اوجاع الزمن الفصل الثاني 2 - بقلم Amysahin

نظر سامح بغضب لساره التى كانت ترتعش من خوفها من عمها الذى قال بغضب

- حصلت يا بنت اخويا تقفى تهينى مرات ابنى و فى بيتى ، ومين اللى قالك ان رياض رفض يتجوزك ، الكلام ده مافيش مخلوق يعرفه غير انا وابوكى واتكلمنا فيه بأوضه مقفوله فى بيتكم يبقى عرفتى مينين

بدء جسد ساره بالارتعاش من خوفها حتى احست وهم بالشفقه عليها ولكنها لم تتدخل فهى لا صفه لها هنا سوى انها ضيفه

- انطقى يا بنت اخوى احسنلك عرفتى مين فين

- يا عمى ااانا ...... ااانا سمعتكم بالصدفه

صفع سامح ساره على خدها وشهقت النساء بصدمه وامسك يدها بقوه ونزل بها للاسفل وامها خلفه تبكى على ابنتها وتحقد على وهم وتلومها ، فقالت الحاجه صفيه

- انزل وراه يا رياض يا ابنى وعلشان خاطرى خليك جنبها ديه بنت عمك وانت عارف ابوك لما بيغضب

- خاليكى هنا يا وهم لحد ما ارجع

- حاضر

نزل رياض بسرعه للاسفل ليجد والده بغرفه الجلوس الكبيره ومعه عمه صفوان و ساره على الارض تبكى وبجانبها أمها

- عملت ايه بنتى علشان تجرها كده يا خوى

- بنتك المصونه كانت بتجسس علينا واحنا فى دارك يا صفوان ، عرفت منين ان انت كنت عايز رياض يتجوزها وهو رفض لانها زى اخته واتجوز مراته الا لو كنت انت اللى حكيت يا ولد ابوى

نظر صفوان بغضب شديد لابنته وقال

- الكلام ده عرفتيه منين يا ساره ، انطقى بدل ما اقتلك بتجسسى على وانا فى مجلسى

فقالت هنيه

- وفيها ايه يعنى لما سمعت كلمتين بالصدفه هتقتلوها عاد علشان اكيده

- اخرسى يا حرمه

قالها صفوان بغضب وكاد ان يفتك بهم الاثنين لولا رياض

- خلاص يا عمى حصل خير ساره صغيره وعرفت غلطها ، يابنت عمى انتى زى اختى وهتفضلى اختى على طول ، انا لما رفضت الزواج مش علشان عيب فيكى بس علشان انا بعتبرك اختى من صغرك وياريت بلاش نفتح المواضيع ديه تانى

- حقك عليا يا خوى انا محجوج ليك

- خلاص يا اخوى الموضوع انتهى ، خدى بنتك من هنا يا ام شريف خالى الرجاله تتكلم

اخذت هنيه ابنتها وخرجت من المكان كله لتذهب لبيتها وهى تدعى على وهم انها سبب كل المصايب لانها دخلت بينهم

- اوعى تزعل منى يا عمى انت عارف انى بحبك زى ابويا

- لا يا ولدى لاه انا اللى يهمنى انك تكون مبسوط ويه مرتك

- ربنا يخليك ليا يا عمى

- اطلع لمرتك يا رياض يا بنى زمانه قلقانه

- حاضر يا بابا تصبحوا على خير

- وانت بخير يا ولدى

صعد رياض ليرى زوجته تجلس بجانب والدته على السرير وهى تحكى لها بعض مواقف الطفوله الخاصه به و وهم تضحك

- ايه ده خيانه ، كده برضوا يا حاجه تطلعى اسرارى بره ابص فى وشها انا ازاى دلوقتى

ضحك الجميع وقالت وهم

- اسرارك كلها عندى يعنى خالى بالك واوعى تزعلنى احسنلك

- ماشى يا وهمى يلا نستريح فى اوضتنا وبكره الصبح بأذن الله أفرجك على البلد

- عن اذنك يا ماما الحاجه تأمرينى بحاجه

- إذنك معاكى يا نضرى مايأمرش عليكى ظالم

- تصبحى على خير يا ماما

- وانتم بالخير يا حبايبى

ذهب رياض لغرفته ودخل هو ووهم واغلق الباب واخذت تتأملها

- اوضتك حلوه اوى

- انتى احلى يا قلبى

- هو ليه انت وبابا الحج مش بتتكلموا صعيدى زى الباقى

- جدى الله يرحمه بعت بابا مصر لاخواله من و هو صغير علشان البلد كان فيها مشاكل تار ، لما اتحلت المشاكل كان بابا فى المدرسه فأضطر جدى يسيبه لحد ما السنه تخلص ، بعدها اخو جدى فتح شركه فى القاهره والاسكندريه وطلب من جدى ان بابا يفضل معاه علشان يتعلم ازاى يدير الشركات ديه من بعده من وهو صغير وخصوصا انه كان ماعندوش ولاد

وبكده بابا كبر هناك اكثر من هنا علشان كده مش بيتكلم صعيدى اوى ، بس عمى صفوان اتولد واتربى هنا وانا كمان كنت باجى الصعيد فى الاجازه بس علشان كده بتكلم مصراوى زى ما بيقولوا

- ههههههههههه على اساس ان احنا بنتكلم مصرواى والصعيد بيتكلم هيروغليفي ما كله عربى

- سبنا من درس العربى ده ويلا ننام لحسن انا خلاص مش شايف اقدامى

- ادخل طيب خد حمام لحد ما افضى الشنطه بتاعتنا

- حبيبتى الشنطه الخدامه فضتها من بدرى

فتحت وهم الدولاب لتجد ملابسه وملابسها مرصوصة بالدولاب فأخرجت له ملابس وجهزتها ليرتديها بعد ان يخرج من الحمام وقامت هى بتغير ملابسها

خرج رياض وارتدى ملابسه ونام الاثنين من ارهاق السفر ، بالصباح استيقظت وهم اولا فدخلت الحمام اخذت شاور سريع وارتدت ملابسها وذهبت لرياض

- رياض حبيبى يلا قوم

- خمس دقايق بس

قالها رياض بنعاس وادار وجهه الناحيه الاخرى ، ضحكت وهم وقالت بدلال

- كده برده يا رورو يا حبيبى يلا اصحى بقى انا جعانه

شهق رياض بصدمه وقال

- رورو ، حسك عينك حد يسمعك بتقولى كده ، ده ابويا ممكن يضربنى بالنار لو سمعك بتقوليلى رورو

ضحكت وهم بصوت عالى وقالت بين ضحكاتها

- طيب قوم أكلنى وانا مش هقول حاجه ابدا

- أمرى لله ، اللى يشوفنى وانا اقدامك مش بقدر اقولك لا فى حاجه مايشوفنيش وانا بمشى الشركه على العجين مايتلغبطش

- معلشى ياقلبى اصلى جعانه خالص يرضيك يعنى

- مايرضنيش ياقلبى ثوانى اغير هدومى

دخل رياض الحمام وغسل وجهه وغير ثيابه ثم امسك يدها ونزلوا للاسفل وكان الجميع على مائده الطعام

- صباح الخير

- صباح النور يا ولدى / صباح الخير

رد الجميع عليهم وجلس الاثنين لتناول الافطار ، لاحظت وهم نظرات صقر لها التى أشعرتها بالتوتر ، كان ينظر لها بكره ولا تعلم لماذا فهى لم تفعل شئ له

- اعمل حسابك يا رياض بعد الفطار هتروح المزرعه تتباع شحنه العلف علشان انا ورايا شغل كتير هنا

- حاضر يا صقر من عنيا

- ليه بس يا صقر ده لسه واصل خاليه يرتاح شويه

- جرى ايه يا أمى يعنى يهمل شغله علشان يقعد وسط الحريم وله ايه

- صقـــــــر

قالها سامح بقوه عندما لاحظ حزن وهم من كلامه

- عن اذنكم

قالها صقر وقام بغضب فقالت صفيه بحنيه

- ماتزعليش يا بنتى صقر مش قصده ، ده احن واحد بالدنيا بس هو ناشف شويه

- ولا يهمك يا ماما الحاجه انا مش زعلانه

- بكره بأذن الله يا وهم هفرجك على البلد كلها

- ولا يهمك يا حبيبى شغلك اهم ، والايام كتير اقدامنا

- ربنا يكملك بعقلك يابنتى

قالها الحاج سامح بأعجاب لعقلها وهدوئها ، بعد ان انتهى الافطار وذهب الرجاله جلست وهم مع الحاجه صفيه بغرفه الجلوس يتناولون الشاى

- ماما الحاجه ممكن أسأل سؤال

- أسألى يا بنتى

- هو ليه صقر بيكرهنى كده

- لاه يابنتى ماتقوليش كده صقر مش بيكرهك ، هو بس قلبه قسى بعد ما مراته ماتت وهى بتولد

شهقت وهم وقالت

- لا حول ولا قوه الا بالله ، ربنا يرحمها ، طيب والطفل

- مات يانضرى كمان ومن ساعتها بقاله اربع سنين وهو كده كل وقته شغل شغل شغل ، نفسى افرح بيه واشوفه مبسوط بس دماغه ناشفه

- ربنا يهديه ويرزقه بنت الحلال

- امين يابنتى امين ، اطلعى ارتاحى يابنتى وشك باين عليه التعب ، ولما جوزك يرجع يبقى يصحيكى

- معلش يا ماما الحاجه الطريق كان طويل عاليا وانا مش متعوده عليه ، عن اذنك

- اذنك معاكى يابنتى

صعدت وهم لغرفتها وأتصلت بوالدها الذى قال

- ازيكِ يا اللى نسينى

- وحشتنى اوى يا بابا

- يابكاشه ، مش قولتلك طمنينى عليكم لما توصلوا بالسلامه

- حقك عليا يابابا بس كنا تعبانين من السفر وروحنا فى النوم على طول معلش بقى يا حاج خليها عليك المره ديه

- هههههههههه ماشى يا قلب الحاج ، طمنينى أهله عاملين معاكى ايه حد زعلك فى حاجه

- الحاج والحاجه كويسين جدا معايا ، اخوه الكبير جامد شويه معرفش ليه وعمه كمان كويس

- والباقيين يابنتى

- انا يهمنى والده و والدته بس يابابا وهما ناس عسل اى حد تانى مش مهم

- ربنا يكملك بعقلك يا بنتى خدى بالك من نفسك ومن جوزك

- حاضر يابابا وانت خد بالك من نفسك علشان خاطرى وماتنساش دواء الضغط

- حاضر يانور عينى مع السلامه ياقلبى

- مع السلامه يا بابا

نامت وهم واغلقت عينها بتعب فأرهاق السفر مازال عليها ، بعد مرور بعض الوقت قامت وهم من نومها وهى تصرخ بفزع

- ررررريــــــٰــــاض