رواية أنتقام الصفحه 27 (ترميم) الفصل السابع وثلاثون 37 - بقلم خـلود الـ محسن

ألكاتبة لورا

انستا للتواصل lorai_alrwi

⛔اشتركو بقناتنة على التليكرام و تفاعلكم على البارت حلواتي
………………………
جيبي الورقة و يعوفها

جسمي يرجف روحي راحت و اني اشوف رتيل كدام عيني شلون ترجف صحت على شهاب

:-شششهاابب لك رتيل هاي اختك شلللون تسوي هيج عوفههه لا تورط روحك وية هذا المريض

محد منهم يرد علية لازمة ايد صعب بقوتي بس اريد اسحبة مني

:-عوووفنني واللة اشتكي عليك عوفنيي

:-جيبي الورقة

:-عوووف رتييلل عوفههه

صعب صاح على شهاب بصوت عالي
:-شهاب

رفعت راسي اباوعلة اشرلة براسة مباشرتا شهاب سحب اقسام احس شهاب مثل الالة شيطلب منة صعب يسوي
جسمي كام يرتعش و رتيل تصرخ بخوف صحت علية

:-عوووفهاا عنددي الورقة عنديي

:-وينهه

:-بالغرفة صعب جوة الدوشك عوفوهه

لزم ايدي و فات للغرفة و اني عيوني على رتيل لحد ما فتنة للغرفة بعد ما شفتهه بهل لحضة كلشي نسيتة كلام امي الامانة حياة صعب جنت بس اريد انقذ رتيل من اديهم

لازمني بأيد و ايدة الثانية شال الدوشك شمرة بالكاع شال الورقة اجاني مغص ببطني احس شي وكع علية مكدرت اوكف اكثر لزمت بطني متأذية باوع علية خلة الورقة بجيبة سحبت ايدي منة و رحت ركض للصالة بس رفعت راسي اباوعلهم وكفت مصدومة لمن شفت شهاب واكف على صفحة و رتيل واكفة طبيعي

درت وجهي وراية صعب حاضن ادية وواكف بلعت ريكي ابعد الفكرة من بالي كلت بصوت هافت من الالم الاحس بي و من الصدمة

:-رتيل

اجت بأتجاهي تمسح بدموعها
:-ملاذ مثل ما جبروج جبروني واللة

اجر بأنفاسي كوة دمعتي جمدت بعيني وصلت يمي لزمت ايدي سحبتهه منهه بقوة و رجعت ليورة

:-ملاذ بس احجيلج واللة جبروني حالي حالج

:-كلكم جذابين

درت وجهي على صعب منهارة الف كلمة بلساني بس صعب احجيهن

:-كلشي توقعت منك بس تنزل لهل مستوى ما توقعت

:-ملاذ

:-اشش اشش ما اريد تلفظ اسمي

اعضائي كلهه ترجف الموقف ما يروح من بالي رتيل تحاول تحجي بس من شافو وضعي هيج كلهم سكتو تمنيت بهل لحضة متزوجة حسن و عايشة بتهم عمامي و لا انحط بهيج موقف

دنكت راسي امسح بدمعتي مشيت بخطوات ثكيلة للغرفة فتت من يم صعب عيونة تلاحكني وصلت للباب شهاب صاح وراية

:-ملاذ ما ردتج تتأذين اكثر اني قنعت صعب هيج يسوي

ابتسمت هزيت راسي بأستهزاء يحاول يطلع صعب صح ما يدرون حفظت تصرفاتهم

لزمت مقبظ الباب ما اريد اشوفهم اكثر من هيج رتيل شهاب صعب كلهم صدموني

ملاذ:-شهاب حسبتك حسبت اخ الي ما توقعت تسوي هيج سواية و لا انت رتيل شفت بيج الاخت على كلا شكرا على كلشي

فتت للغرفة قفلت الباب وراية ما سمعت صوت احد منهم  الوجع اخذني ما اكدر اوكف اكثر من هيج وصلت يم الجرباية كعدت بالكاع و ركيت نفسي عليهه حضنت نفسي عاصرة بطني بأدية اريد الوجع يروح مني

خليت راسي بين رجلية دموعي عاندت وياي ما تنزل
كل لحضة عشتهه وية صعب اجت ببالي كل ضحكة ضحكناهه سوة كل عركة كل حضن بينة طول الفترة العشتهه هنا جنت محافظة على هل ورقة خوف علية كل يوم مر و اني لازمة گلبي بيدي خاف يعرف اكو ورقة نقص كل فكرة تجي ببالي شراح يسوي لو عرف اكو ورقة خلفهه سر ادركت بهل لحضة اني جنت محافظة على الورقة مو بس لان امانة جنت محافظة عليهه لان خايفة اخسر صعب مجرد تخيلت من راح يفتح الورقة شنو راح يسوي گلبي رجف

رفعت ادية اباوع عليهن يرجفن بقيت اعصر بيهن اريد اهدي نفسي فتحت الحجاب شمرتة مني احس خنكني اريد اتنفس وجعي زاد اريد اوكف على حيلي ما اكدر شفتي الجوة ترجف من الوجع احس شي يوكع علية بكثرة خليت ايدي جواية اتلمس المكان من شفت منضرهه نرعبت ايدي مغطاية بالدم

ارتكيت على ايدي اريد اوكف ما اكدر احس رجلية بادت ما تعيني اكوم بقيت اصرخ بعللو صوتي من خوفي

:-ييمةةة وووينجج يمةة راح اموووتتت

بس صرخت ندك الباب بقوة اسمع اصواتهم برة رتيل تصيح و صعب و شهاب

الصعب:-ممملاااذذذ افتحي الباب ملاااذ شبيجج الباب افتحيهه ووينجج

:-ممماااكدر اوكفف ارييد امييي ارريدهاااا

رتيل:-ملاذ افتحي الباب فدوة شبيج ملاااذ فددوةة كوممميي حبااابة لا تسوين شي

فوك خوفي الاحس بي اصواتهم رعبتني اكثر لا اكدر اكوم من مكاني ولا اكدر ارد عليهم روحي انبهتت اباوع على روحي شلون انزف انهاريت النزيف مستمر منتبهه
لاصواتهم برة بس شهاب و رتيل يصيحون

صعب اختفى صوتة شوية و سمعت الباب نفتح ما اباوع لاحد روحي رايحة ما ادري جان هذا وجع لو خوف لحد ما صعب لزم جتفي

:-ملاذذ ملااذذ شبيج

يمسح بوجهي و اني ارجف ما اكدر احجي شي
رتيل كاعدة بصفي و تبجي

شفت شهاب واكف و داير وجهه رفعت ايدي اشوفهه لصعب

:-راح اموت رااحح اموتتت واللة ششوفف

صاح بصوت يرجف
:-ششهاب شغل السيارة مالتي  رتيل امشي بسرعة وية شهاب

كامت رتيل تركض و شهاب طلع كبلهه
:-راح اموت اني راح اموت ما اكدر اووككفف ششوف الدم

ما حجة شي كام و خلة ايدة بضهري و ايدة الثانية جوة رجلية شالني و طلع بسرعة من الغرفة كل عصرة تجيني تاخد روحي طلع برة شهاب بالسيارة صعب صاح علي رتيل تصعد يم شهاب صعد ورة و خلة راسي بحضنة

:-استتعجلل شهاااب

نزع القمصلة مالتة و فتح القميص نزعة يمسح بيدي
:-اخخ راح اموت صعب امي وينهه خل تجي راح اموت اريد اشوفهه

:-هسة تجي ما بيج شي هسة تصيرين زينة

:-رجلية ماتن مااكدر اوكف بعد

:-اشش اشش هسة نوصل اهدي

رفعني من رجلية حضني على صدرة يقرة قرأن بصوت ناصي سحبت ايدة خليتهه على بطني من جهة اليمنى وجعهه فضيع

:-هناا يوجعني راح اموت

خلة ايدة عليهه يحركهه و اني اتلوة
استحي من شهاب ما اكدر اصيح بصوت عالي سحب القمصلة مالتهه لبسهه و سد السحاب

لما وصلنة روحي طلعت راد ينزل من السيارة و هو شايلني

لازمة بطني ابجي صحت علية
:-حجاب ما لابسة

سحب القميص مالتة خلاة على شعري شالني و نزل
فوتوني بسرعة لغرفة وياي رتيل و صعب الدكتورة صاحت

:-اطلع بس البنية تبقى وياهه

:-مرتي دكتورة

:-ميخالف ابني ما يصير اطلع

جنت لازمة ايدة بقوة من يجيني الوجع اعصرهه دنك باس ايدي و و سحب ايدة مني خلة ايدة الثانية على راسي ما جنت مهتمة للجاي يصير الوجع ماخذ روحي

:-ما بيج شي هسة تصيرين زينة

عافني و طلع و رتيل كعدت كدامي لازمة ايدي تعصر بيهه

:-ملاذ واللة مو بكيفي واللة همة جبروني اني السبب و صار بيج هيج موو

ما رديت عليهه عيني على الدكتورة اجت كدامي
:-انتِ متزوجة؟

حركت راسي بمعنى لا

رتيل صاحت
:-متزوجة دكتورة

بقت تلمس ببطني

:-انتِ حامل؟

:-لااا ما متزوجة اني

بقت صافنة
:-شوكت بدة النزيف عندج

هي تسأل و اني اتلوة ما كدرت احجي اكثر بقت رتيل تجاوبهه انطتني ابرة و شدتلي مغذي بعد ما فحصتني و تأگدت مني مو حامل شوية شوية حسيت الالم يخف الدكتورة سألت رتيل

:-الولد الي جان موجود زوجهه

رادت تحجي صحت من يمي
:-لاا مو زوجي

:-لا دكتورة زوجهه

:-انت شنو تصيرين منهه

:-اختهه

:-حبيبتي اختج عذراء

باوعتلي رتيل بللت شفايفهه و رجعت باوعت للدكتورة
:-ها اي دكتورة مو مصار هواية من تزوجو و هي صحتهه متسمح

:-هاي اول مرة يصير وياهه هيج

:-اي

باوعتلي الدكتورة
:-تاخذين علاجات نفسية او اي علاجات ثانية

حركت راسي بمعنى لا
:-ماعندج اي مشكلة النزيف سببة تعب و توتر متعرضة لصدمة ممكن

:-بس جاي اتأذة

:-بعدج تحسين بوجع

:-اي بس مو قوي

:-مو مشكلة ممكن لان اول مرة تكدرون تطلعون بس يخلص المغذي ماكو شي اذا استمر النزيف لاكثر من خمس ساعات لازم ترجعلي حاليا بس تاخذيلهه احتياجاتهه و تطلعون

طلعت رتيل برة بقيت متمددة صافنة على السكف دموعي نزلت تخللت شعري و اني اذكر الوجع الجنت احس بي شوية و فاتت رتيل باوعتلي بقت ساكتة درت عيوني منهه اباوع على الفراغ

:-ملاذ

:-تعبانة رتيل ما اريد احجي شي

كعدت بدون ما تحجي شي المررضة كل شوية تشوف المغذي كالت

:-اكلج شنو بيج و ممتقربلج زوجج

باوعتلهه اني وين وهي وين ردت عليهه رتيل
:-ما بيهه شي بس مريضة

:-ها زين شنو مرضج

جريت نفس و زفرتة باوعتلهه
:-بلة شوفي المغذي شوكت يخلص

:-ربع ساعة

بقيت اباوع للجهه الثانية ما اريد اخلي عيني بعين رتيل شوية و ندك الباب كامت رتيل جابت علاكة

رتيل:-حبيبتي شوفي المغذي ما خلص علمود تبدل

:-شوية و اشيلة

ركيت ادية على الجرباية و سحبت نفسي اعدل بكعدتي رتيل قربت مني رادت تلزمني دفعت ايدهه مني

:-اكدر وحدي

:-ملاذ

حسيت صوتهه بي كسرة بس رتيل جانت الاقرب الي ما اكدر اتقبل السوتة

الممرضة شالت المغذي مني
:-تكدرين تاخذين راحتج

:-انطيني الملابس رتيل

انطتني العلاكة بدون ما تحجي شلتهه و كمت اول ما وكفت حسيت سجينة فاتت ببطني عصرت عيني متوجعة رجعت لمكاني ما اكدر اوكف

:-شبيج ملااذ متأذية

حركت راسي برفض ملابسي كلهه دم صحت على الممرضة

:-يبنية عادي تساعديني اكوم

اجت يمي انطتني ايدهه وكفت مدنكة جسمي ما اكدر اوكف عدل احس شي يجرح بطني اذا وكفت عدل فتت للحمام سديت الباب و كعدت بالكاع اعصر ببطني اريد الالم يروح الة اكعد لو اتمدد ارتاح اذا وكفت يرجع الالم مثل ما جان

غسلت ادية  و جسمي بدلت جانت جايبتلي ملابس كاملة ما ادري منو جابهم كمت فتحت الباب ساندة ايدي على الحايط و امشي رتيل تباوعلي و تبجي

:-ملاذ واللة مالي ذنب

:-امي شوكت تجي

:-ما اعرف

:-خلي صعب يخابرهه تجيني هنا ما ارجع للبيت

:-ملاذ ما

ماخليتهه تكمل كلام
:-كليله رتيل

كملت مشي للسرير كعدت صافنة على الفراغ رتيل طلعت برة شوية و نفتح الباب فات صعب خلة الكرسي قريب مني و كعد يباوعلي و اني عيوني مركزتهه ليكدام
:-ملاذ

حجيت واني دايرة وجهي منة
:-خابر امي خل تجي تاخذني

:-باجر تجي كومي نروح للبيت

:-ما ارجع وياك الورقة و صارت عندك شتريد اكثر من هيج خابر امي

:-اريد اشوفج شي بالبيت كومي وياي

رفعت راسي ليفوك ما اريد دموعي تنزل
:-رجعني لامي كلت

:-اريد احجيلج شي كبل لا ترحين

:-ما اريد اسمع شي

:-ملاذي بس ارجعي هل مرة وعيونج باجر تجي امج و ترحين

باوعت علية اضحك
:-ههه تحجي صدك؟ملاذك و تحلف بعيوني هم شوكت تعوفني بحالي

:-كومي بالبيت نتفاهم

:-امي شوكت تجي

:-باجر

:-خابرهه هسة كلهه ملاذ مريضة تريدج

:-اذا اجت هسة يروح كلشي من اديهه و راح تنعاد معاناتهه ويه عمامج من جديد لازم تطلع بليل علمود محد يلاحض

:-انتضرهه هنا مو مشكلة

:-ما يصير كومي

:-ارجع بشرط ما اشوف وجهك بالبيت لا انت و لا رتيل و لا شهاب

:-هاي هية كومي

كمت من مكاني جان قميصة بصف مخدتي
:-اخذ قميصك من يمي

شالة بدون ما يحجي شي
سندت ايدي على الحايط و كمت امشي على كيف تجيني نغزات من امشي

لزم متني
:-وخر اكدر وحدي

:-بس اوصلج

:-وخرر كلتك اكدر

شال ايدة مني يمشي وراية فتح الباب دفعتة بيدي و سديتة رجعت فتحتة من جديد طلعت

شفت رتيل تحجي وية شهاب اول ما شافوني ثنينهم باوعو علية دنكت راسي و مشيت بالممر يمكن المسكن خلص وقتة الوجع رجعلي بس اهون من البداية حاولت اكمل مشي ما كدرت ارتكيت على الحايط و كعدت بالكاع ابجي كعد كدامي صعب

:-شيوجعج تعاي رجعي خل تشوفج الدكتورة

:-ما بية شي

رتيل:-الدكتورة سجلتلها علاج خل نجيبة يجوز تتحسن علية

:-كومي يلة علمود تاكلين شي و تاخذين علاجج

:-مااريد خابر امي خل تجي اريد اشوفهه

الصعب:-شهاب شغل السيارة و رتيل اكو صيدلية جوة جيبي العلاج منهه جايين وراكم

راحو ثنينهم و اني كاعدة بالكاع الناس تروح و ترجع تباوع علينة

:-كومي شوفي الناس بس تباوعلج

:-بس اوكف يجيني الالم

:-اشيلج

:-لاا ما اريد خليني هنا امي تجي تاخذني

:-وعد باجر تجي بس خل نرجع للبيت شوفي حالج شلون صاير

:-جيبلي عربانة ما اكدر اوكف

:-اشيلج انة

:-ما اريد

كام متخوصر يتلفت
:-ملاذ وين اعوفج كومي اني اوصلج

:-ما اكوم مااكدر

دنك شالني من الكاع بسرعة تخبلت لزمت بطني اصيح بي

:-ننزلنننيي كتلكك نزلننيي ياجلب

ما حجة شي عاصر ادية بيدة علمود ما ارفعهم و ادفعة صعدني بالسيارة و اني بس اصيح و اغلط علية صعد يمي بعدت نفسي منة رفعت رجليه على الكشن اذا لميت نفسي الوجع يخف بس من امشي عدل لو اكعد عدل اتوجع

باوعت على الكشن كلة دم من عرفتهه سيارة صعب اتطمنت دنكت راسي بين رجلية كلنه ساكتين فات بطسة احس روحي شاغت بدون وعي صحت

:-ااااخ

صاح شهاب
:-اسم اللة

شفتة يباوعلي بالمرايا و صعب لزم ايدي يعصر بيهه دنكت راسي ابجي من الوجع وصلنة للبيت وصعب بدون ما يحجي شالني و فات جوة

رتيل فاتت قبلي رتبت الجرباية كعدت و صعب طلع ما ادري منين اجاني هل وجع اول مرة بحياتي هيج يصير بية تمددت جسمي بردان سحبت الغطة علية حسيت احد فات للغرفة

:-صعب هاي هية ما اريد اشوفك اطلع

:-اني رتيل

:-و لا انتِ اريد اشوفج

:-راح اروح هسة و يجوز هاي اخر مرة اشوفج بيهه بس اريد احجي شي كبل لا اروح

:-اريد انام رتيل اطلعي

:-ميخالف اسمعيني كبل لاتنامين

سحبت الغطة غطيت وجهي دموعي تجوي بخدي

:-واللة ملاذ ماعرف شي وحتى الورقة الرادوهه منج ما اعرفهه شنو صار يومين شهاب يقنع بية و حتى صعب خابرني كالو شي يخص حياة ناس و من رفضت كالو ملاذ تتأذة اذا بقت عدهه الورقة خفت عليج

اسمعهه و ابجي مالي خلك احجي وية احد
:-ملاذ واللة تعودت عليج و احسبج مثل اختي واكثر ما اكدر اشوفج زعلانة مني

:-اطلعي رتيل اريد انام

:-راح اروح لبيتنة و صعب كال امج باجر ترجع من السفر ما ادري اذا راح ترجعين للصعب لو لا اكدر اشوفج بعد هل مرة لو لا بس اتمنى منا و تسامحيني

وخرت الغطة من وجهي باوعت عليهه دموعهه تارسة عينهه تحجي و تشهك

:-خلي نفسج بمكاني تقبلين اسوي بيج هيج

:-صدكي لو حاجين وياج مثل ما حجو وياي راح تسوين الاكثر همة ضغطو علية واللة ردت بنص السالفة و ابطل و اكلج يجذبون بس تذكرت من كالو تتأذين خففت عليج واللة

قربت مني باست راسي و وخرت بسرعة دارت وجهه و طلعت من الغرفة بقيت مغطية وجهي وكاعدة ما يجيني النوم اي حركة اتحركهه وجعي يزيد

سمعت واحد فات للغرفة طفة الضوة و كعد يمي
:-ملاذ نايمة؟

ما رديت علية سمعتة يتحسر سمعت طكة الجداحة
ما ادري اذا شغل جكارة او لا بس هاي اول مرة صعب يشغل بيهه جداحة

:-كومي اكلي علمود العلاج

غلست منة حتى نفسي كطعتة علمود ما يعرفني كاعدة
صار هدوء ما اسمع صوتة حسيت بي تمدد على الجرباية غمضت عيني قوي

حاوطني بيدة بسرعة دفعتهه عني و وخرت منة كعدت عدل كعد مقابيلي

:-اطلع برة

:-ليش تجذبين

:-اطلعع من الغرفة ما اريد اشوفك

:-كومي اشربي علاجج و طالع

:-ماريد سم اطلع

:-اطلع من تاخذين علاجج

:-ماررريد كتلك صرت زينة

:-اخذي علمود مااضطر اشيلج مرة ثانية

:-انت تفهم شنو يعني مااطيق وجودك وياي اطبع احسلك

:-اي اي افهم بس كومي اكلي نزفتي هواي لازم تاخذين علاج شوف وجهج شصاير بي وحلكج ابيض

:-تعرف ليش هيج صار بية وهسة جاي تهتم تتعرررفف مووو

:-تعبانة انتِ لاتصيحين اكلي و اخذي علاجج علمود ترتاحين

:-من تجي امي اخذ علاج عوفني هسة

:-انت مو ما تردين تشوفيني هذا علاج بي منوم اشربي علمود تنامين لاتشوفيني و لا تحسين بوجع لحد ما تجي امج

بقيت ساكتة كام من يمي جاب لفة خلاهه بيدي اكلت شوية منهه وعفتهه نفسي ما تتقبل جاب العلاج شربته و رجعت تمددت غطيت وجهي بالبطانية صحت علية

:-سد الباب و عوف الضوة مشتغل و لاتجي يمي

:-خليتلج اغراض على الميز من تحتاجين استخدميهن

ما رديت علية سمعتة سد الباب غمضت عيني اريد انام الوجع يجي و يروح لحد ما غفيت ما ادري شصار بالدنيا
فزيت من نومتي نفسي تكلب و الم ببطني بس جان الم قليل كعدت اتلفت بالغرفة بس اني بيهه

كمت اباوع من الشباك ظلام اخذت ملابس فتحت باب الغرفة شفت صعب متمدد على التخم و نايم

رحت للحمام سبحت بمي دافي بقيت كاعدة جوة الدوش افكر صعب قرة لورقة لو بعدة معقولة قراهه و هذا الهدوء كلة بسة بدلت ملابسي النزيف متوقف فتت للصالة بس سديت الباب فز صعب عيونة حمر يباوعلي

:-ووين جنتي

ما رديت علية فتت للغرفة اجة وراية ردت اسد الباب لزمة بيدة

:-شلون صرتي

:-بيش الساعة شكد بقى و تجي امي

:-بعدج تنزفين؟

:-معليك بيش الساعة

:-طلع تلفونة من جيبة باوع بية

:-ب 12 الة ثلث رُفيدة كالت ب 3 لو ب 4  الصبح هي هنا

درت وجهي فتت للغرفة رجع صاح
:-ملاذ تنزفين لو لا

:-معليك كلت

راح للميز طلع الاغراض الجايبهن اني ماخذت منهن شي لان ما محتاجة صاح

:-ما مستخدمة يعني توقف

ما رديت علية كعدت على الجرباية
:-اطلع اريد انام

:-كومي جنت منتضرج تكعدين اشوفج شي

:-ماريد شي منك

:-كومي

اجة كدامي لزم ايدي و سحبني من الفراش
:-صعب ماريد شي كتلك بس اريد ارجع لامي كافي

:-ميخالف

وصل للباب فلت ايدي و دار وجهه علية عدل الخاولي على شعري راح للميز مادري شنو اخذ خلاهم بجيب القمصلة و رجع

:-صعب شتريد ماريد اشوف شي ثاني منك

ما حجة شي سحبني وراة طلعنة من الغرفة وكف كدام باب الغرفة الثانية

:-اكو اشياء لازم تعرفينهه دام صرتي جزء مني

كال هيج و فتح الباب شغل الضوة مالت الغرفة جان هافت كلش باوعت على الغرفة نفس تصميم الغرفة القديمة كلشي بيهه مثلهه الصور و الكتب و اللوحة سحب ايدي امشي وراة و اتلفت خفت ليش جابني لهنا

وكف كدام اللوحة الي عليهه صور انتبهت عليهه مخلي وياهن الورقة الجانت عندي بلعت ريكي بخوف

:-شتريد؟

:-طول عمري جنت احس صاير شي محد حاجي الي و اليوم عرفت ماجنت مصدوم كلشي اتوقع من عمامي بس

كال هيج و سكت
:-بس شنو؟

:-ما اتوقعت عمي هادي هيج

:-مالة ذنب

:-جان يدري و ماحجالي و حتى رُفيدة كتلج اني الغبي الوحيد بهل قصة

:-عمو هادي و امي مالهم ذنب بس خافو يخسرونك
حالهم حالي كلنة نخاف عليك صعب

:-و تشوفين مالي حك اعرف شي

سكتت و رجعت اباوع على اللوحة
:-جانت امنيتي اشوف ابوي عشت يتيم الاب 11 سنة و بعدهه عشت عمري يتيم الاهل و كل حياتي جانت مبنية على وهم ابوك مات بحادث تعرفين شنو معنى اخوانك يكتلوك و يتبرون من عائلتك هذا ابوي انكتل و خسر كلشي ابنة زوجتة فلوسة شغلة كلشي و خلة وراة طفل يتسمة بأبن زنة و مرة تتسمى بزانية

:-صعب

:-مو وكت هل كلام بس ماعدنة غير هل وكت نحجي بي
اشرلي على الصورة الاولى جانت كلهه صور قديمة

:-امي روح نولدت وحيدة ماتوا اهلها و تربت بغربة عشت مثلهه ولدتني وحيد و تربيت بغربة رجع اشر على الصورة الثانية

:-ابوي كل ذنبة حب من غير ديرتة و مو على مرام اهلة انقتل علمود ورث ماشاف ابنة الوحيد شلون يكبر

ضغط على ايدي قوي و اشر على الصورة الثالثة
:-عمي احسان باعني بيدة علمود يتخلص مني

رجع اشر على الصورة الي يمهه
:-عمي راضي طردني كدام الناس و صاح بينهم هذا ابن زنا مانعرفة

مو بس هيج شفت بعيوني شلون يستلمون الفلوس مقابل ابن اخوهم و شفت شلون فرحانين بموتت امي و يصيحون خلصنة من الخدامة و راح نخلص من ابنهه

رجع اشر على صورة جانت الاكبر بينهم طول يباوع عليهه كال بصوت ناصي

:-الاشوح

يحجي و اني بس ابجي
:-منو هذا؟

جر نفس غمض عينة
:-من اماتني و انا حي

رفعت راسي اباوعلة مركز على الصورة و مبتسم
صورة امي و ابوي موجودات بلعت ريكي بخوف رفعت ايدي اشرت على صورة امي

:-امي؟

ابتسم جر حسرة
:-امي الثانية

مشيت ايدي اصابعي ترجف وكفت اصبعي على صورة ابوي

:-ابوي؟

بلع ريكة عض شفتة الجوة
:-يتمني مرتين

:-شسوة

:-اليوم اني الاحجي مو انتِ بدون اسئلة ملاذ

بقن صورتين وحدة منهن للصعب و الثانية احس نفسي شايفة الشخص البيهه بس ماعرف وين نزلت ايدي اباوع على الصور رفع ايدة على صورة الرجال البقت

:-ابو علي

:-منو هل شخص؟

:-لمني من شتات

:-اعرفة اني؟

:-اممم ابو علي الشخص الي جان يبيع ذرة اخذتج مرة الة

تذكرتة صح نفسة الي بالصورة
:-شيقربلك؟

:-ابو لروحي

اشر على صورتة
:-المُنتقم

غمضت عيني گلبي يرجف من كلماتة
خلصت كل الصور رجع ليورة يباوع عليهن بتمعن

:-راح تنتهي قصة كل شخص بهل لوحة مثل ما انتهت قصة امي و ابوي و ابوج اني عمامي الاشوح   راح ننتهي و يعيشون البقية

:-صعب عوف كلشي انت مو تأمن بوجود رب العالمين
دار وجهه يباوعلي

:-جؤ اياج تتعاطفين وياي ما استاهل حتى الاحبهم أأذيهم اذيتج و اذيت شهاب و جرحت رتيل بيج و باجر عمي هادي اني حقير ما استاهل انسان يتعاطف وياي بلاخص انتِ

:-تكدر تعوف كلشي صعب اهلك خلاص ماتو و دام اللة موجود ميضيع حقهم

:-ماكدر اعوف شي ما خلص كلامنة اكو اشياء لازم تعرفيهه كبل لا ترحين سحب ايدي اتجة للمكان الي بي رسمة العيون

يباوع على الرسمة
:-تعرفيهن؟

:-عيوني

باوعلي جر حسرة
:- هذن الخذن نصي

دنكت راسي ماعرف شجاوبة عيشني بتناقض بين اعذرة و بين ما انسى السواة

:-منو رسمهن؟

:-اذا اكلج انة فغلطان هل عيون رسمتهن مشاعري

رفعت راسي اباوع على اللوحة ثنينة ساكتين
:-تعبتي ترحين تنامين؟

حركت راسي برفض باوعت على الكتب
:-و ذول

لزم ايدي اخذني للمكان الي بي كتب
:-ملاذ

:-ها

:-شكد حافظتي على الورقة اريد تحافظين على الراح احجي مثلهه

:-يعني راح اعيش العشتة مرة ثانية؟ماكدر صعب

:-جؤ ما تعيشين لان محد يريد يعرف هل اشياء غيرج
جانت عيني على الكتابين المتشابهات ما همتني الكتب البقية

:-هل كتب كلهه كتب عن دراستي مو مهمة

شال اول كتاب الي بأسم صعب في الماضي
:-حياتي كلهه هنا من موت امي لحد هذا اليوم

رجع الكتاب المكانة و فتح الثاني جان فارغ تماماََ
:-غمار

:-منو غمار؟

:-حياتي المحد يعرفهه غمار المحد يعرفة غمار ما زال طفل بس راح يكبر بعد هل يوم

:-ما فهمت!

خلة الكتاب بيدي
:-اريد حياتي كاملة تكون يمج ماضي و مستقبل كل الماضي لخصتة بذاك الكتاب و اريد منج تلخصين الباقي بهل كتاب

:-منو غمار؟

اخذ الكتاب مني كلب بي طلع منة جنسية قديمة بأسم غمار..............

:-ما جاي افهم شي

:-اني ملاذ نفسي غمار

:-شلون؟

:-تكتبين عني؟

:-بس اني راح ارجع لامي

:-انتِ و شهاب اي شي تعرفونة عني كتبو و اهم شي اكتبي اخذت بثار گبل لا اموت

:-منين جبت هل جنسية

:-اقري الكتاب و راح تفهمين كلشي حجيت الي جان مفروض تعرفينة

مد ايدة على الكتاب الثاني خلاة على الكتاب البيدي و اخذ الجنسية بيدة

:-ذول ملكج

حضنت الكتب لصدري اباوع علية هادء لدرجة

:-تتعبتي؟

حركت راسي بمعنى لا
:-تكعدين هنا؟

:-ليش

:-شي بنفسي اسوي الج

خليت الكتب بالكاع كعدت بصفهم و هو كعد يمي وخر الخاولي من شعري مد ايدة بجيبة طلع مشط

عدل كعدتة و صار وراية يمشط شعري
:-اضفرج؟

بس سمعت صوتة دمعتي نزلت
:-ماتعرف تسويهه مايلة انت

:-تعلمت اسويهه حلوة

:-سويهه

بقى يمشط بشعري ضفرهه عرفتة سواهه مو عدل مسحت عيوني دنكت راسي رجع كعد كدامي لزم ايدي
:-راح اكصهن اخر مرة

حركت راسي بمعنى اي اباوعلة و ابجي بدة يكص بيهن مدنك راسة كملهن و باوعلي عيونة حمر

:-اخليلج صبغ؟

رفعت ايدي امسح بدموعي
:-ايي

:-اشتريت واحد جديد مو ماتحبين القديم

اخذ ادية خلاهم بحضنة صبغهن و بقى يباوع عليهن
:-حلوات مو

:-ايي

:-تكومين تنامين؟

:-لا

رفعت ايدي على خدة دار وجهه مني
:-صعب مو انت محامي اخذ حكك  بالقانون

:-ما يصير اهلي ذول ماكدر اصير محامي بقضية ضدهم

:-عوفهه صعب

خلة ايدة فوك ايدي
:-ماكدر ملاذ اريد اخذ حك طفولتي ماكدر اعوف شي انت كلتيهه اني اناني

سحبت ايدي منة غطيت وجهي بثنين ادية ماريد اشوفة بهل حالة امسح دموعي و تنزل

:-باوعيلي

مسحت عيوني بردن التشيرت و باوعتلة

:-سامحيني على السويتة و شهاب و رتيل مالهم ذنب اني السبب ورة الصار

:-أذيتني و اذا رحت راح اتأذة اكثر

:-تأذي هسة عادي علمود تتعودين بدوني

ردت احجي خلة ايده على حلكي
:-ماعوف شي ملاذ لا تحجين

مد رجلة طلع باكيت جكاير و جداحة
:-ورثيلي اخر مرة

اخذتهه منة ايدي ترجف شغلتهه و انطيتهه الة اخذ منهه نفس زفرة و باوعلي

:-ما ضنيت يجي اليوم الاكدر اخلي عيني على النار و اجة و لا ضنيت يجي اليوم الاحب بي حد الهيام و اجة كل ضنوني جانت غلط بس بيج اريد ضني صح كل الكلام الي نحجهه هنا ماريدة يطلع بس انت وشهاب تعرفون هل اشياء

:-مااحجي لاحد

:-كل عمري كضيتة ابني بأسم الي و بنيتة بتعب ماراح اخلي يتلطخ بالجرم راح يضل اسمي نضيف دوم

:-ماجاي افهم شي

:-راح تفهمين بعدين كومي صارت باردة

كمت وياة اخذت الكتب حاضنتهم على صدري مادري شنو بداخلهم خايفة ابدي بيهم لا اشوف نفس الشفتة بسبب الكتاب القديم

فتنة للغرفة خليت الكتب على الميز تمددت على الجرباية اباوع لصعب رجع الاغراض على الميز اخذ فراش من الكنتور فرشة بالكاع تمدد و  تغطى

:-نام هنا عادي

:-لا نامي اذا احتاجيتي شي كليلي

غمضت عيني احاول انام ما يجيني النوم افكر شراح يصير بعد هل يوم

:-صعب

:-ها

:-ليش سويت هيج بية

:-نامي

:-بيش الساعة

:-بالوحدة و نص

:-شكل لامي اذا اجت

:-بكيفج

:-راح احجيلهه على السويتة بية

:-ميخالف احجي

:-جوعانة اني

كام من فراشة
:-تجين يمي

:-اي

كمت وراة. كعدت على كرسي و هو طلع اكل من الثلاجة خلاة على الطباخ وطلع صمون رفعت رجلية على الكرسي متربعة

:-اسويلج زلاطة

:-اي

خليت ايدي على خدي اباوعلة كمل كلشي و خلاة كدامي
:-سويلي لفة

جر الكرسي مالتة كعد كدامي كام يسويلي لفات صغيرة و يوكلني بدون ما يحجي شي

:-اكل انت

:-ما جوعان

اخذت صمونة من كدامة سويتلة لفة و انطيتهه الة
:-اكل يلة

اخذهه مني ابتسم و باوعلي
:-ماتكدرين تكرهين بشر انت

:-لا اكرهك

:-جؤ ماتكرهبني

:-اكل يلة معليك

احس شبعت غسلت ادية و بقيت كاعدة كمل اكل و اني  منتضرتة كام غسل و عزل المطبخ

:-اسويلج جاي

:-لا ماريد نعست

:-تعاي ننام

لزم ايدي و اخذنة للغرفة غطيت نفسي بالبطانية اباوع على جهة صعب متمدد كدامي و مخلي ايدة على عيونة غمضت عيني و اني اباوعلة

جان مكان فارغ بس اني بي جسمي كلة مربوط بزناجيل مااكدر احرك نفسي و اجة شخص شكلة قبيح بشكل يجرح ببطني احس بالوجع بس ما اكدر اصرخ شي لازم بلعومي احس احد جاي يكعدني من نومتي بس مااكدر افتح عيني اصرخ بدون صوت فتحت عيني متأذية

صعب كدامي لزمت بطني اصرخ من الوجع فتحت عيني بتركيز امي واكفة يمي كعدت اجر نفسي كوة ماادري امي شوكت اجت و لا ادري صار شكد واكفين يمي سحبتني لحضنهه و اني اتلوة بين اديهه

:-ببطنننيي راح اموتتت يمةةة

جانت تحرك بيدهه على شعري و صعب واكف كدامي حاير شيسوي

:-اسم اللة يمة اسم الله اهدي يروح امج شجاج

ماكدر احجي اشرتلهه انزل من الجرباية شالني صعب نزلني بالكاع و كعد مقابيلي كمت اتقيء احس الاكل الاكلتة كله تقيئتة روحي طلعت ابجي و اتقيء جسمي يرجف بردانة و الوجع ماخذ روحي

:-يمةةة ولج يمةة بطننيي راح اموت واللة

صعب:-رُفيدة انطيهه مسكن على ما اشوف دكتور

:-اي اي انطيهه

راح و اني بحضن امي اصرخ من الوجع شوية و اجة بيدة حب انطانيهه شربنياهه و شربني مي

:-تتمددين ملاذ احسن الج

:-مااكدر اتأذة

ذكرت الحلم من خوفي شلت التشيرت اباوع على بطني عبالي بيهه اثر الجرح

:-يمةة شوفيي بيهه شيي

:-لا ولج يمة شجاج ما تكليلي

:-اااهخ اخذونيي منا راح اموت واللة بعد ما اكددر

ربع سااعة و حسيت الالم هدء ارتكيت على الجرباية روحي رايحة شفت امي كدامي جرتني لحضنهه تبجي

:-ولج بنيتي شجاج

:-مادري يمة راح اموت اني

:-اسم اللة اسم اللة

ضليت مجلبه بيهه عبالي احلم اجتني شكد جنت منتضرة جيتهه بس الالم خرب كلشي باوعت على صعب كاعد و عيونة عليه

:-شبية اني صعب؟

:-مابيج شي بس يطلع الصبح نروح للطبيب لا تخافين

خليت راسي على صدر امي اتنفس بعطرهه مشتاقتلهه مر اقل الساعة و بدة الوجع يرجعلي ما اكدر اخذ مسكن بقيت افرفح بين اديهم

:-انطوننني حبااية فدوة واللة اصير زينة من اشرب

امي تبجي على بجي و صعب طلع يخابر فات للغرفة صاح على امي

:-يلة رُفيدة خل ناخذهه

:-وين اكو دكتور هسة

:-خابرت ناس عرف بسرعة كومي

امي تريد توكفني ما تكدر و لا اني اعين روحي اجة صعب شالني و امي اجت وراة تركض. طول الطريق ابجي و حاضنة امي من السرعة ما ضلت طسة ما فتنة بيهه وصلنة للمستشفى جانت فارغة محد بيهه بس احنة اجت الدكتورة كبل فوتتني للغرفة سوتلي فحص و امي وياي كد ما صرخت صوتي راح

سمعت الدكتورة كالت لامي
:-لازم عملية

.
.
.
.
.
.للحكاية بقية

كلانا كتف للاخر♥
الوريد♪