رواية أنتقام الصفحه 27 (ترميم) الفصل الحادي وأربعون 41 - بقلم خـلود الـ محسن

INS_lorai_alrwi
تفاعلكم گلبي

…………………………

رفعت راسي اباوعلة
:-راح تضل مو

سحبني لحضنة اكثر رفعت راسي اباوعلة
:-متحجي

:-تكومين نسبح؟

:-لا اني اروح وحدي

:-ليش غرفتج بدون ساعة؟

:-ماكدر اسمع صوتهه عوف الساعة كلي راح تضل وياي

خلة ايدة على وجهي يحرك اصابعة الابهام على خدي بلل شفايفة و جر حسرة
:-راح تضل؟

:-الله كريم كومي هسة بس لا تسألين شي يتعبج اكثر

:-بس اني تعبانة صعب تعبانة هواي

حجيت هيج و نزلت راسي مااكدر اكمل
ضميت راسي بركبتة و دموعي تنزل

:-لاتروح حباب

:-هسة انة مو يمج كافي

رفع راسي و خلة ايدة جواية رفع نفسة يباوعلي
:-لا تبجين كافي

مسحت عيوني و ابتسمت
:-شوف ما ابجي يلة اني مو كتلك راح أأذيك جذابة اني أذيت روحي

:-جؤ مااريدج توصلين لهل مرحلة بعد

:-مو بيدي صعب

:-اشش لا تحجين هيج عرفتج ملاذ القوية ليش تخلين امج تبجي عليج ليش تتعبيني ملاذ

:-جؤ جا شوف اكلك

:-ها

:-شوف اريد ملابسي

ضحك و دار وجهه يتلفت بالغرفة

:-وينهن؟

:-ماادري انت شوف ماادريي

:-اني شبية؟

:-شبيك ملابسي شوف من جهتك

:-كومي انت شوفيهن

:-صصععب شبيك

:-اشش اشش ولج صوتج

:-باوع انطيني ملابسي لا هسة اروح لامي اكلهه شسويت
ضحك و عاض شفتة الجوة

:-ليش امج ما تسوي هيج جا انت منين اجيتي

رفعت ايدي لزمت اذنة و سحبته علية
:-لاتحجي على امميي

سحب نفسة مني و رفع ايدة يمسح بأذنة
:-اذني كطمتيهه

:-يلة انطينيي ملابسيي

:-ليش نزعتيهن ماتستحين

:-تراا انتت هذاا شبيك يلة

شافني ضجت من صدك سحب البجامة و التشيرت انطانياهم وكعد اخذ بجامتة سحبت الغطة و درت وجهي

:-لا تباوع

:-هي ضلمة

:-معللليك

لبست بسرعة درت وجهي شفتة لابس بجامتة و واكف يباوعلي

:-ها؟

بلع ريكة و كعد على الجرباية سحبني علية
:-جمارة

:-ها

:-اريد احجي وياج عندي حجي هواي احجي الج

:-احجي

:-لا مو هسة راح اسبح و ارجع ننام و بعدين احجيلج

:-يلة روح

:-تعاي شوفي رُفيدة خاف كاعدة

:-انت مو كتلي تدري بيك

:-اي اني صار الي هواي هنا هسة نامت

:-معلية بيك

خلة ايدة بشعرة حركهه عليه و كام يطكطك بركبتة وصل للباب خلة ايدة على المقبض كال

:-خوش بس امج اذا شافتني طالع اسبح راح تعرف شصار هنا

كمت بسرعة من الجرباية وصلت يمة و هو يباوعلي و مبتسم

:-شوف ارجع خل اشوف امي
:-لا حبيبتي ماكو داعي هي شنو غشيمة ماتعرف شراح يصير
:-اااسكت شنوو ماصار شيي وخر يلة

عاف الباب و لزم ايدي سحبني علية حاوطني بأدية رفعت راسي اباوعلة

:-متأكدة؟

:-شنو؟

:-ما صار شي

درت عيوني منة اخفي ابتسامتي رجعت باوعتلة عاكدة حاجبي

:-ما صار شي تتحلم

نزل راسة علية قريب من أذني كال
:-و الشامة بوسط ضهرج؟

رفعت ايدي ادفعة وخر مني يضحك خليت ايدي على مقبض الباب اريد اطلع كال

:-اكلج بعد شنو شفت

درت وجهي علية فاتحة عيوني على وسعهم
رفعت ايدي ادفع بي

:-شبيكك لا تخلينني اندم والله

خلة ايده على حلكي
:-اشش اش صوتج حتى جيرانكم عرفو

وخرت منة فتحت الباب بنتر باوعت للصالة امي متمدده بفراشهه عفت الباب مفتوح و وكفت كدامهه خليت ايدي احركهه كدام وجهه تأكدت نايمة رجعت اركض على اطراف اصابعي فتت من الباب لكيتة لازم تراك و واكف

:-ناايمة ناايمة

:-ها فرحانة جا خل نسوي شوط ثاني؟

قربت منة اضرب بي بطرف ايدي
:-اطيح حضك والله شبيك انتت ما تكلي شبيك

:-اسبح و اشوف منو يطيح حض منو اصبريلي

مشه من يمي و اني بس اضحك وصل للباب باوع للجهة البيهه امي و رجع باوعلي

:-تعاي سبحيني تعبان

دفعتة من زندة
:-لا تصيير سربوت شبيك انت

:-اسبحج هم واطفي الكلوب

:-مارريد شنو لزكة انت

ضحك و دار وجهه طلع من باب الغرفة احس گلبي رجف تخيلتة يطلع و ما يرجع صحت علييه

:-صععب

التفتلي مبتسم
:-روحة

:-خاف راح تروح و تعوفني

اختفت ابتسامتة بلع ريكة و دار وجهه علية
:-لا بابا ما اروح تلفوني و السويج و المحفظة يمج بالغرفة

:-شوف زين راح اباوعلك من الشباك هذا خوش اشوفك اذا رحت

حرك راسة بمعنى اي سد الباب و طلع و اني وخرت البردة

بقيت اباوع من الشباك شفتة وصل للحمام عيوني علية اتخيلة راح يعوفني دار وجهه علية ما اشوف معانية ضلام بقيت واكفة عيوني على الباب مال الحمام ابد ما رفعتهه عنة خاف لحضة ادير وجهي ويطلع

شفتة فتح باب الحمام و رجع فات للصالة ركض فتحت باب الغرفة يمشي على كيفة و يتلفت خاف امي تكعد فات للغرفة لكاني واكفة

:-ها بابا ليش ما طلعتي ملابس

:-طلع الي انت

:-هسة بس انشف

خلة ايده على شعرة يحركهه علية علمود ينشف المي
جان شعرة منكع و ينزل على ركبتة قربت منة مسحت المي على ركبتة مال راسة من جهة ايدي

:-جؤ ولج ترديني ارتكب بيج جريمة هنا انطيني خاولي

ما حجيت شي طلعت من الكنتور و انطيتة نشف شعرة و اني واكفه اباوعلة

كمل وخلة الخاولي على ركبتة فتح الكنتور طلع ملابس الي

:-يلة تعاي تسبحين

:-وين اجي؟

:-انتِ مو مريضة

:-لا

:-لا مريضة خل اسبحج

قربت منة اخذت ملابسي من ايدة
:-ما بية شي

فتحت الباب اضحك علية درت وجهي علية حاضن ادية و يباوعلي بلعت ريكي خايفة احس شي بعيونة اول مرة اشوفة

:-صعب !

:-ها

:-لا تروح حباب ما اتأخر والله

:-روحي بابا منتضرج هنا

اريد افلت مقبض الباب بس گلبي عاصرني رجعت فتت للغرفة اخذت المفتاح من ضهر الباب و الصعب يباوعلي مستغرب

:-شتسوين

:-شوف راح اقفل الباب و اخذ المفتاح وياي علمود اتأكد ما رحت

:-ما اروح وعيونج

:-اي بس ميخالف

سديت الباب و رحت بسرعة للحمام افتح الابوب على كيف خاف امي تفز سبحت بسرعة اتخيل عندة نسخة من المفتاح و يطلع لفيت شعري و طلعت الدنيا ضلام ماادري بيش الساعة فتت بسرعة للصالة فتحت الباب على كيف و درت وجهي اسدة وراية اجاني صوت امي

:-ها ملاذ

درت وجهي مخترعة شفتهه واكفة كدامي و فراشهه فارغ
:-هاا شنو انت مو نايمة

:-شجاي تسوين

:-ها هذاا

درت وجهي اباوع للباب و رجعت اباوعلهه

:-الباب

:-شبي

:-مو مفتوح كلت خل اسدة لان يجيب هوة بارد للبيت

:-هاا و كلتي خل اسبح على الواهس

:-اااي ايي مو استحريت كلش

ضحكت و هزت ايدهه اجت من يمي لزمت مقبض الباب
ذكرت ملابس صعب بالحمام

:-وووين؟

:-يا ولج شنو تحاسبيني للحمام ويين

:-ها لا رجعي نامي باردة عليج

:-دوخري وخري

:-يمة شوفي اوكفي هنا هسة ارجع

:-شبيج ولج

:-عليج العباس اوكفي

عفتهه و رحت ركض للحمام اخذت ملابسنة لفيت ملابسة بملابسي و رجعت لكيت امي لازمة الباب و واكفة

:-يلة فوتي

ضحكت و فتحتلي الطريق
:-امشي يم رجلج يمة

:-هااا ياهو لا اقصد هو نايم من زماان اول ما اجة نام

:-اي صح وركبتج تشهد

لزمت ركبتي مستغربة و امي بس تضحك عافتني و راحت للحمام فتت للبيت خليت الملابس بالغسالة و رجعت فتحت باب الغرفة لكيتة كاعد على طرف الجرباية

:-نعيماََ

:-اكلك عوف نعيماََ شوف خل احجيلك

سديت الباب و كعدت بصفة خلة ايدة على جتفي
:-احجي

:-شوف هو امي شافتني

:-ششافتج؟

دفعت ايدة مني
:-اكلك انت ليش تسوي هيج بركبتي

:-ما ادري اخر مرة هسة روحي طلعي مشط و تعاي

كمت جبتلة مشط و كعدت بالكاع كدامة
نشف شعرب بالخاولي و بقى يمشط بي

:-شعرج صاير خفيف ليش

:-مو يوكع

:-ليش

:-مو اني اذا انقهر شعري يكوم يوكع

:-زين انت ليش تنقهرين

:-من وراك

:-زين تخيلي اني مو بحياتج تخيلي جنت وهم و هسة طلعتي من وهمج

:-مااكدر

سحبت نفسي منة و هو يضفر بشعري خلة ايده على جتفي رجعني لمكاني

:-اريد انام

:-هسة ننام سوة

:-صعب ليش رجعت اذا متريد تضل اني بديت اتعود بدونك

:-تمرضتي انت مو تعودتي

عاف شعري و كعد وراية رجع ضهري على صدرة خلة حنكة على راسي و ايدة حاضني بيهه

:-تحبيني؟

:-لا

:-صيري كد كلمتج

:-انت راح تضل اذا تضل اني احبك

:-زين امحيني من حياتج

:-بس اني محيتك اني ماحبك

:-ليش مارفضتيني؟

بلعت ريكي ماادري شنو هل دوامة الاعيش بيهه سحبت نفسي منة وخر ايدة و بقى بمكانة درت وجهي علية عيوني بعيونة

:-شتريد صعب؟

:-اريد راحتج

:-انت عبالك اني مريضة؟

:-اي ملاذ انت مريضة ليش تأذين روحج و تأذين امج

:-مو مريضة اني بس تعبانة

:-زين شلون يروح التعب منج؟

:-ضل وياي

:-مو ما تحبيني

:-شوف انت بس افهم

ربعت رجلية و كعدت كدامة لزمت ايدة اباوعلة
:-شوف اني مو كتلك احبك خوش لو مو خوش

:-خوش

:-اي وانت ماتحبني خوش لو مو خوش

:-لا مو خوش

:-كول خوش !

:-لا عذريني مو خوش

فلتت ايدة و ضربتة على صدرة
:-شحجي اني تكول اي

:-يلة يابة اي

:-يعني شنو !

:-يعني خوش

:-يعني انت ما تحبني شفت اني جنت اختبرك

ضحك و سحبني من ايدي
:-وين تردين توصلين

:-لا خل احجي صدك شوف لاتباوعلي من احجي

:-جا وين اودي عيوني

عدلت كعدتي رفعت نفسي و خليت ايدي على عيونة
:-شوف صعب اني مو انام و اتحلم بيك و اكعد واشوفك يمي و ماانسى شي كل ما اصفن اذكر من جنة سوة كمت امشي و اتخيل الناس بيك حتى امي ملت مني اني اكرة روحي من اشوفهه متأذية بس مو بيدي

سحب ايدي من عيونة نزلت راسي احس حرارة من وجهي تطلع شكد ما مقهورة من روحي مقهورة على امي
:-لا تبجين امسحي عيونج

:-تعبت والله تعبت انت جاي تحس بية تسمعني من احجي

سحبت ايدة على كلبي
:-شوف شووف شيصير بية لان اشتاقلك شوف شكد اتأذة من احجي بيك

بلع ريكة و خلة عيونة بعيوني رفع ايدة على خدي
:-امج شنو ذنبهه هيج تأذينهه مو اني استاهل اتأذة ليش ما تأذيني من اشوفج ناسيتني راح اتأذة مو انت حلفتي تأذيني

احس اختنكت وخرت ايدة مني و رفعت رجلية خليت وجهي بنصهم ابجي بحركة كاتمة صوتي اخاف لا امي تجي

حضني بدون ما يحجي شي بقيت هواية لحد ما حسيت روحي ارتاحيت رفعت راسي امسح بوجهي

:-امي خلتك ترجع

:-وضعج رجعني

:-مابية شي اني اريد انام

كمت من يمة تمددت بفراشي و سحبت الغطة علية تمدد وراية ضميت وجهي ما اريد اشوفة

:-بابا

:-لاتكولها

:-خليلي مكان اناام

:-معلية بيك نام بجهنم

:-لاحك على جهنم هسة خل انام بالجنة

:-يابة وخرر وخررر غير اكرهك

:-ديلة اني هم

:-انجب انت

:-والله لو ما ادري هرمونات اسمطج على راسج

:-اي مو عبالك بعدني يمك جرب تمد ايدك علية اخلي امي تمحيك من الوجود

:-وجود لو ركوع

:-اصبر لحضة

كعدت درت وجهي متمدد ويباوعلي
:-هل مرة مو حششت بعد لا تعيدهه نصيحة

ضحك و سحبني علية خلة ايدة جواية و سحب الغطة علية

:-احجيلج شي تنامين

:-لا اقرالي قرأن

خلة ايدة على شعري يمشي بيهه و يقرة بصوت ناصي
:-نعستي؟

:-اي

:-راح يأذن تنتضرين نصلي

:-اي انتضرك

ما حجة شي رجع يمشي ايدة على شعري مر ربع ساعة تقريبا و سمعت صوت الاذان خلص الاذان يلة كام صعب و اني بقيت بالفراش

:-كومي

:-ما اصلي

:-ليش؟

:-ما ادري

:-مو جنة نصلي سوة؟

:-اي روح صلي اني هنا انتضرك

:-كومي

:-ماا

:-جؤؤ كومي

لزم ايدي و سحبني من الفراش كمت بداخلي اريد اصلي كارة روحي لان تاركة صلاتي بس ماادري ليش كطعتهه
طلعنة سوة امي بالصالة فارشة سجادتهه و تصلي باوعتلهه و ابتسمت يمكن هي اكثر وحدة مشتاقة تشوفني ارجع ملاذ القديمة

طلعنة سوة برة توضة و بقيت واكفة وراة كمل و وكف على صفحة انتضرني اتوضى كملت باوعتله حاضن ادية ويباوعلي

:-ها

:-يلة نفوت

:-شوف هو هذا مو وكت اذان واحنة سوة خلي ندعي دعوة سوة علمود توصل بنفس الوقت لرب العالمين و يتحققن سوة

ضحك و حركلي راسة بمعنى اي رفعت راسي اباوع للسماء

:-يلة ادععي

شوية ودرت وجهي علية
:-شدعيت؟

:-مايصير احجي

:-امم لعد يلة نفوت

:-تعاي

لزم ايدي وفتنة سوة امي كاعدة تسبح
:-صباح الخير رُفيدة

:-صباح النور هلا يمة

فلتت ايدي من صعب و رحت يمهه كعدت كدامهه و حضنتهه باست راسي

:-شلون صرتي

:-زينة اني

بست ايدهه و كمت للغرفة اعرف امي ماتحب تصلي يم احد رغم بوقت مرضي شكد حاولت وياي اصلي وياهه

طلعت مصلايات انطيتهم لصعب مدهم بالكاع وكفت وراة اصلي احس برودة نزلت لگلبي واني اصلي كعدت منزلة راسب بالكاع

-ربي سامحني اول ما طحت بشدة هملت واجباتي تجاهك اللهي ف انت اعلم بضعف الحال

رفعت راسي اباوع لصعب صلة فرض ثاني بقيت مركزة علية واني على سجادتي

كمل واني منتضرتة دار وجهه علية
:-تقبل الله بابا

:-منا ومنكم

:-كملي صلاة

عكدت حاجبي مستغربة شنو مشافني واني اصلي كام لم السجادة مالتة وباوعلي

:-يلة صار شكد تاركة صلاتج ؟ صلي طلب

:-غير مرة

:-جؤ من اليوم وية كل صلاه تصلين قضاء خوش

:-اي حاضر

خلة المصلاية على الميز و كعد على الجرباية كمت اصلي احس يباوعلي رغم ماجاي اشوفة استغفرت و درت وجهي علية

:-جاي اصلي لاتباوع

:-ياهو مباوع؟

:-احسك تباوع وصلاتي جاي تخرب

:-لا راح ادنك

:-يلة دنك

درت وجهي بديت صلاتي من جديد بداخلي افكر بي يباوعلي استغفرت ورجعت اباوعلة

:-شبيييك انت؟

:-يابة شبية

:-دير وجهك يلة

:-ما اباوع والله غير تصلين شلون اباوع

:-شوف اكعد من ذيج الجهه باوع للحايط

:-مخبل

:-صعب حباب والله ماعرف يلة

دار وجهه كعد من الجهه الثانية يباوع للحايط بقيت واكفة اباوعلة عبالي راح يرجع يباوعلي شفتة ما باوع صليت بسرعة لميت السجادة شفتة داير وجهه

:-كملت

:-عفية

تمدد على الجرباية و فتحلي ايدة خليت المصلاية بمكانهه و رحت يمة

:-صعب

:-همم

:-نعسانة

:-يلة نامي

:-واذا رحت !

:-ما اروح اريد اخذج لمكان

:-وين

:-نامي الصبح اخذج

قربت راسي لصدرة حاوطني بيدة نمت اول مرة ما احلم بنومتي حسيت احد يكعدني فتحت عيوني بنعاس شفت امي فوك راسي باوعت بصفي طفرت مخروعة

:-وووين صعب؟

:-اسم الله شبيج بالمطبخ متانيج

:-شيسوي

:-شبيج يمة

خلت ايدهه على راسي اريد بس اكوم شي بداخلي خايفة يعوفني

:-ما بية شي زينة اني

كمت بسرعة بدون ما اغسل فتت للمطبخ شفتة كاعد يكلب بالتلفون من شافني عافة باوعلي و ابتسم

:-ها صباح الخير

:-شوكت كعدت انت

:-كعدت ويا رُفيدة انت تنبل ما تكومين

لزمت ايدي اهدي بروحي اريد الرجفة تروح منهم طلعت من لمطبخ اسحب نفسي بقوة غسلت برة اباوع على ايدي شلون ترجف

-ملاذ شبيج خل يروح انت مو كلتي اني قوية

من بين كلامي فززني صوتة درت وجهي واكف بالباب
:-شبيج؟

:-ها ما بية شي جاية

سديت المي و رحت وراة امي مسوية النة ريوك كعدنة سوة امي ما تقبل تضل يمنة

صب الجاي مدنك و يحجي
:-ملاذ

:-ها

:-ايدج شبيها

:-ما بية شي لان كعدت من النوم

ما حجة شي خلة الكوب كدامي و كعد يسويلي لفات صغيرة يوكلني بيدة

:-اكل انت

:-هسة اكل اني كملي ورانة طلعة

:-وين

:-كملي و نروح

كملت و هو شال المواعين يغسلهم كعدت اباوعلة

:-رجعهن لمكانهن مو تخليهن

وية ما حجيت فاتت امي شافتني كاعدة و هو يغسل بالمواعين خزرتني كبل درت وجهي

:-يمة هووو كال مو اني كتله خلي اغسلهن ما يقبل

:-لا والله يايوم

كال هيج امي باوعتله بلهفة و هو رجع دنك على السنك سوة روحة يغسل بالماعون

:-كومي ملاذ غسليهن مكان رجلج

:-لا لا اني تعبانة مسوية عملية مايصير اكوم

:-كلشي ما بيج حيل حصاان

باوعت على صعب مو يمنة كمل و نشف ادية
:-يلة ملاذ كومي

بقى واكف بالمطبخ واني طلعت سمعتة كال لامي
:-رُفيدة

:-كول يمة

فتت للغرفة ما ردت اسمع شيحجون بقيت صافنة شأطلع ملابس وين يريد نروح شوية وفات وراية

:-هاي ليش ما بدلتي

:-شلبس يعني وين الطلعة

:-لبسي عباية وجواهه شي طويل

:-طلعلي انت

فتح الكنتور احسة ضايج

طلع ملابس وخلاهم على الجرباية
:-شبيك صعب

:-ها بابا

:-شبيك؟

:-ما بية شي يلة بدلي

اخذ ملابسة من الجنطة مالتة و طلع سديت الباب بدلت ولفيت حجابي طلعنة سوة امي ماشفتهه سد الباب و فتح الي باب السيارة

:-اكلك اذا تضل هيج ضايج ما اطلع وياك

:-ما ضايج

:-امي وين

:-والله مادري كالت مرة هنا تروحلهه

:-اضحك يلة اصعد اذا تضل بطنكورتك ارجع

:-عليمن اضحك

:-جا ما اروح

ضحك مجامله
:-ها هيج؟

صعدت وسديت الباب و هو راح شغل السيارة باقي ساكت

:-شغل اغنية

:-لا من نرجع

:-زين شبيك ضايج لان كلت لامي يوم؟

ما رد علية باوعتلة مركز على الطريق

:-شوف انت مو تحب امي مثل امك الله يرحمهه ف عادي تكلهه يمة لان هي تتمنى هل شي شوف اني مو احبك و احب ابوية و انت تكلي بابا كلش افرحر ما اضوج

:-اي

:-شنو اي

:-هواي حجيتي

:-مو صوجك صوج اليحجي وياك وجهك صاير بطول

:-ديلة شوف ياهو يعيب وهي لو عندي وجهه مااطلع باب الشارع

:-هنيالك ملاذ بجمالهه تطلع وياك ابو الجنانوة

باوعتلة ضحك و دار وجهه
:-انت راح تخطفني

:-اي

:-خوش من نوصل كلي علمود اسوي رد فعل هسة راح انام

جنت تعبانة من صدك احس روحي جاي اعوض ذيج الايام بس اغمض انام رجعت راسي على الكشن و نمت حسيت على صعب يكعدني

:-ولج كومي

فزيت اتلفت
:-هاا هاا

:-وصلنة شبيج

مسحت وجهي استوعب شكو درت وجهي علية مخلي التلفون كدامي

:-شجااي تسوي

:-والله بيج محتوى

سد التلفون و ضمة يضحك
:-جججيب والعباس تمسح شصووورت

:-نزلي دخيل العباس

:-شبيك انت تضحك علللية والله ما انزل انت وين جايبني

:-نزلي بابا نزلي مو تردين تزورين الامام الكاظم

:-والله اجينة اله

:-امم

:-جا امسح التصوير علمود ننزل

:-جؤ نزلي

:-ما انزل

:-خوش راح ارجع

:-ارجع ما انزل اذا ما حذفتة

كبل شغل السيارة
:-شجاي تسوي

:-غير ما تنزلين خل نرجع

:-اهوو اكرهكك انزل

نزل يضحك علية احس بداخلي فرحانة ما زايرة الكاظم من اني و صغيرة لزمت ايدة امشي و اباوع على الناس فرحانة

:-صعب شوف شلون اروح وحدي

:-زوري و اطلعي تلكيني متانيج بمكان ادليج علية

:-جا شلون واذا انت عفتني ورحت

:-وين اروح يمج ما رايح

وصلنة للتفتيش گلبي يمة فتت بسرعة اريد بس اطلع طلعت اباوع على الناس گلبي عصرني ما شفتة اتلفت خايفة

:-جمارة

درت وجهي علية واكف وراية
:-شتدورين

:-شبيك عبالي عفتني

:-ولج شبيج كتلج ما اعوفج

لزم ايدي وكفني بمكان و راح سلم تلفونة فتنة جوة دلاني على مكان انتضرة بي فتت وية الناس ما اندل شي اول ما فتت احس برودة لفحت روحي

زرت و كعدت بالحضرة اباوع للناس هذا الي يباوع من بعيد و يبجي و هذا الي متمسك بلامام ما بودة يعوفة معقولة كل واحد بينة شايل هم بكد الجبال خليت تربة وصليت دنكت راسي اريد افرغ كل همومي بالحضرة

:-يارب اذا مالي نصيب بهل درب لا تخليني اتأذة و ابعدني عنة يارب لاتكسر امي بية و اذا الي نصيب وية الصعب خلينة نعيش سوة طول العمر يارب راحتي وياة لاتكسر گلب عبدك

دموعي تنزل بدون ارادة بس اشوف الناس تلقائيا ابجي مديت ايدي اشيل التربة واجت وحدة تطش جكليت وكعت جكليتة بحضني نسوان واكفات يمي وحدهم منهم كالت

:-انطاج مرادج

باوعتلهه عيوني مليانة دموع ابتسمت بوجهه مرة جبيرهه وجهه بشوش كالت

:-وعلى نياتكم ترزقون

بست التربة و كمت من دخلت للامام جانت روحي محملة هموم و من طلعت احس روحي مثل الريشة

اريد بس اوصل للصعب لازمة الجكليتة بيدي و اباوع على الناس شفتة واكف من بعيد ركضت بين الناس احس روحي ما اشوف غيرة وصلت يمة لزم ايدي

:-ها بابا زرتي

:-اااي ايي كلش فرحانة

:-زيارة مقبولة

:-صصععب شووف

فتحت الجكليتة ايدي ترجف من الفرحة لزم ايدي
:-شبيج لاترجفين

:-لا لا مو مريضة والله فرحانة

فتحت الجكليتة قسمتهه بالنص
:-شوف اكل هذا لان كالو راح ينطيني مرادي والله هي المرة كالت

وكلتة بيدي اباوعلة بفرحة
:-نطلع لو عاجبج نضل؟

:-لا يلة خل نروح

لازم ايدي و يمشي بين الناس عيوني علية ما اباوع بالطريق شي بداخلي متأكد راح يضل وياي ماعرف هل شعور ليش اجاني وكف اشتره حلويات و كل شوي يشوفني شي علمود اخذة

كام يشتري بكيفة
:-صعب

:-ها

:-اني هوااي حيل هواي احبك

عصر ايدي بين ادية دار وجهه على جهة الامام

:-والكاظمين الغيض ماخذ عهد على كلبي ما تدخله وحده غيرج

:-يصير هنا احضنك؟

ضحك و سحبني علية
:-ههه لا

:-شوف احبك احبك والله شبيك

:-اني جايبج للامام يصحيج شو تخبلتي علية

:-هههه والله فرحانة

:-اليوم اخليج تزوعين فرحة

:-صدك يعني ما راح ترجعني للبيت

:-جؤ

وصلنة للسيارة خلة العلاليك ورة و اني صعدت كدام انطاني كرزات كعدت اكل و اباوعلة

:-اوكلك؟

:-اي

:-مو عندك ادين؟

:-ياطلابة جاي اسوق

:-اي اني جاي اكل معلية بيك

بقى ساكت خليت كدامة
:-اكل يله

:-مااريد

شلت بيدي و وكلتة
:-يلة يلة اني دوم اضل حايرة بيك ابني ما اعتني بي هلكد

:-اي شلونهم التوم

:-لا راحو ويه ذاك بيتنة بعد ماكو جهال

ضحك و دار وجهه
:-اكلك وين رايحين ما كتلي؟

:-قريب من بيتكم نكمل شغلة وراهه اخذج لمكان ثاني

:-شنسوي

:-اكلج نامي من نوصل اكعدج

:-هسة اني شكلت شغل اغنية يله

طلع تلفونة يكلب بي صحت علية
:-مووو في وحدتي

:-لا راح اسمعج وحدة كل ما اسمعهه عيونج تجي ببالي
شغل اغنية
-نضراتك تحرجني

:-ها يعني نضراتي تحرجك؟

:-امم غير عيونج انة شعندي

:-عندك برطومة

:-ههه شذكرج

:-ما انسى شي صار ويانة

اني اكل و هو يكلب بلاغاني وصلنة كدام روضة
:-شنو هاي

:-نزلي يلة

:-انزع العباة؟

:-اي

نزل كدامي واني مستغربة شجايبنة لهنا لزم ايدي وفات جوة سلم و المديرة ماعرف مدرسة تلكتة اليكلك عبالك سنين تعرفة كعدنة واني يمة بس صافنة

:-ست هاي زوجتي ملاذ حجيتلج عنهه

:-هلا بنيتي نورتينة

:-هلو

صاحت بصوت عالي
:-ام حسن جااي

الصعب:-ست احنة مستعجلين لازم نروح اجيت ادلي ملاذ على الروضة ان شاء الله من باجر تبدي وياكم
بقيت صافنة عليه شنو ابدي من باجر سلم و طلع

:-صعب شنو؟

:-شنو تردين تكضين وكتج كلة بالبيت لكيتلج مكان مرتب تشتغلين بي

:-بس شلون اني ما مكملة دراسة

:-معليج كل التسوينة ترحين ب 9 الصبح ترجعين ب 2 الضهر خوش

:-اي

رجع يفرفر بينة بالسيارة نزلنة كدام مطعم
:-صعب ماريد انزل بمطعم خل ناكل بالسيارة

:-جؤ انزلي شوفي العالم

نزلنة سوة كعدنة بزاوية طلب اكل وكعد مقابيلي رفعت ايدي على الطاولة لزم ادية وسحبهم علية

:-متونسة؟

:-اي هواي

سحب ايدي و باسهم
:-جؤؤ منا الناس

:-انتِ كل الناس شعلينة بيهم؟

:-اكلك خل اسألك شي

:-كولي

:-شوف انت ليش تسوي هيج لان عبالك اني مريضة؟

:- ليش اني اول مرة اسويلج هيج

:-زين شوف انت تريد تروح و هيج تسوي

:-خلي نعيش لحضة بالحضتهه لاتفكرين بشي

:-شوف

:-لا ما اريد اشوف

:-لا بس خل اكلك شوف ذيج البنية شكو تباوع علينة؟

:-وينهه

كال هيج ودار وجهه يباوع عليهن مجموعة كاعدات سوة وحدة منهم بس تباوع علينة

:-نزل راسك بسرعة

:-خل نوشف النعمة شبيج

:-خوش شوف النعمة

فلتت ايدي منة اريد اكوم سحبني قوي
:-وين ولج وين

:-شوف النعمة براحتك اني بيش الكيلو وخر ايدك مني

:-اقصد انت النعمة ما فهمتي

:-شوف والعباس اخزيك هنا

:-بابا يجوز مشبهات علينة و باوعن ما يصير

:-لاا ما يصير خوش

:-بكيفج يلة ما يصير

خليتة يباوع لكل الجهات اله ذيج الجهه ما يباوعلهه كملنة غدة و اني على اعصابي لحد ما شفتهم طلعوا يلة رد الدم بية كمنة سوة فات غسل و اني فتت غسلت  عدلت حجابي ورجعت

دفع الحساب كل الوقت لازم ايدي و يمشي و احنة نطلع كال

:-ملاذ

:-ها

:-خلي شي ببالج انت وياي مو وياي ما اشوف غيرج ماريد تغارين من وحدة

:-بس انت باوعت من كتلك

:-وهيج انة بس ارفع راسي عليهه احبهه ملاذ سنين عشت ماحبيت وحدة تردين ورة ما گلبي طاح بيج يحب اي وحدة يشوفهه

:-مو انت تكلي مو حلوة هسة يكولون شلون متزوج وحدة مو حلوة

:-هو لو بيدي اضمج من الناس لو بيدي هاي عيونج اغمضهه وامشيج علمود محد يشوفهه

:-اي خوش
صعدنة بالسيارة شغلت اغاني

:-صعب

:-همم

:-خابر امي

:-دزتلي رسالة كبل ربع ساعة تسأل عليج كتلهه زينة

:-زين باوع اكلك

:-كولي

:-اريد تلفوني القديم يمك بي صور احبهه

:-ميخالف

رجعت راسي على الكشن شغلت روحي بكلشي اريد اوهم روحي ما جاي يعاملني هيج علمود يروح اكيد يريد يعوضني الايام الفاتت

:-اكلك

:-كولي

:-تدري اذا هاي رجعتك راح تعوفني وراهه بوكتهه ما راح اسامحك ابد راح تشوف غير ملاذ

ما حجة شي درت وجهي علية ييباوع للطريق

:-احجي صدك صعب راح اتغير هواي

:-انة شكلت مو كلت ما نحجي بأي موضوع

:-بس ردت احذرك هاي رجعتك اذا اذتني بعدين راح امحي صعب من حياتي و اول شي تسوي تطلكني

احجي بس ما يرد علية طفة الاغاني مشينة هواية بالسيارة بدة يصير غروب وكفنة بشارع

:-وين احنة

:-تنزلين

:-اي

نزلت واكفين على جسر سيارات قليل تفوت وناس قليلة موجودة لزم ايدي وكفنة بنهاية الجسر ما نحجي شي بس نباوع على الجو جان يخبل

باوعت على طفل يركض و ابوة يمشي وراه لزمت ايد صعب

:-شوف شكد حلو

:-اي

:-شبيك انت؟

:-ملاذ

:-ها

:-شلون انساج انة؟

:-انت ليش تحجي هيج انت مو كلت ما نحجي

حرك راسة بمعنى اي سحبني لحضنة ولف ايدة على ضهري

:-ملاذي كلنة نغلط و كلنة نسوي شي بس علمود نرضي نفسنة بس بالمقابل راح نحس بذنب راح نتأذة هواي

:-ليش تحجي هيج

وخرني من حضنة يباوع بعيوني
:-شيطلعهن من خيالي؟

بلل شفايفة و دار وجهه لزم ايدي نمشي سوة محد بينة يحجي من بدت تبرد كال

:-نرجع؟

:-اي تعبت

ما جنت تعبانة بس حسيتة ضاج ما ردت نضل بهل مكان اكثر اول ما اجينة اله كام يحجي اشياء تخوفني صعدنة بالسيارة رجعت راسي على الكشن اباوع على الشارع

:-صعب اذن؟

:-اي

سحبت محفظتة مخليهه كدام فتحتهه شفت الصورة بعدهه ابتسمت و باوعتله

:-ليش ما تشيلهه

:-الصورة؟

:-اي

:-شلون اشيلها وهي افرض من هويتي؟

:-انت صاير حباب كلش

:-ليش انة جنت مو حباب

سديت المحفظة كلت بسرعة
:-لا بأخر فترة انجلبت

كبل خفف السرعة درت وجهي علية
:-ها

بس تذكرت شكلت صفنت شوية يباوعلي رافع حاجبة -ششوف مو انتت لا اقصد علية بس انت ما فهمتني

:-انت ينرادلج گرصة اذن

:-گرصة لو صمونة اضحك لاتضوج شبيكك

حسيت بي كوة لازم روحة ما يلطشني بالكاع

وصلنة للبيت فتت ركض و هو فات وراية شايل الاغراض
لكيت امي بالصالة محضرة سجادتهه حضنتهه

:-مشتاااقتلج

حضنتني تضحك
:-شعجب ذكرتينني

:-والله كلت لصعب يخابرج اسألي

فات من الباب كالها
:-لا رُفيدة تجذب

:-والله يمة معليج بي شوفي زرنة الامام يخبل وهناك طاحت جكليتة بحضني و اني جنت اصلي وكلولي انطاج مرادج و اني قسمتهه بينة اني و صعب

باست راسي وعيونهه بيهن لمعة وهي تباوعلي
:-ان شاء الله يمة

عفتهم بالصالة و فتت للغرفة طلعت ملابس لصعب و الي بدلت و طلعت توضيت شفت صعب كاعد يم امي بالصالة ينضف بالخضرة

:-ما تصلي؟

:-اي كايم

:-حضرتلك ملابس اذا تريد تبدل

فتت للغرفة صليت جاي اشيل السجادة فات
:-عوفيهه اصلي عليهه

عفتهه و تمددت بالفراش احس رجلية تعبانة كد ما فرفرنة

يصلي و عيوني علية كمل و باوعلي
:-صليتي الطلب؟

:-اي والله

:-تقبل الله

كمل و شال السجادة اخذ ملابسة
:-وين؟

:-اسبح

:-خوش راح انتضرك بالساحة

طلع يسبح و اني كعدت برة منتضرتة يكمل و لازمة الخاولي بيدي فززني صوت امي

:-شعندج هنا

درت وجهي عليه احس الفرحة بعيونهه
:-منتضرة صعب

:-كملوا و تعالو تعشو

:-اي

كمل و فتنة تعشينة سوة شلت المواعين و اني و صعب غسلناهم هو يغسل و اني اعزلهن فرشت لامي و فتت للغرفة مشطت شعري و رتبتة اجة صعب سد الباب و فات وكف وراية

:-شجاي تسوين

:-امشط

:-جيبي مكراضة و تعاي

رجعت لمشط واخذت مكراضة من الميز كعدت كدام على الجرباية كص اضافري و خلاهم على الميز تمدد و فتحلي ايدة

:-صعب

:-همم

:-تدري هذا احلى يوم بحياتي

:-اريد كل ايامج هيج تخلينهن ما اريد ضوجة تمر على عيونج

:-بس

:-اشش ماريد بس شوفي من باجر تبدين تداومين بالروضة عينج بدربج ترحين و ترجعين مثل الدودة لا تلتقين بأحد و لا تحجين ويا احد و اهم شي ماريد نسوان كبار يشوفنج

:-بس هيج

:-لبسج مو شلح مثل ذاك الفستان شكد وصيت ولبستيلي شلو بلو

:-حاضر

:-عفية و لا تخلين هاي الالوان على وجهج

:-صار

بقى يلعب بشعري و كل شوي يذكر شي يكولة لحد ما غفيت كعدني الصبح من شفتة موجود احس ارتاحيت

:-شنو ما ناوية تكعدين

:-بيش الساعة

:-تحضري هم يالله علمود اوصلج و تندلين الطريق علمود تتعلمين

كمت من الفراش كلي واهس
غسلت و حضرت الريوم بمكان امي تريكنة و صعب غسل المواعين على ما ابدل

تحضرت و طلعنة مو كلش بعيدة علينة حفظت الطريق من اول مرة اول يوم جان عادي بس يفهموني على الشغل

يحجن وياي واني بالي يم صعب كل شوي اسأل وحدة بيش الساعة لحد ما انتهى الدوام روحي طلعت باوعت بالشارع عبالي الكاة جاي رجعت وحدي فتت للبيت هدوء سمعت صوت بالمطبخ فتحت باب الغرفة شمرت اغراضي و صحت

:-رُفيدةة صععب وينكم

:-ها يمة

من سمعت صوتهه ابتسمت نزعت حجابي خليت الدنبوس على الميز باوعت علية وجعني گلبي من شفت

.
.
.
.
.
.للحكاية بقية

كلانا كتف للاخر♥
الوريد♪