رواية أنتقام الصفحه 27 (ترميم) الفصل الحادي وثلاثون 31 - بقلم خـلود الـ محسن

الكاتبة لورا
°°°°°°°°°°°
للتواصل انستا lorai_alrwi
°°°°°°°°°°°
تفاعلكم على البارت حلواتي
°°°°°°°°°°°
قرأة ممتعة

باوعت لشهاب كتله
:-منو هذا؟

قرب يمي و الرجال وياة شكلة كله هيبة صارو كدامي
باوع شهاب للرجال و اشر عليه

:-هاي ملاذ

رجع باوعلي و اشر على الرجال
:-هذا هادي العلم

ضحك الرجال و ضربة على جتفة
:-لك انة مو هيج ربيتك

ابتسمت على تصرفاتهم
باوعلي ابو شهاب

:-هلا عمي ملاذ شلونج

:-الحمد لله تفضل عمو كعدو

شهاب:-يابة يمكن احنة مخربطين بالشقة هاي مو ملاذ
عكدت حاجبي مستغربة و ابوة باوعلة بأستفهام

مـلاذ:-لا والله اني ملاذ

شهاب:-هههه عبالي مبدلينج و لا عرفتج لسان الرشاشة مختفي

خزرتة اريدة يسكت صاح
:-تفضل بوية تفضل البيت بيتنة و كلهه لا تستحي منك و كل شوية تخزرني

ابو شهاب:-شهاب اطلع برة اني و زوجة ابني انت شعندك هنا

ابتسمت اله اول ما اجة حسيتة قريب مني طريقة كلامة تجبر الواحد يحبة تقدم كعد على التخم كعدت كدامة و شهاب كعد بصف ابوة

ابو شهاب:-اي عمو ملاذ اني هادي عم الصعب و تكدرين تكولين مثل ابوة

:-هلا بيك عمو

:-شلون ماخذة راحتج وية ولدي و تشوفين شهاب مثل اخوج انة اعتبريني مثلهم لا تتقيدين و تستحين مني

حركت راسي بمعنى اي شابكة ادية ببعض اعصر بيهم متوترة ما اعرف احجي ويه شخص اول مرة اشوفه بقى شهاب يحجي ويضحك و ابوة كل ما يحجي شي يباوعلي يريدني اضحك و اتفاعل وياهم

شهاب:-هادي لا يغرك شكلهه البريئ ترة و العباس اذا حجت ما يسكتهه الا ابو حزامين

باوعت على شهاب مصدومة
ملاذ:-ياااا جذب عموو لا تصدك بي

ابو شهاب:-اعرفج عمو اعرفج اكثر من شهاب

باوع على شهاب كال
:-كوم جيب شي من برة ضيفنة

شهاب:-لا ملاذ ام البيت مو اني اضيف

:-انجب غير هي اختك كوم يلة

شهاب:-اني منين اتلكاهه من هادي من ملاذ من صعب

:-كوم لك

كام شهاب يدردم بقينة ساكتين لما سمعت باب الشقة نسد بقيت مدنكة متوترة ما اعرف اتصرف

ابو شهاب:-بابا ملاذ

رفعت راسي ابتسمت بوجهه
اجاني احساس غريب من كالي بابا حسيته ابوية من صدك

:-شلونة الصعب وياج!

ابتسمت متوترة
:-ها زين

:-خو ما مضوجج ترة ما ارضه عليج بنيتيي انتِ

بللت شفايفي كوة مسيطرة على دمعتي متنزل على هل حجاية السمعتهه احس شايل حنية الكون كلة يمكن لان ما حسيت بهيج حنية بعد ابوية اتأثر بأي شي اسمعة

:-الله يحفظك عمو صعب حباب والله ابد ما يضوجني

:-و انتِ شلونج وياة

:-ها

:-خو ما متعبتة هو هم وليدي والما ارضاهه عليج ما ارضاهه عليه

ابتسمت تذكرت شكد انكد علية
:-هاا لا عمو ما مسويتلة شي

رجع ارتكة على التخم و الابتسامة ماليه وجهه اباوعلة و انزل خجلانة منه

:-نريد حفيد بوية

رفعت راسي اباوعلة مصدومة
:-منين !

ضحك بصوت عالي
:-ههه منكم بابا منين

:-ها لا احنة ما نريد جهال

بقى ساكت و اني ادير بعيوني اتلافة نضراتة الي احسة عندة كلام بس ما يكدر يحجي رفعت راسي علية شفتة يباوعلي

:-عمو تريد تحجي شي

:-اي عمو عندي هواي حجي

:-كول

:-انة مثل والدج لا تستحين مني

:-تسلم عمو و نعم منك

:-شهاب حجالي عنج هواي

:-شنو

كام من مكانة كعد بصفي باوعلتة
:-حجة بالخير عنج لا تخافين و انة هواي سألت عنج و عن امج لان من زمان انة ما شفت امج

:-اي

:-اعرف شنو سالفة زواجكم انت و صعب جان اتفاق

:-ها لا

:-مو جاي اكلج انة مثل ابوج ليش تستحين

دنكت راسي كل ما يحجي كلمة يخجلني شكد انسان طيب

:-اي عمو لان امي ما عدهه احد

:-ملاذ بابا صعب هم مالة احد

بلعت ريكي
:-ها

:-لا تضلين حجاية و الثانية ها شوفي عمو من انت اجيتي هنا و لليوم صعب هواي تغير

:-يعني شلون تغير

:-تغير للاحسن انة گلب ابو و حافظ ابني اشوف عيونه شلون تلمع من نحجي بيج و ابتسامتة الما تفارك وجهه اتمناكم تضلون سوة

:-هو ما يريد

:-يعني انت تردينة؟

توترت من سؤالة حجيت بسرعة
:-لا عموو هو بس اني يعني شوف عمو

سكتت و باوعتلة مبتسم على كلامي
:-شبيج بابا اعتبريني الصعب و لا تستحين مني

:-عمو هو اذا يريدني عادي ما عندي مشكلة

:- بس يحبج هو

:-لا هو كال ما يحبني

:-بس مو كل الينحجي صح يا بابا

:-شسوي اني

:-لا تخلينة يخسرج جاي اشوف وجودج يرمم ابني

:-بس امي من ترجع احنة كلمن يروح بطريقة

:-تكدرين بدونة؟

دنكت راسي العب بأصابيعي متوترة هل سؤال ينغز بگلبي لا مستحيل اكدر بدونة صعب جزء مني صار

:-جاوبي بابا تكدرين

هزييت راسي بنفي
:-جا شلون راح تنهون كلشي بينكم؟

:-عمو شوف اني حتى شهاب حجة وياية والله يا عمو اني ما بيدي شي يعني شنو الاكدر اسوي هواية حاولت وية صعب ردتة بس يتغير و اكثر من مرة اسألة اذا
يحبني لو لا بس هو يكول لا بعد شنو بيدي اكثر من هيج

:-بس انتِ الشخص الوحيد الي خلة صعب يبدي يتعالج و هواي خليتي صعب يسوي شغلات جان رافضهه لهذا تكدرين تكونين الشخص الوحيد الي يغير مسار حياتة

:-عمو انت شنو الي تعرفة عن صعب اني ما اكدر اسوي شي اذا ما اعرف صعب شيريد يسوي بالضبط

:-شحجالج شهاب انة اعرفة غير هيج ما اعرف شي

:-صعب بالاشهر الاختفى عنكم وين راح!

ابتعد حاضن ادية لصدرة و مركز عيونة بية
:-ما اعرف وين

:-ليش تردوني اني الاغير صعب و انتم ما جاي تنطوني معلومة عنه و لا هو الي رايدني عمو اني هواي حاولت وياة و رغم احس بحبة الي بس رفضة كدامي خلاني اتراجع من عندة

:-الله كريم بابا انة ما اريد اضغط عليج للحضة نسيت الصعب مستحيل يتغير جنت متمسك بطرف خيط عبالي يغير ابني بس كلنة ما نكدر نسوي شي

:-عمو صعب مستحيل يورط روحة هو ذكي و يعرف يتصرف

:-يعرف يتصرف الا بموضوع الماضي باني افكار براسة من الصغر

:-زين عمو سؤال

:-كولي

:-ابو الصعب شلون مات

رفع راسة عاكد حاجبة كأنما السؤال صدمة الة جاوبني بأرتباك

:-حادث جان حادث سير و انتقل لرحمة ربج

:-شلون؟

:-سيارة ضربت سيارتة

:-ومنهه مات؟

بقى صافن علية ما يحجي شي كام يطكك بأصابعة دنك راسة

:-اي

باوعت للساعة شهاب تأخر

:-عمو شهاب وين

:-هسه يجي

شوية و فات شهاب احسهم متفقين يتأخر علمود ابوة يحجي وياي شفتة فات للمطبخ باوعت على ابوة يكلب بالتلفون كمت من يمة

:-عمو من رخصتك شوية و اجي

:-براحتج بابا

رحت ركض للمطبخ شهاب يحضر بالمواعين شافني فتت عاف البيدة و كعد على الكرسي

شهاب:-تعاي حضريهن تعبتوني

:-ليش تأخرت متفقين علمود ابوك يحجي وياي؟

:-جؤ

كال هيج و رجع يحضر بالصينية
:-لا تجذب تدري بية استحي ليش تعوفني اجفص كدامة

:-لا تستحين من هادي هذا دولة و علم استحي من عدنة و منة لا

:-اكلك اسكت وين الصعب

:-بالشغل للخمسة هيج يجي

:-و انت ليش اجيت وهو ما اجة

:-اخذت اجازة علمود اجيب ابوي

كعدت على الكاونتر اخذت بسكت من الماعون و شهاب فاتح تلفونة يباوع بي و يغسل كلاصات سمعت واحد حمحم ثنينة باوعنة على الباب فات ابو شهاب من المستحة طفرت من فوك الكاونتر و شهاب سد تلفونة

:-على كيفج بابا

:-ها عمو تريد شي اجيبلك شي

:-لا سلامتج

وكف بصفي و اخذ بسكتة من الصحن بقى داير وجهه على الكاونتر و شهاب صاير بضهره كال

:-شهاب اني مو مانعك من سالفة تشتغل و تشيل التلفون

باوعت لشهاب يخرط بخدودة على كيف
ملاذ:-يا عمو هاي كل يومية هيج يسوي

رجعت باوعتلة غمني و بقي يسويلي بيدة حركة عود يتحلفلي

ابو شهاب:-اي بابا ملاذ و بعد شنو يسوي

:-بلة عمو كلي انت من شنو مانعة

:-هواي مثلا علاقتة بعلي شلونهه

:-علي انت تريدهم سوة لو مو سوة

:-لا ماريد علاقتهم تقوة لان واحد يأثر على شغل الثاني و يضلون يشتغلون سوة و يخربون الدنيا

:-عمو النهار كلة سوة بس صعب مو وياهم

باوع على شهاب مبتسم رجع باوعلي
:-اي بابا و بعد

:-يصاحبون بنات بس هم صعب مو وياهم كل يومية يحجي وية عشرة هيج

شهاب:-وابو حزامين تجذب ببوية لا تصدكهه

:-ها عمو صدك و يسميك كلة هادي اني قبل عبالي
صديقهم نوب نصدمت من عرفتك ابوة

شهاب:-ملاذ لا تجذبين شكبرج تصيرين بعد

:-ها عمو صح و يغلط على صعب و يجذب

:-دهر لفج ولج الجذابة ام لسان

:-شوف عمو كول مجذبة هاي كدامك

بقى يضحك على كلامنة بقينة اني و شهاب واحد يذب سالفة على الثاني كعدنة سوة بالمطبخ ابد ما حسسوني غريبة عنهم ساعة و كام ابو شهاب

:-يلة عمو احنة نترخص سلميلي على صعبي ما شفتة

:-عمو بعد وكت وين رايح

:-والله شغل بس كلت اتفرغ علمود اشوف بنيتي و انة مقصر وياج

طلع شهاب و بقى ابو يمي قبل لا يروح باوعلي كال
:-عمو ما اوصيج بالصعب

ابتسمت و حركت راسي بقبول
طلع فلوس من جيبة و خلاهم على الميز

:-هاي مالت عرسكم ولو متأخر بس عذريني

:-لا عموو شنو هاي والله ما اخذ

:-جؤ انة ابوج شنو ترديني

:-لا عمو مو اردك بس والله ما اكدر اخذ و صعب يجوز ما يقبل واصل شكرا الك

:-شنو ما يقبل هي بكيفة انة ابوج صعب يولي

:-عمو والله صعبة اخذ اعذرني

:-راح تزعليني منج شنو هل حجي بابا

بقيت ساكتة استحيت اردة اكثر
سلم علية و طلعو شهاب يقفل الشقة من برة

رجعت للصالة تذكرت كلامة شكد انسان حنون معقولة هذا واحد من اعمام صعب مستحيل زين يعرف بموضوع الورقة لو لا الف فكرة و فكرة اجت براسي

رحت للغرفة تلفلفت بالفراش ما ادري بروحي غفيت حسيت على نفس برگبتي فزيت مرعوبة من خوفتي صحت

:-عوفووني والله ماعرف احد

:-اش بابا اسم الله شبيج

درت وجهي صار صعب كدامي محتضني بأيدة
:-شوكت اجيت

:-صار هواي و هسه اجيت اكعدج لان صار هواي نايمة الساعه صارت ب 8

:-شنوو اني شكد نايمة ليش مكعدتني

:-شفتج تعبانة

خليت ايدي على ايدة اريد اسحبهه مني و اكوم ثبتهه اكثر باوعتلة

:-ها وخر اريد اكوم

:-مشتاقلج اليوم كلة ما شايفج

:-وخر اني ما مشتاقتلك

:-امممم صدك

كال هيج و رفع نفسه متمدد بصفي بس ايدة عليه
:-اي و ليش تتأخر

:-شغل

:-و الدكتور صعب شوكت تروح اله كل يوم شغل و تالي؟

:-انت علاجي الدكتور يولي

:-دوخر يلة اريد اكوم

:-مشتاقلج ابقي شوية عندي سالفة الج

:-صدك شنو

رجع خلة راسة على المخدة و سحبني علية وخر شعري من وجهي

:-يلة احجي شنو السالفة

:-اي بابا السالفة تكول

:-اي شتكول

:-نسيتهه

:-صدك تحجي

:-لا اشاقة جيبتلج خط مو مشتاقة لامج

:-صدك اي والله مشتاقتلهه

:-اي بس باجر راسليهه اليوم احس مشتاقلج اريد اكابلج و اكعد

:-شكو اليوم

وخر من يمي كعد يلعب بشعرة
:-ماكو شي بابا نطلع نجيب عشة و نرجع

:-لا اني اليوم طابخة

:-يعني اليوم نبات بالمستشفى

ضربتة على ايدة
:-ما عاجبك لا تاكل خوش

:-لا عمي عاجبني ونص

:-روح للمطبخ هسه اجي بس ابدل

:-ابقى يمج ما اباوع

:-اهوو امشي

:-يابة شكد عايقة

:-صعععب

:-رايح رايح

راح قفلت الباب بدلت و لميت شعري طلعت لكيتة كاعد بالمطبخ يسوي بتلفوني

:-ها شجاي تسوي

:-خليت الخط بجهازج

:-تمام

حميت الاكل و هو كام حضر المواعين

:-اليوم شعجب طابخة

:-من الملل

:-اليوم شصار من رحت

:-اجو شهاب و عمو علينة

:-امم شكالو

:-هيج حجي عادي و عمو نطاني فلوس كال مالت زواجكم اني مقبلت اخذهم بس هو اصر

:-عادي بعد شحجيتو

:-ماحجينة شي بس كال دير بالج على زوجج

:-اممم زين و من راح شهاب من يمكم شحجيتو حجيتو بيه لو لا؟

:-شمعرفك بشهاب راح؟

:-ادري

:-لا ما حجينة بيك هو بس كلي دير بالج علية و جان يريد يشوفني لان ما شايفني

:-امم

كام هو يصب
:-روحي جيبي مي و انة اصب

جبت مي و كعدنة ناكل كل ما ارفع راسي الكاة يباوعلي

:-يابة شبيك انت شتريد تباوع

:-معجب

كلبت عيوني و عيبت علية
:-ننننن معجب

ضحك بصوت عالي و كام يغسل
:-عاشت ايدج بابا

:-بالعافية

غسلت و هو شال المواعين غسلهن وكفت يمة مخلية ادية على الكاونتر مثبته نفسي بيهن

:-اكلك باجر نروح للدكتور موو

:-مو اكلج انت علاجي ليش ما تصدكين

:-منو كالك اني حبة بندول غلطان ترة اني ملاذ

:-لا مو ملاذ انتِ جمارتي ملاذي

:-خوش هسه شنو

:-لا باجر اريد احلق صاير عندي لحية مو حلوة

صرت كدامة حجيت بحماس
:-اااني اسويهه الك

:-صدك خاف تخربيني

:-لا يلة كمل اني اسويهه الك

:-لا شمورطني

:-معليك والله اني جنت اسوي لحية بابا بس جيب مكينة حلاقة

:-خوش

كمل و اني رحت للغرفة شغلت بيهه مبخرة اجة صعب جايب اغراض الحلاقة كعد بالكاع

:-يلة ملاذ للثلاثة اذا ما اجيتي ما اخليج تسوين لحيتي

:-جاية

طفيت المبخرة و كعدت كدامة مرتكي على الجرباية اخذت الغراض من ايدة كل شوية يكول

:-واذا خربتي وجههي

:-عود انطيك وجهي ولا يهمك

:-شورطني انة شورطني

:-اكلك مدد رجليك

مددهم كمت كعدت على رجلية
:-هااا سالمين كومي

:-اوي غير انت شطولك ما الوح

:-عوفي اني اسويهه

:-معلية والله اليوم لو اني لو لحيتك

بقة يضحك تربعت على رجلية كل شوية يصيح بية
لزمت فكة بايدي مثبتة و ملتهية اسوي بلحيتة رفعت راسي شفتة يباوعلي

:-ها شكو

:-تخيلت اني بنية و لازمتني تردين تبوسيني غيري هاي الحركة

وخرت ايدي بسرعة و ضربتة راشدي
:-اخخ بنت الحلوو ليش هيج

:-علمود بعد ما تتخيل تبطل تخيلاتك الخايسة
خليت ايدي علي حلكي بسرعة لا لا تخيلاتي خايسة

ضحك و كال
:-دنطيني مراية خل اشوف شلعبتي بوجهي

:-لا الة اكمل يلة تشوف

:-انهبنة مبينة خربتي وجهي

:-لا هنيالك بية حتى حلاقة احلق الك

كملتهه وخرت من رجلية لم رجلية و صاح
:-اخخ ولج مكسرة رجلية شثكلج

:-يااا وخر والله بعد ما اسويلك

:-انة مو مخبل اخليج تسوينهه بعد

:-يا شبيك وياي اليوم

:-اشاقة وياج بابا

كام غسل و اني نضفت المكان

رجع يباوع بالمرايا
:-عاشت ايدج بابا

:-الله طلعت تخبل

:-اي هسه حتلو مخربة شكلي تكليلي طلعت تخبل

:-لا والله شبيك هسه اني حتى غرت منك طالع حلو
باوعلي و خلة ادية ليورة راكيهم على الميز

:-حلوة بكل حالاتج

:-اي اخبل

ضحك و دار وجهه يكلب بلاغراض ما ادري شأخذ منهم كعدت على الجرباية دزيت رسالة لامي مشتاقتلهه شفت ما عدهه نت سديت التلفون باوعتلة مخبوص بلاغراض

:-شتدور

:-لحضة

دار علية و اجه للجرباية لازم شي بأيدة وضامهم ورة ضهرة

:-شنو بيدك؟

:-هسه تشوفين

كعد بصفي على الجرباية
:-شوفي مثل ما انة خليتج تلعبين بوجهي هسه مسموحلي اسوي كلشي

:-شتسوي

طلع ايدة من ورة ضهرة لازم الحمرة و المسكارة ضحكت علية

:-شنو شتريد اخليلك؟

:-لا اني احطلج شلون تطلعين حلوة من تخلين هاي الالوان
اوكفي اكو شي بعد

بقيت اضحك علية كام من الجرباية كلب بالمجر و رجع يمي بيدة صبغ الاضافر مرة اشتراة الي بس هو خلالي مرة بعد ما خليت منة

كعد على الجرباية مقابيلي صرت بينة و بين راس الجرباية

خلاهن كدامة و طلع تلفونة فتحة و باوعلي
شال الحمرة و المسكارة بيدة

:-هذن شسمهن

:-حمرة و مسكارة

بقى يكتب بالتلفون باوعت وياه كاتب
:-طريقة وضع المسكارة و الحمرة

متت من الضحك و هو مندمج يباوع
:-اكلج خاف املطخج

:-املطخج شنو هههههه

:-وسم لا ضبطتهه شو وجهج

عاف التلفون خلة ايدة ورة راسي مثبتني و ايدة الثانية يخليلي مسكارة بس ارمش يصيح بية

باوعت علية حتى ما يرمش من التركيز
:-شنو صعب

:-اشش لا تغلطيني
رجع خلة ايدة الثانية مثبتني بيهه و يخلي لعيني الثانية كمل و ابتعد باوعلي بتركيز و هو يسد بالمسكارة

:-الله طلعتي تخبلين

:-ااا صدك شو احسك ملطخني على كولتك

:-لا طلعتي تخبلين اصبري هسه الحمرة

لزم فكي و كعد يرسم بالحمرة يحرك راسة وية حركت ايدة كوة مسيطرة ما اطكهه بضحكة و هو حتلو اتنفس حيل ما يقبل

كمل و بقى لازم وجهي رفع راسه خلة عيونه بعيوني
رفعت ايدي اسحب ايدة دنك راسة باسني بسرعة و ابتعد

:-تخبلين مـرتي

:-دوخر خل اشوف شسويت بوجهي

ستوني تحركت كال
:-بس شفايفج بدون الحمرة اطيب

خزرتة رفعت ايدي ردت اضربة على جتفة لزمهه و كرص اذني بيدة الثانية

:-اطيح حضج اذا تمدين ايدج

:-شبيك وخر ترة اوجعتني

وخر من يمي و اني كمت اباوع لوجهي بالمرايا مسويهن صح عبالك من سنين خبرة

:-ها حلوو؟

:-لا مخربني

:-صدك شو حلو مثل الانتِ تسوينة

:-لا مو حلو

:-جا تعاي اسوي ااضافرج هسه يعكسن على وجهج و تطلعين حلوة

:-وين لكيت هاي

:-دتعاي

رجعت كعدت على الجرباية
:-اوكفي خل ابدل ملابسي

طلع ملابس من الكنتور و اني ارتكيت على الجرباية اباوعلة نزع التشيرت الجان لابسة و لبس نص ردن بقيت صافنة عليه نزل البنطرون ففزني من صفنتي صوتة

:-هاا مو تكولين ما اتحرش

درت وجهي بدون ما احجي شي بدل و كعد كدامي لابس برمودة و تشيرت صيفيات و الجو بارد

:-هاي شلابس تحجي صدك ترة باردة

:-الغرفة حارة انت هم نزعي اذا عاجبج

:-اهو شبيك اليوم شارب شي متعاطي

:-اي متعاطي عيونج

:-و لا يستقر

ضحك و اخذ صبغ الاضافر كعد مقابيلي ثاني رجل و طبك الثانية لزم ايدي خلاهه على ركبتة يصبغ بأضفري

:-لا تتحركين ولج

:-اريد اعدل كعدتي شبيك

:-خل اكمل يلة تتحركين

خلاني مثل الصنم وصل لاخر اصبع خلاة على اضفري مركز وية الفرشة مالت الصبغ سحبت ايدي بسرعة و طلع كبل صبغ ركبتة

:-هههههههههه شبيك ما تشوف

:-وسم هاي شسويتيي

كام من مكانة واكف فوك الجرباية يمسح برجلة تلطش الصبغ بيهه هو قليل بس تخبل

باوعلي شافني اضحك نزل من الجرباية وكف كدامي
:-مسحي يلة

:-مااا شعلية اني غير انت دمرت روحك

:-ملاااذ شلون تردينة يضل برجلي مسحي

:-مااا والله معليه نضفة بأسيتون

صاح بية
:-طاااح حضج

و مشة يدور بالمجر طلع اسيتون و مسح رجلة قبقت الصبغ و خليتة على الميز باوعتلة وجهه ما يكصة السيف

:-شبيك انت شو باوعلي شوف طلعت حلوة مو

:-لااااا

سكتت و دنكت راسي سويت روحي ضايجة هو هم بقى ساكت و كاعد على طرف الجرباية رجعت اباوعلة و لا مهتم داير وجهه

:-صعب

ما باوعلي مخلي ايد بيد و ساكت دنكت راسي كوة مسيطرة ما ابجي من شفت روحي ما اسيطر على دمعتي سحبت الغطة و تغطيت بقيت امسح بعيوني بطرف
التشيرت شوية و حسيتة تمدد وراية سحب الغطة مني و عبر ايدة علية ضربت ايدة بعكسي اريدة يوخر

:-شبيج بابا شو باوعيلي

:-وخر وخرر

:-هاي شبيج ليش تبجين بس خل اشوف

:-اهوو وخر وعلي ترة اصرخ والم الناس

:-يلة بس خل اشوفج و بعدين لمي الناس شو وجهج

:-صعب عوفني شبيك انت

:-عيوني باوعيلي ليش تشلعين بگلبي

:-هي شنننو وخر معليك اريد انام

:-شتنامين التنبل كعدي

:-ما وخرر مني

سحب الغطة جلبت بي بأدية علمود ما يطلع وجهي
:-ليش تخليني اشوف وجهج غصب

:- شبيك انت وخر ما اريد احجي وياك

:-شو خل اشوف عيونج

رجع الغطة علية و وخر عفتة يحجي وحدة و بقيت لازمة الغطة شوية و رفع الغطة من رجلية بحركة سريعة لزم ايدي خاف اتحرك و صار معتليني مثبت رجليني برجلية و ادية لازمهم بأيد وخر الغطة من راسنة

:-وخررر خنكتني وخررر

:-ما اوخر لما ترضين

:-وخرر رضييتتت

:-جؤ ما يصير ترضين هيج بدون ما انطيج شي

رفع ادية ليفوك راسي
:-هههي وخرر و العباس راح اصرخ

:-اسف ملاذي ليش تبجين

:-ما باجية يلة وخر خررب شثكلك وخررر

خلة كصتة على كصتي و يجر النفس بقوة
:-شبيك يابة وخر رضييت اصلا اني ما زعلانة

حسيتة فصل شحجي ما يسمع رفع ايدة على وجهي يتحسس وجهي بأصابعة

:-صعب شبيك بس وخر شوف رضيت اني

ما اهتملي احس گلبي راح يطلع من مكانة كل لمسة مو ايدة تاخذ روحي رفع راسة و خلة اصبعة على شفايفي يمسح بيهه

:-مـلاذي لا ترحين لا تعوفيني

كال هيج و فلت ادية من قبضة ايدة بس احسه مو بوعية
رفعت ايدي خليتهه على خدة

:-ما اعوفك بابا اني وياك

:-لا ترحين محتاجج جمارة تروح روحي بدونج انة جنت ماكو و ابتديت بيج لا تنهيني

:-صعب لا تحجي هيج اني وياك ما اروح والله

رفع ايدة خلاهه فوك ايدي نزل راسة باسني بطرف شفتي رجع نزل راسة على اذني

:-اذيتج من لزمتهه اسف روح ابوج بعد ما اضوج هل عيون

:-صعب شو باوعلي
بقى مدنك خليت ايدي بشعرة احركهه

:-باوعلي خل نحجي

ردت ارفع راسة دارة للجهه الثانية استغربت شبي ما يباوع حسيت بي يبجي خفت شصاير اول مرة صعب يبجي يمي

:-جاي تبجي؟

رفع راسة بسرعة و وخر مني دار وجهه للجهه الثانية و دنك راسة

كمت بسرعة كعدت وراه خليت ايدي على ضهره

:-شبيك لا تبجي حباب اني كلت شي يضوجك اسفة والله اشاقة وياك فدوة لا تبجي

رفع ايدة يمسح بوجهه دار علية مبتسم خلة ايدة على جتفي و سحبني علية

:-منو كال انة باجي

:-انت هستوك بجيت

:-جؤ غلطانة

:-لا اني...

ما خلاني اكمل كال
:-لا بابا ما بية شي انت جنتي تبجين كومي يلة

:-وين اكوم

:-شوفي وجهج شلون صار باندة شني

باوعت علي وجهي بالمرايا الكدامي المسكارة سايحة و وجهي صاير يضحك يمكن شاف وجهي هيج و نصدم
كمت غسلت و هو بقى بالغرفة

رجعت لكيتة يبدل
:-شجاي تسوي

:-صار هواي ما مطلعج و هسه بليل كومي نطلع

:-جا خاف واحد يشوفنة

:-جؤ محد كومي بسرعة

طلعت ملابس بسرعة رحت للحمام بدلت وطلعت صعب بالصالة فتت للغرفة عدلت حجابي فتحت تلفوني بالكت امي دازة شي ماكو سديتة و ضميتة بجيبي باوعت للساعه ب 10 بليل احب طلعات الليل طلعت بسرعة صعب كاعد بالصالة

:-يلة كملت

كام لزم ايدي و طلعنة سوة اول ما صعدنا بالسيارة شغل الدنيا حلوة مشينة مسافة باوعتلة مركز على الطريق

:-وين رايحين

:-ما ادري

:-ليش بجيت مساع

:-شفتي دموعي؟

:-لا بس مبين بجيت

:-اذا ما بجيت

:-انت اليوم بيك شي من اجيت مو على بعضك

:-لا ماكو شي

ثنينة ساكتين وصلنة لمكان فارغ باوعت بي نفسة المكان الي مرة صعدنة بي دراجة نزل و اني هم نزلت

:-ليش جايبنة هنا

:-حلو هل مكان ما تحبينة نغيرة؟

:-لا احبة

لزم ايدي و كعدنة واحد بصف الثاني اني متربعه و هو طابك رجلية و حاضنهة بيدة مخلي جكارة بين اصابعة

:-شبيك ليش ضايج

:-راح ترحين؟

:-وين

:-اذا رحتي تنسيني

:-لا بابا ما انساك

:-انتِ قربتي ترحين و انة قربت انهي كلشي بس احساس بداخلي يكلي اكو شي مخفي علية اخاف هل شي يظلم غيري

:-شنو الشي!

:-ما ادري بس هل احساس يراودني من زمان كل ما قررت انهي الي مخطط الة شي يلزمني شي بداخلي يكلي غلط ما تعرف شي عن الحقيقة

:-عوف كلشي ليش تفكر بأحد

:-ما اكدر ملاذي

لزمت ايدة خليتهه بين ادية اباوعله مركز عيونة على الفراغ

:-احجيلي المضوجك

:-هواي و وحدة منهن انتِ

:-انني!

حرك راسة بمعني اي بقى ساكت شوية كال

:-ملاذي اليوم رحت للدكتور بس ما كتلج راح من بالي

:-انت ضايج من هاي لان ما كتلي بالعكس فرحت لان رايح

:-لا ما ضايج انة ما ردتج ترحين تملين من الانتضار صار شي اليوم

:-شنو

:-تدرين ممكن اليوم اكدر اشرب الجكارة بس شي بداخلي خايف

:-ليش تخاف مهما يكون يلي مريت بي بس يبقى ماضي لا تبني مخاوفك من ماضي ما جان بيدك شي تسوي

:-شغليهه ملاذ

كال هيج و خلة الجكارة كدامي طلع جداحة من جيبة و انطانياهه احس رجفة صارت بجسمي

:-صعب

:-لا تخافين اذا صار شي السياره مفتوحة صعدي بيهه

اخذت الجداحة ايدي ترجف و هو متردد بين الي يكول ااي و بين عيونة الرافضة شغلت الجداحة هو بسرعة نزل راسة ما يباوع ورثت الجكارة و طفيت الجداحة

:-صعب باوع

رفع راسة باوع على ادية البيهه جكارة حسيتة كام يسحب نفسة بسرعة و ادية ترجف

:-اطفيهه

حرك راسة بمعنى لا مد ايدة الي و فاتح ثنين اصابعة علمود اخلي بينهم الجكارة  لزمت ايدة لان رجفتهه قوية
عصرته بيدي رفعت ايدي يلي بيهه جكارة و خليتهه بين شفايفة

:-صعب اهدأ

فلتت ايدة لزم بيهه الجكارة رغم يريد يبين هو ما متأثر بس رجفة ادية واضحة

سحب نفس من الجكارة و نزلهه زفر الدخان بالجو و اني عيوني مركزة بي اخاف على لحضة يفقد ابتسم و باوعلي وجهه اصفر و عركان حتى شفتة صارت بيضة

بس رغم هذا سيطر على روحه من شفتة هيج طفرت من مكاني فرحانة نسيت احنة برة صحت

:-ييياااااايي صصعععب فرررحاانة فررحانننة

سحبني من ايدي كعدني كدامة
:-صوتج ولج صوتج

طفة الجكارة و شمرهه باوع علية و اني الضحكة مالية وجهي

:-ملاذي اريد اسويلج هواي بس مااعرف منين ابدي مقصر وياج انة

:-صعب انت عوضي هواي سويتلي و شما اسويلك احس خجلانة

:-جؤ بابا ابد لا تحجين هيج

ابتسمت و رجعت كعدت بصفة خلة ايدة ورة ضهري المكان فارغ و بارد ضلام و بس الاضوية البعيدة محلية المكان السماء متروسة نجوم

:-اكلك

:-همم

:-ليش تكلي راح ترحين

:-ما ضل شي كلشي راح يجهز اقل الشهر و ترحين
:-راح تجيني مو

هز راسة بمعنى لا

:-لا تجي و راح ابقى دوم انتضرك

:-تملين

:-مستحيل

:-وتكرهيني

:-لا صعب مستحيل والله

:-الله كريم

:-لا تنساني

:-هههه ولج بابا شنساج و انت مرسومة بجفن عيني

ثبتت ادية ليورة و رجعت راسي مديت رجلية بالكاع

:-احسك جزء مني صعب

رفعت راسي باوعتلة ابتسم بس ما حجة شي باوعت علية مخلي المسدس بضهره سحبتة منة دار وجهه يباوعلي بقيت لازمة المسدس و صافنة

:-اكللك

:-كولي

:-لو جنة اني و امي كدامك و المسدس بين اديك مجبور تكتل وحدة من عدنة منو راح تختار

:-ههه شهل سؤال

:-معليك جاوب

:-اختار روحي لان ماكدر افارك اي وحدة منجن

:-زين اكلك

:-كولي

:-لو طلعت اني مجرمة و عمامي دازيني عليك لان عدهم ثأر وياك و جاي اخذ منك معلومات علمود انطيهم و اليوم اكتشتفت هل شي شراح تسوي

:-ما تسوينهه

:-نفترض

:-اذا اليوم اكتشفت ما اسويلج شي

:-صدك ليش و اذا قبل اليوم

:-ما ادري

بقينة ثنينة ساكتين قطع صمتنة
الصعب:-بابا

:-ها!

:-تلفونج شلون فتحو هددوج و فتحتي؟

:-لا فرمتو لان انطانياة كلشي رايح مننه

:-اها تعرفين تفرمتين اجهزه؟

:-لا والله

طلع تلفونة و كعد يشرحلي شلوت افرمت الجهاز كمل باوعلي

:-ها فهمتي

:-سهل

:-اي سهل هسه فهمتي

:-اي يلة فرمت جهازك علمود اتأكد اعرف افرمتة لو لا

:-لا والله خاف ما ترضين

:-هههه لا اشاقة

:-عرفتي تفيدج هاي خاف بيوم ينقفل تلفونج و تنسين الرمز

:-اي عرفت

:-ارتاحيتي

:-اي

:-نرجع للبيت

:-اي بس تشرب جكارة بالسيارة علمود اتأكد ما بيك شي؟

:-ههههه ترة بعدني الجكارة شي بسيط

:-ميخالف اصلا فرحانة حيييل حيللل

ابتسم و كام مد الي ايدة و سحبني رجعنة للبيت مشغلين اغنية الدنيا حلوة راح صعب للحمام و اني بدلت ملابس البيت طلعت الكتاب لان بعدني ما منعسة و فتحتة على الصفحة 30 الصفحة الاخيرة و اخيرا بعد هل يوم راح اخلص من هل هم الي على كلبي تمددت على الجرباية منتضرة صعب

اجة مبدل مشط شعرة و تمدد بصفي
:-ها خو ما نعسان

:-جؤ

:-نقرة

:-اي

فتحت الكتاب

…………………

عودة الى الماضي

الصفحة ثلاثون

رُفيدة

:-روح صدك تحجين ترحين وية الولد للمدرسة اليوم اجاني يبجي يكول امي تنتضرني بالباب اني مو صغير عوفي

:-شنو تردين يطلع و ينخطف

:-منو يخطفة صدك تحجين

:-عمامة كلشي يسوون اخاف منهم تخيلي يكتلونة و يكولون ما عدنة حفيد

:-ولج تحجين صدك ضناهم هذا

:-ضناهم شبيج رُفيدة مو الكل يعرف ابني ابن حرام تبرو منة كدام الدنيا تردين اعوف ابني يروح وحدة

:-خطية يضوج الولد يكلولة صغير و تجي وياة امة
:-خل يكولون احسن ما يصير بي شي ساعتهه اكتل روحي وراة

:-اسم الله عليكم بكيفج بس هو كل يوم يجيني و يبجي لان الطلاب تضحك علية

:-يكبر و يتعلم هذا خوف علية

بقيت ساكتة منهه ابد ما تقتنع محاوطة الصعب من كل جهه بحيث مخليتة يستحي من يشوف عالم خانكتة خنك

مرة الايام و الصعب بدة يكبر و كل ما يكبر يسأل ليش هو بدون اب و كالعادة جواب روح ابوك مات روح خفت الكتاب عني و عن الكل و كل يوم توصيني اذا متت هل كتاب ما يقراة غيرج و غير ابني

الا ان احمد صار منتسب بالجيش و الصعب عمرة صار 9 سنوات روح ربتة احسن ترباية ما يوم رفع عينة بعين واحد اكبر منة و لا يوم سمعتة يغلط و لحد هل يوم روح تاحذة بيدهه للمدرسة و ترجعه بيدهه صار الصعب مثل ابني شكد سمعت حجي على الحمل بس احمد
من يشوفني اضوج يغلس و ييكول ما نريد اطفال لحد اليوم الي تخربطت بي و تكلب روحي و احمد جان ملتحق رحنة اني و روح للمستشفى و روح تصيح زلمتنة صعب لا تخافين منتضرة التحليلي يطلع كل وبالي مغثوصة من اكلة طلعت ام التحليل كالت

:-منو رُفيدة

رفعت راسي الهه
:-اني

:-مبروك عيني

من الصدمة اني و روح ثنينة ساكتين
روح:-ليش مبروك؟

:-حامل حبيبتتي

بقينة مصدوميين لحد ما البنية كالت
:-شكو!

:-ولججج صدكك صدككك اختي حامل صار عشر سنوات ننتضر الطفل

الناس كلهه سمعتنة و بقت تبارك فرحانين على فرحتنة جبنة الدرب كلة نبجي و حدة لازم ايد الثانية

الصعب:-ماما رُفيدة راح تجيبينة طفل
ضحكت و لزمت ادية

:-اي اجيبلك نونو تحبة؟

:-اي احبة جيبي بنية مثل بيت ام علي عدعم بنية صغيرة يلعبون وياهه

:-هاي هية

اجة احمد و من سمع بهل خبر طار يمشي بالشارع و يصيح راح اصير اب لحد يوم ولادت ملاذ و هم احمد ما جان حاضر وياي لان ملتحق

روح هي الوكفتلي بهل يوم و الصعب رغم صغرة ما قصرو ابد و تسمت بنتي ملاذ بطلب من الصعب

…………………………

كملت الكتاب و سديتة

:-و جان نختم الكتاب

ابتسم و سحب الكتاب خلاة على الميز الوراه
:-مرغي بشعري صار هواي ما ممرغتة

وخرت الغطة مني و كعدت متربعة خلة راسة بحضني و بقيت امرغ بشعرة كل ما اباوعلة يباوع علية خليت ايدي على عيونة

:-وخري ايدج

:-لحد ما تنام يلة اوخرهه ضوجتني

:-خل اشبع من هل عيون

:-انت غير نعسان نام يلة

بقيت امرغ بشعرة هواية بس ما نام تحس بي كاعد لان يتحرك احس براحة لان ختمت الكتاب و صعب ما ملاحض هل شي وخر راسة من يمي

:-تمددي ملاذ

تمددت لزم ايدي و قرب مني نمت لثاني يوم كعدت الصبح الصعب اليوم بالبيت

…………………………

بـــرق

اجلت سنتين من الجامعة كل مرة تصير ضروف بالسنة الثالثة قدمت بس مترددة اداوم جنت احجي وية لـورا
:-لورا اخاف ما انقبل بالقسم الرايدتة

:-يمعودة اي شي يطلعلج نعمة على اقلها داومي شوفي الجامعة

:-ما ادري المشكلة سيف حيل مشغرل بدوامة و بيلسان هاي اخر سنة الهه اريد هم أأجل السنة

:-لا ابد لا تفكرين بالتأجل شيطلع روحي اذا تبقين كل سنة تأجلين راح تروح عليج سنة

:-ما ادري الله كريم

سديت التلفون و رحت اشتغل وية امي سيف نازل و كاعد بالساحة يشتغل بالماطور مالتة امي تسوي غدة و اخواني بالمدارس خابرت بيلسان كامرة

:-ها بيبو متونسة

:-اي والله واخيرا راح اتخرج متحمسة للتخرج

:-ايي علمود اجي لجامعتج

:-اايي يافرحتتي

امي خذت التلفون تحجي وياهه
:-ها ولج بليسان شلونج بالدوام لا تلتهين بالتخرج

:-والله زينة سيف شلونة المصاكيع شلونهم

:-كون يامان يسمعج

بعدهه امي تحجي و فات يامان شمر كتبة بالكاع و كعد عليهم يعلج

:-ياهي هاي التحجي الخانسة كليله خل تنجب

:-ولج اختك اكبر منك احترمهه

:-يمة هي غير مفصفصة وين الكبر مالتهه

برق:-غير يستقر

:-اسكتي انت وجهج جنة فلس

:-عود تضحك ترة ثكككيل

:-ثكيل و ما يباوعلي و لاهزة رسم كووحلي

هزيت ايدي و درت وجهي سدينة الخط من بيلسان
اخذني سيف للتقديم نقبلت بكلية ما جنت حابتة بس بعد ما سمعت كلام امي و سيف اتقبلت هل موضوع

سيف:-برقي بنتي الصغيرة و اخيرا دخلتج جامعه

:-سيف مو الكلية الاريدهه

:-ميخالف احنة شكلنة مو كلنة اليجي من الله نعم الله

:-اي صح

مُهرة:-مو تفضحينة بالجامعة و تعاركين الجاي و الرايح
:-يا يمة تحجين صدك غير كبرت و صرت جامعة اصلا ما احب المشاكل اني

:-لا يابة وين تحبينهه

بقينة نضحك نذكر بعركاتي وية عمامي بديت اداوم بالبداية تعب بس شديت حيلي بالدوام لان بتعب امي و اخوي يلة وصلنة لهيج مرحلة حياتنة تغيرت هواي من عمامي لحد ما وصلنة لهل مكان تمامي كل يوم طالعتلهم سالفة صح اليعيش بفلوس حرام الله مستحيل يوفقة و مهما طال العقاب للضالم لا بد يجي اليوم الي راح ينال بي جزائة شنو تزرع راح تحصد

اذا زرعت طيب راح تحصد طيب و امي ما زرعت الة الطيب و نالت بعد تعب صح ابوي راح من هل دنيا بضلم بس رب العالمين ينطي جزاء كلمن ضلمة بالدنيا و جازاة بينة ما يمر يوم نسينة بي ابونة كاعدة و عيني ماليته الدموع بسبب جمعتنة اتمنى هل لمة تدوم للابد

مر قطار عُمري على الجميع انزلني جنبهم واحدا تلو الاخر لكن!!

عند وصوله اليك انزلني الى جثه هامده ملطخه بدماء بريئه ثارت الطلقات ثار الناس معها لكن اغرتهم الاموال انسحب الجميع و نسوا جثمان ابي دفنوه لكن ما زال الثأر يأخذ ارواح بريئه

كلً منهم عاد الى حياته لكن!

نحن بقينا بذلك المكان الذي قتل فيه ابي الذي صرخت فيه امي و بأحضانهه اخي بقيت انا متمسكه بطرف الحائط انضر من بعيد و بقيت اختي متمسكه باطراف ثوب امي بقى اخي ينضر الى ذلك التابوت جميعناا بقينااا بنفس المكان...

..
ما زالت النزاعات العشائريه تسلب ارواحاً دون ذنب يخرج المجرم ليعيش حياة طبيعيه يموت المظلوم و يعيش الطماعون بأموال الحرام و تبقى عائلة الشهيد مشتته💚

الحمد للة على كل حال كانت بداية صعبة لكن جبرنا في النهاية
برق شاركت معكم تفاصيل قصتي بكل حب

………………………………………
مـلاذ

كمت من فراشي طلعت غسلت صعب كاعد بالمطبخ صاح علية

:-صباح الخير بابا

:-صباح الورد

:-يلة منتضرج شلون ريوك

نشفت وجهي و رحت يمة كعد يوكل بية ما يقبل اكل بيدي

:-اكلك والله عندي ادين

:-جؤ مو البارحة ضوجتج

:-ما ضجت منك

:-معليج عاجبني اوكلج

:-و بعد اليوم شتسوي

:-سبحي و امشطلج و احطلج مكايج و الوان لاضافرج بعد تعلمت

:-هههه مبين تعلمت من الاوان

:-جا شسمهه ترة هي كلهه الوان

:-اي صح كلامك

كملنة ريوك كام هو غسل المواعين و اني فتت سبحت
جبت المشط و اجي يمة يطلع فيديو من اليوتيوب يتعلم و يمشطلي نفسة

:-راح اسويلج ضفيرة فوك و الثانية جوة

:-خوش يلة

كعدت و هو واكف يفرك بشعري ما يعرف يثبت بمكان
كمل و كعد مقابيلي باوع علية و هز ايدة

:-ها شكو

:-راسج مصفح ما يرهم بي هيج مشاط

:-لا والله ما بي شي راسي انت ما تعرف

:-لا مصفح انة سويت مثل الفديو بس راسج مو مثل الفديو

عفتة و كمت لغرفة اباوع على روحي بالمراية مسويهن ضفيرة بالشرق و ضفيرة بالغرب كعدت احل بي و ادردم فتح باب الغرفة و بقى واكف يم الباب باوعتلة بالمرايا

:-ها شبيك تباوع حليتة لان مو حلو

جان حاضن ادية لصدرة انتبهت بينهن الكتاب
عفت شعري و باوعت علية

:-شكو؟

الصعب:-……

.
.
.
.
.
.للحكاية بقية

كلانا كتف للاخر♥
الوريد♪