رواية اوركيدا الفصل التاسع 9 - بقلم دانيا

رواية اوركيدا

الفصل الثامن8

بقلم دانيا

قطعنا الظلط بهناك الزول ظهر في وشنا فجأة لمن اتخلعت مسكت فاديه من يدها قوي وقلت ليها " بسم الله دا جابو هنا شنو "؟ هي زاتا استغربت بقت تعاين ليهو بس وقالت لي مش قلت ليكي روميو ظهر في الحي خلاص رجع لحركاتو بعد اربعه سنه البني آدم دا م بمل ..... جاء علينا وقال سلام عليكم فاديه عاينت لي وقالت لي المره دي خلي علي انا بتكلم معاهو ،، قالت ليهو وعليكم السلام عاوزة تقول ليهو داير شنو هو سبقها قال ليها شوفي يالأخت انا المره دي جاي بالباب وم داير منها غير الموافقه وتديني رقم ابوها .

فاديه عاينت لي وانا عاينت ليها وفي لحظه صمت م قدرنا نرد ليهو فاديه فهمت إني م عندي رد قالت ليهو اديها مهله لبعد بكره تشاور راسها .... قال ليها خلاص وطوالي مشى من قدامنا فاديه قالت لي طبعاً دي اول مره اتكلم مع زول بالجديه دي حسيت نفسي امك ،، وبقت تضحك لكزتني في كتفي قالت لي " معقولة م توافقي وتخلي روميو يجن بسببك " انا لو علي كان في وقفتو دي اديتو رقم ابوكي واخوكي لأنو حسيتو ود ناس ومحترم واهم من دا كله خلوق وصبور شوفي حايم وراكي من متين من زمن الثانوي مبالغه عديل مستحيل تلقي احسن منو .... قلت ليها وانا رافعه يدي بأشر للركشه يابت انا م عاوزة عرس هسي فضل لي سنه معقولة م اتمها مستحيل .

وقفت لينا ركشه ركبنا قالت لي يابت انتي عويرة يعني شنو عادي ممكن تتميها في بيتك اقرب مثال ليكي انا شوفيني رقم إني هسي حامل في الشهر السادس ياهو مكمله جامعتي .... مالو اخوكي م قال لي م تقري في الزمن دا ممكن توازني حياتك عادي مافي شيء بغلب ،، وصلنا البيت دخلت غرفتي وانا افكاري مشتته شديد وم عارفه اعمل شنو لمن صدعت من كترة التفكير طوالي نمتا .

احمد رجع البيت لقى امو بتتكلم بالتلفون وكانت بتقول ياولدي ما تخليها عندنا شوية و اماني قاعده جنبها متوترة وقف بقى منتظر امو تخلص .... بعد قفلت الخط سلم عليهم وقال لأمو بتتكلمي مع منو ؟ قالت لي دا علي راجل اماني قال ترجع بيتها بعدا ،، هو مافي لكن م بعرف مستعجل على رجعتها لشنو اكيد دايرها تخدم اهلو انا بتمنى يسوقها معاهو لمن يجي من السعوديه المره الجايه .... احمد قال ليها عادي ياامي يعني شنو لو خدمت اهل راجلها مافي النهايه ديل زي اهلها م تسمعي البت دي كدا وتخليها تكبر راس هسي لو كان خليتوها كملت تعليمها زمان كان وعت وفهمت الحياة صاح وحالها يبقى افضل من كدا لكن م بعرف ليه متشددين في موضوع تعليم البنات كدا .

دخل جوا خلاهم قامت اماني قالت لأمها ولدك دا بلمح لشنو ياامي هسي انا مالي عيبي شنو والله يقول فيني اي كلام تاني م اجيكم .... ضربتها في كتفها وقالت ليها هوي هاا طنشي انتي عارفه اخوكي ،، قامت عاينت لأمها بدهشه وقالت ليها م يكون داير يجيب ليكم متعلمه ومثقفه هنا تجننكم وتكرهكم عيشتكم ؟ قالت لي بري يابتي تفي من خشمك متعلمة شنو البت لو قرت القانون مصيرها الكانون تعليم قال .

بعد اليوم التاني طلعنا مشينا الجامعه فاديه قالت لي اها قررتي شنو ؟ قلت ليها قررت اكمل دراستي اول ،، قالت لي طيب إن شاء الله روميو يرضى يستنى هو اصلاً استنى الكتير سنه م بتعمل شيء .... عاينت ليها وقلت ليها هوي يابت يعني شنو لو م استنى محسساني كأنو الشباب عدمو وبعدين انا اصلاً المواضيع دي م بزحم بيها راسي ،، قالت لي روقي يا بت مالك زهجتي إذا م عاجبك الولد دا وضحي ليهو ،، من غير مااحس قلت ليها لاا م كدا ... عاينت لي وبقت تضحك وتجاكر فيني قالت لي يعني عاجبك ؟ قلت ليها اسكتي مني يلا نتلاقى بعد المحاضرة للحظه حسيت نفسي مكسوفه منها ومن ردة فعلي .

بعد طلعنا كان واقف في باب الجامعه انا كنت بتكلم مع امي بالتلفون جرتني من يدي عاينت ليها قلت ليها فاديه مجنونه انتي اشرت لي على الباب عاينت شفتو واقف .... قلت لأمي تمام ياامي اصلاً طلعنا جايين خلصت المكالمه حسيت اطرافي كلها بردت بقت باردة زي التلج ورجليني حسيتهم بتلخبطن في المشي ،، وصلنا الباب حق الجامعه قبل نتكلم معاهو قال لينا السلام عليكم كيفكم؟ فاديه قالت ليهو تمام والله وانت؟ قال ليها بسط الحمد لله .... قلت ليهو وانا مدنقرة " لو جاي عشان الموضوع داك انا عاوزة اخلص جامعتي بالأول وقبل اخلص م ح افكر في المواضيع دي ودا آخر كلام عشان م تتعب نفسك ".

قال لي تمام مافي مشكله ننتظر انتظرت الكتير انا عاين لفادية وقال ليها ولشنو ؟ هزت راسها بمعنى نعم .... قال خلاص يعني اتفقنا اجهز وضعي لمن تخلصي ؟ انا سكت وم رديت ليهو فاديه قالت ليهو إن شاء الله وربنا يجعل الفيهو النصيب ،، قلت لفاديه ورح قمنا ماشين قال لينا بالمناسبه اسمي احمد .... م اشتغلت بيهو فاديه عاينت لي منتظراني ارد مشيت قامت اتلفتت عليهو قالت ليهو " انا فاديه مرت اخوها وصديقتها المغربه ، وهي غرام " قال ليها " غرام " قالها بنبره كدا بالنيه ،، خت يدو في راسو وقال ليها شرفنا يا غرام قصدي تشرفت بمعرفة اساميكم .... للحظه ابتسمت من ردو ،، مشينا منو مسافه فاديه فكت الضحكه وبقت تقلد فيهو