#انسام_ اللهيب
بقلـمي أنا زينب خالـد
ضيفـو حسابـي بالواتباد وعلقو بين الفقرات وصوتو يحلوات 🥹🩷
𖦆 𖦆 𖦆 𖦆 𖦆 𖦆 𖦆 𖦆 𖦆
أنسام ::- طــحت بالگــاع بعد ماكــدر وإني اباوع
لـ عمي فــز مختـرع على إثر صوت الطلقــة
وأنهار لازمــه ركبــتها تجــر النفس بالگـــوه وعيونــها متشخصنة على الشخص الي
ضرب الطلقة بالجــو
توجهـت عيونـي عليــة ضم سلاحــة لـ خصرة وراح متقدم لـ عمـي سحبـة من ياختـة
جانت نوران واكفــة تباوع لـ أنهار تريد تروح بس خايفـة
استجمعـت قوتـي ورحـت لـ أنهار فززني صوت سيارة من وراي التفت سويت مجـال يعبرون وهـمه يباوعون مصدومين
ليش متجمعين بــرة تجاهلت نظراتــهم وركضت ساحبـــة أنهار لـ حضني
وهي تسحب النـفس سبق وكلـت أنو عمـي فعلاً ضخـم وبُنيـتة قويــة وطويل
وإسم اللّٰـه عليــة محافظ على شكل جسمــة بحيث الضربة مـنة تخليج تنطقين
الشهادة
حجيت واني امسح على رأسها
وعيونـي على الولد الي شايــل سلاح عيونـة تجدح نـار وهوه يحجـي وية عمي
عمـي جان خانس على غير العــادة
: شسويتـي أنهار شـبي هذا
متسودن منخــلص احنــا يعني ؟؟؟
أنهار : كُلشي ماسويت من وحَــدة أجاني يتهـجم عليـــة
غمضت عينـي وشديت على حضنـي إلهـا أدري بيهـا ضامة شي بس تالـيتها أعرف
ماحس إلى شـمر عمـي حيل بالگــاع كـام عمـي وضحك بـستهزاء نفض
ملابسـة وباوع لـ أنهار متوعــدلها
تقــدم الولــد ألنــا ثنه ركبته وكعد كدامي اني وأنهار وصل لمُستوانا
يباوع عليــنا عين عليـــة وعين عليـــها
: خــوما تعورتـي ؟
خزرتــه بحـدة أنهار وعاطـت بتهجم
أنهار : شتشوف أنت ؟؟؟ واحد ومخنوك شتريدة يصير يعني يكوم ويركصلك
چفية
قلص عيونة ورفع حاجبة يباوعلـها
عضيت شفتي وكرصتها بفخذها اريدها تسكت فوك ما الولد ساعدنا
باوع علية وكال :
خوية فوتيها ليجوه اكيد هسه انهبطت
هزيت رأسي وتشكرت منه خلف الله عليه سندتها وفوتتها ليجوة ونوران واكفة
تباوع علينا وتبجي
عاطت بيها انهار :
بسج عاااادددد مفالحة بشي بس بالبجي كله دگ ولطم غدي شني عيشتج
أنسام : كافي انهاررر شبيييييج اليوم تخبلتي؟؟؟؟؟
شبيج يمة ؟؟؟ شبي عمي ترا سالفتج
مامقتنعة بيها وهذا اسلوبج وية الولد بالعباس المرة الثانية خلي اشوفج تحجين وية
أحد هيج الطمج على حلكج يا حقيرة
نترت أيدي وابتعدت تصعد على الدرج ونوران واكفة صافنه فعلاً طبعها مزعج بسرعة
تبجي بس موبيدي شي ماعرف شلون اغيرها
لزمت رأسي بألم ..
عفية منكدر نكعد يوم بدون أحداث لازم لازم اكشن أريد الروتين احتاجة الروتين
الي العالم تتذمر منه إني احتاجة تعبني الخوف على إخواني
مليت من شعور الخوف من خسارتهم شسوي واحميهم وين اضمهم ضميتهم بروحي وهم أذوهم
ولچمو گلبـي بيهم تقربت على نوران باوعتلي عيونها مدمعة حطيت أيدي على جتفها
ربتت بهدوء عليها وهي تكافح حتى تكبح دموعها
صعدت ليفوك وشوي واجوي علي
ولارا دخلو سوة باوعت على علي صاير يطلع هواي ميحجي وكتوم مجان طبعة هيج
مدري إني الي ماكعد اكدر اتقبل انو همه كبرو هاي هي باوعتلي لارا شافت وجهي
عفست وجهه
لارا : شبيج حبيبتي شصايرلج
هزيت رأسي بـ لأ أخاف احجي وعلي يسمع صعدت فوك بدلت ونزلت گضه اليوم
طبيعي بس ميريام ماكو من الصبح لليل وكل ماتخابر علية لارا يطلع
مغلق
لليل دخـل ميريام يباوع بالوجوهه عاط بصوت
: وين أنهار ؟؟؟
أشرت فوك وإني گلبــي نغزنـي ليش هيجي جاي سو الدرج بايتين وصعــد واني وراه
ولارا تباوع من جوه مصدومــة دفــر الباب قـوي حيل
فزن البنـات مخترعات يللبسن حجاب
حجيت بعصبيـة
أنسام : شجــاااااااك ميريام البناات
ملابساتتتتت !!!!
التفت عليـــة معصب وأحس شياطين الدنيــا كلها تتطافر كدامــة باوع
على نوران وهوه بــس خزرها هاي كامـت ترجف وعيونـها كامت تلمع والدموع تلالي
بعينــها
ميريام : بسرعـــة نوران بـــرة
مارييييــد احد بالغرفـــة الزفـت غيررررر أنهار
أول مــرة أسويها والـزم رجال بحياتي غير أخوي سحبتــه قوي عليـــة فتح
عيونــة مصدوم ويباوع على أيدي الى قابضتها
رفعــت أصبعي بتحذيــر وكلت
: ميريام أنت إبن خالـي وفضلك علينـــا هواي
ماعفتنـا بيوم ودوم تساعدنـا
بــس خواتي خواتي ديربالــك تتقرب ألهم وروح أبوي يا ميريام أخذهم واهــج منكـم
اروح يمــها وشيصير ساعتـها خليصيـر
ضحك بطرف شفتــه ورفع رأسة ليفوك يضحك بصوت عالـي لعب بشعرة بـ عشوائيـة
يضحك بــس عيون تجدح نار معصب أحس على ساعــة ينفجـر
انتبهت لـ أنهار متجاهلــة الوضع والي ديصيـر وكاعــدة تأكل نستله وتقرة بالكتـاب
ومطنـشه الوضع برودهـا موتنـي أباوع لنوران شلون الخوف ماكلـها أحسـها هي
الي مسويـة السالفة
رجع وجهــة نظراتـه عليـــة وكال وهوه
گـاز على سنونــة :
أنـتِ تعرفيـن اختج شصخمت ؟؟؟
تعرفيــنننن شسسسسسسووووتتتتتت
حجاااااهاااا وهوه يصيح بصوت عالـي رج البيـت رج على اثر صياحــة طلع علـي من الغرفة
اجه علينـا يباوع مصـدوم من شافــه ميريام كام يستغفر وسكت
صعـدت لارا تباوع مصدومـة همين بلع ريگ
ميريام وحـجه بهدوء مصطنع
: ماريــد أحد بالغرفــة غيـر أنهار وانسام
علـي :
شصاير
ليش صوتـكم عالـي ؟
ركضت نوران لزمـت أيده ومسحت عليـها بحنية كالت بهدوء
: عادي تقرينـي مدافتـهم الكيمياء
ابتسملها بحـُب وكال
: يلا تعالـي
وهو عيونة ؏َ أنهار
طبت تركض مـثل الطفلـة أخذت كتابها تباوعلـي أبتسمت وطلعـت لارا
باوعت بـ حزن وسدت الباب عليــنا واسمع صوتـها هي وتنزل على الدرج
بقينـا بس إحنا التلاثـة بالغرفــة باوعـت على ميريام بـ قلق اريـد يحجـي
أريد أعرف اختـي شمصخـمة من مصيبـة
التفت علـى أنهار بثوانـي تقرب عليــها لزمـها من زندهـا قوي يعت بيـها
ركضت عليــهم سحبتــها من أيده قوي
أنسام : هسـة غيرررررر ياربيييي
يفضهااا ويحجـي شصاير
التفت علـى أنهار خازرتـها وهي أبد
فعلاً مثل برودهـا مشايفـة تحسسني أنو الموضوع طبيعـي
أنسام : انهاررررررر شكوووو متحجيننن
شسويتي
حجت بكُـل هدوء
أنهار : ماكـو شي هوه كـبر الموضوع
كُل ما بالقصـة أريــد اتزوج
رمشت بعيونـي ممستوعبــة حجيت بعـدم
إهتمام واني اعت بيها
: مو كت سوالفج السخـيفة شسويتي ؟؟؟
ضحك ميريام وعاط
: ياااااااسخاففففة اختج تحجـييييي
صددددك
وسعت عيونـي بصدمـة اباوعلـها كعدت على الجربايـة لأن رجليــة بـعد
متحملنـي ضربت على رجلـي بقـوة وصحت
: انهاررررررررررررررر كافـي
يمــة طلعتيلي گلـب بصففففف گلبـييييي كافـي خبال
حجت بعـدم مُبالاه
أنهار : أنسام شبيج كبرتـي الموضوع
ترا إني شابـة ومن حقـي اتزوج
ضحك ميريام بصوت عالـي وفرگ
عيونـة الي صار لونـهم احمر
كال الـها مستهزاء
:: بعدطي** بت الچلبـة من جنت بعمرج
جان عبالـي الجهال يجيبوهم
بكراتين ويحطوهن بطن نسوان وهاي تريد تتزوج
طلعت خُصلة من شعرها تلعب بيـها
: مو شغلي اذا أنت متعرف
إني أريد افتح بيـت
عفـطلها واني فتحت عيونـي اول مرة
يسويها استغفراللّٰـه بنُص هذا الوضع وحصرتـني ضحكـة
ميريام : دمشـي لج ام الصخول
تفتح بيـت وهوه أنـتِ كتاب مادبرتـي تفتحي تجين تفتحين بيت
سكت شويــة استغفر ورجع كال
: دباعـي لروحج جاهلــة شتخلفين وين صايرة
هاي جاهلـة تربـي جاهلـة بابا
بلاول مشطي شعرج وتالـي تعاي كولـي اتزوج بكفشتج هاي
يحجـي بعصبية فاير دمــة وهي تضحك بـ ستهزاء ممهتمـة لكلامــة
أنهار : ما غيـر رأي لو تموتون اتزوج
يعني اتزوج كافـي عاد بـزعت روحـي من عيشة الفگـر خلونـي اشوف حياتي
انصعقت من كلامـها رفعت رأسي اباوعلـها حجيت والغصة بصوتـي
: ومنو هذا الي تردين تتزوجي
سـند روحـة ميريام على الحايط ولزم رأسة
قوي كلشوي يخزرها
ميريام : هنا الي خبلنـي هنا
جنزتـه تجنـززز ويكلي هي تحبـني وتريدني
وسعت عيونـها أنهار حجت بعصبية
: لااا مو هيـج الحجـي هوه گـتل روحـة يلحكنـي من مكان لمكـان ولزگ خلانـي
احبة وكال اريد اتزوجج
أنسام : أنهار شحبيتـي بي متفهميني
وين شفتي يا صاخم حظي
حجت بكُـل برود وثقة
- حبيت شواربـة
سـكت الكُـل فجأة وصار الهدوء سيد للموقف أنهار تحجي بـجدية واني صافنة ارمش
بعيونـي اباوعلـها وميريام كذالك نفس الحالـة بس هوه أضرب لأن فدمـرة مصدوم
لــزم رأسة قوي حيل وصاح
ميريام : اخ بويـة رأسي
لااااااراااااااا
صاح بصوت عالـي شوي واجتي تركض مخترعـة حجت بخوف
: ها شنو شكو
ميريام : مي مي نشف ريگـنا هنا
تباوع مستغربـة هزت رأسها بـ أي وراحت تجيب ميريام سحب الكرسي مال ميز تواليت
وكــعد عليــــة يهـــز برجلـة
باوعلـي
ميريام : تعرفيـن لعد هوه منو ؟
غمضت عيونـي بتعب
: خاف ناقصـة ليش بعد أكو صدمات
أكثر من هـاي ههه
: ضابـط يشتغل وياي الي تريد
تتزوجـة الخاتـون
ضغطت على عيوني بأصابيعي حيــل تخبلت أنهار نهضت على حيـلي بنفس
الوقـت دخلت لارا انطت ميريام المـي شربـة كله مرة وحده وباوعلـي منتظر مني
جواب على صخـام وجهه أختي
أنسام : عوفــها بعدها مراهقــة واول مرة واحد يخطبها وممصدكـة ختولـي
رايحـة أنام من رخصتـك
انتفضت أنهار متعصبـة وكفت بطريقـي كالت بـ عصبية :
ترا داحجـي صدك أنسام !!
دفعتـها قوي من وجهي مالـي حيل تصرفاتها أبد أبد مو عقلانـية كافـي عاد دلال
عمرها ١٨ شوكت تعقل بعــد بعدني ماستوعبت صدمـة البارحـة تجيني اليوم
هه واللّٰـه شنو أريد اتزوج و شنو ضابط بكد ابوها ضحكت مستهزئـة بالوضع
فتحـت باب الغـرفة جانت دافيــة باوعـت علـي ونوران كاعدين يقرون باوعـو عليـــة
بـ استغراب
تجاهلت نظراتـهم شمرت روحـي على الجربايــة بـ تعبت جريت نفـس أحس روحـي
مختنگــة أحس اكو واحد مانعنـي أتنفس
نوران : شنو بيــها أنهار
حجيت واني مغمضة عيونـي
- درجاتها ضعيفة فدنوب راح ترسب
الظاهـر حتى وزاري متدخل الخاتون
ماشـفت حتى رده فعلـهم أحس تعب الدنيا كـله على متونـي استسلمت للنـوم متناسيـة
الوضع الي حولـي
ماعــرف بيـش الساعــة فـزيت فرگــت عيونـي حيل فتحت الباب وإني احط الحجاب
على رأسي البيت كُــلة اظلم ماكو ضوة نزليت ليجــوة
باوعـت على الساعــة ٤:٣٠ رحت للمطبـخ شربت مـي مالـي نفس أكل خلي تصير
الصلاة واصلـي وابدل واطلـع هي حياتـي صايرة فردنوب انوب مو علــــية أستاذ لهــيب
وفعلاً صليــت وغصبت روحـي على الأكل حتى ما تخربط هناك وأكل رزالـة غسل ولبس
صعـدت ليفوك علمــود أبدل
لبسـت على السريـع لأن حتصيـر الـ ٦:٣٠
كعــدت علـي وأنهار كعدت نوران ماخذتلـها اجازه لأن متكدر تداوم بس هـي وضعها
تحسـن يرادلــها شي شهــر يلا تداوم هيج شي
جريت تلفونـي حطيته بالجنطـة وطلعت أركض ركـض أريد اوصـل حتى
مايلــكه عليـــة حجــه اليــوم إريــد اشوف شيحجـي
وصلت وكفت بمكانـي مصدومـة لا أخذ ولا انطـي واكف يم باب الشركـه منتچـي
على الحايــط ويباوع على ساعــة ومدري شيحجـي
رفع رأسة شافنـي وابتسم ابتسامتـة غريبـة
بكـُل مرة يبتسم بيـها احسة
يستهزاء ولا مرة شفـتة يبتسم من گلبــة
توجهت عليـــة باوعلـي من فوك ليچــوة وكال
: خمس دقايق خمس دقايق
لو متأخرة جان نفصلتـي
ضرب أيد بأيد وكال بصوت ناصـي
: حرامـات
فتحت عيونـي مصدومـة إني مثلـة فلاشايفـة يعني طبعـة غريب تصرفاتـة غريبـة
اباوع عليـــة طلع مفتـاح من جيبـة فتـح الباب ودخـل دخلت وراه
التفت عليـــة
لهــيب : لا انتظري بــرة بس ملف
اجيبــة ونطلــع
هزيت برأسي كتفت أيدية بردانـة الجــو بـارد حيــل الناس تـوها بدت تطلع للدوامات
الى إني جـني أم البن من الخمسة يريدنـي اجي
تأخــر عليـــة وإني احس أيدية صارو ثلـچ ماحس بيــهم شفايفي ترجف من كــد البرد
التفت أريـــد اشوف وين صار فزيت مخترعــة
رجعت ليورة
من شفـته واكف مكتف ايدية ومنتچـي على الحايط يباوعلـي من باوعتـلة عـدل روحــة
وكـال
: هاي شصاير بيج
صدك يحجـي هذا ليش مكال هوه موجود راح يخبلنـي صارلـي وياه تلاث أيام
وأحسـة مخبـل مو عاقل استغفر الله خلي يسمعنـي احجيـها خوش فصـل يلطشنـي
صعـدت وياه بالسيارة ليورة ضحك والتفت عليـــة وكال :
اكو احد كايلج إني سايق مال الخلفوج؟؟
حجاها متنرفز بلعت ريگي بخوف ونزلت صعــدت ليكدام
شغـل السيارة وشغـل تدفه وإني ماكـو ارجف رجـف من البـرد حجيت واني
اطك سن بـسن
: وين حنروح أستاذ ؟
حطيـت ايدية على وجـهي أريد ادفيـهم
جان لازم تلفـونة وعين
عليــة وعين على الطريق ماهتــم لكلامـي
يايابـة شكد ينرفز هسـه علاقل سوي إحترام للمقابيل هاي مرتـة شلون عايـشة ويـاه
كـح ونزل تلفونــة وكال
: الوفــد يتأخـر للعشرة تجيـن تتريكين بيتنا ؟
التفت مصدومــة اباوعلــة بقهـر حجيت بحركـة دم وبدون مانتبـه على نفـسي
: ميجوووون وكعدت من الاربعـة ؟؟؟
باوعلـي رافـع حاجبـة
لهيب : وشكـو بيـها
خومـا نقص من طولـج الحلـو ست أنسام
سكـت فايرة أعصابي ماكـو هيـج شـي اجت بالـي
فكـرة اروح وياه واحاجـي عمو
هشـام هناك لأن مستحيلة إني اضل وية هيـج أنسان
أصلاً ماسمع جوابـي رأساً حرك سيارة وتوجهه لبيتـهم صراحـة اني مرات قليلـة فايتـه اله لأن استحـي فزيت مخترعـة من
داس بريـك حيــل
حطيت أيدي على الجامـة حتى لا انضرب بيـها باوعـت هاي يـم حينا سيارة طلعت واحنا گـسرنا عليـها أعرفها هاي
سيارة ميريام نـزل لهيب بعصبية وتوقعي كأن صحيح الي بالسيارة
جان ميريام
باوع على سيارتة أستاذ لهــيب ومدري شحجـو بس اشتد بيـنهم النقاش
فتحـت باب السيارة انصدم ميريام من شافنـي
ميريام : شتسوين أنـتِ هنا
شمصعدج وياه منو هذا ؟؟؟
ضحك أستاذ لهــيب بستهزاء
أنسام : ميريام كافـي شبيك هذا
مديري بـ شغـل وعدنا وفـد راح نجيبـة
ميريام : اها و أنـتِ شتسوين ميروح
هوه وحـده
انتفض أستاذ لهــيب معصب دار ميريام عليـــة وخزرني وكال
: شكو تبررينن؟؟؟
رجع باوعلــة وكال
: هاي اول واخر مرة اسمحلك تتدخل
بـ شي ميخصك المرة الثانيـة
حظ حظك اطيحـة
ميريام : هه أشياء تخصك ؟
وينــها هاي بت عمتـي
لهيب : وهسـه هي بهاي اللحظة دتشتغـل يمـي
وأي شخـص مالـه حق يتدخل بيها
ماشي حبيبي الشطور ؟
حجاها وضرب راجدي خفيف على وجهه ماحس الى ميريام ضرب بوكـس رجع ليورة أستاذ
لهيب لازم طرف شفتـه يتحسسـها
عـدل روحـة وكام ضحك هي ثوانـي واشوف ميريام مدد بالگــاع صارو يتعاركـون
وإني ماعــرف شسوي وكُــل شوي واحد يضرب الثاني لحدما العالـم فاككتـهم
تقرب عليــة أستاذ لهــيب سحبنـي من أيدي وعيني على ميريام خازرنـي دفعنـي للسيارة
وصعـد بسرعـة احسـة كل شويـة يريد يحجـي ويضرب بالستيررن لحـد ما وصلنا
نزل بسرعــة ونزلت خايفــة وراه دفــر الباب إني من يمي نزيـت دخلت وراه اباوع
ولد نزل يركض بسرعـة بس بالبجامة مخترعة درت عينـي مستحيـة
باوع لهيب للوضع وعاط
: إبن السگط امشي البس شني مطلعلي
زنودك متروسات شعر
أبتسمت على وصفــة السخيـف صاح الولـد الي هناك
: شنيهاي خال شني عرست
بالعباس اليـوم خالتـي تنجلـط
حجاها وطفـر ليفوك جان بيـت كُلش جبيرة طابقين طابق فوك وجوة
الـجوة بيـة باب وكأنو فوك اكو طابق ثانـي بيـت وحدهـم اباوع على
البيـت متعجبـة فززنـي وهوه يكول
: تعالـي فوتـي
صــعد ليفـوك واني وراه صعـدت ومثل توقـعي جان بيـت وحـده بس جان كُلش
حـلو ومرتـب
لهـيب : ودققققق
ثوانـي وطلعت بنيـة ناعمـة حلـوة أكبر مني مبينه كالت
- ها خالو
حجتـها وهي تبـاوع عليــة مستغربة عين عليـــة وعين عليـــة واني عيونـي تتجول
بالبيت أريد استكشفـة
لهيب : ريوك بعدخالـج مستعجليـن
هزت رأسها بـ أي وراحـت للمطبخ باوعـت عليـــة وكتلة
- أستاذ هاي بنتـك ؟
حرك لسانـة بخـدة حك كصـته وكال
: أنسام بابا انتو شنو الثول
تتوارثـو بالعائلة
عقجت وجهـي مستغربـة وجهـي يدل على أنو اني مامفتهـمه شـي استغفر ربـة
لهيب : منوراج بــكد ما استغفـر راح افوت
للجنـة لا حساب ولا عقاب
لج مو هاي كدامـج كالت خالي ؟
عضيت شفتـي بفشلة يبو ماعــرف إلى افشـل روحـي طلـع نفس الولـد الي جان برة
بس هلمـرا جان لابس باوعـت عليـــة جان نفســة الي دعـم نوران
اصهب : ها خال
شمـر نفسة لهيب على القنـفة وباوع عليـــة وإني صرت بنُص هدومـي ثنينهم
يباوعلـي وإني ماعرف شسوي لو شحجـي لو وين أكـعد
لهيب : تعاي كعدي هنـا
أشر على مكان قريـب من مكانــة توجهـت كعـدت شوي واجت وكالـت البنية
ودق : خالـو الأكل صار جاهـز
كـام والولـد ويانا جان أكو ميــز مال أكل كعدنـا وإني احس روحـي متشنجـة ماكدر
اكل مستحيــة
رفعت عينـي شفتها تباوعلـي
ودق : شنو اسمج ؟
حجيت وإني احط اللكمـه بحلكـي
وعيوني عليــها
- أنسام
صفـنت بوجهـي مصدومـة بهت وجهه والولــد غص باللكمــة بس إني وأستاذ لهيب
جنــه طبيعين عيونـهم توجهت عليـــة يباوعون عليــة وهوه متجاهـل كُلشي
وحاط كُــل تركيزه على الأكل
ضلت عيونـي تتنقل بيناتهـم
أصهب : اي شيسمونة جا اختج شلون
صارت خوما بعدهي متأذاية
باوعـت البنيـة بعـدم فهم
أنسام - لالا صارت زينـة الحَمدُللّٰـه
عـم الهدوء أرجاء المكــان بس كام أستاذ لهيب كمت وراه غسلــت واحنا ودننزل
صارت بطريقنـا بتول مشافتني لأن جان أستاذ لهيب كدامي وهوه اكبر مني فـ
مبينـت
اباوعلـها تخزرة وعاطـت
:: شعندك باقـي هنا شوكت نخلص
من خلقت ..
بعدهـي مكملت كلامـها توسعت عيونـها من شافتنـي ضربها بچتفـها قـوي حيل
التفت عليـــها وكال
: جسمج مشتهـي كتله لازم
وحق الي تلوع گـــلبي بفراگها اخلي صريخچ مالـه والي وخري عن طريقي احسلج
بلعت ريگي شسوي بنُصهم غيـر هاي المفروض أمور عائلية استحييت من نفسـي شسوي
هنا بس يلا غيــر هوه غصبنـي
انفتحت الباب الجوه قـوي طلعـت أم بتـول تخوفنـي جانت من إني وصغيرة تكرهني
باوعـت على لهيب ورجعت باوعـت
عليـــة ضحكت بصوت عالـي
أستاذ لهيب بس شافـها توها تحجـي عتني من أيدي حيل وطلعنـي برة أسمع صوتها تغلط
وتفشـر عليـــة
نترت أيدي منه قوي خزرنـي حاصرنـي بين السيارة جسمي على السيارة وايدة منا ومنا ميخليني
اتحرك فتحت عيونـي
بنص العالـم هسه تفتهمنا غلط
أنسام : أستاذ شدسوي وخر عيب
تصرفاتك هاي
فجأة وجهه تحول من عصبـي ومخنـزر الى واحد گوة لازم روحـة ليضحك متحمل
وضحك أبتعد عنـي يفرك بوجهـه بلعت ريگي متوترة شبي شنو يضحـك
تقـدم صعد بالسيارة رحـت وياه وهلمرا فعلاً طلعنـا للمطار نستقبل الوفـد الي جاي
بس دخلـنا كعدنـا ندور عليــهم جانو بعدهم هستوهم ينزلون من الطيارة كعـدت
اباوع وياه عيونـة تفتر يمنى ويسرى يريد يلكاهـم بس لــمحهم أشرلـي اوكف
استقبلهم أحسن إستقبال تغيـر اسلوبـة ١٢٠ درجـة صار وأحـد ثاني
ولا جـنة المستفز نفسـة صافنة عليــة وصلنا للشركـة عفته وياهـم جـوه ودخلت الكُـل
مخبوص بالتحضيـر باوعت للساعــة بـ ١٢
دخلــو وأستاذ لهيب دخل وســد الباب كعدت على الكرسـي انتظرهم شيصيـر
اجتـي بتول باوعتلـي
وكعدت يمي حطت رأسها على جتفـي
بتول : هلو شلونج
أنسام - هلا الحَمدُللّٰـه
بتول : شجنتي تسوين اليـوم
وية خالـي ؟
أنسام : ماعـرف هوه أخذني وياه
مالي دخل إني مو قصدي اسمع حديثكـم ترا
بتول : يمعوده هسه أنـتِ قابل
غريبـة
بس تردين نصيحتـي ؟
أنسام : شنوة
بتول : أبتعدي عن خالـي لهـيب
أنسام : ليش ، يعني موقصدي
ماريــد أبتعد بس ليش دتكولين هيـج شي الي مو دتحجيـن على خالـج
بتول : خيولـي الحقيــر
ديربالج على روحـج ترا يخوف هـذا
حجتها وشالت رأسها من على متنـي باوعت لخطواتـها وهي دتبتعـد
من إني وصغيـرة وجنت أحس عائلـة عمو هشام غريبة وخصوصاً بتول
جانت أغرب وحـده بيــهم بس جانت لطيفة وياية هي اول صديقــة احصلها بحياتـي
ماركزت على هلسوالف ولا جنت أعيـر الهم إهتمام جان كُل تركيزي شلون اربـي
إخواني وشلون اكبرهـم بس بتول هي الي اجت واحتكت بيــة
أستاذ لهيب بحياتي مشايفته عدهم غيـر مرة وحده من جان عمـري ١٥ وجنت
مصدومــة أنو عمو عنده اخو وبعد كل هلسنين من شفته استغربت لأن حيل
متغيـر ماعرفتـة
بتول جانت غريبـة جانت هي وأخوها قيس ميتحاجون أبد وهي عدوانيـة
تكره الكُـل وتحقد على الكُـل ماعرف شلون حبتني وصادقتني
شويــة وطلع الوفــد رحت دخلــت على أستاذ لهــيب اباوعلــة كاعــد وحاط رجل
على رجل صافن على الأوراق خفت من منظـرة
أنسام : ها شنوصار
باوعلي أبتسم وكال
:: اقتنعـو
أبتسمت فرحانــة شفتـها فرصـة مدام مرتاح خلي اروح احجـي وية أستاذ هشام
طلعت بسرعــة توجـهت لغرفـته دكيت الباب أكثر من مرة مجان اكو جواب
رحت سئلت واحد من الي يشتغلوون كال طلع
وية الوفـد غميت حظـي إلاغبـر
شنو مكتوبلـي اظل وياه رجعـت للغرفة لكيته يلملم بالاوراق رفـع عينه باوعلـي
خطف نظرة ورجع دنك يكمـل شغلة
لهيب : أنسام تكدرين تطلعين اليوم
ماكو شغل روحـي ارتاحـي
كيفـت مامصدكـة أريد اروح أرتاح هم اكعد يم نوران شويـة خطيــة وحدها بالبيت
تخـاف تشكرت منــة وأخذت جنطتـي وطفـرت أنزل على الدرج بسرعـة مامصدكــة
لبست الجنـطة على چتـفي وية طلعتـي اجتي سيارة نزلـو منـها ثنين ضباط
استغربت شكـو ضليــت صافنــة شوي ورجعت كملـت مشي التفت من حسيت بيهم نزلو
بس جان أستاذ لهيب وياهـم من شافني باوعتلـة غمزلـي
وظهرت إبتسامة على ثغـرة انصعقت شكو وليـش ياخذو حتى نسيت شسوة من حركــة هوه
بعدين اجت بالـي ميريام
الصبح أدري بي مراح يسكـت عزا شكد فشلـة من الرجال
طلعت تلفونـي ودكيت عليــة
ماجاوبنـي دكيت خمس مرات أخير شي يلا فتح
ميريام : ها أنسام عندي شغل
أنسام - أنـتَ سويت هيج؟
ميريام : شسويت ؟
أنسام - تعرف قصدي لتغشم بروحك
زفر نفس وكال
: اي اني خلي يعرف يتأدب
أنسام : ميرياممممم تعرف روحـك شدسوي
طالعـة اني ومديري أنـتَ شعليك
تتدخل ميصيييرررر مالك حقققققق
احجي محترگـــه أعصابي
ميريام : يصير خير أرجع ونحجـي
سد الخــط وإني اباوع عليـــة خفت من ردة فعل أستاذ لهــيب خاف يشـد وياي انوب
گلبـي كام يلوب وبالـي يمـــة
تمشيـت للبيت لحدما وصلت دخلت بعدهـم مجاين لا علـي ولا لارا بس أنهار ونوران
طبيـت أسبح وبس خلصت شمرت روحـي على الجربايـة أفكــــر
أنهار : شـــكد ضجت لأن أنسام كبرت السالفـة
هوه صحيـح إني غلطـت حاولـت
اتجاهـل الموضوع كعـدت ثانـي يوم كُلشي مقاريـة
بطلعتـي صار ميريام بوجهـي باوعتله
ميريام : أنهار عندج اليوم امتحان؟
رفعت عيونـي أفكر شكولــة أي لو لا هوه هيج هيج إني راسبـة خنشوف شيريد
: لاع ماكــو
ميريام : اكيد؟؟
أنهار : اكيييدد
:: تَــمام لعد تعالـي وياي بشغلــة
رحت صعـدت وياه
ودانـي يم بيـت عمـي
باوع عليـــة ورجع باوع عليــهم هز رأسة وحرك السيارة ودانـي لمركز مال ضباط
ضليت صافنــة يُـــمة جنها السالفــة كبرت دخيلك ربي دخلني وكلها تباوعلـي لأن لابسة
ملابس مدرسـة
بس محد فـك حلگــه لأن ميريام يمشي كدامي
دخلنـي بمكتب وكال انتظري هنا
رحت كعدت أباوع على الغـرفـة وعيونـي تتجول بأرجائها نفتحت الباب شوية
التفت حجيت بسرعــة بدون مانتبهه
: واخيراا اجي..
توسعـت عيونـي من شفتـه نفس الرجال الي جان البارحــة موجود بالسوگ بلعت ريگي
باوعلي منتصـر گوه لازم روحـة ميضحك على منظر صدمتي
تقدم كعد على المكتـب حجيت بتعلثم
: أنـتَ منو ؟؟
حط رجل على رجل وباوع عليـــة وكال بثقـة
: اني السبــع ليش مكايليج عليـــة؟
گلبت عيوني بملل
أنهار : سبع عد أمك ميريام وين ؟؟
السبـع : مع الأسف راح ولازم
تكعديـن تسولفيـن اليـة انه شفتي شكـد الدنيا زغيرة نهوره
رمشت بعيوني مصدومــة هوه نفســة أي إني الغبية شلون ملاحظـت الي جان كاعد بالإدارة
والي انتقلو جديد يم بيت عمي والبارحــة هم كلهم شخص واحد وهوه السبــع
باوعت عليـــة ساكتـة لا أخذ ولا انطي غمضت عيونـي وكعدت على القنفـة الي
حاطيها بالمكتب أشرلـي على الكرسـي الي كدام مكتبة
السبـع : تعالـي كعدي هنـا
أنهار : وليش؟
السبـع : مو صوتج بعيـد وماسمع
حجاها بـ ستهزاء
كمـت كعدت قريب عليـــة بديت اسولف وهوه سكت يسمعلـي حجيــلته عن كل تصرفاتها
ويـة منو تطلع وتطب وأخير شي ختمتها بالموقف الي صار كدامي من عرفت هي
تبيـع مخدرات
جان طول الحَــديث يستمع اليــة بتركيـز زفر نفسـة رجع ليورة يباوع عليــة ويفكر
كال
: أنهار ابقي بعيــد عن كُــل الي يصيــر خليج
بعيد عنهــم لتحكتيـن بيـهم
أنهار : تَــمام اكدر اولـي هسه
السبــع : بس اني مخلصت كلامـي ؟
رفعت حاجبـي ممقتنعـة بكُـل الي ديصير
: تفضل كمـل
: الصراحــة وبدون لف ودوران إني اعرف بسالفــة ومراقبـها من زمـان بس المشكلـة
عمـج
عقجت وجهي
: شبي عمـي
السبـع : بس يعرف أنـتِ مبلغـة يدز جماعـة عليج وعلى اخوانج يذبحوكـم
حجاها بكل دم بارد وإني أحس روحـي رجفت من جاب طـاري إخواني تندمـت
لأن بلغت تمنيت لو ساكتـة ماعرف شسوي يباوعلـي ينتظر جواب
واني دافكر نتيجـة اغلاطي يدفع ثمنها إخواني ؟ حجيت بهدوء
: وشنو الحــل؟
عينـة بعيوني وكال
: ماكــو غيـر هذا الحــل الوحيــد
أنهار - وشنوة
السبــع : أمن الكـم حمايـة وماخلـي أحد يتقرب منكـم
- إخواني راح يشكـون من يشوفون
حمايتك
: محد يشوفهـم بس من يصير شي
خطير يتدخلون يلبسون مدنـي
باوعت عليـــة اكو جزء منـي ممقتنع بكلامــة بس ماكدر أنكر أخر شي سمعته
عنه جان يخوف ومبين شكد هوه خَطير
والخطف الي صار ڪلها التمت عليه
ضحكت مستهزائــة
: و أنـتَ أكيد مراح تسـويلي هاي الخدمــة بلاش
مو صحيح ؟
رفع حواجبـة وكال
- أحب الأذكياء والي يلگفــون المعلومــة بسرعــة
جريت حسـرة وباوعت عليـــة
: شنـو تريد ؟
السبــع : تتزوجينـي
من كــد ما جانت الصدمــة قويــة على عقلـي صفنت عشر دقايق أحاول افتـهم هوه شديحجـي معقولــة ديشاقــة ضحكت أي ضحكت
وباوعت
: اكولك إني ليش ذالـة روحـي الك
اروح لميريام
- رتبتي اعلى من رتبتـة كلمتي تمشي
أكثر
شديـت على قبضتـي ايدي التفـت
شنو قصـدك بـ تزوجيني شفت روحك شايب
بكــد ابويــة واني بعدني صغيـرة شعندي
شموازينيييييي اسجن روحـي وية واحد بكدك
السبـع : بهداي بهداي شبيج
انفتگـتي شيسكتج بعــد لا عبالـج كاتـل روحـي عليج ترا مابيج أي المواصفات الي تعجبيني
اريدج تربين بنتـي
أنهار : متزوووووج !!!!!!!!!
السبـــع : منفصل للتصحيح
أنهار : مستحيل مستحيل
افتر وأصيح
- اكول لميريام مايهمني ماريــد
السبــع : بكيفــج اخسري اخوتج
صفنـت عليـــة بكد ما جنـت ذكية وكحـة بوكتـها بس ماجنت اعرف أنو إنسان يكـدر يسوي هيج
وبلحــظة ضعف منـي صدكت أنو فعلاً ميريام ميكـدر يسوي شي الهـم ونضحك عليــة
السبــع : مالـي دخل بيـج تهتمين بـ بنتي
لحدمـا الكاه مرة واتزوجـها وهي تهتـم بيها وساعتها توكلـي نكول ما تفاهمنا ونتطلك
حجيت بغصــة
: وحلوه بعمري هذا واتطلك
وكــتنا مايرحـم
السبــع - ها تردين تبقين براحتج
زفرت نــفس بقلـة حيلـة ماعنــدي أي حل ولا أي مهـرب اباوع عليـــة
: وشراح تسوي
: اسجن عمــج
واحميكـم بالمقابل تتزوجينـي بس بالورقـة
: وشكــول لـ اهلـي وميريام
- جنت احبــة وأريد هسه نتزوج
معليــج الباقـي عليـــة
دخــل ميريام يفرك بعيونــة قـوي كال
: ها خلصـتو
باوعـت اول مرة أحس بهيج شعور أحس روحـي متقيدة وماعنـدي حل كُـل الطرق تذبحني
مستحيل أقبل بأذيــة إخواني روحـي تلوب ماعرف شسوي رجعنـي ميريام للبيت
وراح دخلت شافتنـي نوران اجيت من وكت استغربت
نوران - شو اجيتي
أنهار : تخربطت ودكيت على ميريام
اجـه اخذنـي
سكتت رحت للغرفة افكـر شسـوي ماعرف مترردة وخايفــة جان الوضع هادء لحـدمـا ندك الباب
مال البيــت قـوي نزلت افتح
الباب ونوران واكفــة تباوع ماحـس الى نسحبـت قوي وايد عمـي
حاوطت ركبتـي شكد تمنيت يگتـلني واخلص تلاشت امنياتـي من شفتـه واكف كدامـي
رفع سلاحـة بالسما وضرب طلقــة نز عمي واني وكـعت غمضت عينـي أجر النـفس
بالالف ياعلي
باوعت عليــة وجهه جان بي كدمـات كأنو متعارك رغــم الصبح جنت يمــة مابي شي
حسيت انسحبت لحضن دافـي من ريحتـها ميزتها أنسام ماكدر اتخيل حياتـي
بدونــها ضحت هواي يلا وصلنــا لهنا اذا صار شي على علـي لو نوران متتحمـل وساعتها
منو يفيدني وذا كالـو عليـــة مطلگـه اهمشي راحــة إخواني
بس لازم اخذ منـه كلمــة أكيدة ونتفـق أنو ميتقرب اليــة لأن فعلاً كارهته وإنسان
حقيـر مثلـة مشايفــة ميكدر يسوها لوجهه اللّٰـه ويساعدني
سندتنـي أنسام ودخلتنـي وكالعاده تعاركـنا وصعدت فـوك جان كُــل تفكيـري هوه شلون
هيـج وصل بالوقت المناسب وشجان يسـوي هنـا
جان الوضـع هدوء بالبيـت لحــد ما اجه ميريام وهرج الدنيــا هرج استخدمت كُـل
أنواع الأساليب وهُــمه ممقتنعين حطيت برأسي باجـر لازم اشوفــة
واحجـي وياه حـتى نشوف تاليــها شلون تكـضي طـول اليلل مانمـت فكرة تجيبني وفكرة تاخذني كُـل شوية اتخيل أحد يفوت علينـا ويكتلنا
كلـنا ماعرف شوكت غفيـت من تعب التفكـير يمكن
فزيت الصبـح كمت طلعـت وصلنـي ميريام وجان ناسـي تلفونــة رجـع للبيت
حتى ياخــذة ردت افوت للمـدرسة شفـه واكف يأشرلـي التفت بخوف اباوع
خاف أحد ينتبـه رحت عليـــة بسرعــة
حجيت بخوف واني
اتلفـت
أنهار : أنـتَ شتسـوييي هنااااا ؟؟؟؟
السبــع - هاج هذا الج
احتاج احجـي وياج
باوعت على أيدة الي ممدودة اليــة جان تلفـون باوعت عليـــة نترت ايدة
أنهار : ماكــو شي نحجـي بي افتهمت لو لا ؟
خزرنـي اتنرفـز من اسلوبـي حجه وهوه گاز على سنونـة سحب أيدي قوي وضغط
عليها توجعت حط التلفــون بيدي غصـب عنـي
گلبـت عيوني بملل
السبــع : اقتنعـت اختج؟
أنهار - لااا ومستحيل تقتنع
السبــع : إني عنــدي طريقــة ...
بعــد مكمـل كلامـة فززنا صوت من ورانا يكول
: انتــو شتسون هنـــا ....
يتبــع ...
الحكــاية تستمـر الى أحداث أخرى .
𖦆 𖦆 𖦆 𖦆 𖦆 𖦆 𖦆 𖦆 𖦆 𖦆
حسابي انستا للتواصل 👇🏻
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!