ردة فعلـة ڪل اعتقادي إني الثولة
أنو زعل لأن ڪلت الـه
لـهيب دفعت أيده قوي ؏َــن حلگي

أنسام : تريد اكولك
عمو لعددد؟

لـهيب : تكوليلي؟
أي كوليلي
ماحس الى بگفخه ؏َ رأسي خفيفه
أبتعد أسمع صوت خطواتة

أنسام : شنوهذا
الرعب شغل الضوة مو حموتت

بمُجرد مانطقتها انفتح الضوه
حطيت أيدي ؏َ عيني أعصر بيهن لأن ضوة قوي
شوي شوي يلا ڪدرت
تتوضح الرؤيا عندي

شفته واكف ميل بجسمة ؏َ الحايط
لابس بجامة سودة وفانيلة سودة شعره نازل ؏َ عيونـة مخربط ومبتسم

بلعت ريگي دنگت رأسي استحيت
؏َ دمـي ڪال
لـهيب : هاي شخصيتج
المستهترة وين جنتي ضامتها

أشرت ؏َ روحـي بأستغراب
أنسام : انيي؟
شسويت؟ حجيت إني ونايمة؟

طگها بضحكة بصوت عالي واني صافنة عليه ڪعد بالگاع يضحك ڪأنه
سمع نكته

أنقهرت منـه هو صوجي
توقعت واحد مثله يصير خوش
رجال الخبيث المستفز

ردت افتح الباب مقفولة وهو ڪاعد بالگاع
يباوعلي ڪال : الزقچـة
وين مولية

أنسام : شنو زقچة
منين اجت هاي نوب
أفتح الباب الله يخليك أريد اطلع
ترا عيب مكعدني بغرفتك وأنت مصلخ !!

حجيتها بحرگه دم وإني أباوع ؏َ ملامحة
تغيرت معالم وجهه والصدمة
سيطرت عليـة وكف ؏َ حيلة وسع عيونة

وضرب أيده ؏َ خـدة وڪال
لـهيب : يافلك راح
تغتصبين برائتي شكد ماتستحين

رمشت بعيوني مصدومة من حرڪته
ڪلت بثول
أنسام : شنوو!

أنفجر يضحك بهستيريا ڪلت هسه ڪلها
كعدت ؏َ صوت الضحك
مالته اباوعله مفاهمه شي وهو سكر من الضحك

مسح وجهه أشرلي بأيدة اجي يمــة
عگدت حواجبي
أنسام : احنا اتفقنا ڪل واحد
بغرفة هسه تريدني يمك وبعدين تريد زواجنا
يصير حقيقي وراهااا شنوووو

باوعلي بـرود تغيرت ردة فعلة
بثواني أحلف عليــة مو صاحي نام ؏َ جربايــة
وسحب الغطة متغطي
ڪال وهو مغمض عيونــة
لـهيب : صبرية عدها مفتاح
هذا البيت طبيعي تفوت عليـج بالغرفة
إذا يمي متوصل تخاف مني

أنسام : جذاب .

رفع رأسة وڪال
لـهيب : عيب ولج بگد أبوج إني!

فتحت عيوني بصدمة
ضحك بخفة گح ورجع أردف مكمل
لـهيب : وحگ إلي تلوع گـــلبي
بفراگها مامجذب عليج هي عدها مفتاح
البيت واذا تردين تطلعين براحتج هذاك المفتاح ڪدامج أخذي وطلعي

حجاها ورجع مغمض عيونــة
بلعت ريگي بتوتر ماعرف شسوي هي منيه الي تلوع گلبه بفراگها !! بس أستحي
أنام يمــة واذا أنام يم أنهار سحبت المفتاح فتحت الباب اسمعــة ذب حَــسرة

باوعت ؏َ البيت أظلم ويخوف
سحبت نفس عميق تشجعي أنسام لتخافين لتخافين
ردت أدخل ؏َ الغرفة وتخايلي
أنو إني ونايمــة تجي صبرية تخنگني
لو تچويني إني ونايمة

عضيت شفتي بخوف والله تسويها
مخبلة هاي ركضت ؏َ الغرفة فتحت الباب بسرعــة وطبيت هو ؏َ وضعيته نايم
ماتحرك

فركت أيدي قوي يبو شهلفشلة
هسه شيكول عليه إذا يكعد يلكاني يمــة الصبح!!
يلا ميخالف اهمشي مانگتل

حجيتها بيني وبين نفسي
ورحت ؏َ جرباية سحبــت البطــانية
تغطيت وياه وغمضت عيوني..

فزيت مخترعة ؏َ صوت صبرية تغلط
وتفشر ڪل
ظني ڪاعده احلــم باوعت وراي ماكو أحد يمي الغرفة فارغة فتحت الباب شفتها
وجهه مشهوه من الضرب وأيدها اليسرة ڪلها لافيها

عگدت حواجبي بمُجرد ما لمحتني
رادت تهجم عليــة
رجعت ليورة خايفة ماحس إلى الباب ندفر دخل لـهيب من لمحها رفع حاجبة بأستنكار
دفعتها ودق قوي

هيَ من شَافت لـهيب
دخل تفلت عليــــة وطلعت رحت ؏َ الغرفــة
سديت الباب ڪعدت بالگاع أبجي
نوران جانت ڪاعدة ؏َ الجرباية تباوعلي بأستغراب

دخلت أنهار من شافتني هيج
ذبت حَـــسرة ڪعدت قريبة مني
ڪالت
أنهار : لـهيب يكول خليتجي
تضرب ابرتها حتى نتسمم منتظريها

نترت بيها
أنسام : كوليله ماتريييد
سمعت صوت طرقات ؏َ الباب وصوتة
يكول : هيووو الدگمه
تعالي وجيبي أنسام وياج

أنهار : منيه الدگمه هاي
ضحك بخفة ڪال وصوتة صار بعيد
لـهيب : نوران أختج

نوران : يااا اني هاي
ليش يكول عليه هيج

تأفافت نهضت رحت ؏َ غرفته
فتحت الباب وإني گالبة خلقتي باوعلي رافع حاجبة لگف السالفة رأساً

كعدت ؏َ جرباية جر القميص
وضربني الإبرة هَلمرا بسرعــة رفع رأسة اليـة ڪال
لـهيب : خلصنا
بدلي وتعالي يلا

أنسام : خوش

ردت أطلع فززني صوتة من ڪال :- أنسام

أنسام : هااا

لـهيب : احجيلج سالفة
قبل لا نطلع نتريگ ؟
بللت شفتي باوعت عليـــة
أنسام : مو دينتظرونا

لـهيب : ديلا هسه شينقص
من طولهم
صفنت هزيت رأسي بـ أي

ذب حَــسرة وڪال :- بيوم من
الأيام جان أكو رجال ڪاعد يمشي بالحديقـة
فـ شاف فراشة ڪاعد تناضل وتصارع
حتى تطلع من شرنقتها فـ هو أنقهر عليها حاول يساعدها فـ ڪام وگص شنرقنها
ڪل ظنة واعتقادة أنو هو بـهاي الطريـقة راح يساعدها تطلع بشكـل أسرع

حول بصرة ڪله عليه وإني
صافنه أريد أعرف وين المغزى من ڪلامة أردف مكمل :- هو فعلاً ساعدها
وطلعت الفراشة بشكل أسرع بس هي
بمُجرد ما طلعت ماتت !!

عگدت حواجبي مفاهمه شيقصد بهاي
القصة نهض ؏َ حيلــة
تقرب عليــة وكف مقابيلي حط عينه بعيني
لـهيب : تعرفين ليش
ماتت الفراشة؟
هزيت رأسي بـ لا مثل الثولة

لـهيب : لأنها ماكتسبت
قدرات ڪافية حتى تعيش
بهذا العالم جانت بعدها ضعيفة هزيلة بمُجرد
خروجها انتهت حياتها لأنها ماعدها خَبرة ولا قوة حتى تتأقلم وية ظروف هذا العالم

جانت بيده قراصة مال بنات تقرب
لم شعري بيها يباوعلي
أبتسم ڪتف أيده وڪال :-
المقصد والمغزى بكلامي هذا أنو احنا مجبورين نترك الأشياء على طبيعتها وأن بكل شيء خلقه رب العالمين تجَي من ورائه الحكمة ، وهذا الرجال طبق هذا الدرس على حياته

:- كلها فَـ مرات ضروري جداً نترك نفسنا نعاني من مشاكلنه حتى نلكه الها الحل الأنسب وبهاي الطريقة نكتسب القدرات الكافية الي تخلينا نعيش بهاي الدنيا الصعبة ونحارب حتى نعيش .

أنسام : ليش دتسولفلي
هاي القصة هسه
شنو قصدك؟

أبتسم وميل رأسة
لـهيب : أنـتِ من البداية
من قبلتي تتزوجيني جان ڪل
ظنج هنا حتعيشين مرتاحه وماكو مشاكل

لم شفته للداخل بأسف أردف مكمل
لـهيب : بس هذا الشي
مُستحيل يا مستهتر

حجاها وضرب أصبعة بارنبة أنفي ؏َ
الخفيف عفست وجهي
أنسام : شنو منو مستهتر ؟

لـهيب : أنـتَ

أنسام : إني بنيه ليش
تحجي وياي بصيغة ولد

رفع أكتافة بمعنى ماعرف
لـهيب : ليش اغاتي يضوجك
ابو الـ لعـد

أنسام : لتحاجيني بصيغة
ولددددد

لـهيب : تدلل زقوچي

أنسام : ليش تكول
مستهتر شمسوية؟

أبتسم بخبث نَعم صوتة وڪال
يقلدني عود :- لـهيب لتعوفني
لـهيب احضني اخاااف لـهيبببب

فتحت عيوني مصدومة وهو خربان ضحك
؏َ ردة فعلي حجيت
بسرعة بدون وعي : والله جذاب
ماسويها اني

لـهيب : لتكول جذاب
عيب وليدي بكد أبوك إني

أنسام : اصيحلك بابا؟

طگها بضحكة غمزلي وڪال
لـهيب : اي بابا
من نوع أخر

عگدت حواجبي حجاها وعبرني
واني صافنة مافهمت شنو قصدة اخر شي تقدمت ؏َ المراية باوعت ؏َ وجهي
حجيت بلاوعي بصوت عالي

أنسام : شنو ليش
يحجي بصيغة ولد حتى شاربي
بعده ماطلع

چفلت من سمعت صوت ضحكته
ڪاعد بالگاع يم الباب لازمة بطنه ويضحك
عليه عزا بعيني من الفشلة
مَــادري وين أضم روحـــي

ندگت الباب نهض يحاول
يخفي ضحكته بس ميكدر فتح الباب
صارت بوجهه أنهار متخوزرة

أنهار : عيني مو نريد
نتسمم شطلعت هاي ياخوية

تقدم عليها وهي رجعت ليورة
ڪلها
لـهيب : يلا امشي جينا
جينا ختبدل وتجي

فعلاً طلعو وإني غميت روحـي
ليش بس افشل نفسي؟ وشمعنى بس يمه
اخ نزعت التراك
رحت للحمام بعدها اجيت ڪعدت أكل
وياهم ڪلهم موجودين بس قيس ماكو

ڪلها تأكل بصمت محد حجه
لحدما نطق أصهب وگسر الصــمت

أصهب : شراح تسوي
حجاها يباوع ؏َ لـهيب إلي مركز
بالاكل

إني مالي نَفس أكل أنقش تنقش
رفع عينه اليـة ڪال
لـهيب : أكل العصافير هذا
مو يمي

سوالي لفـة گيمر وبدة يحط بحلگي
حدق بأصهب
بـ جمود ڪال وهو يسوي لفات صغار ويحط ڪدامي

لـهيب : ؏َ شنو؟

أصهب : صبرية

بُمجرد ما نطق إسمها خزرة لـهيب
خنسه وهو انتبه ؏َ نفسة باوعلي رأساً عگدت حواجبي شكو شو ڪلها احسها
تعرف إلى إني

نوران : صدك أنسام
شلون ماكعدتي البارحـة من
صبرية..

مالحگت تكمل وغص لهـيب باللگمه واصهب
خزر نوران ويدگ ؏َ ظهر
خالـــة

عضت شفتها أنهار تباوع ؏َ نوران
وإني مثل الغبية أباوع بالوجوه أنتظر واحد يفهمني
شكــو

أنسام : هو شصاير!

شرب مي لـهيب دكدگ ؏َ صدرة وڪال : ولاشي شغلة عاديــة هي رجعت
تصرخ تريد تصعد تأذيج فـ يعني
هي قصدها شلون مگعدتي ؏َ صوت صريخها

ضليت صافنه ڪلها خلصت أكل
وكامت إلى إني حبسني
يحط أكل بطني ويرجع ليــورة

حجيت واني ادحس اللگمه بحلكي
أنسام : ڪافي اللّٰـه يخليك
والله شبعت

هز رأسة مسح أيده وكام
يغسل حمدت اللّٰـه قتنع ڪمت لميت
السفَرة غسلت المواعين ويـــة ودق خَطر بالي سؤال صفنت عليها هي انتبهت اليـة

أبتسم واشرت برأسها
بـ معنى شنو ؟
أنسام : هيَ صبريـة
ليش تريد تأذيني إني ماسويت شي الها !

تغيرت ملامح وجهه ذبت حَـــسرة وڪالت
ودق : هيَ تكره
خالي لـهيب تأذي أي شخص
قريب منـه

ردت أحجي بس سكتت
من شفت لـهيب طالـع مبدل ولازم سويچه أشر بيده بمعنى بـاي اليـة

ضحكت ودق بصوت عالي التفت
عليـها
أنسام : يااا شبيج تضحكين ؟

ودق : هيج ماكو شي

عگدت حواجبي حجيت بتسأول
أنسام : لـهيب شكد عمرة؟

ودق : دهر ماتعرفين
عمر زلمتج

أنسام : گلبت جنوبي

ضحكت وكالت
ودق : 33

فتحت عيوني بصدمـة
أنسام : جذذذذذذذب .

ودق : ليش

أنسام : مَــادري
ممبين عليــة شكله اكبر من عمره

ودق : اووو أسكتي شاف ضيم
بحياته لحد ما ڪال بس
عمره 33 وإذا تركزين بشعره تلكين أكو شيب

أنسـام : وإني عمري 25
يعني بيناتنا ثمن سنين بس!
مو هواي

ودق : جا ياهو الي ڪلج
بيناتكم هواي

أنسام : مَــادري هو مبين
هيــج

ماردت عليـــة خلصت شغل
ورجعت للغرفة ڪعدت يم نوران ..

هيَ تدرس ڪدامي وإني
أباوع عليــها

أنسام : نونو

رفعت رأسها اليـة نزلت خصلات
شعرها ؏َ عيونها
نوران : هااا

أنسام : شوكت ناوية
تعقدين

نوران : مااااريييييد

أنسام : لعد عمج
اذا درة ياخذج مني شلون

نوران : ميدري شمدري
محد يكوله وميدري جذبو عليه

أنسام : إذا طلب يشوف عقد
الزواج!!!!

نوران : مااااريييييد أنسام ماريييد
ماحبه ماطيقة !

أنسام : ياا ليش
شبي الولد حباب

نوران : مو حباب
وياي مو حباب

أنسام : ڪومي وياي
نحجي وياه نشوف شنو مضوجج
ونصلحه ماشي؟

ردت الزم أيدها سحبتها
مني بسرعــة وبوزت شفايفها
نوران : شبيجن ڪلشي
صار وياجن حليتنه بزواج معليه بيجن

عگدت حواجبي
أنسام : شنو كُلشي نحله بزواج؟
هي مو أنهار الي گتلت روحها عليه وهاي
تاليتها مسويها مگفخه
وإني لخاطرج سويت ڪل هذا شكووو بعد

أنهار : صحيح سمعي
ڪلامها هي أعرف بمصلحتح

التف عليها مصدومة
أنسام : من شوكت أنـتِ
هنا

أنهار : مومهم
هسه يلا بلازحمة أريد أنام
روحن احجن ويه هذا رأس الفچلاية

خزرتني نوران طلعت ورگعت الباب
لزمت رأسي قوي
ماحجيت شي غلط نصحتها من البداية
مسمعت ڪلامي

خلي تتحمل نتيـجة إغلاطها

طلعت لكيت أصهب ڪاعد ؏َ القنفة يباوع ؏َ تلفونة ونوران واكفة ڪدامة خازرته
ممنتبه إلها

لزمت أيدها قوي عصرتها بأيدي
سحبتها وراي ڪعدتها ڪعدنا مقابيلة انتبه النا من لمحها حمحم وعدلت گعدته

أنسام : أنت تعرف بالوضع مو
صحيح؟

هز رأسة بـ أي ومسح ؏َ لحيته عين
عليــه وعين عليها
أنسام : شكد عمرك أصهب

أصهب : 22

نوران : حلو ، عندي
شرط ونتزوج

رفع حواجبة ضحك تك خد
أصهب : ليش هو أنـتِ تردين تتزوجين
لو أني ؟

نوران : صراحـة مطايقة
أباوع بوجهك مو تالي اتزوجك
شتحس أصلاً عمرك 22 واني 16

أصهب : 17

خزرته نترت
نوران : 16

أنسام : لا إله إلا الله
شبيكم!!

أصهب : اي شنوة شرطج
اطربيني

نوران : زين شواربك ولحيتك .

نطقتها بثـقة هو صفن عليها
وإني صفنت عليها وهيَ تباوعله الـه بـ تحدي رافعة حاجبها

أصهب : ليش؟

نوران : ماحب ماحب

أصهب : محد ڪايلج
حبي شسويلج هذاك الحايط
شوفي الزمي راسج ورگعي بي حبيبتي

نوران : هاي هيَ لــعد
حجتها وكامت دخلت للغرفـة

أصهب : بعد أحسن
ڪام وعافني طلع برة البيــت واني
ضليت ڪاعدة بصالة ؏َ نفس ڪعدتي لزمت رأسي قوي حيطگ خايفة خايفة

عايشة بمشاعر مو طبيعية
الخوف محاوطني من ڪل مكان
أحس ؏َ ساعــة ياخذون خواتي مني وأخسرهم نفس خسارة علـي

أخ يا فراگه هد حيلي هــد

أنفتحت الباب الرئيسية دخل
لـهيب عصبي وضعة مبهذل انداريت باوعت ؏َ ساعـة مصارلة هواي من طلــع
ليش رجع

لـهيب : ولد الكو**
إنه الكم

حجاها والتفت من لمحني تغيرت
معالم وجهه تقدم راح للحمام غسل وطلع راح
للغرفــة

هسه إني وين أروح أخاف اروح
لغرفته ويكول گاتله روحها عليـــه
وادري بروحي ماتحمل الى اتفشل هاي صارت بعد روتين

أنفتحت باب غرفة باوعلي بقلة حيلـــة ڪال
لـهيب : تعاي أنـتِ متجين
الى بعزيمة

أنسام : ليش اجي

لـهيب : سالفة وطلعي
وشتردين تسوين سوي

ڪمت وهو أصلا إني مَــادري
وين اروح رحت ڪعدت ؏َ الجرباية وهو سحب المخدة وحطها بحنضه ڪعد مقابيلي

أنسام : أي شنو

لـهيب : عايني إحنا اني
وهشام ولد شيخ معروف بالناصرية!
ودائماً يدزون علينا ومجبورين مرات ثنينا مرات واحد بينا اعتيادي

أنسام : اي وشنو يعني

لـهيب : لازم اروح
ڪم يوم هناك !

فتحت عيوني
أنسام : لاااا عليك العباس
يمه هو رحت يوم واحد حرگتني
أنوب مو ڪم يوم

لـهيب : چا شني الحل؟

رفعت أكتافـي بمعنى ماعرف
زفر نفَس ڪال بقلة حيلـــة
لـهيب : ترحين وياي؟

أنسام : وين
واعوف خواتي؟

لـهيب : مو خواتج
صغاررر وشايلة همهن عايفتهن
وحدهن

عضيت شفتي ماعــــرف شكول
صفنت ؏َ الفراغ أفكر شسوي

أنسام : زين خاف تأذيهم!
لـهيب - متوصل الها وداعت
الشامــة الي بصدرك

فتحت عيوني بصدمة
حطيت أيدي ؏َ حلگي بعــد ما شهگت
أنسام : عزه بعيني
شمدريك !!

طگها بضحكة بصوت عالي وڪال : من جنت
صغير شفتها

أنسام : شلون شفتها !
لـهيب - تحب اسولفلك؟
گلبت عيوني بملل ڪلت
: شيصير لو تبطل تحجي بصيغــة
ولــد
- أخ يابة ، أخ بوية
حجاها وحط المخــدة ؏َ جرباية نايم عليها
مغمض عيونــة

فتح عينه باوعلي مقلص عيونــة
حط عگسه ؏َ المخدة ورأسه ؏َ ايده ڪال : اسولفلك !

بوزت شفايفي وطنگرت
أنسام : ڪافيييي لهـيببب
فتح عيونة مصدوم رمش
بلع ريگه نهض لزم عيونــة قوي مَــادري شيهمس بس سمعتـه يحجي بخفوت
- صبرني يابوالحَسن ..

ڪام فتح الباب ماعرف وين راح
شوي ورجع بيده
منشفة ينشف أيده وجهه الظاهــر جان بالحمام .

أنسام : شلون متأذي خواتي
حدق بية بـ صمت
لـهيب : يكعدن هنا وينثبرن بمكانهن
هيَ ماتوصل يمهن

أنسام : لــعد اني هم
ابقى فوك ومتوصلي
أبتسم وڪال : أستقر أبو الـ لعــد
تصعدلك اذا أنـتَ هنا

ذب حَــسرة أردف مكمل :
هيَ تريد تأذيك الك ! لو تريد تأذي
خواتك چانت من البداية
حرگت نوران مو أنـتَ

عضيت شفتي
أنسام : شمعنى إني ؟
ليش هيج تگرهني وحاطتني برأسها

تقرب عليــة جان واكف ڪدام المرايــة يمشط شعرة واني ؏َ جربايــة
حط وجهه بوجهي رجعت ليورة
قلص عينه وڪال : لأن أنـتَ تخصني
هيَ أي شي يخصني تحب تأذي
حتى تشوفني أتعذب ..

بلعت ريگي عصرت أدية قوي
گزبر جلدي من ڪال " أنـتَ تخصني "

أبتعدت عنـه دنگ رأسة مبتسم
رجع يحدق
بالمرايــة

حجيت بصوت ناصي
عبالي مـ راح يسمعني
أنسام : لتحاجيني بصيغة الولد
اضوج!!

التفت اليــة ڪال
منصي صوتـة مثلي : تضوج ، اويلييييييييي يابة يضوج الزقچ

خنزرت وصحت بصوت عالي
أنسام : لهييييب ڪافييي شبيككك !!

فتح عينه ڪال بحسرة
لـهيب : لتحجي هيج لك قشمر
لا ادفرك مو ڪل شوي رايحين للحمام

عفست وجهي بأستغراب
أنسام : شنوو؟؟
لـهيب - منَ عابت لك هلبچم

أنسام : يعني اني فهمت
جملتك الاولى حتى من تالي افهم هاي
شمر المشط بنفاذ صبر
ڪال : يعني ياا حبيبي ، يااا وليدي
يا زقوچي لاتحجي هيج أحسن الك ولسلامتك

سكتت مارديت لأن مثل الثولة
ڪلشي مافهم ؏َ حجــية
راد يطلع فتح الباب الغرفــة رأسا ڪلت : اروح وياك

اندار عليـــة وأبتسم بطمائنية
لـهيب - حظري هديماتچ
بليل نطــلع

هزيت رأسي بـ أي هو بعدها
اختفى ماشفته اليــوم ڪله ماعرف ويــنة
لليل إني خلصت
ڪِلشي بس لســة ما ڪلت خواتي

حطيت الجنــطة بغرفته
رحت عليهن جانت نوران تدرس وأنهار حاضنه نفسها وتحدق بالفراغ

انتچيت ؏َ البــاب انتبهن
عليــة رفعت عيوني للسگف أفكر شلون
أفتح الموضوع

أنسام : راح أروح
وية لــهيب لفترة وأرجع
لتخافن ماعليجن شي بس ابقن هنــا
ولا تنزلن يم صبرية وتحتگن بيها

غمزتلي أنهار وڪالت : شهر عسل ؟

أنسام : شهر الـ خرا انجبي
وكفت ؏َ حيلها تطگ إصبعتين وتردد : ضل البيت لـ أم طيرة وطارت بي فــرد طيرة

ضحكت ؏َ سوالفها مدت رأسها
ودق وڪالت : مني هاي أم طيرة

وكفت أنهار باوعت لـ ودق ڪالت بثقة : صبرية المطــية .

ضحكت من ڪل گــلبي ؏َ الإسم
أنفتحت الباب دخل لهــيب أشرلي بـ أيده تعالـي
لحگته هو يحضر بجنطته
صفنت عليـــة

أنسام : احضرها إني ؟
لـهيب : لا ، بس لبسي راح نطــلع
هزيت رأسي بـ أي لبست فستان أسود حلــو وشال أسود ڪلشي ما حطيت
لـ وجهي

هو لبس دشداشة سودة حــلوه
ولف الغترة السودة
؏َ راسـة

صافنــة عليــة مامنتبه ؏َ روحـي
سحب نَــفس التفت شافني صافنه عليــة
أبتسم وغمزلي ڪال : اوف تسرسح
؏َ جمالي

صحيت ؏َ نفسي عگدت حواجبي وڪلت : شنوو؟ لا هيج جنت أفكر بسالفة

ضحك بصوت عالـي طلع من الغرفة
شوي ورجــع بيــده
عبايــة شمرها عليــه

گلبتها بأيدي
أنسام : شنوهاي؟
لـهيب - عباية

فتحت عيوني بصدمة
أنسام : صدُك مَــادري
والله همزين ڪتلي

رفع حاجبة وأبتسم ذب العطر
بعــد ما سبح بي سبح تقرب عليــة
حاصرني بين الكنتور أيده منا ومنا

نزل روحــة لـ مستواي مبتسم بخُبث
قرب كِلش أنفاسي تلفح
خـدي ڪال بهدوء : ولك شو تستهزاء

بدون قصـد مني سحبت نَــفس من عطرة وغمضت عيني فتحتهن لكيته يباوعلي
وعيونة ذبلانه

ڪلت بـ ثول : عبالي عطرك
بي ثباتيـة طلعت
تسبح بي سبَح حقه يسبقك
ميل رأسة ڪال
- ليش لازم مركزة وية عطري
: أي والله حيل طيب

غمض عيونـة ورجع فتَحهن
يحاول يسيطر ؏َ نــفسة
ڪال يحاول يضيع سالفـة چفصاتي : أخذي عادي هو رجال ونسائي

أبتعد عني أبتسمت بأنتصار
رحت ؏َ العطــر
رشيت مني شمَيته جان عادي عليـه

لازمه العطر بأيدي افر بي ڪلت بأستغراب
أنسام : لهـيب طلعت ريحته
مطيبة عليـه ليش

تقرب سحبني من فستاني شمني
حيل ڪال : لا طيبة نفس
الشي

عگدت حواجبي
: لا والله شوف ريحته
عليك أطيب
رفعلي حاجبة وضحك
- شمعنى يمي أطيب ؟
رفعت أكتافي بعدم معرفة ڪلت
: هي ريحـة جسمك طيبة
وية العطر تطلع أطيب

حجيتها وحطيت العطر ؏َ الميز التفت لكيته صافن عليـه مسح العرگ الي ؏َ گصته
ڪال بصوت خَدران : اشتعل
أبوج الـ كو**

أنسام : يااا
حجاها وطلع رگع الباب قـوي وراه
هذا شبي ؏َ ساعـة

ورة شوية رجع بس يخوزر بيـة
ردت احجي زمخ بيه
لـهيب : مچتف لـ أبو فاضل يا أنسام
إن فگيتي حلگج اشكج هنا
گوة لازم روحي عنج من لسانج هذا

أنسام : هو انييي شسويت
لـهيب - شسويت عمت عيني عليج
اچفصي وتعال يا لهيب
تحمل وأصبر

لبست العباية وسكتت خفت لا
صدك ؏َ ساعة يحطني ويگتلني يخوف هذا
لزم الجنـط وفتح الكنتور
جان أكو خنچر تلمسه بأيدة وذب حَـــسرة اخذه وياه
فتح الباب طلعت وياه وإني مبتسمـة

طلعت للصالـة جانو ڪلهم ڪاعدين
نوران ڪاعدة وتخوزر بـ أصهب
وأنهار نايمة ؏َ چتفها

ودق تطبخ بالمطبخ
من طلعنا صوفر أصهب وڪال : أنسام
لازم تكولين احببت ثلاثيني
لا يبالي

رفع حاجبة لهيب وخزرة وهو يحاول
يخفي ضحكتــه
أنسام : ليش

گلب عيوني لهيب
: بابا خبلتيني بثولج هذا
رفعت رأسي الــة
- شنوو؟

غمض عيونه بنفاذ صبر
أصهب : أنسام لزمي برجلج
وايديج هنا گتل عليه ازدحام

لـهيب : دسگت هسه تصلخك
بوحده شنووو لو ليشش

عقجت وجهي بأستغراب ڪلت : شنووو؟
ڪلها صارت تضحك عليــة
سحبني طلعني برة بنزلتنا

جانت صبرية ڪاعدة بالحديقة وجهه
ماينشاف من الضرب
صرت بظهر لهـيب خايفة منها

حدقت بينا والحقد يطلع من عيونها
هَمست بغضب : چبان .

جان يمشي وكف حدق بيها بصمت
بعدها أبتسم بأستهزاء لازم أيدي قوي عصرها بأيده ڪال : جبان لخاطرها
وقوي يم ڪل واحــد يحاول يأذيها ..

حجاها وغمزلها سحبني وراه
حط الجنط بالسيارة صعدت يمــة بصدر تذكرت آخر مرة من سطرني راجدي هنا

صعـد وسد الباب بدة يسوق
المسافة ڪُلش طويلــة
وكفت السيارة يم اسواق جان مفتح
نزل تأخر شوي
بعدها طلـع يدخن وبيده علاگه متروسة

من صعد حطها بحضني
وڪال : ماعرف شتحبين
جبت شكو شغلة طلعت بوجهي

أبتسمت بعدها شـغل أغنية
فتح الجامة الهوى حلو يلفح وجهي البرودة إلي بي تخليني أحس بشعور حلو
هو جان يدخن ويدندن وية ڪلمات
الأغنية

لـهيب : وردة سقيتها من دَمع
العيون صارت بالحَـسن فَتنه للعيون
نگطعت من غَضنها وضيعت ڪل حسنها

حسيت بـ نعاس ؏َ صوتة والهوى
غفيت بدون ماحَس ؏َ روحـي

فزيت ؏َ بريگ قوي داســة لــهيب
فتحت عيوني مخترعة أباوع ؏َ المكان جنه بمنطقــة ريفية مو غَريبة عليــة أحس
نفسي شايفتها !

حدقت بـ لهيب الي جان يباوع ؏َ شي إمامة عيونة مصدوم وعيونة تجدح نيران الغضب
والحـقد

توجهت عيوني ؏َ المكان إلي صافن
بي شفت رجال بُنيته هزيلة ضعيفة جان طويل لابس تيشيرت وبجامـة

حاط گبوس التيشيرت ؏َ رأسة
ويشتم بأيده بـ نشوة
انتبهه ؏َ ضوة السيارة الي مَسلط عليه عقج وجهه نزع الگبوس بينت
ملامحــة

بلعت ريگي بخـوف هذا الشكل
مو غريب عليــة الأثر الي بوجهه والطبرة
الي بحاجبـة
حط أيده ؏َ عينه يحجب ضوة الشمس إلي صار بوجهه

لـهيب تخبل صار ميشوف ڪدامة سحب
الخنچر زمخ بيه بصوت
عالي خلاني ارجف
لـهيب : لاتنزلين إذا تنزلييين اذبحج بيدي .

حجاها ونزل ورگع الباب وراه
جان نفســة أسرافيل إلي وصلت رسالته لتلفون لـهيب واني شفتها
أحس رجلية صارت خيوط من الخوف

أرجف بشكل مو طبيعي احس
گلبي ؏َ ساعة يوكف من سُرعة دگاته
فتحت الباب بهدوء
نزلت احدق بيهم

تغيرت ملامح أسرافيل وهو يشوف
لـهيب واكف
ڪدامة ضحك بطريقة تخوف ڪانه مجنون مو صاحي

ركزت ؏َ انفة ڪانت أكو ماده
بيضه فرگ خشمه قوي
يحرك رأسة بطريقــة تخـــوف ڪال بخُبث

أسرافيــل : هلو سوميــــا ....

- لُقب الأول بـ أسرافيل
وهو من اقوى ملائكــة اللّٰـه
صرخته ڪفيلة بـ تدمير العالم
ولُقب الآخر بـ سومــيا
وهو أول من خَلقه اللّٰـه ؏َ الأرض
وهو مصنوع من سَموم النار
فـ كيف سيكون اللقاء ومن المنتصر؟
وهل اللقب وحدة ڪافي لـ نحكم بهِ ؏َ الإنسان
هذا ما نـدعوه يا عزيزي القارئ
بـ لقاء الجبابرة .

يتبـع ..
الحــكاية تستمر إلى إحداث أخرى .

𖦆 𖦆 𖦆 𖦆 𖦆 𖦆 𖦆 𖦆 𖦆 𖦆

حسابي انستا للتواصل 👇🏻👇🏻