رواية انتي ربيع العمر في كل الفصول! الفصل الرابع 4 - بقلم rned 🖤

...

انفتح الباب ودخل السكرتير الخاص بالمكتب الإداري ومعه مساعدة هادي الخاصه " سهى ".

ووقف هادي بسرعة وقال:  بشرني عرفت منهو؟  وتابع اي شركه؟

السكرتير:  اي الرجال مدير الماليه لشركة" فيّان".

عقد هادي حواجبه لثواني ثم قال بهدوء:  شركة فيّان الي اشترت اسهم الصفقه الأولى!!

السكرتير ضيق عيونه:  اي هي
ضرب هادي على الطاولة بعصبية وقال:  ذولي وش يبون ؟!!

السكرتير:  طال عمرك يمكن كل هذه مصادفه!.
صر  هادي على اسنانه وقال بعصبيه:  ما في شيء اسمه مصادفه هذه هي المره الثانيه اللي يخرب فيها مشاريعنا وهذا دليل انه متقصدنا.

التفت السكرتير للمساعد الخلصة بهادي " سهى "ثم  ناظر هادي وقال:  وش تأمرنا طال عمرك؟

اقفى عنهم هادي وقال بهدوء:   ارجعوا لأعمالكم انا بتصرف..

هز السكرتير راسه واخذ ملفاته وطلع من المكتب والتفتت سهى  لهادي وقالت بهدوء:  استاذ هادي اذا تبي انا اقدر اني اطلع لك كل المعلومات الخاصه في شركه فيّان ونعرف ايش السبب اللي يخليهم يتقصدون  شركتنا...

ناظرها هادي وقال بعد تفكير استمر لثواني:  زين طلعي كل المعلومات بدون علم احد وجيبي لي الملف ويبقى هذا الشي بيني وبينك.

سهى ابتسمت بخفه وقالت:  ابشر.

هادي:  حتى صقر وجواد ما ابيهم يعرفون بهذا الموضوع خليه بيني وبينك بدون علم احد

قالت  سهى:  ابشر انت تامر امر بعد خمس ساعات بالكثير اعتبر كل المعلومات صارت عندك

هز هادي  راسه  وقال:  انا واثق فيك وفي خبرتك في  هذا المجال..

ابتسمت سهى واقفت عنه وطلعت من المكتب وهي مستعده تروح  مع كل طاقتها وقوتها في المهمه الجديده اللي يوكلها لها هادي جلست على مكتبها وفتحت اللابتوب وهي تبدا بادخال بعض الشفرات الخاصه فيها ...

بدأت تبحث عن المعلومات اللي هي تبيها وبطريقتها الخاصه..

اما هادي فجلس على مكتبه وهو يمسك الاوراق الخاصه بالاجتماع ويناظرها بضيق وقهر وهو يشوف التعب اللي ضاع في ثواني والمجهود اللي استمر لليالي تبخر كله  فجأة  بسبب المسمى فيّان...

وصل  صقر الشركه ووقف سيارته في مكانها الخاص ونزل منها وفي يده مفتاحه وجواله ودخل بخطوات مستعجله الى داخل الشركه ناوي يروح لمكتب هادي يلحق عليه قبل يسوي مصيبه..

وصل للمصعد وضغط الزر يخليه يطلع   للطابق الثاني حيث موجود المكتب الخاص  بهادي انفتح المصعد  وطلع منه صقر ومر على مكتب سهى المفتوح بجانب مكتب هادي وقال لها باستعجال  :  هادي  موجود؟
رفعت سهى راسها من على اللاب توب وناظرته وقالت:  اي  موجود!..

ما ترك صقر لها مجال تكمل كلامها وراح متوجه للباب الزجاجي وفتحه ودخل..

صقر:  هادي!
هادي: هلا
صقر:  وش صار علمني كل شيء من وقت دخولك للاجتماع لين انتهائة
تنهد  هادي وناظر صقر وقال له:  وش اللي صار غير انه في رجال خرب كل ام ام الشغل!..

صقر:  علمني بالتفصيل وش اللي صار يا رجال علمني من يوم دخلت للإجتماع لين طلعت بالتفصيل الممل انا ابيك تشرح لي!.

هادي ناظره وقال:  اجلس اجل.

سحب صقر الكرسي وجلس وهو يقدم جسمه شوي للطاوله ويشبك يديه ويناظر هادي ينتظره يتكلم..

هادي اخذ نفس وقال:  هذا الله يسلمك رحت للإجتماع وقدمت المادة الي عندي وعرضتها على الجميع وشرحتها مع البيانات الخاصه بالمشروع وكل شي متعلق فيه لجل يعجب فيها ويطلب شراكتنا، يوم خلصت صار الي خططت له وفعلاً سبق الجميع وعرض علي الشراكه وقال بياخذ المشروع وجينا بنوقع العقد وفي اللحظة الاخيرة دخل مدير المالية لشركة فيّان ومدري وش عرض على الرجال لين كنسل الموضوع  انا هنا تورطت الرجال طار والمشروع لو طلعت من الإجتماع بيطير لأن الرجال صاروا عارفينه وعارفين كل بياناته من الممكن ان احد ياخذه وبكذا احنا الخسرانين لذلك اضطريت اقبل بعرض وحدة من الشركات الي طلبت المشاركة معنا في هذا المشروع...

صقر ناظره شوي وقال:  زين وش الي مزعل وجهك ذا الحين هذا انت لقيت شريك!

هادي بقهر:  يامسلم افهم افهم انا ما ابي ولا وحده من ذي الشركات انا ابي الشركة الي سهرت ليالي عشان يعجبهم المشروع  .

صقر:  يا رجال يا حبك للنكد بس احمد ربك هذا انت لقيت لك شركة وخلاص فكنا مب لازم شركة لونا ولا شركة لونا!...

هادي زفر ومسح على وجهه ودار بالكرسي للجهه الثانيه يناظر المباني ويحاول يخفف عن نفسه..

صقر رفع حاجب وقال:  تعطيني مقفاك يالمروح!!

التفت له هادي وقال:  مروح!!  يااااقدمك يا شيخ يا قدمك..

ضحك صقر وهو يرجع على وراه وقال:  اييه يازين ايامنا وايام الفاضنا..

هادي رفع حاجب وما رد

صقر ضحك اكثر وقال:  والله اننا كبرنا يا شيخ  ..

هادي زفر:  الحين انا وين وانت وين..

صقر:  على طاري الزمان والسنين ما تتذكر اول مره جيناكم للديرة  ..

هادي ناظره وقال:  الا اذكر وشلون بنسى؟

صقر:  ايييه كانت ايام..
سكت هادي وهو ما يحب يتذكر الماضي وما فيه
صقر ضحك بخفه وقال:  تذكر ثاني يوم جيناكم وديتونا انت واخوانك للجبل حيث الكهف.

ابتسم هادي وقال:  ايه يالكهف..

ازدادت ابتسامته وهو يتذكر مغامرته هو وغيداء الي مااحد يعرف عنها الا جواد حتى صقر ما يعرف شي عن الي صار بين هادي و غيداء...

صقر تنهد وقال:  اجل اترك عنك الموضوع لعلها خيره وتوكل على الله باقي عندنا اشياء كثيرة لا توقف بسبب عثرة صغيرة عمر الحجار ما كانت عائق لإيقاف الطريق..

اومئ هادي براسه وقال:  ان شاء الله..

ابتسم صقر وضرب الطاوله بيده  بهدوء ووقف:  اجل استأذنك ابي ارجع اشوف اشغالي جيتك وانا مستعجل وتركت كل شيء وراي، حتى اهلي طلعت من عندهم ما علمتهم ليش بطلع تلقاهم الحين قلقانين بسبب طلوعي خوفني جواد بأتصاله يوم قال نلحق على هادي..

ابتسم هادي وقلب عيونه:  جواد والدراما وجهان لعمله واحده..

ضحك صقر وقال:  يلا  أجل استودعتك الله..

هادي بهدوء  :  في امان الله..

طلع صقر من المكتب وناظر سهى اللي كانت تشتغل وكمل طريقه طالع من الشركه راجع يشوف اعمالها الخاصه اما هادي  فضغط بين عيونه وهو يحس بصداع كبير تنهد ورفع الهاتف  ورن عليهم يجيبون له قهوه للمكتب..

_____

في الديره

كان فاهد في غرفته يتامل صوره جواد الصغير بابتسامه خفيفه،  وتفكيره بعيد عن الواقع اللي قاعد يعيشه..
وبالها عند ولده وزوجته العنود.
انفتح الباب بهدوء ودخلت بنته  نوره اللي بعمر " 12 سنه"  وقالت:  يبه جدتي فهده تبيك تقول ما شافتك من الصبح..

رفع راسه فاهد وناظرها وفتح يده لها تجيه وترك صوره جواد جنبه على السرير وهو مبتسم لنوره  ويطلبها تجي عنده تجلس...

تقدمت نوره وعلى وجهها ابتسامه خفيفه واول ما وصلت عنده وجلست انتبهت للصوره اللي على يمينه وصرت على اسنانها بغيرة وهي تشوف ابوها شلون متعلق باخوها ويحبه اكثر منهم كلهم واكثر من خواتها وهالشيء يخليها تكره جواد وتغار منه!!.

فاهد:  ايوه يا ابوي شلونك اليوم؟

ابتسمت نوره مجاملة  وقالت  :  الحمد لله بخير وانت يبه  وشلونك؟.

فاهد وقال:  بخير وبخير ايوه شلون كان دوامك اليوم؟
نوره: والله زينه  الا انت وينك  ما شفناك  من الصبح وجدتي فهده  تقول انها تبيك تقعد عندها شوي..

اومئ فاهد وقال:  الحين بنزل انا وياك عندها  وناخذ لنا فنجان  قهوه واخذ علومك انتي وخواتك..

ابتسمت نوره وقالت:  زين انا بعلم خواتي يجون..

هز راسه فاهد واخذ صوره جواد ورجعها مكانها ووقف هو وياها وطلعوا من الغرفه بهدوء ويده على اكتافها كان اليوم خاطره متضايق لذلك ما طلع من الغرفه وها الشيء يضايق فهده اللي متعوده انه كل يوم بعد الغداء يقعد معها ويشرب لك  فنجال قهوه قبل يطلع للرجال والاشغال..

طلعوا من الغرفه والتقوا مهره اللي كانت ماسكه بطنها لانها في شهرها الثامن وقالت:  اخيرا ما بغينا نشوفك والله وقدرتي عليه يا نوره!

ابتسمت نوره وقالت: هذا ابوي اكيد اقدر له

ابتسم فاهد بهدوء وتعداهم نازل للصاله الكبيرة الي موجود فيها امه وخالاته حريم أبوه..

وبما انه صار كبير العائله صار يحاول انه يحتوي الجميع وما ينقص على احد شي

فاهد:  السلام عليكم.

:  وعليكم السلام

فهده بتعب: حيا الله الشيخ فاهد ما بغيت وانا امك تنزل لنا..

جلس فاهد وسند ظهره:  والله كنت تعيب شوي وبغيت انام.

وقفت بنته " جنى " بعمر 9 سنوات  وهي تصب له قهوه وتقدمها له
اخذها فاهد وبدأ يسئل عن احوال اهله وامه وخالاته..

وجت مهره ( زوجته الوحيدة الي بقت معه بعد ما تطلقن الباقيات)  وجلست وهي تمسك بطنها..

جو بناته وجلسوا حوله وهو يسولف معهم ويسئلهم عن مدرستهم وكل وحده تسولف مع ابوها

لين قطع عليهم كلام فهده: متى بتجيب ولدك يا فاهد مع اهله وخواته وتربية على يدك ما شفنا من العنود خير.

فاهد ناظر امه وقال:  الولد صغير ومن الشرع انه لأمه.

فهده:  وين لأمه ماتشوف تربيتها له مدلعته اكثر من البنات ولا لبسه كله خلاقين انعدمت كل الثياب يعني ماعد به ثياب؟

فاهد:  الولد صغير خليها تلبسه الي تبي.

فهده قلبت عيونها:  الا والله من هالقلب الي متعلق بأمه كل شي مسموح لها ولا لو هي المسكينه مهره الي ملبسه وحده من البنات كذا كان طلعتها من ملة الإسلام.

مهره شدت على يدها وناظرت فاهد الي يشرب من فنجاله ببرود..

فهده  :  ودي اشوفه ويقعد معنا متى بتجيبه؟

فاهد بهدوء:  عنده دوام خليه يكمل وباخذه في اجازة الجمعه..

فهده:  وليه ما يداوم من عندك وين المشكله؟
فاهد:  وين يداوم من عندي مدرسته بعيده!
فهده:  في موتر يوديه ويجيبه خله عندك يطلع رجال لو بقى على تربية امه عز الله كدينا خير.

فاهد زفر بنرفزه وقال:  العنود مافي تربيتها الا كل خير بنت شيخ والولد ان طلع على تربيتها والله انه خير تربيه..

فهده قلبت عيونها وهي تضايقت وقالت:  ما منها خير ولا شفنا منها خير من يوم عرفناها بنت هزاع..

تنرفز فاهد وترك فنجاله على الطاوله وقال:  يمه العنود زوجتي واذا انتي تحترمين ولدك تحترمين حرمته سواءً كانت موجوده ولا غايبه.

فهده:  وين موجوده وين هذي ما عرفنها كثر ما عرفنها المصايب من وراها..

فاهد بنرفزه:  يمه!

مهره خرجت عن صمتها وقالت بقهر:  عمتي الشيخه صادقه ماقالت شي غلط انت وش بلاك ماجاز لك كلامها؟! 
فاهد ناظرها بحده كثير حاول انه ما يجرحها لكنها تجيب لنفسها الكلام:  مهره خليك بعيده عن الموضوع اذا انا اتكلم انا وامي..

نزلت نظرها بقهر وهي تمسح على بطنها..

قعد فاهد يناظرها وهي توترت والحريم ساكتات ويناظرونهم  .

لين وقفت بنت فاهد تجدد لأبوها القهوه ومدتها له واخذها فاهد وهو يشربه دفعة واحدة متجاهل حرارة القهوة..

فهده ببرود:  الحين متى بتجيبه يزورنا قدني فاقدةً له

فاهد:  قلت لك يوم الجمعه
فهده قلبت عيونها:  اجل خليها تلبسه مثل الخلق لو اشوف سيقانه طالعه والله ما يرجع لها..

صر فاهد على اسنانه ووقف وترك فنجاله وقال:  جواد ولدي وولد العنود وامه لها الحق تلبسه الي تبي لو تجيبه بغير ثياب بقول لها الحق واكيد هي ادرى بولدها

مشى عنهم بخطوات عصبيه وفهده قالت بعصبيه:  والله انها  خامشة عقله..

مهره بغيض:  اي والله مابقى فيه عقل لجل العنود..

_____ 

تغدا  هادي  في المكتب وهو ينتظر سهى تخلص شغلها وتجيب له  كامل المعلومات الخاصه بشركه فيان..

وبينما هو ينتظر  رن  تلفونه واخذه وشاف رقم امه يتصل  ابتسم وفتح الخط وقال:  هلا هلا ارحبي تراحيب المطر هلا بشيخة الشيخات امي وتاج راسي.

ام هادي" الشيخه مشاعل": هلا يمه هلا هادي شلونك يمه عساك طيب عساك بخير وش  اخبارك وش علومك وينك يمه مبطي عني ما دقيت ولا تسئل على امك ولا تشوف شخبارها ما تقول عندي ام اسئل  عليها اشوف اذا احتاجت شي  اذا تبي شي..

ضحك هادي وقال:  اتركي لي  مجال طيب ارد عليك!!.

ابتسمت مشاعل وقالت:  والله اني اشتقت لك يمه وينك ابطيت علي ما تسير علي اخوانك هنيا وانت بعيد الله يهديك ما غير تراكض ورا ذا الجواد...

هادي:  دعواتك يمه دعواتك والله هذا شغل وشغلي وحلالي كله هنا وابي اهتم فيه مستقبلي  هنا مالي  مستقبل في الديرة يمه..

مشاعل ام هادي:  هذا اخوك يوسف ما شاء الله عليه وش ناقصه فاتح بيت ومتزوجوا وعنده حلاله وشغله وما ناقص عليه شيء الحمد لله وهذا  نص اخوانك هنا بالديره وش ناقصهم..

هادي:  ما ناقصهم شي يا ربي لك الحمد، لكن يمه هم اهتماماتهم غير اهتماماتي هم راضيين بالشغل في هالارض وفي هالحلال والحمد لله عايشين لكن انا طموحي واهتماماتي غير انا ودي اصير مثل اخوي جواد  ان شاء الله وافضل،  والحمد لله قاعده احقق نجاحات..

مشاعل: الله يفتحها بوجهك يا وليدي وعاد مره لا اوصيك عن اخوانك وبالذات اخوك يوسف اخوانك الباقين ما شاء الله عليهم ان نقص عليهم شي  يبلجون على بعضهم البعض، وانت ان شفت الحلال واجد والخير كثير لا تنسى اخوك يوسف وارسل له مبلغ  ولا مبلغين..

هادي:  ابد ابشر يمه ولا يهمك ما يصير خاطرك الا طيب اخوي يوسف كل ما ينقصه  شي  انا اتواصل له و كلمته وارسل له...

مشاعل:  الله يرزقك من واسع فضله..

هادي:  الا انتي  يمه ما ناقصك شي؟  تحتاجين شي؟  مشاعل:  الله يسلمك والله اخوانك ما يقصرون  و البيت الحمد لله ما ينقصه شي  واحنا ما ينقصنا شي وان احتجت شي اباقول لك ماني متردده..

هادي: قولي الي تبين ابد الحلال حلالك واي شي تبينه تحت امرك متى ما بغيتي شي دقي علي واخواني ان شفتي واحد منهم حالته  الماديه ضعفت ولا ساءت ولا شفتيهم تعيبين ولا ناقصهم شي  علميني اخواني يتعززون علينا وانا واخوي جواد والله ما اقصر اننا كل شهر نرسل لهم مبلغ..

مشاعل:  الله يكثر خيركم ويطول باعماركم ما تقصرون الا اخوك جواد شلونه وش اخباره عساه  طيب

هادي:  الحمد لله ما شاء الله عليه ما ناقصه شي..

مشاعل:  ما ودكم تزورونا يمه ما ودكم تشوفونا ولا اخوك جواد ذا يراكض  للحين ورا ذا  الشيطان  اللي ما هي بملاك..

تنهد هادي وقال:  ما يصير  الا كل  خير والله هالايام مشغولين والشغل لين فوق رؤوسنا بس ابد متى ما شفنا انه ما عندنا شغل بنجيكم ان شاء الله..

مشاعل:  حياكم الله بس ها يمه لا اوصيك عقل اخوك جواد وعلمه ما هو بكل سنه يجيب الحرمه ذي وبنتها وراه وتصير نفس المشاكل يفكنا شرهم ويخليهم بيتهم ويجي،  ويجي يسلم على اهله وناسه و ربعه واحنا  ما نبي ذي الحرمه معه وذا  البنت محنا معترفين فيهم..

هادي  :  يمه وش اللي ما انتم معترفين فيها البنت  ذي  بنت جواد من لحمه ودمه رضينا  ولا  ما رضينا  والحرمه ذي زوجته الله..

مشاعل:  لا يسلم فيها عظم وش اللي زوجته هذي  اللي قتلت ابوكم انتم للحين تحترمونها والله لو اني منك ما طبيت لهم بيت ولا دخلته..

هادي:  انا الحين وش دخلني تقلبين علي؟  يمه عندكم رقم جواد دقوا عليه!..

عوجت   مشاعل فمها وقالت:  على اساس هو يسمع من احد؟  ايه يا عيال جراح والله ما منكم واحد صاحي اخوك الكبير واللي قلنا كبير العائله وسندنا وشيخنا  الي خط الشيب راسه للحين يراكض ورا  العنود والثاني اللي قلنا متعلم ومثقف فاهم ودارس ودكتور العائله و ما ادري وش في الاخير عقله عقله بزر يراكض  ورا هالمهبوله  الي قتلت ابوه!..
ولا حمد اللي ما نشوفه  الا في السنة  حسنه وقاعد هو  وحرمته بالرياض ما نشوفهم  ولا اخوانك الباقين اللي كل واحد ببيته كانه ما صدقوا ان الشايب مات وتفرقوا،  ولا انت اللي ضعت بين هالاوراق وبين هالشركات ما عاد نشوفك عز الله ما فيكم واحد صاحي..

ضحك هادي  واعتلت  ضحكته  وقال:  ادعوا لنا بالهداية..

مشاعل بسخريه:  هداية وش هذا انت اسمك الهدايه بكبرها وهذا  انت في وادي والهدوء في وادي الله يهديكم  بس ويرجع لكم عقولكم...

بقى هادي يضحك من كلام امه وتعدل مزاجه شوي  لين انفتح الباب ودخلت سهى وعلى وجهها ابتسامة وزادت  ابتسامتها يوم شافت عادي يضحك انتبه عليها هادي وقال:  يلا يمه استودعناك الله بدق عليك وقت ثاني عندي شغل الحين مهم..

مشاعل:  الله يفتحها بوجهك ويسهل عليك دربك استودعتك الله يمه استودعتك الله...
هادي:  في امان الله..

نزل الجوال من على اذنه وقفل الخط  وشبك يديه في بعضهم  :  بشري وش صار؟

ابتسمت  سهى  وقالت:  ما شاء الله هذي  الوالده؟ 

هادي:  ايوه  وش صار معك انتي؟

عدلت وقفتها ومسكت الملفات وقالت:  كل الملفات  صارت جاهزه  وكل المعلومات الخاصه بشركه فيّان صارت في هالملف تفضل..

مدت له الملف واخذه هادي  وفتحه واشر لها تجلس على الكرسي المقابل جلست وهي تتأمله  يقرأ الملفات ويشوفهم ..

سهى:  مثل ما شفت يا  استاذ هادي شركة فيّان  تابعه لشخص مجهول،  هالشخص ما يظهر اسمه في اي توقيع ولا في اي صفقه عمل ولا في اي شيء يحتاج الى اسم مدير الشركه، وموكل مدير اعماله بكل شي  خاص بالاعمال اللي تحتاج توقيع وهو فقط يقوم باشراف عام بدون ان يتم اظهار اسمه!. واتضح لي يا استاذ هادي ان شركه فيّان من افضل الشركات المتواجده حاليا بسبب تواصلها مع عمالقه التجاره في التصدير والتوزيع  بس الشي   المبهم في الموضوع والشيء المجهول والغامض ان شركه فيّان هي نفسها الشركه اللي تاخذ اي مشروع او اي شركة  احنا نتجه اليها فمثلاً  عندك الصفقه الأولانيه قبل شهرين بالضبط كانت كل الاعمال الخاصه فينا ماشيه  تمام إلين جاء وقت توقيع العقد واخذته شركه فيّان..
وشركه فيّان هذه هي نفس الشركه اللي الغت علينا الصفقه اللي كانت قبل شهر ونص،  وشركه فيّان هذه هي الشركه نفسها اللي قبل ثلاث اسابيع اشترت المشروع اللي كنا احنا مساهمين فيه، و شركه فيّان يا استاذ هادي هي نفسها الشركه اللي اليوم اشترت  العقد مع شركة  لونا،  احنا ما نعرف وش السبب اللي يخلي شركتهم  تركز على شركتنا وعلى مشاريعنا بهذا الشكل وايش اللي يخليها دائما تدخل في الخط اللي احنا ماشيين فيه هذا هو الشيء المجهول والمبهم في السالفه كلها!!..

هادي:  واضح انه وراء شركة  فيان هذي  سالفة طويلة  او ثار قديم معنا  ،  او انها تسعى الى شيء احنا ما نعرفه!  لذلك انا لازم اني اتواصل مع هذا المدير فيّان واقابله  شخصياً...

قالت سهى:  الشي الجدير  بالذكر يا استاذ هادي أنه المدير هذا فيّان حتى وأن قابلته انت ما بتشوف وجهه مباشرةً لأنه عُرِف دائماً  بأنه شخص  يلبس قناع او كمامه فما حتشوف وجهه ولا ملامح منه  لأنه نادراً ما يشيل النظارة أيضاً فعشان كذا الشخص هذا فيّان  وراه شيء غريب و مريب!..

هادي عقد حواجبه  وقال:  انتي من وين عرفتي انه  يلبس كمامه؟.

قالت سهى:  في عدة  صور نازله في موقع الشركه نفسها يعني عدت صفقات تمت وكان يقف يتصور هو والمشتركين معنا  لكن توقيع ما كان هو اللي يوقع التوقيع هو مدير اعماله،   يعني اللي موكله على كل شي!  ..

هادي:  عطيني صورته بشوفها..

وقفت سهى بسرعه وتقدمت شوي للطاوله وفتحت الملف الي عند هادي وطلعت الصوره ومدتها له..

اخذها هادي وعقد حواجبه وهو يشوف الشخص الواقف بكل هيبة بثوبه الأبيض الناصع وشماغه الي واضح عليه الثراء من نوعيته والكمامة  السوداء الي تغطي وجهه وما يبان الا حدة عيونه والي واضح عليها الشموخ والعزه...

حس هادي ان هالعيون ماهي غريبة عليه وانه شايفها من قبل!!   .

______
...

في بيت كان قمةً في الجمال..

مطلي باللون  الأبيض من الخارج!
وكان شبيه بالفلة بتصميم حديث وراقي جداً..

نزلت من الدرج وهي تحمل ابنها اللي بعمر سنتين ونص، بملابسها الفخمه والراقيه والجميله اللي تدل على مكانة  زوجها والثراء اللي يعيشونه..

رفع زوجها راسه من على الملفات اللي في يده واتسعت ابتسامته وهو يشوف المنظر الجميل اللي قدامه زوجته وابنه في اجمل طله،  زوجته  الي ما كانت في يوم زوجه عاديه زوجته اللي كانت له سند وظهر وكانت له الحياه والعائله والحبيبه والام والاخت وكل شي ممكن تصيره تعبوا مع بعضهم تشردوا مع بعضهم كافحوا  مع بعضهم الين وصلوا للي وصلوا  له إلين وصلوا للحياه الكريمه والراقيه اللي قاعدين يعيشونها الحين ميلت  راسها بهدوء وعلى وجهها ابتسامة  لطيفه وقالت:  نوّر البيت يا ابو رامي...

وقف وعلى وجهه ابتسامه حنونه ومحبه وتقدم منها وجذبها له وهو يضمها بقوه ويستنشق عبيرها الي يفوح لين بدأ الولد يتضايق ويدفه ضحكت بخفه وقالت:  مسفر خلاص ابعد خنقت الولد!  ..

ضحك مسفر وهو ياخذ ولده ويبوس خدوده:  هلا بالشيخ رامي يا لله حيّه يا مرحبا..

ود بأبتسامة شوق:  اشتقنا لك يا مسفر وينك غايب ثلاث ايام؟

ابتسم مسفر ومسكها من يدها ومشى فيها معه للكنبه وجلسوا وترك ولده على الأرض يراكض ويلعب والتفت لها  وسحبها لحضنه وضمها وهمس:  اشتقت لك شوق ما يعلم به الا الله.

ود: ليه غبت ثلاث ايام وش ذا الشغل المفاجأ!؟
مسفر ابتعد عنها ومسح على خدها:  شغل ياعيني تعرفين رامي يحتاجني معه في كل شي..
ود:  الله يوفقك..

( رامي ولد ابو رامي الشايب الي كان عنده بقاله  ومسفر يشتغل معه..

بعد ما شافوا شطارة مسفر في التجارة ضموه معهم في شركتهم وصار يشتغل معهم ومن كثر حبه لهم بعد ماعوضوه مكان الأهل هو وزوجته ووقفوا معه في اسواء ظرف كان يعيشه، سمى ولده على اسم رامي)  ..

ود:  بس هاه هالأسبوع لنا انا وولدك
ضحك مسفر وقال:  على خشمي ابشري..

ود بأبتسامة  :  الله يطول بعمرك يا بعد كل دنيتي..

مسفر بابتسامه:  ويطول بعمرك هذا اليوم ان شاء الله عازمك على العشاء ومنه نتكلم في موضوع،  ودي اكلمك فيك  واستشيرك..

قالت  ود بقلق:  عسى خير ان شاء الله وش موضوعه؟ 

مسفر:   خير ان شاء الله خير الموضوع شوي حساس  ،  يعني... يعني لا تشغلي بالك ما هو شي خطير شي  عادي بس كذا..
لا من طلعنا اليوم وتعشينا وتمشينا وغيرنا جو علمتك عليه وقلت على  السالفه من الألف لين  الياء  وتعرفينها  لا تقلقين ما هو شي خطير!..

قالت  ود:  والله انك قلقتني شوي وش الموضوع؟..

ضحك مسفر وقال:  والله انه موضوع ما فيه  شيء عيني من الله خير  بنطلع اليوم وبعلمك عليه  الموضوع بسيط يعني كذا تغيير في البيت وزي كذا ما في شي

ضيقت  ود عيونها وقالت:  لا والله ما هو تغير في البيت ولا اثاث ولا شي لكن الموضوع ثاني وانك بتعلمني  عنه الحين...

ضحك مسفر وقال:  بعلمك بعلمك لكن ما هو الحين الليله ان شاء الله..

____

" غيداء "
.
.

صحت  غيداء من النوم وجلست على السرير وهي تفرك راسها( واخيرا اخيرا شبعت نوم وتعدل مزاجها وحست انه الكتمه اللي على صدره والصداع اللي كان فيها راح)
فركت راسها وعيونها وسحبت  جوالها شافت الساعه تشير على الساعه 3:00 العصر حمدت  ربها انها صحت هل وقت قبل  يجيها احلام العصر وكوابيسه وخرت اللحاف من عليها ووقفت وهي تحرك ايدينها لبست شبشبها ( وانتو بكرامه)  ومشت للتسريحة وناظرت نفسها في المراية وضحكت بنعاس وهي تشوف وجهها مفقع نوم.. خذت لها علكه  ودستها فمها وتوجهت لدولابها خذت لها الروب والمنشفه وراحت للحمام  (وانتو بكرامه)..

بدأت تجهز  "البانيوم" عشان تستحم وتغير من جوها وتروق..

وما هي الا نص ساعه خلصت كل شي وطلعت وهي مروقه على الاخر وتغني وتدندن  ..

رفعت شعرها كله  لفوق وتوجهت للمرايه واخذت لها الاستشوار وبدأت تستشور شعرها وتنشفه وبعدها سحبت الكرسي  وجلست عليه وبدأت ترطب وجهها وتعتني ببشرتها  بعد ما أخيراً روقت وشبعت نوم..

توجهه للدولاب طلعت لها ملابس خفيفه و لبستها واخذت العطر وتعطرت وناظرت نفسها في المرايه  تشوف شكلها النهائي وارسلت بوسه خفيفه  طائره لنفسها  وتوجهت لجوالها اللي وصله مسج فتحت  الجوال وشافت المسج من صديقتها مكتوب فيه دعوه لخطوبتها الليله وتطلبها انها تحضر الليله هي وصديقتهم فَي، ابتسمت غيداء بهدوء وجلست على السرير وتربعت ومسكت جوالها وهي تبحث على رقم فَي ودقت عليه..

لكن طال الإنتظار وفَي ما ردت عليها  وعرفت غيداء
اكيد ان فَي نايمه او صاير معها شي او يمكن مشغوله لذلك قررت تتصل في هديل وبعدين تدق على فَي..

دخلت على رقم هديل ودقت عليها انتظرت شوي

وجاها صوت هديل وهي ترحب فيها:  هلا هلا غدو اخيراً دقيتي علي ما بغيتي يا شيخه! 

غيداء:  والله  أنا  الأخت الصغيره المفروض كلكم اخواني الكبار وخواتي تدقون علي تسألون عني تشوفون انا وش فيني نفسيتي شلون مع الدراسه مو انا الي ادق عليكم واحد واحد.

هديل بضحكة:  حبيبتي احنا اخبارك توصلنا بالدقيقه كل يوم كل حركه تسوينها توصلنا يوصلنا تقرير كامل عنها عشان كذا ما نتصل فيك ولا ندق عليك ولا نسال عشان امي ما شاء الله ما تقصر...

ضحكت غيداء:  والله في ذي انك صدقتي انا ما يمديني اتنفس الا وانتم عرفتوا  امي مستقعده لي استقعاد واحد  شايب متقاعد..

ضحكت هديل وقالت:  حسبي الله على ابليسك انتي وكلامك الحين انت وش اخبارك وش مسويه بعد ايش مهببه شفت لامي ثلاث مكالمات كنت طالعه انا ومتعب  ما شفتها..

غيداء:  والله الحمد لله اخباري تمام التمام ما علي خلاف وعلى طاري وشني مهببه والله ما هببت شي ما غير نايمه وتجيك التهايم وانت نايم...

هديل  :  غدّو حبيبتي  هذي هي المشكله ،  اصحي وصحصحي سوي لك اي جدول نظمي لك جدول حياتك اليومية  عشان لا تعصبين امك وفي نفس الوقت انتي  يكون روتينك منظم ومرتبه وقتك  وتقدرين انك توافقين في دراستك وبين مسلسلاتك ولأمك ولكل شي  لا تكوني لا كذا ولا كذا  يعني تهملين جانب وتصبين كل قوتك على جانب واحد!!..

غيداء  :  يا هديل الله يسعدك والله اني دائماً اسوي لي  جدول وامشي عليه لين فجأة كذا يخرب كل كل الجدول ما ادري شلون بس يصير شي كذا فجأة  يخرب كل شي علي  يعني،  بعدين انتي  تعرفين انه انا ما اداني شي اسمه دراسه ثاني شي التجاره ما يبغى لها دراسه وبس يبغى لها تطبيق ويبغى لها مهنه يبغى لها شغف ويبغى لها يكون عندك خبره وانا اشوف نفسي في مجال التجاره والحمد لله يعني متوسعه وممتازه ليه  باقي ادرس ليه  ما  يعني خلاص ادخل في التجاره على طول؟..

هديل:  ما يصير يا حبيبتي  ،  تدخلين مع مين؟  ما حد يقبلك الا بشهادتك!..

غيداء:   اي والله حتى اخوك صقر مو راضي يدخلني الا بشهاده عشان كذا يعني كذا كذا مضطر اني ادرس بس والله ما اطيق  الجامعه ولا اقدر ارتب وقتي لها بس ان شاء الله بحاول عشان شي  واحد عشان المشاكل تخف وحنه امي على راسي يوميا خلاص تخف شوي..

هديل:  الله يعينك
غيداء :  يا رب  كيفه متعب ان شاء الله منيح؟    ان شاء الله منيح؟

ضحكت هديل وقالت:   منيح منيح الحمد لله.

ابتسمت  غيداء  و قالت:  الله يسعدك يا رب

هديل:  وياك الا وش عندك داقه علي ماهي بالعادة؟

غيداء:  يعني سواءً احد دق عليكم ولا ما ادق عليكم تزعلون كذا كذا؟.

هديل:  لا المقصد مو كذا المقصد انه يعني ما هو بالعاده انتي  تدقين علينا كذا يعني لوجه الله،  بالعاده احنا ندق على امي نقول لها قولي لغيداء تفتح الجوال ولا شلون غيداء  يعني مشوار كبير لين اكلمك..

ضحكت غيداء  وقالت:  انه يعني من الحين انا قاعده اطبق اني وضعيه البزنس وومن..

هديل:  حتى على اهلك؟

غيداء:  اكيد انا في الشغل ما عندي اهلي وغير اهلي...
هديل:  اقول اخلصي علي وش عندك؟

غيداء:  ابد والله سلامتك اليوم ان شاء الله صديقتي خطوبتها فعزمتنا وانا ابيك تروحين معي اذا ما عليك امر ولا بنزعجك انتي  ومتعب..

هديل:  وليه  تقولين متعب بهالطريقه؟

ضحكت غيداء وقالت:  انتي الي تقولين كذا
هديل:  طيب ومن بيودينا يعني؟

غيداء: مو مشكله صقر ولا السواق وين المشكله المهم الحين انتي  ابيك تجين  معي عشان توافق امي اني اروح الخطوبه ما حتوافق اروح مع السواق لحالي..

هديل:  اوكي طيب مو مشكله بكلم متعب وان شاء الله بجيكم كذا بعد ساعه..

غيداء:  تنورين البيت يا عيوني انتي  اخيرا ما بغينا!..

هديل بمزح:  اصلا كذا كذا يعني كسرتي خاطري ومتعب عنده  شغل بيتأخر فا بطفش لحالي..

ميلت غيداء  راسها وقالت:  ايه يعني مو لله كذا يعني ما حنيتي لاختك المهم الحين يلا يلا سلام بدق على فَي بشوف اذا بتجي معنا..

هديل  :  طيب يلا مع السلامه،  خليني الحق على متعب قبل يروح
غيداء :  طيب سلمي لي على صهري مع السلامه...

قفلت من هديل  ودقت على فَي وهي توقف وتتوجه للبلكونه وتفتحها وتطلع وسمعت صوت في: 
هلا غيداء دقيتي علي اول وانا قاعده مع جدي..

غيداء :  مو مشكله المهم بغيت اعلمك  اليوم ليلى عازمتنا على حفله خطوبتها الليله تقول كانت مشغوله فما قدرت انها تبلغنا بدري انه نعذرها وما نشيل يعني كذا بخاطرنا ونروح يعني ما يحتاج احنا اخوات وصديقات ومانحتاج عزومه من قبل يعني..

فَي:  طيب مو مشكله بكلم جدتي وبعلمك ان شاء الله ان شاء الله توافق..

غيداء:   اذا ما وافقت انا بدق عليها واقنعها بس ها حاولي  معها كثير ان شاء الله تقبل..

في:  طيب انا بكلمها الحين وبقول لك اذا وافقت او لا عشان تعرفين من بدري..

غيداء:  طيب تمام انا بنزل الحين لامي وانتي خلصي كلمي جدتك ودقي علي.

فَي:   طيب يلا باي

غيداء:  صبر ما علمتيني ولد عمك  ايش سوى يوم رجعتي؟  .

فَي:  ما سوى شي رجعنا البيت راح جاب غداء من المطعم كذا وخلاص انتهى كل شي.

غيداء:  الحمد لله

فَي:  يلا يلا مع السلامه خليني اطلع لجدتي  اعلمها.

غيداء:  تمام يا روحي مع السلامه..

قفلت غيداء  الخط من فَي وطلعت من البلكونه راجعه  لغرفتها وتوجهت للباب وطلعت رايحه الدور الأرضي  بتشوف امها وتقعد معها وتعلمها انه هديل جايه وتعلمها عن موضوع الحفله..

_______

عند " العنود "..

كانت جالسه هي وجواد الصغير في حديقه بيتهم تشرب لها شاهي وتقلب بجوالها  وتناظر جواد اللي يحل واجباته عندها وهو كل شوي يعدل نظارته ويرجع يكتب
العنود بهدوء  :  كيف كانت دروسك اليوم يا ماما؟

جواد بلكنته اللطيفه:  حلوه والتيتشر  ساعدتني في الكتابه على السبوره وخلت كل الطلاب يصفقون لي..

العنود ابتسمت:  ايوا شطور كذا انا ابغى ابني من الممتازين والأوائل..

جواد هز راسه  وكمل يكتب 

والعنود بقت تقلب جوالها بدون هدف معين او واضح لين توقفت يدها وهي تشوف مسج وصلها من فهد يقول فيه« ابي اكلم جواد»

تأففت وقلبت عيونها  وقالت:  ابوك بيكلمك!..

وما هي الا ثواني ورن جوالها فز جواد بسرعه والفرحه بانت على ملامحه والضحكة شقت وجهه وتوجه بسرعه للجوال واخذ من يدها وفتح الخط ورد  :  هلا بابا هلا
جاهم صوت فاهد المتلهف وقال:  هلا يا بابا هلا جوادي هلا حبيبي كيفك يا بابا عساك بخير.

جواد فرحان  :  الحمد لله طيب يا بابا وقاعد اذاكر انا مره شطور وقاعد اسمع كلام ماما كل واجباتي قاعد  احلها واليوم في المدرسه التيتشر خلت كل الطلاب يصفقون لي..

فاهد:   الله الله شاطر يابوي
جواد بفرحه:  حتى الحين قاعد احل الواجبات انا وماما..
تنهد فاهد وقال:  زين يبه ممتاز
كانت العنود تسمع لكلامهم وهي تشرب من كوبها وتفكر بصمت لين سمعت جواد يقول:  بابا متى تجي تاخذني اشتقت لك؟

فاهد بصوت ثقيل:  حتى انا والله مشتاق يابوك مشتاق حييل..

جواد برجاء :  تعال خذني
العنود بقهر:  جواد عندك دوام احنا متفقين يوم الجمعه تروح.

سكت فاهد اول ما سمع نبرة صوتها وغمض عيونه وقال بشوق: اشتقت لك يا جواد.

سكتت العنود وبلعت ريقها وشتت نظرها..

جواد بأبتسامة:  حتى انا يا بابا اشتقت لك تعال خذني وجيبني للمدرسه.

فاهد:  ابشر على خشمي لكن اول شي اقنع امك توافق
جواد ناظر العنود برجاء وقال:  ماما الله يخليك ابي اروح لبابا اشتقت له.

شتت نظرها وهزت راسها بالموافقة وضحك جواد بفرحه وقال:  وافقت يا بابا
فاهد ابتسم وقال:  اجل خلص مذاكرتك وجهز اغراض المدرسه وانا بجيك..

العنود بهمس:  قول له لا يجيك هو انا بخلي خالك يوديك له.

جواد:  بابا ماما تقول لا تجي خالي بيجيبني
شد فاهد على يده وقال:  زين..

قفل فاهد الخط وجواد نزل الجوال ومده لأمه ووقف بفرحه وقال:  انا بجهز اغراضي.

العنود:  اول شي خلص مذاكرتك
جواد:  خلصتها
العنود مدت يدها:   اشووف
سحب جواد الدفتر ومده لها:  شوفي

هزت العنود راسها وقالت:  زين يلا روح جهز اغراضك ترك جواد اللي في يده  وركض بكل سرعته للبيت والفرحه غامرته..

اما العنود  تنهدت وبدات تلم دفاتره والأقلام
ودخلت للبيت تشوف وش بيحتاج وبدت الضيقة تجتاح قلبها لأنه بيروح لأبوه ويتركها وشلون بتنام وهو
بعيد عن حضنها وشلون بترتاح وهو بعيد عن عيونها. 

هزت راسها تبعد الافكار عنها والضيق عشان ما توضح لجواد شي وتخلي الموضوع طبيعي..

وكتبت مسج سريع لاخوها عشان يكون عنده معرفه عن الموضوع انه هو اللي بيودي جواد لأبوه..

_____

" عند غيداء  "

اخيراً  اخيراً اقتنعت امها اذا هديل بتكون معهم فكانت جالسه مع امها على العصريه وتتقهوى مع امها رن جوالها كان رقم فَي على طول ردت عليها وقالت:  هلا في..

فَي بزعل:  غيداء بقول لك شي بس لا تزعلين انا خلاص قررت ما اروح اليوم الحفله..

قطبت  غيداء حاجبها وقالت:  خير ما امداك حتى تكلمين جدتك ليه؟

فَي:  انا صح ما كلمت جدتي بس فكرت في الموضوع يعني بيني وبينك كذا، ما عندي... ما عندي فستان كذا كل الفساتين اللي معي  لبستهم من قبل في حفلات البنات يعني مو حلوه اني اروح وانا مكرر اللبس وش بيقولون عني..

تاففت غيداء وقالت  :  الله اكبر يا السبب اللي يمنع من الحضور سبب قوي ايش السخافه ذي!!!

فَي بنرفزه:  وين السخافه ترى حقيقي يغيظ الموضوع يقهر!..

غيداء: الليله بتروحين يعني بتروحين غصب عنك ولا  والله  لا اسحبك من شوشتك بالبيجامه الحين روحي اقنعي جدتك وخليها توافق والفستان موضوعه  محلول خلاص سخافه انا يلا يلا يلا وافقت امي نروح..

بوزت فَي وقالت:  زين طيب

غيداء:  يلا مع السلامه روحي كلميها..

فَي:  اوكي  باي  ..

غيداء :  مع السلامه.

____

قفلت  فَي من غيداء  و توجهت لباب غرفتها
طلعت الصالة شافت جدها وجدتهاا قاعدين يتقهوون توجهت لهم بسرعه وجلست عندهم وقالت بأستعطاف:  جده حبيبتي   تكفين بطلبك لا ترديني بليييز يا جده فديتك قولي تم.

الجده:  بسم الله وش تبين انتي؟
في برجاء:  جده الله يخليك الله يخليك لا ترديني ابغى اروح مع غيداء صاحبتي حفلة صديقتنا تكفين وافقي تكفين..

~في غرفة حمدان~  ..

تقلب في فراشه اكثر من مره وجلس وهو يفرك عيونه
حك شعره وهو يتثاوب وقف وهو يتوجه لمنشفته وجاء بيطلع بيروح للحمام سمع صوت في مع جدانه توقف مكانه على الباب يسمع لها وش تقول...

فَي برجاء:  والله ما نتأخر تكفين كل البنات بيروحون تكفين يا جده..

الجده ناظرت فَي وقالت:  يا بنتي انتي تعرفين الموضوع عند حمدان انا بعلمه.

فَي ببكاء:  ما بيوافق تكفين انتي قولي تم تكفين!

الجده تنهدت:  زين انا بعلمه وبقنعه.

في بفرحه:  صدق!!
اومئت الجده وقالت  : اي صدق
في برجاء:  زين تكفين يا جده بطلبك طلب ثاني..

تنهدت جدتها وقالت:  وش تبين بعد؟

في:  ابي فلوس بشتري فستان ولا اخلي غيداء تشتري معها جده يرضيك بنتك تروح وما عندها فستان زي النااس؟

الجده:  يا ينتي من وين لي فلوس والفستان توه حمدان ماخذ لك قبل شهرين!

في ببكاء:  قبل شهرين!!  جده وش ذا كل فساتيني كلهم ما يجون مثل واحد من فساتين البنات وكل مره اروح بنفس الفساتين يمه وش بيقولون عني؟!!!

الجده تنهدت:  يا بنتي وش بيدنا ماسويناه هذا هو ولد عمك ليله مع نهاره يشتغل وعمره ماقصر عليك بشي لا تنكرين الجميل والله ان فساتينك من افضل الفساتين!
واحمدي ربك انه كل ما توفر له شي اخذ لك كل الي يخطر على بالك حتى نفسه حارمها من كل شي عشاننا
وبعدين شوفينا حنا كيف كنا ماكنا ناخذ ملابس جدد الا من العيد للعيد الثاني اما انتي كل شوي مشتريه لك شي!.

في بقهر:  وش مشتريه لي شي انا اذا اخذت شي غالي اخذت آيلاينر او روج وش الشي الي مشتريته بعدين يا جده والله انه قهر انا دائماً اكون انقص وحده في الشله وش ذنبي!!  ليه ما يصير عندي كل شي مثل الباقيات..

بلع حمدان ريقه وهو يسمعها تبكي وتقول  :  دايم اسكت واقول لا تشتكين لا تقولين شي عشان ولد عمك هذا هو يتعب هذا هو يحاول بس ما اقدر ما اقدر احس بالنقص يا جده!!

كان الجد يناظرها بعتاب وقال:  من اول ما تكلمتي وانا ساكت يا فَي وش هالكلام وانا ابوك وش الي تمنيتيه وما جاك هذا هو حمدان حارم نفسه من أبسط الأشياء لجل يوفر علاجي وعلاج جدتك وطلباتك الي ما تخلص ارحمي الولد يا فَي ارحميه شوي لا تخليني اغضب عليك..

فَي بكت ووقفت:  زين انا اعتذر لاني طلبت اكون مثل البنات مبسوطه فأغراضي الحلوه ومكياجي الفاخر خلاص يا جده لاعد تقولين لحمدان اني بروح الحفله بدق على البنات وبعتذر عن الروحه ماعد ودي احضر ولا انا حاضره بفستان قديم..

تنهد الجد وهمس:  الله يهديك من بنت الله يهديك..

راحت فَي لغرفتها وهي تبكي وقفلت الباب على عمرها وارتمت على. السرير وهي تبكي بقهر من حياتها الي تحسها ناقصه اشياء كثيره..

اما حمدان رجع لفراشه وترك المنشفه وهو يمسك راسه ويحس بقهر من قلة الحيله الي يحس فيها وقف وراح للمرايه وناظر نفسه وشد على الطاوله بقوه وعروقه برزت من الغيض الي يحس فيه ولمحات من الماضي تلوح امام عيونه..

ابتعد بسرعه عن المرايه وأنفاسه متسارعة وتوجه للدولاب طلع له ثوب غير ولبسه بسرعه وسحب جواله ومفتاح سيارته وطلع من الغرفه وشاف جدانه جالسين القى السلام بأستعجال وقال:  استودعتكم الله طلع لي شغل مهم..

طلع قبل يسمع منهم رد وتوجه لسيارته فتحها ودخل وشغلها وانطلق بكل سرعته وكلام فَي يتردد في باله وامنياتها بأنه يصير عندها كل شي..

بينما جدانه كانت دعواتهم له هي الشي الوحيد الي يقدرون يساعدونه فيها...

توجه حمدان للورشه ونزل وتوجه لرائد وطلب منه مبلغ مالي لكن رائد رفض وقال اشتغل السيارات الي برا وبعطيك حقهم فقط، طلع حمدان وناظر السيارات وغمض عيونه واخذ نفس عميق وشال الثوب من عليه وتوجه للبس الخاص ولبسه وتوجه لهم يبدأ يشتغلهم ومستعد يبذل كل الجهد عشان يحصل على المبلغ المطلوب ويروح ياخذ لها فستان قبل موعد الحفله
عشان تحضر وهي رافعه راسها ومقتنعه بشكلها...

كان مستعد يبذل المستحيل عشان يسعدها عشان يشبع دلعها ورغبتها في كل شي جديد...

_____

يتبع...