رواية اوركيدا الفصل العاشر 10 - بقلم دانيا

رواية اوركيدا

الفصل التاسع9

بقلم دانيا

مشينا منو لقدام فاديه بقت تقلد فيهو وفكت الضحكه وانا لا عارفه اضحك معاها ولا عارفه اسكت ،، قلت ليها عيب يابت قالت لي الله الله من هسي بدينا دفاع قلت ليها مجنونه .... وقفت ركشه ركبنا والشارع كله تتكلم لي عن الود وكمان بدأت تتخيل بعدين بعد نخلص ح يحصل شنو والخطوبه ح تكون كيف والعرس ،، قالت لي بعدين حظك ضامنه الوظيفه من هسي قلت ليها صاحبة غيداء م قصرت نعم الصحبه لأنها اقترحت علي اشتغل معاهم دوام في الصيدلية بتاعتها .... قالت لي فعلاً دي بسموها مرا ونص عاينت ليها وبقيت اضحك قلت ليها خلاص قمتي لخارجياتك ،، قالت لي لحظه روميو دا شغال شنو ياربي؟ هزيت كتافي بمعنى م عارفه .

احمد بعد شيك على الود الشغال ليهو في الكشك اتصل لأيمن صاحبو قال ليهو تعالني في القهوة الجنب صالون رويال لو فاضي .... قال ليهو حظك حلو انا حالياً في السوق جبت مشوار شكلك اخدت الجواب الصح باين من صوتك ،، قال ليهو والله يامان انا شاكي إنك بتقرأ افكار ضحك وقال ليهو معقولة يااا انا حافظك حفظ انا وصلت انت وين ؟ قال ليهو جنبك وقفل الخط ايمن بقى يتلفت شاف احمد جاي عليهو جاء سلم عليهو وقعدوا وقال للمرا جيبي اتنين .... تشرب شنو انت ؟ احمد قال ليهو شاي قال ليها جيبي اتنين شاي يلا انجز الأوركيدا قالت شنو ؟

احمد اخد نفس عميق وخلف رجلو وخت يدو في دقنو وقال لأيمن هم خبرين واحد حلو وواحد م حلو لكن في الحالتين انا مستمتع .... ايمن رفع حاجبو وبقى يعاين لأحمد قال ليهو رغم إنو م فهمتك مستمتع من شنو لكن احكي الحلو اول ،، قال ليهو الحلو إنو هي م عندها مشكله يعني موافقه بس السيء قالت إلا بعد سنه لمن تخلص .... ايمن اتحمس وقال لأحمد والله يامكتب الإتنين حلوين المهم إنها موافقه قال ليهو لكن دي سنه ياصاحبي سنه كامله وم تنسى الحاجه انا بالزور اقنعتها هسي ارجع اقول ليها شنو ،، ايمن بقى يفكر قال ليهو كلامك صاح والله .... احمد سرح في تفكيرو مسافه وتاني قال لأيمن والمشكله الأكبر القروش الأنا رتبتهم لموضوع العرس خلال السنه دي عادي ممكن يروحن من يدي انت م عارف انا عانيت قدر شنو عشان اجمعهن ،، ايمن بقى محتار يقول شنو بعد مسافه قال لأحمد عندي ليك حل القروش دي لو كتيرة استثمرها .

احمد رجع البيت المساء بعد صلى المغرب جاء قعد جنب امو ونام في رجلينها خت راسو في رجلينها .... بقت تهبش ليهو في راسو وقالت ليهو ح نخطبها متين ؟ رفع راسو وقعد جنبها وقال ليها والله ياامي الموضوع دا شكلي ح ااجلو شوية لأنو عندي مواضيع تانيه لسه م كملتها ،، قالت ليهو مواضيع ول في حاجه حاصله مالو اهلها رفضو ؟ وصحي هي بت منو في الحي يمكن نطلع بنعرفها ... سكت مسافه وباين عليهو اتوتر من اسئلتها لأنو هو عارف ناس امو بفكرو كيف قال ليها رفضو شنو م رفضو لكن زي ماقلت ليكي عندي امور عاوز اعملها وهي بت منو دي خليها لزمنها .

قالت ليهو طيب ح تتم امورك دي متين يعني؟ خت يدو في دقنو وقال ليها يعني سنه كدا .... اتخلعت وقالت ليهو سنه سنه كامله يااحمد ياولدي انت بتسوي الني وهاله بت اخوي دي بتجيبها متين يعني ؟ انت بقيت م خاتي لينا اعتبار بتقرر براك كأنو م عندك زول تشاورو صاح ابوك الله يرحمه بس امك لسه عايشه .... قال ليها استغفر الله ياامي العفو قامت على حيلها قالت ليهو شوف ياولد انا مواضيعك دي م بتهمني واصلاً اخوي دا م طالب منك حاجه بس عاوزك تجي تعمل عرسك وخلاص وانا موضوع سنه دا م بخش في راسي لو داير رضاي خلينا نمشي نجيب ليك بت خالك دي وخلاص ومشت خلتو محتار