انثى في عرين الوحوش الفصل الرابع والعشرون 24 - بقلم الاميرة ارجوان

الكاتبة الاسدية

شدوا جناحي ويريدوني أطير
هاي ناس بلايه ذمه ولا ضمير
عدهم الضحكة چذب
واليحبهم ينسلب
ما أظل وياهم أني من الأخير
شدوا جناحي ويريدوني أطير

جوري عفت فريدة تخبز واني رحت ادور جبارة لان صار الغروب وهو مابين من طلابة الصبح

ماكووكلها عشر دقايق واسمع صريخ فريدة التفتت واشوف فريدة تركض والنار شابة بيها من راسها الرجليها

من صدمتي ماعرفت شسوي بس ضليت اصرخ وياها واشوفها تلوب وتصرخ
منظر بشع عمري ماراح انساه

احس بيها تستنجد بية وتتوسل اخلصوهة من الوجع

ركضو الولد عليها وخالة سكينة والكل التمت

عبد جاب بطانية ولفلفها بيها طفت النار

عبد ولج خوية شمالج شجاج ولج ليش هيج

الكل ضلت تصرخ وتبجي والكل تلوم وتعتب ليش وليش

مثل المثل الي يكول يكتلون الميت ويمشون بجنازتة

شالها عبد وجاسم مرو من يمي اباوع شكلها سبحان الله شلون تغير انفخت عبالك نفاخة

من مرو من يمي فريدة ضلت تباوع بعيوني وحجت كلمة خلصت

طلعو كلهم يركضون واخذوها وراحو للمستشفى

سكينة الله على الظالم بت جنها ورد عليش هيج يظلموها

خايبة يجورية جا موش اتي وصيتج تخبزين جا فريدة شوداها صوب التنور

جوري ماكدر انطق ولا كلمة وبس البجي ومنظرها وهي تركض والنار بيها خلة جسمي كلة يرجف

بعد اكثر من ساعتين رجع جاسم وكال خلنة نتحزم نسوي فاتحة فريدة

النسوان ضلت تصارخ وتلطم

سلمان اصبرن ولجن مايجينة من صوبجن بس العار

يجويسم جا بت عمك شمسوية وحركت روحها خافنها خذت درب اختها وخافت لا يكشفوها

جاسم استغفر ربك يسلمان البت كبل لا تموت كالت اريدن اخلص من عار كريمة الي لاحكني طول عمري

سلمان جا خوش اسمعو كلكم كبل ما تلتم الوادم من ينشدون شلون حتركت

نكول شجرت التنور ودشداشتهة نايلون وشبت بيها النار واي جلمة غير هيج ماريد سمعتن واتو سمعتو

جاسم خوش يخوي صرخن ينسوان خل الوادم تسمع

جوري الله ياخذكم كلكم تخافون من الناس وماخفتو الله من ظلمتو البنية لكم حرام عليكم الله ينتقم منكم الا موتتكم تصير على ايدي جلاب حقراء

جاسم وج عليمن هيج تصارخين
وتفشرين الا اخليج تلحكين فريدة وبدل ما نطلع بجنازة نطلع بثنين

جوري من وجع كلبي ماحسيت بجاسم يسحلني من شعري وكوة خالة سكينة خلصتني منة

التمت الناس وجابو الجنازة للبيت هلكد بجيت عليها صح هي هواي اذتني بس اخر لحظات حياتها حسستني اني اختها وشكت الي ظيم كلبها

مهما يكون الدم يحن وتبقة هي اختي

طبعا فريدة ماواصلة للمستشفى وميتة بس كالت العبد اني حركت روحي

من سمعت امها موتت روحها من البجي واللطم وحتى عافت منسية ورجعت وية جنازة بتها

منسية محد كايل الها فريدة انتحرت يخافون عليها تنقهر ليش هي الي مثلها هم تعرف اتحب واحد وتنقهر علية

فاتحة منصوبة 3 ايام من الفجر تبدي الناس تجي الى بعد العشة واكو اصلا يبقون مقيمين وبالاخص المحافظات

اخوية ماجد وحدة حضر الفاتحة

اما عن سلمان فجميلة رجعت البيتها علمود الفاتحة وهم علمود سلمان منصوب وبحجة ادارية

نرجس من سمعت بفريدة ماتت حاولت اروح الجوري ماقبل غضبان

وحمدان اتعارك وية جميلة لان كالت اروح الزلمتي لان متصوب ومنا بت عمة ماتت وفاتحة

كوة عنهم خلوها تروح بس شرطو عليها مترجع الهم زعلانة اذا اتزوج عليها سلمان وهي وافقت

اني ضليت الوب اذا بفاتحت اختي ميخلوني اروح كلت خلي اجرب الي كال علية علي

اجيت على غضبان كتلة عمو اريد اروح للفاتحة مال اختي واريد اشوف جوري

غضبان كون عمة الي يعمي عينج جا انة عمج يو زلمتح وروحة مامش

نرجس لا اروح مو كلشي لا لا

غضبان شوفي ولج انة الدنيا طافرة من عيني ان ماجريتي عدل وحق ابو فاضل اخليج تلحكين اختج جنازة

نرجس واني اكلك اذا ماخليتني اروح هسة منا اطلع اصيح كدام ولدك وجناينك ونسوانك اني بعدني بنية وعمو غضبان كلشي ماكو وافضحك فضيحة واطلع جذبك الهم

غضبان جا خوش من عبنج تساويها هنا اذبحنج جوة رجلي كبل لا تنطكين جلمة

نرجس مو مهم تذبحني تكتلني المهم افضحك

غضبان وج صايرة كوية وماتخافين

نرجس عيشتي وياكم علمتني ماخاف هسة شكلت

غضبان جا شلون وحنة عدنة طلابة وياهم

نرجس اني طلعني من طلايبكم اريد اختي وبس هسة شكلت اروح لو اطلع النسوانك

غضبان اشوفن احد مدرسج على هاي السالفة ياهو الي كلج عليها

نرجس محد مدرسني ولا احد معلمني بس من عاشر القوم اربعين يوما صار منهم واني صار سنة من عاشرتكم

غضبان جا خوش روحي وانة اكللهم عيب من الوادم عزة اختها ومامشت ليهم

نرجس اتعلمت احط الشيلة على راسي والبس العباية بس شنو تسحل متر وراية ورحت على بيت منسية

لكيت الزلم هلكد هواي تارسة المضيف وناصبين جوادر تكول العراق كلة يمهم

جبارة ها نرجس المسودنة الحبابة
غضبان ابو العرك شلون خلاج تجين

نرجس جبارة اريد اروح يم جوري

جبارة هاي اختج تسودنت بس تعوي راح تسودني وياها

نرجس اي هي هم هيج صارت جوري مسودنة وراح تسودنك انت خطية هسة وينها جوري

جبارة تعالي وراي

نرجس واني امشي وية جبارة صارت بوجهي نورية

نورية شجابج يالكح.... جا ضليتي اتي واختج عارات ماتموتن وبنيات محيسن الصكد يموتن كون الموت بيج اتي واختج

سكينة كولي يالله نورية بتج الله يرحمها وهذن خياتها محروك كلبهن عليها

نورية لا موش خياتها وذيج الحية الي كشمرت بتي وخلتها تخبز بمجانها واحتركت الا اندمنها

جميلة هاي شجابج ولج وجدي يدري بيج جاية هين

جوري اجاني جبارة يركض للمطبخ وهو يصيح

جبارة جوريتي المسودنة تعالي نويرية المسودنة راح تحرك اختج

جوري شنو شبيها اختي وين هي

جبارة وج اتلاحكي عليها عبنهن راح يموتنها هذيج عفتهة وشردت

جوري طلعت اركض وين مجلس النسوان والكي نرجس تبجي وخايفة ركضت عليها وحظنتها

نرجس جوري اني حايفة اجيت عليج

جوري لتخافين تعالي وياي

نورية اصطبرن علية ان ماخذيت روحجن جا بس انة بناتي يموتن ونتن جنجن غراب البين كلش مايصير بيجن

جوري ماردت اتصير هوسة كدام الناس حظنتها حيل شعجب اجيتي وشلون خلاج غضبان تجين

نرجس لان هددتة اذا ما اجي يمج وللفاتحة مال اختي افضحة كدام اهلة

جوري عزة العزاج وشلون هيج سويتي ماخفتي يذبحج وعلى شنو هددتي

نرجس هددتة اكول اني بعدني بنية وغضبان ماكدر يسوي شي

عبد نرجس اشجابج اهنا سلمان يكول ترد الحوشها لا يردنج بالكوة

جوري عبد شجاك مو هاي هم اختك شوف شلون محترك كلبك على فريدة لعد هاي مو اختك مثلها

عبد انة مالي غرض سلمان هيج يكول

ماجد عبد هاي شكو هو هذا الله الي كدركم علية تهددون بنية

عبد موش انة هاذ سلمان يكول خلها ترد الحوشها

ماجد روح كل السلمان نرجس جاية بيت ابوها واخوها وانت مالك حق تطردها

نرجس خلي اروح ماريد مشاكل

ماجد لا متروحين وهسة روحي وية اختج

جوري اصلا ما باوعت بوجه ماجد لان ما انسة من باعني بلحظة الخاطر بنتة

اخذت نرجس ورحنا للمطبخ لان شغل هواي ومشاكل النسوان متخلص

كعدنة سوة نشتغل ونصب جاي وياخذن البنات للنسوان ادري ميشبعن من الجاي

سالت نرجس عن وضعها سولفتلي عن علاقتها بغضبان وعن اهلهم شمسوين بيها من كتل وضلم

نرجس اكول جوري اتفقت وية علي يهزمنة منا

جوري بس اريد اعرف علاقتج بعلي شنو

نرجس اني احب علي وعلي يحبني ومتفقين بس ننهزم منا نتزوج

جوري عزة بعينج نرجس شنو حب ولج هذا من ال شنون هسة يطلع هذا دازي عليج يريدون يختبروج

نرجس لا مستحيل انتي متعرفين علي لوما هو ماجان كدرت اجي يمج هنا

جوري اني حسيت علي وراه سر يخلي يساعدنة واني الغبية رحت ركض علية وطلبت منة ينقذ امي

نرجس امي شبيها امي وليش ينقذها وين امي جوري

جوري اش فضحتينة كلها تباوع علينة

سكينة امشن خالة اخذيها الحجرتج وسولفن براحتجن

جوري يلا نرجس تعالي وياية

رحنة بغرفتي ستونة طبينة نسولف منشوف غير نورية هدت علينة وذاك الغلط والفشار وتصيح محد موت بتي غيرجن

وانتن كاعدات تتونسن وتسولفن
اليوم الا اخليجن تلحكن بتي

ونوب هدت وياها جميلة وحدة طلعت اخت نورية والهوسة كامت

حتى ماجد وعبد وعلي اجوي على صوت العياط والصياح والعركة

ماجد ولج يمة خزيتينة شجاج انتي وين هستوج مكسورة وبتج رايحة منج مال عرك ومشاكل

نورية وك وسفة التعب والربة بيك ريت بطني مانكلتك عدك بنات الفصلية ابدة من اختك بت امك وبوك

ماجد يمة اني على المشاكل اول تالي صوتنة يطلع كدام العالم ونوب كلها زلم جاية تاخذ من خاطرنة

نورية اليوم ماريدن بنات الفصلية يضلن بالحوش اذا ضلن اروحن احركهن

ماجد ميخالف ميضلن اني اخذهن وياية

سلمان وين تاخذهن وياك جا هي هيتة يو فالتو خافنك شفت حبوبتي موش هين وكلت تصرف بكيفك مامش وحيدة تطلع من حوشها

ماجد وانت شدخلك اني وخواتي وامي

سلمان وانة جبيركم والشور والراي كلة عدي واتة مالك راي

علي كولو يالله منا الوادم وعدكم عزة لاتسوونة سالفة بالديرة

سلمان اتي نرجس كبل منا روحي البيت رجلج وماريد اشوفنجن بالحوش

واتي جوري امشي وية النسوان نريد همتج وحالج من حالهن

علي امشي مرت جدي خل اوصلنج الحوشج

ماجد لا مشكور ياخوي اني اوصلها امشي ياخوي

جوري خلصت ايام الفاتحة وراها طلعو منسية من المستشفى شايليها شيل حلكها معووج وايدها ورجلها ماكو اي حركة بيهن

طبت للبيت كامت تبجي على فريدة ونورية كابلتها وتبجي وياها وكل هذا ميخلى من الحجي والدعاوي علية وعلى امي واختي

مرن الايام نفس الروتين بين الاهانة والضرب والتشدد بالحبس اكثر من الاول لان بدت نرجس تتردد علية كامو يخافون لا نتفق ننهزم سوة

بعد اربعين فريدة رجع موضوع زواج سلمان ورجعت مشاكل جميلة بالبيت بس هاي المرة ماراحت الاهلها

جبارة اكولن جوري سلمان المسودن يريدنج يم منسية المسودنة المريضة

جوري اهو شيريد سلمان

جبارة ماعرف بس انة شلت احجارات خافن تصيرن عركة

جوري جبارة رحمة الربك دير بالك مو تفشخني بطابوكة مابية حيل فشخات

جبارة موش اكولن عليج مسودنة جا انة اريدن افشخ سلمان تجين اتي بالنص

سلمان وج هوي جوري موش وديت عليج

جوري لتكول هوي بس الحيوانات هيج يتعاملون واني مو مثلكم

سلمان وج تالي وياج الا اذبحنج وارتاح وج ياهو ذول الحيوانات تكصديني

جوري اخ ايدك كسر وخر عني

سلمان اراوينج الكسر وين من اكسرن اسنونج وج شوكت تتادبين وتصيرين ادمية

جوري اخ ولك جبارة الحكني وخر ايدك اشمئز من تلزمني

سلمان وج انة الي اتنكس من اطخنج اخ ولك جبارة اليوم الا اعدمنك بالشارع جدام الوادم انة هيج تطكني

جبارة اي اطكنك واذا ات زلمة تلحكني عليش تطك جوريتي وهاك هاي حجارة بالكصة اعرفنك ماتكدر تركض وراي

سلمان اخ ولك انة اعلمك وج جميلة جيبي سلاحي خل اجتلة بمجانة

جبارة سلمان المسودن الاعرج

جوري سلمان وهو يحاول يركض ورة جبارة وكوه يمشي اني ركضت اطب الغرفتي واريد اسد الباب جان يجيني سلمان

سلمان وين واج كضيتج انة تخلين جبارة المسودن يطكني اليوم ادفنج

جوري اخ اني شعلية انت وابن عمك

سلمان شوفي ولج باجر تروحين وياي للطابو تتنازلين عن حكج لية عبن حبوبتي موش كواكة خوش

جوري لا ماتنازل عن شبر واحد من حقي وشتريد تسوي سوي

سلمان خوش ماتنازلين موش هيج جا اترحمي على روح امج

جوري الي تريد تسوي سوي كتلك ماتنازل عن شبر واحد من حقي وحق امي واختي

سلمان خوش خوش يبت هيلة

جوري عافني سلمان واخذ سلاحة وطلع
بس هو ميدري علي راح الامي وحذرها من سلمان وكللها هو يعرف انتي يم خالتج

وراح يضغط عليج وعلى بناتج وكال الها روحي الكركوك والبنات اني اتكفل بيهن اهزمهن واجيبهن الج

المغرب رجع سلمان من برة وجان شايط نار واعصاب وياهو الي يحجي وياة يتعارك وياه

الصبح رجع علية سلمان يريد ياخذني غصب حتى اتنازل الة وهددني

سلمان شوفي تمشين وياي تتنازلين لية يو اسلم امج العمامها حتى يذبحوها شكلتي

جوري شتريد تسوي سوي ماتنازل لو تموت

بعد ما اقتنع ماعندة اي وسيلة للتهديد حقيقية سكت عن موضوع التنازل

واخيرا راح جاب بت شلال وتزوج بدون عرس وهوسة لان عدهم ميت بالبيت

نرجس كل يوم علاقتي بعلي تزيد وغيرنة مكان اللقاء الي نلتقي بي اني وياه

احس الدنيا كلها تضحك الي يوم الي اشوفة احس بي حبة شكد نضيف وبلا غاية

صح يتغزل بية ويتغزل بعيوني وبكل شي بية بس ابد ما يوم اتجاوز وحتى بلمسة وحدة

علي يتغزل بنرجس

اهيم بشوك وصلك وانثر الروح وعلة اشفافك ثلج من تنزل اشفافي واعض اشفاف حسنك واشتعل نار وكطعهه بصدك ياكلمة الكافي لمستك بيدي وذوبت الاشواك الطريق اطويل اكعد تعبت اجتافي واحس رجفة ابغرامك والكلب عطشان اريد اشبع وحسن بيك متعافي واريد بايدي اجتفك تنسجن بحساس وعلة اوصافك اريد اطبعهه لاوصافي وبادلني بغرامك خل اهيما بيك بس اكعد حبيبي وانتة الك صافي

نرجس علي فدوة الكلامك الحلو

علي اني وكلامي وحياتي كلها فدوة لعيونج

وج نرجس تعبني عشكج ماضل صبر واصبر عشت كل عمري وحيد جنت كلش اخاف من العشك

عبني بيوم واحد من صحباني جنة كاعدين نتكهوة بالديوان جان يكلب فنجاني وضحك وكال

شوف يعليوي الله ابتلاك بعشك نار تجوي ضلوعك

شايف شكثر بعيدة السما بس السمة اكرب ليك من الي تحبها

وتضل طول العمر متلوع بحبها وعمرك ماتطولها ولا راح بيوم تاخذ وحدة غيرها

صح جذب المنجمون ولو صدقو وانة ماهتميت بس ضلت جلماتة ترن بذني عبن موش اول مرة يكول شي ويتحقق كل كلامة يصير

من دشيت كلية ابغداد وشفت البنات اشكال الوان ابد كلبي ما رف على وحيدة جنت كلش خايف من كلام صاحبي

وبيوم شفتج جن كلام صاحبي كلة نمسح من بالي ولا تذكريتة الا بيوم شفت غضبان ياخذج جدام عيني الحجرتة انة بذيج الساعة انتهيت

نرجس شبيدي اسوي كلي

علي نرجس خل نشرد

نرجس اذا انهزم لازم اختي وياية مستحيل اعوفها

علي خوش روحي الاختج واتفقي وياها على اليوم الي نشرد بي

حبايبي اريد توقعاتكم راح تنجح خطة الهروب لو لا

حبايب كلبي عظم الله لنا ولكم الاجر بذكرى استشهاد سبط الرسول ابو عبد الله الحسين

بداعت جبارة لتنسوني بالتصويتات 🌟🌟🌟🌟