رواية انتي ربيع العمر في كل الفصول! الفصل السابع والعشرون 27 - بقلم rned 🖤

... .

صرخ هادي بكل صوته: حــــــــمــــــــدان!..

دخل بخطوات مستعجله داخل للحوش هو يصرخ بأسم حمدان...

وقف الرجال اللي في المجلس كلهم وهم مستغربين من الصراخ وما هي إلا ثواني ودخل عليهم هادي المجلس كالإعصار ثاير ما يشوف قدامه..

وجت عينه على حمدان اللي كان توه يقعد معهم وتقدم منه بكل عصبيه ووقف حمدان تلقائيّاً و سدد له لكمة على وجهه طيحت حمدان على الارض..

صرخ جواد بعصبيه على هادي وتقدم منه ودفّه وقال: وش قاعد تسوي انت؟؟!!

ألجد اتسعت عيونه بصدمه وتحرك بكرسيه متقدم منهم وهو مصدوم من اللي سواه هادي لحمدان

وفزع لهم فاهد وهو يمسك هادي بعصبيه وحمد ركض يرفع حمده من على الارض وهو يسنده ورجال كلهم واقفين ويناظرون بعضهم ما يدرون وش اللي قاعد يصير.!

مصدومين وكأن الحرب بدأت تشتعل ما بين نساء ورجال آل فارع...

هادي بصراخ وهو يحاول يفك نفسه من يدين جواد وفاهد: وش تحسب نفسسسك تسوي؟؟

حمدان رفع راسه وناظر هادي ورفع يده يمسح الدم من فمه وهو يناظره بتوعد..

جد حمدان بخوف وهو يرتجف: وش سوويــــــــت يا ولد ليه تضرب حمدان؟

جواد بعصبيه دف هادي وقال: مهبول انت جاك بلا؟

هادي بعصبيه: والله والله لندمك يالكلب والله لشرب من دمك مب انا الي تستغفلني وتلعب عليي..

فاهد شد على هادي بعصبيه وسحبه معه وطلعه من المجلس والرجال يتكلمون مابينهم وهم ناقدين على الي يصير في عائلة جراح..

وحمدان نفض نفسه من حمد وطلع للحوش وهو يتوعد في هادي
و يوسف اخذ عمه وطلعه للحوش وطلعوا عيال جراح كلهم من المجلس والرجال جلسوا وهم يتناقشون حول الي صار...

__

فاهد بعصبيه: وش هالوغدنه يا هادي؟!!

جواد بعصبيه مماثله: وش بلاك على الرجال احنا في عزاء! !!!..

هادي بأنفعال: هذا الكلب سايقها علينا مب فاقد الذاكره وقاعد يدمرنا بدون ما نحس عليه..

جواد بصدمه ناظر حمدان الي واقف امامهم بكل شموخ ويفكر شلون عرفوا عنه ووش يعرفون؟

الجد برجفه: انت وش قاعد تقول؟ حمدان وش بينه وبينكم؟

هادي وهو يرتجف من العصبيه والقهر وصوته يحس انه صار مبحوح من الغيظ اللي يحس فيه ناظر اخوانه وقال: حمدان قاعد يسوقها علينا يسوقها علينا ما هو مريض ولا فاقد الذاكره!! حمدان هذا هو سبب كل المصاب اللي قاعده تصير فينا وهو نفسه يا جواد هو نفسه فيّان صاحب شركه فيّان...
يا جواد هو اللي يبي يخرب علينا شركتنا واللي قاعد من شهور يدمر لنا كل صفقاتنا واليوم كل الشركات ألغت كل العقود اللي معنا وكل البنود اللي بيننا وبينهم التغتوا بطريقه ما ندري عنها شلون؟ وكيف؟ ما ندري وهو نفسه السبب هو يا جواد السبب هو اللي دمر شركتنا واملاكنا وقاعد يسوقها علينا انه فاقد الذاكره وداخل بيننا والله اعلم ليه داخل بيننا؟ هذا اللي قاعد بيننا شيطان يا جواد شيطان!! ما ادري وش اللي في باله ولا وش يبي مننا لكن قاعد يسوقها علينا وقاعد يخطط مخططات ما لها نهايه...

ارتفعت الأنظار كلها لحمدان بصدمه..

وحمدان شد على يده بقوه وهو يحس الدنيا صارت تدور فيه وشلون عرف هادي انه فيّان!!!..

الجد نطق بصدمه: حمدان! وش يقولون؟

كانت انظار جواد على حمدان بصدمه وهادي يحس دمه يفور ويبي يهجم على حمدان..

حمدان كانت انظاره ثابته على هادي ويتبادلون انظار التوعد في بعضهم. ..

هادي رفع يده واشر على حمدان وقال بقهر: ساقها علينا كلنا كذب علينا كلنا وقال انه فاقد الذاكره ودخل بيتنا واليوم كل الشركات تركتنا وضاعت مننا كل الأسهم يا جواد يعني كل تعبببب سنينا راح بسببه كل اموالنا راحت بسبب هذا الي واقف امامكم من انت لجل تدمر شغلنااا؟؟ من انت لجل تسمح لنفسك تهدم كل تعبنا " صرخ بغيض وهو يحس قلبه بيتوقف من القهر:والله العظيم لوجعك قلبك مثل ما اوجعتنيييي والله لشرب من دمك يا كلـــــــــب!!..

الجد ناظر حمدان بصدمه وقال: حمدان وش الي يقوله؟!!!..

فاهد بعصبيه: تكلمم يا حمدان وش قاعد يقول هادي ؟!!

جواد بحده: انطق يا حمدان الي يقوله هادي صحيح؟!!!

حمدان ابتسم بسخريه وعينه على هادي وقال ببرود: صحيح!.

اتسعت عيون الجد بصدمه وقال: حمدان!

جواد هجم على حمدان بعصبيه ومسكه من ياقته وصرخ: تسوووقها علينا انك فاقد الذاكره؟!!

حمدان رفع يديه بعصبيه ووخر جواد عنه وقال: ابعد يدك لا اكسرها لك..

الجد بعصبيه: حمدان وش حركات البزرنه هذي؟ تكذب علينا ليه؟ ليه تتعنى المرض؟ ليه يا حمدان تكذب علينا!؟؟؟

هادي وانفاسه سريعه: حفيدك ذا في راسه بلا وحاط راسه براسنا حفيدك ذا ناوي على الشر!..

الجد بعصبيه: حمدان تكلم..

حمدان ناظر جده بنظرات حاده وقال: تبي تعرف؟

الجد هز راسه بحسافه وقال: يا حسرة قلبك يا عجلان دام حفيدك الي رافع فيه الراس سود وجهك امام الملأ يا سواد وجهك يا عجلان...

حمدان بعصبيه صرخ: ما سودت وجهك امام احد ذول الي انت شاد فيهم الظهر ورافع راسك فيهم مجرمين ذول هم نفسهم الي سببو لي الجرح الي في راسي...

الجد رفع راسه بصدمه لجواد وقال: وشو؟

هادي بعصبيه: والله لربيك يا كلب..

حمدان ناظره وصرخ: تنكر انك الي تسببت لي بالجرح الي في راسي تنكر؟؟

الجد ناظرهم وقال: الي يقوله حمدان صحيح؟؟؟

حمدان بمكر : ايييه صحيح يا جد صحيح هادي الي ضارب راسي في الجدار ويوم صحيت قلت اني فاقد الذاكره لجل لا يذبحوني...

هادي صرخ بعصبيه: يا الكذابب نذبح من؟؟؟

حمدان بصوت مماثل: اجل ليييه تكذبون على جدي وتقولون حادث؟؟

الجد ناظرهم بصدمه وقال جواد: يا عم اسمع احنا كذبنا لجل لا نخسرك والله العظيم ما في نيتنا شي ثاني..

حمدان بسخرية: ليه تطلع اخوك من السجن؟ ليه جبتنوي البيت؟ ليه ما خذيتوني المستشفى تعالجوني ولا خايفين لا اصحى واعلم جدي قلتوا دامه فاقد الذاكره خل نخليه مكانه ونقفل كل الملفات..

الجد كان يناظرهم بصدمه وهادي مصدوم شلون قلب حمدان عليهم الطاوله وهجم بكل قوته على حمدان واعتلت اصواتهم وكل واحد فيهم يضرب في الثاني وفرقوهم فاهد واخوانه وماسكين كل واحد على جنب وصرخ هادي: والله لربيك والله لطلع الأسهم من عيونك.

حمدان بحده: تعال كانك رجال والله ثم والله لربيك..

الجد: خلااااص انت ويااااه...

هادي وانفاسه متسارعه: يا عم يشهد الله ما كذبنا عليك لجل شي الا خوف اننا نخسرك من بعد كل هذي السنين الي صار بيني وبين حمدان هوشه وطاح مني بالغلط وضرب راسه...

حمدان ضحك بقوه ورفع يده يصفق وقال: اجل خايفين تخسرون عمكم؟

هادي بعصبيه: انت اسكت يا كلــــــــب اسكــــت!!..
الجد هز راسه وهو مصدوم من الي يصير وقال: خذني يا حمدان خذني...

ابتسم حمدان و قال هادي بعصبيه: يا عم تكفى افهم افهم احنا ما كذبنا عليك الا لجل لا نخسرك والله العظيم ما كذبنا عليك الا لجل لا نخسرك! حفيدك ذا شيطان شيطان اقسم بالله ..

حمدان: اقطع صوتك لا اقطعه لك جدي كشفكم على حقيقتكم...

هادي بأنفعال: يا عم حفيدك ذا صاحب اكبر شركة تصدير وإستيراد في المملكة ومعيشكم في فقر..

اتسعت عيون حمدان بعصبيه ورفع الجد راسه بصدمه وقال: وشو!

جواد بحده: كلام هادي صحيح يا عم حمدان خبيث..

هادي وعيونه حمر ويحس انه بيصيح في اي لحظه كل ما تذكر الاسهم الي خسرها: يا عم حفيدك هذا خسرني
كل تعبي وسنيني خسرررني كل شي املكه..

الجد ناظر حمدان وهو عاقد حواجبه بصدمه وقال هادي بكره: الصدمه مب هنا يا عم الصدمه من وين جاه كل هالأموال؟ وهو لا وارث ولا عنده حتى شهادة جامعية؟ هذا دليل انه داخل في الحرام...

حمدان بعصبيه: تخســـــــــى يالكلــــــــب تخســـــــــى!.

جد حمدان كانت عيونه ثابته على حمدان وهو يهز راسه بصدمه ويده على صدره وهو يحس بنغزات في قلبه ولده وحفيده الغالي داخل في المحرمات!!.

حمدان بقهر: يا جدي اسمعني والله العظيم مالي في المحرمات ولا دخلت فيها الشركه حلال زلال لي مافيها ريال واحد حرام..

هادي بحقد :وليه متسلط علينا؟ ليه ما تعيش جدك وأهلك في الخير والنعمه الي انت فيها...
حمدان بصراخ: انت لا تتدخل يا كلب..

فاهد بعصبيه: اسكت انت وياه ما عد فيكم احترام ولا شيمه..
هادي: الي مافيه احترام ولا شيمه هو هذا الي قدامك لا يرحم ولا يخلي رحمة الله تنزل اناني وحقود عايش في النعمه والخير لحاله واهله تاركهم في الفقر...

الجد كان يهز راسه وهو مصدوم من كل الي يصير وكأنه تلقى صفعه في عمره الكبير هذا..

فاهد: حمدان وش الي يخليك تخسرهم شركتهم؟

نطق الجد بحزن وقال: لا تسئله يا فاهد لا تسئله شي خذوني من هنا خذوني ما عد ابي أشوفه ما عندي ولد اسمه حمدان..

حمدان اتسعت عيونه بصدمه وقال: يا جد! .

جد حمدان برجفه: خذوني من هنا..

توجه جواد لعمه وقال: اهدئ يا عم اهدئ لا يصير لك شي كل شي بينحل الا صحتك لا تدمرها لجل مشاكلهم...

جد حمدان: خذوني من هنا خذوني..

حمدان بانفعال: تبي تنحاش من حفيدك ولا تناظره وما تبي تبعد عن قتلة عيالك؟؟!؟

توقف جواد ورفع راسه وناظروا كلهم لحمدان والجد عقد حواجبه وهمس: قتلة عيالي؟!.
فاهد: وش تقول يا حمدان الكلام كبير ولكل كلمه حقها!..

حمدان ناظرهم كلهم بكره وقال: وانا ما نطقت كلمه الا وانا ادري عنها..

هادي بسخرية: وش الي تدري عنه؟

حمدان جال بنظره على عيال جراح كلهم واستقر نظره على نمر الي شحب وجهه وانخطف لونه وهو يناظر حمدان برجفه...

ابتسم حمدان بألم وقال: تحسبني ياجد عايش ومتهني؟ لا والذي نفسي بيده اني اعيش في كابوس من سبع سنوات اعيش في وجع وهم ماله نهايه...
ابحث عن طريقة وحده لأخذ الثار من الي قتل اهلي من الي قتل عمتي بيوم زواجها!....

طاحت دموع الجد وهو يتذكر الفاجعه الي صارت في عياله..
حمدان بغصه: لحقتهم يا جدي لحقتهم بموترك وشفتهم يموتون!..

شهقت الجد وهو يمسح على صدره يحاول يتنفس وجواد مسكه بخوف وقال: عمي.

حمدان بأنفعال: اهلنا ماااتو عيـــــــالك ماتو وذولي عايشين حياتهم احنا تدمرت كل حياتنا بسبب اخوك وعياله ويوم جيت باخذ حقي وحقكم وقفت ضدي وتبي تروووح مني!!!!؟؟؟؟؟

فاهد بضيق: حمدان وش قاعد تقول وانا اخوك..
نمر غمض عيونه بقوه وهو يشد على يده ويحاول يسند طوله..

حمدان بعصبيه: لا انت اخوي ولا اعرفكم ولا اعترف فيكم حتى انتو قتله قتله وماضيكم كله دم والحين تحاولون تحصدون الورد في حياتكم وانتو زارعين حياتكم كلها جرايم وظلم لخلق الله...

عسّاف: حمدان ان كانك تعرف شي تكلم بوضوح لا تتكلم بالألغاز..

جواد برجفه وهو يناظر عمه: حمدان وش تقصد اننا قتلة اهلك؟

حمد انتبه على اخوه نمر يختل توازنه وسنده بسرعه: بسم الله عليك وش بلاك؟

حمدان ابتسم بألم وناظر نمر وهمس بغصه: وشلون قادر تنام وتعيش بين عيالك مرتاح وانت تارك عيال الناس ايتام!..

اتسعت عيون الجميع بصدمه وناظروا نمر الي غمض عيونه بقوه وشد على يد حمد لكن حمد سحب يده بصدمه وهو يناظر اخوه...

العم كانت عيونه ثابته على نمر وعلامات الصدمه مرسومة على وجهه..

فاهد بصدمه: نــمـر!.

حمدان بعصبيه: ايـــــــــه نمر ايييه نمر الي ذبح اهلي نمررررر اخوكم نمررررر ولد جراح..

هادي كانت عيونه متسعه بصدمه وناظر نمر وهز راسه بالرفض..

وحمد ناظر اخوه من امه وابوه بعيون مصدومه رافضه التصديق و جواد هز راسه بالرفض وهو مو مستوعب ان اخوه الهادئ الساكت قاتل!..

فاهد برجاء: نمر تكلم يرحم والدينك تكلم قل شي عكس كلامه تكلم يا نمر!.

نمر طاح على الأرض وشد على التراب بيديه وهو يحس الدنيا تضيق فيه وتخنقه..

فاهد بصراخ: نمــــــــر تكلم قول شي الله ياخذك يا نمر كررت غلطي ليييه؟؟ نمررر وش سووويييت!!!...

حمدان نفض نفسه من عيال جراح الي ماسكينه وانقض على نمر ورماه على ظهره بقوه وشد على عنقه وهو يخنقه وصرخ: والله ما اخليييك والله لموتك بيديني..

حمد انتفض بسرعه ومسك حمدان وهو يبعده عن نمر وجواد فزع وهو يمسك حمدان بقوه وصرخ حمدان: فكووونييي والله لموته فكوووني...

التفت حمدان بقوه لهادي وقال: الحين دامك عرفت كل شي خلينا نلعب على المكشوف والله لقلب لكم حياتكم جحيم والله لندمكم ولذوقكم مر كل ليلة عشتها انا واهلي في ضيم والله ان تعيش موجوع انت واخوانك مثل ما عشنا كلنا في جحيم..

نمر وقف مع اخونه الي سندوه وناظر حمدان ودموعه تنزل مما خلا اخوانه يحسون بالخيبه منه يوم شافوا دموعه صدق لهم كل كلام حمدان وانفعاله وصرخ حمدان: والله ان ينقص راسك والله ان ينقص راسك امام الملأ والله ان ما يروح دم ابوي وامي واهلي كلهم هدر...

فاهد تقدم من نمر ووقف امامه ورفع يده وبلحظه طيح نمر على الأرض من اللكمه الي سددها له و عسّاف
مسك فاهد وكتف يديه وقال: اذكر الله يا فاهد..

فاهد بعصبيه وهو يحس ان قلبه ينحرق: ليــــــــــــه يا نمر ليــــــــــــه!!!! ليــــــــــــه طحت مثلي ليــــــــــــه يا نمر ليــــــــــــه؟؟؟!

نمر رفع راسه ومسح الدم الي يطلع من فمه وحمدان صرخ بحرقة قلب ودموعه بدت تنزل بضعف: فكوني والله العظيم لذبحه فكوني هو الي ذبح اهلي هو الي دمرني هو الي دمر حياتي كلها هو الي عيشنييي بعذاببب فكوني...

هادي كان يرتجف بصدمه وهو يناظر فاهد الي يلكم نمر ويصرخ عليه و عسّاف واخوانه يحاولون يبعدونهم لكن فاهد كان اقوى ويضربه بكل قوته: انا الي بذبحك انا قبل يقصون راسك انا الي بذبحك يا نمر!!..

طلعوا كل الرجال من المجلس يوم اشتد الكلام والصراخ ووقفوا بصدمه وهم يشوفون عيال جراح في حرب ما بينهم...

حمدان يضرب الي ماسكينه و يحاول يفك نفسه منهم وفاهد ما سكينه اخوانه يبعدونه عن نمر الي طايح على الأرض بدون حركه ولا ردة فعل..

الكل منفعل ومعصب ويصرخ على الثاني مو منتبهين لعمهم الي طايح على كرسيه بدون حركه..

صرخ واحد من رجال الديره: الشيــــــــخ عجلاااان..

التفتوا كل الموجودين للشايب الي طايح على كرسيه وصرخ حمدان: جـــــــــــــدي..

ركض جواد بسرعه لعمه وحمدان حرر نفسه منهم وركض لجده وصرخ جواد وهو يتحسس النبض: الأسعاف بسرعه خلونا نسعفه..

حمدان بأنهيار: يا جد افتح عيونك جدي تكفى افتح عيونك..

جواد بعصبيه دف حمدان عنه وقال: ابعد كله من ورا راسك ابعد..

هادي تقدم بعصبيه وقال: اسعفوه لا تتركونه يموت..

هجم حمدان على هادي يضربه وهو يصرخ: جدييي ما بيموت يا كلب هذا الي انتو تبووونه هذا الي انتو تبووونه تذبحون جدييي...

هادي لكم حمدان على وجهه وصرخ: انت الي بتذبح عمي..

حمد تقدم منهم وهو. يصرخ: مافيكم رجال عليكم اللعنه يا كلاب ابعد انت ويااه ابعد..

التفت حمدان بقوه لعمه وماشافه على الكرسي صرخ: ويـــــــن جـــــــــدي؟؟؟؟

حمد بعصبيه: بننتظركم لين تخلصون هواشكم؟؟ اسعفه جواد..

حمدان بصراخ وانفعال: من سمح لكم تاخذون جدي ليييه تاخذونه ليييه؟؟؟!

حمد كشر في وجه حمدان وراح لسيارته بيلحق يشوف عمه ولحقوه اخوانه متوجهين لسياراتهم والرجال تفرقوا وهم يتكلمون عن الي صار..

اما حمدان التفت بقوه لنمر ورفع يده بتهديد وقال: والله والله لا تاخذ جزاك..

نمر طلع من البيت لاحق اخوانه وبقى حمدان واقف لحاله في الحوش وهو يحس انه بينجن وركض بعصبيه للبيت وصرخ بكل صوته: ياااجـــــــده يا فَـــــــي...

دخل للصاله والحريم صرخوا وهم يتغطون وهو يصرخ: يا جــــــــــــده يا فَــــــــي!.

الجده بصدمه: حمدان!

فَي جت تركض وناظرته بصدمه وقال حمدان: البسوا عباتكم بسرعه مالكم قعده في هالبيت البسوووو..

فَي راحت بدون كلام للغرفه تاخذ عباتها وتاخذ شنطتها والفلوس وتنزل للصاله..

الجده بفرحه: تذكرتنا يمه تذكرتنا؟!
حمدان بعصبيه: البسي يا جده مب وقت البسي اغراضك بنطلع..

الجده ناظرت الحريم الي تغطوا وهزت راسها بالموافقه وهي ما تدري وش صاير وراحت لغرفتها ونزلت فَي من الدرج وفي يدها شنطتها وتوجهت لحمدان ووقفت عنده وفهده تناظرها بكره ونزلت الجده وما انتبهت على القرب الي بين حمدان و فَي وقالت: وجدك يمه وش بيقول؟

حمدان بحده: جدي مب هنا سبقنا تعالي..

طلع حمدان من البيت و فَي لحقته تركض والجده ناظرت الحريم وقالت : استودعناكم الله كثر الله خيركم..

فهده ببرود: في امان الله..

الجده ناظرت العنود وملاك وقالت: استودعتكم الله..

وقفت العنود وتقدمت منها تقبّل راسها: استودعناكم الله لا تطولون علينا..

ملاك تقدمت وسلمت عليها وقالت: حياكم الله في أي وقت البيت بيتكم..

الجده : الله يحفظكم استودعتكم الله..

ودعتهم الجده وطلعت من البيت للحوش وشافت حمدان واقف بعصبيه: وششش قاعده تسوين عندهم؟؟؟

الجده بصدمه: بسم الله وش فيك اودع الناس وش بنتركهم بدون سلام ولا كلام؟ جدك وينه الحين؟

حمدان بعصبيه طلع من الحوش و فَي التفتت لجدتها وقالت: خلينا نلحقه مدري وش صاير..

الجده اومئت وطلعت تلحق حمدان و فَي تسندها..

اما حمدان كان معصب لان ما عنده حتى سياره!..
بس بيشوف له احد ياخذه من هنا..

طلعوا كلهم لبرا وتوقفت رجول حمدان وهو يشوف هادي واقف عند السياره وقال بضيق: تعال انا اوصلك..

حمدان بعصبيه: انقلع لا اشوف وجهك..
الجده بعتاب: حمدان!!
هادي بحده: مب وقت كلامك الحين تعال اوصلكم لعمي...

حمدان تقدم منه بعصبيه ورفع يده وشهقت فَي والجده بصدمه وتوقفت يد حمدان في الهواء وهادي ناظرها ببرود وقال: ما عندك غيري يوصلك..

حمدان نزل يده وشد عليها بقوه وتوجه للباب الأمامي وفتحه ودخل وصفقه بقوه..

وصرخ هادي بعصبيه: وجعع يوجعك..

فَي بخوف: جده تعالي..

تقدمت الجده ومعها فَي ودخلوا للسياره ودخل هادي وتأكد انهم كلهم دخلوا وحرك السياره طالع من الديره وهو ما يناظر حمدان وحمدان ما يناظره...

حمدان بحده: اسرع..

هادي قلب عيونه وما رد.

حمدان التفت له بقوه وقال: يا بتحرك مثل البشر ولا وخر انا بسوق...

هادي مارد وهو يكمل طريقه ورفع حمدان يده وقالت الجده بعصبيه: حمدان انت ما عدت تحشم احد؟؟ وش قاعد تسوي؟؟؟

هادي بسخرية: والله يا عمه حمدان هذا ما عنده غير يده يبي لها كسر..

حمدان بحده: تخسى وتعقب..

هادي ابتسم بسخرية وطلع جواله من جيبه ودق على رقم جواد وانتظر شوي وجاه صوته: جواد انتو في اي مستشفى؟

جواد: مستشفى الـ***..

فَي اتسعت عيونها وناظرت جدتها: مستشفى!!..

الجده بخوف: وش فيه جدك يا حمدان وش صاررر ليه جدك في المستشفى؟
حمدان ما رد وقال هادي يطمنهم: لا تخافون بسيطه ان شاء الله..

حمدان صد بوجهه بعصبيه وهادي هز راسه وهو يناظر الطريق..

في المستشفى..

كانوا كل عيال جراح واقفين ينتظرون عند غرفة الطوارئ وجواد يمتر الممر بتوتر وخوف و فاهد يناظر نمر بعيون تتطاير منها الشرار ونمر منحني الراس وساكت..

و عسّاف يهز راسه بأسف على حالهم..

والكل يـــدعي لعمهم انه يقـــوم بالسلامة..

فاهد بوجع: ليييه يا نمر علمني ليييه!!!..

مارد نمر عليهم وهو ينزل راسه اكثر...

.
.
.
.

وصلت سياره هادي عند باب المستشفى ونزل منها هو وحمدان وفَي والجده ودخلوا كلهم بإســتعجال متوجهين الى داخل المستشفى وراح هادي للإستقبال وسئلهم عن عمه وقالوا له وينه ودخل هو وحمدان والجده تبكي و فَي تسندها وتبكي معها بخوف على جدها..

ركض حمدان بخوف للطوارئ لكن رجوله توقفت وهو يشوف نمر واقف أمامه اتسعت عيونه وهجم عليه وصرخ: وششش تسوووي هنا تبيييي تذبحننييي انت تبييي تجلطنيي؟؟؟!!!

هادي بعصبيه مسك حمدان وكتفه وقال: خلاص خلاص خلاص فكنا من المشاكل عمي في بين الحياة والموت وانت في مشاكلك يكفيييي يا حمدان يكفييي!!!...

حمدان بأنهيار: لا ما يكفييي ما يكفييي هذا الي قتل اهلي هذا الي ذبحهممم...

الجده شهقت بصدمه واختل توازنها ومسكته فَي وصرخت: يا جــــــــــــــده..

التفت يوسف بسرعه وركض لهم وحمدان اتسعت عيونه وهو يشوف يوسف يوقف بجنب فَي ويمسك جدته نفض هادي عنه بقوه وركض لهم وضرب يوسف بقوه وطاح يوسف على الأرض وركض هادي بعصبيه وسدد لحمدان لكمه مماثله وصرخ: يكفييي تراك زودت فيها يكفييي!!..

فاهد تقدم منهم ومسك حمدان من أذنه وهادي من أذنه الثانيه وقال من بين اسنانه: اقسم بمن أحل القسم ان ما احترمت انت وياه الأشناب الي في وجوهكم ان افرشكم بأرض المستشفى انت وياه..

حمدان نفض نفسه من فاهد وهادي ابتعد عن فاهد وهو يناظر حمدان بحده والجده قالت ببكاء: من الي ذبح عيالي منهو؟؟

حمدان بوجع: نمر بن جراح يا جده..

فاهد غمض عيونه بقوه وهو يشد على يده والجده جلست على الأرض تبكي وناظرت نمر وقالت بوجع: لييه توجع قلبي يا نمر ليه تذبح عيالي ليييه؟

نزلت دموع نمر اكثر وهو يناظر الأرض وزاد بكاء الجده وقالت: ليييه تذبحهم ليه تذبح عيالي ليييه تذبحهم ليه تذبح عيالي يا نمر ليه توجعني حسبي الله ونعم الوكيل فيك حسبي الله ونعم الوكيل فيك الله يحرق قلبك في عيالك مثل ما احرقت قلبي على عيالي الله يحرق قلبك...

طاحت فَي تبكي بجنب جدتها وحمدان يناظر نمر بحده..

الجده بحرقة قلب: ليه يا نمر ليه؟

نمر صرخ بأنهيار: خلاص يكفيييي يكفيييي مب انا الي قاتلهم مببب انااا...

حمدان بعصبيه: كــــــــــــذااااب انت الي قاتلهم انا شفتك بعيوني عندهم سمعتك بأذني تتكلم عندهم قبل يوصل الأسعاف انا شفتتتتك..

نمر طاح على الأرض وهو منهار وقال بصوت ثقيل: مب انا الي قاتلهم مببب انااا...

فاهد ناظر نمر وقال: علمنا وش الي صار وانت يا حمدان علمنا وش شفت وش سمعت؟؟؟!..

حمدان طاحت دموعه وهو يأشر على نمر: كان واقف عند جثثهم المتفحمه كان واقف...
نمر رفع راسه وقال بأنهيار: كنت موجوع مثلك موجوع قلبي على حبيبة عمري وهوى قلبي موجوع قلبي على عيال عمي موجوع قلبي على الخسارة الي صارت بسبب قلبي...

حمدان بوجع صرخ: كـــــــذااب كــــــــــــذااااب..
هادي توجه لحمدان وهو يمسكه: حمدان اسمع منه تكفى !..

حمدان ناظر هادي ونزلت دموعه: كذاب هو كذاب انا شايفه قدام عيني..

نمر وقف وقال: شفتني وانا اذبحهم؟ لا!.. وش شفت لجل تقول اني الي ذبحتهم؟؟؟

حمدان بصراخ: كنت واقف عندهم هذا اكبر دليل انك تعرف انهم بيموتون هذا اكبر دليل ان الحادث كان مدبر منك..

نمر سند راسه على الجدار وضرب راسه بحسره ودموعه تنزل: مب انا الي ذابحهم مب انا والله العظيم مب اناا..

حمدان نزلت دموعه أكثر وقال بوجع: يكفي كذب يكفي والله العظيم ما عدت اتحمل اكثر من كذا خلاص يكفي كذب..

هادي كان حاس بالوجع اللي في قلب حمدان وهو يشوفه منهار و كان موجوع على اخوه نمر اللي يحلف انه ما قتلهم...
شد على حمدان و هو يمنعه من الأنفعال وقال: خلنا نسمع منه يا حمدان خلينا نسمع منه تكفى وانا اوعدك اقسم بالله العظيم ان كان لنمر يد في ذبحهم لا اوقف معك ولا اخذه و يدي في يدك لساحة القصاص لكن خلينا نسمع منه يا حمدان خلينا نسمع منه تكفى..

فاهد بعصبيه: تكلم يا نمر تكلم وش عندك؟ وش اللي صار؟

نمر ناظرهم ودموعه حاجبه عنه الرؤيه وقال: من يوم ما ابوي طلّع عمي من الديرة وانا مخلي ناس تتّبعه وتجيب لي اخباره أول بأول، كنت احس بالندم كنت حاس بالندم حيل اني السبب في طلوعهم من الديره ومرت سنين كثيره وانا من يوم ما طلعوا من الديره وانا اراقبهم واخبارهم كلها توصلني كانت حياتهم مستقره وان نقص عليهم شي خليت ناس تاخذ لهم فلوس بدون ما يدرون انها مني كنت ادري أنهم ساكنين في الرياض وما عليهم شر، وكان قلبي مرتاح لأن البنت اللي هويتها ما تزوجت لمدة سنين وهي في بيت ابوها!..

لين جاني خبر في يوم من الأيام زلزلني و دمرني لأن قلبي للحين مهتويها قلبي الى ذاك الوقت وانا ابيها وعندي امل انه بيجي يوم واخذها!.

جاني الرجال اللي موكله يراقبهم وقال لي ان زواجها قرب وانها بتاخذ رجال مقدور الحال وزواجها في هذيك الايام..

انا أنوجع قلبي حيل تدمرت نفسيتي وحياتي كلها وبدون شعور مني رحت لأبوي رحت اترجاه واطلبه انه يرجع عمي عجلان للديره ويطلبها من جديد واخذها انا ما ياخذها غيري طلبته وترجيته قلت له يا يبه تكفى عمي يرجع للديره تكفى ما ابي أحد ياخذها غيري تكفى يبه خلي عمي يرجع للديره واخذها انا ويتهنى قلبي فيها! ..

لكن ابوي عصب مني وحلف يمين ما ياخذها احد غيري وما يرجع عمي للديره لانه لو رجعه بيعتبر انه انهزم هو امامه، انا ترجيت ابوي ترجيته حيل وقلت له تكفى عمي عجلان يرجع وشاف ابوي حزني وضيقي ويا ليتني ما علمته عن حزني ولا عن ضيقي ويا ليتني ما فتحت لك قلبي ولا شكيت له همي طردني من عنده وقال البنت ما ترجع لا هي ولا ابوها للديره وما بياخذها غيرك ان ما كانت لك جعل يحرم عليها عيال ادم كلهم ما بتكون لأ حد غيرك انا ما كنت ادري وش ابوي يقصد في ذيك الفتره ولا ادري وش يخطط له؟

لين اليوم الثاني جاني وهو مبتسم وعلمني وقال ابشرك البنت ما حد ياخذها غيرك انا ارسلت ألي يذبحها ويذبح اخوانها كلهم ويوجع قلب عجلان اللي اوجع قلبك ورفض انه يزوجك بنته!!.

غمض حمدان عيونه بوجع وشد عليه هادي وهو يسنده
وأكمل نمر كلامه: ما استوعبت كلامه ولا صدقته لكنه علمني ان الرجال اللي كان يراقبها ويعلمني علم ابوي عن مكانهم وعن كل شي يخصهم وقال لي أنه خطط لقتلهم بكل أحرافية!

خلا رجال يدق عليهم ويقول لهم ان في افتتاح سوق كبير اللي يبي يتسوق وفيه تخفيضات كبيره و لانهم على نياتهم واجواد كانوا يحسبون انه صحيح..

ابوي كان يدري انه وقت زواج بنت عمي يعني اكيد يحتاجون اغراض ويحتاجون اشياء ثانيه هم صدقوا الموضوع وطلعوا كلهم السياره اللي كان ابوي مرسل شخص يخربها...

حمدان عض شفته وهو يرفع راسه يمنع دموعه وقال نمر بصوت موجوع: يوم دريت باللي صار اخذت موتري وطلعت من الديره تحت صراخ ابوي وعصبيته علي وانا رايح بشوفهم بحاول اني انقذهم بشوفهم!!
ولان ما كان عندنا جولات ما قدرت ادق عليهم واحذرهم انقطعت الحلول عني!..

رفع نمر نظره وناظر جواد وقال: كان هذا الشي قبل ما يجينا جواد قبل ما يوصل، انا وصلت للرياض وتوجهت للمكان اللي انا ادري انهم هناك وعلى طريقي شفت الحادث ويا ليتني ما شفته شفتهم هناك ونزلت من موتري ورحت لهم طحت عندهم وانا منهار مصدوم من اللي صار كنت ابكي واقول انا اللي ذبحتكم انا اللي ذبحتكم كنت وقتها اقصد انه انا اللي ذبحتهم بسبب اعترافي لأبوي بمشاعري كان قلبي موجوع على عيال عمي وعلى البنت اللي هويتها وحبيتها وراحت ضحيه وهي مالها اي ذنب أنوجع قلبي عليهم ما كنت ادري أن فيه واحد واقف ويسمعني واللي هو انت يا حمدان ما كنت ادري والله العظيم!!.
ما كنت ادري واللي خلقك وسواك ما كنت أدري!!.

ما كنت أدري ان ابوي بيسوي فيهم كذا انا رحت اترجاه يرجعهم للديره اترجاه يرجع عمي للديره هو واهله ما كنت ادري انه بيسبب قتلهم وذبحهم اقسم بجلال الله ما كنت ادري انه بيذبحهم!!!..

أنهار نمر اكثر وهو يبكي بحرقه قلب وكأن اللي صار كان البارح ما كأنه من سنين!.

توجه فاهد لأخوه وجلس عنده وهو يدري باحساسه ويدري بشعوره الحين يدري بالوجع اللي يحس فيه والندم الكبير لانه قد عاش نفس الندم قد عاش نفس الندم اللي يعيشه نمر الحين...

حمدان ضحك من بين دموعه وقال: مطلوب مني الحين اصدقك؟ مطلوب مني الحين اصدقك يعني؟!!!

هادي شد هلى حمدان وهمس: أهدأ وانا اخوك أهدأ..

حمدان بعصبيه: مانيييي اخوكم فكونييي ماني اخوكم!!!

هادي شد عليه اكثر وقال: انا اخوك انا يا حمدان انا معك بالي تبي اهدأ تكفى انا حاس فيك ورب البيت حاس فيك!..

تناسى هادي كل شي سببه له حمدان يوم حس بوجعه وحس بالمعاناه الي عاشها حمدان..

وقال نمر بحزن: جعلني فداك يا حمدان اسمع مني والله العظيم مالي ذنب انا ما ذبحتهم ما كنت ادري ان ابوي بيتصرف كذا والله ما كنت ادري...

حمدان بصراخ: وش يثبببت لي كلامك وش يثبت لي؟؟؟

نمر ناظره بحزن: بعد الي صار انا رجعت للديرة وانا لا ليلي ليل ولا نهاري نهار حتى ابوي مقدر اناظره ولا اكلمه وفي يوم من الأيام طلعت من الديرة و رحت للي ذبحوهم رحت لهم واحد واحد وذبحتهم!..

فاهد اتسعت عيونه بصدمه وناظر اخوه
نمر ضرب صدره بوجع: قسى قلبي يوم شفت الغالين على قلبي ينذبحون انوجع قلبي وقسى!..

فاهد بصدمه: ذبحتهم؟

اومئ نمر وقال: اخذت بثارهم..

حمدان غمض عيونه وهو يبكي بوجع من الي يسمعه وهادي واقف معه ويهديه والكل متأثر و فَي والجده منهارين ويبكون..

اكمل نمر كلامه وقال: كان باقي واحد منهم باقي واحد ما ذبحته بحثت عنه ايام كثيره لين أخيراً لقيته ورحت له كان عايش في خرابه، خرابه في طريق مقطوع وصلت وانصدمت يوم شفت اثنين يركضون اثنين عيال واحد بعمر 15 16 كذا وواحد اكبر منه شوي راحوا الموتر وانحاشو من هذا المكان للطريق..

انا عرفت على طول انه الوكاد انهم مخطوفين ولا شي صاير معهم ما اهتميت كثير ورحت لهم شفته هو ورجاله يحاولون انهم يلحقون العيال اطلقت الرصاص على رجاله واخذته ودخلته الخرابه وبديت اضربه واعذبه واطلع كل الضيم والقهر اللي في قلبي عليه وانا اتذكر جثثهم المتفحمه أخيراً شفته أخيراً شفته بعد ايام طويله وكثيره أخيراً لقيته بعد ما انكويت وانحرقت وذبل نصفي وانا ابحث عنه...

طلعت الفرد ابي اقتله وارتاح منه ابي اقتله واتخلص وأخلص الناس من شره لكنه صرخ، صرخ علي وهو يترجاني ما اذبحه وقال لي انا اعرف عن اخوك جواد كل شي لو تبي تدري عن اخوك جواد لا تذبحني...

احنا وقتها ما كنا ندري عن جواد اي معلومه ولا كان بيننا تواصل معه ولا ندري عنه باي شي ثمان سنوات واحنا ما نعرف عنه شي ولا بيننا اي تواصل!!..

قال لا تذبحني وانا بعلمك عن اخوك انا وقتها وافقت لاني ابي اعرف عن اخوي اي شي بس مستحيل اني اتركه عايش فجيته بالخديعه ونفذت شروطه وطلعته من الخرابه وتركته في حال سبيله وهو علمني وقال لي اخوك جواد بعد ايام بيوصل من لندن دراسته خلصت وهو بيرجع وقتها احنا عرفنا أن جواد راجع من لندن قلت له كانك صادق اثبت لي هو على طول طلع جواله ارسل لجواد وقال اهلك يستقبلونك وبتكون الديره منتظرتك بكل فرحه وسعاده لا تتاخر عليهم!...

عقد جواد حواجبه و ناظرهم بصدمه وقال: ايه في احد ارسل لي رساله وقتها وانا يوم وصلنا للسعوديه علمت صقر وقلت له بنوصل للديره وبتشوف الديره كلها مضويه وينتظروني لانها جتني رساله وعلموني ان أهلي منتظريني...

نمر ناظر حمدان وقال: عرفت ان اخوي راجع وبعد ما عرفت طلعت الفرد وذبحته ذبحته ولا أهتميت فيه تركته في ذيك الصحراء ومشيت عنه ورجعت الديره علمتهم وقلت لهم اخوي جواد راجع من لندن وبدينا نتجهز ونستقبله وانا احاول اني انسى واتناسى اللي صار لكن قلبي موجوع ومحروق عليهم..

حمدان كان ساكت وكلام نمر يتردد في باله وبالذات يوم قال اثنين عيال كانوا هاربين من الرجال اللي في الخرابه!!

ذول العيال هو وباسل.!
يعني كلام نمر صحيح!
ولا شلون بيعرف كل هذي الاشياء...

حس حمدان ان رجوله ما عادت تشيله واستند على هادي الي قال بحنيه: استند علي وانا اخوك استند علي..

حمدان غمض عيونه وهو منهار من الحقائق الي انكشفت امامه وشلون كان عايش كل هالسنين في وجع والم وثار وهمي؟..

نمر قال بوجع يوم شاف انهيار حمدان: ابوي بعد اخذ جزاه يا حمدان ابوي انقص وراح لربه كل انسان اخذ جزاه..

حمدان مارد وهو ساكت واخذه هادي لأحد الكراسي وجلس عنده وهو يربت على كتفه وتقدموا عيال جراح من حمدان وهم يربتون عليه ويساندونه و تقدم فاهد وجلس عند حمدان ومسك راسه وتقدم منه وقبّل راسه وقال: اعذرنا يا خوك اعذرنا تركناك في اشد الحاجه لنا تركناك طفل تتخبط لحالك حتى بعد موت ابوي سامحنا تكفى...

نزل حمدان راسه وما رد عليهم والدمع في عيونه متجمع..

والجده تبكي بوجع قلب و فَي عندها...

طلع الدكتور وناظرهم كلهم وبلع جواد ريقه وقال: دكتور بشر كيف عمي الحين؟؟

وقف حمدان بسرعه وهو يرتجف: دكتور جدي بخير؟

وقفوا كل عيال جراح وهم يناظرون الدكتور الي ساكت وما يدري وش يقول لهم..

حمدان بأنهيار: دكتوررر تكفى تكلم..

الدكتور نزل راسه وقال بحزن: عظم الله أجركم....

حمدان بصراخ: دكتووور وش فيييه جدييي تكفى قول انه بخييير تكفى..

نمر نزلت دموعه أكثر وجلس على الارض وجواد غمض عيونه بحزن والجده انهارت تبكي واعتلى صوت بكاها هي و فَي وصراخ حمدان عليهم و هادي ماسكه بقوه ويحتضنه ونزلت دموع هادي وهو يسمع بكاء حمدان على كتفه ويحس برجفته وانهياره التموا كل عيال جراح حول حمدان وهم يساندونه والحزن مقطع قلوبهم جميع على عمهم الي ما تهنوا فيه ولا قعدوا معه...

وفاهد يحس ظهره انكسر بخسارته لعمه وصار العزاء عزايين موت مهره وموت الجد عجلان...

كان حمدان منهار وهو يحس انه السببب في موت جده مات جده وهو مقهور منه مات جده وهو موجوع من عيال اخوه..

وقف حمدان وهو يركض للغرفه الي جده فيها دخل له وراح لجسده الي على الفراش الأبيض ووجهه مغطى راح له وجلس بجنبه وهو يبكي ومد يده الي ترتجف ووخر اللحاف الأبيض عن وجه جده وانهار يبكي اكثر وهو يحتضنه: ساامحنييي ياجد سامحني رحت يا جد ما قد عيشتك الحياة الي انت تبيها سامحني يا جد رحت ما قدر رضيت عني سامحني يا جد ما علمتك بيتك الي بنيته ولا دخلت له حتى تكفى سامحني يا جد تكفى..

دخل فاهد وسحب حمدان من ذراعه ووقفه وسحبه له وضمه بقوه وقال: كلنا مخطين يا حمدان كلنا مخطين..عظم الله اجرنا فيه عظم الله اجرنا...

دخلت الجده وجنبها فَي اللي منهاره مثلها وتبكي وتوجهت الجده الى جسد عجلان المرمي على السرير وجلست عنده وهي تمسك يده وتقبّلها: اااه يا عجلان اااه يا سند ظهري رحت من هالدنيا اااه يا وجع قلبي عليك يا بعد عمري اااه يا حزن قلبي عليك..

جلست فَي بجنب جدتها واحتضنت جدها وهي تبكي: كله بسببي يا جدي كله بسببي الله يا خذني وياخذ لساني كله بسببي..

طلعوا الرجال من الغرفه وهم يتلثمون بشماغاتهم وبقى حمدان عند جدته وجده و فَي واحتضن جدته وهو يهديها ويبكي معها..

يُتبع