رواية أنتقام الصفحه 27 (ترميم) الفصل الثاني وأربعون 42 - بقلم خـلود الـ محسن

انستا للتواصل lorai_alrwi

تفاعلكم گلبي لاتنسون التصويت ❤️
………………………………

من سمعت صوتهه ابتسمت نزعت حجابي خليت الدنبوس على الميز باوعت علية

وجعني گلبي من شفت گلادة صعب على الميز وبيهه الحلقة و بصفهه جكارة اريد ارفع ايدي الزمهن ما اكدر بللت شفايفي احاول ما افكر بشي سحبتهن من الميز خليتهن بيدي اباوع عليهن الجكارة كاتب عليهه احبج ملاذي

بس رمشت وكعت دموعي على ايدي سديت ايدي عليهن ما اريد اصدك مسحت عيوني ادية ترجف اتذكر مرة گلي
اذا رحتي مني و دزيتلج هاي الكلادة راح تلبسينهه

نفضت الافكار من راسي طلعت بسرعة من الغرفة اريد اتأكد من امي وكفت بباب المطبخ امي واكفة ودايرة وجهه على الطباخ تكلب بالجدر

:-يوم

بدون ما تدير علية كالت
:-ها

:-صعب وين؟

دارت وجهه علية و كالت بصوت ماليتة العبرة
:-راح

باوعت عليهه عيونهه مورمة من البجي عصرت الكلادة و الجكارة بيدي عفت امي بالمطبخ و رحت للغرفة كعدت بالكاع صافنة ما مستوعبة الصار

:-ليش اجة و راح معقولة جنت احلم معقولة تمرضت وجاي اعيش بوهم

عفت الكلادة و الجكارة على الجرباية و كمت فتحت الكنتور اكلب بي شفت قميصة ويا ملابسي

سحبتة جسمي يرتعش حضنتة لوجهي اعرف هذا عطرة مستحيل وجودة جان جذبة مستحيل لكيت دموعي تطيح على القميص فززني صوت امي درت وجهي شفتهه يم الباب

:-ما اريد اخسر ولدي ثنينهم صعب ما سمع كلمتي انت لا تعوفيني

نزلت ايدي و بقيت لازمة بيهه القميص اباوع على امي تحجي و دموعها تارسة عيونهه قربت منهه روحي رايحة يعني صعب ما راح يرجع سحبتهه لحضني اهدي بيهه

:-ما اعوفج يوم مااعوفج

:-صعب وصة بيج لاتكسريني يمة

وخرت منهه ابتسمت بوجهه ومسحت عيوني
:-ما بية شي خلي يروح درت وجهي شمرت القميص على الجرباية و رجعت باوعتله مسحت دموعهه

:-شمسوين غدة جوعانة اني

باوعتلي مستغربة
:-يللةة ميتة جوع تدرين بية من اطلع استحي اكل
لزمت ايدهه و امشي كدامهه لازم ادوس على گلبي كافي أذيت امي وياي

فتت للمطبخ امي واكفة صافنة علية تلافيت نضراتهه احضر بالمواعين باوعتلهه مبرطمة

:-هااا رُفيدة انت صايرة ما تهتمين بية يعني من جنت اجي من المدرسة مو الكاج محضرتلي الصينيه هسة ليش تهمليني

ابتسمت رغم احس عليهه شكد خايفة من رد فعلي قرببت مني اخذت الخاشوكة من ايدي باستني و راحت تصب

:-اي يمة اليوم شسويتي تعودتي لا

تربعت بالكاع اباوع لادية رجفتهن مستمرة عصرتهن ايد بيد و خليتهن بحضني

:-اي المديرة حبابة و هي تعرف صعب و حتى الاطفال حبابين

:-صدك يعني تونستي

:-ايي و اني اصلا اريد اشتغل ما اريد بس انت تشتغليين

:-ما محتاجين شي اذا علمود الفلوس لاتشتغلين

:-لا اني اتونس من اروح

بقت تسألني واني اجاوب احس شي يطحن بگلبي بس ما اريد اشوف امي مكسورة علية متأكدة صعب رفض
يعوف عمامة و هل شي اعرف شكد يأذي امي مستحيل اخليهه تخسرنة احنة الاثنين

كعدنة ناكل سوة كملت اكل شلت المواعين
:-لا حبيبتي انت تعبانة روحي نامي اني اغسلهن

:-لا يوم ما بية شي

عيونهه تلاحكني وين ما اروح غسلت المواعين ما اريد اكعد بمكان وحدي و اضعف شغلت البلازما على فلم و جبت اغراض التنضيف نضفت البيت كلة و امي كل شوي تصيح بية ما تريد اشتغل للعصر كملت تنضيف فتت للمطبخ احضر بالعشة طلعت بتيتة اجت امي سحبتهه مني

:-كافي تعبتي روحي ارتاحي بغرفتج

اخذتهه منهه خليت ايدي على خدهه

:-ترديني ارتاح اني مرتاحة من اشتغل و لا عبالج ضايجة على صعب لا ما ضايجة

:-ملاذ اني اعرفج من عيونج

:-لاتخافين ما بية شي كل واحد اختار طريقة هو اختار يروح و اني اختاريت اكمل بدونة و بعدين انت شلون ام ترديني كوة احب كضيني بنعال و كتليني

ضحكت و لزمت ادية
:-اخاف عليج يمة

:-لاتخافين

عصرت ايدي قوي بيدهه
:-شبيج ترجفين

:-لان تعبانة مشبعانة نوم

:-روحي نامي

:-لا اريد اعدل نومتي نتعشة وراهه انام

فلتت ايدي منهه درت وجهي اكصص بالبتيتة كملت و خليت العشة نفسي ما تتقبل اكل كعدت علمود امي

شلت المواعين غسلتهم و فتت للغرفة احس جسمي هلكان طاحت عيوني على الجرباية شفت اغراضة شكد ما احاول الهي روحي نهاية اليوم اتذكرة كعدت بفراشي شلت الكلادة بيدي بيهه الحلقة

_شلون انطاك كلبك تنزعهه

باوعت على ايدي لو شيصير ما اكدر انزع هل حلقة روحي معلكة بيهه شلون انطاة گلبة ينزعهه لبستهه برگبتي تمددت و سحبت الجكارة مالتة بيدي و القميص يمي

:-شكو تعوفلي ذكريات منك ما تدري هل اشياء تأذيني !

امي فاتت للغرفة ابتسمت بوجهه خليت الجكارة جوة المخدة بدون ما تنتبة غطيت القميص بالبطانية

جنت مشغلة كلوب اضائتة خفيفة لان امي متكدر تنام بضوة و لا اني اكدر انام بالضلمة صحت عليهه

:-يمة طفي الكلوب وياج

جانت تنزع بحجابهه باوعتلي مستغربة
:-من شوكت تنامين و الكلوب طافي؟

:-ها مو احس الضوة بعيني

طفتة بدون ما تحجي سدت الباب و اني غطيت روحي بالبطانية

حسيت عليهه كعدت على الجرباية جريت نفس قوي ماريد تشوفني ضعيفة دعيت ربي كون ما ابجي كدامهه وخرت الغطة باوعتلهه خلت ايدهه على راسي

:-ملاذ يمة

:-ها

:-متأكدة ما بيج شي

حركت راسي بمعنى لا
:-مريضة اخذج للطبيب؟

:-لا ييروحي ما بية شي بس ردت انام لان وراية دوام الصبح

دنكت باست راسي و راحت لفراشهه غطيت روحي سحبت القميص لحضني اشم بعطره

ضليت هواي على هل وضعية اريد انام ما اكدر وخرت الغطة باوعت لامي ما اكدر اشوفهه ضلمة صحت بصوت ناصي

:-يوم

ما ردت علية عرفتهه نايمة كمت من فراشي شغلت الكلوب و رجعت على الجرباية سحبت القميص لبستة وركيت راسي على راس الجرباية

:-مرضتني بيك صعب مرضتني بحبك

تمنيت دموعي تنزل تمنيت اعبر عن الاحس بي بدموع بس معاندات وياي دنكت اباوع لادية شلون ترجف حضنتهن لصدري كل ما اغمض يجي ببالي شلون جنة سوة

اريد الليل يخلص واكوم اداوم عيوني تعبت واني اجبرهن ينامن سمعت صوت الاذان نزعت القميص و كمت من فراشي باوعت لامي نايمة طلعت توضيت خليت عيوني بالسماء

:-يالله يامخرج النور من الضلام ريح بالي

درت وجهي شفت امي طلعت
:-صباح الخير

:-هلا يمة شكعدج

:-كعدت اصلي

خليتهه تتوضة و فتت جوة صليت خليت المصلاية صلت عليهه امي رجعت لفراشي غطيت روحي امثل النوم علمود امي ما تحجي علية

حسيت عليهه طفت الضوة وخرت الغطة بقيت كاعدة صافنة على السكف ماادري شكد مر وقت ما اريد اخذ تلفون امي ادري بروحي اضعف

كعدت امي سوت ريوك تريكت وياهه و كمت بدلت رحت للدوام اليوم كلة مسطورة ما استوعب شي خفت من رجفة ادية تزية ما تنقص

رجعت امشي بالشارع فارغ باوعت على بابنة من بعيد شفت كدامة سيارة گلبي رف

باوعت على الشارع فارغ لزمت الجنطة قوي و طكيتهه ركضة للباب وصلت اتلمس بالسيارة تشبة سيارة شهاب

فتت للبيت شفت حذاء بالباب گلبي يدك بقوة فتحت باب الصالة محد موجود جريت نفس قوي فتت للمطبخ شفت امي واكفة على السنك و شهاب كاعد يسوي زلاطة بس شافني كام مبتسم

:-هلا ملاذ

بلعت ريكي متوترة ليش اجة
:-هلو

باوعت لامي ابتسمت اطمنت من شفت ابتسامتهم عبالي صاير شي

:-يابة صاير مدرسة و لا تتحاجة

:-صعب وين؟

:-بالدوام

:-ليش اجيت؟

:-شني ارجع ما ترديني

:-ها لا مو هيج قصدي هلا بيك

:-يلة ملاذ متنة من الجوع امج ما تنطيني اكل اله تجين

:-اكلوا انتم اني تغديت بالدوام

عفتهم و فتت للغرفة بدلت و رجعت صليت ادري بأمي تضوج رحت كعدت يمهم

:-ملاذ تعاي اكلي هذا الاكل جبتة بفلوسي حرامات نذب الزايد و احنة عدنة جلاب

:-ما غيرك

صاحت امي
:-وللج عيب

:-لا يمة اشاقة وياه

كعدوا ياكلون احس امي بعينهه حجي بس لان شهاب موجود ساكتة شوية و كالت

:-ملاذ شعجب اكلتي بالمدرسة

:-مو سوينة عزيمة و اكلت

كملو اكل خليت جاي شهاب كال
:-ملاذ انة دزو بيدي امانة الج و جيت اعزمكم على خطوبتي

قدمت الجاي الهم
:-شنو الامانة؟

:-صعب دزهه انطيتهه لامج

من كال صعب درت وجهي على امي و حجيت بصوت عالي ماليتة الرجفة

:-وووينها شدزلي؟

:-بعديين انطيهه الج

كعدت على اعصابي
:-اي يمة شهاب شوكت خطوبتك

:-باجر

شكد فرحتلة بس بالي مو يمهم افكر صعب شدز
:-مبروك

:-تجين ملاذ انة اجي اخذكم بيدي

:-لا مااكدر

:-شنو بكيفج ام ملاذ انة جايكم تردوني و ما تجون

:-لا يمة اذا كدرنة نجي

ضلو يحجون واني بس كاعدة ما استوعب شيحجون كامت امي للمطبخ باوعت لشهاب

:-صعب شدزلي؟

:-ما ادري

سكتنة ثنينة شوية و كال
:-ملاذ

رفعت راسي اباوعلة
:-ها

:-ليش ما تجين علمود صعب تخافين تشوفينة؟

:-لا عندي دوام

:-انة اخذلج اجازة انت مو تكولين انة مثل اخوج شلون ما تجين لخطوبتي؟

:-ما اريد اشوف صعب

:-ليش؟

:-تعرف ليش اني وصعب كل واحد بطريق ليش كل ما احاول انساة يرجع و يخليني اتعلق بي من جديد

:-صعب تمرض بدونج لذلك بس عرف بوضعج اجة بدون ما يفكر بالعواقب

:-واني اضل كل يوم اتعلق بي اكثر و كل ما اكول رجع يروح بدون ما يكلي؟

:-حگج شما تحجين ملاذ صعب شكد يحب ابوي هسة ما يحجي وياه

:-واني شبدية؟ سويت كلشي اكدر علية بس ردتة يضل شهاب ماتعرف شنو المريت بي من هو ماكو و هسة محد يعرف بشنو جاي امر و ترجعون تذكروني بي خليني انساة

:-براحتج ملاذ انة ما جاي اكلج حاولي وياه لان ماريد أذيتج اكثر وانة اكثر واحد يعرف الحب شيسوي بس امج شذنبهه انت شايفة شصاير بيج؟

:-ما بية شي اسأل امي اني عايشة طبيعي و جاي ادرس و التهي بالبيت ماعندي شي

:-انت شايفة روحج لو لا شايفة شصاير بحالج؟

:-لا ما بية شي جاي اتعب بالدوام

:-ليش تكابرين

:-شتريد مني؟

:-انة و انت نرجع صعب للطريق الصح

:-وتاللي ليش تفكرون بس بصعب ليش محد يفكر بية اريد انسى ليش محد يساعدني

:-نسيانج ياخذ صعب من عدنة

:-شنو الاسوية ششهااب ليش تخليني احجي شي ما اريد احجيي شسووي شهاب مو حتى روحي سلمتهه اله و هانت علية شسوي اكثر من هيج؟

عفتة و كمت للغرفة سديت الباب وراية ما ادري بروحي شلون حجيت هيج جسمي كلة ينتفض افتر بالغرفة اريد شي يبرد روحي

طلعت الجكارة من جوة المخدة و القميص مخليتة يمهه حضنتهم و تمددت على الجرباية غطيت روحي عسى و لعل اكدر انام

سمعت باب الغرفة يندك كمت من فراشي رجعت الاغراض جوة المخدة

امي لازمة صينية اكل وواكفة
:-ها يوم

:-جبتلج غدة تعاي اكلي

:-ما جوعانة اكلت بالدوام

:-وجهج مصوفر شوكت اكلتي

:-شهاب وين؟

:-راح راد يسلم عليج بس كال خطية نايمة

:-اي اني راح انام

:-تعاي يمة انة اوكلج

احس حرارة تطلع من وجهي رفعت راسي اباوعلهه
العبرة خنكتني مااتحمل اشوف امي هيج

:-يوم بس اجوع اكلج ما اريد

عفت الباب مفتوح و رجعت لفراشي درت وجهي مااريد اشوفهه كدامي حسيت عليهه طلعت خليت ايدي جوة المخدة لازمة القميص حسيت على امي رجعت للغرفة غمضت عيوني كعدت وراية

:-ملاذ

ما رديت عليهه ماعرف شحجي اذا سألتني شبيج
:-ملاذ انت ما نايمة كومي ما تردين تعرفيت صعب شدزلج

طفرت من مكاني باوعتلهه
:-شدزلي؟

:-هيج اني مو مهمة عدج من اكعدج ما تحاجيني

:-تعبانة يوم

خلت علاكة كدامي و كامت فتحتهه شفت بيهه تلفوني فتحتة ايدي ترجف كبل فتت للصور

اكللب بيهن احس عيوني تتسابق على صورنة ركيت نفسي على راس الجرباية اباوع بيهن وحدة وحدة وصلت لصورة من خليت اله مكياج اباوع بيهه و اضحك فاتت امي للغرفة رفعت التلفون اشوفهه

:-ييوم شوفي اني سويتلة

باوعت بيهه و ابتسمت
:-ملاذ اديج شبيهه

رجعت التلفون كدامي و رجعت ارتكيت
:-ما بية شي لان ما نايمة

كمت من فراشي نضفت البيت و البرة كعدت بساحة البيت لحد ما أذن سمعت الاذان كلة يلة كمت احس صوتة نسمة على كلبي كمت توضيت و صليت اجت امي مسويتلي لفة

:-اكلي بس هاي

:-ما اشتهي من اجوع اكل

:-لخاطري اكليهه من ايدي

عدلت كعدتي باوعتلهه
:-وكليني انت

ابتسمت عيونهه مليانة دموع
:-راح اصبلج و اوكلج بيدي

حركتلهه راسي بمعنى اي شوية وفاتت جايبة صينية كعدت كدامي تسوي لفات صغيرة و توكلني

:-يمة

:-ها

:-صعب شكالج من راح

:-وصة عليج

:-ما راح يرجع مو

:-الله كريم يمة اكلي هسة

:-شبعت

كمت من مكاني اخذت الصينية منهه غسلت المواعين و رجعت فرشت لامي اخذت الجكارة من جوة المخدة ضجت لان نكسرت خليتهه ويه ملابسي سحبت القميص من جوة المخدة حضنته و تغطيت

اغمض عيوني مايجيني النوم فتحت التلفون اكلب بالصور حفظتهن شكد ما كلبت بيهن شغلت قصيدة على الاب احس روحي مليانة دموع بس مااكدر ابجي

جنت كل ما اسمع قصيدة على الاب ابجي اليوم لان ردت البجي ما اكدر باوعت على الساعة بالتلفون بالوحدة

راح يصير الي يومين ما اكدر انام فتحت الواتساب اقرة برسائلنة القديمة شكد عاندت وية روحي ما اضعف يمة بس لكيت روحي كاتبة اله

:-صعب تعبانة

شفت صار صح واحد ردت احذفهه كبل طلع يمهه صحين احس گلبي رجف يمكن غلط ما يصير ادزلة اني قررت ابتعد ليش رجعت حذفتهه و حذفت الواتساب

شوية و اتصل على الرقم رفضتة و حضرت الرقم سويت التلفون صامت خليتة جوة المخدة الوم بروحي ليش دزيتلة ليش ضعفت سمعت تلفون امي يتصل سحبت الغطة علية بسرعة غمضت عيوني شوية و ردت
اذني يمهه

:-الو ها يمة صعب شبيك

سكتت شوية و كالتلة
:-هاي يمي نايمة اكعدهه....لا نامت من وكت

بقيت مغمضة بقوة بس كملت مخابرة صاحت علية
:-ملااذ

ما رديت سكتت يمكن عبالهه نايمة بس حسيت صار هدوء كعدت حضنت القميص

رجعت اكلب بالصور مليت من كد ما كلبت بيهن ما عفت شي ما ركزت بي صار الصبح واني ما نايمة صليت بقيت ادعي كون انام لان تعبت يومين عيوني ما شايفة النوم كعدت ابدل من السبعة

:-ملاذ تعاي تريكي

:-اكل بالدوام

فاتت للغرفة تباوعلي
:-دوامج بتسعة؟

:-اي

:-شعندج من هسة تبدلين

:-مو اريد اكمل مابية حيل لشوي ابدل

:-تعاي تريكي

:-اكل بدوام ما اشتهي

:-اليوم لاتداومين اطلب الج اجازة شوفي شصاير بيج

:-لا مابية شي

كملت و طلعت من الغرفة افتر بالبيت احس روحي مبهوتة صارت ب 8:30 طلعت للدوام ماعندي علاقة بأحد اخذ العلية و ارجع بطريقي امشي بشارع شفت ولد فات صحت علية

:-من رخصتك

:-تفضلي؟

:-وين الكة صيدلية هنا

دلاني على الطريق مشيت بسرعة اخاف اتأخر و امي يضل بالهه فتت لكيت بيها بننية

:-هلو حبيبتي

:-هلو تفضلي

:-اريد منوم

:-مالت اطففال لو شنو؟

:-لا فوك عمر 18

:-الج
حركتلهه راسي بمعنى اي

مشت صحت وراهه
:-اريد قوي كون

جابتلي حبوب و رجعت انطيتهه فلوس مديت ايدي اخذهه ايدي من وحدهه ترجف كالت

:-حبيبتي اذا عندج شي بگلبج ميصير تاخذين هاي الحبوب

:-لا مابي شي

اخذتهم و طلعت بسرعة ضميتهن بالجنطة فتت للبيت امي منتضرتني

سلمت عليهه غسلت و صليت كعدت وياهه على الغدة
:-ملاذ اليوم خطوبة شهاب

:-اي على الخير

:-خابرية و باركيله هو غير عزمج و مارحتي

:-اي لشوي اخابرة

كملت كمت كدامهه شربت حباية و تمددت بفراشي فتحت التلفون رقم رتيل عندي اتصلت عليهه اول اتصل ما ردت سديت التلفون شوية و اتصل شفت رتيل تتصل على الماسنجر فتحت خط بقيت ساكتة كالت

:-ملاذ هاي انت شلونج تسمعينني

:-الو

:-شلونج يروحي لج ملاذ والله ما مصدكة مشتاقتلج

:-زينة اني

:-ملاذ

:-ما زعلانة لا تحجين بس ردت اسلم على شهاب موجود

:-اي موجود ملاذ

:-ها

:-اسفة اني وداعتج عندي جنت مجبورة

حجت هيج و سكتت عرفتهه كامت تبجي فتحت كامرة كتلهه

:-مبدلة انت

:-ااي

:-فتحي كامرة خل اشوفج

فتحت كامرة تمسح بعيونهه مبدلة و طالعه تخبل
:-حلوة طالعه

:-صدكك عليج الله بعد شوية راح نروح شهاب فرحان حيل

:-وانت

:-فرحانة اله

:-ان شاء الله خير وين هو

:-جوة

:-اذا تكدرين تنزلين انطي التلفون خل اسلم علية

:-اي ثواني

شفتهه نزلت باوعت يمي ماكو شال بس قميص صعب خليتة على شعري شوية واجاني صوت شهاب باوعت عليه كاشخ ولا عرفتة

:-هاي شطالع بالباكيت

:-ها صدددك شلوني عليج العباس ملااذ فرحان الدنيا ما واسعتني

ضحكت حاير شلون يعبر على فرحتة
:-الف مبروك تستاهل كل الخير

:-يوم الالج ملاذ انة مستعجل ورتيل صعدت الغرفتهه شوية و ارجع اوكفي

انطة لتلفون لواحد يمة رفع التلفون صعب صار بوجهي
باوعتلة عيونة عليه و عاكد حاجبة ماحجيت شي بس اباوعله احس گلبي كام يرجف

:-شلونج

دنكت راسي اهدي بروحي احس نفسي يتسابق وياي
:-زينة

:-ليش حاضرتني مااكدر اخابرج من غير رقم مثلا

درت وجهي من التلفون و بقيت ساكتة ماعرف شأكلة
:-ليش تعبانة؟

رجعت اباوعلة وجهه ما يگصة السيف
:-مابية شي انت شعندك رايح

:-خطوبة اخوي شني ماروح

:-لا شعلية

:-شلونج

:-زينة

:-تعبانة؟

:-لا

:-اجيج؟

:-لا

بقى ساكت رجع حمحم كال
:-تداومين

:-اي

:-مرتاحة بالدوام

:-اي

كمت ادير بعيوني على كل الغرفة الأ التلفون ما اباوعلة يومين حابسة دموعي بس شفتة كدامي نزلن وخرت الكامرة من وجهي دنكت راسي بين رجليه اكتم بشهكاتي مخلية التلفون كدامي اجاني صوتة

:-جمارة

مسحت عيوني سحبت نفس قوي و رجعت الكامرة علية
:-ها روح راح تتأخرون اني راح انام

:-تنبل كل مااخابر نايمة؟

:-شتريد؟

:-القميص لايكلج

نسيت اني لابستة على راسي لمستة و رجعت باوعت لصعب

:-مالكيت حجابي و لبستة

:-امم راح تنامين؟

:-اي يلة روح

:-من تنامين اروح

:-تلفون رتيل

:-راح اتصل عليج بغير رقم ردي علية

:-اي

سد التلفون شوية و اتصل علية رقم فتحت الخط بقيت ساكتة و هو ساكت

:-ملاذ

:-همم

:-ليش ما تاكلين

:-اكل

:-ليش بليل تسهرين؟

:-مااسهر

:-اديج ليش ترجف

:-مابية شي

:-اجي اخذج للطبيب

:-مو رحت ليش تجي

:-ملاذ

:-ها

:-بليل اخابرج اريد ننام سوة ردي علي

:-انام من وكت ما انتظر

:-اخابرج بليل خوش يلة باي سدي الخط

عفتة شوية مفتوح ما حجة شي سديتة و نزعت القميص حضنتة وخليت راسي بين رجلية احس مثل الجنت محتاجة اشاره من احد علمود ابجي بس شفتة كدامي انهاريت شكد ضعفت وياك صعب

بقيت بالغرفة لليل كل شوي اباوع بالتلفون منتظرتة يجي
امي اجت نامت واني كاعدة رغم شربت حباية بس ماكدرت انام

صارت ب 11 اتصل نفس الرقم فتحت الخط وخليتة على اذني بقى ساكت هواي اخر شي كال

:-متغيرة هواي ملاذ

:-شتغير بية

:-كلشي حتى عيونج

:-بفضلك

ماحجة شي اسمعه يدخن بقى يكح
:-مريض؟

:-حيل ملاذ حيل

:-شتريد

:-ضايع بين دربين مااندل وين اروح

:-ليش رحت واني كتلك لو رحت هل مرة راح اعوفك

:-اول واخير اروح

:-انت اناني

:-اذا بيج حيل اناني

سكتت روحي تفور
:-شهاب فرحان

:-اي بس انة ما مرتاح لانسابتة

:-شبيهم

:-ما ادري بعدين نعرف وين انت هسه

:-ع الجرباية اريد انام

:-نامي يلة و خلي التلفون مفتوح

:-اي

عفت التلفون و كمت شربت حباية و رجعت خليت التلفون على اذني اسمع صوتة يدخن

:-صعب

:-همم

:-اليوم اخر مرة احجي وياك

:-ميخالف

:-مااجذب

:-اي

غمضت عيوني اريد انام مااكدر سمعتة شغل اغنية في وحدتي

:-صعب اريد اسد الخط وانام

:-سدي

:-يلة روح

سديت الخط ماريد اسمعة شيكول و كالعادة النوم ما يجيني تربعت على الجرباية ابجي بصوت ناصي اخاف امي تكعد شكلها لان ما اكدر انام مسحت وجهي اتصلت على صعب فتح خط

:-شبيج بابا

:-شلون اكرهك

:-شتردين اسويلج اجيج هسة

:-وين تكدر توصل هاا انت ليش تجذب ماتشوف الطريق شكد بعيد

:-شسوي بس فهميني

:-اطلع من حياتي اكرهك

:-هاي هية تدللين

:-ليش تعوف اغراضك هناا ليش

:-نسيتهن

:-جذذابب هاي كلادتك اله باجر الصبح انزعهه و قميصك احركة و الجكارة اشمرهه اني اعلمك

:-بكيفج الي يعجبج سوي

:-ليش شكلك تكلي بكيفج تستهزء بية

:-لا بابا ما مستهزء

:-باي بعد لا تخابر

سديت التلفون و شمرتة على الفراش تمددت صرت اجذب على روحي اقنع روحي اني نمت شربت حبايتين منوم بس بليل و ما اثرن بية

للصبح كمت غسلت احس طاقتي مهدورة باوعت بروحي بالمرايا جفني احمر و عيوني مشطبة بحمار وجهي صاير اصفر اليشوفني عبالة مدمنة

فتت صليت و كعدت امي تصلي تريكت و طلعت على اعصاب امي اطلع ادري بيهه ما راضية بس مااكدر اضل بالبيت رجعت من الدوام الجو حار احس روحي ثكيلة ادية ماتعيني اشيل الجنطة

وصلت للبيت كوة رحت بوجهي للمغسلة ارش على وجهي مي احس نفسي يسرع و ادية مااتحكم برجفتهن نزلت الجنطة بالكاع وكعدت لامة رجلية ابجي وارجف طلعت امي من سمعت صوتي برة اجت تركض علية

:-يمةة بنيتتي يمةة

:-يمةة گلبي راح اموت

سحبتني عليهه تبجي و تلزم بوجهي مااكدر اعين روحي واوكف تريد تكومني ما تكدر كمت اتنفس بسرعة احس الهوة ما يلحك علية اجر شهيق بقوة و ازفرة

:-يمة ايددي لزميهم بردانة

تعصر بدية و تبجي فاتت ليجوة و طلعت بشارع اني على كعدتي بالكاع اباوع على ادية شلون تنتفض و لونهم اصفر

اجت يمي لازمة ادية ساعة تبوسهن ساعة تمرغهن 
:-شني اليوجعج يروح امج

:-گلبي يمة راح يموتني

سحبتني لحضنهه سمعت احد فات من برة
:-بية ولا بيج يروح امج

اجت مرة من جيرانة كومني وياهن بقيت لازكة بحضن امي وبس اردد بكلمة گلبي اطرافي ثلجت و زدت رجيف

:-يمة غطيني بعباتج راح اموت

مسحت وجهي بردن عبايتهه و تقرالي بأاية الكرسي
اخر شي سمعتة الولد الي يسوق كلهه ما ضل شي راح نوصل غمضت عيوني ما ادري شنو الصور فتحت احس اضائة قوية كدامي باوعت يمي بس ممرضة نسيت شصار رفعت راسي

:-انني شسوي هنا

باوعت لايدي بيهه مغذي
:-الحمد لله على سلامتج حبيبتي

:-وين امي

:-هسة اصيحلهه

طلعت و اني اتلفت ذكرت شصار رجعت راسي على المخدة نزلت دموعي وتخللت بشعري احس بحرارتها حسيت بأمي لزمت وجهي فتحت عيوني اباوعلهه

:-يمة

:-سودة عليج ولج يمة سودة علية يروحي شجاج يا يمة

:-تعبت والله تعبت جاي اموت اني

:-اسم الله لاتحجين هيج

سكتنة ثنينه على صوت الدكتورة اجت وكفت يمي ومخلية اديهه بجيب الابكوت مالتهه

:-اسمج ملاذ حبيبتي

:-اي

سحبت كرسي وكعدت كدامي
:-ملاذ ليش هيج صار بيج

:-ما ادري

:-همم ما تدرين تشربين علاج شي؟

حركت راسي بمعنى لا

:-تدرين انت لو باقية يوم زايد جان نصابيتي برجفان اذيني و لا سامح الله يجوز يؤدي للجلطة الدماغية

:-اسم الله دكتورة شلونهه بنيتي شبيها

:-تعدت الخطر بس ملاذ اي علاج تاخذينة عوفي
امي ردت عليهه

:-ما تاخذ اي علاج هي فجأه تمرضت

:-لا امي تاخذ

جريت نفس رفعت عيوني اباوع للسكف
:-اي دكتوره اخذ منومات

باوعت لامي تباوعلي و دموعهه على خدهه
:-تعرفين اسم المنوم الي تشربينة؟

:-اي
انطيتهه اسم المنوم

:-هذا مو بس منوم هذا بي نسبة مهدء و هل شي خلة صحتج بالنازل سببلج سرعة بنبضات القلب زادت عن الطبيعي 20%

ببقيت ساكتة ماعرف شحجي رفعت ايدي اباوعلهه ترجف بس مو مثل قبل

:-دكتورة ايدي راح تضل بيهه رجفة

:-بمرور الوقت راح تروح سجلتلج علاج

كامت تفتر بالغرفة ما ادري شنو تريد شوية و كالت لامي
:-خالة من رخصتج عادي ابقى شوية وية البنية

:-اي يمة

جانت لازمة ايدي عاصرتهه بقوة فلتتها و راحت عيوني تلاحكهه يارب لا تخليني اكسر امي اكثر

مسحت دموعي تجوي بعيوني
:-ملاذ احد مأذيج من اهلج؟

:-لا

:-تتعرضين لضغط نفسي احد يجبرج على اشياء تسوينهه

:-لا

:-هل شي الي صارلج ميصير اله بسبب ضغط نفسي قوي اذا احد مأذيج احجي احنة نساعدج

:-لا محد

:-تمام حبيبتي بس خلي يكون بعلمج انت الي تتأذين و احنة هنا نساعدج مراح نخلب احد يأذيج اكثر

:-مابية شي

:-زين حبيبتي تكومين بسلامة

طلعت و رجعت امي فاتت وراهه

:-يمة

:-ها يروح امج

:-اني تعبانة حيل

:-اسم عليج من التعب ما بيج شي انة يمج يمة اذا صارلج شي انة شسوي بساعتهه وين ملاذنة القوية وين الما تهتم لشي ولج وصلت بيج ما تنامين و انة يمج ما ادري مو جنتي حتى من تاكلين تحجيلي

:-صعب وصلني لهنا

:-عوفي يمة كل واحد بيكم راح لسبيل حالة كل واحد عندة طريق يبني صعب معند و انت ما تنسين انة غلطت من وديتج يمة و ما حسبت حساب لهيج مواضيع بس ما عبالي راح يحبج خفت لا اموت و انة ما مأدية لامانة لذلك انطيتهه الج

:-معليج انتِ احنة ما نعرف نتصرف

:-راح اعوضج وعد بس لاتضمين علية

:-اي

:-اوعديني ما راح تسوين شي من وراي

:-لا

باست راسي و بقت كاعدة يمي تمسح بأدية

ما ادري شنو هذا البرود الاجاني احس روحي خالية من المشاعر خلص المغذي و سمحولنة نطلع جيرانة ابد ما عايفنة امي تتشكر منه و ماكو صعدنة بالسيارة خليت راسي على جتف امي عيوني على الفراغ

رفعت ايدي اباوعلهه بيهه كانونة و صفرة ترجف
درت وجهي اباوع من المرايا الكدام على الطريق بس الولد باقي وية امي المرة رايحة

رفعت راسي باوعت للمرايا شفته يباوعلي بس شافني دنك راسة كمت كل ما ارفع راسي اشوفة يباوع حجيت بصوت عالي ما ادري شبية بس احس صارت عقدة ما
اريد احد يباوعلي

:-متزوجة والله

بس حجيت هيج بعد ابد ما رفع راسة و لا امي حجت شي امي تشكرت منة و نزلنة للبيت وين ما تسحبني اروح وياهه فوتتني للغرفة على الجرباية و كعدت بصفي انطتني علاجي و غطتني

غمضت عيوني شوية و بعد ما حسيت ما ادري اذا جان حلم لو خيال احس بصعب يتلمس بوجهي باس گصتي فتحت عيوني اتلفت بالغرفة فارغة محد بيهه اتلمس بوجهي احس بلمسة معقولة هذا كلة خيال جاي احس بي
صحت بصوت عالي

:-ييمةةة وينج

شوية و فاتت للغرفة
:-ها يمة ها يروحي

:-يمة منو يمنة

:-محد نمتي شلون صرتي

:-يعني محد اجانة

:-لا حبيبتي خاف تتحلمين

رفعت ايدي اتلمس بخدي بعددني احس بلمستة على وجهي مستحيل حلم

:-تاكلين شي جبتلج جاهز

بللت شفايفي مستغربة من الموقف امي ابد ماتحب اكل البرة تحب هي تطبخ بيدهه ليش هل مرة جابت

:-لا ما جوعانة اريد انام

رجعت لفلفت روحي بالغطة شوية و سمعت امي فاتت للغرفة كعدتني

:-ملاذ كعدي

:-ها

:-كومي اكلي

:-ما اكدر

:-مو بكيفج

خلت الصينية كدامي سحبتني من الفراش
:-كومي كومي سكتتلج على سالفة الحبوب

اكلت كوة احس بعدني منعسة شوية و امي رجعت فرشت لروحها غمضت عيوني اريد انام ما كدرت نزلت جوة يمها تمددت بحضنهه

:-يوم حضنيني

حضنتني وباست راسي
:-اقري قرأن

بقت تقرة بصوت عالي لحد ما غفيت كعدت الصبح امي ماكو يمي فتحت تلفونها شفتهه دازة رسائل صوتية لصعب من البارحة و قبل لا اتخربط كايلتله علية و هو راد عليهه راح اجي

سديت التلفون و رجعتة لمكانة سحبت تلفوني خابرت علية بسرعة رد علية

:-الو صعب

:-ها بابا

:-انت هنا مو؟

:-وين

:-انت ببغداد

:-لا

:-لاتجذب انت هنا تعال

:-شتردين؟

:-اريد تطلكني ما اريد اشوفك بعد و لا افكر بيك

:-بابا كومي اكلي شي واخذي علاجج

:-وغلات امي علية اذا ما تجي ارجع اشرب مهدئات و امرض روحي تعال

:-شمتحلمة

:-انت مو تريد راحتي؟

:-ملاذ

:-كوول اي لو لااا

جر حسرة و استغفر
:-اي

:-تعال طلكني علعلتني وياك

:-ارتاحي هسه

:-حلفت بغلات امي اذا ما تجي الحبوب عندي اكوم اشربهه و ماعوفهه لحد ما اموت و تخلص مني اكيد امي حجتلك شنو اضرار هل حبوب علية

:-شنو التردينة؟

:-واضحة وياك اريد اتطلك

:-التردينة يجرالج

:-وهسة صعب هسه

:-ميخالف

:-صعب الك نص ساعة تجي !

:-اي

سد الخط و اني كمت من فراشي ادية ترجف ماادري ليش هيج سويت بس احس تعبت ماريد اتعب اكثر صورت الحبوب و دزيتهه اله

:-نص ساعة و اشرب منهم

شاف الرسائل و ما كتب شي بقيت افتر بالغرفة سمعت باب الشارع انفتح طلعت بسرعة شفتة واكف كدامي

.
.
.
.
.
.

.
.للحكاية بقية

كلانا كتف للاخر♥
الوريد♪