انثى في عرين الوحوش الفصل الرابع 4 - بقلم الاميرة ارجوان

الكاتبة الاسدية

تنوية مثل ماذكرت القصة حقيقية مع تغيير بالاسماء والاماكن واي تشابه بالاسماء هو لمجرد الصدفة فقط

يعني ليجيني واحد يكلي ليش ذكرتي اسم عائلتنا او اسم عشيرتنا اني ماراح اذكر اسم اي من عشائرنا وانما راح اكول ال فلان مثلا يعني الاسم وهمي للتنوية فقط

كملت الامتحانات وكعدنا بالبيت وماعرف شنو اخبار اكرم ووين وصل بموضوع الجنسية

انشغلت اقرا مواد السادس لان ناوية لازم اطلع معدل طب
امي كملت خبز وطلعت تاخذه للناس دقايق واسمع صوت الباب يندك

فتحت الباب شفت اكرم كبالي

اكرم هلو جوري شفت امج طلعت كلت اجي ابشرج عرفت اهلج وعمامج وين

جوري صدك تحجي انت متاكد هم نفسهم اهلي

اكرم اي اكيد

جوري اكلك اكرم روح هسة اني احاول اطلع واشوفك وتحجيلي كلشي عرفتة عنهم

اكرم ماشي راح انتظرج

عفت جوري ورحت اتمشة واني افكر بكلام ابوية

ابو اكرم شوف اكرم شكد جانت امك معارضة زواجك من جوري واني جنت ماخذ موقف الصامت اكول هذا اختيارة هو بس بعد الي عرفتة اكلك انسة جوري انسة بيوم من الايام هاي البنية تصيرلك مرة

واذا جنت مصر عليها لا انت ابني ولا اني ابوك

جوري من راح اكرم لوبيدي اطلع بسرعة وراه حتى اعرف الحقيقة

المشكلة اني ونرجس منطلع ابد غير بس للمدرسة لو مرات اروح اخذ الخبز للناس ومن نجحت للسادس امي بعد متخليني اطلع تكول كعدي اقري

شلون راح اطلع شاكول الامي اريد اروح للسوك اكيد تكول ماعندي فلوس وشنو تحتاجون اني اجيبلكم

هيلة ها جوري اشوفج دايخة وتصفنين شبيج مامة

جوري الله يساعدج شوكت اجيتي

هيلة حتى ماحسيتي شوكت اجيت شبيج يمة صاير وياج شي

جوري اي يمة الدراسة صعبة واكو اشياء ماجاي افتهمها كلت اروح على اكرم اخذ عنده ملزمات ميحتاجهن اخذهن واقرا بيهن

هيلة روحة البيت ام اكرم بعد ماكو واي حجاية وية اكرم بعد ماريد زين

جوري ليش شنو الي صاير

هيلة هاي ام اكرم كل حجاية تذبها علية اليوم ولا غيرها عبالك تريد توصلي حجي بس يمة ماينلبس علية ثوب عبالك مسويتلي مكسورة

جوري تروحلج فدوه يمة هي هيج حقيرة قابل جديدة عليج

هيلة يمة بروح ابوج لتروحين الهم وعوفي اكرم يمة هذا لا من ثوبنا ولا من مستواهم احنا ماناقصين مشاكل وامة مرية ماترحم تروح تشوه سمعتنا

جوري يمة احنا الناس كلها تعرفنا شنو هواي رادو يستغلون حاجتنا وكدرنا نرد عليهم ونعرفهم مو كلشي ينباع وكت العازة

هيلة يمة عوفي اكرم

جوري يمة قابل شعندي وية اكرم

هيلة يمة اني اعرف كلشي واعرف بيج عاقلة وفاهمة

جوري يمة وداعتج وروح ابوية بس هاي المرة اروح علمود الملازم وراها اني بطريق وهو بطريق

هيلة بس على كد الملازم وتجين

جوري اي يمة فدوه

هيلة وماريد تحجين اي شي وية ام اكرم لو شماتحجي ماريد مشاكل

جوري ادللي

ماصدكت امي وافقت اطلع رحت اركض واني ادعي كون من ادك الباب يطلعلي اكرم

وية دكت الجرس جان يطلع ابو اكرم

ابو اكرم خير شعندج جاية علينا

جوري عمو اجيت اخذ ملازم من اكرم

ابو اكرم اني لا عمج ولا اعرفج شنو عمو واكرم مو هنا كفينا شرج وشر امج وبعد لتجين حتى لتشوفين شي موزين من عدنا

جوري بقهر اني وامي نسوه راسكم والله ليعوزنا عليكم رجعت والقهر مالي كلبي ومن البجي ماشوف دربي

ليش هيج الفقير ينداس بالرجلين طول عمرنا خادميهم وماماذين اي واحد ليش هيج تلعب بينا الدنيا

وهذا ابو اكرم ليش هيج اتعامل وياية اول مرة يسويها
حسيت بسيارة وكفت حيل لان رادت تدعمني والصوت جان كلش عالي

نشوان هي شبيج عمية لوتريدين تذبين روحج جوه السيارة وتبليني

جوري باوعت علية واني مالي نفس حتى اجاوب حسيت على ايد امتدت الي وسحبتني باوعت هذا اكرم

اكرم ها جوري شبيج صار بيج شي اتعورتي انجرحتي

نشوان لا كلشي مابيها همزين لحكت تمشي مثل العمية

اكرم تعالي جوري شبيج ليش تبجين

جوري سحبني اكرم من ايدي ومشينا يم هيج مثل المتنزه بنهاية المنطقة مالتنا تلعب بي الجهال طوبة

اكرم جوري شبيج ليش هيج حالج

جوري ابوك حجا علية اني وامي وهددني بعد اذا احجي وياك

اكرم ابوية معقولة هيج يسوي

جوري مو مهم الي سواه ابوك اكرم اني وياك طريقنا مو واحد اجيت بس حتى اعرف اهلي منو وين

اكرم اخاف الي راح اكولة الج مايريح بالج لو تضلين متعرفين احسن

جوري لا اريد اعرف هو بعد اكثر من الي عايشتة اكو شي اتعس منه

اكرم جوري انسي اهلج وانسي الماضي وعيشي الواقع

انتي مو تكولين اريد اصير دكتورة انجحي وصيري وتعيني واخذي امج واختج وروحي بعيد شكد متكدرين بعيد

جوري اكرم فدوه كلي منو اهلي لتظم علية متعرف النار الي اني عايشة بيها

اكرم هاي مو نار بكد النار الي راح اتحسين بيها

جوري وتريدني انسة بعد حجيك هذا اكرم بداعتي اذا عندي يمك معزة احجيلي شنو الي عرفتة

اكرم جوري اهلج ناس تسد عين الشمس عندج اخوان وخوات وعندج عمام واولاد عم جدج ميت بس جدتج موجوده وابوج الله يرحمة ميت بس مو شهيد

جوري عندي اخوان وخوات اني معقولة زين ابوي مو شهيد شلون مات وشلون اتزوج امي اذا هو متزوج وعنده جهال

اكرم ماعرف شلون متزوج امج بس اهلج ناس الهم صيت ومن عشيرة معروفة بالناصرية انتي اصلج من الناصرية

جوري الناصرية زين ليش اني وامي واختي عايشين بكركوك ليش اهلي عايفيني وميريدوني

اكرم كافي الي عرفتي خليج هيج احسن

جوري لا مو كاقي اريد اعرف اكثر احجي احنا ليش اهنا عايشين شنو الي عرفتة

اكرم جوري خلي الماضي نايم ومدفون احسن

جوري اكرم بداعت جوري عندك احجي مو فتيت كلبي

اكرم الي عرفتة استغفر الله جوري انسي بداعتي

جوري اذا متحجي اروح على ابوك اسألة لان الضاهر هو يعرف كلشي واحسن من امك ماتكعد اتعير بامي بالشوارع خلي اعرف الحقيقة

اكرم اوف من امي اشكد حلفتها متحجي شي بالموضوع

جوري اكرم تحجي لو اروح الابوك وامك

اكرم جوري لتضوجين يجوز ساعة شيطان يجوز امج جانت مجبورة على ابوج لان هي زغيرة وابوج جبير

جوري لتكعد اتبرر قبل لتحجي شنو الي صار

اكرم جوري امج جانت اتحب واحد وهي وياه متفقين يكتلون ابوج وينهزمون

جوري شنو عيد شنو الي كلتة

اكرم هو هذا الي سمعتي يعني امج ناهبها واحد ومهزومين ويمكن بعدين عايفها الله العالم

جوري زين اذا ردت اعرف عمامي منو شكول اريد بيت منو

اكرم انتي من بيت شنون ال شنون معروفين اهناك

جوري اكرم اخر طلب اريد اطلبة منك اريدك تستر على امي وهذا السر ميطلع الى اي بشر

اكرم لتوصين حريص عمري ماراح اضرج بشي ولا راح اتخلى عنج بيوم

جوري واني اكلك انساني اكرم وعمرنا ماراح نكون البعض من قبل مو هسة من عرفو هيج حقيقة سوده

اكرم اني معلية باي واحد لا امج ولا اهلي المهم عندي انتي جوريتي وحبيبتي الي عمري ماشفت بعقلها وشرفها

جوري ياشرف هذا اوامي هيج خلي اروح

اكرم وشنو الي راح تسوي

جوري اواجة امي بالحقيقة واخذ اختي واروح الاهلي ابوس التراب الي يمشون علية حتى يقبلون بينا بيناتهم لان اول وتالي احنا بنات محسن يعني شرفهم ولحمهم ودمهم

اكرم زين وامج

جوري اني ماعندي ام امي ماتت من هاي اللحظة

رجعت للبيت واني مو جوري الي طلعت منة احس نفسي وحده ثانية ما انتمي الى هذا البيت

وامي مو امي لا هاي قاتلة ابوية هاي الي حرمتنا من الحنان والاب والسند

ماعرف شلون راح اكدر اباوع بوجها شلون راح اكدر اواجها بجريمتها بحقنا وبحق ابونا وبحق نفسها

شلون كدرت اتخون ابوية زين اهلها وين ليش ماسالت عليهم شنو موقفهم من بتهم

اي ابسط شي اعرف اهلها وين وادليهم على مكانها لان هي نزلت روسهم وخلتها بالطين

امشي وكل هاي الافكار تدور براسي وصلت للبيت دكيت الباب طلعتلي نرجس

نرجس هاي وينج ليش اتاخرتي امي اشسوت من وراج وحلفت بعد متطلعين ابد وراحت ادور عليج

جوري لا جواب

نرجس هاي شبيج شنو متسمعين اكللها امي اليوم تلعب بيج طوبة وراح اتدور عليج وانتي ولا يمج

جوري لا جواب بس اباوع على نرجس واسال نفسي شنو ردة فعلها من تعرف الحقيقة وهي حاقدة على امي لان الناس اتعيرها وتكول بت الخبازة

زين شلون لو تعرف الناس حقيقة امي وتكوم انعيرنا بشرفنا

نرجس ولج جوري اشبيج اسم الله شنو دستي على جني وهيج صرتي احجي يمعودة

هيلة لج جوري هي هاي وصيتي الج كتلج لتتاخرين كتلج يمة مابينا حيل بيت ام اكرم تالي اتخليني عباتي على راسي وافتر بالشوارع ادور عليج هي هاي تاليها

نرجس يمة جوري مادري شبيها متحجي من طبت وهي بس اتصفن وميتة بجي ولا كلمة حجت

هيلة ولج جوري يمة لتشلعين كلبي وين جنتي اشسوة بيح اكرم وين رحتي وياة يمة بس لا صخمتي وجهنا

جوري واني ماعرف احس الساني توقف عن الحركة وبس افكاري هي الي تحجي ياصخام وجهة اكثر من صخام وجهج اريد اصرخ اريد احجي ماكو

هيلة يمة اسم الله بتي يمة جيبولي مي اغسل وجها يمة احجيلي شسوو بيج يمة منو وياج

وهي بدت تقرا المعوذات والفاتحة ماعرف غيرهن بس هاي حافظتهن علمود الصلاة

ولج يمة نرجس اختج مادري شبيها

نرجس حوري حبيبتي جاوبيني شبيج وين جنتي منو غثج يمة خاف ام اكرم غثتها اليوم احرك بيتهم عليهم

هيلة يمة اختج متعودة على مغثة ام اكرم مو جديدة بس يمة اخاف مسويلها شي وهي تحاول اتفتش بجسم بتها وملابسها

حوري حسيت امي اتدور بجسمي وملابسي على اثر اعتداء علية اهنا ماتحملت الموقف وصرخت باعلى صوتي لتدورين محد مسويلي شي محافظة على نفسي حتى لا اصير مثل امي

هيلة انصدمت من جواب جوري من اتكول محافظة على نفسي حتى لا اصير مثل امي

لج اشبيها امج شنو ماحافظت على نفسي ولج اشتغلت خدامة للي تسوة والي متسوة حتى احافظ على شرفي واحافظ عليجن

جوري هذا الحجي جنت اصدكة قبل بس هسة لا ماصدك ماصدكج ولا اصدك اي حجاية منج

هيلة انجبي واسكتي غصبن ما عليج وعلى هاي الدنيا كلها تصدكون مو هيلة الي اتبيع نفسها ياوسفة ضيعت عمري وشبابي عليج

نرجس جوري اشبيج ليش تحجين على امي شنو الي صاير

هيلة الي صاير اني ماعرفت اربي اني صوجي كلت بتي كبرت وبتي عاقلة وانطيتج مجال هواي

جوري اي بنتج كبرت وبنتج عقلت وبعد متصدك جذبج الي جنتي اتجذبي علينا من جنا زغار من اتكولين ابوجن شهيد واهل ابونا اتبرو منة لان ماقبلو على زواجج من ابونا

هيلة اي وهي هاي الحقيقة

جوري بعدج تجذبين مو عرفت كل الحقيقة

هيلة شنو الي عرفتي احجي ومنين عرفتي

جوري ها خفتي مو لان اكو حقيقة ثانية

هيلة اني ماخاف بس من الله بس اريد اعرف شنو الحقيقة الي عرفتيها

جوري عرفت احنا من بيت شنون الي بالناصرية وعرفت اني عندي اخوة وخوات

هيلة ولج منين عرفتي احجي وصلولج عمامج ها اندلو دربنا مو وصلونة

جوري ها خفتي لان هاي الحقيقة خفتي لا يوصلون الج ويكتلوج مثل ما كتلتي ابوية انتي وحبيبج وانهزمتي وياه

هيلة لا جذب اني ماكتلت ابوج ولا انهزمت وية واحد

جوري لا صدك كتلتي لان اتحبين واحد واهلج زوجج غصب ولان ابوية شايب غدرتي ليش هيج يمة ليش هيج تسوين بينا

نرجس امي كتلت ابوية وانهزمت وية واحد زين ليش احنا شنو ذنبنا ليش ماعفتينا يم اهلنا ليش مانهزمتي بدون متكتلين ابونا ليش

هيلة والله جذب كل هذا جذب اني لا كتلت ابوكم ولا انهزمت وية واحد

جوري اي اي اتذكرت الي جنا انكول علية جدو ابو سمير هو هذا الي انهزمتي وياه وبعدين عافج اي اتذكر هو مامات مو صحيح نرجس

نرجس اي اي صحيح هو مامات هو عافنا وماذكر وين راح

هيلة يمة استغفري ربج ولج يمة والله كلة جذب من الي لعب براسج وهيج كلج وبعدين بس كليلي اهلج شفتيهم

جوري اي شفتهم وهم هسة راح يجيبون اهلج عليج حتى يطمون عارهم بايدهم

هيلة وهي تظرب جوري على حلكها امج طول عمرها ثوبها نظيف وحشاها من العار ولج لو الدنيا كلها توكف وتحجي علية جان المفروض انتي توكفين كبال الكل وتكولين جذب امي متسويها

يلا بسرعة لمن الي تكدرن علية وخلي ننهزم منا قبل ليجون عمامكم علينا بسرعة

جوري اني ماروح وياج تريدين تنهزمين انتي انهزمي لان الضاهر متعوده على الهزيمة

نرجس واني هم ماروح وياج

هيلة ولج يمة اسمعي الحقيقة مني ولج والله يمة كلة جذب ناس متخاف الله مو كافي ظلموني قبل جايين هسة يشوهون سمعتي ويحجون بشرفي

جوري كل يوم اكلج يمة كوليلي اهلي وين يمة اذا الحقيقة غير الي تحجيلنا اياها عمري ماراح اسامحج جم مرة هيج كتلج جم مرة توسلت بيج

هيلة كلة المصلحتكم جنت اخاف عليكم لا مصيركم يصير مثل مصيري

جوري ترحين تنهزمين وية واحد وتكتلين ابونا حتى ليصير مصيرنا مثلج مو

هيلة بس اطني مجال احجيلكم الحقيقة كلها واذا ماصدكتني اني الي بعد ماريدجن واكللجن روحن الاهلجن لان ماعندي بنات

حبايب كلبي والله العظيم حتى كسرتوا واهسي بالكتابة

معقولة القصة متجيب بس خمسين تصويت لعد المن متابعيني بس حتى تقرون وتطلعون

اذا القصة محلوة كولو حتى الغيها وماتعب نفسي ولا اتعبكم
وصدكو هذا اخر بارت اذا ضلت هيج التصويتات قليلة

تحياتي اختكم الكاتبة الاسدية