رواية أنتقام الصفحه 27 (ترميم) الفصل التاسع وثلاثون 39 - بقلم خـلود الـ محسن

إلكاتبة لورا

انستا للتواصل lorai_alrwi

تفاعلكم ع البارت عيناي

شبابات اشتركو بقناتنا على التلي
………………………………

أنا ألصعب

قبل 18 عشر عاماََ

اقف وحيداً  أمامَ شُعلة من النار وأتسأل من هي الروح التي أحرقتْ هُنا!!

طفل ذو احدى عشر عاماََ عاد مبتسماََ ليرى والدتة مرةََ اخرى لكن ما الذي وجدهُ!

هنالك روح محروقة تحوم في كل مكان تتحاشا الوصول الى ابنها كي لا تحرق طفلها بالنيران التي شبت بها

صراخ لهيب نار ام و ابنها

كل ما تصل لةُ يشب ناراََ معها و كلُ من رأى المنضر
.... قال لقد انتحرت تلك الزانية

جانو عمامي يمنة بعد ما اشتد الحديث بينهم و بين امي كالت

:-صعب خلي امك رُفيدة تجي

:-حاضر

رحت اركض لبيت رفُيدة جانت لازمة ملاذ تنوم بيهه كتلهه بكلام امي كالت

:-هسة يمة كلهه تنوم ملاذ و تجي

باوعت بحضنهه بست ملاذ و رجعت ركض لبيتنة علمود اكل لامي راح تجي

وصلت كدام بيتنة اشوف نار مشتعلة وكفت متصنم مشبث نضري على النار الكدامي روح داخل هاي النار واكف وحيد انضر لهل نار الي تركض بكل مكان تريد تطفي الجمر البيهه تقدمت اريد الزم النار وكفت بمكاني بعد ما شفت هل نيران المشتعلة صارت بالكاع

درت وجهي اشوف الناس ملتمة بكل مكان و امي رُفيدة واكفة يمي دموعهه تنزل و جسمهه يرجف خلت ايدهه على عيوني سحبتهن منهه اريد اتأكد من المنضر الشفتة اعضائي تتحرك لكن روحي واكفة بعد ما شافو هل روح نسلبت روحهه الكل بدة يركض لفوهه ببطانية و امي رُفيدة تركض وياهم و تصرخ اسمع يصيحون

:-ماتت ماتت

هل كلمات تطلع من لسانهم لكن تفوت مثل النار لگلبي برود اجتاح روحي اريد اصيح هاي امي اريد احجي بس كلشي بداخلي يمنعني كعدت بمكاني مكرفص و حاضن روحي اباوعلهم شلون يلمون بشتات روح ماتت

من لحضة الوكعة بالكاع ماتت و عافت ابنهه وحيد كل شي صار برمشة عين

ورة لحضات الناس تركض و ناس تبجي اجة واحد من اهل المنطقة شايل بيدة ورقة و وياة مجموعة اشخاص بقو يتنقلون هل ورقة بينهم

من وصلت لايد امي رُفيدة قرتهه و صرخت بصوت عالي جانت اعتراف من امي على انتحارهه

كل ما اذكرة جانت رُفيدة محتضنتني لكلبهه و تصرخ و ناس تجي تشوف منضرنة و تروح اندفنت روح اندفنت احلامهه وياهه جانت تحلم تشوف هل طفل يوم من الايام واصل جانت تحلم اخذهه بيدي و ازورهه العمرة جانت و جلنت لكن عود شخاط انهى الف حلم و اخذ روح من بين الاف الارواح

جنت اشوف شلون دموعهم تنزل بس ما نزلت دمعتي
اشوف شلون يغيرون الوانهم بلاسود بس انة بعيد عنهم كمت من حضن امي رُفيدة اريد افوت لغرفتنة اني و امي اسمع كلام النسوان بينهم

:-ماتت منتحرة ....ماتت و هي على حرام... ماتت الزانية ...

رغم طفولتي بس الحجاية تحز بالخاطر وكفتني حجاية وحدة من بين الكاعدين كالت

:-المفروض مو بس تحرك روحهه المفروض تحرك ابن الحرام العافتة

درت وجهي عليهه جان كلامهه بصوت عالي الكل يسمع امي رُفيدة بس تبجي حالتهه تعبانة حتى من احد يحجي ما ترد

كلمة زانية تردد بأذني و اني طفل
:-امي اشرف منكم

الكلمة الوحيدة الكدرت احجيهه بهل لحضة المرة بقت تصيح و اني فتت للغرفة امي رُفيدة تعاركت وياهه و طلعن النسوان من البيت رفعت راسي على الحايط هذا اكثر مكان امي تحبة هنا معلكة روحهه صورتهه هي و ابوي خليت مخاد صعدت عليهن و نزلتهه كعدت راكي ضهري على الحايط و الصورة بحضني

_جان حلمي احس بشعور يكون عندك اب حضيت بحنية الام كاملة بس خسرت شعور تكول يابة و اليوم صعب اكل لاحد امي اليوم خسرت حنية الام

مسحت الصورة و ضميتهه بالكنتور ما اكدر اباوع لهل صورة مرة ثانية طلعت رُفيدة واكفة بالباب بس شافتني حضنتني تبجي

:-رُفيدة

جانت اول مرة اكلهه بأسمهه بدون كلمة يمة رفعت راسهه تباوعلي عيونهه مملية دموع

:-من ورة عمامي امي انتحرت همة السبب

سحبت ايدي باستهه تمسح على وجهي
:-اسكت يمة لا تحجي هيج اللة يرحمهه

ثلاث ايام رُفيدة ما عافتني جانت هاملة بيتهه زوجهه و بتهه كل الي سويته بهل ايام مخلي ملاذ بحضني من رُفيدة تطلع للناس الي يعزونة اني احجي لملاذ شنو احس جنت استصعب احجي لاي بشر غيرهه رغم جانت طفلة ما تستوعب شنو الاحجي

كعدت كدامهه متربع
:-ملاذ شوفي اني مو امي ماتت و بعد ما اشوفهه بس ما راح انساهه و من تكبرين تصيرين بكدي احجيلج عليهه
تسمعني احجي و هي تناغي

ثالث يوم و اني ما نزلت دمعة من عيني ما حجيت وية انسان كل الاسمعة قذف لامي محد عرف شنو بداخلي جنت بس اسمع كلمة احجيهه لهل طفلة جان الوكت ليل احس شي يخنك ببلعومي تمددت بصف ملاذ بعد ما نومتهه

فاتت رُفيدة للغرفة جانت تضن اني نايم احس بيهه شجاي تسوي خلت ايدهه على راسي

:-ما اعوفك لو شيصير مستعدة اسوي كلشي علمودك راح اواجة الدنيا علمودك

بقيت مغمض عيني ما اريد اشوف كسرتهه كدامي ندك باب الغرفة و سمعت صوت احمد

:-رُفيدة الفاتحة و خلصت رجعي البيتج الطفلة متمرمرة

:-و الصعب

:-عندة اهل و ياخذونة تردين تبلينة بطفل

:-ما يردونة بس يروح يتمرمر هناك اني مثل امة و اربي

:-رُفييدة اياج تفكرين تربين طفل مو النة بنتج بس ملاذ اليوم ترجعين لبيتج

:-احمد مااعوف الصعب لو على كص ركبتيي

فتحت عيني و كعدت رُفيدة انصدمت من شافتني كاعد
:-رُفيدة ما علية شي بيتنة يمكم تكدرين ترحين

:-لا يمة ما اعوفك

جانت تحجي وياي و تمسح بشعري احمد فات للغرفة اخذ ملاذ من الفراش و كام

:-اذا تبقين بهل بيت ملاذ ما تشوفينهه

طفرت من مكانهه راحت على احمد تريد تاخذ ملاذ منة

:-احمد على موتي تاخذ بنتي منيي اني العانيت بيهه اني اانتضرت عشر سنين يلة صارت انني الي تعذبت مو انت

:-و اني الي صبرت عليج كل هل سنين علمود طفل اذا عاجبج هذا البيت ابقي بي

كامت تلطم وتبجي بصوت عالي و احمد اخذ ملاذ و طلع كمت من مكاني واكف كدام رُفيدة

:-رُفيدة

صاحت بية
:-لااا تكلللي رُفييدة لا تكللي اني امك انننيي مو تسميني يمةة

رجعت ليورة خايف من صوتهه العالي
:-روحي لملاذ بس تكعد تبجي عليج

:-تعال وياي

:-ما علية شي روحي لملاذ

:-ما اعوفك

:-انة موجود هنا ما اروح بس ما تدرين احمد وين اخذ ملاذ روحي

:-صعب ارجعلك واللة دير بالك على روحك اجيك بس اجيب بنتي

حركتلهه راسي بمعنى اي طلعت و رجعت بمكاني گلبي يم ملاذ خاف اخذهه خاف ما ترجع طلعت من البيت ضلام الكل نايم اصوات جلاب بعيدة و الشارع فارغ امشي و اتلفت وصلت لبيت رُفيدة اصواتهم طالعة برة البيت اول ما وصلت كلمة احمد وكفتني بمكاني

:-كلة ابن حرام تردينة يعيش ببيتي و يسوي شي لبنتي ابن الحرام يضل كل عمرة يشتغل بالحرام

باوعت من الشباك جان شباك بيتهم مطل على الشارع
ملاذ بفراشهه تصرخ عيوني بقت عليهه عفتهم و رجعت لبيتنة

فتحت كنتور امي جان كلشي مرتب على ايدهه اخذت صورة الها و لابوي و اخذت جناسينة اني و امي و جان عدهه جنسية لابوي وفلوس جانت تجمعهم الي علمود الدراسة ردت اسد الكنتور تراجعت من شفت ربطة لامي شلتهه من مكانهه شميت عطرهه بي عطر هل روح اذكر هل ربطة شنو تعنيلهه بيوم من الايام كالت

:-هاي اول ما تحجبت ابوك جابلي هل ربطة مستعزة بيهه اكثر من روحي

عصرتهه بين ادية اخذت  ماشة شعر جانت لامي لفيتهه بالربطة و خليتهن بجيبي هنة و الجناسي و الصور

طلعت من البيت امشي بطريق مظلم بين الفروع اريد اوصل للشارع العام ما ادري شنو الصار وراي ما ادري اذا رُفيدة عرفت بية رحت لو لا كعدت بالشارع جان ليل و ماكو سيارات قليل تفوت

جنت طفل ما افهم شي كل الاعرفة اريد اوصل لانسان يحتويني اريد اخلص رُفيدة مني ما اريد تتعذب اكثر بتت بالشارع اول ليلة تفوت و عيوني ما ضاكت النوم اول ليلة تفوت و انة بعيد عن امي روح و رُفيدة

للصبح انتضرت صعدت بسيارة احس نضرات الكل غريبة علية بس جنت ابعد روحي عنهم مااريد ابين لاحد اني خايف بعمر 11 سنة طلعت من بيتنة وحدي اتجهت للبصرة جنت الشي الوحيد الاعرفة بالبصرة اسم المنطقة العايشين بيهه عمامي

اي سيارة اصعد بيهه اشوف الناس شلون تباوعلي اي مكان امشي بي اشوف شلون الناس مستغربة مني وصلت للمنطقة البيهه عمامي لهنا و كمت امشي بدون وجهه مااعرف شلون اوصل الهم ما اعرف منو راح اسأل

وصلت لمكان مثل السوك شفت رجال شايب يبيع وصلت يمة خوف بداخلي عكس شكلي الي ابينة للناس

:-السلام عليكم

:-هلا بوية هلا تفضل

:-تعرف بيت ابو احسان؟

:-بوية هواي ناس بهل اسم بس اذا گصدك اهل الشيخة انة اوصلك بيدي

ما جنت افهم كلامة شلون راح اعرف اني منو الي اريدهم خاف ياخذني لغيرهم

:-عمي همه اربع ولد احسان و راضي و عابس و هادي عرفتهم

ابتسم و حركلي راسي بمعنى اي
:-اهل الشيخة بوية وصلت خل اعزل دكاني و انة اوصلك بيدي

:-مشكور عمي

كام يعزل البسطية مالتة و اني واكف انتضر لما يكمل كال
:-شنو طلبك منهم

:-مااكدر احجي

:-شتعودلهم بوية

:-گرابة عمي

ما حجة شي كمل و مشة كدامي يسأل بية و اني مكتفي بكلمة جايهم بشغلة وصلنة كدام بيت جبير وكفت اباوع على الرجال

:-عمي هذا بيتهم

:-اي بوية تفضل للمضيف مالتهم و شني التريدة مكضي

جان بابهم مفتوح فات وياي الرجال اشرلي على باب المضيف

خايف اشوف عمامي خايف محد يحتويني خايف اضيع للمرة الثانية فتت من الباب و شفت المضيف كلة عالم معگلة شفت براس المضيف عمي احسان و بصفة عمي راضي اول ما شافوني كامو من مكانهم

كل الناس بالمضيف تباوع علية محد فاهم منو اني دنكت راسي امشي و اطرافي ترجف وصلت كدام عمي كتلة

:-عمي امي ماتت

ما حجة شي الكل واكف منتضرين يعرفون السالفة صاح عمي راضي

:-و ياهو انت؟

انصدمت من سؤالة شكد جايينة معقولة نسو شكلي بهل سرعة

:-عمي انة ابن روح

رد واحد من المضيف
:-انت گاصد مضيفنة يبوي امك شنو الجرالها وماتت وين اهلك

درت اباوع على الرجال ما اعرفة اول مرة اشوفة كل عمامي شايفهم بس هذا مو منهم تمنيت الكة عمي هادي بينهم يحجي بمكاني بس هو جان يحبنة اني و امي

اشرت على عمامي كتله
:-ذول اهلي

راضي:-ياهو هلك انت من ياديرة گاصدنة ياهو الموديك علينة

:-اني ابن عابس

بس كلت هيج كلهه كامت تتهامس بينهه و عمي احسان طفر علية يدفع بية

:-يا عابس ولك

:-انتم اهلي و عابس ابوي

كلهه كامت تصايح ما افهم شيحجون صارت هوسة

احسان:-هذا الفرخ واحد مودية علينة اخوي عابس مات ما متزوج

:-لا متزوج اني ابنة و امي روح مرتة

سحبني عمي راضي من بينهم و عيونة تجادح نار وكف كدام المضيف صاح بصوت عالي

:-احنة النة هيبتنة بين الناس اخوي صارلة عشر سنين مات بدون ما يتزوج و هذا الفرخ واحد مودية علينه يشوه سمعتنة بالديرة

جان لازمني من جتفي ضاغط علية بقوتة دفعت ايدة مني خليت عيني بعينة صحت بي

:-محد دازني و انت تعرفني كلش زين اني الصعب عابس و اذا ما تصدكون عندي دليل

مديت ايدي بجيبي طلعت جنسيتي اشوفهه الهم
سحبهه عمي من بين ادية و صاح

:-اهل الديرة كلكم تعرفون كل العشاير تريد طيحتنة و هاي لعبة منهم يخربون سمعتنة هذا الفرخ ابن زانية و جنة نجسيهم و مدبرين عيشتهم و اليوم الطمع طلع من عينة و اجة يمثل هو ابن اخوي الميت

:-عمميي احسان هاي جنسية ابوي عابس عندي

:-اطلع برة من اليوم انة اتنازل عن مساعدة اي واحد يتيم هاي مجازاتنة تالي

بدة ييحجي كلام للناس و يبين الهم هو يعرف امي و جان يساعدهه لان محد الها صاح عمي راضي

:-انة شاهد على كلشي حجاة اخوي و شاهد على هل فرخ من صار هذا ابن زنة و امة عشيرتهه تبرت منهه لاجن من اجت دخيلة النة ما سدينة ابوابنة بوجهه و اليوم هذا النلناة منهم اطلع يا ابن الحرام

گرب صوبي اخذت جنسيتي من ايدة سحبني من بين الناس دفعني برة المضيف عثرت و طحت

:-ولد الحرام مالهم ضلة بمضيفنة ما اريد اشوفك موتك على ايدي

اسمع صوت الناس و حجيهم بأمي و واحد يسأل الثاني من يا عشيرة طلع واحد من بينهم كال

:-احنة الزانية ما تعيش بينة و لا ابنهه اطلع من ديرتنة هل ديرة الهه كرامتهه و حرمتهه لا تدنسون هل سمعة بين باگي الدير

كمت انفض بملابسي طاحت ماشة امي بالكاع دنكت اخذهه و رجع عمي راضي يدفع بية دفعتة بكل قوتي عكالة طاح بالكاع و جانت نعالات تارسة الكاع طاح
بينهن دنكت راسي اخذ الماشة رفعني واحد من خوانيكي

و صاح بوجهي
:-طييحت عكال شيخ العشيرة ولللكك

خنكني بين ادية اسحب بروحي منة اريد بس افلت روحي

كلهه كامت تصيح و هذا اليشيل العكال و هذا اليصيح و هذا المطلع سلاحة

راضي:-انت لو ابن عشيرة و طالع من بزرة حلال باللة كاومنكم و اطلع حكي من بين عيونكم لجن انت تضل ابن حرام اطلع من ديرتنة لا تخلي شرنة يحتويك انت و امك الزانية

كل العيون تشع غضب كل واحد بينهم يريد ياكلني بين سنونة سحبت روححي من بينهم اريد اطلع بروحي العزيزة طفل اكلوا بشرهم

بس طلعت باب الدار و الكة عيون الناس علية ما ادري شلون طش الخبر ابن زانية دايس باب الشيخ ما ضل واحد ما حجة هل حجاية

قررت ارجع لبيتنة و ابتعد عن رُفيدة مديت ايدي بجيبي اريد اشوف شكد ضل عندي فلوس لكيتهن قليلات ما يرجعني لبيتنة ضليت امشي لحد ما وصلت لمكان شبة فارغ بس حديقة قديمة كعدت بي ما اندل اني وين بنفس المنطقة لو طلعت منهه

البرد اجتاح جسمي طلعت اغراض امي جنسية ابوي اخذوهه مني لليل و اني كاعد بمكاني من شفت الضلام حاوط المدينة قررت ابات الليل هنا و اطلع ثاني يوم

جانت اكو شجرة بوسط الحديقة القديمة شجرة يابسة كعدت يمهه و ركيت راسي عليهه بس غمضت عيني نمت ما حسيت بالصار

احس واحد ينغز بجتفي فزيت من نومتي و اشوف عمي احسان بيدة سلاح ينغزني بية و عمي راضي يمة و شخص شكلة مخيف بشكل ضخم لدرجة ما تنوصف و وجهه كلة اثار قديمة كمت من مكاني ما ادري بيش الساعة بس جان ليل اول مرة ينحط سلاح على جتفي

تراجعت بخوف عيوني تلاحك فوهة السلاح اتخيلت لهنا و انتهت حياتي انصدمت من قرب مني الرجال الي وياهم و سحبني من ايدي نفضت ايدي منة

:-ششراايددد وخر شرايدين مني انتم

ما حجة شي خلة وصلة على خشمي كلشي غوش كدامي ما شفت شي كعدت بمكان شبة مهجور بس انة و ثنين اطفال يمي لزمت راسي الوجع كتلني صاح واحد من الكاعدين

:-شوية و يروح الوجع

وخرت ايدي من راسي اباوعلهم بنية وولد ثنينهم اصغر مني

:-شمعرفك

:-انة هم هيج صاير بية

:-وين احنة

:-بيد الاشوح

:-منو شجابني هنا؟

:-حالك حالنة نبعت

كمت من مكاني متجة للباب اريد افتحة مقفول بقيت ادك بي بقوة محد يفتحة

:-الصبح يطلعونة منا

درت وجهي على الولد جانت يمة بنية متمددة تريد تنام
:-وين يودونة

:-انت اول يوم الك هنا راح تفهم بعدين نام

:-شوكت اطلع منا

:-ماكو طلعة

ماعرف افسر اليحجي و كفت كدام الباب اروح و ارجع منتضر احد يفتحلي الباب رجعت اباوع للولد

:-بيش الساعة هسة

:-ما ضل شي للصبح و نطلع

مديت ايدي بجيبي ادور على الغراض لكيتهن طلعت الربطة حضنتهه و كعدت بالكاع الي جانت عبارة عن تراب و بيهه فراش قديم ضليت طول الوكت على كعدتي

سمعت الباب نفتح رجعت الغراض بجيبي و سديت السحابة اخاف احد ياخذهن مني فات واحد اشر للولد و البنية طلعو بدون ما يحجون و ضل يباوعلي

:-شتردون مني؟

جان ياكل مصقول و يحجي بيدة بطل غريب طريقة حجية تخلي الواحد يقرف منة

:-شسمك انت

درت وجهي لعبانة روحي منة
:-لا تتعبني اسمك شنو

ما حجيت قرب مني كعد كدامي و عصر وجهي بيدة
:-هاي الحركات ما تمشي هنا جاوبني لا يجي الاشواح يشوف شغلة وياك

جريت ايدة من وجهي  عصرهه بقوة علمود ما احركهه تفلت بوجهه ما احس غير ضربني راشدي خلة اذني تون

:-دير بالك تعيدهه و احجي شسمك

نزلت دموعي من وجع الضربة مسحتهن و رفعت راسي علية
:-طلعوني منا اريد ارجع لبيتنة

صاح بصوت عالي
:-شسمممككك

ضليت مشبث عيوني بعيونة و هو ينضرلي بتحدي رجع لزم وجهي بيدة و طلع المصقولة من حلكة درت وجهي لعبانة روحي منة فتح حلكي غصب و اني صاك على اسناني و ارفس جواة

فوت المصقولة بحلكي و طبكة لعبت روحي منة صاح

:-علمود ما تتنوعلي بهاي النضرة مرة ثانية بس وخر تفلت المصقولة بالكاع

سحبني من ايدي و طلع جان المكان عبارة عن اطفال بنات و ولد كلهه تبدل و مخلين جنط على اجتافهم بعمري اكبر مني اصغر مني سحبني من ايدي و اخذني لمكان واحد كاعد ياكل باوعت بشكلة زين نفسة الشفتة وية عمامي واكفين يمة ثنين مثل الاصنام شافني و ابتسم

:-نورت عائلتك الجديدة

جريت ايدي من اليمي تفلت علية و ابتعدت رفعت راسي على الكاعد ضحك بصوت عالي كال

:-متربي كبل لا اتعب روحي بي

تفلت علية من حركة روحي كام من الصينية و اجة بأتجاهي لزمني من ياختي

:-تعجبني انت لا خفت من عمك رفع بوجهك سلاح و لا خفت من انت كدامي

:-عووفنني كلب رجعني لاهلي منو انتم

:-احنة اهلك

كال هيج و خلة اصبعة بحلكة ينضف بأسنانة تصرفاتهم تكلب الروح دار وجهه مني كال
:-الصعب اسمك

رجع باوعلي
:-اريدك كول و فعل صعب

:-شتريد مني

:-انت بين ادين الاشوح

احس روحي ضايع بين وحوش كلامهم جان عبارة عن الغاز عافوني واكف و راحو يحجون و يشتغلون و اني منتضر احد منهم يفهمني شجاي يصير فاتو الاطفال صاح بيهم المسمى بلاشوح

:-كل واحد يكمل شغلة مثل ما موصيكم علية الي يجي و ما مكمل البيدة يتحاسب و تعرفون حساب الاشوح شنو
كال هيج و كل الاطفال طلعو انتبهت اول ما طلعت الاطفال يخلون بجنطهم اجياس غريبة ما فهمت شي منهه

صحت علية
:-شوكت ترجعني لاهلي

:-كتلك احنة اهلك الصعب مو؟

ما جاوبتة صاح
:-انسى اسم الصعب انت غمار

ما فهمت شي رجعت للغرفة الجنت بيهه محد اكو حتى الجانو وياي طالعين للعصر رجعت الاطفال كلهه جانت بديهم فلوس يسلمونهه للاشوح الكل ياكل نفس الاكل الكل ينام بنفس الوكت الكل يطلع نفس الطلعة و الكل يشتغل بهل مكان

كل طفل بينة يستلم جنسية لان كل شخص بينة ما يمتلك جنسية جنت الوحيد بينهم شايل جنسية و محد يعرف بهل شي كمت اضمهه ببين اغراضي و من انام اخليهه بملابسي صرت حالي حال الاطفال اطلع اجدي و ارجع العصر

يطلعون ويانة شخصين يراقبون حركاتنة محد بينة يكدر يتنفس شي يجي الليل يشربون الاطفال نص حباية جنت الاحض الي يشربهه يفقد وعية يتصرف بدون اردتة و من بين هل اطفال جانو ينطوني هل حباية اخليهه جوة الساني ابين الهم شربتهه اول ما يرحون اذبهه بدون محد ينتبة و اغير تصرفاتي

حتى الي وياي ريم و عباس جانو اخوان من ضليت وياهم عرفت حالهم من حالي نباعوا لهل عصابة

كل فترة يجي طفل جديد ويانة صرنة منهم وبيهم الليل يكضونة سكر و حفلات و النهار حجيهم بالجرم احنة كلنة نفس الشغل نص من عدنة يبيعون م/خدرات و النص الثاني يجدون

جنة كاعدين نتعشة فات واحد من بين هل اطفال اسمة مرتضى ملاحظ علية يريد يسيطر على كل واحد بينة اكبر و اضخم مني قرب يمنة و جر عباس و كعد يضرب بية اباوع للاطفال كلهه تباوع و ساكتة عباس بس يدافع على روحة

  اختة تصرخ تريد تسحبة من بينهم  و الاشوح و جماعتة يباوعون بكل فخر و يضحكون يشجعون بمرتضى علمود يأذي

درت وجهي شفت سجينة ام الياي مخلاية على شباك الغرفة اعرفهه سجينة القاتم جان هل شخص ذراع الاشوح وين ما يروح وياة و هو بنفسة يشرف على الحبوب الي ينطونهه النة

سحبتهه و طفرت على مرتضى ادفع بي من راد يضربني فتحت السجينة اريد اضربة فقدت ما ادري بروحي شجاي اتصرف من شافو هيج فازعونة و اخذو السجينة مني بعد هل موقف قوة علاقتي بعباس بس لليوم ما حجيت شي يخصني الهم فتت اغسل ادية طلعت صار قاتم كدامي

:-سالمين شتريد انت؟

:-عاجبني غمار

خلة ايدة على جتفي دفعتة مني
:-هييي لا تلمسني تلعب روحي منك احسك مجاري

ضحك و مد ايدة على ركبتي ابتعد عنة منقرف من حركاتة تفلت علية و طلعت و هو بس يضحك فتت للغرفة عباس كاعد يشخبط على الكاع و ريم تعزل بملابسهم باوعت وياه

:-شجاي تسوي

:-ارسم

ضحكت و اخذت العود من ايدة كعدت ارسم و احجي وياة بصوت ناصي ما اريد ريم تسمع شنكول جان عمرهه 9 سنوات

:-عباس سؤال

:-كول

:-صارلك شكد هنا

:-راح يصير سنتين

:-زين ما فكرت تشرد منا

:-ما نكدر يلزمونة

:-زين عباس قاتم شبي؟

:-شبي

مسحت على الكاع بيدي اعدل بالرسمة
:-قاتم ييتحرش بالولد هنا؟

سد حلكي و بقى يتلفت بالغرفة
:-غمار دير بالك تحجي يم احد قاتم يكتلنة موت
:-الاشوح يدري؟

:-لا ما يدري و لو يدري راح يكتل قاتم لان هل اطفال كلهم ملك الاشوح محد الة حق يقرب من عدنة شوف حتى قاتم حالة حالنة انباع لهل عصابة و ضل يشتغل وياهم

سكتت ما ارد علية كملت الرسمة باوع عليهه عباس كال
:-شلون تعلمت ترسم

:-احب الرسم

:-هاي عيون منو؟

:-عيون عمي لا بد يجي يوم و اعمي هل عيون بيدي
ضحك و تمدد بفراشة

:-مصدك روحك الي يصير بيد الاشوح ما يطلع منهه الة ميت

:-اذا متت اندفن بيا اسم

:-غمار

:-شنو اسمك الثاني

:-علاء و سماني عباس هل اسم راح يضل وياي كل عمري

:-اني اسمي الصعب هل اسم امي سمتني بية و راح يضل كل عمري اسمي الصعب

:-كلنة نكول هيج بس واقعنة هذا غمار

:-عباس

:-ها

:-راح يجي يوم ارجع بأسم الصعب

:-شتحجي شلون

:-نام معليك

سحب الغطة رجعت اشخبط بأصبعي على الرسمة الرسمتهه سمعت باب الغرفة نفتح طفر عباس من مكانة فات قاتم ثنينه نباوعلة خايفين مثل عادتة سكران ما يدري بروحة سحب ريم من ايدهه طفر عباس يسحل بيهه و يغلط على قاتم

:-عوفهاا نكسس

وذاك مثل الصنم كمت ادفع بي ما اهتم سحبهه من بين ادينة و طلع ندك بالباب قافلهه علينة و هي تصرخ بعلو صوتهه

اباوع من الشباك اخذهه لغرفتة و سد الباب
صريخهه مالي المكان غرفنة وحدة قريبة للثانية نسمع كلشي عباس كضاهه يبجي و يضرب على الباب

كعدت بالكاع عيوني على عباس شلون يصرخ ليلة كاملة ريم مو ويانة ليلة كاملة تعذبت بيد مجرم

من الصبح رجعهه للغرفة دموعهه على خدهه وصافنة بمكان واحد ما تحرك راسهه بهل مكان القذر كمنة نعرف كلشي محد كدر يحجي شي

انجبرنة نطلع نشتغل ثاني يوم و ريم مو ويانة تحججت بالمرض بس رجعنة راح عباس يركض للغرفة رحت وراه شفتة واكف بالباب وشفتة بيضة باوعت على الغرفة

اشوف ريم ذابحة رگبتهه و الدم مغطيهه فاتحة عيونهه و وجهه اصفر شفتهه بيضة طفلة مغطاية بدمهه صحت بصوت عالي

:-قاااتمم ققااتمم رريممم ماتتت

من سمعو صياحنة كلهه اجتمعت اباوع على عباس ما حجة شي بس يباوع عليهه جامد

وصل الخبر للاشوح محد تجرأ وقرب منهه كلهه تباوع من بعيد

عباس مثل الفاقد قربت يمهه رفعت راسهه واني اشوف منضر ركبتهه المذبوحة كدامي حطيت راسهه بحضني خليت ايدي على عينهه اسدهه

باوعت بصفهه سجينة اعضائي كلهه ترجف اول مرة المس شخص ميت فات الاشوح و الشرار يتطاير من عيونة صاح بينة اني و عباس

:-للقبو بسرعة

هذا مكان يعذبون بي ااي واحد يعارضهم لو يسوي غلط اجة قاتم سحبني من ايدي حسيت براس ريم شلون نضرب بالكاع من سحبني عباس يمشي بكل هدوء كدامنة ما يحجي شي

قاتم:-غمار اذا حجيت شي اذبح عباس بنفس الطريقة

رجف جسمي من سمعت حجايتة دار وجهه يمشي كأنما ما صار شي فتنه للقبو

وكفنة ثنينة و الاشوح كدامنة
:-ليش كتلت روحهه

ردت احجي رفعت راسي قاتم مخلي عيونة علية دنكت راسي ماكدر احجي شي عباس ينذبح كدامي

رجع صاح بصوت رج المكان
:-لللليييش واحدد يجااوووبب

اباوع على عباس فاتح عينة على وسعهه بس ما يرمش
:-جنة بالشغل ماندري

:-اربطهم قاتم

اجة واحد منهم اخذ عباس من ايدة ربطة من ادية على حديد عالي و قاتم ربطني

:-قاتم اذا عباس صارلة شي اذبحك صدك

:-هههه اني ذراع الاشوح تتخيل يذبحني و يعوفكم

دار وجهه وكف كدامنة جان عندة سوط يضربنة بي بقو يضربون بينة يردون نحجي من شاف ماكو امل عافنة بس فلت ايدي طحت بالكاع جسمي يأذيني من الضرب من بعد صمت عباس كال

:-قاتم اغتصب اختي وانتحرت

كلمة انتحرت تجوي بروحي اخاف اخسر عباس اذا حجيت كمت من مكاني لازم ايدي الصاير بيهه اثر سوط جريت عباس وياي

:-عباس كوم نشوف شراح يصير

مشة وياي رجعنة لمكانة ماكو اثر لريم لادم لا السجية و لا جثتهه بيومهه محد من عدنة اكل

انتضرت الليل يجي وقاتم يجيب الحب اريد احجي وياة بس ما اجة جابو واحد غيرة خليت الحباية جوة الساني باوعت على عباس شربهه بدون ما يحجي

:-عباس

خلة ايدة على الكاع
:-هنااا ذبحت روحهه راح اخذ بثارهه

ضل الليل كلة كاعد طلع الصبح و كأنما ما صاير شي كل واحد اخذ اغراضة شفت عباس شكلة مو طبيعي

:-عباس اليوم اضل وياك بالشغل

:-لا اني راح اضل هنا ما اطلع

فتنة يم الاشوح عيونة مركزهه علينة اني و عباس كتلة
:-الاشوح عباس ما يكدر يطلع

:-بسسس الييومم

:-واني اضل وياه

:-لا اطلع

:-باجر اشتغل مضاعف بس اليوم لاتخليني اطلع

:-ااششش حجيكم هذا عوفوا اني اخسر طفللل يعني خسرت شغل واحد بيكم و جاي انت ما تريد تطلع

:-الاشوح كتلك ما اطلع تعذبني؟ عذبني اليوم كلة مااهتم

رفع حاجبة مبتسم
:-كلش تعجبني غمار يجي يوم تصير انت بمكاني

:-هه تحلم

:-صغير و مسيطر تذكرني بروحي يجرالك التريدة

طلعنة من يمة و اني عيوني تلاحك عباس اريد اشوف شيسوي شفت عباس راح للغرفة فتحت الباب بيدة كزازة على شكل مثلث
:-شتسوي بيهه عباس؟

رفع اصبعة مشاه على طرف الكزازة بس لمسهه جرحت اصبعة ما يحجي اي شي

جنت امشي وراة اريد اشوف شنو تالية تصرفاتة شفتة متمدد بالكاع اخذت ملابس اريد افوت اسبح بهل مكان كل اسبوع زين اذا سبحت

:-عباس شوية و ارجع

:-اي براحتك

فتت للحمام كلهم يكرهوني من اسبح اضل ساعة بالحمام

اتأخرت واني اسبح سمعت صوت صياح بدلت ملابسي بسرعة طلعت اركض ادور على صوت الصياح رحت للقبو واشوف قاتم واكف ودم مالي قميصة من جهة البطن و عباس بيد الاشوح يشلع بأضافرة بسجينة وعباس يصرخ بعلو صوتة فتت اركض اسحب بعباس من بين اديهم مافهمت الصار

:-عوووفةةة لكك عووفوو جلاب عووفوو

دفعني الاشوح يرفس بية
:-قااتمم كتتل ريم قااتمم كتلههه

صحت هيج بصوت عالي وكف الاشوح يباوعلي بغضب
:-اكتلك غماار اذا كربت مني

:-واللة قاتم كتل ريم اغتصبههه و كتلهه بيدة

قاتم ضل يغلط و يسب و هو لازم بطنة و عباس ما يحجي شي احس روحة مبهوتة

الاشوح:-قاتم!

:-جذابين سيادتك تصدك بأطفال جذاابين

:-ما نجذب اسأل عباس قاتم اغتصبهه و ثاني يوم كتلهه وخلة السجينة بيدهه علمود تبين منتحرة الاشوح شوف

كمت من مكاني لزمت ايد الاشوح بعدهه مني
:-سجينة قاتم شجابهه لريم انت مو منعتة يعوف اي سلاح بعد الحادثة الصارت بيني و بين مرتضى

من حجيت هيج الاشوح قرب من قاتم
:-اليحجي غمار صح

:-لا سيادتك

شفتة رفع اصبعة دخلة بالجرح الي ببطن قاتم
:-اححجججيي

كام يتلوة جوة ايدة و الاشوح ما مهتم يحرك بصبعة داخل الجرح لحد ما صرخ

:-اااايي كتلتهاا

بس كال هيج اشر على الولد بعيونة علكو قاتم كدامنة
ماهمة شكد جان قريب منة صاح

:-جيب مسدس

كبل خلو مسدس بيدة رحت يم عباس ادية تصب دم و كاعد يتلوة

:-غمار

رفعت رااسي على الاشوح ابتسم بوجهي
:-الزم

قدملي المسدس مشيت بخطوات ثكيلة اخذت المسدس منة

:-اسحب اقسام

سحبت وايدي ترجف اشر للولد انطوة مسدس ثاني سحب اقسام ووجهه على عباس فتحت عيوني مصدوم صاح

:-اكتل قاتم

اعضائي كلهه ترجف حركت راسي برفض ضحك و كال
:-اذا ما كتلتة عباس يموت

باوعت على عباس يتلوة من الوجع و المسدس براسة
وجهة المسدس على قاتم غمضت عيني و ضغط على الزناد فزيت من حول المسدس بس ما جان بي رصاص شفت الاشوح يضحك بصوت عالي

:-اكلك تشبهني ما تصدك

رفع ايدة ورمة ثلث طلقات على قاتم الي جان بس يترجة يعوفونة تراجعت ليورة كلة دم كلة جرم كلة قتل

الاشوح:-مات قاتم ماتت ريم اندفن العار هههههههه

ست اشهر عانيت هنا ست اشهر عايش هل عيشة وياهم اشوف بعيني الجرم المخدرات الجداوة كلشي و همة عايشين حياتهم طبيعي روح بروح بس من يغلط وياة يكتلة برمشة عين

:-عباس غمار ابطالي انتم

رجعنة طبيعي كلمن لحياتة و لا كأنما احد عانة بديت اتناسة الصار اغمض عيوني بليل و يجي منضر ريم بعييني اذكر روحي شلون ردت ارتكب جريمة اذكر الدم الصار بيدي من ريم

عباس ماتت روحة صار يشتغل و هو ساكت ثلث ايام ضبط و نعادت معاناتي و اني اشوف عباس ذابح روحة بنفس مكان ريم بنفس الطريقة كلنة اطفال بس جان بداخلنة شي اكبر من الطفولة ما تحمل يعوف اختة اكثر من هيج

و نعادت نفس المعانة مات عباس و اني التعذبت اني العلكوني و اني الطفت سجينة النار بجسمي انام بمكان بي جريمتين و مكمل حياتي كعدت الصبح شفت ورقة على ملابس عباس فتحتهه كاتب عليهه

:-غمار لا تغلط مثلنة حاول تشرد من بين اديهم كلنة بالنهاية راح نموت اشرد لزموك راح تكنتل ما لزموك راح تعيش حياتنة تستحق المجازفة جازف علمودي و علمود ريم

عصرت الورقة بيدي احس روحي كبرت عشرين سنة على عمري طلعت اغراضي جنسيتي القديمة بأسم صعب و جنسيتي بأسم غمار عراض امي و صورهم هي وابوي و رسالة عباس خليتهم بجيوبي طلعت حالي حال الاطفال ثنين ويانة يراقبونة من بعيد

جان شرط من تمشي السيارت احنة نوكف على الرصيف علمود ما نضيع بين السيارت انتضرت الشارع نفتح فتت بين السيارت عرفتهم لاحضو اني ماكو عيوني عليهم  يمشون وراي

عبرت الشارع اركض شمرت الفلوس البيدي ع الكاع و ركضت بكل قوتي

استغليت الي ويانة ما يشيلون سلاح صرت اركض واركض الناس تباوع علينة و تكمل طريقهه طفل يلحكونة ثنين مجرمين

افوت بين الافرع اريد اضيعهم كل ما دير وجهي الكاهم وراي جان اكو بيت و محل بينهم مكان صغير بشكل مدفون للنص شفت ماكو امل لو يلزموني لو اعبر هل مكان صعد على الدجة عثرت بالتراب وكمت بسرعة فتت بهل مكان وصلت لنهايتة بعد ما نكطع نفسي

درت وجهي للجهة الثانية هيم طالع من البيت مااكدر اعبر بااقي مجال قليل اذا رجعت يلزموني و ممكن انكتل واذا عبرت الهيم يجرح جسمي

غمضت عيوني بقوة عبرت المكان ادفع روحي على ضهري علمود يبعد عني الهيم بس وراي حايط ماكو فايدة حسيت الهيم فات ببطني ماكدرت اكمل

ذكرت كلام عباس ذكرت شسوو بينة سحبت روحي بقوة عرفت الجرح قوي اثر على رجلي مااكدر احركهه شفتهم راحو اكيد يجوني من غير مكان سحلت رجلي سحل اركض و اتلفت

الدم كام يقطر بالكاع ما ادري اذا ضيعوني لو لا جانت ضهرية و الناس كلهه ببيوتة ماادري بروحي وين طحت بالكاع ررفعت التشيرت شفت بطني مشكوكة عصرتهه بيدي قوي ايريد اهدي الوجع خفت لا احد يلزمني لان مو بعيدين عني بس رجلية ما تعيني رفعت راسي للسماء

:-اللهي بحق كُل يتيم ضايع دليني الدرب ياااالله

ركيت ايدي على الكاع اريد اوكف

:-ياعلي ياكافل الايتام امشي عليك فاطمة الزهرة لا تضيعني من جديد ياافاطمة الزهراء عينوني اطلع من هل مكان

ضليت الهج بأسماء ال البيت من حلاة روحي كمت اركض احس رب العالمين واكفلي

شفت عربانة محد يمهه جانو يبيعون ذرة كعدت وراهه اباوع للطريق محد اجة دنكت امسح بالدم حسيت واحد اجة يم راسي غمضت عيني حسيت لهنا و خلاص اني راح ارجع لنفس القبو رفعت راسي خايف ياهو راح اشوفة كدامي الاشوح؟

:-بوية شبيك

شفت رجال الشيب متطشر على راسة لازم سبحة بيدة

:-يابة دخيلك عندك انة

كعد كدامي رفع التشيرت مالتي غمض  عينة مصدوم من شكل الجرح

:-شجباك هنا

اريد احجي روحي انبهتت كوة طلعت مني هل كلمات

:-اذا تأذيني عليك اخو زينب عوفني والحق شردت بطلاع الروح

فتحت عيوني بغرفة ويمي نفس الرجال يسويلي كمادات
الوجع نفسة ياكل بية و جسمي ثلج

:-وين جايبني

:-بأمان انت بوية

:-غطيني

غمضت عيني متأذي الرجال خلة ايدة على راسي

:-شوف بوية انة مااكدر اخذك للمستشفى يبلوني و نضيع انة وانت

:-بس اصير زين اروح منا مااورطك بس لاتخلي احد يوصلي

:-لا بوية ضل هنا معزز مكرم بس شوف جرحك اذا ظل هيج يلتهب و خاف يصير بيك شي راح اجيب ولد صديقي يخيط جرحك هنا مو بالمستشفى

حركت راسي بمعنى اي كام طلع برة مديت ايدي بجيبي اريد اتأكد من اغراضي جسمي يرجف ما اسيطر علية
تاكدت من الجناسي سحبت ربطة امي من جيبي خليتهه على خشمي

:-ليش عفتيني ضايع بدونج انة

غمضت عيني والربطة بيدي حسيت على واحد يلمس بجرحي فزيت مرعوب شفت ولد وية الرجال ردت اكعد بس جسمي ما يعيني

:-منو انت

ابتسم كال
:-لا تخاف جاي اساعدك بس صير قوي

غمضت عيوني ماادري شنو راح يصير شفت الرجال لازم ايدي بقوتة

:-غمض عينك لا تتحرك ابد

رفعت راسي شفت لازم مثل الابرة بيدة عرفتة يخيط الجرح واني كاعد غمضت عيني قوي حسيت بلابرة شلون تفوت ببطني اصرخ بعلو صوتي لحد ما فقدت ماادري شصار بعد

كل مااكعد الكة الرجال يمي ماادري شكد ضليت شكد صارلي هنا اني بأمان لو لا كل الي يصير اكعد اكل و ارجع انام بليل اضل وحدي و بالنهار هل رجال يمي بديت

احس جرحي يلتئم كمت من الفراش فتحت باب الغرفة شفت اسطبل كدام الغرفة خليت ايدي على عيني من اشعة الشمس درت وجهي على صوت الرجال

:-شلون صرت بوية

:-الحمد للة يابة

:-ابو علي اسمي

:-اللة يحفظك يابة انة مديون الك

ابتسم و طبطب على جتفي
:-شكد عمرك

:-دخلت ل 12

:-يابوية الي يشوفك يكول لايح العشرين

ضحكت و درت وجهي
:-يابة مرات الضروف تكبر

:-اي باللة شسمك يبوي

خفت انطي اسم غمار خاف احد يعرف هل اسم
:-الصعب

حرك راسة بمعنى اي مشة كدامي صاح علية
:-تعال وراي

مشيت وراة وصل كدام حصان اسود سوادة كأنما قطعة من الليل خلة ايدة علية

:-الصعب تدري هل حصان على اسمك
ضحكت و قربت منة اتلمس بي

:-عجبك

:-هواي

:-ملكك هذا

درت وجهي علية ضحكت
:-مشكور عمي كلشي سويتة الي ماانساة

:-احجيلي يبوي شجابك لهنا

كعدت كدامة ما خفت من شي حجيتلة كلشي
:-ارجع لديرتك يبوي لا تضل هنا

:-مااكدر ارجع يلكوني

:-واذا تضل هنا يلكونك

صفنت حاير وين اروح ضرب على جتفي
:-بوية شوف احنة نريد ننتقل للناصرية روح هناك و ارجع عيش لا تضيع روحك اكثر و انة وعد حر و وعد الحر دين مااقصر منك ابد

حركت راسي بمعنى اي بداخلي شي رافض ارجع للناصرية شيصير لو لكوني خاف انكتل ضليت بهل مكان اهتم بالخيل

ابو علي يروح و يرجع علية من لحضة الطلعت من بيتنة و لليوم صار الي سنة كاملة ابو علي انتقل للناصرية و اصر علية اروح وياهم بس رفضت

قررت ارجع للناصرية وحدي مافكرت بشي جنت اريد ارجع ادرس و احقق شي من الرادتة امي

رجعت مثل يوم الطلعت وحيد بطلعتي جنت اريد أأتمن بأحد لكن رجعتي جانت قوة الي فتت لنفس البيت لنفس المكان لنفس الوجع ذيج الروح المحروكة ذيج الكلمات نفسهه

بيتنة مثل ما هو على نضافتة على شكلة ما تغير منة شي فتحت الكنتور اغراض امي كلهه بي مشيت ايدي عليهن احس مالي واهس بشي خليت الجناسي و اغراضي كلهه بصندوك

فتحت القاصة مالت امي حتى فلوسهه بيهه اخذت منهن و طلعت جبت شفرة رجعت للبيت اباوع على شكلي شعري جان طويل بشكل حلقتة كلة سويت طبرة بحاجبي اريد اغير شكلي ما اريد احد يعرفني ..................

.......
ملاذ

فززني من غفلتي صوت الاذان عرفت طلع الصبح صحت بصوت ناصي

:-صعب

:-ها

:-شعندك كاعد

:-عبالي نمتي

:-لا ما جايني نوم كوم صلي

:-اذن؟

:-اي يلة كوم

ردت اسد التلفون كعدت امي حرت شسوي اشمر التلفون لو الكتاب

باوعتلي عكدت حاجبهه
:-شمكعدج ولج

:-هاا اا شمسة اريد اصلي

:-وين تكدرين تكومين انت منين اجتج هل ديانة

:-هاا شوفي ااا يمة شبيج انت شمكعدج

:-ولج سهرانة على التلفون

:-لاا لااا

باوعت على الاتصال مفتوح سديتة بسرعة

سحبت التلفون من ايدي باوعت بي
:-لا ابد ما سهرانة

:-لاااا ماسهرت اني وين بية اسهر

:-جا ياهو خلص شحن التلفون خاف جنيتج

:-لا مو انيي اوي يمة تصبحين على خير

رجعت الكتاب يم راسي درت وجهي على امي ادري ما يفوتهه شي

:-ها شنو راح تنامون

:-ياهمه اني اي راح انام

:-ها عاشت ايدج يمة نومتي

:-يا يمة شبيج

طبكت اديهه و غمتني
:-امسحي الاتصال وراج

سحبت الغطة على وجهي اضحك بصوت ناصي على امي

نمت ما كعدت للعصر لكيت امي مخلية البيت يخبل كمت اتمشى بالبيت مسوية غرفتي تخبل كعدت على الجرباية رفعت راسي على الساعة مدري شصار بية طلعت بسرعة صارت امي بوجهي

:-ها يروحي عجبتج

:-اي شيلي الساعة ماريد

:-ليش

:-هيج احسن يمة فدوة وخريهه

ما حجت شي فاتت للغرفة طلعت برة وين ما اروح صعب بخيالي ما يروح من بالي

فتت للصالة اخذت تلفون امي دزيتلة رسالة
:-وين انت

شوية و كتب
:-بالشغل

:-صعب شوكت تطلكني

:-نصعد اتصال؟

:-بكيفك

بس كتبت هيج اتصل علية
:-ملاذ

:-صعب طلكني حباب اريد تطلع من بالي

:-مااكدر من اروح اريد شي يضل رابطني بيج

:-مااريد صعب اريد انساك اريد ارجع ملاذ القديمة مااعرف الصعب

:-جمارتي

:-لاتكول هيج ماحبك بعد ماريد تحجي شي اصلا اني اكرهك

:-يلة ميخالف خو ما تتوجعين

:-ااي اتوجع

:-صدك؟

:-اي

:-اجيكم؟

:-اي تعال طلكني

:-ميخالف بس اجي اطلكج على طريقتي

:-اكلك انت تعبتني انت تحبني مو

:-اممم مادري

:-لا انت كلتهه تحبني و هسة راح تعوف كلشي و ترجع مو

:-مااكدر

:-اااسكتت اسكتت سد الموضوع

:-هه مشتاقلج البيت فارغ بدونج

:-واني ما مشتاقتلك تعال علينة

:-شتردين بالضبط

:-جيبلنة كبست ببسي غير اني سويت عملية شنو مو بعينك

ضحك بصوت عالي
:-ملااذ

:-شتريد انت شترريددد عوفني بحالي واللة تعبتني لاتجي ببالي اريد أأذيك شلون

:-من تعوفيني اتأذة

:-راح اعوفك

:-ميخالف

:-باي

:-ضلي وياي

:-ماريد امي ترزلني

:-رجلج بوية شني ترزلج

:-مو رجلي انت

جر حسرة
:-راح ابتعد عنج لا تخافين

:-صعب شوف اني ادري انت حيل تأذيت بطفولتك بس شوف امي و اني شهاب و عمي هادي كلنة راح نعوضك
:-وروحي ملاذ و ابوي و امي؟

:-صعب

:-لاتبجين

:-واللة راح اجرحك واللة

:-ميخالف

سديت التلفون درت وجهي لكيت امي وراي نزيت
:-يمة شني ماعندج غيري بهل بيت

:-لا واللة ماعندي غيرج كومي اكلي

كمت من مكاني انطيتهه التلفون لزمت ايدي بين اديهه
رفععت عيني اباوعلهه

:-ملاذ تحبينة مو

دنكت رسي و دموعي نزلت حركت راسي برفض
:-لا لااا مااحبة

:-و هو؟

:-لا ماعدنة شي

رفعت ايدهه تمسح بدموعي
:-شوفي يمة ثنينكم ربيتكم على ايدي الصعب يحبج لا تخلينة يضيع

:-ما بيددي شي واللة مابيددديي حاولت وياة

:-حاولي اكثر

:-مستحيل ينسحب صعب يمة صعب عاش شي محد عاشة تدرين صرت احقد على روحي من اكلة عوف كلشي لا انت و لا اي واحد عاش مثل صعب حگة شما يسوي

:-ماريدة يخسر روحة

:-تعبت يمة تعبت وانة احاول وياة

بعدنة نحجي سمعت باب الشارع ندك گلبي دك وية دكتة منو عرف مكانة باوعت لامي بأستغراب

:-منووو هذااا !

:-شبيج يمة على كيفج يجوز جيرانة

راحت فتحت الباب واني عيوني معلكة بيهه اخاف اشوف حسن كدامي..........

.
.
.
.
.
.
.للحكاية بقية

كلانا كتف للاخر♥
الوريد♪

ملاحظة/حبيباتي حيكون التنزيل ثلاثاء و سبت خلال فترة الدوام