رواية انتي ربيع العمر في كل الفصول! الفصل السابع عشر 17 - بقلم rned 🖤

......

عند الشرطه..

سمع هادي العسكري ينادي اسمه: هادي بن جراح..

وقف هادي بسرعه وراح له: انا هادي..

فتح العسكري الباب و قال له : اطلع..

طلع هادي وهو عاقد حواجبه وقال: وش صار؟

العسكري: امشي معي وانت ساكت توجه هادي بعد العسكري رايحين لمكتب الضابط.

__

اما عند غيداء جاءت الشرطيه ونادت بأسمها: غيداء منصور...

تركت غيداء الخس اللي في يدها وقالت: أخيراً جيتي والله ما باقي الا شوي وأبعبع كني ماعز من ساعه قاعده اعلف في ذا الخس وهو مو راضي ينبلع..

الشرطيه فتحت الباب و قالت: أطلعي..

طلعت غيداء وهي تعدل نقابها وتناظر حالها في المكان ومشت الشرطيه وقالت: تعالي خليك وراي..

مشت غيداء خلف الشرطيه متوجهين الى مكتب الضابط اللي استدعاها هي وهادي..

وصلوا عند المكتب وفتحت الباب ودخلت وشافت هادي واقف وجواد جالس ناظرته شوي ثم ناظرت الضابط وتقدمت بهدوء وسمعت الضابط يقول: اول ما يصحى المريض يجي عندنا نسمعه و ألا بيتم استدعائك انت يا دكتور جواد...

جواد: ابشر ولا يهمك وبثبت لك إن هذي المشكله مشكلة عائلية بيننا واحنا نحلها..

هز الضابط راسه وناظر هادي وغيداء و قال: تقدرون تطلعون..

ابتسم هادي وناظر غيداء الي كانت شاده على يدها بقوه وواضح عليها انها معصبه..

وقف جواد وقال: مشكور يا حضرة الضابط..

أومئ الضابط بهدوء وطلع جواد وخلفه هادي وغيداء.

.
وأول ما ابتعدوا عن العساكر التفتت غيداء بعصبيه وقالت: قدرت تطلع اخوك يعني؟ ذبح الرجال والحين طلعته! انتو تحسبون الدنيا على كيفكم ولا وش؟ انتم عندكم ضمير؟ ما تحسون بغيركم!!
هذا وهو من لحمكم ودمكم مسوين فيه كذا الحين
من لجده وجدته وبنت عمه غيره؟..

انتوا ما تحسون؟ انتوا قلوبكم من وش مخلوقه؟..

تدري!.. اصلاً الشرهه مو عليكم الشرهه على الضابط اللي طلعك من السجن وانت معتدي على الرجال وضارب راسه في الجدار قدام عيوني!..

هادي ناظرها بصدمه وقال: انتي وش قاعده تقولين يا بنت؟!!

غيداء بعصبيه: والله يا هادي والله لو يموت حمدان ما اسامحك طول عمري فعلاً انتوا يا آل فارع مستحيل تتغيرون....
على من تطلعون أصلاً طالعين لابوكم!..

فتح جواد عيونه

وهادي قال بعصبيه: اقطعي صوتك يا غيداء لا تخليني اغلط عليك الحين.!!.

غيداء بسخرية: لا والله؟!... وش بتسوي يعني بتذبحني مثل ما سوى ابوك بالبنت وزوجها؟
ولا بتطردني مثل ما سوى ابوك بأخوه؟
ولا بتقتلني مثل ما سوى اخوك بالرجال المسكين؟
ولا يا استاذ هادي اقصد يا شيخ هادي بتسجنّي مثل ما سجن اخوك زوجته في غرفة سته شهور!!

لا لا اكيد بتصفق راسي في الجدار مثل ما سويت بولد عمك!
ما شاء الله يعني ما انتوا عندكم ماضي جداً رائع وحافل بالأنجازات ما تهددون على الفاضي..

جواد بحده: غيداء اسكتي خلاص!!.

اما هادي فكان يناظرها بصدمه كبيره وهو غير مصدق الكلام اللي قالته ولا مستوعب له!..

كانت عيونه متسعه وثابته عليها وكلامها يتردد في باله اكثر من مره وصداه يرن في المكان كاملاً..

بينما هي كانت تناظره بحده وواضح عليها العصبيه والقهر ..

اما جواد فكان واقف ما يدري وش يقول مصدوم من كلامها ومصدوم من اخوه اللي واقف بدون اي كلمه!.

وقبل ما يتكلمون او يبدون اي ردة فعل شافوا صقر داخل من بعيد وأول ما انتبه عليهم على طول تقدم منهم وواضح على هيئته العصبيه من عيونه الحمر وشكله اللي يخوف ويوحي ان هذا الانسان بينفجر في أي لحظه....

تقدم منهم وقبل ما يتكلمون له او يبررون له او يقولون له اي شي..
سحب غيداء من يدها بعصبيه وسحبها خلفه وهو طالع بخطوات وسيعه وحادة..

بينما هادي صد بسرعه وهو يمسك راسه ويمسح وجهه مصدوم من الكلام اللي قالته غيداء في وجهه وكيف انها عددت لهم كل مصايبهم في الماضي وكل كلامها كان جارح بالنسبه لهادي وما كان متوقع إن غيداء يجي منها هذا الكلام..

ادرك انه هو الوحيد اللي يحمل لها في خاطر شي كبير بينما هي ما تعتبره الا ولد قاتل ومن عائله مجرمه ومتغطرسه!..

ما تشوفه الا كذا!!

ربت جواد على كتف هادي وقال: خلينا نطلع ونرجع للبيت خلينا نطلع من هنا..

هادي ناظر جواد وكان واضح على وجهه الصدمه والحزن وحواجبه منعقده..

جواد شتت نظره في كل مكان وهو يدري، يدري حيل بهذي النظره هذي النظره ما تجي الا اذا سمعوا كلام قاسي من اللي يحبونهم!.

وجواد بكل تأكيد مجرب هذا الشي ملاك في الماضي ما قصرت معه..

وفي نفس الوقت انقهر!.

انقهر حيل على اخوه هادي ما يبيه يسلك الطريق اللي هو سلكه ما يبيه يحس بالإحساس اللي هو عاشه ما يبي هادي يكون ضحيه جديده لأفعال ابوه وآثار مصائب ابوه تلاحقه في كل حياته!..

ابتعد هادي عن جواد وطلع بخطوات سريعه من المكان اللي هم فيه ولحقه جواد وهو يستغفر بهدوء وضايقه فيه الوسيعه وهو يشوف الخيبه في عيون هادي..

____

بينما صقر كان يسحب غيداء وراه وهو معصب ولا يتكلم...

فتح الباب ودفها بكل قوه للداخل مما خلاها تضرب يدها وصرخت بألم: وجع وجع انت الثاني وش فيك؟!!!

صر صقر على اسنانه وقال: والله اني بندمك على ذا الشي اللي سويتيه..

اجل انا اختي تنحجز في اقسام الشرطه؟

اخرتك يا صقر بن منصور اختك تنسجن بتهمه محاوله القتل؟؟.
والله لأوريك!!

غيداء كانت ماسكه يدها بوجع اما صقر فتوجه مكانه وتحرك بسيارته منطلق للبيت وهو ناوي عليها اليوم هذا بسبب اللي سوته وانها سمحت لنفسها تنحجز في مكان الشرطه..

_____

وصل هادي لسياره جواد ودخل بعد ما فتحها له من بعيد..

ودخل جواد لمكانه وحرك السياره بهدوء راجعين للبيت يتفاهمون فيه ويشوفون حل للمصيبه هذي ويشوفون شلون يتصرفون مع حمدان وشلون يخفون عن عمهم هذا الشي..

وخايفين ان عمهم يعرف في اللي صار في حمدان وتتﭢزم حالته النفسيه ويزداد الامر سوءً..

التفت جواد لهادي وقال: اسمعني يا هادي عمي مستحيل يعرف عن اللي صار مفهوم مستحيل نعلمه عن اللي صار ابدا بنحاول انه نخليه يبتعد عن المكان لين تتحسن حالة حمدان ويصير بعدها خير الحين لو يعرف عمي عن اللي صار فيه والله ما يقابل وجوهنا دقيقه وحده...

هادي رجع راسه للخلف بتعب وقال ببرود: سوي اللي تبي!.

جواد سكت وهو يرجع يناظر طريقه ويفرك جبينه بهدوء يحاول انه يفكر في شي يخلي عمهم يبعد وما يدري عن سالفه حمدان بعدها التفت جواد لهادي وقال له: اسمعني يا هادي انا من رأيي اننا ناخذ عمي هذي الايام، اليوم ولا بكره ونخليه ينزل الديره بنقول اي شي بنقول اننا نبي نجتمع مع الاهل بنعزم الكل وبننزل كلنا وبنقول لعمي انه قاعدين نحاول مع حمدان انه يجي معنا في الديره ويسامحنا لكن حمدان متضايق شوي وآخذ على خاطره وعمي ما بيشك في شي انا متأكد..

قال هادي بتعب: حتى انا والله مالي خلق لشي الحين نفسيتي تعبت ومتضايق ودي أنزل الديره اخذ لي يومين ثلاثه اغير فيها جو وبرجع الرياض..

جواد اومئ بالموافقه وقال: الله يستر من صقر لا عصب لا يأذي البنت هي مالها دخل في الي صار..

ما رد هادي والتفت للشباك يناظر الشارع وهو شاد على يده بقوه ومتضايق من كلامها معه.
ومصدوم فيها!

اما جواد كان ينقل نظره ما بينه وبين الطريق

__

" مسفر"

وصل للرياض وتوجه لبيته ومعه ود وولدهم رامي ودخلوا للبيت بهدوء وقال: ادخلوا ارتاحوا وانا باخذ لنا اكل وجاي..

ماردت عليه ود وخذت ولدها وصعدت لغرفتهم..

اما مسفر تنهد وطلع من البيت بيروح ياخذ لهم شي يا كلونه وهو يفكر اليوم يرتاح وبكره يروح لبيت جواد ويشوف الوضع هناك...

____

وصل صقر للبيت ونزلت غيداء وهي معصبه ودخلت للبيت ودخل صقر خلفها وهو مسرع وسحبها بيدها بقوة ولفها له وبدون وعي منه رفع يده وأستقرت على خدها

...

شهقت أفنان الي كانت نازلة من الدرج وقالت بأستنكار: صقــــــــر!!

رفعت غيداء راسها بصدمه وناظرت صقر الي يتنفس بسرعه وواضح انه فاقد اعصابه قال بحده: انقلعي من قدام وجهي لا اكمل عليك الحين تراني ماسك اعصابي بالقوه انقلعي يا غيداء!

غيداء ابتسمت بوجع وصدت عنه ومشت متوجهه للدرج ودموعها تنزل وافنان تناظرها..

وناظرت صقر بعتب وطلعت الدرج بتلحق غيداء بتحاول انها تراضيها وتشوف ايش اللي صار يخلي صقر يعصب كذا منها..

دخلت غيداء بسرعه لغرفتها وقفلت الباب وراحت للسرير وطاحت عليه وهي تبكي..

أفنان وصلت للباب ودقت الباب: غيداء افتحي الباب بتكلم معك غيداء لو سمحتي حبيبتي افتحي الباب صقر ما يقصد انتي تدرين ان صقر مستحيل يمد يده عليك بس هو تعبان و..

فزّت من صوت صقر من خلفها: الا بمد يدي عليها وبكسّر راسها لا تتدخلين يا أفنان بيني وبين اختي وأنقلعي لغرفتك انتي الثانيه..

افنان رفعت حواجبها وناظرته وقالت: هذا الكلام لي انا يا صقر؟.

صقر بعصبيه: افنان قلت لك روحي غرفتك لا تخليني الحين افصل عليك!!

أفنان بعصبيه: احترم نفسك يا صقر ماني اصغر بناتك الحين!!

تركته وراحت عنه وهي معصبه متوجهه غرفتها

ينما مسح صقر وجهه وركل الباب بقوه ما وقال بعصبيه: وش اللي صار؟ وش اللي مخليك تروحين لقسم الشرطه!!!؟؟؟.

ما ردت غيداء عليه وهي تبكي مصدومه انه مد يده عليها قبل حتى لا يسئلها وش اللي صار معها!.
وقبل حتى لا يفهم وش السالفه!.

انقهرت كثير منه و عصب صقر عليها وركل الباب بقوه برجله وقال: انا اوريك يا غيداء انا اوريك..

ام صقر كانت طالعه من الدرج على صوت الصراخ وقالت بخوف: وش فيكم اصوتكم واصله للشارع وش اللي صاير يا صقر؟

صقر ألتفت لها وقال بعصبيه: بنتك ذي لو تطلع من باب البيت بكسر رجولها تكسير يا اما تعيدين تربيتها انتي يا والله العظيم لا افرشها في الارض اجل أنا اختي تدخل اقسام الشرطه؟!!!! انا اختي تدخل اقسام الشرطه؟! ولا فوق هذا يتهمونها بالشروع بالقتل!..

انصدمت ام صقر قالت: وش تقول انت.

صقر بعصبيه: اقسم بالله ان طلعت من البيت لاكسر رجلها وقولوا صقر ما قال..

مشى صقر عنهم وهو معصب والتفتت ام صقر لباب غرفة غيداء وهي متفاجاة من كلام صقر وش الي قسم شرطه ووش الي شروع بالقتل!!!!...

_____

وصلوا هادي وجواد الى بيت جواد وكان حمد واقف في الحوش بأستقبالهم وينتظرهم وكان جدا قلقان مو قادر حتى يقعد مع الرجال في المجلس اول ما وصلوا راح لهم بسرعه وقال: وش صار معكم؟ وشلون حمدان الحين؟

ما ارد عليه هادي وتخطاهم داخل للبيت ..

ناظره حمد لين دخل والتفت لجواد وقال: وش صار؟

جواد تنهد: طلعتهم من الحجز وحمدان الحمدلله استقرت حالته لكن يبي له 24 ساعه لين يبدا يستعيد وعيه ويصحى...

حمد: زين وصقر وش صار على اخته؟

جواد: اخذها تلقاهم الحين وصلوا البيت الحين اسمعني يا حمد خذ زوجتك وانا باخذ زوجتي وبنتي وناخذ عمي وننزل كلنا مع اخواني للديره اليوم او بكره..

عقد حمد حواجبه وقال: ليه وش صار عسى ما شر؟

جواد: ما ابغى عمي يعرف عن اللي صار مع حمدان ابيه يبعد بقدر الاستطاعه و قدر الإمكان عن كل الناس المحيطين بهم اللي يعرفونه ويعرفون حمدان عشان عمي ما تنتكس حالته لو عرف على اللي صار وانا بهتم بحالة حمدان الصحيه لكن المهم الحين اننا ننزل في اسرع وقت للديره..

حمد: يا رجال شلون ننزل كذا فجأة طيب وبنتك معاها مدرسه! وبنت عمك ذي ما ادري وش اسمها عندها جامعه! ..

جواد: ما هي مشكله بناخذ اجازه ثلاث ايام اربع ايام ونرجع الموضوع مهم ويحتاج اننا ننزل قبل يوصل طرف خبر لعمي..

هز حمد راسه بالموافقة وقال : اجل انت ادخل كلم اخوانك وكلم عمي، وانا بروح اخذ زوجتي وبجيبها البيت عندكم ونتحرك من هنا كلنا في وقت واحد للديره..

جواد ربت على كتف حمد وقال: خير ما تسوي هذا افضل وانا بدخل لهم واعلمهم عن الموضوع..

وافق حمد وعلى طول طلع من البيت متوجه لسيارته بيروح بيته وياخذ زوجته ويجيبها لبيت جواد..

اما جواد اخذ نفس عميق وناظر نفسه وهو بلبس المستشفى للحين ودخل للبيت وتحديدا لمجلس الرجال..

اما هادي دخل للبيت و طلع صوت عشان ينتبهون على تواجده معهم ويتغطون وراح للدرج بيطلع لغرفته لكنه توقف بسرعه وهو يشوف الي نزلت من الدرج وما كانت منتبهه له وهي تتأمل كل شي بأعجاب
على طول ارتد لوراه وصد بوجهه وتحنحن عشان تنتبه عليه...

فزت فَي بخوف اول ما شافته وركضت بسرعه للأعلى.

ويوم تأكد هادي انها ابتعدت عن طريقه صعد الدرج بسرعه رايح لغرفته..

____

مرت الساعات على الجميع في حوسه وتجهيزات
السفر للديره..

كانت فَي متحمسه جداً للروحة الى الديره وشوفة أهلها..

كانت قاعده في وحده من الغرف اللي خصصوها لها وتفكر في كيف بيكون اللقاء هناك وفي التغيير اللي بيصير في حياتهم وهي نوعاً ما مبسوطه..

اخذت جوالها وهي ناويه تدق على غيداء وتعلمها عن كل شديد صار معهم لكنها تذكرت سالفة حمدان وانهم تركوه واختاروا يجون عند اهلهم وقالت اكيد بتعاتبها غيداء لذلك بتترك الموضوع شوي وبتعلمها بعدين!.

وقفت فَي وهي تفكر وش بتجهز لها ووش بتاخذ لها من اغراض عشان تروح الديره، وللحظة تذكرت المبلغ المالي اللي اعطاها حمدان انها ناسيته في البيت وما اخذته عضت شفتها بقهر وهي تتذكر انه مبلغ جداً كبير وكفيل انه يجيب لها كل شي تحتاجه لهذا السفر!.

لذلك قررت انها تروح البيت تاخذ اغراضها المهمه وتاخذ الفلوس..

لكن اذا عرف جدها او جدتها انها بتروح البيت مره ثانيه ما بيسمحوا لها لذلك قررت تطلع بدون ما يعرفون وتروح تاخذ الفلوس وبتاخذ اغراضها وبترجع بسرعه

وفعلاً وقفت بسرعه ولبست عبايتها وأخذت جوالها وشنطتها الصغيره وطلعت من الغرفه بسرعه و هي ناويه تطلع تشوف لها اي احد يوصلها لبيتهم..

تسللت من البيت وطلعت للحوش شافت سياراتهم كثيره فتحت فمها باعجاب كبير بأشكال سياراتهم وجمالها..

مشت بخطوات هادئة وسمعت صوت سياره
توجهت لمصدر الصوت وشافت واحد واضح انه للحين شاب في العشرينات تعطيه عمر 25 او 24 اخذت نفس عميق وراحت له: السلام عليكم .

التفت يوسف لها وعدل جلسته وقال: وعليكم السلام..

فَي بأحراج: انا فَي ابي احد يوصلني لبيتنا باخذ اغرضي قبل نسافر الديرة..

يوسف انخببص وقال: زين تفضلي بوصلك للبيت..

فَي بهدوء: مشكور..

يوسف: ما بيننا تفضلي..

دخلت فَي في الخلف وهي منحرجه ويوسف منخبص من تواجدها معه..

وحرك سيارته طالع من البيت ومتوجه لبيت حمدان!.

بينما فَي تفكر وش بتقول لحمدان إذا سئلها ليه رجعت؟
وش بتقول له!
رجعت أخذ الفلوس!
اخذت نفس عميق وهي تهدي نفسها ما تتوتر من طاريه

وناظرت السيارة باعجاب وهمست: هذي السيارات الصح! الله يرزقك يا حمدان والله انك مظلوم بحياتك و لا سيارتك سيارة بشر!!

قلبت عيونها وهي تناظر من الشباك للناس وللسيارات...

__________

" جواد "

كان جالس مع ملاك الي معصبه ورافضه انها تروح معهم للديرة: اقول لك ماني رايحه وخلاص يا جواد!

جواد: ملاك الكل بيكون موجود
ملاك ناظرته بقهر: انا ماني من الكل! تمام؟

جواد تنهد وقال: ملاك
ملاك بانفعال: جواد نسيت انهم طارديني وفوقه حتى بنتك قهروها وخوفوها اهلك ذولي لا يمكن اني اقابلهم..

وقف جواد بعصبيه وقال: بتقابلينهم ويكفي ذي الحركات اتركيها عنك بنتي لازم تعرف أهلها وتحبهم ويحبونها وتعيش وتتعايش معهم تفهمين.!!؟؟

ملاك بعصبيه: لا ما افهم واهلك ذولي عاد من زينهم تتعرف عليهم ولا تعرفهم خلها بعيد عنهم احسن..

جواد بحده: ملاك!!

ملاك صدت بوجهها وهي تتنفس بسرعه ومعصبه

جواد جاء بيتكلم لكن رن جواله رفعه وشافه فاهد رد عليه: هلا فاهد

فاهد كان جالس في سيارته ومبتسم: السلام عليكم

جواد: وعليكم السلام ارحب

فاهد: البقى شلونكم؟

جواد: الحمدلله بخير وانت؟
فاهد تنهد براحه وقال بسعاده: بخير وبخير وبخير بعد

ابتسم جواد بهدوء وقال: يا عساه دايم..

فاهد بابتسامة: اسئلني ليه؟

جواد: ليه؟

فاهد ارتجف صوته وتنهد براحه كبيره وشوق: العنود بترجع لي!.

فتح جواد عيونه بصدمه: وش؟ وش تقول انت!!

التفتت ملاك لجواد وعقدت حواجبها

فاهد ضحك براحه: بكره ان شاء الله اخذ كل الي اعرفهم من جاهات ومن مشايخ ونروح بيت الشيخ هزاع وأخذها..

جواد بفرحه: الف مبروك وانا اخوك الحمدلله الله يتمم لك على خير ويسعدكم..

فاهد تنهد: يــا رب
جواد بسعاده: اجل اصبر احنا جايينكم الليله وبنروح كلنا لها..

فاهد بابتسامة: تم اجل استودعتك الله بدق على الباقين..

جواد بفرحه لاخوه: الله يبشرك بوجه النبي فرحت قلبي والله...

ضحك فاهد براحه
وقفل جواد منه والتفت وشاف ملاك تناظره: وش عندك؟

ملاك: وش صار؟
ابتسم جواد وقال: العنود بترجع بكره لفاهد

فتحت ملاك عيونها: احلف!!

جواد بسعاده: والله

ملاك بابتسامة مكر: اجل انا معكم

جواد عقد حواجبه: وشو؟
ملاك بابتسامة: دام خويتي رجعت للبيت هذاك انا بعد برجع وبدخله غصب عن الي يرضى والي ما يرضى...

عض جواد شفته وقال: بتتفقون يعني؟
ملاك بدلع: احنا متفقات من زمان

ابتسم جواد وتقدم منها يضمها وهو اهم شي عنده بنته تعرف أهلها وبنات عمها...

يتبع

حساب الانستا الجديد alrane.d