انثى في عرين الوحوش الفصل الخامس والعشرون 25 - بقلم الاميرة ارجوان

الكاتبة الاسدية

علي نرجس خل نشرد

نرجس اذا انهزم لازم اختي وياية مستحيل اعوفها

علي خوش روحي الاختج واتفقي وياها على اليوم الي نشرد بي

نرجس اني خايفة اخاف مثل ذيج المرة وهم يلزمونة بس هاي المرة ميرحمونة لان مهزومات وياك

علي لا هاي المرة مستحيل تنلزمون لان سيارة موجوده لا نتوقف بمكان ولا نطلع لا بغداد ولا كركوك ويرحون يتبعونة اني هواي فكرت وهواي خليت خطط بس المهم انتي واختج

نرجس رحت على جوري اول ما وصلت اتلكاني سلمان

سلمان ها ينرجس اشوفنج مسوية الدرب حردة يا رايحة ويا رادة شعدج شنهي الي وراج

نرجس جاية اشوف اختي قابل شعندي

سلمان مالج اخت هين وردي الحوشج

نرجس ماجاية عليك اني كمت اصيح جوري جوري وينج

جوري سمعت صوت نرجس تصيح باسمي طلعت اركض من غرفتي واشوف سلمان يدفع بيها ويريد يطردها

ها نرجس هلا بيج تعالي وياي لان اهنا خنكة

سلمان وين تمشي وياج خلها ترد الحوشها

جوري جاية تشوفني وتروح الحمد لله لا ماكلة ولا شاربة يمكم

سلمان خايبة هو جميلة تعالي طردي مرت جدج ماريدنها هين وان ماردت اردنج وياها

جميلة شنهي يسلمان جا عليش تردني هساع اسحلهة هي وختها يلا كش كش منا ردي البيتج

جوري لج شو انتي متعرفين تحجين شنو كش كش لو متعلمة تتعاملين بس وية الحيوانات

جميلة شوفن انة روحي واصلة هنا الخشمي اطلع حركة كلبي بيجن يلا ولجن لا اصيحن خالتي نورية

نرجس جوري اني راجعة وياريت اشوفج بسرعة

جوري اشرت نرجس الي بمعنى ننهزم ودارت وجهة وراحت

زين شلون اكدر اوصل الها شلون اكدر احجي وياها هي عدها الي اتهدد بي غضبان وتكدر تجي يمي اني شلون

جميلة ها يبعد روحي رضيت عني شفت شلون هججتهة بساع

سلمان اي اريدنج هيج

زهرة ها يسلمان جا اليوم انت موش الي اريدنك كلة بس وياي

جميلة شنهي بس وياج حتى يو يومج بس الليلة الج موش كل اليوم

زهرة اتي مالج غرض عليش هيج رجفتي من الغيرة جا انة بعدني عروس وجديدة وحتى ماشبع مني

جميله بس انة الي خذاني عن حب وانة اضل كلشي عدة

سلمان وهو نافش ريشة شفتي يجوري وهسة اجيبن الرابعة واخلهن هيج مكاون علية

جوري درت وجهي ارجع الغرفتي وكلت هو الذبان يتعارك على الزبل عفتة ورحت

سلمان وج يالغمة اني اربيج يا زبل يا بت الزبل

جوري هم مصدكات يتعاركن على سلمان بس مالومهن هي هاي بيئتهن وحياتهن الي تربن عليها

سكينة خالة يجوري تعاي وياي نغسل الحبوبتج

جوري خالة اني ماعندي بيبية ولا علية بيها

سكينة خالة تعاي شوفي حالها كاتلها الوصخ وحاجتها جواها تكسر باب الكلب

جوري حل خلي تشوف عذاب الدنيا حتى تفكر بعذاب الاخرة

سكينة يخالة اتي موش هيج ربتج هيلة اعرفنها كلش طيبة ولو هي بمجانج جا بارتها وخلتها جنهة ورد

جوري خالة الي سوتة منسية بية مو شوية بسببها ادمرت حياتي وضاع مستقبلي ومستقبل اختي

بسببها صار سنتين ماشايفة امي ولا اعرف هي وين ماوين

سكينة جا انة اسويها لله انة هم هيج مثلج خذوني فصلية وانة زغيرة ونجتل زلمتي وهل تشوفين

طلعت بهالوليد من الدنيا وفوك كل هاذ مسودن بس انة ماعابي واحد اكولن الله يعابيهم

جوري اوف خالة حجيج يلين الصخر امشي خلي نسبحها على الاقل نكسب بيها اجر

رحت الغرفة منسية شلناها اني وخالة وخليناهة على كرسي مال معاقين واخذناها للحمام

سبحناها وغيرنة ملابسها ومن كملت ركضت خالة سكينة غيرت الفراش ورجعناها المكانها

كل هذا واشوف بس الدموع بعيون منسية

من كملت اريد اطلع لزمت ايدي
وهي كوة تحجي كلام مامفهوم
منسية حح بوبة

جوري سحبت ايدي منها ماريد اسمع اي شي عود من وكعت اكيد تريدني اسامحها

طلعت من منسية واني طكيت بجي على حالي وعلى حال اختي وامي

اتذكرت نرجس من اشرت الي كلت احاول اروح الها

بس وين وسلمان مراقب تحركاتي كلها

نرجس اكول علي هاي جوري ماكو منهة اي خبر ولا اكدر اروح سلمان وجاسم واكفيلي بالشارع ابد ماكدر اوصل الها

علي وتالي شلون ينرجس ماضل عندي صبر اخاف اروح اتعارك وي غضبان واكلة كافي عوف نرجس هاي مالتي

نرجس دخيلك لتسويها مابية حيل سمعتي ينحجي بيها وميكولون حبهم طاهر وشريف

علي تعبت ينرجس والصبر مل مني وعافني ومشة

نرجس واني هم ماضل عندي صبر بس شبيدي اضل متمسكة بالصبر

علي نرجس كل يوم احلم يلمني بيت اني وانتي وجهالنة داير مدايرنة يلعبون

شوفي ذيج هبة وذيج هديل شوفيهن شكد حلوات يشبهنج كلش

وذاك حسين وذاك محمد هم يشبهون امهم اريد كل جهالي يشبهوج حتى وين ما ادور وجهي اشوفج بيهم

نرجس واني اكول منو هبة ومنو هديل طلعت تقصد بناتي بس اني اريد الولد يشبهوك كلش نسخة منك

علي هم يجي يوم والحلم يصير حقيقة وتصيرين الي

نرجس نكول ان شاء الله يصير

علي تدرين اليوم امي رايحة تخطب الي بت عمي ومن دريت تعاركت وياها وعفت البيت وطلعت

نرجس ماعرف شكول احس كلبي نمرد من القهر زين انت ليش ماتقبل تزوج وكل الولد الي بعمرك اولادهم بطولهم

علي مادري تصدكين لو لا جنت دوم اشوفج باحلامي واكول هي هاي مرتي وام جهالي اكيد يجي يوم والتقي بيها

بس ماجنت اعرف منو انتي لو وين راح اشوفج الهيج ما قبل اتزوج الا الي شفتها بخيالي وباحلامي

نجاة هلا هلا وانة اكولن وين تروح البت وين تغط فد غطة ومامش مجان مادورنة عليج

نرجس نجاة

نجاة اي نجاة شعدج وي علي

علي نجاة خوية جا شعدها وياي انة شفتها بطريجي وجاعد انشدها عليكم وانشدها على جدي واتي جيتي هل شفتينة واجفين نسولف

نجاة من يمتة ونسوانة يوجفن بالطريج وي الزلم ويدكون وياهن فجوج ها

علي جا خوية هاي موش من ديرتنة ولا تعرف عوايدنة وعيشتها غير عنه

نجاة جا هي وموش من عوايدنة جا اتة شمالك مغسول فد دورة

نرجس من شافتني نجاة وية علي واني جسمي كلة يرجف من الخوف مادري شسوي احس بس الدموع تنزل على خدودي نار تجوي

نجاة موش احجي وياج شمالج خرسيتي يو ماتعرفين تحجين الا وية الزلم امشي جدامي خل اشوفن يرضوهة عليج هيج

علي خوية نجاة لاتسرعين كتلج انة شفتها هيج بطريجي وجيت انشدها عليكم

نجاة دربنة موش بعيد لليحب ينشد امشي جدامي ركض بساع بساع

علي راحت نرجس وية نجاة واني ضليت الوم بروحي شلون وليش هيج سويت وياها ليش مافكرت بيها احد يروح يشوفني وياها

هسة شراح يسوولهة خاف يكتلوهة خاف نجاة تكبر الموضوع

زين شلون اروح وراهة لا لا انوب يزيد الشك عدهم

ياربي شلون شسوي اضل هيج

نرجس اخذتني نجاة للبيت والطريق كلة تغلط وتسب بية وبتربيتي وكل شوية اتهدد يذبحني غضبان اذا عرف بية جنت وية علي واكفة

اخر شي اجتني الجرئة لان بعد الي عشتة وياهم صرت اكثر جرئة وماخاف واصير قوية كلت الي يحجي علية كلمة اردها بعشرة

وصلنة للبيت ويدت نجاة صوتها يلعلع وجمعت الكل

نجاة شوفو المصيبة والعار الي سوتة نرجس اليوم وانة اتلاحكت علية

غضبان الله اليستر وج يافضيحة

حمدان وج احجي خل نغسل عارنة

ام حمدان جا هاي الكح.... بت الفصلية شيجي من وراها غير العار هي وخواتهة

غضبان وج كولي لا اذبحنج كبلهة

نجاة كل يوم نرجس تنس وتختفي من نروح للزرع وانة ادورن عليها اليوم هم نست ومالكيتهة

ومن دوريت عليها شفتهة واجفة دك فجوج وي ابن عمكم حسين علي

حمدان ياكاع انشكي وطمينة جابتلنة العار بت الفصلية

غضبان انة اغسل عاري بيدي مالكم دخل

نرجس هذا ياعار الي تحجون علية ها شنو لكيتو واحد نايم وياية بفراشي لو شردت وية واحد

كل الي صار اتعب والدنيا حارة اروح ارتاح بالفي من الشمس واليوم رحت ارتاح شفت ابن عمي المضمد

كال اشوفج هنا شنو تيهتي الدرب كتلة لا

كال جدي غضبان شلونة كتلة زين جان تجي نجاة علينة هذا كل الموضوع

حمدان وج ماستحيتي من وجفتي تحجين وية زلمة غريب

نرجس الي اعرفة هو هم ابن عمي يعني مو غريب

غضبان وج نرجس خزيتينة جدام الوادم شتكول حرمة غضبان ماعدها حشمة تسولف وي الزلم

نرجس زين انت من اخذتني من امي ماكلت هاي جانت تدرس وتطلع وتسولف وية جيرانها وتسولف وية مدرسها لو قبل حلال وهسة حرام

غضبان كبل راح وية كبل انة احجي بهسة عيب ولج

نرجس اني ماسويت العيب وهذا طبعي وماغيرة يعجبك اهلا وسهلا مايعجبك عوفني الحال سبيلي

غضبان لا مايعجبني ولا اعوفنج الا تطلعين جنازة من بيتج خوش

حمدان بوية انت شجاك وراخي الحبل ليهه شمالك كلبك رجيج وياها

سمعي ولج منا وغاد مالج طلعة الباب الحوش ولا روحة للزرع تكضين شغل البيت كلة والبنيات هن الي يطلعن بجانج

نرجس يعني شنو حتى الاختي ماروح

حمدان حتى الاختج ماترحين سمعتي يو لا وانتي يمة ونجاة ان شفتها طلعت ماتلومن غير روحجن

ام حمدان اي خلها بالحوش خل ابوك يكابلهة ويكعد

غضبان ليش لا جا اكابل وجهج الي يسد النفس

نرجس غضبان عفية وهي تدلل تحرك كلب ام حمدان اني اضوج ماتحمل ماطلع اروح الاختي

غضبان اشتعل ابو غضبان وج لاتتغنجين علية منا الويلاد والبنيات

نرجس اروح انام شوية اريد ارتاح

غضبان روحي يابعد هلي وعشيرتي ارتاحي

جوري ولك جبارة تعال مو احجي وياك

جبارة ما معلية انة ماروحن

جوري عفية حباب الخاطر جوري

جبارة جا اتي بس بالمصايب تكليلي حباب وانة اعرفنج مسودنة من يطكني سلمان تضمين راسج

جوري لعد شتريدني اسوي

جبارة مثل ما انة اساوي من سلمان يطكج طكي بحجارة فشخي حتى انة اشرد منه

جوري ميخالف جيبلي طابوكة واني افشخ سلمان

جبارة هم ماروحن الحوش غضبان ابو العرك كلهة تطكني هناك وانة ماحبهم

جوري شلعت كلبي جبارة اريد اطمن على نرجس صار هواي ماجاية وكمت ابجي من كل كلبي

جبارة وج لاتسودنيني وياج ليش تعوين

جوري وخر مني عوفني بحالي

جبارة لاتعوين اجيبلج حنونة تاكلين وتسكتين

جوري ماريد شي

جبارة جا خوش اجيبلج ماي اشربي

جوري كتلك ماريد شي عوفني بحالي

جبارة جا موش اكولن عنج مسودنة الا اروحن البيت غضبان ابو العرك ويو سلمان يو غضبان يذبحوني

جوري لا كتلك ماريد شي

جبارة شوفي ياهو اجانة هاذ عليوي المسودن الحباب

جوري رحت اركض على علي علي فدوة هم شفت نرجس ليش متجي كون بيها شي

علي هو اني جيت انشد عنها جي اخر مرة جنت واكف وياها وجتي نجاة شافتنة سوة ومن يومها بعد ماكو لا تطلع للزرع ولا تجي المكانة الي نلتقي بي

جوري ليش هيج حرام عليك ليش هيج تسوي بيها ليش تستغل هاي الطفلة اكيد سوو بيها شي

علي اني ماستغلها والله وداعت نرجس اني احبها وجنت متفق وياها اهزمكم اثنينكم واخلصكم من هذا المستنقع الي وكعتو بي

سلمان هلا بعليوي اشوفنك اليوم جاي لينة صار زمان مامش انتة

علي اجيت اخذ الضغط مال حبوبتي عبن جوري ودت جبارة علية تكولن يمكن ضغطها صاعد وموش كواكة

جوري اي جنت اكلة اليوم مو تمام

سلمان جا منج من الشيطان تبارين حيوبتي

جوري لعد منو يداريها ويسبحها بس اني وخالة سكينة

سلمان جا وجميلة وزهرة موش موصيهن مايعوفنها ويبارنهة

جوري ولا وحدة تداريها بس اني وخالة
راح سلمان يصيح على نسوانة وعلي استغل الموقف

علي اني اروح اليوم لو شيصير اروح اشوف نرجس وادزلج خبر

سلمان تعال ياخوي دش انت موش غريب وحبوبتك بالحجرة مالتهة وانة جاي وراك

نرجس بعد مامنعوني من الطلعة وصار فوك الشهرين محبوسة بالبيت ماكدر اتحمل فراك علي

ومنا اختي ماكدر اشوفها ضليت افكر لازم اسويلي حل

مادام نجحت خطة التهديد من كتلة افضحك وخاف لازم استغل هذا الموضوع واضغط على غضبان

حتى يطلكني واعيش حرة واتزوج علي ونروح بعيد عنهم ماريد اعرفهم طول عمري

علي بعد ما اتاكدت نرجس مختفية من يوم الي شافوني وياها كلت اكيد مسوين بيها شي واني لازم اروح اتطمن عليها

خفت اذا رحت وحدي راح يشكون بالموضوع اكثر واكثر

كلت اخر شي اروح على الجبير مال عشيرتنا واكلة خلي نتوسط بين سلمان وبيت غضبان ونصالحهم

لان هم اخوة واولاد عم وميصير الزعل بينهم وهاي حجة حتى اشوف نرجس بيهة ومحد يشك بالموضوع

رحت على الشيخ وهو رحب بالموضوع ومشينة اني وياه والوجوه الخيرة مال العشيرة البيت غضبان

تلكانة حمدان واخوتة واني عيني منا ومنا اريد بس المح طيفها

كعدت كلش كبال باب الديوان حتى تضل عيني على البيت واشوف الطاب والي طالع

اخر شي الشيخ ترخص من حمدان حتى نروح لان غضبان ماموجود وكال الهم نمر عليكم بعد صلاة الجمعة

ومن طلعنة شفت نرجستي وهي شايلة طفل زغير وتريد تنزلة منهة مايقبل

اوف ينرجس حتى الطفل يحبج جا انة شلون مو تمرمر كلبي بحبج وعفنة بيت غضبان وناوين نرجع بعد يومين

نرجس سمعت واحد من الجهال وهو يركض يكول الابوه الشيخ وعمي علي جايين لينة ويردوك بالديوان

سويت حجة لازم اطلع واشوف علي حتى لو من بعيد جان ابن ابن غضبان كاعد بحضني يلعب

اني كتلة روح شوف ذيج الدجاجة وهو ركض اني سويت الحجة اروح اجيب الجاهل واشوف حبيب الروح

وصدك شفت عيونة وهو يدور علية بكل مكان

وم رجع غضبان ابنة كالة الشيخ والوجوه مال العشيرة راح يمرون علينة بعد صلاة الجمعة

هنا كلت مابيهة مجال لازم انفذ الفكرة الي براسي يمكن بعد ماتصير عندي هيج فرصة

جوري بعد ما اختفت نرجس ماشوف غير نرجس طبت علية الغرفتي تركض

جوري ها شبيج نرجس منو وياج شصاير
نرجس ماكو شي بس خفت سلمان يشوفني وميقبل اجي عليج وميخليني اشوفج

جوري حظنتها حيل واثنينة كمنة نبجي هلكد مشتاقين وحدة للثانية

وضلينة نسولف وجان تحجيلي نرجس عن الخطة الي راح تسويها

ماعرف ليش انقبضت روحي

نرجس لتخافين جوري اني متاكدة خلاصي بهيج فكرة

جوري فدوة اروحلج لتسويها وج خاف تنكلب عليج وكلشي تخسرين

نرجس شنو الي اخسرة بعد ماكو خسارة اكثر من الي اني بيها انتي بس ادعيلي

جوري ادعيلج كل يوم وكل ساعة بس كلبي مامرتاح ولا متطمن

وراحت نرجس وروحي راحت وياها

حبايب كلبي شنو تتوقعون الخطة الي راح تنفذها نرجس

وصدك راح يصير بيها الخلاص الها
وراح تكدر تنجمع وية علي

اريد توقعاتكم هيج اريد حماس بالموضوع اريد هذا البارت بارت التوقعات

تقبلو تحياتي والاول مرة تحيات بطلة قصتنا جوري للجميع

لتنسوني بالتصويت 🌟🌟

اختكم الاسدية