رواية انتي ربيع العمر في كل الفصول! الفصل السادس 6 - بقلم rned 🖤

.....

غيداء وصلت عند باب البيت مع هديل وزوجها
والتفت هديل لغيداء وقالت: يحتاج ادخل معاك ولا؟

غيداء: لا لا ما يحتاج انا بتصرف..

ضحكت هديل وقالت : الله يعينك مو بمشكله لو احتجتي اسعاف او شي انا بدق انا في الخدمه..

ابتسمت غيداء ونزلت من السياره وقالت لهم: مشكورين..

هديل: الله معك تصبحين على خير

غيداء: وانتوا من اهله..

تقدمت غيداء من باب البيت وهديل انتظرت لين شافتها تدخل وحرك متعب راجع لبيتهم..

اول ما دخلت غيداء من باب البيت على طول فسخت الكعب ومسكتهم بيدها ومشت على اطراف اصابعها عشان ما تصدر صوت وتسمع امها وتنتبه ان توها ترجع ولحسن الحظ كانت الاضواء كلها طافيه مما يدل ان امها نامت مو صاحيه وصلت غيداء عند الدرج وتنهدت براحه لما حست انه فعلاً امها نايمه مو موجوده..

وبدأت تطلع الدرج طبيعي لكن الاضواء اشتغلت وشهقت اول ما شافت امها واقفه في وسط الصاله وفي يدها نعال " وانتو بكرامه "..
ابتسمت غيداء وهي قامطه العافية وقالت بابتسامه خوف: هلا يمه مساء الخير ! ...

رمت امها النعال واستقر في وجه غيداء اللي جلست على الارض وهي ماسكه وجهها بالم وقالت امها بعصبيه: اي خير الله ياخذ روحك؟ اي خير ما تشوفين الساعه؟ انتي ما عندك والي يولاك أصلاً لو في اخوك خير ما كان يراكض بعد حيته الصفراء وتاركك تهيتين لين نصوص الليالي والله والله لعيد تربيتك من اول وجديد هذا اخرتها بنتك يا ابو صقر قاعده خارج البيت لين الساعه 12:00 هذا اخرتها تحسبين البيت سايب لان ما عاد به رجال بتركك تهيتين؟ لا والله لربيك!!

غيداء وهي تبكي: وش سويت ماني مسويه جريمه تراني مع اختي الكبيره مع هديل اللي يسمعك يقول اني الحين في واحد من.. واحد من استغفر الله بس..

ام صقر بعصبية: انا وش قلت لك؟ انا وش قلت لك ها؟ وش قلت لك!!! متى ترجعين البيت؟ المفروض شفتي الوقت تاخر دقيتي على السواق ورجعتي ما تنتظرين هديل لين الساعه 12:00 لين يجي زوجها وياخذها لكن عجبك الوضع وبغيتي تهيتي شفتي ان ما عندك ابو ولا اخو يسئل قلتي الوضع والمساحه صارت خاليه ومتاحه لي لا والله اني لاربيك انا اوريك يا غيداء الزفت انا اوريك!.

تقدمت ام صقر من غيداء وهي تسحبها من شعرها وتضرب فيها وغيداد معصبه وتصرخ من جهه وامها من جهه وطلعت الشغاله وهي خايفه وتشوفها وتحاول تفك ام صقر عن غيداء..

_____

عند صقر..

كان توه يرجع للبيت ومعه زوجته الي كاشخه ومتزينه بعد عرس في بيت اهلها وهو مشتاق لها وتوه يفضى من شغله ومن همومه..

دخلوا لبيتهم وراحت افنان للغرفه وتركت عباتها وتوجهت للمرايه تعدل شكلها ودخل صقر وانبهر بجمالها واناقتها وابتسم وتقدم منها وهو يضمها: وش ذا الزين كله؟!

افنان ابتسمت بدلع والتفتت له وقالت: حلو شكلي؟

صقر وهو يناظرها: حلو بس؟ يا شيخه يذبح جمالك!

ضحكت افنان وهي تضمه: وحشتني مره
صقر: والله اني اشتقت لك حيل لكن شسوي انشغلت وانتي تعرفين هالشي.

افنان: اي اعرف انك تنشغل بس اليوم ماعندك شي صح؟

صقر بأبتسامة اعجاب: ولو عندي شغل ما اتركك
افنان ابتسمت وهي تبتعد عنه وقالت: اجل خل اجهز لنا خفايف ونسهر اليوم انا وياك على فيلم حلو ونقعد مع بعض ترى من زمان ما قعدت معي ولا تكلمنا

صقر اشر على عيونه: للصبح لو تبين انتي روحي الحين جهزي لنا شي خفيف وانا بشوف لنا فيلم

راحت افنان بسرعه تجهز لهم شي خفيف وصقر راح يختار لهم فيلم يتابعونه..
وهو فعلاً يحس انه اشتاق لها ولجلسه معاها ولسوالفها..

وجت افنان وفي يدها صحن فيه خفايف وعصير وتركتهم على الطاوله وجلست على الكنبه وهي تجمع المخدات كلهم عليها وتضبط لهم جلسه حلوه وجلس صقر عندها وسحبها له وضمها وهو يقول: والله اشتقت لك عساك انبسطتي في بيت اهلك؟

افنان بأبتسامة حنونه: اي انبسطت بس وحشتني يا صقر وكنت استنى منك اتصال بس مدري شفيك تتغلى علي!

صقر: افا في احد يتغلى على حبيبته لا والله الا انشغلت كثير

افنان سندت راسها على صدره وقالت: صرت اغار من شغلك ترى!.

ضحك صقر وهو يضمها له ويقلب لهم على الفيلم
وافنان مبتسمه ومغمضه عيونها..

قطع عليهم صوت الجوال الي رن ورفعت افنان راسها وقالت: صقررر كم مره اقول لك قفل جوالك اذا صرت في البيت يعني الشغل لاحقك للبيت بعد!

رفع صقر جواله وهو عاقد حواجبه وقال: هذي امي وش تبي هالوقت لا يكون صاير لهم شي!.

افنان بخوف: رد بسرعه ..

رد صقر وقال: هلا يمه ارحبي

جاه صوت الشغاله الي قالت برعب: استاز صقر انتا لازم يجي الحين ماما شوي ويقتل غيداء!

فز صقر برعب وقال: وشش صاير تكلمي؟؟!

الشغاله: ماما يضرب غيداء تعال
صقر بصدمه: تضربها! ليه

افنان بعصبيه: وانت بتنتظر لين تخلص عليها روح لهم شوف وش صاير من عندهم!

قفل صقر الخط وقال: عطيني مفتاح السياره بسرعه..
ركضت افنان وهي تاخذ مفتاح السياره وتمده له

وقال صقر: تجين معي؟

افنان بتوتر : لا لا ماودي احرج غيداء بوجودي في مثل هذي المشكله روح انت الله يهدي امك ذي

مارد عليها صقر وطلع من البيت وراحت افنان تقفل الباب وتنهدت: اووف منك يا عمه لاحقتنا لين هنا مو تاركتنا نتهنى استغفر الله العظيم بس..

دخلت لداخل وهي تجلس على الكنب بقهر وتلف شعرها بيدها وتفكر وش ممكن غيداء مسويه...

وقفت وهي مو قادره تجلس وراحت للغرفه تغير ملابسها وهي قلقانه عليهم وش ممكن صار..

____________

صقر حرك بسرعه متوجه لبيتهم وخايف وش الي صاير ببيتهم...

وبعد مده ما هي طويله وصل عند باب بيتهم ووقف سيارته ونزل باستعجال وهو خايف من اللي بيوصل عليه فتح الباب ودخل وسمع صراخ غيداء وعصبيه امه ويوم دخل وشاف منظرهم انصدم وعلى طول توجه الامه وسحبها وقال: اهدي يمه وش صاير ايش قاعده تسوين يمه بتذبحين البنت!!!.

غيداء بعصبيه ابتعدت وهي تبكي: امك ذي ماعادت تترك احد بحاله وتشكك في كل شي..

ام صقر بعصبية: اسكتي وقص يقص لسانك ان شاء الله لا بارك الله فيكم من عيال..

غيداء بعصبيه ودموعها على خدها: من مات ابوي وانتي معاملتني معاملة الـ """" تحسبيني قليلة تربيه؟!!!!

صقر فتح عيونه بصدمه من الكلمه وتوجه لها بعصبيه ومسكها من يدها وصرخ عليها: وششش هالكلام يا غيداء؟!!!..

غيداء بأنهيار: امي الي مسويه كل هذا ان طلعت قالت لي قليلة تربيه وان مسكت الجوال قالت وش عندك واليوم ضاربتني كني بنت عشر سنوات ما كني بنت عاقله كبيره وبعد هذا كله كنت مع اختي هديل مو لحالي لكن كل ما عصبت منك ولا من آمال طلعت حرتها علي انا ماعندها غيري تفرغ عقدها وكئابتها..

صقر بعصبية: قطع يقطع لسانك اسكتي..

دفته غيداء وهي تبكي وطلعت الدرج وراحت لغرفتها وصقر التفت لأمه وقال: يمه!

ام صقر بعصبية: سامعها قليلة التربيه سامعها تقول عني معقده وكئيبه!!! سامعها وش تقول لسانها طاااال!!

صقر: يمه فهميني وش صاير ليه مسوين هذا كله..

ام صقر بعصبية : مهوب شغلك طس من البيت لبيتك ماهو هذا الي انت تبيه انك تطلع بيت لحالك وتفتك من مشاكلنا ومشاكل اختك وتاركها لي مو قادره اسيطر عليها.. والحين لا تجي تسئلني وش الي صاير ارجع لزوجتك وخلينا حنا نحل مشاكلنا وعقدنا وكئابتنا يا حسرتك ياحسرتك بعد ما ربيتيهم وكبرتيهم وسهرتي عليهم الليالي يقولون عنك معقده..

صقر تقدم منها وهو مبتلش وما يدري وش صاير وقال: يمه صلي على النبي واذكري الله واهدي لا يرتفع ضغطك وابشري انا بحل الموضوع وبـ...

ام صقر بعصبية: قلت لك طس ما نحتاجك هذا انت هارب من المشاكل ليه راجع لنا ليييه من الي قال لك تجي هااه؟؟

صقر تقدم وهو يحب رأسها: تكفين اهدي ومالك الا الي يطيب خاطرك وغيداء انا اتفاهم معاها انتي اهدي لا يصير لك شي اهدي طلبتك وهذه حبه على راسك تكفين اهدي..

ام صقر نزلت دموعها: حسبي الله ونعم الوكيل حسبي الله ونعم الوكيل عشاني خايفه عليها تقول عني معقده وكئيبه سامعها وش تقول يا صقر سامع بنت بطني وش قالت عن امها..

صقر اقشعر جسده وهو يشوف دموع امه وضمها بسرعه وهو يقول: افا وانا ابو محمود افا تنزل دموعك يا الغاليه لجل غيداء والله لربيها اهدي انتي والله لخليها تجيك وهي تعتذر..

ام صقر: وش سويت ياربي يجيني هالعيال ياربي ارحمني برحمتك وخذ روحي تعبت يارب تعبت اتحمل الخوف عليها في كل يوم ولا القى تقدير

صقر: خلاص يمه تكفين خلاص اهدي تكفين...

ساعدها صقر تجلس على الكنب وراح يجيب لها مويه تهدأ اما هي فكانت تمسح دموعها وهي تتحسب عليهم وتدعي..

جاها صقر مسرع وهو يشربها مويه ويهديها وقال: طلبتك اهدي خلاص انا احل الموضوع...

ام صقر : قالت لي عندها حفله سمحت لها تروح مع هديل واتفقت معهم يرجعون بدري لكن شوفت عينك توها ترجع الحين انا تعبت اخاف عليها هي بنيه في اول شبابها واكيد العيون عليها وخايفه يصير لها شي لا ابوها موجود ولا انت موجود تاركيني معها وخايفه عليها من كل شي...

صقر شد على يده وقال: الله ياخذني كان هذا كله بسببي وابشري ورب البيت اننا بنرجع هنا وانا الي بهتم في غيداء من الحين انتي لا تشغلين بالك عليها انا موجود من قال لك اني مب موجود انا موجود يمه وخادم عند رجولك لو تبين سامحيني يمه تكفين لا تضيقين خاطرك بسببي...

ام صقر: زوجتك ما بتقبل ترجع عندنا

صقر: افنان تحبكم يمه وانتي تعرفين

ام صقر ماردت وهي تمسح دموعها..
ووقف صقر وجلس عندها وهو يمسح دموعها ويحب راسها ويتأسف منها ويحاول يهديها عشان ما تتعب من الضغط اكثر...

اما غيداء فكانت طايحه على سريرها تبكي بندم على الكلام الي طلع منها في لحظة غضب لكنها انقهرت من تعامل امها معها هي تدري ان امها تخاف عليها واكثر شي مخوفها ان ماعاد فيه رجال كبير معهم في البيت بعد صقر...

لكن امها تضغط عليها كثير وهي تدري انها مستحيل تميل في الطريق الخطأ لكن الوقت والزمن صاروا يخوفوا امها مما خلاها تضيق على غيداء...

______

بعد محاولات قدر صقر انه يقنع امه ترتاح وهو بيحل الموضوع وأوعدها انه يرجع هو وزوجته للبيت يسكنون معهم وهذا الي خلاها تهدأ وتوافق تروح لغرفتها تنام..

اما صقر ناظرها لين اختفت من قدام عيونه وجلس على الكنب وهو يمسك راسه الي صدع وتنهد بضيق من الي قاعد يصير ورفع جواله الي دق وشاف رقم زوجته ورد بضيق: هلا.
افنان بقلق: عسى خير؟

صقر سكت وهو يمسح وجهه بضيق

افنان بقلق: صقر!

صقر: افنان انتي معي ولا لا؟
افنان : وش صاير

صقر: افنان لازم نرجع للبيت نسكن هنا..

سكتت شوي وقال صقر: الوضع يحكم اننا نرجع هنا..
افنان حست بالي فيه من صوته وعرفت ان الموضوع كبير وقالت: طيب حاضر..

غمض صقر عيونه براحه انها وافقت وما جادلت كثير وزاد قدرها عنده واحترامها وقال: بنام الليله هنا وبجيك بكره ونبدأ ننقل اغراضنا..

افنان بهمس: بس ما حقدر انام بدونك تعال خذني وننام كلنا في بيتكم..

ابتسم صقر بين ضيقه وقال: زين البسي..
ابتسمت افنان وقالت: طيب..

قفل صقر منها وتنهد وناظر بيتهم ووقف وهو يطلع بيروح يجيبها ويرجع..

____

الصباح..

في الشركه..

كان هادي من الصبح في مكتبه بكل نشاط وهو صار عنده شي جديد يشتغل عليه والي هو موضوع فيّان..

دخل السكرتير ومعه مجموعه اوراق وتقدم من هادي وتركها على الطاولة وشكره هادي بهدوء وطلع السكرتير وبدأ هادي يقلبهم و هو يحاول يطلع ولو ثغره بسيطه عن شركه فيّان او يعرف مين هذا الشخص اللي يديرها واللي يحمل لهم كل هذا الكره اللي تجسد في انه يحاول دائماً يخرب عليهم كل صفقه يشتركون فيها..

وكان يعمل اتصالاته مع اشخاص يعرفهم في مجال التجاره وحب يعرف لو عندهم معلومه عن شركه فيّان او عن اللي يديرها ولازال هادي في بحث مستمر عشان يطلع هذا الشخص...

دخل صقر من باب الشركه ومعه جواد وكان واضح عليه انه مقهور ومعصب ومتضايق وجواد يحاول انه يخرج منه ولو بكلمه بسيطه ويفهم و ش اللي مضايقه لكن صقر ابدا ما اتكلم عن اي شيء وكملوا طريقهم لمكتب هادي عشان يشوفون وش اخر الاجراءات المتعلقه بالاداره الماليه وصلوا لمكتب هادي وسمح لهم بالدخول ودخلوا ووقف بسرعه وهو يرحب فيهم ويجمع الأوراق كلها قبل ينتبهون: هلا هلا نورت الشركه..

جواد جلس وقال: منوره فيك
جلس صقر وقال: بالله عليك خلهم يجيبون لي قهوه مصدع..

هادي رفع الهاتف: ابشر.

اتصل هادي فيهم وطلب لكل واحد منهم قهوه وجلس عندهم وقال: ارحبوا وش جايبكم من الصبح؟

جواد: والله ما ادري صقر متصل وقال نجتمع في الشركه عشان امور الإدارة الماليه..

هادي بتذكر: اوه اي والله الله يذكرك بالشهاده الاداره الماليه قل ياطويل العمر كل شي جاهز وبعطيكم الملفات تشوفونها وتشيكون على الامور كامله..

صقر بهدوء: الله يبيض وجهك يا هادي..

هادي ابتسم: وجهك ابيض
جواد: امس وصلت كل الاجهزه اللي نحتاجها للمستشفى..
صقر: زين وشيكت عليها كلها؟

جواد: لا ما امداني اشيك عليها كامل شيكت على البعض والبعض تركته لان الوقت كان متاخر فبنشيك عليها ان شاء الله اليوم هي في المخزن ما بيصير عليها شيء بنشوفها العقد معنا وكل شيء معنا الفواتير كامله اي جهاز نشوفه خربان او فيه اي عطل او خلل بسيط او زي اللي طلبنا بيرجعونه بدون تعويض عشان تاخير الوقت..

صقر: زين كذا حلو خلاص ان شاء الله انا وياك نخلص امور الشركه وامور الموظفين وكذا ونروح نشيك على الاجهزه..
هادي: اذا عندكم شيء مهم ما عليكم ازهلوني انا اخلص كل شي في الشركه وانتو توكلوا على الله..

صقر: زين بالله قبل نمشي ورينا الملفات بشوفها.

هادي وقف: ابشر الحين..

دخل الموظف ومعه القهوه ومدها لهم وطلع
جلس هادي على كرسي المكتبه فتح اللاب توب وبدا يبحث عن الملفات المطلوبه ويجهزها عشان يمدها لصقر يشوفها...

اما صقر فكان جالس على كنبه طويله هو و جواد ويشربون قهوتهم وجواد ما قدر يسكت اكثر من منظر صقر اللي كان متضايق وواضح على وجهه: صاير معك مشاكل مع الاهل او شي؟

تنهت صقر وقال: ابد مو صاير شي..

جواد: تستهبل علي انت؟ علمني وش فيك! من يوم جيت وانت وجهك مقلوب وش صاير..

هادي رفع راسه من على اللابتوب وانتبه على كلامهم قال صقر: ابد والله صايره كذا مشاكل في البيت والحين، ... الحين بنرجع في البيت الكبير انا والاهل كلنا

جواد: زين ما سويت زين وش اللي مضايقك يعني مشاكل اهل؟
صقر: تقدر تقول كذا..

وقف هادي واخذ اللاب توب وتوجه لهم وقال: هذه هي الملفات صارت كلها جاهزه..

ترك صقر كوب القهوه على الطاوله وسحب اللابتوب وجلس يشيك على الملفات هو وجواد اما هادي فكان يناظر وجه صقر بهدوء ويحاول لو يبحث عن لمحه بسيطه من ذاك الوجه اللي كان في الماضي لكن غيداء ما كانت تشبه صقر ابدا وفي اختلاف بينهم تنهد هادي لما ادرك مجرى تفكيره ووقف وراح لمكتبه وجلس عليه وفتح الدرج بخفه و شاف اللابتوب والجوال فيه ارتسمت على شفايفه طيف ابتسامه ومد يدل داخل الدرج ومرر يده على اللابتوب وعلى الجوال اللي فيه لا شعوريا وهو يتذكر ضحكاتهم ويذكر كيف جاءت له في بيئه مختلفه وطبيعتها المختلفه وبافكارها المختلفه واسلوبها المختلف كيف جذبته وكيف انها كانت حاجه حلوه مرت عليه، رغم انه كانت طفولتهم وافكارهم الشيطانيه وجنونهم الا انه ما قدر ينساها ما قدر ينسى هذاك الحضن الاخير اللي كان بينهم ما قدر ينسى نظراتها ولا تلاعبها في الكلام اللي كان يدركه ولا قدر ينسى طفاقتها وتهورها ولا يقدر ينسى اي شيء فيها من سبع سنوات ولا زال عقله مشغول بسؤال واحد هل يا ترى بيلتقون؟

كيف بيكون اللقاء واي موجه صدف تاخذهم معاها؟!.

صحى من سرحانه لما انتبه ان صقر وجواد مدوله اللاب توب وهم بيطلعون قفل الدرج وسحب اللابتوب من صقر وقال: وين بتروحون الحين؟

جواد: ابد بنطلع كذا ناخذ لنا قهوه ونروح المستشفى..

اومئ هادي بالموفقه وهو يحس ان عقله تشوش بعد ما جرى بأفكاره لها..

_

صقر وجواد طلعوا من المكتب بيطلعوا من الشركه كلها ناوين يروحون لأحد الكافيهات ويتكلمون من اخ لاخوه و من صديق لصديقه..

اما هادي على طول فتح الدرج و طلع اللاب توب من الدرج وشبكه في الشاحن وشغله وانتظر لين ينفتح ودخل على الملف الوحيد الموجود فيه واللي كان فيه صوره وحيده كأنه يجدد في نفسه حبها كل ما شافها..

ابتسم وقال. بضحكه: والله يا هادي شكله جاك بلا العايله!

وكان يقصد بالبلا هو الحب الغريب الي صاب كل فرد من عايلتهم! ..

طلع جواد وصقر لأحد الكوفيهات القريبه من الشركه وجلسوا فيها وطلب لهم قهوه وقطعه حلا لكل واحد فيهم...

كتف جواد يديه وناظر صقر ببرود وقال: والحين علمني وش السالفه من طق طق للسلام عليكم ابي افهم كل شيء وش اللي قالب وجهك كذا..

صقر بضيق: والله ما ادري وش اقول لك ومن وين ابدا لكن يا طويل العمر امي الله يطول بعمرها ويحفظها لها مده ما هي طبيعيه تعبانه وبالها مع الكل ودايم تحاول انها تلم الجميع حولها لكن بطريقه صعبة وقاسيه اول شي انا وزوجتي حاولت كثير انها تخلينا قريبين منها لكن بطريقه غريبه خلت زوجتي تتضايق من تدخلها في أبسط الأمور..
وطلبت بيت لحالها وانا فعلاً شفت انه من حقها يكون لها شوي خصوصية..
ودايم امي عتبانه على الكل، وتبي الكل حولها واحنا والله العظيم ما قصرنا دايم نحاول نكون معها وحولها بس لكل واحد منا اشغاله اول شي انا دايم في هالشركه او في المستشفى واختي متزوجه الله يستر عليها ولها حياتها وزوجها مشغول مو قادر يجيبها كل شوي لنا وامي عتبانه عليها..
ولا اختي الصغيره الله يهديها عاد مجننه امي ، وامي الا ولا تبيها مثاليه ومافيه منها اثنين ما تقدر تغير منها ولا من اسلوبها امي تحبها وتخاف عليها لكن تضيق عليها بأسلوبها..

جواد بهدوء: امك معها حق من ناحيتكم انت وخواتك تبيكم توصلونها وتقعدون معها لاتهجرونها بالذات انها تحس نفسها وحيده بعد موت والدك الله يرحمه حاولوا تكونون معها في كل وقت تقدرون لا تبعدون عنها وزوجتك حاول انك تفهمها تصبر شوي وامك بتفهم وبتترك لكم كامل الحريه، هي بس تبيكم تكونون حولها
ومعها...

صقر: هذا احنا بنرجع للبيت وبيني وبينك والله انه افضل ما ودي اني اتركهم حريم لحالهم وكل وقتي والله اني مشغول وبالي معهم لكن ذيك الفتره طلعت اهلي بيت لحالها عشان المشاكل الي صارت ولأني شفت انها ما غلطت على امي بشي ومحترمتها قلت اطلعها قبل يصير جفاء بينهم وتسوء علاقتهم...

جواد: وانا من رأيي انكم ترجعون لأن وضعك انت استثنائي امك واختك مالهم الا انت ما يصير تتركهم وتطلع لحالك..

اومئ صقر بالموافقه وهو يفكر بصمت..

جواد شرب من كوب القهوه وناظر صقر وقال: خلوكم حولها بخيركم وبشركم وهي بترتاح لامن شافتكم حولها كلكم، واحمد ربك دامها متقبله زوجتك مب مثل امي رافضه حتى تشوف بنتي بعد اخر مره..

صقر وهو يحرك قهوته: يا رجال لخمتهم ماينلامون داخل عليهم ببنتك وزوجتك وتقول هذي زوجتي وابوي اخذ حقه وهذا شي شرعه رب العالمين وزوجتي ماني مطلقها ولا لأحد شي عندي، يا رجال انا لين الحين حافظ كلامك بعد ما علمتني عن الي صار..

ضحك جواد ثم تنهد وقال: والله انها كانت ايام صعبه لكن الحمدلله عدت وقدروا يستوعبون انها زوجتي وماني تاركها لكن لين الحين مو متقبلينها ولايبون يشوفونها لكن الي قاهرني بنتي ودي تعرف اهلها وتشوفهم ماتشوف الا عمها هادي وعمها حمد والباقين كلهم في الديره..

صقر: الله يعين.

سكتوا كلهم وكل واحد يفكر في الي يصير معه وفي حياته الخاصه..

وفجأه قال صقر : لقيت الحل يا جواد!!
جواد ناظره: حل وش!
صقر ابتسم: الي يقلل من المشاكل في بيتنا
جواد تقدم بجسمه شوي للطاوله وهو مبتسم بخفه: وشو

صقر ضحك: امي اكثر مشاكلها مع اختي وعلى جامعتها لذلك انا قررت اخلي اختي تشتغل معي في الشركه البنت ممتازه في هالمجال وتدرسه لكن مالها رغبه في الدوام للجامعه وروتين الطلاب تبي تتحرك وتفعل مهاراتها...
جواد سكت وهو يفكر في كلام صقر
صقر: واذا شافت امي انها ملتزمه بشي يفيدها ومنتظمه عليه بترتاح وبتترك البنت شوي وتخليها في حالها وفي نفس الوقت بتتطمن انها معي وما عليها ضرر...

جواد: والله فكره زينه بس شلون بتلتزم بتعليمها وانت نص يومك معي في المستشفى؟

صقر: هذي ماهي مشكله بدخلها مع الموظفات الجديدات الي يشرف على تدريبهم هادي واختي بتفهم بسرعه عندها خلفيه عن الموضوع كانت تساعدني وتساعد ابوي الله يرحمه..

جواد: والله فكره زينه ومنه بتستفيد الشركه من مهارتها التسويقيه وغيره..

صقر بأبتسامة: بالضبط هذا الي اقصده ابضرب عصفورين بحجر ولاسيما ان اختي دايم تطرح علي الموضوع وودها تتوظف عندي ...

جواد: ابد والله انها فكره زينه وماعليها قول.

صقر سحب كوبه وهو يشرب منه براحه وهو أخيراً لقي الحل الي بيريح راسه..

وجواد يشرب من كوبه ويناظر الرايح والجاي...

_____

في بيت حمدان..

كان توه يصحى على رنين جواله قال بصوت ماليه النوم: من التعبان الي يدق من صباح الله خير..

سحب الجوال وشافه رقم مو مسجل عنده تجاهله ورجع ينسدح بتعب وغمض عيونه وكان بيرجع ينام لولا اصرار المتصل مما خلا حمدان يعصب وسحب الجوال ورد: نعم!

جاه صوت رجال كبير في السن: السلام عليكم
حمدان مسح وجهه وسحب المخده خلف ضهره وعدل جلسته: وعليكم السلام.

المتصل: حمدان؟
حمدان: الله الله وصلت آمرني؟
المتصل: ما يآمر عليك ظالم معك ابو سليمان الـ...

حمدان: حياك الله يا عم.
ابو سليمان: الله يبقيك يابوك قل يا طويل العمر داقن عليك ودي اتكلم معك بموضوع شوف لي الوقت الي يناسبك نلتقي به ونتكلم

حمدان عقد حواجبه: عساه خير
ابو سليمان: خير خير ان شاء الله العلم وانا ابوك دقينا عليك ونيتنا خير وودنا نطلب القرب منكم شوف لك الوقت ونجيك ونتكلم حول الموضوع بشكل رسمي...
اتسعت عيون حمدان وتسارعت دقات قلبه وقال بدون وعي: وش قلت؟

ابو سليمان بأستغراب: عسى خير وش فيه صوتك تغير قلنا طالبين منكم القرب
حمدان شد على يده وقال: بس احنا ما عندنا بنات للزواج يا عمي..

ابو سليمان بأستغراب: شلون ما عندكم بنات للزواج والأهل يعرفون بنتكم وودهم بها زوجة لولدنا وش العلم يا حمدان!

حمدان بعصبيه: يا ابوي الله يرضى لي عليك قلنا ما عندنا بنات للزواج والبنت مخطوبه..

سمع حمدان صوت حرمه بجنب ابو سليمان تقول: يابو سليمان شلون مخطوبه وانا بنفسي سائلتها وقالت مهيب مخطوبه وهي الي عطتني رقم ولد عمها..

تطاير الشرار من عيونه وقفل الخط بوجههم وهو معصب وهمس بغيض: اجل انتي الي موزعه رقمي على الخطاب انا اوريك يا فَي مستعجله على الزواج انتي!! ..

وقف بسرعه وطلع من الغرفه بسروال وفنيله وشاف جده وجدته يتقهوون وقال وهو يحاول يكتم عصبيته: صبحهم بالخير..
الجد والجده: صبحك بالنور والعافيه..

الجده: اجلس وانا امك تقهوى.

جلس حمدان وهو يحاول انه ما يطلع عصبيته قدامهم ويفكر بهدوء شلون يكلمهم عن هالموضوع...

________

يتبع...