انثى في عرين الوحوش الفصل السادس والعشرون 26 - بقلم الاميرة ارجوان

الكاتبة الاسدية

الاميرة ارجوان

حبايب كلبي مثل ما ذكرت بداية القصة

القصة حقيقية وبعثتها الي احدى المتابعات مع تغيير بالاسماء والاماكن فقط

نرجس شنو الي اخسرة بعد ماكو خسارة اكثر من الي اني بيها انتي بس ادعيلي

جوري ادعيلج كل يوم وكل ساعة بس كلبي مامرتاح ولا متطمن

وراحت نرجس وروحي راحت وياها

نرجس كل ساعة تمر علية واني اصير اكثر اصرار على تنفيذ الي براسي

وكل ما افكر بالاحتمالات والنجاح والفشل الغي الفشل لان ماكو خسارة اكثر من خسارة حياتي وخسارة علي

جنت متاكدة الشيخ راح يجي ويجون وياه رياجيل هواي

صار يوم الجمعة وانتضرت صلاة الضهر حتى يجي الشيخ

كل شوية امر من يم الديوان حتى لتفوتني الفرصة

واخيرا اجوي العشيرة وجان وياهم علي
وكفت كبال الشيخ كتلة شيخنة اني عندك دخيلة اريد احجي وياك وحدنة

الشيخ اي بنتي احجي كلهم عمامج واهلج واني حسبة ابوج

نرجس بالاول اريد احجي وياك واريد تساعدني اذا صدك انت مثل ابوية

الشيخ كولي وبعون الله اكونلج سند

نرجس شيخنة اني صار فوك السنة من زوجوني غضبان غصب وتهديد وكل هذا كلت هاي قسمة ونصيب

بس الي صار اني الى هسة بنية محد لامسني وغضبان يكول لا هي زوجتي وكلشي تمام وحتى جرحني وطلع كال هذا نيشان وهددني يذبحني

بس بشرع الله هيج زواج يعتبر باطل واني اريد اخلص

من حقي اتزوج ويصير عندي جهال

الشيخ ماطلبتي غير حقج

نرجس وهسة شلون

الشيخ الج الصافي انة احل موضوعج

حمدان وج شعندج توكفين وي الزلم اتي ماتتوبين كليلي شلون اذبحنج واخلص من عارج

الشيخ انة وكفتها عبنهة بت محيسن ويتيمة وكلت اطمن عليهة

نرجس رحت اركض وكلبي يدك وجسمي يرجف

كعدت الزلم بالديوان وسوالف واني الوب اريد اعرف شكو

ماكو مرية توصل يم ديوان الزلم وعيب يلمحون خيالهة

شوي وكبت الهوسة والصياح

اجاني حمدان وهو يسحول بية
حمدان وج شسويتي من طركاعة من كون الله ياخذج ويفكنة منج ولجن لبسنهة شيلة وعباية بسرعة

نرجس جابولي عباية وشيلة ولفلفت روحي بيها واخذني حمدان للديوان تكفخ وصلني الباب الديوان

الشيخ عليش هيج بوية وية البت ماتخاف تسكط الفرخ

غضبان شنهي هاذ يافرخ

الشيخ موش انة من جيت وتطمنت على حالهة عبن تعرف محيسن موش بس ابن عمي لا وصاحبي هي بشرتني حبلى وتخاف تحجي جدام نسوانك

غضبان ولكم هاذ يافرخ الي تحجي بي وشلون اهي حبلى وانة ماماخذهة وبعدهة بت

نرجس انصدمت من سمعت من الشيخ يكول عني حامل كتلة اني ماكلت

الشيخ وهو ياشر بمعنى اسكتي جا شلون ماماخذهة واتة طلعت نيشانهة وكلت هاي هية البت صارت حرمتك

غضبان اليوم الا اغسل عاري بيدي ولكم ماماخذها ولا متدني ليهة شلون صارت حبلى ولج منين جبتي هذا الفرخ احجي عبنة موش مني

حمدان بوية انت شتحجي جا موش كلت خذيتهة وان جان صكد وانت ماماخذهة

هاي جابتلنة العار ولابد نطم عارنة بيدنة جا شتترجة من اخت كريمة وفوك كل هاذ بت فصلية

الشيخ يعني جدام هاي الزلم كلهة اتة ماماخذ البت ولا متدني ليهة صار فوك السنة موش هيج

غضبان اي هيج وانة عاجز حتى وية نسواني الثنين

حمدان جا خوش خل نطم عارها

الشيخ تهدة تهدة يحمدان البت لا حبلى ولا شي بس انة ردت ابوك يعترف جدام هاي الوجوه الخيرة ان نرجس بعدهة بت وماخذاهة صار فوك السنة

جا عليش خالهة على ذمتة وهو اصلا زواجهم باطل

غضبان لا موش باطل وتضل نرجس حرمتي وانة ماصدك سالفتك هاي ولازم اطمن عاري بيدي

الشيخ ياغضبان خاف الله اكلك البت ماهي حبلى وهاي حجاية انة حجيتهة عبني ردت ابين الحك جدام الوادم

وانك مامتدني للبت وهيج زواجك منهة بطل وعوفهة الحال سبيلهة

حمدان وشلون نتاكد حجيك صحيح والبت موش حبلى

الشيخ طلكهة وان ردت خل ياخذهة اي واحد من ولد عمومتهة ومن يدش عليهة يطلع نيشانهة وهيج الكل تتاكد من حجيي

علي وانة مستعد اخذهة واسوي الي تردوه

حمدان وانة اكولن جياتك كثرانة وكبل مدة جنت واجف وياهة وهسة تريد تاخذهة

اكيد هاي من تدبيرك عبنهة حبلى منك وجاي وية الشيخ وساويتو هيج ملعوبة علينة

الشيخ وك حمدان اشوفنك نسيت روحك ويامن تحجي وعليمن تذب تهم انة شيخ ناهي يو نسيتني

حمدان محشوم شيخنة بس كصدي علي ونرجس سوو هاي اللعبة عليك وعلينة عبنهم متعاشكين

علي انة الصوج مني كلت اخذهة واجيبلكم نيشانهة عبني ماردت جدي غضبان يدنك راسة ويكول حرمتي حبلت من زلمة غيرة

نرجس حرام عليكم تجيبون بسمعتي وبشرفي اني بعدني بنية ومحد لامسني وغضبان ماريدة بكد جدي

غضبان وانة ماطلكنج وحكج بورث ابوج صار الي وانة اعلمنج على هاي سوايتج

الشيخ بس البت من حكهة تتزوج ويصير عدها فروخ موش تضل وية انسان عاجز حتى بشرع الله زواجكم باطل

غضبان انة هسة اشوفكم شلون زواجنة باطل عبنهة هي الي تمنع روحها عني وانة هسة اخذهة وتصير حرمتي من هاي الساعة

علي من شفت غضبان سحب نرجس كدامي واخذهة الغرفتة حسيت سهم وصوب كلبي ماكدرت اسيطر على روحي

وهي تصرخ وتتوسل حتى يعوفهة وهو بلا رحمة ولا ضمير

ردت اكوم اخلصهة من ايدة الشيخ وكفني كال مالك دخل هاذ مايخاف الله واخافنة يروح يذب تهمة عليك وعلى البت

حمدان شوف يا علي من هاي الساعة انت مالك دشة الحوشنة ولا الك جلمة ويانة وان شفتك ولا لمحتك وية وحدة من نسوانة موتك يصير على ايدي

علي ردت اطلع من الديوان حتى اكدر ابجي لو اصيح بعلي صوتي من قهر كلبي والوجع الي بي

شفت غضبان جاي صوب الديوان ودشداشتة كلهة دم

غضبان غسلت عاري بيدي ذبحت نرجس عبنهة طلعت موش بت

الشيخ لا اله الا الله ولك غضبان ماخفت الله ولك اتة انسان عاجز ليش هيج وحك علي انة اروحن اشهد انك ذبحتهة باطل

علي اخ يا وجع كلبي والصدمة الي اني بيهة

لا اكدر اصرخ وابجي لان راح اثبت التهمة على نرجس ولا اكدر اضل ساكت احس كلبي بي جمرة نار

اسمع الشيخ يتهدد على غضبان وحمدان يتهدد على الشيخ

طلعنة من بيت غضبان الشيخ كال راح ابلغ المركز على غضبان

واني رجلية اخذتني والدموع بعيني ورحت على جوري

جوري كاعدة واحس نفسي ضايك وكلبي دكاتة سريعة وكلش مخنوكة

ماسمع غير صوت علي وهو يصرخ ويصيح

علي ولج يجوري اختج ذبحوهة المايخافون الله ولج اختج ذبحهة غضبان المجرم

جوري اريد اسيطر على جسمي ماكدر كلشي بية يرجف يمكن حتى شعر راسي

اريد استوعب الي سمعتة ماكدر احس عقلي وكف وغاب عن الوعي

حسيت على صوت نورية وهية تهلهل وتصيح طلعت حوبة كريمة وفريدة

حقيقي احس نفسي مو اني جوري لا احس نفسي لبوة مجروحة ماعرف شلون هجمت على نورية

بس احس بيهم يوخروني منهة واني ايدية كلهة دم هلكد مخرمشتهة من وجهة وايديهة

طلعت اركض حافية وبلا شي على راسي غير الدشداشة واركض البيت غضبان
كل اعتقادي علي يجذب علية

وصلت للبيت لكيت لمة زلم يمهم

ضلت اصرخ والطم على وجهي نرجس وين ولج نرجس جاوبيني تعالي وكوليلي الخبر جذب ولج نرجس لاتشلعين كلبي وجاوبيني

اصرخ والطم وافتر من مكان المكان
كلشي ماندل ولا بيوم طابة البيت غضبان واعرف شي عنه

ام حمدان وج فضحتينة فوك كسران وجوهنة انوب اتي تشهرينة لاتصارخين

جوري وج ياكسران وجهة هذا اختي وين شسويتو باختي ولج نرجس جاوبيني ولج نرجس كولي هاي اختي وردي علية

ام حمدان اختج ذبحهة زلمتهة عبنهة طلعت موش بت وحبلى

جوري الي سويتة بنورية قليل عن الي سويتة بام حمدان

نجاة وهي تجر بجوري تعالي اختج ميتة بهذيج الحجرة

جوري ركضت للغرفة الي اشرتلي عليها فتحت الباب واشوف المنظر الي دمر حياتي كلهة

اشوف اختي مشمورة بالكاع والدم داير مدايرهة

اتقربت عليها واني مامصدكة الي تشوفة عيني

الكلب الحقير ذابحهة ذبح هاي نرجس ام ركبة الحلوة هيج كاصهة

ولك شلون كلبك انطاك اني دجاجة اذا ذبحوهة كدامي اضل ابجي عليهة واتخيل شلون تتوجع

اشلون انسان هيج يذبحوه

ولج نرجسي كومي حاجي اختج ولج كومي شوفي حالي

شكول الامج ها اكللهة ماكدرت احمي اختي ماكدرت ادافع عنهة ولج شلون عفتيني شكالت روحج من خلو على ركبتج السجينة وذبحج

هم كلتي يمة لحكيلي لو كلتي جوري تعالي خلصيني لو شنو حجيتي وية روحج

هم وجعج الكلب السجينة جانت حادة وبسرعة ماتعذبتي لو مو حادة وضل يعذب بيج

ماعرف هلكد دكيت ولطمت ولا واحد او وحدة كالتلي كافي ولا اكو بشر يسندني ويكلي اني يمج خليني اشيل شوية من وجعج

اخر شي اجتي خالة سكينة وحضنتني وضلت تلطم وتنعة وياية وكابلتهة وبس الطم على وجهي وراسي

ولج وينج يمة تعالي شوفي حال بناتج
شوية واجاني جبارة وهوة يحضني ويكلي اجتي الشرطة كومي خل يشتغلون

كوة كوموني منهة واني غركانة بدمها واحس نفسي فقدت

كل شوية اهد على وحدة من النسوان لو البنات الي ابيت غضبان

وبس اسمعهن يكولن البت تسودنت مثل زلمتهة جبارة

ومن اسمع هيج انوب ازيد اكلهم اي اتخبلت ولكم هو منو يعيش وياكم وميتخبل

ضلو الشرطة يسالون وهم يكولون غسل عار وغضبان وحمدان مهزومين ميدرون وين

اخذو نرجس للمستشفى ومحد خلاني اروح وياهم

رجعوني كوة البيت منسية الي عرفتة الولد كلهم رايحين وراهم للمستشفى والمركز

يومي كلة اني بس ابجي والطم ومحد يمي غير سكينة وجبارة وزهرة مرت سلمان ومرت عبد جنان

مادري شنو كمت اتصرف واسمعهم يكولون البت تسودنت من شافت اختها مذبوحة

ثاني يوم مسلمين نرجس الاخوتي وماجد جاي من بغداد والكشف اثبت نرجس باكر والقضية صارت قتل عمد مو غسل عار

رادو ياخذون الجنازة للنجف حتى يدفنون نرجس واني جلبت بيهم وحتى الدشداشة الي عليه شكيتهة الا اروح وياهم

ماجد اخذني وياهم والطريق كلة ابجي واعيط والطم وساعة الي احجي وية نرجس وساعة احجي وية امي

وصلنة للنجف الطريق شطولة واني حتى حيل ماضل عندي

طبينة للمغتسل واني طبيت وياها ماقبلت اي واحد يغسلهة غيري

وصلنة للامام علي علية السلام حتى يزوروهة وبعدين ياخذوهة للمقبرة

عاهدت نفسي وربي والامام وعاهدت نرجس الا اخذ حقهة بايدي لو يضل اخر يوم بعمري

وصلنة للمقبرة لكينة الدفان مجهز القبر الهة كلش يم قبر ابوية

اني شفتهم يردون يخلوهة بالقبر واني هجيت اركض بنص الليل وحدي بين الكبور يمكن صدك اتخبلت وصرت مثل جبارة

حبايب كلبي اعذروني على بارت اليوم اعرف انصدمتو بي ومو مثل توقعاتكم
بس شنترجة من ناس مثلهم طبعهم الغدر والقتل والله العالم يمكن راحت كريمة بريئة مثل نرجس

صدكوني صار يومين عيني مانشفت من البجي وتمرضت وحتى ضغطي صعد من القهر

امانة الله اترحمولها واقرولهة الفاتحة لان عاشت مضلومة وماتت مضلومة

تقبلو تحياتي اختكم الاسدية

https://www.youtube.com/watch?v=PSjDFAGeXK0