رواية انتي ربيع العمر في كل الفصول! الفصل التاسع 9 - بقلم rned 🖤

....

وقف حمدان بخوف وهو يسكتها: تكفين فَي  اسكتي
وش قاعد يصير ياربي اسكتييي

فَي برعب:  حمدان تكفى لا تأذيني حمدان انا بنت عمك عرضك ليه تسوي كذا

حمدان وهو مرعوب اكثر منها كان يترنح بوقفته ويحاول يتكلم لكنه ما قدر..
مد يده يحاول يهديها لكن توازنه اختل وطاح عليها وصرخت فَي ومد يده بسرعه يكتم صوته وقال بصوت مرتجف:  اششش فَي اششش  خلاص خلاص وش قاعد يصير انا وش فيني..

وقف ومسك راسه بقوه وهو يصرخ:  انا وش فيني!؟؟؟

ارتعبت فَي اول ما وصلت لها رائحته وفتحت عيونها بصدمه وقالت بهمس: سكران!!!!؟

التفت لها حمدان وهو يحاول يتزن:  هاه!

فَي نزلت دموعها برعب ويدها على فمها بصدمه تمنع شهقاتها تطلع  اما حمدان فكان يتلفت برعب وهو يحس الدنيا ترميه يمين ويسار..

وازداد رعب فَي وهي تشم رائحته والى الان ما هي مستوعبه ان حمدان من هذا النوع وانصدمت فيه صدمه عمرها ويوم شافته يترنح مو قادر يوقف وقفت وهي تستقوي وبدت تضربه وهي تبكي وتطرده من غرفتها وهي جداً مرعوبه منه وانهدمت  في داخلها قصور الأمان اللي كانت بانيتهم بوجوده معهم في البيت....

ناظرها حمدان وهو ما يدري وش اللي يصير فيه ما يدري وش قاعد يصير ويحس راسه بينفجر من الصداع دفته بكل قوتها الى خارج غرفتها وقفلت الباب وهي تبكي بنحيب  وتستند عليه.. 

وطاح حمدان على الارض وهو يحس انه بيستفرغ في اي لحظه وقفت بسرعه وتوجه لغرفته وجلس على الارض وهو يستفرغ  " وانتم بكرامه"
والألم في راسه بيذبحه...

طاح على الارض ودموعه تنزل وهي يبكي بضعف ما يدري وش فيه ووش اللي صار له وش اللي وصله لهذه المرحله همس بضعف:  يمه! 

بدأ يبكي بضعف وهو في غير وعيه...

اما فَي فكانت طايحه على ارض قريب من السرير وتبكي وضامه رجولها لصدرها وتتلفت برعب خايفه يطلع لها من اي مكان..

وصوت  شهقاتها ماليه الغرفه وخايفه تنام ويتكرر اللي صار....

وهي تحس فعلياً انه هذا الليله ارعب ليله مرت عليها في كل حياتها ،  لان الرعب جاها من اكثر شخص كان يعتبر مصدر امان بالنسبه لها..

___________

الصباح 

صحت غيداء  بكل نشاط وتوجهت للحمام  "وانت بكرامه"  وهي تغسل اسنانها وتغسل وجهها طلعت للغرفه وبدت تتجهز لاهم يوم بالنسبه لها...

خذت عبايتها في يدها وشنطتها وجوالها ونزلت بسرعه من الدرج وهي تركض بأستعجال عشان ما تتأخر على صقر...

نطت من على آخر درجتين وقالت بصوت عالي:  صبـــــــــــاحووو

كانوا جالسين على الطاوله يفطرون وابتسمت امها وهي لأول مره تشوفها صاحيه من بدري..

ام صقر بأبتسامه:  الحمدلله الي خلاني اعيش لين اشوفك صاحيه من بدري...

ضحكت غيداء وجلست معهم وقالت:   ما ابي اصدمك يا امي العزيزه لكن انا للحين مواصله ما نمت..

ضحك صقر وتلاشت ابتسامة ام صقر وقالت بعصبيه: انا ادري ان ما فيك خير..

ابتسمت غيداء وهي تشرب كوب القهوه وقالت:  صقوري انا جاهزه متى ننطلق؟

صقر رفع يده يشوف الساعه وقال:  الحين،  نخلص فطورنا وننطلق  ..
وقفت غيداء تلبس عباتها:  انا شبعانه الحمدلله..

ابتسم صقر وقال:  الله يعين على حماسك ذا. 

تنقبت غيداء وعدلت نقابها وناظرت امها وقالت بغرور:  سيدة اعمال ولا لا؟
قلبت امها عيونها وتقدمت غيداء بفرحه وهي تضم امها من الجنب وقالت:  باي باي يا أحلا ام ادعييي لي..

ام صقر تنهدت  :  الله يوفقك..

غيداء ارسلت بوسه طايره لأفنان وقالت:  باي باي يا أحلا فنونه..

ابتسمت افنان:  الله معك حبيبتي..

صقر مد يده بدراميه وقال:  اختي الجميله مستعده لأول يوم معي؟ 

غيداء مسكت طرف عبايتها وانحت مثل الأميرات ومدت يدها له:  مستعده..

ابتسم لها صقر وهو يضمها ويلفها بذراعه وقال:  استودعناكم الله..

ام صقر:  الله معاكم الله يحفظكم..

طلعوا صقر  وغيداء من البيت وتوجهوا للسياره وغيداء مبتسمة بحماس:  يلا يلا حرك..

ضحك صقر على حماسها الزايد وقال:  بسم الله توكلنا على الله
..

غيداء:  طيب الان انا وش اسوي يوم نوصل لانه للحين انا ماني فاهمه وش بنسوي اول شي...

صقر:  لا تخافين ولا تتوترين انا معك بنوصل وبوريك كل شيء بالضبط...

هزت غيداء  راسها بالموافقه وهي تناظر من الدريشه للشوارع بحماس كبير وما تدري وش بتلتقي في الشركه وما عندها اي فكره انها ممكن تتقابل مع هادي من بعد كل هذي السنين...

ما مر وقت كثير و وصلوا للشركه ودخل صقر بالسياره للمواقف ووقف سيارته..

ونزلت غيداء قبله وهي متحمسه مما خلا  صقر يضحك ويقول:  اصبري وين بتروحين  اصبري شوي..
نزل صقر وتوجه لها ومسكها..

صقر  :  بندخل الحين وبنمر اول شي للإداره الماليه  لأنها تحتاج عده اشخاص ومحاور لإدارتها  من بعدها تتوجهين للمدير التنفيذي الخاص بالشركه هو بيقوم بتسجيل جميع البيانات الخاصه فيك وبتخبرينه انك الى الان طالبه وانك من جهة  الاستاذ صقر وهو بيكمل باقي الاجراءات وبعدها انا باخذك لكل الاقسام وانتي تشوفي القسم  اللي تحسي انك ماشيه معهم متناسقه
افكارك فيه وتبدأين  تشتغلين وتنفذين فيه.. 

غيداء  بحماس:  ان شاء الله كل شيء بيصير تمام

صقر و هو يدخل هو وياها  للشركه قال:  شوي شوي بتتعلمين على كل حاجه وتقدرين انك تديرين شغلك بنفسك بدون توجيهات من احد لكن حاليا بيكون عليك مسؤول لتدريبك وتاهيلك الى ان تصيرين متمكنه من الشغل تماما وعندك معلومات وخلفيه على كل شيء

غيداء:  ومين بيكون هذا الشخص اللي مسؤول على تدريبي؟

قال صقر:  كبداية بنحدد القسم اللي انتي  ترغبين في الشغل فيه وبنشوف من هناك  احد يكون متمكن ويبدا في تدريبك...
هزت غيداء  راسها بالموافقه...

وقال صقر:  لكن اهم شي يا غيداء الانضباط والالتزام وكذلك عدم المساهله في اي شيء وكذلك علاقتك مع الموظفات تكون في حدود الشغل فقط ما ابيك تتدخلين في اي احد ولا تكونين معهم صداقات  شخصيتك المرحه والفرفوشه تكون خارج الشغل تماماً عشان يكون لك كلمتك بين الموظفين وايضا يكون حضورك كانه حضوري انا اذا كنت غايب..

غيداء خذت نفس عميق وقالت:   ابد ولا تشيل هم  أبداً..

ابتسم لها صقر وهو يلقي السلام على الموظفين الي صادفهم امامه وبدا يشرح لغيداء عن بعض الأقسام والمكاتب الي يمرون عليها...

وغيداء مركزه معه بشده وتحاول تحفظ كل شي يقوله لها وتثبت له انها تستحق الشغل معه...

توجهوا للمصعد و ضغط صقر على الزر يوصلهم للطابقه الثاني  وهو ناوي يبدا يعرفها على المكاتب واحد واحد  وعلى جميع الوظائف الموجودة عشان تختار هي وش تبي بالضبط...

انفتح المصعد وطلع صقر وغيداء  منه وبدأ صقر يأشر
لها على كل مكتب..
ويشرح لها عن الموظف الموجود فيه وايش وظيفته وايش اعماله ودوره في الشركه وغيداء  تستمع له  بكل تركيز وتحاول انها تحفظ كل شخص وين هو..

وصل صقر  لمكتب سهى والتفت لغيداء   وقال لها:  هذا مكتب سهى المساعده الخاصه بالمدير التنفيذي للشركه بتساعدك كثير في اشياء انتي  تجهلينهم وأي شي يكون عندك صعوبه فيه او ما تفهمينه وانا مو موجود عندك المدير التنفيذي تسئلينه  واذا ما  حبيتي انك تسالينه  عندك أيضاً مرجع ثاني واللي هي سهى تفيدك باي شي تبينه عندها خبره في المجال وفاهمه فيه كثير ولها كثير معنا في الشركه وفاهمه كل شي...

غيداء هزت راسها بالموافقه وتوجه صقر وغيداء لسهى وألقى صقر السلام بهدوء ووقفت سهى وهي تعدل شعرها وقالت: وعليكم السلام اهلين استاذ صقر..

صقر ابتسم وألتفت لغيداء وقال:  هذي هي سهى..

ابتسمت لها غيداء وقالت:  مرحبا!.

سهى:  اهلين..

بدا صقر يتكلم وهو يبي يعرف سهى على غيداء  لكن تلفونه رن مما خلاه يقطع كلامه ويطلع جواله من جيبه ويرد على جواد :   هلا جواد

جواد بارتباك:  صقر تعال الاجهزه اللي وصلت فيها خلل كبير بتصير لنا مشكله وورطه كبيره تعال بسرعه الحين..

صقرا انخبص وقال:  بسم الله وش صار وش اللي صار؟
جواد هو ماسك راسه:  قلت لك تعال الحين بسرعه قبل يوصل الموضوع للشرطه!!!

اتسعت  عيون صقر وقال:  وش دخل الشرطه!!!

جواد بعصبيه صرخ:  قلت لك تعال الحين وبتفهم كل شي..

صقر بأستعجال :  الحين الحين جايك ثواني مسافه الطريق وانا عندك..

قفل جواد في وجهه وهو ماسك راسه من المصيبه اللي بتطيح عليهم..

صقر:  ادخلي للمدير التنفيذي علميه اللي قلت لك عليه وهو بيكمل كل شي... لازم اطلع الحين...

غيداء بخوف:  وش صار امي فيها  شي!!!؟

صقر:  لا لا مشكله في المستشفى ماله علاقة في البيت انتي الحين ادخلي وكملي الإجراءات وانا جايك بعد ما  احل المشكله  وأعتبري هذا الشي اختبار لك بشوف لو بتقدرين تتصرفين بروحك...

غيداء ابتسمت بحماس وقالت:  مالك الا الي يرضيك..

صقر بأستعجال  :  كفو.
راح صقر  للمصعد واختفى من امام نظر غيداء  اما هي التفت لسهى  بابتسامه وقالت:  وين مكتب المدير التنفيذي؟

سهى ما سئلت عن اي شي ورفعت يدها واشرت لها على المكتب:  هذا هو..

غيداء بهدوء:  مشكوره

عدلت   غيداء  نقابها وتوجهت للمكتب ودقت الباب بهدوء وجاها  صوت رجولي من الداخل:  تفضل..

خذت نفس عميق وفتحت الباب ودخلت...

______

في بيت حمدان 

مرت عليهم ليله جدا كئيبه ومرعبه ما قدرت فَي انها تنام فيها اما حمدان فكان في حاله هلوسه...
مابين بكاء وكلام غير مفهوم والي صار لهم في الماضي يتكرر في باله...

صحى الجد  والجده ما يعرفون عن اي شيء صار..

وجهزت  الجده القهوه وهي مستغربه ليش للحين فَي ما صحت لكنها ما حبت تصحيها..

طلت الجده براسها من الشباك شافت سياره حمدان موجوده عند الباب لذلك عرفت انه موجود في البيت حست بالعطف عليه لذلك ما حبت انها تصحيه وهو نايم اكيد كان في شغل متعب طول الليل.

وجلست هي وشايبها في الصالة يتقهوون وهم ما يدرون عن أي شي صار ولا سمعوا شي...

_____

في الشركه..

دخلت غيداء للمكتب وقالت:  السلام عليكم..

هادي بهدوء:  وعليكم السلام تفضلي..

تقدمت غيداء بخطوات هادئه وجلست مقابل له ولاهي تعرفه ولا هو يعرفها  .
هادي كتف يديه وقال:  تفضلي كيف اقدر اخدمك..

تحنحنت غيداء تحاول تخفي توترها وتتذكر وش قال لها صقر..

بينما هادي ساكت وينتظرها تتكلم..

غيداء خذت نفس عميق وقالت  :  أنا جايه عشان الإنترفيو..

هادي:  اها اهلين فيك

غيداء:  شكراً  .

هادي:  طيب حدثينا عن نفسك
ليه  تبين  العمل في هذي الشركة؟
ووش الي يخلينا  نختارك من بين المتقدمين؟ 

غيداء بلعت ريقها وحبت انها ما توضح له انها جايه بوساطه وقالت:  اول شي ابي العمل في هذي الشركة لأن سمعتا زينه والعمل فيها مكسب كبير لي وبتنمي مهاراتي التسويقيه وكذلك قدراتي التجاريه...

هادي هز راسه وعجبته الإجابه:  زين ليه نختارك من بين كل  المتقدمين؟  وش الي يخليك تتأهلين؟

غيداء في نفسها (عشانها حقت اخوي)  تحنحنت وقالت:  ما احب اني اتكلم عن قدراتي وامدح في نفسي كثير لكن لو ما باخذ من وقتك كثير عطني مهمه او اختبرني وبتشوف لو انا استحق او لا...
ابتسم هادي وقال:  تمام ممتاز طيب ليه تركتي عملك السابق؟ أو ليه  تبين  تتركينه؟

غيداء:  ما قد سبق لي وتوظفت هذي بتكون اول وظيفة لي...

هز راسه بالموافقه ومد يده وقال: تمام تفضلي عطيني السي ڤي تبعك!.

غيداء تورطت وقالت:   مـا ما عندي سيڤي!

عقد هادي حواجبه وقال: نعم!؟  اجل كيف تبين تتوظفين عندنا!!

غيداء عضت شفتها وخذت نفس عميق وقالت:  انا  للحين طالبه وانا من طرف الإستاذ صقر...

سكت هادي وهز راسه بالموافقه وفهم الموضوع اخذ كوب القهوه ورفعه بيشرب  وقال بهدوء:  طيب وش اسمك وكم عمرك  ووش تدرسين...

غيداء بهدوء  :  اسمي غيداء منصور الـ"""...

اتسعت عيون هادي وكح بقوه ونزل كوب القهوه وبدأ يكح بقوه وهو يحس القهوه دخلت لرئته..

ووقفت غيداء بخوف:  استاذ انت بخير؟
لف هادي بالكرسي للخلف وهو يكح بقوه وسحب له منديل وهو يمسح وجهه...

وهو فاتح عيونه بصدمه وخايف يلتفت ويشوفها ويحس قلبه بيطلع من مكانه من سرعة نبضاته.

غيداء بتوتر:  استاذ انت بخير؟

رفع هادي راسه وبلع ريقه وكح ومسح وجهه والتفت ببطئ بالكرسي ودقات قلبه متسارعه..

رفع راسه لها والتقت عيونها في عيونه بخوف وقالت بتسائل :  صار لك شي؟.

هادي كان متنح فيها  بدون كلام وما يدري هي وش تقول  ..

غيداء فركت يديها بتوتر وقالت:  صار شي؟

هادي رفع حواجبه بأستدراك وبلع ريقه وقال:  هاه!؟

غيداء سكتت وما عرفت وش تقول

هادي وهو يحس ان قلبه بيطلع من فمه وقال:  تفضلي تفضلي اجلسي العفو منك حادث بسيط..

غيداء جلست وهي ما تعرف وش تقول تخاف تقول شي وتهبب بالكلام..

اما هادي رفع راسه مره ثانيه وهو يناظرها بصدمه مو مستوعب انها قدامه الحين!!..

نزل عيونه للملفات الي أمامه وقال:  وش وش قلتي اسمك؟

غيداء بهدوء:  غيداء منصور الـ....

ابتسم هادي غصب عنه ولف الكرسي وعطاها ضهره وهمس:  اهدئ يا ولد اهدئ خذ نفس عميق اهدئ  اذكر الله وش فيك..

غيداء عقدت حواجبه وهي ما تدري وش قاعد يبربر..

هادي التفت لها بقوه والإبتسامة شاقه وجهه وقال:  حياك الله..

توترت غيداء وفي نفسها ( بسم الله هذا وش فيه!):  الله يسلمك..

هادي ودقات قلبه يحس انها بتفضحه ويده ترتجف:  ءءء كم..  كم عمرك..

غيداء:  اثنين  وعشرين 

ابتسم هادي وهز راسه:  العمر كله.

غيداء في داخلها ( لا يشيخ!) 

هادي وهو يحوس مكانه مايدري وش يقول:  ءءء من الي قال لك تجين مكتبي..

غيداء:  اخوي

هادي بأبتسامه:  صقر!؟
غيداء هزت راسها بالموافقه
وهادي يحس انه شوي وينط يضمها قال ويده ترتجف والأبتسامه شاقه وجهه:  طيب وش اسوي لك وش قال لك؟

غيداء عقدت حواجبها وقالت:  مدري قال ادخلي للمدير التنفيذي وعلميه انك من جهتي وهو يدري وش يسوي..

هادي ضحك بأرتباك:  اي صح انا ادري وش اسوي...

غيداء كانت تناظره باستغراب
وهادي بلع ريقه: وش اسوي يعني!!

غيداء كانت ما تدري وش صاير وتناظره بأستغراب..

هادي ضحك بأرتباك:   اي صح صح بتتوظفين عندنا؟

صدت غيداء بوجهها بسرعه وهي تكتم ضحكتها وفي نفسها ( بسم الله هذا وش فيه!!)..

هادي وقف بسرعه وقال:  ءء وش تبين بالضبط تدخلين..

غيداء بأبتسامه  وضحت على عيونها:  ما أدري انت اختبرني وشوف وش يناسبني..

هادي قال: ءء  أجل تعالي بمر فيك على الأقسام وبختبرك وبشوف..

وقفت غيداء  وهي مبتسمه بهدوء ومستغربه من حركاته...

توجه هادي للباب وفتحه وغيداء خلفه وهو يحس بدقات قلبه متسارعه ومو مستوعب انها خلفه وصارت بهذا الكبر وصارت حرمه!! 

الى الحين موو قادر يصدق  ...

وقف امام سهى وقال: سهى انتي بيتم نقلك لقسم ثاني..

عقدت غيداء حواجبها بأستغراب وكذلك سهى قالت بصدمه:  ليـــه!!

هادي ناظر غيداء وبلع ريقه وناظر سهى وقال:  هذي الأستاذة غيداء منصور اخت الأستاذ صقر منصور ومن اليوم هي مساعدتي الخاصه..

غيداء فتحت عيونها بصدمه: مساعدة وش انا للحين متقدمه..
هادي ناظرها وقال بكذب وهو منخبص : ءءء اي صقر قال اخليك تحت إشرافي  لذلك انا الي بدربك...

سهى بقهر:  ليه انا قصرت بشي؟؟

هادي:  لا لا ما قصرتي ما شاء الله عليك شغلك ممتاز لذلك بيتم نقلك لقسم ثاني يحتاجك اكثرر.
.

سهى بقهر:  استاذ هادي!!

فتحت غيداء عيونها وكأنها تعرف هالأسم!!؟؟..

هادي ابتسم وناظر غيداء بيشوف ردة فعلها رفعت غيداء راسها له والتقت عيونها المتسعه بعيونه  ودققت النظر فيه  ..

وهو مبتسم ببلاهه وينتظرها تعرفه  ...

شهقت غيداء بقوه ورفعت يدها لفمها بصدمه وهادي ضحك ببلاهه وهو يحس انه مشتت ما يدري وش يسوي...

سهى بقهر:  استاذ هادي وش قصرت فيه.؟؟

هادي ماسمعها وهو مبتسم ويناظر غيداء الي مصدومه وتناظره...

بلعت ريقها اكثر من مره وقالت بورطه:  استاذ هادي!

هز راسه ببلاهه وهو مبتسم..

انقهرت  سهى من قراره المفاجأ وناظرت غيداء بقهر

غيداء بتوتر وهي تحس ان معدتها صارت توجعها:  ءءء... انا انا برّد على جوالي..

راحت بسرعه مبتعده عنهم وهي تستعجل بخطواتها وقلبها يدق بسرعه ومتوتره .

اما هادي كان طاير  من الفرحة فيها وتارك سهى تحتج على قراره ودخل للمكتب وهو يضحك بعدم إستيعاب وهو يتذكر شكلها وكيف انها متغطيه عكس الماضي!..

ضحك أكثر وهو يناظر المباني ويحس الدنيا أخيراً ضحكت له!
وبدأ ربيع العمر يزهر في طريقه ...

أخيراً صار اللقاء!

أخيراً شافها!..

اخيراً حملتها موجة الصدف له!.

اخذ نفس عميق وتنهد براحه وهو يرفع يده لصدره يهدي قلبه...

أما غيداء طلعت من الشركه وهي ترتجف وردة فعله تتكر في بالها ومصدومه من تغير شكله..:  يا ويلك يا غيداء يا ويلك  .

جلست على أقرب كرسي وهي ترفع يدها لقلبها تهديه وفجأه ضحكت بعدم إستيعاب للي صار وهي تتذكر ملامح وجهه وصدمته يوم عرفها...

يالله وش الي خلاهم يجتمعون من بعد كل هالوقت !! 
يالله شلون بتقدر تناظر في وجهه من بعد ماضيها الحافل بالفشايل!!!....

غطت وجهها بيديها وهي متفشله وتضحك بأحراج من كل شي يصير..

____ 

في الديرة..

طلع مسفر من بيت أهله والتقى في ود الي جايه ومعها ولدها رفع نظره وناظرها وهو يحس بقهر يسكنه وحيره وتشتت..

ود بعتب:  مسفر وش فيك ما جيت..

مسفر تنهد وقال:  انا انا بطلع عندي شغل مهم..
ود:  وانا؟
مسفر صد بوجهه :  خليك عند اهلي لين أرجع ماني متأخر..

ود:   زين ابوي يبي يكلمك..

مسفر بعصبيه:  قلت لك مشغول ماني فاضي يوم ارجع بشوفه.

قالت ود بعصبيه:  وش فيك من يوم رجعنا وانت متغيرر؟؟ 

مسفر:  ود تراها واصله معي لين هنا... ادخلي عند اهلي او روحي لأهلك لين ارجع من شغلي...

هزت ود راسها وهي زعلانه من عصبيته عليها لأول مره..

ودخلت للبيت وهو توجه لسيارته وحركها بسرعه طالع من الديرة...

في اللحظه الي جاء راجح وهو يركض ومتلهف يشوف صديق عمره مسفر وقف على الباب ودقه بسرعه وهو يلهث من الركض..
انفتح الباب وتراجعت زهور وقالت:  من؟
راجح بلع ريقه وقال:  انا راجح وين مسفر..
زهور:  طلع الحين من الديره..
راجح بصدمه  : لا تكفون راح.؟؟
زهور:  لا بيرجع بس صار له شغل   .

راجح هز راسه وهو يتنفس بسرعه وتلفت في الديرة وهمس:  تكفى يا اخوي تعال..

راح راجح راجع لشغله وهو يناظر مدخل الديره لعل مسفر يرجع في أي لحظة...

____

فاهد..

كان في مدرسه جواد ويسئل المعلمين عن مستواه وهو فرحان في ولده الي يتباها فيه قدام اصدقائه..

المربيه:  ما شاء الله عليه الولد ذكي ومؤدب..
ابتسم جواد بسعاده وناظر ابوه بفرحه..
فاهد ابتسم لجواد وضمه:  اي ولدي شاطر وذكي..

المربيه بأبتسامه:  الله يحفظه لك..

فاهد:  يارب.... يلا وانا ابوك انطلق لمكانك وانا بطلع وبرجع اخذك نهاية الدوام..

هز جواد راسه بالموافقه وتوجه لمكانه وفاهد مبتسم له ويناظره...

وشكرهم فاهد على أهتمامهم وطلع من المدرسه وتنهد وتوجه لشغله...

______

في المستشفى..

صقر بصدمه:  انت وش قاعد تقول!!!

جواد مسك راسه  :  مدري وش الي صار

صقر:  مستحيل انت وش قاعد تقول الحين تدق عليهم وتشوف وش الي صاار.

جواد بقهر صرخ: ادق عليهم ما احد يرد لعبوا فينا يا صقر لعبوا فينا..

صقر بخوف  :  وهالبلا الي في الأجهزه وين نوديه؟

جواد بتوتر وهو يحس انه بيفقد اعصابه:مدري مدري

صقر:  انا من رأيي نبلغ الشرطه..

جواد:  انهبلت؟؟  اكيد في احد يبي يدمرنا انا متأكد يا صقر متأكد لكن اسمعني انا خايف الحين على بنتي هي في مدرستها وانا مقدر اطلع من هنا لا أنا ولا أنت والزفت هادي ادق عليه ما يرد..

صقر: وش دخل بنتك!؟

جواد مسك راسه:  مدري مدري خايف انا متأكد مصيبه بتصير...

صقر بخوف:  اذكر الله وانا اخوك انا الحين بدق على اختي هي استاذتها بخليها تمنع طلوعها مع اي احد..

جواد هز راسه:  وانا بدق على حمد مالي الا هو يروح ياخذها..

صقر هز راسه وطلع جواله وهو يدق على هديل...

اما جواد طلع جواله ودق على حمد..

وعينهم على الأجهزه الي دخلها لهم احد مليانه مخدرات!!..

يتبع...