رواية أنتقام الصفحه 27 (ترميم) الفصل الثالث وثلاثون 33 - بقلم خـلود الـ محسن

الكاتبة لورا

انستا lorai_alrwi

تفاعلكم على البارت و اشتركو بقناة التلي لطفاََ❤️

قرأة ممتعة
……………………

ما اهتم كعدني و صار كدامي

:-شكوووو؟

ثنة رجلية و كعد لازم ايدي و وجهه ما يتفسر حجة بهدوء

:-احجي ملاذ

:-شنو صعب شحجي افتح ايدي

كلت هيج و درت وجهي افلت بيدي شادهه بحجابي و بقوة مااكدر افلتهم بقيت احرك بيدي لزمني من جتفي و عتني علية بقوة صاح بصوت عالي عكس الهدوء الجان بي

:-ملااااذذذ لا تستتغبينن

:-شبييك شبييكك شتريدد

:-الصفحة وينهه ملاذ

:-يا صفحة شتحجي انت وخر مني

وخر ايدة مني و كعد مقابيلي رافع حاجبة مد ايدة بجيبة و طلع تلفوني بلعت ريكي متوترة بقى مدنك على التلفون كلب بي و خلاه كدامي باوعت على لتلفون مطلع محادثتي وية امي

:-اقرريها

:-شترييد مني

:-الصفحة شنو بيهه وينها؟

بس رمشت بعيوني نزلت دموعي احسهه تجوي خدي جريت نفس و باوعت علية

:-مو عندي صعب

عض شفتة الجوة يحاول يهدي نفسة رجع كرر نفس السؤال

:-ملاذ احجي ما اسويلج شي

:-ما اعرف

بس كلت هيج ركع التلفون باللكاع و رفع ايدة عصر فكي ودفعني ليورة بسرعة قرب وجهه مني يحجي وكاز على اسنانة

:-ملااذذذذ ملااذذ اذبحج واللة اذبحج احجيي شضامة علية احجي

:-عوفنننيي صعب جاي تأذيني

:-و اشبعج اذية اذا ما تطلعيينهه

:-وخر حقيرر

دفعني بيدة و وخر يفتر بالغرفة بدون ما يحجي
:-صعب ايدي افتحهم

ما رد علية طلع تلفونة يكلب بي خلاة على اذنة و باوعلي اشر بأصبعة بمعنى اسكتي

الصعب:-الو شلونك عمي....عمي اليوم جايك بشغلة عادي امرلك...لا سالفة صغيرة بليل جايك يلة اللة وياك

سد التلفون و باوعلي
:-اول واخير راح اعرف شنو بهل ورقة عمي موجود

:-اذا عرفت شراح تستفاد

:-هواي ملاذ هواي لذلك احجي ليش تخليني التجأ لغيرج

:-شراح تسوي اذا عرفت؟

:-شنو البيهه و هيج خافينة علية امج تعرف من زمان مو
حركت راسي بمعنى لا ابتسم و خلة التلفون بجيبة

:-كلكم تعرفون اني الغبي الوحيد بهاي القصة اني
الشخص الوحيد الراح يعيش كل حياتة بوهم اني الخاسر اهلي مو انتم محد راح يفهم شحس محد عاش العشتة محد تيتم منكم

:-افتح ايدي بس خل احجي وياك

كعد بصفي مدنك راسة فتح ادية و حضن ادية لصدرة دنكت افتح رجلية عدلت كعدتي و صرت بصفة خليت ايدي على جتفة

:-صعب شنو راح تسوي لو عرفت بهل ورقة وين

:-تخص امي لو ابوي بس كليلي

:-ما ادري شي

:-لا تجذبين لاااتتجذبييينن

:-صعب عوفهه

:-بس احجيي عندج مو عندج ملااذ شفتيني شلون كاتل روحي عليهه ميت بس كون اعرف شصاير وانة ماادري بي احجيلي

:-ما ادري مو عندي ماعرف شبيهااا

:-وعيونج تجذبين اعرفج من تحجين الحجاية انة اعرف الناس من نضرتهه اذا تجذب لو لا مو يلة انت تردين ما اعرفج

:-بس اني ما ادري شنو بهل صفحة

:-شلون ما تدرين و الرسالة؟

:-هي امي كلتلي اكو صفحة ضايعة بس ما كلتلي شنو بيهه

:-لاتجذبين

:-ما اجذب الي اعرفة كلتة الك

كام من يمي وصل لباب الغرفة صحت علية
:-صعب

دار وجهه علية واضح علية شكد عصبي شكلة يخوفني من يصير هيج اتمنى روحي باقية يم امي و لا اشوفة بهل حالة

:-شكو؟

:-اريد امي

:-اي ليش لا روحيلهه

كال هيج و طلع قبل لا يسد الباب صحت
:-خابرهه خل تجي

رجع باوعلي و لازم يدة الباب بلل شفايفة و ابتسم
:-ترحين!

:-اي

صاح بصوت رج البيت

:-تردين تزوجيين حسنن عاجبج موو لو تموتين لو اخر يوم بعمرري انتِ مرتي تموتين و ما اعوفج شايفة مو يكتلوني مو اموت و انت تفرحين عبالج عفتج بس لا روحي تضل وياج ما تعوفج هيج مثل الجن مرافك خيالج

:-مصدك روحك صعب!

سد الباب و اجة كدامي لزم طرف وجهي بخفة
:-كتلج اموت واضل وراج دير بالج مني ملاذ

:-مريض انت

:-اي مريض و راح امرضج وياي

:-اريد امي

:-من تنطيني الورقة روحي لامج

:-مو عندي

:-خوش من تصير عندج روحي لامج

عافني و طلع فززني من ركع الباب بقوة شجاي يحجي هذا معقولة راح يسوي شي بس مااكدر انطي الورقة حتى امي بعد ما اكدر احجي وياهه

كمت من مكاني رتبت الغرفة و شلت الشالات شبي هذا مخبل ادري اني شبية ما حسيت من شد ادية و رجلية نفضت الافكار من راسي و رحت للباب اريد اطلع فتحته ما ينفتح سحبتة بقوه ماكو قافلة بقيت ادك بالباب و اصيح علية

:-صعععب وينك افتح الباب

بقيت ادك الباب بقوة بس ماكو جواب جريت نفس بقوة و تخوصرت افتر بالغرفة ياللة شبي هذا تخبل ليش يقفل الباب باوعت للساعة ب 9 وربع

رجعت كعدت على الجرباية الف فكرة و فكرة براسي شراح يسوي اتمنى بهل لحضة اشوف امي واخلص من كلشي مستحيل اكدر انطي الورقة و اذا بقيت يمة يبقى يعاملني بهل طريقة شوكت امي تاخذني تمددت على الجرباية الهدوء مالي المكان ماكو اي صوت منتضرة اسمع صوت فتحة الباب بس ماكو اي احد احس الوقت كوة يمشي كمت اباوع من الشباك صاير على الكراج ماكو بشر بس سيارات قليلة جريت نفس قوي و كعدت جوة الشباك جعت كلش و مليت المكان صار يخنك رجعت ادك بالباب نفس الحالة ماكو جواب صار الضهر وماكو احد تمددت بفراشي و لفيت نفسي بالبطانية احس برودة صارت بجسمي غمضت عيوني اريد الوقت يمشي ما ادري بروحي و نمت فزيت على صوت طكطكة بالغرفة فتحت عيني شفت صعب كدامي يبدل التشيرت مالتة باوعت للساعة بالسبعة باوعلي اول ما كعدت
 
الصعب:-كومي اكلي

:-ما اريد ليششش تقفل الغرفة علية

كلت هيج و غطيت وجهي بالبطانية احس غصة ببلعومي ما ردت ابجي كدامة

:-براحتج

كوة لزمت روحي منة عضيت البطانية علمود ما اطلع صوت

:-عمي راح يجي لا تطلعين بدون حجاب

ما رديت علية احس بطني توجعني من الجوع بس ما اتنازل و اكل مسحت عيوني بطرف التشيرت و وخرت الغطة

:-اريد امي

جان يمشط بشعرة دار وجهه علية

:-تعرفين شنو اتفاقنة

:-صعب شبيك انت اريد ارجع لامي ما اعرف شي اني

:-اي ترجعين

كعدت و وخرت الغطة مني صحت
:-شوكتتت شوكتت

:-الورقة

:-موو عندديي شبيك

:-عند امج

:-ما ادرييي ماعرف شي اني

:-تمام ضلي هنا

:-عووفنني بابا عوفني اني اريد ارجع لاعمامي انت شعليك

:-خلصي مني و بعدين رجعي

يحجي و يرتب بشعرة و لا هامة الوضع البرود البي موتني

:-صعب انت مو كلت احبج وين الحب

رجع المشط على الميز و شال العطر خلة منة  باوعلي بالمرايا

:-مو كل الحجي صدك

:-ما تحبني؟

حرك جتفة بمعنى ما ادري
:-جاي اكلك الورقة مو عندي و ما اعرف شي شتريد مني بعد

:-تجيبينهاا

فتح علج و علجة دار وجهه علية و ارتكة على الميز
:-ما اعرف شي صعب

:-كومي اكلي

:-ما اريد ما اكل اذا ما رجعتني لامي

:-انتِ تضررين مو احد غيرج الاكل بالمطبخ شوكت ما عاجبج كومي المهم مو تطلعين بدون حجاب

وخر من الميز و اتجة لباب الغرفة صحت علية
:-صعب خل اروح وية عمو هادي

:-عمي غريب عليج مترحيين وياة

:-و شهاب مو عادي ابقى يمة؟

:-كلهم غربة عنج ممنوع تلتقين بأحد منهم على كد السلام

عافني و طلع خلاني اغلي كمت من الفراش لبست حجاب و طلعت كاعد بالصالة يكلب بالتلفون حتى ما رفع راسة غسلت و رجعت اريد افوت للغرفة سمعت الباب اندكت بقيت واكفة فات عمو هادي ما ادري شعجب اجة سمعت صعب من خابرة كلة اني اجيك من شفتة لا اراديا  ابتسمت و بقيت بمكاني فات للصالة
اجيت يمه و باوعت على صعب رافع حاجبة و خازرني

:-شلونك عمو شخبارك

:-هلا ملاذ شلونج عمو

:-الحمد للة شعجب نورتنة

:-واللة اشتاقيت لهل وجه الحلو

:-هههه فدوة لعمرك

كعدو بقى صعب يحجي وياة رحت للمطبخ اسوي جاي شوية و فات صعب

:-روحي للغرفة لا تسوين

:-معليك

:-شوفي اكلي اني اسوي

:-معليك

:-ملااذ لا تخليني اعلي صوتي عمي منا

:-شعلية؟

:-تخبلتيي لو صار بيج شي لا اكيد الجوع مأثر عليج

:-لا الحبسة أثرت بية

:-امشي للصالة اني اكملة

:-تريد تطلع خوش رجال كدام عمك روح من يمي

:-ملاذ لا تجاوزين مو شفتي عمي هنا و اخذتي راحتج

:-معليك

هز ايدة و اجة يمي سحب الشكردانة مني ما حجيت شي عفتة و رحت للصالة كعدت كدام عمو هادي جان لازم تلفونة من شافني عافة على صفحة و ابتسم

:-شبيج عمو ليش متغيرة باوعت على باب المطبخ صعب واكف يباوعلنة

:-ما بية شي بس هيج شوية تعبانة

:-خاف حامل عمو

باوعت للصعب ضحك و خلة ايدة بجيبة
:-لا عمو مو حامل

:-لكك صعب داريهه البنية متغيرة

:-عمي ما تاكل شسويلهه

:-وكلهه بيدك

:-اوكلهه اوكلهه

كال هيج و فات للمطبخ
هادي:-ملاذ هم تعرفين صعب شرايد مني؟

:-لا عمو ما اعرف

:-امم ان شاء اللة خير

:-ان شا اللة

:-انتِ شبيج ليش هيج متغيرة عمو خو ما صعب مضوجج بشي

:-لا

:-باجر تطلعون للبيت

:-يابيت؟

:-مو صعب اجر بيت لبين ما تنحل السالفة و ترجعون لبيت صعب

:-ما كالي

:-ها شني السالفة هيج موضوع مهم ما يكلج بي

:-مو مشغول هل ايام يجوز نسة يحجيلي

:-اي يجوز و يجوز ما تتحاجون كلشي وارد

رفعت راسي علية بللت شفايفي و ابتسمت فات صعب بيدة صينية الجاي 

ملاذ:-ههه لا شسالفة عليمن نتحاجة ماكو شي

الصعب:-منو متحاجي عمي

:-منو غيركم

:-لا عمي عليمن نتحاجة

:-كل مرة اشوف بعيونكم لمعة هل مرة هل لمعة ماكو

الصعب:-هههه شني السالفة عمي شككتنة بروحنة ماكو شي بس ملاذ شوية مريضة

:-اخذتهه للطبيب

:-باجر اخذهه

:-باجر تلحك مو تنتقل للبيت

:-اي عمي اني مجهز كلشي كبل نروح نكعد ماعدنة شي

:-دير بالك عليهه ولك

:-بعيوني عمي

:-اي بوية ما كتلي شكو

:-نشرب جايينة و نسولف عمي

باوعلي و بيدة كوب جاي
الصعب :-بابا ملاذ كومي للغرفة

ما حجيت شي عفتهم و فتت للغرفة سديت الباب و كعدت على الجرباية افكر شلون اخلص منة مر ساعة و همة بعدهم برة فتحت الباب شفتهم كاعدين صاح علية عمو هادي

:-تعالي عمو تعالي كعدي

رفعت ايدي اعدل بحجابي  رحت يمهم ردت اكعد حسيت دوخة لزمتني ردت الزم طرف التخم اريد اكعد ما كدرت صعب من شافني هيج طفر علية لزم ايدي و كعدني و عمو هادي واكف قريب يمي

:-شبيجج ملاذ دختتي بيج شي؟

كعد كدامي و لازم ايدي و يعصر بيهه
:-ما بية شي بس دوخة خفيفة

:-اخذج للطبيب بيج شي اجيبلج مي

:-لا ما اريد صرت زينة

هادي:-عمو خاف ما ماكلة

:-لا ما بية شي

:-خاف حامل عمو

الصعب:-لا عمي مو حامل منيلهه

:-شنو منيلهه صعب جا وانت

:-لا اقصد اني ادري بيهه مو حامل بس هي مريضة

:-ليش تتعبهه خليهه ترتاح ترة اخذهه منك حتى متغيرة

:-لا عمي ما بيهه شي

ملاذ:-صعب خل اروح وياة بس اليوم

فلت ايدي و باوعلي احس وجهه نببهت

هادي:-ايي عمو انت تعبانة كومي وياي هناك رتيل تهتم بيج وتغيرن جو  عاد بس اليوم تعاي

الصعب:-لا ما تجي اني اهتم بيهه

ملاذ:-اريد اروح

:-ما ترحين اني هنا ما اعوفج اني اخذج للطبيب و اهتم بيج ما ترحين لاحد

هادي:-بوية البنية من تزوجت لليوم ما شايفة احد خليهه تجي وياي بس اليوم ترتاح شوية و باجر العصر من تروح لبيتكم اخذهه

باوعلي و كأنما يحجي ببعيونة يريدني ارفض كال
:-ملاذ تردين ترحين؟

:-اي اريد اروح

حرك راسة بمعنى اي و وكف
:-عمي بس احجي وياهه بالغرفة شوية و تجي

:-اني طالع برة من تكمل جيبهه الي

:- هاي هية

راح عمو هادي وكفت احس الخوف دب بعروكي لزم ايدي و فوتني للغرفة بدون ما يحجي شي سد الباب و ارتكى علية بقيت واكفة كدامة ثنينة ساكتين شوية و كسر الصمت

:-ليش تردين ترحين؟

:-ما تخليني اروح لامي و لا تخليني اروح لاهلك و بعدين شتريد ما اتحملك و انت هيج صعب

:-ابقي ما اسويلج شي بعد

:-سمعت عمو كال بس اليوم تعبانة اريد اروح

:-ما بيج شي لان ما ماكلة هسة اني اوكللج و تصيرين زينة ابقي

:-اريد اروح

:-ما أذيج ابقي

:-كتللك اريد اروح

:-خوش روحي باجر اخذج

:-تمام

:-شراح تحجين الهم

:-ما احجي شي

:-زين شوفي راح انطيج تلفون اسويلج ماسنجر و افعلج نت و خلي الاتصال وياي مفتوح

:-اني شاردة منك

:-ما نحجي شي بس فتحي الاتصال و خلي يمج

:-لا

:-ما ترحين

:-ترة ما راح احجي شي لا تخبلني

:-تاخذين التلفون ترحين ما تاخذينة ما ترحين

:-تخاف

:-منين

:-خاف احجي لعمك و يوديني لامي

:-لا ما اخاف لان اكدر اجيبج برمشة عين بس ما تكدرين بدوني

:-ههههه منو كال ما اكدر بنفسك كتلي مو كل الحجي صح تحمل نتيجة كلامك

:-شنو قصدج

:-اذا من قبل كايلتلك ما اكدر بدونك ف كلامي مشكوك بي و يلة وخر اريد اخذ وياي اغراض

:-اني احضر الج بدللي

:-معليك اني احضرهم

:-بدلي تلكيني مطلع اغراضج

:-معللليك سوالف بنات

:-اشتريناهن سوة هسه استحيتي

:-صععب

:-ملاااذذ كوة لازم روحي لا تخلينني ابطل ما اخليج ترحين

:-مو بكيفك

:-ملااذ

:-لا حول اللة شتريد

:-امشي بدلي باجر اجي اخذج

:-عود تعال بليل ما الي خلك اكمل وياك يوم كامل

:-هيج صارت

:-انت اختارييت هل شي

:-المهم باجر اجي

:-تمام

:-تفتحين اتصال

:-خوش

:-اذا ما فتحتي صدكي اجيج بأي وكت

:-امم

:-يلة بسرعة كملي

اخذت ملابس و فتت للحمام مدري شبي خبلني ما يعرف بروحة شيريد بدلت و طلعت لكيتة واكف بالغرفة بيدة لفة
:-هاج اكليهه

:-ما اريد

:-جا ما ترحين

:-ما اريد

:-بعد احسن علمود ما ترحين

طلع تلفونة على جهات الاتصال
:-شجاي تسوي

:-اخابر عمي اكلة روح ما تجي بطلت

:-لا حول اللة لا تخابرة انطيني

اخذت اللفة منة و هو يفتر فوك راسي لازم بيدة جنطة صغيرة

:-شوفي هاي خليتلج فلوس هنا خاف تحتاجين شي وملابس بس مالت يوم واحد و هذا التلفون بالجيب الصغير حتى رمز ما بي و بي نت بس تصعدين السيارة اخابرج و وين ما ترحيين يضل وياج

:-خوش

:-دير بالج يبعد عنج شوية كبل اجيي

:-اهووو لا تلح فهمتت

:-مرض صوتج

:-موتتنيي ملتتني التلفون لا تعوفينة اجيج اخابرج نت اتصل متتت فهمت لا تعيد علية كل شوية

:-معلييج اعيد ما اعيد بكيفي

:-يلة خل انزل

:-امشي

طلع من الغرفة مشيت وراة وكف بنص الصالة و باوعلي

:-متأكدة تردين ترحين

:-اي متأكدة وبكامل قواي العقلية

:-مو تكلين لعمي ياخذج لامج أأذيج ترة

:-ما اكلة بس امشي

:-ما تبطلين من الروحة و اني اخذج لامج

:-لا حول اللة صعب

:-امشي اممشي امري للة

وصلنة برة كل شوية الكاة يباوعلي صعدت كدام يم عمو هادي و صعب واكف كدامي مجتف ايدية اول ما شغل السيارة باوعت على صعب اشرلي على التلفون هزيت راسي بملل تحركت السيارة باوعت من الجامة على صعب واكف بمكانة لحد ما صرنة بعيدين بعد ما اشوفة

هادي:-شبيج عمو ليش ضايجة

:-ما ضايجة

:-انت و صعب مو

:-لا

:-تجذبون علية حافظكم انة

:-هيج عادي متعودين

:-صعب شبي

:-ما ادري

:-شعندة ييدور على الماضي

:-شمعرفك؟

:-الييوم و بعد سنين رجع سألني على امة و ابوة شيدور بالضبط

:-ما ادري

:-اااووف ياعموو مادرري هل ولد شبي

:-ليش هو اكو شي ضامينة على صعب

:-لا

:-متإكد!

:-ليش هل سؤال

جريت نفس قوي و غمضت عيوني
:-زين و موت عمو عابس شنو سالفتة

فجأة السيارة وكفت فتحت عيوني باوعت على عمو هادي يباوعلي والصدمة مرسومة على ملامحة

:-شقصدج!

:-صعب شنو يعرف عن موت ابوة

:-شنو صعب شيعرف؟ كلنا نعرف بهل شي اخوي عابس مات بحادث

:-بس انت بنفسك حجيت لخالتي روح غير هل حجي
بلع ريكة و بلل شفايفة يحاول يهدي نفسة

:-شمعرفج بهل شي منو حجالج صعب يدري يعرررف شيي منين عرفتي هل شي

:-يعني هل شي صح

:-شنو

:-عمي عاببس انتم قتلتوه

:-اششش ملاااذ اشششش لا تشملينيي اخوي هذا اخوي شلون اكتلة

:-اخوانك

:-شمعرفج بهل حجي

:-كتاب خالتي روح

:-و صعب!

:-ما يندل الصفحة البيهه هل حجي

:-وينهه هل صفحة

:-ما ادري

:-منو انطاكم الكتاب

:-امي

:-يعني هل صفحة عد امج

:-ما اعرف شي

:-ملااذ صععب اذا عرف شي راح يدمر روحة كل هل سنين كوة مسيطرين علية و مغلس لمجرد يعرف بيهم ضلمو امة و ابوة لمجرد يعرفهم سبب بأنتحار امة يريد ينتقم شلون لو عرف همة كاتلين ابوة

:-راح يعرف بس مو هسة اخوانك اول و اخير راح ينلزمون انت تعرف كلش زين يشتغلون وية مجرمين اكيد نهايتهم سجن و اكيد بعد ما ينسجنون صعب راح يعرف كللشي يخص ابوة

:-ملاذ لا تحجون شي للصعب شوفي نروح لامج نقنعهه تمحي هل ورقة من الوجود

:-صعب عرف اكو ورقة من الدفتر ضايعة لهذ السبب اني اليوم اجيت وياك

:-أذاج؟

:-مو مهم المهم اتأكدت من الحقيقة

:-بس تعرفين انة مو مذنب

:-بس جان مفروض صعب يعرف بهل شي من هو طفل

:-جنت اريد احتوي بعد موت امة لكن صعب اختفى هواي دورت علية و بعد ما لكيتة صعب هواي تغير كوة رجعت علاقتي بي ما ردت احجيلة و اهدم كلشي من جديد

:-ششنو ذنبة ما يعرف شي عن اهله

:-اذا عرف راح نخسرة

:-ماعرف شي اني طلعوني من هل موضوع بس خل ارجع لامي و ينتهي كلشي تعبت و اني بعيدة عنهه

:-ما فكرتي تضلين وية صعب

:-ههه اذا جنت مفكرة ابقى بعد اليوم مستحيل ابقى

:-بس هو يحبج

:-ما يحبني يحب الماضي

:-براحتج عمو بس يايرت ما تحجين شي الة

:-ما احجي شي لان اخاف علية بس لا تخلوني يمة اكثر لان يجبرني احجي

:-ميجبرج اني اكدر اخليج يمي بس صعب شيقنعة و انت امانتة

:-حاول تتواصل وية امي خليهه تستعجل

:-ان شاء اللة عمو

:-شكرا

رجع شغل السيارة و اني اباوع للطريق شوية و اتصل تلفون عمو كال

:-هذا صعب

:-افتح الصوت عمو

حركلي راسة بمعنى اي فتح الخط قبل لا يحجي كلشي صعب كلة

:-ها شنو وصلتو موو

:-لا عمي وين وصلنة بعد

:-بس اني حافظ الوكت النوصللكم بي هسة لازم توصلون

:-ازدحام

:-خوش بس توصلون خابرني

:-هاي هية

:-انطيني ملاذ

قدملي التلفون سديت الصوت و خليتة على اذني ما حجيت شي صح

:-ملاذ

:-ها

:-راح اتصل على الماسنجر فتحي بس لا تحجين شي

:-بعدني ما واصلة

:-ميخالف

:-صعب

:-اجي واللة افتحي احسلج

:-اي باي

سديت التلفون و نطيتة لعمو هادي طلعت التلفون من الجنطة شفتة داز رسايل ما لحكت اقراهم كبل اتصل فتحت اتصال بس ما حجيت شي رحت فتحت الرسائل كاتب

:-تردين اجي اخذج؟ راح تملين يمهم بس تملين دزيلي بأي وكت اني موجود

راجع كاتب
:-ملاذ ما تحجين لاحد اني وياج صارت بينة مشكلة حتى رتيل

:-شوفي اكلي مو ما تاكلين و لاتنسين اذا سديتي الاتصال اجيكم للبيت حتى من تفوتين للحمام تفتحين اتصال

هزيت ايدي و خليت التلفون بحضني وكفت السيارة كدام بيت كلش جبير

:-يلة عمو نزلي

:-هنا

:-اي حبيبتي نزلي

شلت الجنطة سمعت صوت رسالة غلست ما اكددر اشوفهه لان بشارع فتت جوة و صوت الرسايل ما واكف محد جان موجود فتنه للصالة عمو صاح

:-ام شهاب رتيل و ينكم

شوية و نزلت رتيل من الدرج شافتني و الضحكة ملت وجهه كبل اجت علية حضنتني

:-لججج شنو هااي صددكك واللة ما اصدكك بابااا شعجججب

ضحكت و بادلتهه الحضن طلعت مرة من الغرفة المقابيلي اول مرة اشوفهه بس عرفتهه امهم وخرت من رتيل عمو كال

:-بابا ملاذ هاي خالتج ام شهاب و اشر علية كلهه هاي ملاذ زوجة ابني الصعب

:-هلا بيج عيني

:-هلا بيج خالة

:-كعدي عمو البيت بيتج لا تستحين

لزمت ايدي رتيل و كعدنة سوة اجت امهه كعدت بصف عمو احس روحي متقيدة و التلفون وترني كل شوية رسالة سويتة صامت و خليتة بحضني خبلني

رتيل:-شعجب جيتي واللة ما مصدكة

:-عمو شافني ضايجة وحدي كتلة اريد اجي وياك و صعب قبل

:-شعجب رضة هذا ابو راس اليابس يلة مو مهم لمهم انت اجيتي باوعت للتلفون كبل اجت رسالة ضحكت و رجعت احجي وياهه

:-اي واللة اني هم مصدومة هو كلش نحس بالطلعة ما يقبل

:-راح تبقين يمنة موو

:-لا بس اليوم

ام شهاب:-اي اعرف زوجج ما يحب الطلعة  اكيد يتزوج وحدة مثلة ما تحب طلعات

ابتسمت بدون ما ارد عليهه بقو يحجون بينهم رتيل كالت
:-بابا تسمحولي اخذهه يمي بالغرفة

:-اي بابا براحتكم

كامت و شالت جنطتي اخذت التلفون و رحت وراهه صعدت كدامي و اني امشي وراهه فتحت الرسائل بلبداية كاتب

:-حبيبتي شنو كلي لعمي خل يحجي عدل
راجع كاتب

التهيتي وياهم خوش لا تردين طبعا فرحانة

:-عجبوج موو واللة اطلع الطلعة من عينج اجيج هسه بس اسمع تحجين اسكتي لا تحجين وياهم

:-هي شعليهه ام شهابب لا تدخل بينة رجال و مرتة

كاتب كومة رسائل اقره بيهن و اضحك خليت التلفون على اذني اريد اشوفة راح لو بعدة صحت بصوت ناصي

:-صعب

:-هاا واخيررا حجيتي

:-شنو انت حارس على التلفون

:-مراقبج دير بالج تسوين شي

:-بعد ما اجي

فتت للغرفة و رتيل طلعت برة
صاح بصوت عالي

:-بكككيفج هي بكككيفج و الحق اجي هسة و ارجعج

:-راح اروح لامي

:-ممملااااذذذ ووولج ملااااذ خووش خوش جايج

:-لا والعباس لاااا

:- تأدبي والحقق اموتج

:-معليك ترة ما احجي وياك

:-جا هسة شجاي تسوين

:-معليك

رجعت التلفون على الجرباية شوية و اجت رتيل جايبة حلويات و فواكة

:-ما جوعانة رتيل اريد انام

:-تنام ام الوصخ ما تنامين واللة اليوم نسهر للصبح

:-واللة بطرانة

:-انت بطرانة

كعدنة على الجرباية سالفة تجر سالفة و اني عيني على التلفون كل موضوع نحجي بي يعلق من يمة موتني احسة مراقبنة لحد ما كالت

:-ملاذ راح اكلج شي بس ما اريد احد يعرف بي
نسيت التلفون كتلهه

:-شنو!

:-على علي

اول ما كالت هيج ذكرت التلفون مخليتة قريب مني لا اكدر اخذة و لا اكدر اسكت رتيل

:-شوفي راح انام بعدين احجيلي

:-لااا شنو تنامين شبيج انت كتلتي روحج على النوم شوفيي علي كلي راح يجي يخطبني بهل ايام بالكت شهاب و ابوي يقتنعون

:-اييي شوفي نامي نامي

:-شبيج هسة اني جاي احجيلج موضوع مهم انت تكليلي نامي

:-اي واللة فرحانة اني يلة بس بعدين احجي

:-شبيج خاف مريضة انت كالت هيج و خلت ايدهه على راسي تتلمس بي

:-ما بية شي واللة بس تعبانة ما نايمة

:-هااا صعب مسهرجج حكة عمي حكة يسهرج

فتحت عيني مصدومة احس مثل بلاع الموس ما اكدر اسوي شي

:-واللة انعس خل ننام

:-ناممي بس واللة اكعدج من الصبح خاف تكولين

:-اي ميخالف بس هسة نامي

فرشت النة بالكاع ثنينة تمددنة على الفراش غطيت راسي و التلفون بيدي رتيل لزمت تلفونهه لكيتة ما داز رسالة على موضوع علي كتبتلة

:-وينك

شوية و كتب
:-ها

:-شجاي تسوي

:- بالصالة متمدد

:-روح للغرفة

:-ليش

:-احسن

:-لا اريد انام بالصالة

:-شوف الاتصال راح يصير الة ثلث ساعات اسدة

:-لا خلي ع اذنج اريد احجي شي

:-شتحجي

:-لبسي هتفون

:-ما عندي

:-اخذي من مرة علي اقصد من رتيل

سويت روحي ما سمعتة وخرت الغطة من وجهي كلت لرتيل على هتفون كامت جابتلي لبستة و دزيتلة رسالة

:-لبستة

:-امم تسمعيني

هو يحجي و اني اكتب رسائل

:-اي اسمع

:-‏اخ ياطير المحبه هم سمعت بطير
ماشدة الحنين لديرته وعشه

كتبتلة:-ييعني شنو

:-مااشتاقيتي لحضني

:-ههههه هو اني شاردة منك

:-تفرين الدنيا كلهه بس ما راح ترتاحين الة بحضني

:-خاف ما ترضى

:-و داعت عيونج لو شما اسويلج ما تكدرين بدوني

:-كول انت ما تكدر اي
اني كادرة و هسة انعس و راح انام

:-حلفي

:-مااحلف يلة روح اريد انام

:-نامي

:-شعليك بية من يعجبني انام

:-انت جوعانة اجي و اجيبلج شي تاكلينة؟

:-ما اريد

:-اليوم تأذيتي

:-لا

:-ليش تخليني أأذيج

:-اسأل روحك

:-ملاذ تعاي

:-وين

:-اريد اشرب جكارة شلون بية

:-اشرب

:-ياهو يورثلياهه

:-انت

:-ما اكدر اني اجيج تورثينهه الي

:-لا

:-جا روحي نامي

:-يلة راح اسد التلفون

:-جؤ عوفي

:-ما شنو تراقبني انت

:-معليج ترة اجي اخذج

:-شنو تهددني ترة ليل الناس نايمة شتجي

:-شعلية بالناس اذا اريدج اجي خلي التلفون يلة

:-و انت شوكت تنام

:-معليج نامي

خليت التلفون بصفي و نزعت الهتفون شسويلة ما يقتنع بشي اجتني رسالة منة فتحتهه كاتب

:-نامي زين لا تفكرين بشي

ما رديت علية غمضت عيوني حاولت انام ما اكدر
رجعت الهيتفون بأذني اسمع صوتة موجود تحركت اعدل نومتي حجة بصوت ناصي

:-بعدج كاعدة

ما رديت علية و لا هو حجة

بقيت هواية كاعدة خليت التلفون جوة المخدة و تأكدت منة بعدة مفتوح الاتصال طلعت برة اريد اشرب مي سديت الباب على كيف خاف يسمع صعب

نزلت الدرج شفت واحد كاعد بالصالة منطيني ضهره و المكان متروس دخان قربت منة عرفتة من صوتة شهاب بس اول مرة اسمعة يحجي بصوت مكسور مثل اليترجة بشخص وكفت قريب منة عرفتة يحجي وية بنية

شهاب:-روح شهاب انت بس افهمي باجر اجيب اهلي و اجي شيردون انة حاضر اجيب عشيرتي كلهه شيطلبون موافق بس كولي اي لا تكسرين بية

بقى ساكت شوية الضاهر هي تحجي رجع كالهه

:-خل يأذوني المهم ما تصيرين الغيري ما اعيشج هنا لا تخافين من احد ابعدج عن الدنيا كلهه شوفي هو باجر مو يجيي انه هم اجيب اهلي و اجي و راح تخرب الخطوبة ححتلو ما يوافقون علية راح يعوفج هذا الكلب

رجع الهدوء و طول الوكت يشفط بالجكارة طول يلة رد عليةة يحاول ما يعلي صوتة بس واضح صار عصبي

:-لججج بينااات معليج بية خل يكتلوني ببس لا ينطونج لغيري شيسوون خل يسوون انة مو مهم خل اخذج و اموت راضي لجج يا قنندرة يا قندرة افهميني ما اكدر بلياج لا ترحين

شوية و سد التلفون شمرة على التخم و خلة ادية على راسة

حمحمت علمود يلاحض وجودي كبل دار وجهه علية عيونة حمر و مغوركة من شافني ابتسم و رجع دنك كعدت كدامة ثنينة ساكتينن ما اعرف شلون اببدي الحديث

:-شهاب

بقى ساكت شوية جان مشابك ادية وحدة بالثانية و مدنك راسة رفع ايدة مسح عيونة بأصبعة الابهام و باوعلي يحاول يخفي ضوجتة بس واضح من ملامحة شكد مكسور

:-ها ملاذ شعجب اليوم جايتنة لا وبايتة ما اصدك ابو راس اليابس اقتنع

:-هه اي بس انت شبيك

:-اني!

:-اي

:-ما بية شي تعبان بالشغل

:-تحبهه؟

خلة عينة بعيوني احس ملامحهه بهتت بلع ريكة و جر نفس ابتسم و مسح شعرة بيدة

:-شالفايدة الحب وحدة ما يفيد اذا مو الطرفين يضحون

:-ضحي

:-ضحيت و مرتين تقدمت الهه و رفضو حتى اهلي بعد ما يجون وياي ولج كتلهه اجيب عشيرتي كلهه واجي بس رفضي الجايج باجر بس ما بيدهه شي

:-ليش ما ينطونهه الك

:-اخوهه

:-اللة كريم يجوز ما بيهه صالح

:-لا يابوي اللة يدري روحي بيهه بس حضي عاثر

:-كول ياللة كوم نام الوكت متأخر و ما يصير بس الكاتبة ربك

:-روحي نامي خوية اني شوية و انام

:-لا تضوج شهاب

ضحك و حرك راسة بمعنى لا عفتة و صعدت ما ادري ليش بجيت يمكن لان اول مرة اشوف شهاب هيج مكسور سديت باب الغرفة على كيف فتحت التلفون لكيتة محروك حرك سبع مرات متصل و بالعشريين رسالة اجت عيني على اخر رسالة كاتب

:-وينج شو ماللج صوت ليش سويتي التلفون صامت انت كطعتي الاتصال مو راجع كاتب جواهه

:-جايج

من قريتهم كلبي كام يدك كبل اتصلت عليية بنفس اللحضة رد علية كبل صاح

:-ووويننج انت وووينج

:-نايمة يعني وين

:-للليش تسوين التلفون صامت

:-نسيت

:-جاي اني

:-شنننو وين جاااي

:-حضري اغراضج ما اتأخر

:-يااا انت تحجي صددكك صععب نايمين

:-اني جايج ما جايهم و انت كاعدة

:-صعب

:-يلة باي

سد الخط بدون مااحجي شي رجعت اتصلت مرتين يرفضة يأست منة كمت لميت اغراضي باوعت لرتيل نايمة كسرت خاطري اكعدهه و الساعة ب 2 وربع بليل اذا كعدتهه تخترع بقيت كاعدة شوية و طلعت اريد اشوفة باوعت من فوك شفته هو وشهاب بالصالة يشربون جكاير هزيت ايدي ردت افوت للغرفة دزلي رسالة

:-نزلي لا ترجعين

بقيت اتلففت وين شافني و اني بس طلعت راسي سديت التلفون و نزلت كعدت يمهم يسولفون بينهم شهاب باوعلي كال

:-هاا ما كدرتي تنامين الة جبتي

:-هو مو اني

:-اي صح هو و ياهيي الجانت تحوس بالبيت ما تكدر تنام
باوعت على صعب هستوني جذبت علية كلت نايمة رفع حاجبة و ابتسم كال

:-اي ما تكدر تنام الة بحضني

:-صعب شبيك؟

:-يلة كومي بابا كومي لا يكعدون

:-لعد من يكعد عمو الصبح مو عييب منة

:-لا عادي كليلة عمي ما كدرت انام الة بحضن رجلي

باوع على شهاب و ضحكو بصوت عالي بقيت ساكتة مالي خلك ارد عليهم كام سلم على شهاب و اني مسوية روحي ضايجة منهم ما احجي كال شهاب

:-فوكاهه هم مخابرة رجلج و هم ما راضية عمي زين مني و سكتت

:-اسكت انت اسكت لا تدخل المهلس

:-ديلا شوف منو تحجي علية اني منج اضل ساكت طول عمري على هل حاجب الشايلتة

:-اهووو شعليك

الصعب:-امشي ملاذ كدامي اذا اعوفكم للصبح ما تكملون

طلعو و اني امشي وراهم تسالمو و صعدنة بالسيارة شهاب وكف من جهتي

:-الحلوة زعلانة الحلوة زعلانة منهو اليراضيهه صعوبي يراضيهه

:-شهاااب شبيك انت صاحي

ضحك و وخر صعب شغل السيارة و مشة بقى ساكت الطريق فارغ بس سيارتنة و كم سيارة ماكو اي ازدحام كسر صمتنة صعب

:-ملاذ

:-ها

:-جيبي التلفون

:-اريدة

:-جيبي

:-هو ما بي شي و حتى رقم امي ما حافضتة خلي عندي من تروح للدوام اتونس بي

:-جيبييي

:-اهوووو هاااك

طلعتة من جيب القمصلة و نطيتة الة

درت وجهي على الجهه الثانية شوية وصاح

:-ملااذ

:-سم بگلبهه شتريد منهه

:-خل تورثلي جكارة

:-وينهه

:-بالجكمجة

طلعت باكيت جكاير و جداحة ورثتهه و نطيتهه الة سحب منهه نفس

:-ملاذ

:-هاااا هااا يا طلالة ملاذ

:-ضايجة

:-لا

:-بيا ايد ضربتج اليوم

:-اسأل روحك

وكف السيارة على صفحة باوعتلة مستغربة شبي خلة جمرة الجكارة ببين اصابعة و طفاهه

سحبتهه من ايدة بسرعة لا ارادياا خفت علية

:-ششبييكك انت تخبلللت

:-هاي ايدي ضربتج بيهه

:-لااا تسوي هيجج مخبلل انت مخخخبلل

:-ادري بروحي راح اضل أاذيج لمن اخذ الشي الاريدة كل ما أاذيج راح احرك ايدي علمود اعرف كم مرة كسرت گلبي

:-بس ما راح تكسر گلبك بهل سوالف صعب كتلك ما عندي شي

:-لا راح اكسر بگلبي كل ما أأذيج راح ابعدج مني و هيج راح اتأذة انة بس بالمقابل راح اعرف كلشي اريدة

:-مو مني تعرف دور غيري يحجيلك

:-ما عندي خيار غيرج

:-ما اعرف شي اني

:-تعرفين كلشي

:-ما اعرف صعععب ما اعرررف

ما رد علية شغل السيارة و رجع يمشي بالسير
:-نروح للبيت الجديد

:-شلون نكدر

:-اي كلشي مجهز و كامل حتى مفتاح البيت عندي

:-لا نروح للشقة عود باجر نروح للبيت

:-لا خل نروح علمود تشوفينة

:-اغراضي و ملابسي

:-باجر نروح للشقة نجيبهن

:-متأكد

:-اي

:-بكيفك

ما تأخرنة بسرعة وصلنة لان ماكو ازدحام نزل و اني نزلت وراه فتنة للبيت كلشي مجهز حتى مفروش عبارة عن صالة و غرفتين و مطبخ ما جان الي واهس افتر بالبيت باوعت لصعب كتلة

:-بيا غرفة انام

اشرلي على وحدة منهم رحت للثانية عناد بي فتحتهه ما نفتحت مقفولة

:-شنو ليش ما تنفتح؟

:-اعتبرية مثل ذيج الغرفة لا تنفتح و لا احد يفوت الهه

:-مال مجرمين قصدك

كلت هيج و فتت للغرفة الثانية نزعت القمصلة و خليت اغراضي على الميز

فات صعب للغرفة درت وجهي علية ردت احجي
من شفت معانية شلون حادة سكتت

ما حجة شي سد الباب و خلة ادية بجيوبة قرب مني

:-شكو صعب؟

:-ليش تكليلي جنت نايمة و انت جنتي كاعدة

:-نزلت جوة اشرب مي

:-اممم زين يلة بما انو ثنينة كاعدين و محد يمنة
احجيلي

بلعت ريكي خايفة احاول ابعد عيوني عنة
:-شحجي صعب شحجي الف مرة اكلك ما اعرف شي ليش ما تعوفني

:-اليوم شنو كلتي لعمي؟

حسيت رجفة صارت بكل جسمي معقولة سمع كلامي وية عمو هادي

:-شكلت

:-شحجيتو اليوم؟

:-شمعرفك

:-احجيلي

:-سمعتنة؟

ابتسم و قرب مني اكثر صرت بينة و بين الحايط من جهتي اليمنى صايرة الجرباية و من الجهه الثانية ميز

:-ههههه لا بس جنت اختبرج و طلعتو صح حاجين جنت شاك تعرفين شي اني ما اعرفة و هسة تأكدت و هل شي هو الورقة

:-لاا ما عندي ما حجينة

دنك بدون ما يحجي شي عيوني تراقب حركاتة فتح الميز و طلع مسدس رفعت عيوني اترجة بي ما يسوي شي
سحب اقسام و باوعلي
يمكن ما يدري بروحة شجاي يسوي دموعي تنزل لا اردايا و شفتي الجوة ترجف كمت اجر النفس كوة

:-صصععب فدوة اني معلية

:-احجي

:-ماا اعرف شي

رفع المسدس خلاة براسي

لزكت نفسي بالحايط ارجف و ابجي احس بالمسدس شلون ملامس جبيني جريت نفس قوي حجيت بصوت عالي و يرجف

-صعععببب عوف الكتاااب عووففهه هي مجرد صفحه خليينه نطويها خلينه نعيش مثل باقي النااس عوف هل صفحة لا تدمر حياتنه بيهاا

قرب مني و ابتسم نص ابتسامه كال
:-حياتتتي ملاذ مو حياتنه بالحق اذا هل صفحه طلعت عندج امحي وجودج يا ملاذ بلعت ريگي بخوف كتله

:-آخاف عليك صعبب اخافف عليك من هل صفحه ما تعرفهم مجررمممييننن يا صعبب مجرمممينن

اقترب مني و لزم فكي بقوه
:-وين تروح مني لابد اعرف شنو بهل صفحه اذا مو امج ف انتِ واذا مو انتِ اوصل للجحيم و اجيبهااا

:-لا تحاول تموت

:-اذا ثمن وصولها الموت مستعدله اذا همه مجرمين ف
اني المُنتقم

.
.
.
.
.
.
.
.
.
.
.
.للحكاية بقية

كلانا كتف للاخر♥
الوريد♪

البارحة كمل البارت و جنت ارتب بي للنشر و فجأة نحذف كلشي بحيث مرتين افوت اتأكد عبالي متوهمة كلشي سويت بس علمود ارجع البارت بس مكدرت كعدت ابجي لان كلت خلاص ما اكدر اسوي شي و بالحضة اجيت احذف القصة و احذف كل تعبي بعدين كلام هواية منكم خلاني ارتاح و كلت يمكن صح رب العالمين يجوز ضاملي احسن من هل شي و اكدر اكتب بارت احلى من هذا وصح هسة من رجعت كتبت ايقنت اكدر اكتب بارت احسن من القبلة احبكم❤️

شنو رأيكم نغير صورة الغلاف لو نبقى على القديمة؟