رواية انتي ربيع العمر في كل الفصول! الفصل الثاني عشر 12 - بقلم rned 🖤

...

جواد ناظر صقر وهو يعيد يقرأ الأسم من جديد..

صقر تنهد وقال:  مصيبه جديده...

جواد جلس على أقرب كرسي ومسك راسه: يالله!.

صقر:  وش بتسوي

جواد وقف وهو يتنفس بسرعه:  مدري مدري انا طالع احس اني انخنقت..

صقر سكت وهو يشوف جواد يطلع بسرعه مو قادر حتى يناظر حمدان...

الي اخذوه الممرضين للغرفة وعطوه مهدئ ورجعو له كانيولا جديده و فَي واقفه وهي تحس الدنيا تدور فيها..

صقر انتبه عليها وراح لها:  اختي؟
فَي رفعت راسها له

صقر:  غيداء كانت معك؟
اومئت وهي مو قادره تتكلم
طلع صقر جواله يدق عليها وهو يحس ان في اشياء كثيره مو مفهومه..

غيداء خافت يوم شافت اسم صار وبلعت ريقها وناظرت حولها ما فيه احد بس هي في السياره..

اخذت نفس عميق وردت:  هلا صقر

صقر بهمس حاد :  انتي وينك صديقتك هنا ووش سالفة حمدان ليه ما عندي خبر انه من آل فارع؟؟!!!

غيداء تنهدت:  صقر تكفى سالفه طويله بنقعد وبعلمك
صقر:  وينك؟

غيداء بلعت ريقها وقالت وهي تغمض عيونها تستقبل صراخه:  عند الشرطه قدمت دليل براءة حمدان..

اتسعت عيونه وقال بعصبيه:  وشششش!!  عند مين؟؟؟ جايك الحين وبنتفاهم.

غيداء بتوتر:  لحظة صقر انا...

قفل في وجهها وتأففت غيداء  وانفتح الباب ودخل هادي وغيداء فتحت الباب وطلعت من السياره ناظرها بأستغراب وقالت بتوتر:  صقر جاي
هادي: زين؟
غيداء:  بـ.. بيعصب اذا شافني معك..

سكت هادي وتوه يستوعب الي يسوونه!! ناظرها 

هادي نزل من السياره وقال:  طيب انا بكلمه.

غيداء نزلت راسها:  لا وش بتقول له
هادي: الصدق
غيداء ناظرته وتسارعت دقات قلبه:  انا سمعتكم وفزعت معكم الموضوع مو بسيط ولا لعبه هذي حياة رجال كان ممكن يروح فيها لولا الله ثم تعاونك..

ابتسمت غيداء غصب عنها وصدت بوجهها وفي نفسها
(هذي الناس الذوق الي تقدر المواقف)..

ابتسم هادي بهدوء وهو يشوفها صاده عنه يالله وشلون ابسط حركه منها كفيله انها تخليه مبتسم ودقات قلبه سريعه!.
وش ذا اليوم العجيب من اوله! 
صدق ان دخولها لحياة الشخص تنعشها وتغيرها 180 درجه...

وين كان الصبح قاعد في أمان الله على كرسي مكتبه ووين صار الحين واقف على باب الشرطه معها!...

هادي:  غيداء..

تسارعت دقات قلبها ورفعت نظرها له
هادي شتت نظراته وما يدري وش يقول كان يبي بس يتأكد انها موجوده يبي بس يتأكد انها تسمعه..

نزلت غيداء نظرها ليدها وهي تفرك اصابعها تخفف توترها...

وصلت سيارة صقر وبلعت غيداء ريقها بخوف ولاحظ هادي  وهي عدلت وقفتها وتقدم هادي وهو يبادر بالكلام قبل يبدأ صقر  ويعصب عليها..
هادي بقهر:  شفت يا صقر شفت القهر؟؟!!
صقر بصدمه:  هادي! وش تسوي هنا. 

هادي بتمثيل مسك راسه وقال:  انا شوي وأنجن يا صقر شوي وانجن بالصدفه تخيل اعرف ان عندنا عيال عم وعندهم عيال طايحين في مشاكل الأرض واحنا يا غافلين لكم الله!!

صقر عقد حواجبه وناظر غيداء الي واقفه وتشتت نظرها قال:  غيداء على السياره..

راحت غيداء بسرعه للسياره وصقر التفت لهادي الي لازال يمثل دور المعصب والمقهور..
صقر مد يده وربت على كتفه: اهدأ وانا اخوك تنحل انا مثلك ما دريت الا الحين واختي تدري عن الموضوع من زمان ما علمتني ...

هادي بقهر:  ايه ايه قالت لي بنت ابن  عمي على السالفه والله ان اختك ما قصرت الله يكتب اجرها بنت رجال والله مارضت بالظلم وبفضل الله ثم فضلها قدرنا نعرف ونطلع الرجال المسكين  .

هز صقر راسه وقال:  يلا تبي شي بوصلها البيت وبرجع..

هادي يفرك جبينه بتمثيل للصداع:  الله معك..

اقفى صقر عنه ونزل هادي يده وهمس:  اللهم اني استودعتك مستقبلي لا يصير له شي.

تنهد هادي وهو يشوف سيارة صقر تبتعد وراح هو الثاني لسيارته متوجه للمستشفى...

__

" غيداء "

ابتسمت بهدوء وهي تسند راسها على الشباك وتناظر الناس وتتذكر كلامه مع صقر وكيف انه أنقذ الموقف كله..

فزت على صرخة صقر:  وش موديك للشرطه؟!!!

بلعت ريقها وقالت:  بسم الله نقزتني

صقر بعصبيه: فهميني كل شي الحين انتي تبين تجلطينيييي؟؟؟  وش ذا التصرفات الطايشه يا غيداء وش دخلك فيهم!!!..

غيداء:  هدي وش فيك
صقر بعصبيه رفع يده وهو يبحث على شي يرميها فيه:
وششش صار اقول لك

غيداء: طيب طيب بعلمك  .... فَي ولد عمهـ...

صقر بمقاطعه:  ادري فَي وولد عمها حمدان متعاطي.
غيداء:  لا مو متعاطي في واحد متهاوشين معه وقرر ينتقم من حمدان وعطاه ذا البلا مدري شلون.

صقر بصراخ:  وانتي وش عرفك فيهم وش دخلك ليه لازم تدخلين نفسك بكل شي!!!؟؟

غيداء:  صقر تكفى اصبر لا تصارخ بفهمك..

همست بداخلها وهي تطقطق  ( لا تصارخ علي لا تصارخ علي)  ..

صقر شد على الدركسون:  فهميني يا استاذه غيداء كل شي ابي افهمه تفهمين؟  كل شي!..

غيداء:  طيب كنت في الشركه اتدرب و فَي دقت علي وهي تبكي وقالت كل شي و هادي اقصد الأستاذ هادي
سمع وعرف كل شي...

صقر: و وشلون طلع طلع برائة؟

غيداء بحماس:  الرجال الي معطيه هذا البلا ارسل له مسج يبتزه..

صقر شد على يده وقال: وليه ما علمتيني من قبل عنهم انهم من آل فارع  .

غيداء نزلت عيونها:  رغبة فَي..

صقر بقهر:  فَي هذي الي تدخلك في المصايب...
غيداء:  حرام عليك يا صقر والـ...

صقر بمقاطعه وعصبيه:  حرمة عليك عيشتك انتي وياها انتو مصايب مصايب اسمعيني زين خروجك مع هادي والله والله ما يتعدى لك والله...

غيداء شدت على يدها بقهر وصدت بوجهها..

صقر وهو يتنفس بسرعه:  انسي موضوع الشركه

غيداء التفتت له بقوه:  لا صقر تكفى ماله دخل..

صقر بعصبيه:  الا له دخل شركة ماعد فيه بتبقين في البيت ولا تداومين جامعتك هذا اول يوم وطلعتي لما مصايب من تحت الأرض..

غيداء برجاء :  لا صقر تكفى  كل شي الا الشركه ترى ما غلطت والله البنت تحتاجني واستنجدت فيني مالها احد. 

صقر:  انتهى انا ماني جاي اطق لي بنت بكبري وانتي تعرفين هالشي مو من طبعي لكن انتي تحديني اتصرف معك يا غيداء بصرامه..

غيداء برجاء: صقر تكفى..

ما رد صقر عليها وهي تترجاء فيه...

لين وصلوا للبيت التفت لها بعصبيه:  خلاص قلنا انتهى

طلعت غيداء من السياره بقهر ودخلت للبيت ولحقها صقر وهو معصب وقال:  والله ما عاد تروحين غير اليوم تفهمين..

وقفت ام صقر و افنان بصدمه:  وش فيه؟

صقر بعصبيه:  بنتك ذي بتجنني بتجنني..
ابتسمت ام صقر بشماته وقالت:  قايله لكم لكن ما تصدقوني مالها معك ساعتين وهذا انت تصارخ منها. 

صقر بصدمه:  مو صاحيه مو صاحيه حتى الميت طلعت كل فضايحه..

ماقدرت افنان تكتم ضحكتها وجلست وهي تضحك.
غيداء بقهر:  الله لا يرحمه من ميت ترى بسببه حياتهم متدمره...
صقر:  وانتي وش دخلك

غيداء صدت بوجهها وقالت ببرود:  الساكت عن الحق شيطان اخرس..

اتسعت عيونه وسحب عقاله وقال:  الساكت عنك والله الي شيطان...
ركضت غيداء بسرعه للدرج تهرب وافنان تضحك وهي تشوفها تهرب وصقر يلاحقها...

دخلت غيداء بسرعه غرفتها وقفلت الباب وهي تضحك..

وصل صقر وضرب الباب بقهر وقال:  انا اوريك

كانت تضحك وهي ترمي شنطتها ونقابها وعباتها وانسدحت على السرير وابتسمت بخفه وهي تتذكر هادي: والله وصرت حليو يا هادي.. وجع انا وش قاعده اقول..
وقفت بسرعه وهي تروح تغير ملابسها. 

___
نزل صقر للصاله وهو يعلمهم وش سوت وهو مصدوم منها:  عايله باكملها خبصتها وطلعت لهم اقارب..

افنان:  بس يا صقر والله ما سوت شي غلط

صقر بغيره:  تطلع مع هادي ليه تبيني اذبحها..

افنان:  طيب ادري انه غلط هذا بس الموضوع مختلف يعني كانت مضطره.

صقر:  مافي شي اسمه مضطره عندها السواق

افنان قلبت عيونها:  على اساس السواق مو رجال يا صقر؟  ،  قول عشان هادي انت تعرفه...

صقر سكت بعصبيه وهو ما يبي يجادل.

افنان:  والشغل طيب تراها تشتغل معه.

صقر: الشغل مختلف شغل شغل عشرات الموظفات والموظفين اما انها تطلع معه لحالها في سيارته اكسر رجولها والله. 

تنهدت افنان وقالت:  انا بتكلم معها..

وقف صقر:  انا بطلع لهم بشوف وش صار بعد ما جابت لهم المصايب...

هزت راسها بالموافقه اما ام صقر كانت ساكته وهي تفكر..

______

في المستشفى...

كانت فَي جالسه بضياع على واحد من الكراسي ما تدري وش تسوي ولا وش تتصرف الدنيا تشتت في نظرها.. 

وصل هادي وانتبه عليها جالسه تحنحن وتلفت يبحث عن جواد وشافه جاي من اخر الممر وهو بلبس الدكتور..

توجه له هادي وقال:  جواد
جواد تنهد وقال:  دقيت على اخواني وعلمتهم..
هادي: وش قلت لهم
جواد:  علمت فاهد وقال بياخذ اخواني كلهم وبيجي وبنروح لعمي..
هز هادي راسه بالموافقه وقال: وذول تكلمت معهم؟
جواد هز راسه بالرفض:  للحين الولد ما صحى..

هادي:  والبنت؟
جواد ناظرها:  ما كلمتها للحين..
هادي:  من رايي تكلمها وتطمنها وتفهم منها كل شي..
هز جواد راسه وقال بهمس:  الحين عندنا مصيبه كيف نتصرف فيها..

جاء صقر وتقدم منهم:  السلام عليكم.

هادي وجواد: وعليكم السلام.

صقر: وش صار
جواد:  لا جديد الحين احنا نفكر في البلا الي في المخزن وشلون نتصرف فيه. 

ابتسم هادي وقال:  لا تسوون شي
جواد:  تستهبل انت؟  خل نتصرف قبل تدري الشرطه عن شي..

هادي:  يا رجال خلها تدري

صقر:  انت انهبلت وش فيك؟

هادي ضحك بقوه وقال:  وش فيني؟
صقر ناظر جواد وقال:  الولد طار عقله من الصدمه في عيال عمكم..

زادت ضحكة هادي وقال:  تعيشوا وتاكلوا غيرها ان شاء الله بس عجبكم المقلب..

جواد عقد حواجبه:  اي مقلب. 

هادي غمز: النشا الي في الأجهزه اووه اقصد   المخدرات  الي في الأجهزه..

صقر:  لحظه.. لحظه!!

جواد فتح عيونه بقوه:  يا الـ"""""" والله ما اخليك..

ركض هادي بكل سرعته وهو يضحك بقوه وجواد يركض خلفه وصقر بعدهم والناس يناظرونهم بصدمه! 

وعض هادي ثوبه وصار يركض اكثر طالع من المستشفى وجواد وقف على باب المستشفى وهو يلهث وضحك بقوه وهو يشوف هادي الى الحين يركض

صقر وصل عند جواد وناظر هادي الي صار بعيد عنهم والى الحين يركض ضحك وقال: يقولون وصل الحدود..

ضحك جواد ووقف: والله ما اخليه والله لا اردها له النذل والله..

صقر هز راسه بالموافقه وهو يتوعد في هادي الي موتهم رعب بمقالبه الثقيلة...

تنهد جواد وقال:  خلنا الحين ندخل نشوف الرجال.

صقر:  اي والله افهموا منه وش الي صار معهم..

جواد:  خلنا ندخل

دخل جواد وصقر ووصلوا لمكان حمدان وكانت فَي للحين جالسه وحاقده عليهم وهي تشوفهم يراكضون ويضحكون ولا كأن صاير شي حست بالقهر على حمدان وكثير بعد ذولي عايشن حياتهم وهو عمره راح في تعب شافت جواد يتقدم وواضح انه يبي يكلمها وقفت بسرعه وفتحت باب الغرفه الي حمدان فيها ودخلت بسرعه وغلقت الباب...

جواد ناظر صقر بأستغراب وهز صقر راسه بتفهم..

فَي نزلت دموعها وراحت للكنبه الموجودة في الغرفه وجلست عليها وهي تبكي وضامه رجولها لصدرها...

انفتح الباب ودخل جواد وغلق الباب خلفه وقال: السلام عليكم..

نزلت فَي رجولها وهي تمسح دموعها وتعدل نقابها:  وعليكم السلام..

جواد تنهد وراح لواحد من الكراسي وجلس وقال:  انا جواد بن جراح آل فارع..

صدت بوجهها ودموعها تنزل..

جواد بحزن:  انا حاس فيك وادري بالي في خاطرك لكن والله العظيم مـ....
فَي بهدوء:  ماصار شي احنا متعودين كبرنا وتربينا بدونكم ونقدر نكمل بدونكم انتو مو مضطرين انكم تسوون دور الأبرياء المهتمين..

جواد نزل نظره ليديه وقال:  احنا غلطانين والغلط فينا لكن ان شاء الله انه جاء الوقت الي نصحح فيه الغلط

ضحكت فَي بقهر وقالت:  تصححون الخطأ؟  طيب ناظر هذا الي على السرير هذا ولد عمي هذا هو الي تحمل كل نتائج غلطكم يادكتور جواد..

جواد:  حنا عيال اليوم والغلط كان من آبائنا الحين احنا لزوم نتحد ونـ....

فَي بهدوء:  الكلام مو معي الكلام مع ولد عمي يوم يصحى كلموه انا شوري من شوره..

جواد سكت وهو يشوفها ما تركت له اي مجال يقدر يتكلم...

اما فَي صدت بوجهها ودموعها تنزل وهي تتذكر الصعوبات الي واجهوها في حياتهم والآلام الي عاشوها...

وقف جواد وقال بهدوء:  ما يشوف شر..

ماردت فَي وطلع جواد من الغرفه وهو ضايق ومقهور: وش سويت يبه وش سويت!!..

صقر وقف وقال: وش صار
تنهد جواد وقال:  خل نروح مكتبنا لين يحلها الله. 

___

" فَي"

رجعت راسها على وراها وهي تفكر وتتحسب عليهم..

فتح حمدان عيونه بهدوء وهو يناظر سقف الغرفه الأبيض بصمت وكلامهم يتردد على مسامعه...

رفع راسه بهدوء وسحب يده ببرود وانقطع الي فيها ووقف وفزت فَي بسرعه وهي تناظره...

وقف من على السرير ومشى ببرود متوجه للباب.
فَي بخوف:  حمدان!

حمدان ببرود:  تبين ترجعين البيت تعالي وان ما تبين خليك..

بلعت ريقها ومشت خلفه وهي ترتجف وللحين خايفه منه.

كان يمشي بدون ما يناظر اي شي في المستشفى وانتبهت فَي على حركته شافته شلون يناظر طريقه فقط وكأنه مايبي يشوف النعمه الي هم فيها..

طلع حمدان من المستشفى و فَي خلفه والتقوا بهادي الي كان داخل وقال بأستعجال: وين رايحين..

مارد حمدان عليه وكمل طريقه طالع و فَي خلفه لكن تاركه بينهم مسافة.  .

استغرب هادي ودخل للمستشفى بيسئل جواد وش صار.

اما حمدان و فَي كملوا طريقهم مشي لا جوال معهم ولا فلوس بس يمشون..

حمدان بهدوء: اعتديت عليك؟
فَي بلعت ريقها بتوتر وما ردت..

حمدان هز راسه:  يعني اعتديت

فَي بسرعه:  لا

حمدان  :  ليه خايفه مني؟

فَي بتوتر:  ما... ما تتذكر؟
حمدان: ليه خايفه مني. 

فَي نزلت دموعها:  خوفتني انت
سكت حمدان ينتظرها تكمل كلامها

فَي برجفه في صوتها: دخلت علي الغرفه وخوفتني وكانت ريحتك تخوف...

غمض حمدان عيونه ووقف وهو ياخذ نفس

فَي وقفت مكانها وهي تبكي بصمت.

حمدان بوجع: ذول وش عرفهم عنا وش ودانا لهم؟

فَي ببكاء:  خفت عليك و...
حمدان بقهر:  لييه تعلمينهم ليييه..

ماردت فَي وهي تبكي
حمدان شد على راسه وجلس على الطريق وهو يحس انه بينهار:  يا الله يا الله...

فَي صدت عنه وهي تبكي..
حمدان:  يا الله ارحمني برحمتك    يا رب...

فَي كانت موجوعه حيل موجوعه من منظره ومن الي يصير لهم..

وقف حمدان وهو يمسح وجهه ويكمل طريقه و فَي خلفه..

_____

هادي

دخل للمكتب الخاص بجواد في المستشفى وقال:  ليه طلعوا؟

جواد وقف بسرعه:  رجعت يا حيوان. 

هادي ضحك:  اصبر خل افهمك الحين ليه طلعوا ذولي؟
صقر:  منهم؟

هادي:  عيال عمنا.

جواد التفت له: طلعوا؟
هادي:   اي والله وانا داخل شفتهم طالعين وماردوا علي...

تنهد جواد وقال:   واضح اننا بنتعب كثير. 

هادي جلس وقال:  ياخي واضح عليهم نفسيه..

صقر:  لا تلومونهم
جواد:  مانلومهم والله ما نلومهم حقهم يزعلون حقهم يكرهونا.

صقر بحزن:  والله حالهم صعيب اختي دايم تكلمني اساعدهم.. لكنه عزيز نفس وما يقبل من احد مساعدة..
هادي:  انت تدري وش يشتغل؟

صقر أومئ:  اي يشتغل في ورشه وانا بعد الي متوسط له يشغلونه الولد دمه حار ويعصب بسرعه وما يطول في شغل..
هادي ابتسم وناظر جواد:  دامه يعصب بسرعه تطمنت انه من عائلتنا..

جواد ناظره بنص عين:  انت الي نبي نتأكد اذا انت ولدنا ولا لا دايم مبتسم وفاتح فمك...

هادي: قل اعوذ برب الفلق   ...

ضحك صقر وقال:  كلكم ما فيكم صاحي..

جواد:  اقول لا تمون بس..

صقر وهي يتكي على الطاوله:  للأسف قلتها متأخر  ..
جواد بضيق:  الحين بالي معهم،  ابوي يوم طردهم كانوا ثمانية اتوقع عمي وزوجته وثنتين من بناته واثنين من عياله وحريمهم..

صقر:  عمك وزوجته عايشن لكن عيال عمك كلهم توفوا وبقى عيالهم الي هم حمدان واخته..

هادي:  هي اخته؟
صقر:  لا بنت عمه بس بحكم انهم مع بعضهم يعني اخوان...
اومئ هادي وقال جواد:  شلون توفوا كلهم كذا!؟
صقر:  حادث سير اتوقع مدري اتذكر ان اختي قالت كذا..

جواد سكت شوي ثم قال: الله يرحمهم الحين احنا لازم نلتقي بعمي وبحمدان...

هادي:  وفاهد وش قال لك؟
جواد:  قال بيتحركون هو والعيال وبيجون الليله..

هادي هز راسه:  يعني الليله نروح لهم؟

صقر:  أنا من رأيي تتركونهم الليله يرتاحون بعد المصيبه الي صارت لهم وبعدها تروحون لهم وقت ثاني...

جواد:  حتى انا اقول كذا...

هادي:  من الي كان يبي يتزوج بنت عمي؟
جواد تنهد:  نمر او عساف مدري كنت صغير يوم صارت السالفه ما أتذكر زين..

هادي أومئ وهو يفكر بصمت وجواد مهموم وباله مع حمدان     ....

__

وصلوا فَي  وحمدان للبيت بعد مسافه كبيرة قطعوها ودخلوا للبيت وركضت فَي لغرفتها وقفلت الباب اما حمدان التفت لجدته الي طلعت من الغرفه وهي تبكي وراحت تضمه شد عليها حمدان وهو يغمض عيونه بتعب...

سمع صوت جده يناديه من داخل الغرفه ابتعد حمدان عن جدته وراح متوجه للغرفه الي جده موجود فيها..

تهلل وجه الجد بفرحه وفتح يديه له وراح حمدان وهو يحب راسه وينزل لركبته ويحبها وانسدح بضعف على رجل جده وغمض عيونه...
الجد بخوف:  وش صار لك يا ولدي وش صار!

الجده جلست عنده وهي تمسح على شعره:  خوفتنا عليك يا امي وش الي جاك...
تنهد حمدان وقال بهدوء:  تعبت شوي ولأني كنت مواصل زاد تعبي...

تنهدت الجده وقالت:  قلت لك يمه قلت لك اترك عنك الجهد الزايد وارتاح ما حنا ميتين جوع اذا شفناك بخير هذا اكبر سعاده لنا...

غمض حمدان عيونه اكثر وهو يحاول يهرب من الواقع ولو لدقايق يحاول انه يريح قلبه شوي..

والجده بدت تقرا عليه والجد يتأمله بحزن شديد وهو يشوف تعبه. 

وحمدان يصارع افكاره ما بين أهله وما بين الي سواه في فَي وكيف انه خوفها بدون علمه...

لين غفى على رجل جده..

_______

"فَي"

انسدحت على سريرها وهي تتذكر الي صار اليوم كامل...

ولأول مره تحس بهذا الإحساس تجاه حمدان لأول مره تحس انه فعلاً عانا عشانهم يوم شافت الحياة الي عايشينها عيال الشيخ.  .

وقفت وتوجهت بخطوات بطيئة للدولاب فتحته ودخلت يدها تحت ملابسها وطلعت الفلوس الي عطاها حمدان..

ناظرتها بين يديها ماكنت مبلغ بسيط لا مبلغ كبير وكبير حيل..
للحظة داهمتها الشكوك من وين لحمدان هذا المبلغ؟
لا يكون فعلاً يتاجر في الممنوعات!!.

هزت راسها وهي تتذكر صوت العسكري وهو يقول انه "بريئ " شلون أثبتوا براءته؟  وغيداء وينها ليه اختفت

تنهدت  فَي ودخلت الفلوس كلها تحت الملابس وراحت لفراشها وانسدحت سحبت جوالها الي تركته في البيت ودخلت على معرض الصور ومن بين مجموعة الصور الكثيرة عن الفاشن وعن الموضه وغيره شافت صور من أيام العيد صور صورتها للذكرى، لأول مره يطلعهم حمدان لمكان ويلف فيهم الرياض كلها وقتها كان جالس هو وجده الي على كرسي متحرك وجدته الي تصب لهم قهوة اما فَي فكانت تتمشى بعيد عنهم شوي وقتها رفعت جوالها وبدت تتصور بحيث انهم يطلعوا كلهم في الصوره بدون ما ينتبهون...

بدت تسوي زوم على وجه حمدان وتشوف شلون يضحك مع جدانه تأملت وجهه لثواني وطالت الثواني وصارت دقايق وهي تناظره لين تنهدت وتبعد الجوال شوي عنها وهي تفكر هل هم عائلة سعيدة برغم الحال المادي؟  هل هم مبسوطين برغم كل شي!..

تذكرت الهلع الي جاهم بسبب تعب حمدان للحظه تخيلت حياتهم بدونه لو صابه شي كيف بيكونوا؟ كيف بتكون حياتهم!  وما قدرت تتحمل الفكره وبدت تبكي

ووقفت من على السرير وهي تتوجه لباب غرفتها فتحت الباب وطلعت بخطوات بطيئة وناظرت غرفته شوي وناظرت غرفة جداتها توجهت لهم وهي ناوي تقعد عندهم شوي لين يهدأ قلبها من الخوف..

دقت الباب بهدوء وفتحت وقال:  جده ابي اقعـ...
تلاشت الكلمه من فمها ووقفت وهي تشوفه نايم على رجول جده وجدته تقرأ عليه وتمسح على شعره...
رمشت أكثر من مره وهي تشوف شكله وهو نايم
رفع الجد راسه وشافها واقفه بدون حركة تناظر حمدان

نزل نظره لوجه حمدان وهو يمسح عليه ويفكر في حال حمدان و فَي...

فَي بلعت ريقها وصدت عنهم وطلعت من الغرفه
وناظرت غرفته وتوجهت لها فتحت الباب وناظرتها كيف مكركبه بعد تعبه وتنهدت وهي تدخل لها راحت تفتح كل الشبابيك ودخل النورر للغرفه لأكملها
وتوجهت لسريره وهي ترتبه وطلعت تلبس لها قلفز واخذت أدوات التنظيف ودخلت تغسل أرضية غرفته وترتبها..

خذت ملابسه الي تحتاج لغسل وطلعت من الغرفه وودتهم للغساله ورجعت لغرفته..

تاخذ ادوات التنظيف وتوجهت للمطبخ تشعل لها جمرات لجل تبخر غرفته..

تذكرت جدانها وانهم للحين بدون غدا ولا علاج تنهدت وبدت تطلع الحاجات من الثلاجه وتبدأ تتجهز تطبخ الغداء..

ومع صوت الغساله فتح حمدان المعروف بنومه الخفيف وتنهدت الجده:  الله يهديك يا فَي  صحتك.

جلس حمدان وابتسم بنعاس:  انا بروح انام في غرفتي.

الجده اومئت وهي تشوفه يوقف..

وطلع من الغرفة بخطوات بطيئة وهو نعسان...

بينما كانت فَي واقفه في وسط غرفته وفي يدها البخور وشعرها رافعته لفوق ولابسه بلوزه تصل للركبه بلون رمادي مع بنطلون ابيض..
انحتنت تعدل اللحاف على السرير ودخل حمدان من الباب وتوقفت رجوله وهو يشوفها وقفت بأعتدال والتفتت بتطلع وارتدت على وراها يوم شافته...

صد حمدان بوجهه وانسحب بسرعه من الغرفه و فَي طلعت بسرعه ودقات قلبها تسبقها وركضت للمطبخ..

رجع حمدان يدخل غرفته وعلى وجهه طيف ابتسامة ابتسامة خفيفه لا تكاد ترا..

طار النوم من عيونه ورائحة غرفته الزكيه ردت فيه الروح توجه للدولاب وفتحه وطلع له كم غرض يحتاجهم واخذ منشفته وطلع من الغرفه وتوجه للحمام المشترك للجميع دخل وهو يشوف الغساله شغاله وفيها ثيابه ابتسم بحنيه وهو يحب كل شي تسويه عشانه يحب يوم يشوفها متحمله مسؤولية يحبها يوم تهتم وتلاحظ برغم شخصيتها الدلوعه..
تنهد وقفل باب الحمام وعلق ملابسه وترك الملابس الي عليه في سلة الغسال..
وبدأ يتروش..

______
سمعت فَي صوت الماء وعرفت انه دخل جلست وهي تقطع السلطه بصمت.
______

جمع فاهد  كل اخوانه وحركوا كلهم متوجهين للرياض
بيشوفون عمهم الي الى الآن ما عنده علم.

اما جواد الصغير فكان عند أمه توه واصل..

___

اتصلت فَي في غيداء وفهمت منها كل شي وانقهرت فَي على حمدان وهي تدعي على الي تسبب بذا الشي.

وسئلت غيداء عن جوال حمدان وقالت لها انه مع هادي..

اما معاذ فوصلت له الشرطه واخذوه ولكن عشان مركز ابوه قدر انه يطلع بتعهد..

_____

مرت الساعات
دون شيءً يُذكر مشاعر مختلفة هنا وهناك
ولحظاتٍ مرتقبة للأحداث القادمة...

_

المساء.

وصل جميع أبناء آل فارع بمختلف أنواع سياراتهم وتوجهوا جميعاً لبيت جواد الي كان في إنتظارهم

كانت القهوة ماليه المجلس استقبالاً لهم..

وجواد طالب ألعشاء كامل
اما جود فكانت لابسه اجمل ملابسها وتنتظر دخول أعمامها تستقبلهم..

وقف جواد بأبتسامة هو وهادي  وحمد على باب البيت يستقبلون اخوانهم الي نزلوا من سياراتهم وتوجهوا لهم بشوق يسلمون عليهم واحد واحد

جواد بسعادة:  ارحبوا تراحيب المطر ارحبوووو
فاهد فتح يديه له وقال:  البقى يا عين اخوك.

احتضنه جواد بقوه وهو يسلم عليه وجاء هادي وهو يضحك وضم فاهد وهم يرحبون فيه...

جود صرخت بفرحه:  عمـــــــــو..

كلهم التفتوا لها وابتلشت من تروح له وضحكوا عليها واخذها فاهد في حضنه  وهو يسلم عليها:  وشلون أميرتنا؟
جود بفرحه:  بخير عمو فاهد وين جوادي؟

فاهد ابتسم وناظر جواد الكبير وضحك وقال:  انا اسولف لها عنه..

ابتسم فاهد وقال:  ما قدر يجي معاي عنده مدرسه بس لا جيتي عندنا بتشوفينه وبتلعبون..

جود:  وشو يدرس؟

فاهد بحنية:  صف اول ابتدائي
جود  بأبتسامة:  حتى انا

فاهد:  شاطره واكيد دايم يكرمونك صح؟
جود هزت راسها بالموافقه
وجاء عمها الثاني وهو يضمها ويسلم عليها وهم مبسوطين بسوالفها ودخّلهم جواد للمجلس  وهو يرحب فيهم ويهلّي.

وهادي يصب لهم قهوه وجلسوا وهم يسئلون عن حال بعضهم البعض ويسئلون عن اعمالهم وعن حياتهم وحمد يسئل  عن امه وهادي يسئل عن امه..

وكل واحد يطمن الثاني..

وشوي  وجاء صقر ودخل وهو  يسلم عليهم ورحبوا فيه وجلسوا مع بعضهم  .

وبعدها قال فاهد:  أسلم يا جواد وش العلم؟

جواد  نزل فنجاله وقال:  العلم وما فيه يا طويل العمر انه عمي عجلان لقيناه...

فاهد:  وشلون لقيتوه؟  ووين لقيته؟

جواد: هو  للحين ما شفنا عمي بنفسه بس شفنا ولد ولده،  حمدان بن طلال والظاهر ان الرجال متغربل في حياته وداخلً  له في مصايب لا له فيها حول ولا قوه والحمد لله ساقه  الله لين مستشفانا والله يبارك في اهل صقر هم اللي علمونا عن سالفته كامله والوكاد اهل حمدان واهل صقر يعرفون بعضهم،  المهم يا طويل العمر  والسلامه ونفكه من ذا المشكله والحمد لله طلع منها،  لكن الرجال شايل في خاطره حيل مننا ما قابل ولا واحد فينا اخذ بنت عمه وطلع من المستشفى...

تنهد فاهد وقال:  اييي بالله ما نلومه ما عليه ملام الوكاد انه عاش شيءٍ ما ينعاش لا اهل ولا سند ولا عزوه،  ابوي غلط حيل يوم انه طرد  عمي وطرد اهله من الديرة وتبرى منهم  لكن ان شاء الله ان احنا
بنروح لعمي وبنجبر بخاطره وبنعوضهم  عن السنين اللي فاتت، الا وباقي اهله وينهم؟

جواد: الله  يرحمهم ما بقى منهم الا عمي وزوجته وحفيده وحفيدته اما عياله وبناته كلهم توفى في حادث سير....

فاهد عقد حواجبه:  حادث سير؟.

جواد:  يقولون كذا..

هز فاهد راسه وقال:  الله يرحمهم زين عرفتوا  وين بيتهم ولا لا؟

هادي:  ايه انا اعرفه..

فاهد ناظر اخوانه  وقال:  وش رايكم نطلع لهم الحين ولا ننتظر بكره؟

جواد:  لا وين  تطلع لهم الحين، صلِّ على النبي شف الساعه كم صارت الحين.!  تعشى الحين  وعيّن من الله خير وارتاحوا وبكره الصبح ان شاء الله من بدري نطلع كلنا لبيتهم وما نتحرك منه الا وخاطره طيب وهو راضي علينا في النهايه احنا ما لنا دخل باللي صار في الماضي...

فاهد:  اجل هذا هو الشور ان شاء الله من بكره الصبح   نروح لبيته ونطيب خاطره ونرجعه معنا  لديرته ولحلاله الي أخذه أبوي..

الجميع اتفق مع فاهد  بالرأي ووقف جواد وهو يقول لهم:  حياكم الله اقلطوا على العشاء واعذرونا ان كان به  قصور..

فاهد وقف:  الله يطول بعمرك ما تقصر وانا اخوك خيرك سابق الله يطول عمرك ويزيدك من فضله..

جواد:  اللهم امين واياك، يا بعد  راسي .

وقفوا جميع اخوان جواد وهم يمشون معه للعشاء اللي اكرمهم جواد  فيه وهو فرحان بجيتهم وبزيارتهم لبيته

ودخلوا للصالة الي كان فيها العشاء و جلسوا  وكان محور حديثهم طول الجلسه  هو حمدان وعمهم وهم يفكرون شلون يراضونهم ويرجعون لهم حقهم اللي ضاع من سنوات...

__________

في بيت الشيخ هزاع..

كانت العنود جالسه هي واهلها على طاوله العشاء وياكلون بهدوء وجواد الصغير كان ياكل من صحنه  المخصص وهو يستمع لأمه اللي قالت:  بكره ان شاء الله حفل تكريم جواد المدرسه مرسله  علي وقالت لي انهم منظمين لهم حفل كامل تشجيعي يشجعون فيه الطلاب الممتازين والشاطرين وجتني دعوة حضور..

هزاع بابتسامه:  ما شاء الله تبارك الرحمن شاطر وانا ابوك شاطر..

ابتسم جواد بفرحه وهو يناظرهم ببراءه..

وقال اخو العنود  بتشجيع:  ما شاء الله عليك ممتاز وعيالي ان شاء الله بيكبروا وبيصيرون مثلك شطورين ويتكرمون..

جواد بحماس طفولي:  كل اصدقائي بكره ان شاء الله  بيجتمعون في الحفل وبتشوفينهم يا ماما..

ابتسمت العنود وميلت راسها  بحنان وقالت: اكيد ان شاء الله ابجي معك بكره وبتعرف عليهم كلهم بشوف منهم اصدقاء ولدي الشطورين واللي اخلاقهم حلوه ودائماً يسوون الخير هم وياك...

جواد:  كلهم شطورين ودائماً التتشر تقول لنا انه دائماً نشوف المساكين اللي يكونوا موجودين ونساعدهم وكمان تقول لنا انه نركز على دراستنا وعلى واجباتنا وانه دائماً نكون بارين بأمنا وأبونا عشان ربي يرضى علينا..

العنود ابتسمت وقالت:  الله يجزاها خير هالأستاذه ما قصرت ودايم تعلمكم الحاجات الحلوه وانتوا لازم تكونون شطورين وتحترمونها ومؤدبين ملتزمين بواجباتكم  وتهتمون بدروسكم لانه هي قاعده تتعب عشانكم وعشان توصّل لكم المعلومات فانتم لانكم حبوبين و تحترمونها لازم تهتمون بدراستكم...

جواد هز راسه بالموافقه وهو ياكل..
و كان هزاع مبتسم لبنته وابنها  وغايه زوجه اخوها قاعده تسولف مع عيالها وتسولف مع امها وهم  يبتسمون لسوالف الصغار ويتكلمون معهم  لين قال جواد هو يرفع راسه عن الاكل:  ماما..

العنود:  لبيه يا عيوني وش تبي؟

جواد بتردد:  بكره تكريمي وانتي  حتجين للحفل بس... بس بابا ما حيجي صح؟

سكتت العنود ونظرت اهلها ثم نزلت الملعقه وقالت:  شوف يا ماما احنا تكلمنا عن هالموضوع من قبل..

جواد بغصه:  بس يا ماما انا.. انا ودي يكون  بابا معانا ودي انه  يشوفني وانا اتكرم  ،  كل اصدقائي ابوهم وامهم يجون ليش انا لا؟

العنود حسيت انها بدت تعصب فقالت وهي تاخذ نفس:  جواد يا ماما وش قلنا على هذا الكلام؟  اذا انا موجوده ما يحتاج  وجود ابوك  خلاص صح ولا لا؟

اهتزت شفته  دليل انه بيبكي:  بس انا ودي انه بابا يكون معانا عشان يشوفني!.

العنود غمضت عيونها تصبر  نفسها وقالت:  جواد!!!

هزاع تحنحن عشان ينبهها انها لا تعصب على الولد..
وتنهدت وسكتت..

اما جواد فناظر امه وهو يحس انه شوي ويصيح مره ثانيه..

العنود بحنيه:  جواد يا ماما انت ابني الشطور  وفاهم وتدري انه ما يصير،  بعدين.. بعدين ابوك يمكن يكون مشغول يمكن يكون عنده شغل ما يقدر يجي،  بس هذا انا موجوده ابجي معك بكره و بجيب لك الهدايا وبنتصور وبصورك وابتعرف على اصدقائك وبننبسط و مره ثانيه ابوك يكون موجود ما هي مشكله يا ماما لا تزعل نفسك..

نزل جواد راسه للطاوله وهو ياكل بصمت ومدت  العنود يدها وهي تمسح على راسه  بابتسامه حنونه
ناظرها وأبتسم في وجهها بهدوء وكمل اكله وبعدها وقف وقال:  الحمد لله شبعت بروح اغسل اسناني يا ماما والبس بجامتي وانام...

ابتسمت العنود وقالت:  شطور يا ماما يلا روح البس ونام وانا بخلص اتكلم مع جدك وبجيك تمام حبيبي؟

هز  جواد راسه بالموافقه وراح عنهم لغرفته

أما هزاع التفت للعنود وقال:  وش هالاسلوب مع الولد؟ 

تنهدت العنود وقالت  :  ما ادري بس عصبت شوي..

ناظرها هزاع بنظرات فهمتها و قالت: اعتذر..

هز راسه وكمل ياكل وهي جلست تكمل اكلها وهي تفكر في كلام جواد..

اما جواد فطلع من غرفته وتوجه لغرفة  امه واخذ جوالها وركض بسرعه لغرفته وسحب الكرسي وطلع من عليه وقفل الباب وراح لسريره وجلس وهو يفتح الجوال ويبحث على رقم ابوه ودق عليه..

كان ماسك الجوال بيديه  الصغيرتين وينتظر رد من ابوه وهو جالس على السرير...

___

عند فاهد كانوا جالسين على العشاء رن جواله وطلعه بيده  الشمال من جيبه وشاف اسم العنود  نفض يده من الاكل ووقف:  الحمد لله كثر الله خيركم  .

انتبهوا كلهم على جواله وسكتوا لانهم يدرون اكيد انه ولده اللي يدق عليه..

طلع فاهد عنهم وفتح الخط ورد:  هلا حبيبي..

  جواد بصوت باكي:  بابا..

فاهد توقف وقال:  جواد وش فيك ليه تبكي؟

جواد وهو يبكي:  بكره يا بابا حفل تكريمي انا والطلاب الممتازين وبيسووا لنا حفل كلنا...

فاهد ابتسم وقال:  طيب وين المشكله هذا شيء يفرح ليش زعلان يا بابا ليه تبكي؟!.

جواد ببكاء:  عشان... عشان كل اصدقائي امهم وابوهم موجودين وانا لا..

غمض فاهد عيونه وقال:  جوادي حبيبي..

جواد وهو يبكي: بابا الله يخليك تعال ابيك تشوفني وانا ممتاز..

فاهد تقطع قلبه من صوت بكاه:  جواد حبيبي اسمعنـ.  ..

جواد  ببكاء: ماما تقول لا ازعلها ولا ازعلك وانت مشغول،  بس انتو تزعلوني كل مره انتو تزعلوني وما تجون.. انا ماعد احبكم..

قفل جواد الخط وهو يبكي وينسدح على فراشه..

فاهد:  جواد... جواد حبيبي اسمعنـ... جواد!!

تنهد فاهد بضيق وناظر جواله ودخله جيبه وهو يحس انه انهد حيله من هالمكالمه وتقطع قلبه على ولده...

اخذ نفس عميق ودخل للبيت...

__________

خلصت العنود تتعشى وراحت تغسل الصحون
ونشفت يديها وراحت لغرفة جواد فتحت الباب ما انفتح! 
عقدت حواجبها وقالت:  جواد؟  جواد افتح الباب!  ليه تقفل!!..

ما سمعت رد ودقت الباب مره ثانيه وهي تنادي بأسمه:  جواد ماما افتح الباب!!

ارتجف قلبها بخوف وقالت:  جواد والله ان ما فتحـ...
سمعت صوت المفتاح وانفتح الباب وشافته واقف
جلست لمستواه وضمته بخوف:  ليه تخوفني عليك ليه تقفل الباب؟ 

جواد بهدوء:  اسف.
العنود:  تعال يلا ننام.
هز راسه بالموافقه وراح للسرير وهو مخبي الجوال تحت المخده  ..
انسدحت العنود عنده وهي تنيمه وتحكي له قصص لين يقدر ينام..

ويوم شافته غفا ونام وقفت وغطته وهي تبوس جبينه وطفت النور وطلعت من الغرفه والمفتاح في يدها عشان ما يقفل مرة ثانيه..

راحت لغرفتها وجلست بتفكير على السرير وعينها ثابته على اللاشي!.

شهقت ببكاء ورفعت يدها تمنع شهقاتها ودموعها تنزل على خدها وهي تتذكر كلام جواد!.

تتعب حيل من معاتبته وتتعب من تسائلة لها لكن مافي يدها حيله كرامتها اكبر من انها تتنازل وترجع لفاهد لكن في نفس الوقت اتعبها جواد اتعبها حيل بتصرفاته ماعادت قادره تتحمل تحس انها أوشكت على الأنهيار والضعف!..

رفعت شعرها وهي تاخذ نفس ورفعت راسها تمنع دموعها تنزل اكثر   ...

وقفت وراحت تغير ملابسها وهي تدعي الله يهدي جواد ويقنعه من تعلقه الشديد بأبوه الي اتعبها حيل..

___

مرت الساعات على الجميع بهدوء تام..
وربما هذا هو الهدوء ما قبل العاصفة...

مع إشراقة الصباح...

وساعاتهِ الأولى

في بيت جواد..

صحى هادي بنشاط غير مسبوق وتوجه للحمام " وأنتو بكرامة"
يتجهز ويتكشخ وعلى غير العاده لبس له تيشرت أسود مع بنطلون أبيض ونظارة شمسية كبيره سوداء ورتب شعره ولبس ساعته وخاتمه وناظر نفسه في المراية وابتسم وهو ياخذ عطره ويتعطر وقال:  اييه كذا الشغل الزين...

اخذ جواله  وشاف الساعه وطلع من غرفته ونزل واستقبلته ريحة القهوة ماليه البيت وشاف جود لابسه ومتجهزة للمدرسه قرص خدودها وهو مبتسم لها:  صباحو.

جود ابتسمت: صباح النور عمو

هادي:  من بيوصلك المدرسه؟
جود:  بابا
هادي قرص خشمها :  غلط انا الي بوديك عاد انا اليوم متفائل خير ومروق..

جود ابتسمت ووقفت وقال هادي:  بنشوف اعمامك في المجلس وبنطلع..

هزت جود راسها بالموافقه ومسكت يده وطلعت معه
وراح هادي للمجلس وشاف اخوانه جالسين يتقهوون كلهم وابتسم فاهد بهدوء وهو يشوف جود بلبس المدرسه وتذكر جواد وتنهد بضيق...

جواد ابتسم:  هلا هلا يلا جاهزه؟

جود ناظرت هادي:  عمو هادي  بيوصلني  ..

جواد ناظر هادي بنص عين:  بالله؟

هادي ابتسم وقال:  اكيد عاد من قدها عمها هادي بشحمه ولحمه بيوصلها..

جواد عقد حواجبه:  لحظه لحظه تعال وش الطقم الي عليك؟
هادي مسك نظارته وقال بغرور:  وش رايك
جواد رفع حاجب وهو يدري عن سالفة غيداء:  وليه اليوم كاشخ؟  بالعاده تلبس الثوب مقلوب وتروح الشغل

ضحكوا اخوانه وقال هادي:  لا عز الله في ذي انك ظلمتني تراني اكشخ واحد فيكم ولا فيكم قصور يعني..

جواد:  الله يسهل روح بس وصل اميرتي لمدرستها لا تتأخر..

جود بأبتسامة راحت لابوها ومدت يدها:  مصروفي..
جواد ضحك ودخل يده لجيبه:  ابشري كم جود عندي

نزل فاهد نظره للأرض وغصب عنه راح تفكيره لولده
وانتبه عليه حمد:  عسى ما شر يا فاهد وش فيك؟
فاهد ناظره:  مافيني شي بس مصدع شوي  .

رفع نظره لجود وقال:  تعالي وانا عمك.

ابتسمت جود وراحت له ودخل فاهد يده في جيبه وطلع لها فلوس وقال بأبتسامة: وذي من عمك

ضحكت جود بفرحه وقالت:  شكراً عمو

مسح فاهد على راسها بأبتسامة.
وجواد ناظر اخوانه وقال:  وانتو ما بتسلمون على بنتي خلوها تغنى من وراكم..

ضحكوا على كلامه وكل واحد منهم ناداها وهو يطلع لها شي وهي في اسعد لحظاتها وعيونها تتطاير قلوب..

اخذها هادي وقال بمزح:  الحمدلله اني حصلت على فرصة توصيل البزنس وومن جود..

جواد:  اقول خل فلوس بنتي لا اطلب لك الشرطه الحين..

ضحك هادي وقال:  لا تتدخل بيني انا وبنت اخوي..

هادي  بهمس لجود:  القهوه اليوم عليك
ضحكت جود وهي تسمع كلامه
واخذها هادي وطلعوا من البيت متوجهين لسيارته..

____

في بيت حمدان..

تجهز بيطلع وهو ناوي على شي بيسويه أنتقاماً لنفسه
طلع من الغرفه وتفاجأ يوم شاف القهوه على باب غرفته وصحن فيه فطور ابتسم على أهتمام فَي بالعاده يطلع بدون ما يفطر لكنها بدت تهتم نزل بجسمه لمستوى الأكل وأخذه ودخل لغرفته وقال:  وش هالأهتمام يا فَي؟ 
جلس وهو يحس بسعاده غير طبيعيه من هالصباح بسبب حركتها البسيطه وبدأ يصب له قهوه ويشربها واخذ له من الخبز وبدأ ياكل

سمع الباب يندق ترك الصحن ووقف وراح للباب فتحه وما شاف احد نزل نظره وشاف ثوبه مغسول ومكوي...

عض شفته يكتم أبتسامته وهمس:  لا كذا كثير

اخذ ثوبه ودخل للغرفه وقال:  لو ادري انه بيجيني هالأهتمام  كان طحت من زمان..

جلس يكمل أكله وبعدها وقف ولبس ثوبه الي غاسلته فَي  وقرر يسئل فَي عن جواله..
طلع للصالة وشاف جدته تطلع وعقدت حواجبها: وين رايح من صباح الله خير؟

حمدان ابتسم: صباح الخير

جدته:  صباح النور وين رايح يمه

حمدان: شغلي
اتسعت عيونها وقالت:  والله ما تطلع اليوم
حمدان ضحك:  ليه
جدته:  لا لا والله ما تطلع انا للحين يديني تراجف من ورا خوفي عليك والحين تبي تطلع لا يا امي ماقالها الله..

حمدان:  ما فيني الا العافيـ...

جدته بمقاطعه:  كل مره تقول ما فيني الا العافيه وامس الله لا يعيده بغيت تطيح قلوبنا عليك..

حمدان ابتسم:  لا ذي المره صدقيني ما فيني الا العافيه..

جدته بحزن:  يمه يا حمدان طلبتك اقعد

حمدان وهو يحب راسها:  صدقيني اني بخير وماني متأخر..

تنهدت جدته وقال حمدان:  جدي صاحي؟

الجده:  لا للحين نايم.

اومئ حمدان وقال:  اجل ادعي لي انا طالع...

الجده:  استودعتك الله لا تتعب عمرك وانا امك لاتخوفنا عليك..

حمدان بابتسامة:  ابشري.

حب راسها مرة ثانيه وطلع من البيت ناسي موضوع جواله!!.

وقف عند سيارته وجاء بيفتح الباب وقفه صوت:   حمدان!

رفع حمدان راسه واتسعت عيونه وهو يشوف شخص رافع مسدس ومصوبه بوجهه وقبل لا يتكلم اي كلمه صدح صوت الرصاصه الي انطلقت من مسدس هذا الشخص...

وشهق الجد بقوه وهو يفز من النوم وهو يرتجف ويتعرق:  حمدان حمدان!

دخلت الجده بسرعه وقالت:  بسم الله  وش فيك

الجد بخوف :  وين حمدان وين حمدان

الجده:  توه يطلع الحين

الجد بصراخ:  وقفيه لا يطلع لا يطلع

ارتجفت فَي الي سمعتهم وركضت بسرعه لباب  وفتحته وشافت حمدان يتوجه لسيارته قالت بسرعه :  حمدان!

التفت حمدان لها وعقد حواجبه:  هلا!

فَي بلعت ريقها:  جـ.. جدي يبيك

أومئ حمدان ورجع داخل للبيت وهي دخلت بسرعه وشالت الطرحه عن وجهها وراحت لغرفتها  .

اما حمدان دخل للبيت وغلق الباب وشال نعوله"وانتم بكرامه" وتوجه لغرفة جده ابتسم له وقال:  صبحه بالخير

الجد ونفسه يضيق فتح يديه له يجيه.

استغرب حمدان وتقدم من جده وجلس عنده على طرف السرير لكن جده سحبه وهو يضمه والخوف واضح عليه انصدم حمدان وما عرف وش فيه وقال:  جد انت بخير؟ 

الجد بتعب رفع يده لقلبه يهديه وحمدان ابتعد عنه وقال:  فيك شي يوجعك شي؟

الجد:  لا لا وانا ابوك بخير بخير..

حمدان: تبي علاجك؟ 

الجد هز راسه بالرفض:  لا وانا ابوك لا انت وين رايح؟
حمدان بابتسامه: شغلي!
الجد بتعب:  خلك وانا ابوك خلك صحتك اهم من كل شي..

حمدان:  يا جد انا مضطر اني اطلع شغل مهم..

الجد بخوف:  انتبه على نفسك وانا ابوك

ابتسم حمدان وهز راسه بالموافقه وقال:  وش فيكم خايفين،  تراه تعب بسيط ان شاء الله وما عاد بيتكرر..

الجد هز راسه:  لا تغفل وانا ابوك وانتبه من الطريق الحرام انتبه من رفقاء السوء وانا ابوك..

حمدان مسك يد جده وهو يقبلها:  لا تخاف ان شاء الله اني عند حسن ظنك ولا ني حول الردا والرديين..

الجد:  الله يستر عليك ويفتح لك ابواب الرزق..

حمدان ابتسم:  انت بس ادعي لي انت وجدتي وكل شي بيزين ان شاء الله..

الجده بحنيه:  الله يحفظك ويطول بعمرك..

ابتسم حمدان لهم ووقف:  اجل استودعتكم الله تأخر الوقت..

الجد:  الله يحفظك وانا ابوك انتبه على عمرك..

حمدان:  ابشر، تبون شي معي؟

الجد:  سلامتك وانا ابوك

الجده:  سلامتك يا امي الله يطول لنا بعمرك..

ابتسم حمدان لهم وطلع وهو يحس ان اليوم ازين يوم في حياته بسبب أهتمامهم اولهم فَي واخرهم جده وجدته..

طلع من البيت وجاه صوت فَي:  حمدان

التفت لها وبدون شعور منه قال:  لبيه..

فَي وهي ماسكه شنطتها:  اروح الجامعه؟
ابتسم حمدان لها وهز راسه بالموافقه واشر لها على السياره ابتسمت بهدوء وراحت للسيارة ودخلت في الخلف ودخل حمدان وقال بهدوء:  تسلم يدك على الفطور.

فَي:  ما سويت شي

حمدان:  متى اجيك؟

فَي:  على الساعة 10:30  .

حمدان هز راسه:  زين.

سكتت فَي وودها تسئله وين بيروح لكنها ترددت

اما حمدان فكان وده أنها تسولف ولا تسكت لذلك قال:  الا جوالي وينه؟

فَي بلعت ريقها:  مع هادي
حمدان عقد حواجبه:  من هادي!؟
فَي نزلت راسها:  ابن عم ابوي..
حمدان رفع يده ومسك فمه ودقنه يكتم عصبيته وهو ما يبي يتذكر معرفتهم لهم..

فَي  بتردد:  وين بتروح؟
حمدان بهدوء: شغلي
فَي:  بس..
حمدان:  بصفي حسابي مع الي وصلني لذيك الحاله..

فَي:  حمدان لا تروح لهم خل الشرطه هي تتصرف
مانبي مشاكل

حمدان:  هم الي بدو في المشاكل وانا الي بنهيها..
فَي  سكتت وهي خايفه وما تدري وش تقول له..

حمدان بتردد:  خوفتك كثير؟

شتت فَي نظرها على الطريق وما عرفت وش تقول..
تنهد حمدان وقال:  انا اسف ما كان بيدي انا مدري وش قلت ولا وش سويت لكن انا اعتذر منك انتي تعرفيني ما كنـ...
فَي بمقاطعه لكلامه:  خلاص شي صار وانتهى..

حمدان بضيق:  بس انا اشوفه ما انتهى واشوفك خايفه مني...

سكتت فَي وقال حمدان بهدوء: وش يرضيك؟
فَي رفعت نظرها له: وش؟
حمدان:  وشلون تبين اعتذر منك؟

سكتت فَي وحمدان اول مره يقول لها كذا..

حمدان زم شفته وهو ينتظر منها جواب..

ما عرفت فَي وش تقول وبقت ساكته.

حمدان ابتسم بهدوء وهو يدري انه ما بينهم هذي الميانة الكبيره الي يخلي فَي تطلب رضاوتها لذلك قرر في نفسه ياخذ لها رضاوة بنفسه..

وصلوا عند جامعتها وقال:  لا تدقين على رقمي لين اطلع رقم جديد انتي انتظريني على الساعة عشر ونص بجيك
..

فَي بهدوء:  حاضر..
نزلت من السياره وناظرها حمدان لين دخلت واختفت من نظره وحرك هو الثاني لوجهته..

_______

وصل هادي للشركه وهو متحمس لتدريب غيداء ونزل
وهو يعدل شعره وقفل سيارته ودخل لداخل الشركه وهو يلقي السلام على الرايح والجاي ودخل للمصعد وناظر نفسه وانتظر لين انفتح وطلع منه ومشى لين وصل لمكتبه ناظر مكتب غيداء شافه فارغ مافيه احد 
عقد حواجبه ونزل نظارته: هذي وينها من أول يوم تأخير؟

دخل لمكتبة وترك جواله والمفتاح وجلس على الكرسي وهو مستغرب ليه تأخرت قال يمكن جايه في الطريق..

_____

اما غيداء

طلعت من غرفتها وهي متجهزه وشنطتها معها وعباتها ونزلت للصالة شافت صقر جالس يتقهوى على طول ركض له ورمت نقابها عنده:  طالبينك لاتردنا
نقز صقر بخوف  وصرخ: وجع يوجع العدو

غيداء ضحكت وقالت:  طالبينك يارجال لا تردنا..

صقر رفع حاجب وهو يشرب من كوبه:  وش تبون؟
غيداء:  جيناكم معتذرين على ما بدر منّا ونطلب منكم السماح والعفو وتسموحون لنا نرجع لشغلنا وعليه يتم تنفيذ جميع الشروط التي تبدونها علينا...

ابتسم صقر وقال: القرار صدر ولا يمكن تغييره

غيداء:  لا تكفى عاد طلبتك يا صقر

صقر هز راسه بالرفض ببرود وهو يشرب من قهوته

غيداء تقدمت وجلست عنده:   يلا يا صقر طلبتك اعتبر ان اليوم فرصة أخيرة لي لو شفت اني اسوي شي ما يعجبك وقتها امنعني تكفى يا صقر وهذي حبه على راسك

وقفت تحب راسه.

صقر ببرود:  بفكر وبدرس الموضوع وبرد لك علم يوم ارجع في الليل.

غيداء برجاء:  صقر تكفى تكفى
صقر أشر على راسه مره ثانيه وتقدمت غيداء وحبته:  ها وافقت؟

صقر حك جبينه:  جبهتي تحكني مدري وش تبي..

قلبت غيداء عيونها وتقدمت تحب جبهته..

صقر اشر لها على الكوب:  كن القهوه طعمها مر..

صرت غيداء على اسنانها وابتسمت له بتسليك:  احط اصبعي ولا اروح لسكر؟

صقر كشر:  ذباتك خايسه خلاص مافيه دوام..

غيداء بقهر: صقر  لا تذلني الحين!!.

ضحك صقر وقال:  تجهزي يلا

نطت غيداء تبوس راسه بفرحه:  الله يخليك لي ولا يحرمني منك يا اغلى اخ في العالم..

صقر: بس قبله بكلمك وانا ادري من اكلم  يا غيداء انا واثق فيك كل الثقه  وأدري انك قد الثقه وانك كفو ان الشخص يتركك وهو متطمن ان عنده أخت يشتد فيها الظهر لكن يا غيداء انا علمتك من قبل شخصيتك الفرفوشه تبقى بين اهلك ومحارمك غيره ممنوع في الشركه انتي في مكان شغل
لا تتدخلين في أحد ولا تفزعين لأحد خليك في شغلك وبس
سالفة خويتك فَي وولد عمها بتغاضى عنها لكن ان تكرر شي مثله صدقيني بتزعلين مني كثير..
غيداء شدت على يدها وقالت:  ابشر وان شاء الله اني اكون قد الثقه..

صقر ابتسم لها وقال:  انتي قدها انا ادري من هي اختي..

ابتسمت غيداء وتقدمت تضمه وقالت:   الله لا يحرمني منك
انت سندي من بعد ابوي الله يرحمه..

ابتسم صقر وضمها وقال:  يلا تجهزي معك مدير أقشر ما يحب التأخير..

ابتسمت غيداء وهزت راسها وهي توقف وتطلع نقابها من شنطتها..
فتح صقر عيونه وناظر الي على الأرض: وذا وشوا

غيداء ضحكت:  ذا نقاب خاص بالطلبات..

ضحك صقر وهز راسه بيأس منها ووقف وهو يطلع يشغل سيارته وطلعت غيداء وهي تحس بسعاده من كلام صقر معها ومن طريقته في النصح وهي تهمس لنفسها انها لازم تكون قد الثقه..

____

طلع جواد هو والي معه متوجهين لبيت عمهم بعد ما أرسل لهم هادي الموقع..

_____

" العنود "

طلعت من غرفتها وراحت لغرفة جواد بتجهزه فتحت الباب ودخلت بأبتسامة:  صباح الخير. 

ابتسمت وهي تشوفه يتغطى بفراشه وتقدمت منه وهي تقول  بتمثيل:  يالله ابني للحين نايم والناس يستنونه يبون يكرمونه لا لا ما يصير اممم انا لازم افكر بطريقة عشان يصحى...

ضم جواد نفسه اكثر وهو يمثل انه نايم...

العنود جلست عنده وقالت بأبتسامة:  ابني شكله نايم يا حرام بس النايم دايم يطلع صوت غريب ابني ليه ما يطلع صوت؟!

كتمت ضحكتها أول ما بدأ جواد يشخر لجل يثبت لها انه نايم

العنود تمثل الحزن:  اووه الحين انا كيف بفرح بولدي وشلون برفع راسي واقول للحريم الموجودات ناظروا هذاك الي واقف ابني انا هذا جواد بن فاهد اشطر واحد في المدرسه كلها..

سكتت العنود وهي تشوفه يمثل النوم ولأنها تدري ان ولدها يموت في شي اسمه تفاخر بالأب قالت:  يا حرام وشلون بنرسل لأبوه صورته وهو يتكرم اكيد بيزعل اذا ما وصلت له صورة ولده اما اذا وصلت له الصورة بيوقف بكل فخر وبيقول ناظروا هذا الشيخ جواد بن فاهد هذا ولدي البطل الي رافع راس امه وأبوه...

سكت جواد وعجبته السالفه وهو يسمع لها:  بدعي الله ان ولدي ما يخيب ظني  فيه ويصحى بنشاط ويتجهز للتكريم عشان يرفع راس امه وأبوه..

ناظرته بطرف عينها ورفعت يديها وقالت:  يارب تـ...

جلس جوام وهو يمثل ان توه يصحى:  ماما؟

ابتسمت العنود وضمته بكل قوّتها وقالت:  يلا يا ماما خليني اجهزك عشان نروح للمدرسة

جواد هز راسه ولاحظت العنود ان فرحته انطفت من بعد كلامهم امس تنهدت بحزن وضمته مره ثانيه..

ووقفت وهي تروح تجهز ملابسه وهو يروح يغسل اسنانه ويغسل وجهه..

________

وصلت غيداء عند الشركه والتفتت لصقر وقالت: صقر
ناظرها وقال:  سمّي؟

غيداء بأبتسامة:  اوعدك اني اكون عند ثقتك واوعدك اني ارفع راسك..

ابتسم صقر واومئ..
نزلت غيداء من السياره وأشرت له بيدها ودخلت للشركة و هو حرك سيارته رايح للمستشفى..

دخلت غيداء وهي تاخذ نفس عميق وتوجهت للمصعد بتتوجه للطابق الثاني لمكتبها وفي نفسها تجهز لها عذر عشان تأخرها..

وصلت لمكتبها وفز هادي وهو يعدل شعره بهدوء بدون ما تنتبه عليه..

جلست غيداء على مكتبها وهي ما تدري وش تسوي رفعت نظرها تشوف هادي من خلف الزجاج شافته يناظرها نزلت نظرها بسرعه للملفات تقلبهم..

____

" العنود "

وصلت هي وجواد الي كان لابس بدلة رسمية وشكله كيوت وحلو ابتسمت العنود وشافت المعلمة تأشر لها مسكت يد جواد وتقدمت من المعلمة وسلمت عليها والمعلمه ابتسمت لجواد وقالت:  مين ذا الحلو ليه تدخلونه مدرستنا؟
جواد بأبتسامة:  ما عرفتيني؟

المعلمه هزت راسها بالرفض وضحك جواد بفرحه:  انا جواد

المعلمة شهقت:  الله وش ذا الزين كله جواد هلا هلا بالشطور..

ابتسمت العنود وقالت:  وان شاء الله بيبقى شطور كذا لين يتخرج..

المعلمة رفعت راسها للعنود:  على طاري التخرج احنا مجهزين لهم بالطو التخرج يعني كتحفيز...

العنود لمعت عيونها:  ياربي بتجنون قلبي..

ضحكت المعلمة وقالت:  تعالي لداخل تلبسين البطل هذا..

العنود ابتسمت وهي مبسوطه في ولدها ودخلت معه للداخل وشافت الصغار كلهم لابسن وضحكت بسعاده واعجاب وراحت المعلمه ومدت للعنود اللبس الخاص في جواد..

واخذته العنود وجلست وهي تبدأ تلبس جواد وهو مبتسم وفرحان فيه...

العنود:  يلا يلا  تجهز خليني اصورك فيه..

ابتسم جواد وهو يوقف ويعدل نظارته والعنود بدت تصوره وهي فرحانه فيه وعاجبها شكله..

وبعدها نادوا أولياء الامور يروحون لاماكنهم المخصصه والعنود باست جواد وقالت:  يلا يا حلو انا بشوفك من هناك تمام؟
هز جواد راسه بالموافقه وطلعت العنود وهي مبتسمه اما جواد تلفت وطلع يشوف الحاضرين يبحث عن أبوه لكنه ما شافه..
جت المعلمة واخذت جواد ودخلته مع باقي الطلاب وهو عينه على الحضور  بيشوف ابوه..

___

ومرت نص ساعه وبدأ الحفل وبدأت فعالياته وفقراته

والبنات الصغار يرقصون على اغنية النجاح.

ومن بعدها مسرح تمثيل واولياء الامور يصورون عيالهك وفرحانين فيهم..

والعنود تنتظر طلوع جواد للمسرح وتشوفه لكنه ما دخل..

وانتهت فقرة المسرح وجاءت فقرة الأنشاد وطلعت بنوته صغيرة تنشد لهم وهم فرحانين فيها وهي خجلانه وتاكل نص الكلمات ونص الأحرف مخارجها غلط ومع ذلك مبسوطين...

وجاءت فقرات موسيقى التكريم واولياء الامور يصفقون لصغارهم وبدأت المعلمة تنادي بأسماء الطلاب والعنود رفعت جوالها تصور لحظة دخول جواد. 

بدأت المعلمة تنادي بأسماء الطلاب لكنها تفاجأت يوم شافت الاباء يطلعون للمسرح لعيالهم يلبسون عقد الورد وينزلون بلعت ريقها وهي تتمنى ان جواد ما يشوفهم هي حتى ما تذكرت انها تجيب له ورد كانت محتاسه معه ونست  هالشي!..

وخلصت المعلمة من حرف الثاء وجاء وقت حرف الجيم..

وبدأت المعلمة تنادي بأسماء الطلاب وأولياء الامور يصفقون لعيالهم...

عند جواد كان واقف خلف واحد من الطلاب ودوره بيجي بعده وتقدموا شوي على المسرح وصار يقدر يشوف الحضور كان يبحث بعيونه عن شخص واحد كان يبحث عن ابوه لكنه ما شافه نزل راسه بحزن ونزلت دموعه وانتبهت العنود وهمست بغصه:  لا يا ماما لا تكفى!..

نادت المعلمة باسم الطالب الي واقف قبل جواد وتقدم بفرحه وهو يستلم جائزته والناس يصفقون له وجواد منزل راسه ودموعه تنزل...

العنود غمضت عيونها ونزلت دموعه وهي تهمس:  تكفى يا ماما لا تسوي فيني كذا تكفى يا ماما..

المعلمة بابتسامة:  اما الآن مع الطالب المتميز والشاطر جواد  فاهد آل فارع..

اعتلى التصفيق والعنود نزلت دموعها وهي تشوفه واقف ومو راضي يتقدم..

وارتجف قلبها وهي تسمه صوت:  كفو ولــــــدي ممتاز

رفع جواد راسه بقوه وشاف فاهد واقف وسط الحضور ويصفق وعلى وجهه ابتسامة فخر...

ضحك جواد بفرحه من بين دموعه وتقدم فاهد ويده مليانه هدايا وصعد على المسرح وهو يفتح يديه لجواد الي ركض بكل سرعته وارتمى بين يدين ابوه..

واخذه فاهد وضمه بكل قوته
والحضور يصفقون لهم...

والعنود واقفه مكانها بدون حراك..

نزله فاهد وقال: يلا رح استلم جائزتك وتعال لنا احنا ننتظرك

جواد هز راسه وهو مبتسم بفرحه وراح للمعلمه الي مبتسمه له وسلمت له الجائزة ووقف بين الطلاب الي واقفين

ونزل فاهد من على الستيج وشاف العنود واقفه وعينها ثابته على ولدها تقدم منها بخطوات كانت تحس انها تسمع صوتها وهي ترتطم في الارض كانت دقات قلبها جداً سريعه ومضطربه بينما فاهد كان ظاهرياً متزن لكن داخله منهار جداً وهو يشوفها واقفه امامه وما يفصل بينه وبينها شي..

وصل عندها ووقف بجنبها كتفها يلامس كتفه وعينه على ولدهم الي يضحك بفرحه وهو يشوفهم امامه
واقفين لأول مره في حياته...

امتدت يد فاهد الراجفه ليدها الي ترتعش وشبك يده في يدها وشد عليها بقوه ولا شعورياً منها شدت على يده وعيونهم ثابته على ولدهم الي يصفق بكل فرحه والجميع يحسبونه فرحان بجائزته ما يدرون ان الي في قلبه شي اكبر واكبر بكثيير...

ابتسم فاهد بهدوء وعينه على ولده الي فرحان فيهم
وببطئ شديد التفت للعنود الي رفعت راسها ببطئ والتقت عيونهم بعيون بعض  تحكي تفاصيل كبيره...

يُتبع...