رواية اوركيدا الفصل الحادي عشر 11 - بقلم دانيا

رواية اوركيدا

الفصل العاشر10

بقلم دانيا

بعد اسبوع من النقاش في موضوع زواج احمد من بت خالو " هاله " رفض رفض تمام إنو يتزوجها والقروش اللماهم وباع الكشك واجر دكان في السوق وعملو بوتيك ملابس .... جاهو ايمن بعد الظهر كدا في المحل كان في ناس بشترو في شيله من المحل سلم لأحمد وانتظر لمن الناس مشو قعد مع احمد احمد قال للود الشغال معاهو امشي جيب جبنه لأيمن ايمن قال ليهو لالا ياصاحبي شربت جبنه والله بس جيتك في موضوع ،، احمد بقى يعاين ليهو قال ليهو ملامحك م بتبشر بالخير ايمن ابتسم قال ليهو معقولة لا يامان كله خير والله بس امس كان اتصلت علي خالتو زينب " ام احمد " .

احمد عاين ليهو بإستغراب وقال ليهو امي خير قالت مالها؟ ايمن سكت مسافه وسند ظهرو على الكرسي وخلف رجلو وقال لأحمد والله ياخ م عارف اقول ليك شنو لكن ما هو اصلاً كل ام في الدنيا بتتمنى لولدها الإستغرار في حياتو وبتتمنى تشوف اولادو وتفرح بيهم وتلعبهم وتونسهم ..... بس لمن يكون اختيار امك شيء واختيار قلبك شيء هنا بتبدأ الخلافات ،، احمد ختى يدو في دقنو واخد نفس عميق واتنهد وقال لأيمن يعني من الآخر كدا هي اتكلمت معاك عشان تقنعني بإختيارها بما إنك صحبي الوحيد وبسمع منك ،، عاين ليهو وقال ليهو شبه كدا يااحمد وانا م عارف اقول ليك شنو والله لأنو انا عارف انت موقفك شنو وحاسي بشنو ومتفهمك وفي نفس الوقت الخاله زينب عاوزة القريبه مافي ناس كدا بحبو يزوجو اولادهم دائماً من الأهل وبشوفو دا انسب شيء لأنو في نظرهم بت الأهل دي ربيت بيناتهم وعارفنها وعارفين طباعها .

احمد سرح بعيد في تفكيرو وعم الهدوء المكان وبعد لحظة سكون استمرت لأكتر من ثلاثه دقايق احمد نطق وقال لأيمن انت عارف انا لمن كنت صغير كنت بحلم اكون طيار .... وبعد وصلت الصف التامن اتغير حلمي وبقيت عاوز اقرأ هندسه بس في نص الحلم جات الفاجعه على وابوي اتوفى وانا بإعتباري الأبن الأكبر خليها اماني دي مابت م بتتحسب ،، كان علي انا اشد حيلي واستلم المسؤليه كامله البيت على دراسة امين اخوي ،، وبعد وفاة الوالد م كان في مصدر دخل ماهو كان بلم رزق اليوم باليوم " الله يرحمه " وانا عشان اشيل المسؤليه دي كان لازم اشرط الصفحه الفيها احلامي وطموحاتي دي وابدأ مكانها صفحه جديده " مسؤليات وإلتزامات " .

وفعلاً انا عملت كدا وبقيت نفسي دي اخر همي وانت كنت معاي وشفت البداية كانت صعبه كيف .... لكن انا من شفت البت اوركيدا " غرام " حسيت بالأمل بالجد وحسيت إنو انا عاوز اعمل حاجه لنفسي ودي الحاجه الوحيدة الكنت بسعى وراها لنفسي ،، وانا لو م واثق من إنها بت ناس وح تحترم امي وتقدرها م كان اصريت عليها وعسى ان تكرهو شيء وهو خير لكم هسي يمكن غرام تبقى لأمي احسن من بت اخوها دي كل شيء ممكن هسي لو ما كان فرضت علي السنه دي انا كان تميت الموضوع وجبتها قعدتها مع امي دي عشان تشوفها وتعرفها وتغير مفهومها عن زواج الغريب .

احمد قاعد بتكلم مع ايمن والعبرة خانقاهو وجو ناس المحل عاوزين يشتروا احمد قام فضلهم .... ايمن قال ليهو طيب يازولي نتقابل المساء وم تشيل هم شيء محلوله بإذن الله ،، احمد ابتسم وخت بدو في كتف ايمن وقال ليهو إن شاء الله وانا زاتي عاوزك في موضوع لكن شايف الوضع ناس طالعه وناس داخله المساء نتقابل ونحكي قال ليهو اوكي وطلع مشى .

العصر كدا قاعدين نتونس انا وامي وفاديه امي قالت لفاديه يابتي لو المشي للجامعه متعبك جمدي السنه واقري السنه الجايه بما إنو دي اخر سنه ليكي .... قالت ليها ياريت ياامي روعه لكن ماخلاص السنه اوشكت على نهايتها نتمها بس قالت لي خير يابتي انتي ادرى بمصلحتك قبيل كان اتصلت لي امك قالت لي دايرة اجيكم لكن مع مشغولية البيت م قدرت قالت ليها ااي والله امي ياحليلها ما فضلت براها ،، مشغوليات البيت كترت عليها هسي لو كان اخوي جاء وعرس كان مرتو بتونسها وتشيل معاها البيت .

زينا انا وانتي بكره لمن غرام تعرس وتمشي بيتها ح نفضل برانا نتساعد ،، فاديه مستهبله عاينت لي وقالت اها ياغرام م لقيتي ليكي عريس؟ بقيت بعاين ليها بدهشه في نفسي قلت ياالله منك اصبر لي من نظراتي ليها فهمت وبقت تتبسم لي نظام مكاواة .... انا سكت وم رديت ليها امي عاينت لي وقالت ليها يابتي م كنت عاوزة اتكلم هسي لكن دام الكلام جاب الكلام ح اقول ليكن لكن م تجيبن سيره قدام " يونس " ابوي يعني .

بقينا دي بتعاين لدي قالت لينا غرام اتكلم فيها صاحب اخوها " غانم" دكتور شغال في السعوديه حالياً وغانم امس الصباح جاء فتح الموضوع مع ابوها وابوها قال ليهو كدي نشوف لبعد تتخرج ..... فاديه نططت عيونها كبار وبقت تعاين لي تاني اتلفتت على امي قالت ليها لكن يا ماما روعه غانم م جاب لي سيره الموضوع ،، امي قالت ليها يمكن نسى انا من سمعت كلام امي حسيت مخي اتشوش وم عرفت اقول شنو انضم ول اسكت

الفصل الحادي عشر من هنا