رواية انتي ربيع العمر في كل الفصول! الفصل الثامن والعشرون 28 - بقلم rned 🖤

....

اليوم التالي..

كان حمدان واقف مع الرجال يصلون على جده قبل ما ياخذونه للمقبره يدفنونه..

كان حمدان هادئ و ساكت والحزن مرسوم على معالم وجهه والكل عارف بمصيبته وبحزنه..

فكان فاهد هو اللي قايم بالعزاء كله ومتكفل بكل شي وبما انه كبيرهم الكل يمشي على شوره..

حمدان كان لا زال تحت تأثير الصدمه أن جده مات لكن فاهد واخوانه ما قصروا معه أبداً أحتووه وكانه واحد من اخوانهم بالذات هادي اللي تناسى كل شي صار ما بينهم البين..
ووقف مع حمدان وقفت أخ لأخوه وما تركه ولا لحظه حتى وقت النوم كانوا ينامون كلهم في المجلس لجل ما يتركوا له المجال للتفكير او للحسره او انه يلوم نفسه وتمت الصلاه على جد حمدان واخذوه كلهم للمقبره...

ونزل حمدان للقبر وهو ياخذ جده ويدخله والدمع على خده مو مستوعب انه يدفن جده بيده والحسره ماكله قلبه والحزن محتله بعد ما ترك جده في القبر..

تقدم فاهد وشدّه من يديه وطلعه من القبر وهو يحتضنه ويواسيه..

سند حمدان راسه على كتف فاهد وهو يحس انه منهار وان كل صموده وشموخه طول السنين راح اليوم كل قوته تبخرت وانتهت ، حيله منهد ويحس انه ضاع وتشتت في ذي الحياة، ندمان انه ما عيشهم الحياة الهنية وانتظر لين يكمل انتقامه الوهمي! يا ليته عيشهم وريحهم وترك كل شي خلف ظهره لكن لافات الفوت ما ينفع الصوت..

هادي تقدم من فاهد الي أشر له يجيه وقال: خذ حمدان يرتاح في اي مكان واحنا بنستقبل الرجال..

هادي اخذ حمدان من ذراعه وهمس: تعال وانا اخوك تعال..

تنهد حمدان وهو يمشي مع هادي وهو منهد حيلة وتعبان..

وهادي شاد عليه ويصبره: الله يرحمه كلنا لها وانا اخوك..
ما رد عليه حمدان وهو منزّل راسه ويمشي بهدوء بجنب هادي ..

تنهد هادي واخذه للبيت ودخلوا للحوش الخلفي البعيد عن الناس والضجيج وجلس حمدان على وحده من الصخرات الصغيره وجلس بجنبه هادي وهو ساكت وحمدان يناظر الحوش وهو سرحان بتفكيرة.

هادي ناظر حمدان وقال بهدوء: قبل سبع سنوات كنت الولد الي متعلق بأبوه برغم انه ما كان لنا أب برغم انه ما كان لنا سند ولا ظهر وكل همه المشيخه وكل تصرفاته معنا قاسيه يبينا نكون مثله، ما قدرنا نكون قاسين ولا قست قلوبنا وبرغم هذا كله ما كنت متخيل اني ممكن اخسر ابوي او يصيبه شي مدري ليه بس كنا راسمينه في بالنا انه الظل الي نحتمي تحته وأن حياتنا من غيره بتكون سراب وان الناس لو خسرناه بتقلب ضدنا وبنرجع أذلا بعد ما كنا اعزاء بين الناس، ابوي ترك بيننا وبين الناس مسافات وبعد كبير ما قدرنا نتغير ولا نتعود عليهم خفت لا يصيبه شي ونضيع من خلفه..

حمدان رفع نظره وناظر هادي شوي وقال هادي بحزن: بس اكتشفت اني مخطي وان موت ابوي هذا حق وان الناس ما بتعيش ولا بتبدأ حياتنا الا بموته لأنه سبب موت الناس وظلمهم..

خذوه للقصاص قدامنا كلنا وراح ابوي من الدنيا وانا وقتها حسيت اني ضايع ضايع يا حمدان ، حسيت بشعورك حسيت بالوحده والندم قلت ياليتنا وقفنا في وجهه وواجهناه يا ليتنا اعترضنا طريقه الباطل واخذناه للحق لكن ما صار من هذا شي ومات ابوي بكل ذنوبه ومعاصيه..

والى الحين في قلبي حسرة يا حمدان لو اني جربت يوم واحد اوقف في وجهه واقول انت غلط اقول يبه انت على باطل لكن اتذكر ان اخوي جواد وقف في وجهه اكثر من مره اخوي جواد هو الوحيد الي وقف في وجه ابوي والوحيد الي حاول في ابوي والوحيد الي مرتاح الحين لأنه جرب وحاول وما ترك وسيلة الا وأتخذها مع ابوي لكن أبوي أصر على الظلم والباطل لين مات في أعماله ، انا اعلمك الحين يا حمدان لجل تعرف أن ندم عن ندم يفرق انت على الأقل مرتاح ان جدك راح لربي وسجله نظيف انه مظلوم ومو ظالم مرتاح من دماء الناس ومن مظلوميتهم على عاتقه...
انا ما اقول انك مو مخطي انت مخطي لكن انت ما تعلم الغيب انت ما تدري بالي بيصير كلنا مخطين لكن خطأ من خطأ يفرق انا اعلمك عن ابوي لجل تحمد الله ان جدك لجنات النعيم ان شاء الله حمدان جدك مظلوم ومو ظالم وهذا اكثر شي يخليك ترتاح وتحمد الله...

حمدان نطق بحزن: ضيعت عمري على انتقام وهمي لو اني اخذت جدي وجدتي وزوجتي لو اني اخذت الفلوس حتى لو ان الشركه ما صارت لي كلها يا ليتني سويت اشياء كثيره..

انتبه هادي ان حمدان بدأ بفضفض له وقال: تدري ان الوقت ما انتهى وان باقي امامك وقت كثير ربي اخذ منك شي وترك لك شي، عمي كبير في العمر وتعيّب ومريض و ربي ما ياخذ شي الا لحكمة منه، شف الحمدلله ما ضاع باقي عمرك كله على انتقام وهمي اكتشفت الحقيقه ووضح لك كل شي الحين شوف حياتك انت وأهلك الحق الي باقي في العمر...

حمدان بوجع: راح جدي وهو مقهور مني راح جدي وهو يحسب اني في الحرام داخل وراح وهو مقهور على عياله..

هادي تنهد وقال بحزن مماثل: ادري ادري والله العظيم وحاس فيك ومقهور مثلك وقلبي يوجعني عليه لكن الحمدلله على كل حال وتلقى مصيبته هذي تكون شفيعة له يوم القيامة وتدفع عنه عذاب..

حمدان نزل راسه بحزن ومد هادي ذراعه وربت على كتفه وهمس: لا تفكر وتضيع باقي عمرك في التفكير والندم والحسره شوف جدتك واهلك وصبرهم واوقف معهم واسندهم وعوضهم عن كل الي صار اخوي فاهد بعد موت ابوي قعد في ندمه وحزنه لين شاف انه ما يفيد الندم وشافنا بدينا نتشتت ونتفرق وقف على روسنا كلنا ولم شملنا والي شاف انه يبي يستقر بعيد عن البيت وقف معه وسانده وعطاه حقه ووزع كل الاموال الخاصة في الناس ورجع لكل صاحب حق حقه يا حمدان الأنسان يبي له يتخطى ويتقبل ويصبر لجل يكمل في حياته ويلم اهله، شف هذا اخوي جواد اكبر مثال زوجته هي السبب في نبش الحقائق وهي الي وصلت ابوي لساحة القصاص هي مثلت على الجميع انها مهبولة من طفولتها لين كبرت عشان تاخذ بحق اهلها الي ذبحهم ابوي ووصلت لمرادها وخذت حقها وحق اهلها ومع هذا كله ما طلقها جواد ولا تركها لأنه تقبل حقيقة انها على حق وان الحياة ما توقف وان كل انسان بياخذ حقه وجزاه وهي مالها ذنب الا انها خذت حق اهلها، وغيرة زوجة اخوي فاهد انظلمت من فاهد لكنها حست انه ندم وتقبلت فكرة انه لازم تستمر الحياة ولازم تتخلى عن الماضي بخيره وشره..
كلامي الحين لجل اقول لك لا تقعد ضايع في نفس الدائرة وتائه وعالق فيها استمر في حياتك وشوف الأحياء الي على وجه الوسيعه واسندهم وخفف وجعهم وامسح دموعهم وعوضهم وعمي الله يرحمه راح للي ارحم مننا كلنا..

حمدان تنهد بحزن وهو يدري ان كلام هادي صحيح وقال بحزن: حتى انت خسرتك ومالك ذنب كنت احسبكم مثل ابوكم كان الحقد عاميني..

هادي ابتسم وهو صحيح مقهور وحزين على الي خسره لكن كل شي يتعوض الا الأهل وحمدان من أهله قال: الله يسامحك في كل ريال انا حاس فيك وعاذرك وادري بشعورك واحساسك ما ألومك، انت من لحمنا ودمنا وفدا راسك كل ريال راح...

حمدان ناظر هادي بصمت وهو مقهور من نفسه ومن غباه الي استمر كثير بدون معرفه..

هادي بهدوء: انا اخوك وانت من لحمي ودمي وكل ريال فدا راسك، والفلوس تتعوض المهم انت تكون معنا يا حمدان احنا مب مثل ما تتخيلون احنا ملنا ذنب في اعمال ابوي له ذنبه ولنا ذنبا " ولا تزر وازرة وزر أخرى ".

حمدان اومئ براسه وهو ساكت ويتفكر في كلام هادي..

_____

وصل باسل للديرة ودخل للمجلس امام الناس كلهم وتوجه لفاهد الي يستقبلون الناس وسلم عليهم وهو واضح عليه الحزن ويبحث بعيونه عن حمدان: عظم الله اجركم واحسن الله عزاكم الله يرحمه برحمته ويسكنه فسيح جناته..

فاهد: الله يسلمك اجرنا واجركم عظيم ..

باسل سلم على الجميع وتلفت وقال: وين حمدان؟

جواد: حمدان تعبان بيرتاح شوي وبيجي..

باسل تنهد بحزن وتقدم يجلس مع الرجال وجاه ولد يصب له قهوه...
وهو حزنان وباله مع حمدان وقلقان عليه..

رفع جواد راسه على دخول الرجال الي قال بصوت جهوري: السلام عليكم يا رجال..

اتسعت عيونه واقشعر جسده وهو يشوف وجه مسفر من بعد وقت طويل مسفر تقدم من عيال الشيخ الي واقفين كلهم يستقبلون المعازين...

كانوا يناظرون بعضهم البعض بتفاجأ من وجود مسفر!.

وصل عندهم وسلم عليهم وهو يعظم لهم الأجر وهم الى الحين متفاجئين من وجودة معهم..

جواد شد على يد مسفر وقال: شحالك يا مسفر؟
مسفر ابتسم بهدوء وقال : زان حالك يا شيخ شلونك انت؟

جواد: الله يسلمك الحمدلله كلنا في خير وش اخبارك انت وش حالك وكيف ايامك..

مسفر: الحمد لله في خير..

جواد: حياك الله.

مسفر: الله يبقيك.

دخل مسفر مكانه وجلس وجاه الولد يصب له قهوه.

______

حمدان ناظر هادي ووقف وقال: انا رايح المجلس.

هادي اومئ ووقف معه وقال: معك.

هز حمدان راسه ومشى مع هادي وطلعوا للمجلس.

توجهوا الى المجلس ودخلوه الاثنين وارتفعت الانظار كلها لهم ووقف باسل بسرعه وتوجه لـ حمدان ويضمه وقال بحزن: عظم الله اجرك وانا اخوك الله يرحمه ويسكنه فسيح جناته تصبر وانا اخوك تصبر كلنا لها..

تنهد حمدان وشد عليه اكثر وهو تعبان نفسياً ومنهار.

وماله خلق يتكلم ولا يقول شي...

التفت هادي للولد الي دخل مستعجل وقال: وصلت سيارة..

حمد توجه مع اخوانه يستقبلون الي وصلوا وكان جواد ابتسم جواد بأمتنان لخوي عمره الي ما تركهم حتى في ذي المصيبه وانتبهو ان معه اهله وابتعدوا من الطريق راجعين للمجلس اما ام صقر وغيداء وأفنان ومعهم هديل دخلوا متوجهين لقسم النساء..

وقفوا عيال جراح وهم يستقبلون صقر والي معه...
صقر وهو يسلم عليهم: عظم الله اجركم..

ردوا عليه بحزن وقال صقر وهو يأشر على الرجال الي سلم عليهم: هذا زوج اختي..

هادي رفع راسه بقوه وناظره وقال: زوج اختك؟
صقر: ايه زوج اختي من الرضاعه..
حمد رفع راسه بسرعه وناظر متعب الي كان واضح عليه رجال كفو وطيب وراعي واجب وهو يعزيهم بكلام رزين...

متعب: الله يصبر قلوبكم على فرقاه.

فاهد: الله يسلمك ويطول عمرك ما قصرت بيض الله وجهك وتشرفنا فيك والله والنعم بك..

متعب بأبتسامة: لي الشرف والله اني عرفت مثلكم رجال اجواد.

فاهد: الله يطول عمرك حياكم الله..

صقر ربت على كتف جواد ودخل هو ومتعب الي سلم على الرجال وجلس وهو يسئل عن الحال و يتبادل الكلام مع الرجال الي حوله وحمد واقف وعينه عليه يناظره بهدوء...

استغفر بهمس وهو يبعد نظره عنه ويبعد هديل من باله البنت متزوجه ومعها حياتها الخاصه وبيتها الخاص وهو له بيته وحياته الخاصه وليس كل ما يتمناه المرء يدركه..

كان باسل يربت على كتف حمدان ويصبره ببعض الكلمات ويحثه على الصبر واحتساب الأجر و حمدان كان ممتن له كثير بسبب مواقفه معه الي ما تخلص..

تدارك حمدان وضعه واستجمع نفسه ووقف وتوجه لعيال جراح ووقف معهم وهو يستقبل المعازين كلهم..

___

دخلوا الحريم وسلموا عليهم وتوجهت غيداء بسرعه لـ فَي الي منهاره وتبكي وضمتها وقالت بحزن: حبيبتي بسم الله عليك عظم الله اجركم يا روحي الله يرحمه لا تبكين يا عيوني..

فَي ببكاء: مات جدي يا غيداء مات وتركنا مات..

غيداء: الله يرحمه ويغفر له ويسكنه فسيح جناته ويجعل قبره روضة من رياض الجنة، لا تقعدين تصيحين وتوجعين قلوبنا صبري نفسك واوقفي مع جدتك.

فَي ببكاء: مقدر مقدر يا غيداء مقدر..

غيداء تنهدت بحزن وجلست و فَي تبكي على كتفها وضمتها غيداء وهو تهمس لها وتصبرها..

تقدمت ام صقر وناظرت فَي بحزن وقال: عظم الله اجرك يا بنتي اذكري الله يا عيوني اذكري الله..

أفنان بحزن: الله يرحمه ويغفر له ويصبركم..

فَي كانت تبكي ومو قادره تستوعب ان الناس تعزيها في جدها و غيداء ضامه لها وتهديها وأشرت أم صقر لـغيداء تبقى مع فَي..

تقدمت هديل وقالت بحزن: عظم الله اجركم الله يرحمه ويغفر له ويسكنه الفردوس الأعلى..

تنهدت غيداء من انهيار فَي الي رافضه ترد على احد واومئت هديل وأشرت لـ غيداء تبقى مع فَي..

راحوا لأماكنهم وجلسوا كلهم وهم يسمعون بكاء الجده والحريم يعزونها..

مر الوقت و غيداء الى الحين مع فَي لين قالت غيداء بهدوء: نروح الغرفه ترتاحين شوي؟

فَي: جدتي بتزعل..

غيداء: تعالي ماحد زاعل..

فَي وقفت وطلعت مع غيداء متوجهين للدرج وراحوا للممر وقالت غيداء: وين غرفتك؟

فَي: اخر غرفه.

غيداء هزت راسها بالموافقه...
وتوجهوا للغرفه فتحت فَي الباب ودخلوا وراحت فَي للسرير...

انسدحت بهدوء وغمضت عيونها و غيداء جلست بجنبها وبدت تمسح على راسها وهي ساكته..

ومر الوقت كالمُر على القلوب..

واستمرت أيام العزاء الثلاثه وعيال فارع بجانب بعضهم كتفاً بكتف وجنباً إلى جنب ما يتركون حمدان ولا دقيقه لحاله وكذلك الحال مع فَي كانت صديقتها المقربه إليها غيداء بجانبها وما تركتها أبداً وهي بجنبها ومساندة لها..

وفي كل ليلة كانت فَي تعلم غيداء شي من الي صار معهم وصارت غيداء فاهمه كل علاقة حمدان و فَي ..

والجده كانت محتسبه الأجر عند الله في ما أصابها وتدعي لعجلان الشريك والحبيب والحنون والزوج والسند بالرحمة والمغفرة من الله ، ووقفت بجانبها أم صقر وكانت مساندة لها ومعها..

هديل ما كان لها ولزوجها حضور كبير جاءوا فقط للقيام بالواجب ورجعوا للرياض...

بعد ثلاثه ايام...

كانت جود تلعب هي وجواد في شوارع الديره مع سعود..

وبعض العمال كانون الى الحين يشتغلون الملعب اللي بيسوونه في الديره وللحين ما خلصوا.

لكن جواد كان برغم خسارتهم الكبيره في اموالهم وفي شركتهم الا انه لازال مُصِر على إكمال بناء الملعب والمنتزه الصغير للبنات..

ركضت جود لعند جواد وقالت: جواد... جواد روح لنا مويه من البيت مت عطش..

جواد ناظرها وقال: لا روحي انتي انا ما ودي اروح.
جود كشرت في وجهه وقالت: جواد روح لنا لمويه انا وياك وسعود تكفى...

بوّز جواد وناظر سعود وقال: ليه ما يروح سعود يجيب لنا مويه من بيتهم؟

جود: ما نبي من بيتهم نبي من بيتنا احنا عندنا بيت رح جيب لنا مويه واحنا بنوقف لعبه ما احنا لاعبين لين تجي..

جواد ناظرها و قال: احلفي ما تلعبون لين أجيكم..

جود: والله ما نلعب لين تجي

هز جواد راسه وقال: اليوم انا اروح اجيب مويه بكره انتي او سعود مو انا اللي اروح كل يوم.

اومئت جود وقالت: طيب طيب رح جب مويه.

راح جواد يركض متوجه للبيت يجيب لهم مويه يشربون لأن جود خايفه تروح البيت وتمنعها أمها تطلع مرة ثانية..

جلست جود بجنب سعود وقالت: ان شاء الله ما يتأخر جواد انا ميته عطش..

سعود ما سمعها وش قالت وقعد مكانه يناظر الرايح والجاي.

_______

في حوش بيت آل جراح..

كان صقر واقف هو وجواد وهادي ويتكلمون بهدوء
حول شركتهم وخسارتهم الفادحه ..

صقر: يا اخي ولد عمكم ذا غابني وش في راسه يوم انه يخسرنا كل شي؟

جواد تنهد: يا رجال كانت شاغلته قصة الأنتقام...

صقر هز راسه وقال بضيق: الحين وش السواة؟

هادي: اتركوا الموضوع علي انا انا بتصرف وبرجع الأسهم كلها ان شاء الله..

صقر: وشلون؟
هادي: الموضوع كله بيد حمدان لكن الحين الرجال مقهور على جده اتركوه لين يطيب حاله وهو بيصلح كل اخطاه الرجال كان مقهور ومغبون وما نلومه أبداً عن اللي صار اتركه لين يزين وضعه وهو بيعدل أخطاه، في النهايه الرجال كان مهووس بشي اسمه انتقام لكن الحين تغير الوضع وتعدل وفهم السالفه كلها وما فيها لذلك المسئلة يبي لها صبر، اصبر لين يتخطى الحزن اللي صار عليه وبتشوفونه يعدل كل شي..
انا شفت الندم في عيونه لانه كان معمي بشي اسمه انتقام لكن الحين تعدى الوضع انا متأكد..

صقر: خلاص اجل بنمشي وراك و ورى كلامك وبنشوف اذا عدل الوضع ولا لا ، لكن المفروض ان احنا نحط لنا احتمالات ثانيه من الممكن انه ما يقبل يرجع الأسهم او ما يقدر لذلك فكروا شلون بنتصرف..

جواد: حمدان ما خسرك ولا سهم من الاسهم الخاصه فيك المشكله كانت معي انا وهادي وخسرنا كل اسهمنا اما انت كل اموالك واسهمك موجوده مثل ما هي..

هز صقر راسه بالموافقه وقال: اسهمي اسهمكم والخساره اللي عليكم علي بعد ، انا من يوم دخلت معكم في الشراكه كنت حاط في بالي ان اي خساره علينا كلنا واي نجاح هو لنا كلنا، ما نترك الخيط كله والتعب على شخص واحد كلنا نتحمل النتائج سواءً كانت إيجابيه او سلبيه..

جواد: الله يبيض وجهك رجال ما تقصر..

صقر: الله يسلمك..

هادي قال: ومثل ما قلت لكم الموضوع كله بيد حمدان الرجال الحين زعلان على جده لكن بيرجع لقوته وإرادته وبيحل الموضوع وصدقوني ما هو تارك شي وراه..

جواد: قد بنترك الموضوع عليه وبنشوف وش بيسوي..

هادي: بسوي كل خير..

دخل جواد الصغير من باب الحوش وانتبه عليه جواد وقال وهو يأشر له: تعال تعال..

رفع جواد الصغير راسه: ناديتني يا عمو؟.

جواد: وينها جود؟

جواد الصغير: برا تلعب هي وسعود..

عقد جواد حواجبه وقال: افا ليه تترك بنت عمك لحالها؟.

جواد الصغير: ما تركتها لحالها سعود معها..

ضحك هادي وقال: حتى لسعود لا تتركها..

جواد صغير: جود ما تركتني اقعد العب معها وتقول عطشانه تبي مويه وانا رحت اجيب لها مويه تشرب..

ابتسم جواد وقال: والله انك رجال بس انتبه على بنت عمك لا تتركها لأحد يضربها ولا احد يقول لها شي..

هز جواد الصغير راسه وقال: الحين بروح اجيب مويه وبرجع لها ماني تاركها..

هادي: كفو وانا عمك لا تترك بنت عمك لحالها في الشارع خليك معها..

هز جواد الصغير راسه بالموافقه وركض متوجه للبيت يجيب مويه لجل يروح لجود اللي تنتظره في الشارع..

ضحك جواد وهز راسه بيئس: شوف اللعوبه مخليه ولد عمها يدخل البيت يجيب لها مويه عشان ما تطلع هي وتشوفها أمها وتمنعها تطلع الشارع مره ثانيه..

ضحك صقر وقال: الله يحفظها البنت ذكيه ما شاء الله..

ابتسم جواد بهدوء وهادي قال: انا بطلع اشوفها وينها وبجيكم المجلس..

جواد: وش تبي منها خلها تلعب..

هادي: لا لا والله بروح اشوف سعود ذا من هو مب حنا اللي نخلي بنتنا مع ولد ما نعرفه..

ضحك جواد وقال: عساك على القوه كفو شوف بنت اخوك وينها..

ابتسم هادي وطلع من الحوش بيتوجه لـجود ويشوفها وينها ومن سعود هذا....

___

لمحها هادي جالسه هي وولد صغير وراح لها وهو يعدل شماغه الي عاصبه على راسه وصل خلفها وقال: جود؟

التفتت جود وناظرت عمها هادي وقالت: عمو هادي؟ هلا عمو..

هادي بأبتسامة: وش تسوين هنا في الشارع؟

جود: قاعده العب هنا انا وسعود وجواد بس جواد راح البيت يجيب لنا مويه..

هادي ناظر سعود اللي يناظره وقال: ما شاء الله وش اسمك يا بطل؟

ما رد عليه سعود وناظر جود يبيها هي ترد عنه

وعقد هادي حواجبه وهو يجلس عندهم وقال: وش فيك ما ترد؟

جود ناظرت سعود ثم ناظرت هادي وقالت: عمو.. سعود ما يرد ما يقدر يتكلم..

هادي ناظرها بأستغرب وقال: ليه ما يتكلم؟

رفعت جود أكتافها وقالت: كذا من الله ما يتكلم..

هز هادي راسه بتفهم وقال: ايوه؟ وليه قاعده في الشمس؟

جود: مو شمس هنا احنا نلعب في الظلال بس عشان انتظر جواد يجي وبنروح كلنا نلعب في الظلال..

هادي: انتي وسعود وجواد؟

جود: اي احنا فقط الثلاثه نلعب..

وقف هادي وقال: زين معك نص ساعه فقط العبي وارجعي البيت لا تتأخرين اكثر!..

جود: ليه يا عمو ابي العب معهم؟

هادي: عشان بكلمك العبي معهم نص ساعه وبعدها ارجعي للبيت الوقت تأخر والشمس تحرق..

هزت جود راسها: حاضر يا عمو هادي نص ساعه..

هادي: لا تنسين معك نص ساعه لو تمر نص ساعه ما تجين ابزعل منك..

جود: لا لا ماني متأخره نص ساعه وبجيك يا عمو..

ابتسم هادي و هو يدري انها قاعده تسلك له..
من متى هي تعرف الوقت؟ ابتعد عنها وهو راجع للبيت..

_____

في البيت..

دخل جواد وصغير وركض للمطبخ وهو يبي ياخذ لهم مويه ويطلع قبل تنتبه عليه امه وتمنعه من الطلعه اخذ لهم ثلاث علب مويه وطلع من المطبخ بسرعه مروراً بالصاله و قبل لا يطلع من باب البيت سمع صوت امه خلفه وهي تقول: جواد اصبر وين رايح؟

جواد التفت لها وناظرها وقال: رايح العب!.

العنود وهي شايله الولد وترضعه بالرضاعه قالت: مع من تلعب؟

جواد: مع جود وسعود..

العنود: خذ خواتك معك يلعبون..

رفعت وفاء راسها وناظرت جواد وهو يناظرها وقال: بس هم ما يبون يلعبون معي يا ماما..

العنود بحده: ذولي خواتك بيلعبون معك خذهم وانتبه عليهم ولعبهم معك لا تتركهم يا ويلك لأزعل منك يا جواد...

ناظرهم جواد وهز راسه بالموافقه والعنود ناظرتهم وقالت: يلا حبيباتي روحوا مع اخوكم العبوا برا ولا تتأخرون و خلوكم عنده لا تبعدون كثير..

سجى: حاضر

ابتسمت العنود: حبيبتي انتبهي لخواتك وانتبهي لاخوك وأنت يا جواد انتبه لخواتك وخلي بالك عليهم..

جواد: حاضر..

العنود: لا تقعدون في الشمس حبايبي..

سجى هزت راسها وهي تمسك يدين خواتها و طلع جواد من الصاله وخواته يلحقونه..

جواد التفت لهم وقال بهدوء بتلعبون معي؟

سجى نزلت راسها وقالت: اي بنلعب معك..

ابتسم جواد الصغير لهم وقال: انا احبكم انتو خواتي..

ابتسمت سجى وهزت راسها: واحنا نحبك..

ابتسم بسعاده ومشى معهم طالعين من الحوش متوجهين لجود وسعود..

و رفعت جود راسها وشافت جواد يجي ومعه خواته وقفت وتكتفت وهي تناظرهم ..

وجاها جواد وهو مسرع وقال لها: خواتي بيلعبون معنا..

عقدت جود حواجبها وقالت: بس هم ما يحبونها!!.

سجى نزلت راسها وقالت: إلا نحبكم..

ناظرتهم جود بنص عين وجواد قرب منها وهو يهمس لها: جود حرام يا جود خليهم يلعبوا معنا ما عاد عندهم ام وهم خواتي ابيهم يلعبون معي ..

ناظرته جود وهي تتذكر وحزنت عليهم و قالت: طيب طيب تعالوا العبوا معنا..

تقدمت سجى ووفاء وخواتهم الصغار يلعبون مع جود اللي اخذت المويه من جواد وهي تشرب وبعدها بدأوا يلعبون كلهم وجواد حاس انه مسؤول عليهم كلهم ويهتم فيهم وباله عندهم عشان توصيه امه عليهم...

_____

دخل هادي للمجلس وتوجه الى جواد وقعد عنده وقال بأستغراب: وين حمدان؟

جواد وهو على جواله: راح البيت بيرتاح شوي..

ناظر هادي المجلس وشاف مافيه الا بعض اخوانه والبعض الآخر في اعمالهم او في بيوتهم التفت لجواد وقال: إلا صحيح الولد اللي معه جود اللي يلعب معها..

جواد عقد حواجبه وقال: وش فيه؟

هادي: مدري يقولون ما يتكلم الولد من طفولته السمع عنده ضعيف وما يقدر يتكلم..

جواد: اي ادري اعرف ابوه انا..

هادي: وليه ما تاخذه انت وتعالجه؟

عقد جواد حواجبه وقال: وشلون؟

هادي: وشو و شلون؟ انت الدكتور ولا انا؟ خذ الولد سوي له الفحوصات اللازمه وشوفوا وش يحتاج على حساب المستشفى ..

جواد: اي و الله الولد اهله حالتهم الماديه ما هي زينه..

هادي: واحنا الحمد لله المستشفى حاله زين و نقدر نتبنى هذي الحاله ونعالجها ما في اي مشكله..

سكت جواد شوي وهو يفكر في كلام هادي وهز راسه بهدوء وقال: انا بشوف اهله وبسئلهم عن حالته وباخذ الولد واوديه المستشفى ونسوي له كل الفحوصات وإن كانت حالته مقدور عليها بنعالجه وان كان فيه خلل خلقي ما نقدر نعالجه بنقول لهم ..

هادي: على الأقل بنكون سوينا اللي علينا...

جواد هز راسه : بالضبط

ابتسم هادي وهو يتذكر شكل سعود وقال: حرام الولد صغير لا يضيع كل عمره خلنا دام مقتدرين نعالجه..

اومئ جواد وهو يفكر بصمت..

وهادي طلع جواله على الاتصال الي جاه من شركتهم..

__________

" غيداء "..

كانت قاعده هي و فَي في الغرفه..

وغيداء تلم اغراضها لانهم يمكن يسافرون اليوم ويرجعون للرياض اما فَي فـكانت سرحانه وساكته وما يصدر منها اي صوت..

التفتت لها غيداء وقالت: فَي لين متى طيب وانتي ساكته ما تتكلمين تراكي من الصبح ما قلتي ولا كلمه!!.

تنهدت فَي وقالت بضيق: ضايق خلقي وزاد علي الضيق انك بتسافرين الحين!..

غيداء: لا مو الحين بنسافر يمكن نسافر الليل او العصر انتي ارتاحي الحين لا تفكرين في شي و بعدين يمكن ما تطولون هنا يمكن ترجعون الرياض بعد..

فَي: والله ما ادري وش بيقول حمدان ولا وش بيقرر من يوم ما توفى جدي ما تكلمت معه ولا شفته ولا ادري وش بيصير انا خايفه عليه يا غيداء اكيد الى الحين حاط في بالها الانتقام..

مع ان نمر ما له دخل بس خايفه يضيع حمدان يا غيداء من جديد ونخسره بعد مثل ما خسرنا جدي وقتها انا وجدتي من لنا غيره والله نموت من غيره انا ما ادري وش فيه الحين ولا وش بيكون احساسه ولا وش شعور اكيد يلوم نفسه الحين ومحمل نفسه كل السبب!..

تنهدت غيداء وقالت: طيب ما جربتي تدقين عليه ترسلين عليه وتشوفيه وشلونه؟

فَي: لا والله احس مالي وجه اني اكلمه وانا السبب في كل اللي صار خايفه يعرف انه انا اللي كلمتك وانه من تحت راسي صارت كل المشكله ويزعل مني خايفه ان احد يقول لي انه انا السبب في موت جدي ما اقدر اتحمل الفكره...

غيداء تركت اللي في يدها ووقفت وتوجهت لـ فَي وجلست عندها وشدت على يدها و قالت: حبيبتي انتي مو السبب، بفضل الله ثم بفضلك عرفنا أن نمر ماله ذنب وتفادينا اخطاء كانت ممكن تصير بسبب وهم!!..

كان ممكن يا فَي انو احنا نخسر كل ما نملك وكل تعب السنين اللي فاتت من اخوي وجواد وهادي وممكن حمدان زوجك يخسر بعد ويخسر حياته ممكن يتسبب لنفسه في دخوله للسجن عشان الوهم ، عشان انتقام وهمي، عشان كذا التصرف اللي سويتيه كان لحكمه ما تخافين ولا تقلقي ولا تحملي نفسك اي مسؤوليه في النهايه انتي ما سويتي شي خطا انت نفعتي حمدان ونفعتي اسرتكم كلها اما جدك فهو يومه مقدّر له، الله يرحمه..

فَي: طيب وش اسوي بالي عند حمدان وخايفه عليه يكون صاير له شي خايفه انه يلوم نفسه ولا يزعل نفسه ولا يدخل في انهيار نفسي ولا عصبي حمدان للحين تحت تأثير صدمه خسارته لأهلنا وشلون بيتحمل خساره جدي؟!

ابتسمت غيداء بحنيه ومدت يدها لخد فَي و قالت: الحين صار دورك يعني اوقفي بجنبه بجنب زوجك اثبتي له انك نعم الزوجه سانديه وكوني له سند اوقفوا جنب بعضكم الثاني اسندوا بعضكم مالكم الا بعضكم يا
فَي لا تتركين حمدان يروح من بين ايديك كذا...

فَي بحزن : وش اسوي يا غيداء وش اسوي؟

غيداء: حمدان وين الحين؟

فَي: ما ادري والله ما ادري لو اني ادري كان ماني قلقانه كذا..

غيداء: طيب اوقفي الحين البسي عبايتك ونقابك وروحي لغرفته ما انتي سويتيها من قبل يعني! و شوفي اذا هو هناك ادخلي سولفي معه تكلمي معه وفهميه انه ماله ذنب حاولي تخففين عنه وتطلعينه من الحزن اللي هو فيه وحاولي انكم تسندون بعضكم وتطلعون من المصيبه اللي انتم فيها مع بعضكم ويدكم في يد بعض عشان جدتك تقوى وما تخسرونها هي بعد..

فَي : قولك اسوي كذا؟ طيب ولو ما كان يبي يشوفني؟

غيداء ابتسمت وقالت: لا تقولين كذا الرجال زوجك ما فيها اي شي ترى ولا بتسوي شي حرام واذا ما وقفتي معه الحين متى بتوقفين معه؟ اوقفي الحين البسي عباتك ونقابك عشان ما تصادفين احد في طريقك وتوكلي على الله وروحي له أقعدي معه شوي سولفي له اثبتي له انه ما له اي ذنب وطلعيه من الحزن اللي هو فيه قولي له ان اللي صار قضاء و قدر وان جدك هذا يومه وكل انسان بيجيه يومه زين؟

اومئت فَي براسها بالموافقه وقالت: زين..

غيداء: يلا اجل روحي له..

تنهدت فَي وقالت غيداء بتشجيع: يلا..

هزت فَي راسها بالموافقه ووقفت و غيداء وقفت وقالت: لا تخسرينه يا فَي..

فَي تنهدت وخذت عباتها ولبستها ولبست نقابها وناظرت غيداء وقالت: ماني متأخره.

ابتسمت غيداء وقالت: تأخري عادي..

ابتسمت فَي بهدوء وتوجهت للباب فتحته وخذت نفس عميق ومشت مبتعده عن غرفتها متوجهه لغرفة حمدان..

اما غيداء تنهدت وهي تدعي لـ فَي في نفسها وجلست على السرير وهو تنسدح وتقلب في جوالها بهدوء..

_____

"العنود"

كانت جالسه عند فاهد الي محتضن الصغير والعنود تناظر فيه بهدوء وقالت: فاهد وش رايك نسمي الولد إياد عشان يكون متناسق مع اسم اخوه جواد؟

ابتسم فاهد بهدوء وناظرها وقال: تم خلاص ان شاء الله اسمه إياد...

ابتسمت العنود ومدت يدها وتقدمت منه وهي تمسح على خده بحنيه وقالت: كنت ابيك تكون موجود عندي عشان اخفف من حزنك من يوم توفت مهره وبعدها توفى عمك وانا ما شفتك و بالي طول الوقت كان عندك وخايفه عليك...

رفع فاهد يده وخلاها على يدها وغمض عيونه وقال بهدوء: ما قصرتي يا العنود ما قصرتي أبداً احتويتي بناتي في اسوء الايام اللي كانوا بيتشتتون فيها احتويتيهم في حضنك الدافي وخفتي عليهم مثل ما تخافين على جواد واعتبرتيهم بناتك من لحمك ودمك وشفت البنات وشلون متغيرين وكيف صاروا يحبونك وشفت نظافتهم ولبسهم شفت وجوهم ما ينقصهم شي ما قصرتي يا العنود الله يجعلني اجازيك بخير الجزاء اللي تستاهلينه..

قدمت بحنيه راسها على كتفه وكأنها تضمه وقالت: بناتك بناتي يا فاهد و إن شاء الله ما قصر عليهم وما ينقصهم شي..

أحاطها فاهد بيده وهو يقبل راسها وقال: حتى إياد اهتميتي فيه واعتبرتيه ولدك...

ابتسمت العنود ومدت يدها لخد اياد الصغير وقالت بحنيه مفرطه: هالـولد دخل قلبي يا فاهد دخل قلبي والله العظيم كأنه ولدي واني احبه من محبتي لجواد ما في فرق بينهم شوف كيف يسكت يوم اخذه انا شوف شلون يناظرني...

ابتسم فاهد بحنيه وقال: الله يجزاك خير يا العنود..

العنود:وياك ، بس يا فاهد في خاطري شي..

فاهد: سمّي؟.

العنود: ودي انك تاخذ نوره وتقعد معها شوي تسولف لها من أب لبنته وتترك لها المساحه تفضفض لك ودي تحتويها البنت للحين متأثرة بموت امها بالذات انه هي بنت صارت كبيره وتفهم مو زي خواتها كلمتين وتنسى خواتها صحيح صغار وصحيح قدرت انه انسيهم الوضع يا فاهد بس نوره صارت كبيره وتحس احتويها يا فاهد خذها لحضنك ضمها سولف لها كلمها خلي بنتك تكون قويه لا تضعف صح انها متقبلتني وصح أنها تسمع كلامي وكل وقتها عندي بس تحتاجك يا فاهد هذي بنتك وبتسمع منك اكثر خذها لحضنك تكفى...

فاهد بهدوء: وينها الحين؟

العنود: قبل شوي يوم عرفت انك جاي لعندي خذت عمرها وراحت تلقاها الحين في غرفة امها روح لها يا فاهد اقعد معها شوي خذها لحضنك وصبر قلبها وسولف عليها..

اومئ فاهد ومد لها اياد و قال: خذيه وانا بروح اشوفها الحين..

اخذت العنود اياد من فاهد وضمته لصدرها وقالت: حسسها بوجودك جنبها يا فاهد ضمها لصدرك وخفف الحزن عنها..

اومئ فاهد وهو ممنون جداً للعنود ولكلامها و تصرفاتها ولحنيتها على عياله وحبهم وكبرت كثير في عينه وزاد حبه لها اضعاف وأضعاف..

وقف فاهد وقال لها: لا تطلعين ماني متأخر باخذها وبسولف عليها شوي وباخذها ونجيك انا وياها ونقعد عندك..

قالت العنود بأبتسامة: بستناكم ماني طالعه من الغرفه بنيم إياد وبنتظركم...

فاهد اومئ بالموافقه وتوجه إلى الباب وطلع من غرفته متوجه لغرفة مهره بيشوف نوره ويقعد معها...

وصل فاهد عند باب غرفة مهره ووقف و رفع يده وفتح الباب بهدوء ودخل بخطوات هادئه وناظر الغرفه كلها وشاف نوره نايمه على سرير امها ومتغطيه لاحظ اهتزاز أكتافها وعرف انها مو نايمه وانها اكيد الحين قاعده تبكي تقدم منها بخطوات هادئة ووصل عند السرير وقعد بجنبها ومد يده ومسح على راسها بحنيه وشال الفراش من على راسها وشافها تصيح ودموعها على خدها وتقطع قلبه على منظرها وعلى صوت بكاها...

فتحت نوره عيونها وشافت ابوها قدامها وفزّت بسرعه وهي تقعد على السرير وتمسح دموعها وقالت بتفاجؤا: يبه!..

ابتسم فاهد بحنيه وفتح يديه و قال: يا عيون ابوك يا روح ابوك انتي تعالي تعالي يا عيوني..

اهتزت شفتها معلنة بكائها المتواصل والمتجدد وتقدمت منه وهي ترتمي في حضنه وتبكي بصوت عالي وضمها فاهد بكل قوته وهو يبي ياخذ الحزن اللي في قلبها لقلبه ويبعد عنها كل وجع وكل ألم وقالت نوره بصوت متقطع من الصياح: امي راحت يبه ماتت وتركتنا ، تركتنا انا وخواتي واخوي ما عاد في عندنا ام يبه...

فاهد ابعدها عنه شوي ومسك وجهها بين يديه وتقرب منها وهو يقبل خدودها الصغيره وقال بحنية: امك يا عيون ابوك راحت لربي ، ربي أرحم مننا كلنا وارحم من هذي الدنيا وبلاويها خليها ترتاح في الجنه وهي ما تركتكم الا وهي متأكده و تدري إن معها بنت قويه شاطره بتهتم بخواتها واخوها وبتكون سند لهم وبتواصل معهم باقي ايام الحياه وما بتترك ابوها يضعف وبتكون جنبه وتسنده وبتهتم بمدرستها ومدرسة خواتها ، وعندهم بعد خالتهم العنود ما بتتركهم واي شي يحتاجونه بتساعدهم فيه عشان كذا هي ما راحت الا وهي متطمنه لانها تدري انها ما بتتركم تايهين في الدنيا تدري انكم اقوياء بالذات انتي انتي حبيبة ابوك وشبيهته قويه مثله خليك كذا قويّة مثل ما اعرفك ومثل ما احبك تكونين وساعدي خالتك في الأهتمام باخوك الصغير الدنيا ما تنتهي وانا ابوك على كذا... وبتلتقون إن شاء الله بعد عمراً طويل في جنات النعيم وبتنبسط امك منك وبتقول لك كنتي قد الأمانة وانتي خليتيني ارفع راسي فيك يا بنتي وافتخر ان عندي بنت مثلك قويه تبين كذا؟ ولا تبينها تقول ليه يا بنتي ما كنتي قد الامانه اللي تركتها لك؟

نوره نزلت راسها و ما ردت وهي تفكر فيك كلام ابوها..

و ابتسم فاهد بحنيه وضمها لصدره وهو يمسح على راسها وقال: شوفي يا ابوي شوفي يا عين ابوك انتي..

انا رافع راسي فيك وادري ان عندي بنت قويه شجاعه وفاهمه بتهتم بخواتها وبخوانها جواد واياد وخواتها كلهم ما بيحتاجون لأي احد وان احتاجت النصيحه او أي شي تحتاجه أو تبي تتكلم مع احد ابوها موجود وخالتها العنود موجوده ما بنقصر معك أبداً خليك نوره اللي اعرفها وارفع راسي فيها زين يبوي؟.

نوره هزت راسها بالموافقه ودموعها على خدها وقال فاهد: العنود مزعلتك بشيخء ولا مقصره عليك بشي علميني؟..

نوره رفعت راسها و ناظرت ابوها وقالت: لا يبه خالتي ما قصرت معي حتى انها تحبني اكثر وحده فينا كلنا وقالت انه تبيني اكون صديقتها وما تبي تسولف الا لي انا بكل اسرارها..

ابتسم فاهد وقال: شفتي! قلت لك هذي هي صديقتك العنود اي نصيحه ولا كنتي تبين تتكلمين ولا في خاطرك شي وحسيتي انك تستحين مني وما تبين تعلميني صديقتك موجوده كلميها وهي بتنصحك وكأنك بنتها وإن حسيتي ان في تقصير عليك ولا ناقصك شي ولا هي مزعلتك بشي علميني وانا ابوك..

نوره هزت راسها بالموافقه ورفع فاهد يده وهو يمسح دموعها وقال: خلاص أجل ما عاد أبي اشوف هذي الدموع مره ثانيه خليك بنتي القويه اللي احبها وارفع راسي فيها خلي خواتك يشوفونك قدوه لهم يا نوره زين؟..

نوره: زين..

ابتسم فاهد وهو يحتضنها لصدره وقال: والله انك ازين بناتي..

ابتسمت بخجل وهي تضمه وفاهد تنهد وهو يقبّل راسها بحنيه وهو يفكر بصمت...

__________

" جدة حمدان "..

كانت قاعده هي وام صقر يسولفون ويتكلمون بهدوء حول الدنيا واحوالها وام صقر تسئل جده حمدان على وش بيسوون وهل بيبقون في الديرة او بيرجعون للرياض..

جدة حمدان بحزن: مدري والله وش يبي حمدان نقعد هنا ولا نرجع الرياض.

ام صقر: الله يهديه للصحيح..

جدة حمدان تنهدت : يا رب انك تهديه وتحفظه وتصلح شانه يارب.

ام صقر: قعدتي معه ولا للحين ما جت لك فرصه؟

جدة حمدان: لا والله للحين ما قعدت معه كل وقته مع الرجال ما يدخل..

ام صقر: دقي عليه..

جدة حمدان: الجوال مع فَي هي الي تكلمه.

ام صقر: اجل انا بدق على ولدي اقول له يمد له الجوال وتتكلمين مع وش رايك؟

جدة حمدان بغصه: خير ما تسوين ودي اسمع صوته واكلمه اكيد ماكلن قلبه على جده..

ام صقر بحزن: الله يصبر قلوبكم ويغفر لميتكم ويسكنه فسيح جناته ويجعل مثواه الجنه...

جدة حمدان بهمس: آمين.. آمين.

ام صقر طلعت جوالها وهي تضيق عيونها وتبحث عن رقم صقر وشافته ودقت عليه وجدة حمدان تناظرها وتنتظر اللحظة الي بتسمع فيها صوت حفيدها وتتكلم معه...

ام صقر كانت تسمع رنين الجوال وجاها صوت صقر وردت: هلا يمه صقر شلونك؟

صقر: بخير جعلك بخير شلونك يمه

ام صقر: الحمدلله بخير.. الا بغيت اسئلك حمدان حولك؟

صقر تلفت: لا والله ماهو في المجلس ليه عسى ما شر؟

ام صقر: ما شر ان شاء الله بس جدته تبي تكلمه..

صقر: هو في البيت اتوقع له اكثر من ساعتين في البيت..

ام صقر ابتسمت: ها زين عز الطلب اجل استودعتك الله..

صقر: في امان الله..

ام صقر قفلت من صقر والتفتت لجدة حمدان وقالت: يقول انه في البيت ماهو عندهم في المجلس..

جدة حمدان: في غرفته؟

ام صقر: يمكن يقول انه في البيت نن ساعتين.

جدة حمدان مدت يدها للأرض تسند نفسها توقف وقالت : اجل انا بروح له اشوفه واتطمن عليه..

ام صقر: اسندك؟

جدة حمدان وقفت وقالت: لا الله يسلمك تسلمين..

ام صقر: لا تضغطين على نفسك..

جدة حمدان بتعب: العمر وش باقي فيه؟
ام صقر: الله يطول بعمرك ويحفظك لعيالك.
جدة حمدان تنهدت وهي تتوجه للباب بتروح لغرفة حمدان ...

يُتبع..

( غداً أخر لقاء لنا في رواية انتي ربيع العمر في كل الفصول) ..