#أنسام_اللهيب
بقلـمي أنا زيـنـب خالــد
صوتو ؏َ البارت حبايبي وعلقو بين الفقرات مشتاقة لتعليقاتكم اللطيفة البعيدة ڪُل البعد عن البارت قصيررر ههه 😂😂😂😡 + تابعو حسابي واتبـاد جميلاتي 🫶🏻♥️♥️♥️.
𖦆 𖦆 𖦆 𖦆 𖦆 𖦆 𖦆 𖦆 𖦆 𖦆
أنـهار ::- طبگت الكتاب رفعت اديـة بنصر وأخيراً خلصت الامتحان
أول مكعدت صارلي ساعتين اقرة ولسـة لانزلت ولا شفت
أحد ليالي نايمـة بعدهي أستغليت الوضـع أقرة وهي نايمة إذا تكعد
بعد متهدني إلى تلعب وتگمز منا ومنا
نزلت جـوه صبا ڪاعدة بالصالة ومبين الحزن ؏َ محياها أستغربت
مو طبيعتها أنزل أطفر بدرج أحب هيج وصلت يمها ڪعدت
ضربتها بـ چتفي
أنهار :- شبييي الحلوووو ضايج ؟
صبـا ::- أريد ارجع أكمل
عفست وجهي بأستغراب
أنهار :- شتكملين؟
ذبت حَـــسرة
:- دراستي
تحجي مدنگه راسها ماحطت عينها بعيني أبد جريت نفس رجعت بجسمي
؏ القنفة اباوع الها
أنهار :- ڪملي متڪملين أحسن شي
تسوي هوَ هذا الشي
ماردت عليـــة ظلت ساكته ڪمت من يمها رحـت للمطبخ أشتـم ريحة
الأكل تموتت سحبت نفس مغمضة عيني مستلذة بريحـة الأكل الشهية
فتحت الچدر جانـت مسوين تشريب لحـم بس متروسس لحممم عضيت
شفتي بجوع صبرت نفسـي ما أكل هسـة خلي أكمـل
صعدت فوگ ضليت اقرة اقرة مستغلة ؏َـــــدم وجود عثمان
وليالي اليــوم خاملة مابيها تلعب بس أشغللها التلفون تباوع وتسكت
خلصته تمغطت باوعت ؏َ ساعــة بـ ٤ العصر توجهت نظراتـي ليالي
ڪاعد تباوع ؏َ التلفون بهدوء وهو مدري شيرطن فوگ رأسها بس
هي متونسة
:- ڪومتها حتى تأكل مماكلـة جوعانة
نزلنا جــوة ڪعدتها ؏َ الكرسي
بس فتحت الچدر طفر خليل باوعتله وهو أبتسملي من شافني
فاتحة الچدر
أنهار :: خير اللهم اجعله خير
خليل : بت حلال بذگرج
هستوني ڪلت أنهار خوش بنية وأحسن مرت أخو بدنيا
گلبت عيوني بملل
أنهار : أكعد أكعد راح أصبلك
أبتسم بـ نصر تقدم ڪعد يم ليالي صبيت الأكل حطيته ؏َ الميز
ردت أكعد تذكرت رودينا شو مالها حَـس اليوم توجهت بسرعــة
؏َ الباب
فتحته شهگت بفزع حطيت أيدي ؏َ حلگي من هـول الموقف ومن شدة
ذهولي واني أشوف الدم تارس الحديقة ورودينا ماڪو
صرخت بصوت عالي
:- خليللللل الحككككننننييييييي
ڪعدت بالگاع تجمعت الدموع بعيني ركض يباوعلي بصدمة لازمة لحمة
ويأكل بيها
خليل :: هااا شكو شبيج
ولج عبالي طبت أمريكا علينا خربروحج
رفعت أيدي أشرلة ؏َ المكان
:- روديناااا ماكو ياااايمةةة وين راحت
خاففف شردددت
رمش بعيونة
خليل :: رودينا منو؟
ثواني وڪأنة أستوعب ڪلامي ڪال وهو يرفع اللحمة أمام ناظري
خليل : إذا قصدج ؏َ طلي صار
ببطونا
عم الصمت أرجاء المڪان إني بالگــاع اباوعله وهوه يلوج باللحمة
بحلگه ويباوعلي بكل صلافـــة
رمشت بعيوني بعدم أستيعاب أباوع ؏َ المكان مامصدكـــة
نهضت ؏َ حيلي
أنهار :: تشاقة مو؟
خليل :: لا
الدمــوع تجمعت بعيني وإني اشوفــة يحجي بكل جديييية صحت
بصوت عالي هز أركان البيــت
:- منوووووو ڪتللللهااااااااااااا
طلعو ڪلهم ؏َ صوتي يباوعون بأستغراب
حليمة ::- وهرش شمالة
صوتج واصل لذاك الصوب
حجيت وإني أرجف من العصبية
أنهار :- ياااااااهووو ڪاتل
روديييينااااا ومسويهااا تشريب
حمدية ::- يا يمة ياهي
رودينا هاذي لا تكون جنيتج مسلطتها علينا
حليمة :- شنهي قصدج ؏َ طليي؟
إني سويته تشريب شحلاته ڪلها أكلت منه
شديت ؏َ قبضة أيدي بعصبية
من ڪل عقلي ڪعدت أبجي عليـــة بصوت عالي مثل الجهال وڪلها
تباوعلي
حمدية :- نهجم بيت العيارة
شدعواج هوه طلي لو شفتي نفس صنفج حبيتي هي هاي الشگول
الي توالمج
رفعت رأسي من بين أدية خزرتها خزرة المسافة إلي بيني وبينها
طويـــلة كُلش سويتها هلكدوتها وطفرت عليها گفشتها
اعت بيها بشعرها يمنااا ويسرررى
وهي تصرخ
حمدية :- ولججججج يومممم
ماحس إلى انسحبت من شعري قوي وحليمة تعت بية وإني اعت
بحمدية وصارتلك طاح طيح كظ أخوك لا يطيح
دفعتهن عني نزعت النعال وشمرته مَــادري وين طار بس سمعت صرخة
خليل
:- خرببب هاي يا زمالة شمرت
نعالها الفسفوري ؏َ رأسي
عضيت حليمة من أيدها قوي ماحس الى صبااا تصرخخ
::- ولججج يمه هاييي اني
رفعت رأسي ماشوف نايمات فوگاي
لكيت صبا تفاگگ بينا واني عضيتهاا دفعتهن قوي وإني مغمضة
نمت ؏َ وحدها اضرب راشديات واسمع صوت بيبي تصيح وأم السبع واكفة تخاف لا تلوحها گتله
ساعة اضرب ساعة أنضرب فتحت عيوني لگيتني ڪاعد أضرب بصبا
أنهار ::- صخاممممم بوجهي
هددددف عكسيييي يحظييي انسحبت من ياخة الدشداشة قوي
طلعني من نصهم رفعت رأسي خليل واكف يشحط بيه البيت
ومستمر يأكل باللحم
عطت بصوت عالي دفرته برجلي لزم رجلة بألم ويشتم بية
ركضت ؏َ تلفوني بساع دكيت ؏َ السبـع سُرعان ما فتح الخط
:- عثمــان الحكنيييي گتلتهااااا
حليمـــة گتلتهاااااا لـ روديييينااااا
حجيتها وسديته بسرعة صعدت ؏َ القنفة رفعت أصبعي بتحذيررر
وإني اهدد حليمة لتوصل يمي
حليمــة :- بت الـ **
السگط شلون تمديييين أيدج ؏َ بنتـي حيييييووووانـة
جميلة :: كافييييي حليمة
ضغطي صعد تحطين عقلج وية عقل زعطوطة بكد بزرج
هستوها تريد تحجـي أندفرت الباب قــوي دخل معصب تغيرت ملامح وجهه
وهو يشوف حالتنا إحنا الأربعة خوب إني گفشتي والشال صفح
وجهي أحمر
السبـع ::- سلاماً قولاً من رب رحيم
هستوه حط رجله ؏َ عتبة الباب ڪعدت حليمة بالگاع تثغب وتبجي
:- ترضاهاااال ولللكك يلغالييي
يبن الغالييي هيج يصيرررر بينه إني وبت عمكككك واحنا أمانة مرتك
تطگ بنتي
باوعتلها بقرف عض ؏َ شفته وخزرني
تنعوصت
أنهار :- بتهاا تكول عليك طلي !
فتح عيونة بصدمة يباوع لحمدية الي توسعت عيونها بنفس الصدمة
حجه خليل بلامُبالاة وهوه حاط ليالي بحضنة ومستمر بالأكل
خليل :: للتنعوصين گلبتي
معدتي بگفشتج هاي خلي أكل اللحمة بسلام
من جاب طاري اللحمة تذكرت رجعت أبجي من جديد عمتي أخذت جدته
دخلتها لأن ضغطها صعد ڪعدت ؏َ التخم لميت رجلي لصدري
أبجي
حمدية :- عمي شنييية يبوييي
تتبلين علييية عمي وشرففف زِينب ماگايلههه
مانطيت إلها أهمية ضليت أبجي يمكن بساعتها بجيت بكد ما جنت متحملة هواي شغلات ولگيتها حجــة
ذب حَــسرة تقدم عليـــة يمسح ؏َ ظهري
تقرب همس يم أذنـي بخوف
:- أمشي نصعد فوگ
ماريد عليـــة ضليت ؏َ وضعيتي أنوح
السبـع ::- تگومين لو أشيلج
ڪدامهم ؟
رفعت رأسي خزرته عدلت الحجاب وڪمت صعدت فوك أمشي وانافخ
أسمعها رجعت تشگيلة ماهتميت طبيت للغرفة من حرگه دمي
ظليت أفتر
صفنت شوي التفت فزيت بخوف من المنظر إلي شفته
الي جان وجهي بالمراية وگفشتي العالمية
غميت روحـي اريده يحبني وهذا شگلي عدلت شعري رأسي أحسة
يأذيني بكد ما گفشني منــه
ڪعدت ؏َ الجرباية نزعت الدشداشة اريد ألبس الثانية انفتحت الباب
دخــل مامنتبه يأشر ليالي بأيده حمحم ورفع رأسة يباوعلي
جمــدت بمكانـي رمش بعيونة مصـدوم يباوع من فوگ ليچوة
استوعبت الموقف غطيت جسمي بالدشداشة
أنهار :- سددد البابببب
بلع ريگه بتوتر طب وسدها يباوع بالگاع صفنت عليـــة هذا شديسوي
رمش بعيونة رفع رأسة يباوع لگه روحـة بالغرفة بلل شفته
باوعلي بـ نظرات غريبة غمض عيونة طلع وسد الباب من الهبطه
أحس حتى النفـس نسيت شلون أچره ڪعدت بالگاع
حاطــة أيدي ؏َ گلـــبي الي صوت دگاتة صارت تقرة مليون
لميت شفتي للداخل غمضت عيوني بفشلة شهلموقف يربي
باوعت للمراية مال ڪنتور إلي ڪدامي يلا الحَمدُللّٰـه مشيرة داتخيل
الموقف لو جنت مماخذه احتياطاتي يلا هاي ولا غيرها
لبستها ؏َ سريع عدلت شعري باوعت عليها مخصرة تبرز مفاتن الجسـم
ردت أنزعها فتحت الكنتور اندكت الباب أخترق مسامعي
صوتــة وهو يكول
:- خلصتي أفوت ؟
رجعت أباوع ؏َ روحــي هي حلوه عليــة بس أول مرة ألبس هيــج شي
ڪدامة أخاف يفهمها بغير قصد غمضت عيوني أفكر
انفتحت الباب دخل يباوعلي وشايل بأيده ليالي سديت الكنتور ڪعدت
؏َ الجرباية خطفت نظرة لروحــي باوعت لوجهي أحمر من الفشلة
نزل ليالي بالگاع ضربت ؏َ رجلها قوي
:- هسه اني ليش جبتوني
بنصكم أريد اسوف كارتون وية عمو كليل
حجت مغندبة تباوع لـ أبوها تقدم گرفض ڪدامها يبوس بيها مكزكز عليها
وهي تغار لأن شواربة تبززها
فتحلها الباب وطلعت تركض
وكف ؏َ الباب منتچي عليـــة عيونة اخترقتني ذب حَــسرة هز رأسة
يتحرك ومدري شيتمتم واني مثل العاقلة ڪاعده اباوعلة بهدوء
شمر تلفونة ؏َ الجرباية مفتوح سحب المنشفة وملابس
ڪال
:- رايح أسبح شوي واجي مو تنامين عندي حجي وياج
يحجي وإني مدنگه رأسي رفعت عيوني الــة لكيته يباوعلي ويباوع ؏َ
دشداشة مسح ؏َ وجهه بسرعــة
السبـع :- استغفر الله ربي وأتوب اليــة
طلع ورگع الباب غميته بس طلع درب السد ماله رد گبور أستغفر أستغفر حصل
حسنات برأسي درت وجهـي ؏َ الجهه الثانية
صارت عيني ؏َ تلفــونة المفتوح أجت فڪرة
برأسي رأساً سحبته
قبل لا يطفــة ڪعدت أبحوش بيــة أبتسمت بسعادة وإني اشوف الي جنـت أدور عليــة ڪدام عيوني
فتحته رحت جبت تلفوني حفظت اليوزر سديت التلفون ورجعته
؏َ حطتـــه رحت ڪعدت ؏َ القنفة حطيت رجل ؏َ رجل
دخلت ؏َ الانستا واني بالي شي كُلش قوي رحت أسوي حساب
لازم أختار أسم ظليت صافنـــة شحط أكل بأظافيري وعيني
؏َ التلفون أفكر بأسم حتى لا يعرفني هاي أني
كتبت
:- أميره بأخلاقي
هزيت رأسي بـ لا ماحس راهم اهز برجلي وأفكر أخير شي ڪتبت
:- امرأه اتعبها الزمن ويمها ايموجي حزين وقلب مگسور
أبتسمت برضا اي هسه حلو نفشت ريشاتي وگتها جان الي يكتب هيج
اسماء فدشييي وهيبة
انفتح الباب دخل لابس ملابسة وينشف بشعرة باوعلــي برود
نزلت عينه ؏َ رجلـي إلي طالعة من فتحت الدشداشة وڪأنو ديفكر
بشي سحب نفس تقدم ؏َ المرايـــة يعـــدل بشعـــرة
شمر المشط حرك لسانة بخده تقدم بخطوات هادئة ڪعد ؏َ القنفة
بصفي لزم تلفونة يگلب بي وأني عيوني عليــه اترقب تحرڪاتة
السبـع :- هسه سولفيلي ؟
ليش ڪتلتيهن
أنهار ::- هاي إني ؟
مو هي إلي غلطت عليك لو هو صوجي إني الي أدافعلك عود رجلي وهالله هالله
أبتسم تك خد يهز برأسة سد التلفــون تقرب عليــة رأساً وڪفت
مبتعدة ظل يباوع ؏َ مكاني بثبات بحركة سريعة
أيده طوقت خصري ساحبني عليــة
غمضت عيوني وصرخت بفزع
::- ولج يمـــــة
عضيت شفتي مغمضة عيوني فتحتها لكيته نايـم فوگاي ؏َ القنفة يباوع عليـــة
بأستهزاء سحب حنجي
محرر شفتي
السبـع ::- شكالت ؟
رمشت بعيوني بقلق تلافيت أنظر بعيونة أباوع لـڪل مكان آلة عيونــة
أدري بس اجذب يلگفني سحب وجهي عليـــة مثبته
السبـع ::- عينج بعيني وتحجين كلشي
هساع
بللت شفتي دفعته من صدرة قوي
مابتعد
:- وخر شلون احجي وانت فوگاي؟
ميل برأسة عيونـة نزلت لشفتي أبتسم بسخريــة
السبـع ::- متحفين شواربج بعدروحي
أنهار ::- عايفتهن للضرورة
تعرف قلة زلم بهلوكت ديلا وخر جنگ ثوررر نايم فوگاييي أذيتنييي وخرر عثمااان
أحجي وأدفع بي بكـــل قوتي ماحس إلى نام ؏َ صدري جسمة يهتز يضحك
ظليت جامدة أنفاسة تلفحني ويضحك من ڪل گلبـــة
:- ومررضضض وهرشش
وسم يلاا وخررر عني
رفع رأسة عض شفته السفلية ڪال
::- خاب هيو المصرگعة تحجين لأ اجيبج
براشدي هسه أفرج فر وداعته نعال
حمدية
گشولت وجهي بقرف
:- لتجيب ططططارييهااا يمي
تكول عنك طلييي؟؟؟ تكولي أنـتِ متتوالمين إلى وياه الطليان واني وياك متوالمين يعني أنت طلي ؟؟!!
أحجي وعيونة تتنقل ؏َ ملامح وجهي مركز بأدق التفاصيل حرك
أيده جوه شفتي أكو شامة صغيرة عندي
بلع ريگه رفع رأسة ڪال
::- شنو؟ شجنتي تحجين ؟
ردت أرد ماحس الى الباب ندفرت صار طشارنه ماله والي ڪل واحد
صار بجهه فاتت ليالي معصبة حط أيده ؏َ رأسة يباوعلها مضيگ عيونـة
السبـع ::- هو هيج يا زمالة
أكو واحد هيج يچفت غرفة أبو
باوعتله خزرته
:- بابي خلي نطرد عمو كليل
من البيت ماحبو بعد
مسح گصته إلي عرگت رغم الجو جان بارد سحبها وطلـــع يشاقيها أخذ
تلفونة وياه
أمشي وراهم
:- عُثماننننن
::- ها شتردين؟
:- رودينا ماتت
حجيتها وتجمعت الدموع بعيني التفت الية يباوع بأستهزاء تغيرت
نظراتة من لمح الدموع بعيني ليالي باوعتلي بخوف
ليالي ::- ليش تبجين هبيبتي ؟
ڪعدت بعتبة باب الغرفة ضامة وجهي بأيدي أبجي بقهر
:- لا مامي اني اهبج خيولي بابي حكيرررر
التفت عليـــة تفلت ورجعت تبوس
بوجهي من شافتني
ماسكتت ڪعدت بالگاع تبجي وياي وهو واكف صافن يباوع عليـــنا
أسمعة يذب حسرات تقدم سحب بنتة دخلها بالبداية وراها ڪعد مقابيلي
أحس بحركاتة
السبـع :: شتردين كوليلي يجرالج ؟
رفعت رأسي
أنهار :- نسويلها فاتحة ومحد يأكل لحمها !!
رمش بعيونة مستغرب يباوعلي
بعدم أستيعاب
::- بابا صدك تحجين؟
مسحت الدموع دفعته ورحت ؏َ الجرباية غطيت جسمي ڪلة أسمعة
يسكت بـ ليالي شوي شوي صار الصوت يروح بعيـــد بس مو هم
إلي أبتعدو إني الي رحت لعالم النـــوم
ماحسيت إلى الصبـــح ؏َ الدوام ڪمت المدرسة محد يعرفني
من ڪد الغيابات المدرسات هنه يرگضن وراي علمود يمتحنني
رجعنا بالسيارة نوران بعالم ثاني عالــم وحدها من يوم وفاة علـي
ماشفتها تبتسم راح وترك غصة بگلوبنا ترك أثر محد يكدر يمسحة
من گلوبـــــنا
نزلت من السيارة صارت بوجهي أنســـام وجهه أصفر ولابسة ملابسها
شلون ما جــــان تقدمت عليـــها حاولت أفتهم منها السالفة بس جَانت أعصاب بارود
متتحاجـــة
صحيت بأيده وهي تحاوط ڪتفي ساحبتني من أيد أختي وهي تصعد السيارة عيــون
نوران طبعت بعقلي وهيَ تباوعلي بقلة حيلـــة
عتني من أيدي عتت ساحبني مدخلني للبيت هز بية قوي
السبــع ::- شبيج بابااااا ؟
أنهار :- عافوني ڪلهم عافوني
علي وخواتي ورودينا
عيوني مدمعة أباوعلة من ذكرت رودينا زم شفته ڪاتم ضحگته زدت بالبچي أحسة
يستهزاء بحُزني
السبـع :- لا يلا اشش اشش
ڪافي اللّٰـه يساعد گلبج تعاي فوگ ارتاحي
دخلني للبيت ڪلها تباوعلي يردون يعرفون شنو بيــة أشرلهم بأيده بـ اششش
دخلني للغرفة سحب الجنطه من أيدي شمرها بالزاويــة فتح الدنبوس
بَــعد الشال ؏ــــن شعري ذب حَــسرة يباوع ؏َ شعري فتحــة نازع القراصة طاح ؏َ متوني
طويل يوصل للورگ
سحب نفس قوي باوعتله خازرته
:- خلصت الأوكسجين الي
بالغرفة ؏َ ڪيفك !!
صفن بوجهي ماحس إلى طگها ضحكـة ضرب چتفي بـ خفة غمزلي وڪال
:- شنو اخذج الواهس تردين
حتى هدومج ابدلهن الج
فتحت عيوني خزرته دفعته بسرعة بــــرة وهو يضحك بصوت عالي أكتافة تهتزز
بدلت ملابسي وڪعدت ڪدام المراية أريد أضفر شعري ماكدرلة
أنسام جانت تظفــــرة أجت بالـي فڪرة سحبت المگص من الجرار لفيته أريد أكصه
انفتح الباب بقـــوة نزيت شفته واكف يباوعلي مقلص عينــة والجگارة بحلگه
طفاها بأيده بحرگه سريعة عفست وجهي بألم سد الباب تقدم سحبني والمگص بأيدي ڪعد ؏َ
الجرباية وڪعدني بالگاع
رأسي صار يم رجلــة وشعري يلعب بيه بأيده همس بهدوء
:- نگصه؟
أنهار :- مَــادري حابـــته بس يضوجني
يحتاجله عنايـــة وامشط ڪُل شوي تعبنـي حيللل
رفعت رأسي الـــة أباوعلة لم شفته للداخل
نزل عيونــة صارت بعيني
السبـع ::- خلي نتفق إتفاق ؟
من تكرهيني گصــي ساعتها لا أنـتِ تلومين نفسج ولا إني الومج متفقين ؟
أنهار :- هو إني هَــسة
إني گارهتك خنگصه يلا
السبـع ::- چؤ چؤ من تكرهيني
من صدك متظلين ولا دقيقـة يمي وداعت سمار خدودج هذا
نزلت عيني للگاع أفكـــر بـ ڪلامة إني فعلاً أحب شعــري وماريـــد أكصــه صفنت ؏َ شعري اتلمسه بأيدي
أنهار :- تَــمام متفقين
رفعت رأسي الــة أبتسم مسح ؏َ خدي طلع جگارة ورثها مد أيدة بمعنى انطيني
المشــط رفعتــة الة ڪعد يمشطلي شعــري
السبـع ::- اظفرة؟
أنهار :- يايي تعرف؟
رفع حواجبـة ودك صدرة
::- امهات الصالوانات ميلحگنــي !
ضحكت ؏َ حجايتة
رفعت رأسي بملل ؏َ ساعــة صارلة نص ساعة يظفر أوكي طويل بس مو لهلدرجـة
أنهار :- عثثثثممممااان
شطلعت هاييي شدسوي
باوعتله حاط الجكارة بحلگه ومخنزر مركز بالظفيرة دفعت أيدة بسرعــة
رحت ؏َ المرايا فتحت عيوني مصدومة وإني اشوف شعري صاير بي أنفجار
خصلة متداخلة بخصلة التفت عليـــة خزرتة
:- هايييي شسوييييت بشعريييي !!!
أبتسم بتصنع
السبـع ::- شبيج اوكفي أفتحــة
تقدم عليه يحاول يفتحة وماكو يسحب بشعري وإني اشوغ من الوجــع نزلت دموعي ؏َ
خدي دفعته من صدرة
أنهار :- اللّٰـه ياخذك يا حقير
راح شعريييي شسويييت
هوه ضل صافن يباوعلي حگ شعرة سحب أيدي نزلني بسرعة ليجوة
دخلنـي لغرفــة بيبيته جانت ڪاعده تسَبح وتباوع ؏َ التلفزيون مسلسل تركـي
مدبلج
جميـلة :- هاي يـــمة خيركم
عينها نزلت ؏َ أيدينا الي متشابگه سحبت أيدي بنترة وعيوني حُـمر
أبتسم الـها وسحَب الشال من ؏َ رأسي يراويها الگارثة
لطمت ؏َ صدرها وفتحت عيونها
::- ييااا ييااال دهررر دهررر هاي
شمسوي بيج هيج
أنهار :- أبن ابنج
جميلة ::- طرگاعة ؏َ صماخة ڪون
السبـع :- رحم الله والديج حجيـة
بلازحمة عليج حليها لا تتخبل علية وهسه انطيها خمس دقايق تصيح طلگني
جميلة ::- تعاي يمــة تعاي
ڪعدت يمـها بدت تفل بشعري هو شــوي وطلــع بـــرة الهدوء جان سيــد الموقف
لفترة من الزمـن
لحــد ما خَــطر ؏َ بالــي ڪلامة ذاك اليــوم
من ڪال
:- أنه چتال أبوي
أنهار ::- عادي أسئل سؤال؟
:- أي حَبيبة سئلس
::- أبو عثمان وين ؟
ذبت حَـــسرة حجت بصوت ضعيف
مهزوز مبين بي مدئ أستيائها
:- ميــت يمة ميــت !
::- اللّٰـه يرحمــة شلون مات؟
:- حادث صار بعــد يومة وساعته
حجيت بسرعـة بدون ما أفكـر
::- يعني محد گتلة ؟
عضيت شفتي بـندم وإني أستوعب مدئ غباني ممكن تشك اني داتحرئ منها شكد
فشلة وعيب أنفتحت الباب
دخل السبـع باوع الـنا جانت بيده علاگه وليالي لازمها بأيده
سد الباب باوع ؏َ ملامحي بهدوء تقــدم شغل الصوبة شلون عرف بردانــة
ڪعد مقابيلنا وليالي بحضنة انطاها العلاگــه
فتحتها تباوع بشهية فتحت الجبس وتحط بحلگها خمسة خمسة
السبـع ::- ؏َــــڪيفج بوية شني
قابل طاير هو المن؟
ليالي :- أسكت لتحاجيني إحنا متزاعلين
حط أيده ؏َ خــدة يباوع عليــها تفتر تلعب ساعــة تگمــز ساعــة تلعب وتطفر
عيوني عليــة أحس بوجع أخترق بطني من الأسفل
حسيت بشي حار نزل ؏َ خدي
ليش بجيت ؟ مامنتبه عليــة عينه ؏َ بتــة يبتسم إلها عيونة تشرح مدئ حُـبة إلها
ماكــدر أصير أم ؟ أريد إني هم طفل أباوعلة وأبتســم
ليش ماتزوجت شخص احبة ويحبني ويصير عنده طفل تنهـد صارت عينه عليــة
تغيرت ملامح وجهه من لمحني أبتســم
::- ها ها شكو هم رجعتي تبجين
راد يتقرب ؏َ وجهـي باوع ليورة ؏َ مكان جدتـه ضحكت بصوت واضح
تراجع للخلف عينــة علية
جميلــة :- الطبع الي بالبدن مايغيره غير الچفن
مو يمــة عثمان؟
تنرفز من أسلوبها سحب ظفيرتي من أيدها گومني باوعت للوڪت بـ ٤:٣٠
طلعنا لازم أيدي قوي عاصرها بأيده وليالي مچلبة بطرف الدشداشة
بطلعتنا أنفتحت الباب الخارجيــة دخلت صبا وراها بنية بعُــمرها حليوى وراها دخلت
هيّ واللّٰـه هيّ زوجته لعثمان
عيني رأساً صارت عليــة أنتظر ردة فعلــة لكيته أصلا ممنتبه ألهم بعده يباوع عليـــة
التفت بلامُبالاة يباوع من لمحها تغيرت ملامحه غمض عيونــة بـتعب
دنگ ليالي
:- روحي بابا سلمي ؏َ ماما
سحبت روحـي من نصهم غريبة إني هنــا صعدت ؏َ درج وإني اباوعلها گصتني گص تباوعلي
بقرف الحيوانــة تخبل أحلى من بيضة گطن هوه ينلام من يگول عليــة سَمرة
سديت الباب ڪعدت ؏َ الجرباية أنوح هسه شبية شعلية إني
خيولي رأسة چنه سطل روبة
أنفتحت الباب رفعت رأسي أشوف منــو
انتچه ؏َ الباب يباوعلي مگتف أيدة حجــة رافع حاجبة
::- شبيج اليــوم متكليلي بسلا اجتج؟
نزل علية الثول حجيت بأستغراب
:- شنيـة ؟
سد الباب برجلة تقرب همس بأذني دفعته من صدرة قــوي
:- ساقط أبو البنات وخررر
طگها بضحكة بصوت عالي سحبني لحضني مردني مردد وإني ادفع وهو ثابت
يجبل ميهزك ريح
سحبني نيمني ؏َ صــدرة ضاغط ؏َ چتفي حتى ماتحرك
أنهار ::- شبيكك عُثماننننن وخرر عُثمان
اويييي وخررر
هدني بسرعــة ڪعدد يضحك من ڪل گـــلبة شمر روحــة ؏َ المخدة يبستم
السبـع :- خربعرضج والله ضحكتيني
وخررر عُثمانن اوييي
يحجي يقلد صوتي گلبت عيوني بملل درت وجهي مطنگرة شكد حيوان وحقير
طفه الضوة وبوگتها جانت الدنيا مغيمة الضوة خفيف إلي يفوت للغرفة
السبـع :- أنهار نمتي؟
أنهار ::- أي نايمة إني لتحاجيني
السبـع :- تعاي نامي ؏َ صــدري اسولفلج
سالفــة
أنهار ::- لو تموت تحلممممم
السبـع :- ؏َ أبوي أريد
احجيلج
بدون وعي رأساً شلت روحـي ولكيت نفسي نايمة ؏َ صدرة ڪام يضحك وجسمـة ويهتز
من الضحك
السبـع :- لازم فضولج قوي
ها ؟
سكتت مارديت سكت ماحجه شوي أسمعة يذب حسرات ردت أشيل
رأسي بس صوتة إلي اخترق مسامعـي وقفني
السبـع ::- ماسولف هاي السالفة
لـ أي أحد من معارفي فقط أهلي يعرفون بيها حتى زهور متعرف بيها
عفست وجهي رفعت رأسي الــة منتچي ؏َ تاج الجرباية يباوع ليكـدام
:- زهور منو؟
السبــع ::- طليقتي
نزلت رأسي أحــس جسمي خَــدر وأطرافي ماكــدر اتحرك بدون ماحس غفيت ؏َ صــدرة
فزيت ؏َ حركــة وهو ينزلني يحط رأسي ؏َ المخــدة چلبت بطرف القميص وإني أشوفها
ليالي واكــفة تريدة ينزل وياها حتخرب ڪل خططي
رجعت نـــمت أيام اعتيادية مابيها أي روح أو طعــم عثمان رجع لطبعة بعيــد عني
أستحيت أسئلة ؏َــــن سالفة أبو ويفشلني
فتحت الحــظر من أنسام عوجت حلگـــي ماكدر بعد اشتاقيتلهن دكيت عليها
رأساً جاوبت
أنسام :- أنهارررررررررررر
أنهار ::- راح نغرگ بكد ما جريتي
الـ راء أريد اعرف يا چلب إبن سطعش چلب أقترح يسميني هذا الإسم
سكتت شويــة وحجت
أنسام :- محسوبتج الچلبة بت
سطعش چلب إلي اقترحته
أنهار ::- عُـــــمري تشرفنا
شلونجن
ذبت حَـــسرة
أنسام :- حَــال الضيــم حالنا شلون يعني
تدريــن لازم أتزوج أستاذ لهــيب أخو عمو هشام شايفة شكد عيب !! وفشلة أنوب
الرجال يحب وحــدة أجي إني انبص بنصهم شكو
أنهار ::- يمعودة رجل بالگبر ورجل
بالفراش وينة وين الحب متكليلي
صدُك أكلج هو أي مواليــد؟
صفنت شوي وحجت
:- مَــادري والله
أنهار ::- وشراح تسويـــن ؟
:- ماعرف أنهار شببيييج
والله ماڪو شي بعقلي حالياً ماعرف شسوي لو شتصرف وبيمن أثق
حجينـا شوي سئلت عليه وراها قفلت الخــط
وياها رجعــت انيم
ليالي
أنســـام ::- بعدت الغطه عن جسمي صارت عيوني ؏َ الساعــة بـ ١٢:٣٠ بليل فتحت
عيوني بالگــوة أحس بعطش مو طبيعـي نزلت للمطبخ
أخذت ڪوب شربت مي تنفست براحة نزلته من أيدي تحركت
أريد ارجـع للغرفة تخلل لمسامعي صوت من الخارج
فتحت الباب ؏َ الخفيف الشال ؏َ رگبتي اتبعت مصدر الصوت
جان ڪاعد لهيب بالحديقــة ؏َ الكرسي منطيني ظهره ممنتبه لوجودي حاط رجل ؏َ رجل يدخن ويسمع
اغنيـة يا نبـِعـــــــة آلـرِيـٰــحـٌــان
حطيت الشال ؏َ رأسي تقدمت كعدت مقابيلة باوعلي بأستغراب
ماتوقع وجـودي عدل ڪعدته
طفه الأغنية وصار يباوعلي باوعت ؏َ النفاضة إلي ڪدامة يمكن مخلص باگيت جكاير
حجيت وبحه النوم مبين بصوتي
أنسام ::- شنو اول طيحة
الجكاير وهلكد شارب
ظل يباوعلي ساكت ذبلت عيونة رجع نفس بالكرسي يباوع للسما
لـهيب :: شعدج ڪاعد هيج
وكت بابا بعدين الجو بارد موزين دخلي جوه
زفرت نــفس أحاول استجمع نفسي حتى أنطق الكلام إلي يدور
بمُخيلتي
عيونـة ؏َ السما يدخن مايباوع اليــة عيني علية بلعت ريگي حجيت
بـ تعلثم
أنســام :- إني موافقــة
رفع حواجبة بأستنكـار
صار يباوع عليـــة عيونــه بعيوني
لهــيب :: موافقـة ؏َ شنو ؟
أنســام :- موافقــــة اتزوجك لهـــيب
حجيتها بيني وبين نفسي أي أي ڪوليها هيــج لتخافين رفعت رأسي أباوعلة
عيونـــة عليــة يباوعلي بتأمل ينتظر جوابي وعلامات الاستفهام واضحة ؏َ محياه
زفرت نــفس
أنسام :- مو عرضت عليــة تتزوجني؟
أي إني موافقة
رجع بالكرسي سند رأسة ؏َ الكرسي حط أيده ؏َ عيونــة وأشرلي بأيده أوكي
أحس روحـي صخنت هذا شبي ليش هيج ردة فعلة لا لحظة أنسام قابل شتردين
يعني يرگصلج
عضيت شفتي بنــدم حجيت ابرر الــة موقفي
::- يعني هو اني آسفة
بس أنت اذا متريد تتزوجني عادي كلش والله لتستحي إني ماجبرك إني أدري بيك تح..
عيوني بالگاع احجي بسرعة بدون ما أفكــر رفعت رأسي الــة يباوعلي مصدوم
بسرعة ڪمت ودفعت الكرسي بدون ما أباوعلة ركضت ڪعدت ؏َ الدرج أغم بروحــي
أنسام ::- شعلية حيوانة شعلية
تبررين الة اللّٰـه ياخذني أن شاءلله
ردت أصعـد بس وكفت من سمعت صوت حرڪة ختلت حتى لا أحد يلمحني شفتها بان
طالعــة من غرفتها ظليت اراقبها لحد ما طلعت برة البيت يعني للحديقة
شو هاي كُلش فلتانه رجال بگد أبوها شعدها وياه ظليت الوب أريد اعرف شراح تگله
عيني ؏َ ساعة مرت عشر دقايق وماكو حس
شوي وأنفتح الباب دخلت تركض خدها أحمر توسعت عيونس بذهول ياااااااااا معقولة
تغزل بيها وأستحت لو شنو شسوو
حسيت بايد ؏َ چتفي طفرت طفررة
ألتفت وراي لازمة گلبي
أرتخت ملامحي وإني اشوف نوران واكفــة تباوع الية رافع حواجبها
نوران :- شكاعد تسوين؟
دفعتها ليفوگ لأن سمعت صوت خطوات متأكدة لهيب ليروح يشوفنا
:- أمشي صعدي ڪدامي هسه نحجي يلا
قفلت الباب زين باوعتلها بقلق ماعرف شلــون أحجي وياها بالموضوع وهل راح تتقبل
الفڪرة شنو راح تكون ردة فعلها
أنسام :- نوران تحبيني؟
هزت رأسها بـ أي وهي عيونها تباوعلي بـ ريب
أنسام ::- تريدين تعيشين وياي نوران ؟
نوران :- شدتحجين أنسام أكيد أريد !
وين المغزى من هذا ڪلامج؟
أنسام ::- ؏َــــادي عندج تتزوجين
بهذا العمر حتى تكملين دراسة ؟
عگدت حواجبها
نوران ::- ليش دتحجين هيج أكيد مو عادي
مستحيل يعني
بلعت ريگي أفرگ اصابيعي عصرتهن عصر بأيدي
تقدمت لزمت ڪتفها نترت أيدها
مني ڪأنها عرفت إلي راح انطقة ظلت جامدة لا تأخذ ولا تنطـي
أنسام :- إذا تبقين هيج والله ياخذج
مني ترحين هناك مايخليج تدرسين اللّٰـه يخليج لا تشلعين گـــلبي !
دفعتني بعيــد عنها تحركت ڪدامي لفت رأسها بالغطه نايمــة غمضت عيوني بتعب
استندت ؏َ الحايـــط
هل الحــل هذا راح يعود بنـفع عليها؟
داضرها؟
لو انفعها؟
ڪاعد انتشلها من مڪان سيئ لـمڪان أسوء أو أحسن ؟
ليلتها مانمت ظليت ڪاعـــدة أفكر للفجـر صليت ونمت هواي بحياتـي مريت بشغلات
سيئ وقرارات غبية وندمت هواي حيل هواي ؏َ أشياء كثيرة بس ماعتقــد إني بيــوم ندمت ؏َ شي أكثــر من اني حددت مصير نوران
بنفسي ما تركتها تختار بنفسـها
صحيت الصبح متأخرة لكيتها ڪاعدة تقرة مانطتني أي أهمية بصريح العبارة تجاهلتني
نزلت غسلت وجهي صبحت عليهم أشرلي خالي محمد بأيده
حط أيده ؏َ ڪتفي محاوطني
محمد :- نسئل سؤال
أبتسمت
أنسام ::- نجاوبك جواب
محمد :- شحاجي وياج لهيب
ليش أجاني بنص اليل يكلي كوم بت أختك قبلت
أنسام ::- عزا ڪعدك من نومك
طگها بضحكة
محمد :- أي وربج ڪعدت مخترع
والمطي يحجي بجدية
أنسام ::- مَــادري شفته ڪاعد وحده
إني اقتنعت بالفڪرة اهمشي خواتي يمي الباقي مومهم
باوعلي بعدم تصديق مقلص عيونـــة سمعت هوسة برة انفتحت الباب بسرعــة
دخلت بان باوعت لـعمها وكالت
:- أبوي وصللل
باوعلها بجمود طبطب ؏َ ڪتفي سحبني وراه ضامني ورة ظهره
أشوف نسوانة تمالخن ڪلهن يردن أول شي يسلمن عليه مديت رأسي شــوي اشوفه
جانت ملامحة قاسية وملامحة حاده جان عاگد حواجبة ؏َ عكس خالي محمد وجهه بشوش
حسيت بظل شخص وراي التفت جان لهيب
واكف مگتف أيده منتچي ؏َ الباب
عيونة مخترقتني
يمة درت وجهي للجهه الثانيـة شبي يباوع هيج رجعت أباوع لـ خالي إلي يحدق لنسوانة بقرف
لـهيب ::- أحلف بشريفة بت الحسن
هذا يريد يتزوج
ماحس إلى طگها ضحكة وعيونة تدورة بين الحضور طلع من وراي تقدم حضنة حيل يسلم عليـه
ردت أنسحب لكن بالغلط
صارت عينــة بعيني خزرني
ظليت متصنمة بـ مكانـي ماتحركت لحــد
ما خلصو سلام عليــة
لاحظت ماعندة ولد ڪله بنات بس ولد صغار بعدهم أعمارهم ماتتعدى الـ خمس ست سنين
أحمد :- هاي منين
يحجي ويأشر عليــة بأصبعة
محمد ::- سحر أخذي أنسام
فوگ
باوعله بأستنكار
أحمد :- لا يواش يواش وين مولية بيها
مني هاي الفريخة؟
الجــدة ::- طرگاعة نامت ؏َ روسكم
ڪون ماتكدرون بدون عراگ أمشي حبوبة صعدي فوك دهر صابك يحويمد
تحركت ردت اصعد عاط بصوت فززني
أحمد :- مكانججججج لتتحركيننن
كاعدة بيتي وماعرف منين؟
الجــدة ::- شمالك ويهد تجوعر جنك
هايشة تطلگ بت أختك هاية
باوعلي رافع حاجبو مسح ؏َ شواربة بحركة سريعة گصني گص من فوك يباوع مضيگ
عينة
::- اي خير اللهم اجعله خير
سحب نفس لهيب وڪال
لهيب :- بـما أنو انتو ڪلكم ڪاعدين
إني رايـد أطلب أيد أنسام ؏َ سنــة اللّٰـه ورسولة رايدها حَـرمة اليـة
جمدت بمكاني عيوني عليـــة يباوع ؏َ خالي أحمد بجدية واحس ڪُل الأنظار
صارت عليــة احتاريت شسوي الهدوء إلي احتل المكان غريب
اباوع عليهم أحسهم يسمعون دگات گـــلبي
غمضت عيوني وفتحتها لكيت لهيب طايح بالگاع توسعت عيوني بصدمة
ماشوف إلى خالي أحمد نايم فوكاه ويضرب بي وهو ماصدرت منه أي ردة فعل
أحمد ::- عرض السگط الـ** الـ** ابن الزمال
أنت واحد هتلي وساقط ومامربى يرادلك تربية من أول وجديد
لهيب :- مربى توت؟
بمُجرد ما نطقها ضربة بوگس ؏َ حلكــة حجايته ذكرتني بذاك اليــوم معقولة هو
جان نفس الشخص !!
أحمد ::- هو أنت شگول واحد يأمنك ؏َ شي الـ ** اليـوم ** و** أشكه
الجــدة :- يا دهر خايب تحجيها
طگ بطگ ڪدام الفريخات امشن ولجن خفة لخلقتجن هاي صافنات بويهي أنگلعن نامت عليجن طابوگه ڪون
لهـيب :- شدتحجي مداسمعك أذني توجعني
دكتور ڪلي عندك التهاب بالكلى
يحجي مستهزاء وخالي دمة فاير طاح بية دوسة ونص وهو ماتحرك تالي سحبة
خالي محمد سحبه للديوان وعاط بـ لهيب
محمد ::- تعاللل للديواننن
لهيب :- مو جوعان خناكلي لگمة واجي
أحمد ::- يابة بعلي دقايق اذا ماشفتك
ڪدامي أخليك تتندم ؏َ ساعة إلي عرفتني بيها
نهض روحة من الگاع مسح الدم إلي ؏َ وجهه ڪال بلامُبالاة
لهـيب ::- هو إني متنـدم حرامات واحد
مثلي إبن خالتكم المفروض إني أكون إبن وزير أجنبي ؏َ هذا ذكائي وجمالي
يحجي بهدوء وبرود متعمد ينرفزة راد يهد عليه وخالي بالگوه لازمة ساد حلگه
لأن نزل دوسة ونص بالفشار
الجــدة :- خايب وصرع وشبيه دشوفني
بشبابي جنت جني صخيلة امريكيه الشعر اشگر والعيون خضر
لهيب ::- سبحانك ربي وبقدرة قادر
تحول شعرج لـ أسود معطب وعيونج سود وجهج ازرگ
ماشوف إلى شالت عوچيتها تريد تشمرها عليه طگطگ عظامة طاحت
العوچية ؏َ خوالي
الجــدة :- يا دهر طاحت بفريخاتي
أنسحبت بهدوء بدون مايحسون رحت للمطبخ حطيت أيدي ؏َ گـــلبي أتنفس
براحــة أحس روحـي جنت مخنوگه بنصهم نسوانة لخالي ڪلهن وجوهن مگلبة
بعد ڪلام لهيب صعدن فوگ
مَــادري شعجب ماسون غدة ڪليوم خابصت رواحتهن فزيت من حسيت بضربة
؏َ رأسي ألتفت
لهيب واكـف يشرب مي ويباوعلي
::- ها الصفنة مو الج بسلا رجعتي
بقرارج وعلي أشك.. راد يحجي قطع ڪلامة وأستغفر
أنسام :- لالالا أبد بس جنت
أفكر ليش ضربك
لهـيب ::- چيفن زمال ليش يعني
ترا ڪل خوالج جانو يعرفوج ويعرفون أخبارج بس من بعيد لبعيد
أنسام :- شنو الفايدة حالهم حال
الي يشوفون أبنادم ڪدامهم ينگتل ومايساعدو
سكت مارد عليــة ردت أحجي وياه بموضوع الزواج بس رأساً حط الكوب ؏َ الميز وطلع
ظليت أباوعلة
التهيت منا ومنا لحــد ما خلص اليــوم
سمعت لهيب حيروح باجــر أريد احجي وياه بس مستحيــة باوعت للساعة بتسعة
أطلع أحاجي لو شلون
رفعت عيوني لنوران متحجي وياي تقرة وترد ليورة زفرت نفس دزيت رسالة لـ أنهار
- أطلع احجي وياه ؏َ موضوع حبيبته؟
شافتها بسرعة دزتلي ايموجي متنرفز
- شتكليلة مثلاً اعذرني والله راح
اخذك من حبيبتك باعي أمي هذا رجال اذا يحب وحده يأخذها لو تنطبگ السما ؏َ الگاع بس هذا مايحبها لو صدك يحبها لو ينطوج اله هدية هم ما يقبل
ظليت صافنة أعيد برسالتها ڪل شوية ڪلامها منطقي وحقيقي شمرت التلفون تمغطت دخلت للحمام سبحت طلعت بدلت ملابسي
لبست دشداشة سودة ثخينة باوعت لروحي بالمراية
روحـي تفرفرح ؏َ شوفتة مشتاقة لعلي مشتاقة المه لحضني وأشمة انحرمت حتى من شوفه
گبرة عمت عيني عليك يُمة
باوعت ؏َ ساعـــة بـ ١١ التفت لنوران نايمة بعمق تقربت قبلتها ؏َ جبينها بهدوء
لزمت أديها أمسح عليـهم بحنيـة
فتحت التلــفون شفت رسالة من أنهار
- ڪاعدة نحجي ؟
زفرت نفس سحبت شلون الفروة سودة غطيت بيها جسمي نزلت من الدرج ماكــو حس
الدنيا ظلمة أضوي ؏َ الدرب يلا أشوف طلعـت للحديقة الهوئ بارد تندمت
طلعت لا اروح اتمرض انوب
دگت عليــة حجيتها وياها شوية تحجؤ ؏َ عيالها داست بيهم دوسة ونص أحس بجسمي
يرجف من البــرد صعدت الشال ؏َ رأسي صرت اطگ سن بسن
بسرعــة ڪمت أريد ارجع للبيت أنركعت بشخص دعيت بكل الأديان والائمة مايطلع
هوه بس من عطرة عرفت اميزة رفعت رأسي باوعلي بعيون ناعسـة ذبلانة
أبتسم تك خد
أنسام ::- شفايفي وخشمي زرگ مو
من البرد عادي
حجيت وقربت أيدي ؏َ حلگي ادفي أدية
ميل رأسة يباوع ؏َ شفايفي وڪال
:- لا لونهن وردي يا ازرگ
صفنت أباوعلة وهو يباوعلي دگ تلفونة حمحم وفتح الخــط رأسا ڪال
::- ها شتريد
رفع حاجبة أبتسم بخباثة
:- يم بت أختك اني
هو حجاها ماحس الى دقايق خالي أحمد واكف ڪدامنا تقرب لزمني من طرف الدشداشة
يعت بية ليجوة ولهيب يضحك بصوت عالي
أحمد :- شمگعدج وياه بره ها؟
أنسام ::- جنت ڪاعده وحدي هو اجاني
ذب حَــسرة وأشرلي أصعد فوك رأساً صعدت دخلت جوه اللحاف أشتم بروحـي ليش
طلعت برة شموزايني
احتضنت البطانية حيل مدفية جسمي غمضت عيوني قوي أتذكر الصار وكلامة واستغفر أكول أكيد إني فهمت بغير قصــد
بدت عيوني تستلم للنوم بس صوت أشعار جاي من التلفون شدني حتى أعرف منو
يدز هيج وكت
- ترا الخطوبة تحددت
فتحت عيوني ؏َ الإسم جنت حاطه عليه تلاث نقاط لرقم لهيب كتبت بسرعة
- ياخطوبة خطوبة منو؟
دز
- ** أمي
عضيت شفتي بفشلة هذا شلون يكتب هيج مايستحي ظليت صافنة
مارديــت أباوع ؏َ الشاشة رجع يكتب
- لا تعضين شفتج
فتحت عيوني وشهگت حطيت أيدي ؏َ حلگـي
دز رأساً
- أراهن هسه أنـتِ حاطه أيدج ؏َ حلگج
ها؟
نهضت ؏َ حيلي أباوع بالغرفة مامعقولة هذا شمدري يمة مادز شي بعد ظليت صافنة شلون
عرف شداسوي
- أستاذ معقولة حاط كاميرا مراقبة
بغرفتي؟
رأساً شافها ودز ايموجي يضحك وراها ڪتب
- أي وشفتج أنـتِ وتبدلين
لطمت ؏َ خدي من حلاوة روحـي صدكت تأخر ورجع ڪتب
- أشاقة بابا نامي تأخر الوڪت
موزين عليج السهر
دزيتله ايموجي اوكي وحطيت رأسي ؏َ المخدة أتخيل صدُك شافني إني وابدل شكد
عيب ليش يحجي بالقلم العريض
فعلاً بعدها تحدد موعد الخطوبة وإني مثل الي بحلم منتظر شوكت يصحى بس مجان
أكو مهـرب من مصيري وقدري المكتوب اليــة
لفيت الحجاب انطتني وحده من نسوان خالي عباية ميقبلون أطلع بدونها أباوع لـ روحي
بالمراية رايحة أجهز لعرسي وأخوي مطلعته السنـة مالته
دگيت ولطمت وتوسلت ميسون حفلة ولا عرس محد منهم عبرني عبالك أحجي وية الحايط
ڪالو حفلة خطوبة علاقل
رفعت تلفوني أشوف الاشعارات من أنهار خبصت الدنيا راح تجي بالالف ياعلي
أقتنع رجلها هي مينخاف عليها ايشي تريدة تجيبة
سَحبت نفـس عميق لبست العباية شكلها
مقبول عليــة نوران ماردت
ولا جاوبت ومحد حجه بسالفتها وهدوئها مخوفني
داعيش نفس الشعور إلي عشته قبل
وفاة علـي خايفة لا اخسرها هيَ هم وساعتها من صدُك أتدمر واموت وراهم
نزلت جوه باوعلي خالي أحمد من فوگ ليجوة هز رأسة سحب نفس من الجكارة
ونفخه أشرلي وراه اخذني إني وحده من بناته اشتريت فستان أسود
بغض النظر عن أيشي راح يحجونا يس مستحيل البس أي لون غير الأسود
رجعنا للبيت هلكانين إني ماريد ايشي وهاي بنته چلبت جهزتني جهاز مال عروسة
من صدُك
دخلنا للبيت أول مدخلنا گبت العيطــة
:- بت الفگوووور تشمرررريييين سحووورررة
ماشوف إلى ذيج طفرت عليها تعت بيها من شعرها مالحكت توصل حتى عاط بيهن صوت
خنسهن خنس
أحمد ::- ومرضضضضضضض
شبيجن بنات الـ أستغفر الله
:- ياااه شنهي يابو ولدي ماتشوفها
طگتني عليش ساگتلها
طگها ضحكة وغمزلها
::- واتصرف چني ماعرف طينتج بت خلود
:- ايه لهذا اطگها يا أبو بيتي ڪونها
أمها تسويلها سحورة وتذبها هني بديرتنا عبنها تريد تهجم بيوتنا بت أم الزلم
ماحس الى تقدم عليها ضربها ؏َ حلگــها حيل من يمي حسيت بالوجع باوعت ؏َ بناته
حسبتهم خمسة ولد ثنين الهم صلي ؏َ محمد
جنت اتوقع السالفة عادية مشكلة تصير بين الضراير عاديــة لكن ڪلام خالي الي صدمني
من رمى عليهن الطلاق اثنينهن ختمها قبل لا يطلع
:- رحم الله من زار وخفف
الي تولي لبيت اهلها متاخذ فريخاتها وياها
وحده منهن شگت ثوبها
::- تريدنييي اعييييفف بناتييي هنا واروحننن
وكف عاط بيها بصوت جهوري عالي
أحمد :- قابل اعوفهننن يتربن بين السكاررررة اخوانج
حجاها وفلش شكو شي طلع ڪدامة صار يتعارك وية الهوى تقدمت وحده من بناتها
بطنها شوية جبيرة دنگت عليها تكومها
:- ولا يهمج يمه كومي وياي نروح يم زلمتي
يحبج مايردلج طلب
عوجت حلگها مرت خالي الثانية
::- كون جدتج طاگته بسحر خماسي الأبعاد
يحب ليش مايحب
رادت تكوم تهد عليها بس لزمتها أمها گومتها لبسن عبيهن وطلعن بقن بس تلاثه من بناته
إلي فهمته ثنين متزوجات وجايات عد اهلن وتلاثة بعدهن
باوعت ؏َ بان تخزرني هزيت بيدي ولله زعطوطه هاي شلون افهمها باوعت ؏َ وحــدة ڪاعده
بركن تعض بأصبعها خايفة
اجتي سحر مرته الأول غمتني وغمتها
:- گصتجن فگر عابت لهلجهره العايبة
أنسام ::- يااااا
سحر ::- ويعة هليييي
سحبتني وحده من البنات لغرفة بيبتي عيوني ؏َ درج اريد اشوف نـوران بالـي يمها
دخلتني وطلعت شفتها تسَبح ڪعدت أباوعلها رجعت دخلت البنية وياها هواي مكياج
:- أسمي ندى أنه بنت خالج أحمد
ماتعرفيني لچن أنه اعرفج من زماننن عبن عمي وأبوي بطاريج دايم
أبتسمت ؏َ لهجتها باوعت النا بيبتي وڪالت
الجـدة ::- هاشني شراح تسون يالمصركعات
ندى :- ههه جدة شمالج جاي اعلمها
تحط مكياج واحفلها غير اريدهن تبين حليوة لا يطفر الرجال
ذبت حَـــسرة عدلت ڪعدتها وڪالت
الجـدة ::- اخ جانت اميمتي اللّٰـه يرحمها تڪول إلي مايحبج بشخاطج ومخاطج لا يحبج بحمرتج وخطاطج
باوعت عليــنا وأردفت مكملة
::- دائماً نحب نبين حليوات چدام الي نحبهن چيفن نريدهم يشوفونا هيج بس الزواج يا صخيلاتي مو هيج أنـتِ راح تعيشين وياه ڪل حياتج أكيد مارح تضلين ڪل عمرج تحطين مكياج حتى يشوفج حليوة ويتخبل عليج
:- إلي يحب يا يمة يحب روحج الرجال من يحب روح المرأة يحب كلشي بيها من تداري وتباري راح يتعلق بيها
ندى ::- يا جده مو هاي أمي مدارية
أبوي ونزل ؏َ راسها تلاثة
غمتها بثنين أيديها وڪالت
:- امداج هي أمج هم تنحسب ؏َ نسوان مو ڪلت هيج يعني فدمرة متهتم بروحهاااا امج
شواربها صالها سنتين محافتهن الله شاهد اثخن من شوارب حويمد
ضحكت ندى بصوت عالي وكعدت تحفلي واني أطفر منا ومنا حفت ڪل وجهي شكلي
اختلف جذرياً لأن فعلاً جنت ممهتمه لروحي ومانتبه ؏َ هيج تفاصيل
ندى ::- هذا إذا يشوفها شيسوي
عمي لهيب أخذها بشواربها إذا يشوفنها هيج يتخبل عليها ههه
دفرتها جدتي برجلها
:- شمالهل سوالفج مگسرة الغبرة امشي اخذي هاي النعجة الي وياج ولن من يمي اريدن
انخمد
ندى ::- نخمدي جدة نخمدي طالعين
شمرت العوجية عليها طاحت بالباب صرخت بصوت عالي
::- يااااااععع هاي عوچيتها تعبها الوكت
صاير ماتعرف الهدف منين ما وين
ضحكت ؏َ سوالفهن من خطبتني صبرية واضح ؏َ محياها شكد هي مو طايقتني بس إلي
استغربته هي جانت خايفة من بيبيتي لدرجة صارت مشادات ڪلاميــة بينهن
دنكت رأسي مغمضة عيوني رجعت رفعتها باوعت وراي إلها تباوعلي بنفاذ صبر
نوران ::- افتحي الباب عيب شجاچ أنسام
أنسام ::- يردننن يحطليي مكياج ماررريييد
ندى :- يابة بعلي ڪونچ مافتحتي الباب
لكسرها وادخل اسحلج من عطوبج أم الگمل فتحي راح يجي الزلللمهههة
استسلمت للأمر الواقع رفعت عيني ؏َ ساعة مبقه شي ويجي نعقد أحس رجليــة من الخوف
بعد متشيلني
ڪاعده ڪدامي تخط بالگحلــة اهز برجلية من الخوف
ندى ::- ياااا نسيمة شبيج ولج راح تخربين
السالفة شجاج هسه قابل اليوم ليلة الدخلة
نوران :- عزاااااااااااااااااااااااااا
ندى :- هاي مثل جهاز الإنذار وين متسمع
ڪلمة غلط تصيح عزاااااا
أنسام ::- آسفة والله مو أول مرة اتزوج
باوعتلي بصدمة ڪعدن يضحك عليــة خلصت رحت لبست الفستان يا مُحمد العربي
ضيگ ضيگ
طلعت باوعتلي ندى صوفرت
أنسام :- ضيگ ماكدر اتحرك عفية غيرة ايشي
ندى ::- دنطمي خايبة شو دوري دوري
انداريت وطگنها بضحكة ونوران حاطه أيدها ؏َ حلكها وتصيح
:- شكد ماتستحون
غصبني أنزل ڪعدت والمكان انترس نسوان ماعرف منين عيونس تدور أنهار غير اليــوم
تجي شو ماكو
ماحس إلى ؏َ صوت هلهلولة طرشت أذني وصوتها وهي تهوس
:- هاي فرحـة وبعددد فرحة
واليحبنااا يفرح ويانا
أبتسمت من شفتها أنهار داخلـة حاطه مكياج لابسة عباية وشايلة بت رجلها بيدها وتهوس
فرحانة دخلت وراها ودق باوعتلي
ودق ::- وعيون الغزال عيون چنته
صلو ؏َ نبي والصيدة صديتناااا
تقدمت ندى وكفت ڪدام صبرية تهوس
ندى :- عفية عليج شلون دبرتيها
بت النجوم للگمر چبتيهااا
قابلتها صبرية بردة فعل تشرح مدى قرفها من الوضع وشكد هي مشمئزة مادرتلها بال
اجتي أنهار ڪعدت يمي بعد ما نزعت عبايتها لابسة فستان أحمر طالعة تخبل
هستوها تريد تحجي ڪالت بان
::- شنو هلجُرئة لابسة احمر وأنـتِ زرگه
التفت الـها أنهار باوعتلها من فوك ليجوه بأستصغار
:- ليش يُمة قابل أنـتِ بحسني وجمالي؟
من فستانج الأصفر هذا طالعة جنج ماعون وبي زردة
وجهه صار ينطي ألوان غمتها أنهار رجعت تباوع اليــة
أنهار ::- هاي منيـة جنها نعال خليل حماي
الحية الصفرة
ضحكت ؏َ ردة فعلها ضلت تسولف شوي وگومني ڪالو اجه الشيخ أريد أكوم
رجلية متشيلني من الخوف أحس روحـي وحدي ماكو أحد وياي
كعدني يم الباب يحركني ؏َ كيفهن مانطيت أي ردة فعل حجه الشيخ هواي الشي الوحيــد
الي سمعته نهاية ڪلامة ڪال
:- إذا قبلتي قولي نعم قبلت وأنت وكيلي
رجف جسمي غمضت عيوني ونطقتها مَــادري شصار صوتها الهلاهل اخترقت طبلة أذني
ڪتلهن لا يهلهلن اللّٰـه لا يوفقهن من حركه گــلبي ماعرف شحجي
رجعوني لمكاني دنگت رأسي صافنــة بالفراغ رفعت عيونـي ؏َ صوت نسوان ثنين
جَذبني حديثهن
:- يا خية هي صغيرة وحليوة
شجاها ماخذه شايب
::- شمعرفنه يجوزن عايبة لو بيها شي
خزرتهن انتبهن عليـة وسكتن شوي وصار صوت المهامس عالي رفعت رأسي شفته واكف
يم الباب يباوعلي بثبات لابس رسمي وهنه يضحكن مَــادري ؏َ شنو
هز رأسة وتقدم ڪعد يمي من الخوف نسيت كُلشي دنگت رأسي لايشوفني مستحية أحط
عيوني بـ عيونة وكلني وكلته مدنگه مارفعت رأسي
أخير شي اجتي ندى وبيدها طاسة صغيرة حلوه بيها عسل حطتها ڪدامة باوع بأستنكار ؏َ العسل
ذب حَــسرة حطه اصبعة الصغيرة بالعسل
وقربها لحلگي أباوعلة عيوني صارت بعيونة أشرلي ؏َ أصبعة
توجهت انظاري لـ أنهار واكفة خازرتني تأشرلي فتحي حلگج سحبت نفس فتحت حلگي
حط أصبعة بحلگي وعينه ؏َ شفايفي دار وجهه ؏َ جهه ثانية وهمس
لـهيب ::- هسه من الزم سوالف
هلنسوان وازرب
عليها أكو كو** يكلي ليش
عضيت شفتي حتى هنا يفشر شبيه هذا أخذ الحلقة قربها مد أيده بمعنى انطيني أيدج
بلعت ريگي أيديه ترجف بشكل يخوف سحبها لبسني الحلقة وعصر أيدي عصر
انداريت أخذ الحلقة من أيدها لمحت طيف فرقان واكفة تباوعلنا رفعت حاجبي بأستغراب
رجعت لزمت أيده أريد البسه الحلقة وايده تتلمس بأصابيعي بهدوء
توترت تقربت ندى انطته گلاده غمزتلي خزرتها شكد مستهترة هاي البنية تقرب عليــة
صار رأسة برگبتي أنفاسة تلفحني رفع عيونـة يشوف مدى تأثير حركاته عليـه حاولت ڪد ما أكدر مابين ضعفي أو إني ضعفت ڪدامة
رفع رأسة شويــة همس بأذني بهدوء
:- طالعة حلــوة
درت عليه مصدومة صار وجهي بوجهه أبتسملي ظليت صافنــة باهته بوجهه
نهض ؏َ حيلة عدل روحة وطلع يمشي بهدوء ورزانة
ظلن يهوسن ويرگصن والأغاني أحس دخت وتعبت الفستان خنگني من قسته جان قياسي
هسه ليش ضيگ !!
رفعت رأسي فوك لا أبجي شوي واجتي ندى گومتني
أنسام :- ها وين ؟
ندى ::- روحي ڪعدي يم زلمتج حبوبة
وين يعني ؟
أنسام :- صدُك تحجين بهاي ملابسي
ندى ::- اي مو قبل دقايق جان مغمض عيونة
تسحب بية وإني عوزي أبجي چلبت بيها وهي ماكو قافلة فتحت الباب دفرتني للغرفة وسدتها
تضحك وتغمزلي ضليت واكفـة منطيته ظهري
بلعت ريگي فرگت أصابيعي شهلخوف الي لبسني
فززني صوتة
::- إني أكول لو تندارين لأن منورة
السالفة داچه أكثر من ڪدام
التفت بصدمة عزااا بعين أمي اباوعلة وارمش بعيوني أحس راح اتخربط من الفشلة
هسه شعبالة يبووو
جان ڪاعد يدخن ومقلص عيونــة يباوعلي ماحس إلى طفه الجگارة بالنفاضة بسرعة تقدم عليه وإني ارجع ليورة لحدما عثرت وطحت ؏َ
التخم ماشوف إلى نــام فوگاي
أبتسم بـسعادة يمكن أول مرة أشوف هيج يبتسم ڪال بصوت ذايب
لهـيب ::- نذر هذا خاف تگولين !
عگدت حواجبي ؏َ شنو ديحجي تسارعت دگات گـــلبي وإني أحس بشفايفة ؏َ شفايفي
دامجهم أيده تسللت لخصري لازمــة بيده قوي
گورت أيدي ضربته ؏َ صدرة أريد يبتعد بس هو صاب جم اهتمامة ؏َ شفايفي يتفنن بيهم
أنفتحت الباب بقــوة أبتعد عني بسرعة يمسح بحلگه واني حالتي حالــة گمت وأحس روحي
سكرانة اتنوطح وگلبي صوت دگاتة حتى لهيب يمكن سمعـة أتنفس بسرعة
مسحت حلگي تخربطت حُمرتي ماعندي الجُرأة أرفع عيني اشوف منو راد يحجي
لهيب بس صوت صرخة قاطعــة
أنتفض جسمي بـ فزع واني أسمع صوت أنهار تصرخ بصوت عالي ماصرت أشوف ڪدامي
ركضت بسرعة فوگ صحيح نوران وين نسيتهااا ماشفتتتهاا بالحفلة !!!
صعدت فوگ الدرج صار شطولة وصلت يم الباب الهث أحاول التقط أنفاسي
رفعت عيني وعساني لا رفعتها
طحت بالگاع الگحلــة إلي رسموليها قبل دقايق لفرحتي طاحت هسه بدموع خيبتي
روحـي أرتعدت من الخوف وإني أشوف نوران مــددة بالگـــاع والدم مغرگها
:- نوران أنتحـــرت ..
- شحَلات الفاتحه بصوتي
شحلات اخشاب تابوتي
اش واسم الله لا تحچون
عشِت شلون ماتدرون!
اريد اتونس بموتي .
يتبع..
الحكايــة تستمر إلى إحداث أخرى .
𖦆 𖦆 𖦆 𖦆 𖦆 𖦆 𖦆 𖦆 𖦆 𖦆
شلونكم نياتييي مبدئياً هذا البارت طبگت بارتين بارت واحد فـ كُلش كُلش طويل تعويض الكم والأحداث تملخ ها 😡😂! رجاءً بدون جملة البارت قصير 🫶🏻🩷
حسابي انستا للتواصل 👇🏻
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!