رواية اوركيدا الفصل الثاني عشر 12 - بقلم دانيا

رواية اوركيدا

الفصل الحادي عشر 11

بقلم دانيا

بعد سمعت كلام امي دا عاينت لفاديه وهي عاينت لي في لحظة صمت دامت لعدة ثواني بعدها فاديه قالت لأمي لكن ياماما روعه القرار برجع لغرام والمفروض هي تختار .... امي قالت ليها ااي نحن م اخترنا ليها نحن بس شايفين إنو الود صاحب غانم دا ود ناس ومحترم وم فيهو كلام وكمان معرفتنا معاهم قديمه بس برضو الرأي رأيها ،، قلت ليهم ياجماعه مالكم هسي دا م وقتو انا لو م خلصت زاتو م مفكره في اي شيء

احمد بعد اتعشى اتصل ليهو ايمن قال ليهو اها طلعت ول لسه ؟ قال ليهو خمس دقائق وبكون معاك .... قام طالع امو جات قالت ليهو يااحمد وين اللبن الليله نسيتو ولشنو ؟ اتلفت عليها وقال ليها معليش ياامي والله مع المشغوليات شكلي نسيتو لكن بجيبو معاي وانا جاي ايمن راجيني ،، طلع مشى هي قالت شكله ايمن ح يتكلم معاهو ويقنو الحمد لله .

اتلاقى مع ايمن في القهوه الجنب الظلط طلب القهوه وقعدو يتونسوا احمد قال لأيمن والله يامان شكلي ح اطلع من البلد دي تاني .... ايمن إتفاجأ وقال ليهو جنيت يازول انت كل شهر قاطع بحر زمان طلعت عشان المال حفرت الدهب دا لمن عينك طلعت وجبت المال وهسي ماشاء الله فتحت دكان ملابس وامورك تمام تاني مالك طالع لشنو ؟ احمد شال نفس عميق وقال والله ياخ ااي الحمد لله الأمور كويسة لكن لو قعدت هنا م بكون مرتاح موضوع بت خالي دا م ح يفكوني منو ،، قال ليهو كدي روق يامان انا بتكلم مع الحجه وبحاول اقنعها .... البت جابت الجبنه احمد شالها منها وختاها في التربيزة وقال ليها شكراً ،، وبعدها قال لأيمن لالا م تتكلم معاها انا بحل الموضوع بطريقتي .

بكره الصباح قاعد مع امو بشرب في الشاي قال لأمو انا مسافر قبل يتم كلامو نطت وقالت ليهو تاني تاني يااحمد ياولدي ؟ لالا والله م بتسافر انت عملت ليك مصدر دخل كويس والأمور تمام تاني تسافر لشنو ول الملكه طلبت مهر ؟ سكت مسافه وقال ليها مهر شنو ياامي بت الناس م ليها علاقه بالموضوع ..... عاينت ليهو مسافه وقالت ليهو انت ياولدي انا امك بدور ليك الشين ؟ قال ليها العفو ياامي دا كلام شنو قالت ليهو طيب خلاص مالك م راضي ببت خالك دي ؟ سكت وقام ماشي قالت ليهو خلاص جيبهن الإتنين في نفس السنه وقف في الباب مسافه وتاني قبل عاين ليها وجاها راجع قعد جنبها قال ليها شوفي ياامي انا بجيب ليكي دي تعيش معاكي وتشوفيها وتعرفيها وإذا ظهر ليكي منها عيب واحد انا بوعدك اجيب بت اخوكي دي لكن هسي موضوع بت اخوكي دا م تجيبي لي سيرتو .

قبل التخريج بشهر فاديه ولدت جابت ولد سموهو مأمون كانت قاعده في بيت امها وانا وامي بنمشي ليها وبنجي كل يوم واحياناً بغشاهم المساء بعد الجامعه ..... يوم التخريج اغلبية الناس البنعرفهم جو حضروا كان من اسعد الأيام وابوي وامي ديل لمن قعدو يبكو من الفرح ،، بعدو بإسبوع فاديه كانت ح ترجع من بيت امها لكن امها بقت عيانه شوية طلعت بين العصر والمغرب قلت لأمي ماشه اشوفهم قالت لي كويس سلمي عليهم طلعت من البيت لمن قربت لبيت ناس فاديه فجأة ظهر احمد قدامي من حيس لا احتسب لمن قلبي بقى يخفق بسرعه ،، حاولت اتخطاهو وامشي عشان م يوقفني لكن كان جاي علي والمسافه قريبه قبل يصلني قال لي الف مبروك التخريج بقيت مدنقره م رديت ليهو حسيت يديني برجفن .

قال لي م ح اوقفك الدنيا شارع لكن لو لقيتي فرصه رسلي لي رقم ابوكي مد لي ورقه عشان اشيلها منو حسيت بالإحراج شديد .... مسكتها منو ومشيت سريع خشيت بيت ناس فاديه وجسمي كله برجف ونفسي قايم مشيت سلمت عليهم وكفرت لأمها وقعدت جنب فاديه بقيت بلعب في البيبي ،، لاحظت إني متوترة امها قامت مشت المطبخ طوالي هي قالت لي مالك يابت جيتي جري ولشنو ؟ عاينت ليها ومديت ليها الورقه فتحتها قالت لي اشي اشي متين اتخرجنا وبقت تضحك قالت لي والله الود متابع متابعه دقيقه خلاص دا لو م حصل عليكي بموت .

قلت ليها دا كله هين هي الحل شنو انا كيف اديهو رقم ابوي م بقدر ،، قالت لي عادي يابت م فيها حاجه رسلي ليهو بس وعمي لو سألك قولي ليهو قاطعتها وقلت ليها كمان دايراني اقول ليهو اقول ليهو شنو ؟ ضحكت وقالت لي خلاص عندي ليكي حل انسب انا بكره اصلاً جايه البيت ندي الرقم دا لغانم وانا بتكلم معاهو وهو يتكلم مع عمي مش فكره ؟ قلت ليها ااي فكره احسن ..... بكره بعد العصر غانم مشى جاب فاديه من بيت اهلها قعدنا اتونسنا كدا ولمن جينا للنوم مشيت الغرفه وانا على اعصابي خايفه شديد جاتني في الغرفه قالت لي انتي لسه م نمتي ؟ عارفاكي م ح تقدري تنومي لكن اطمني يابت الموضوع عادي مالك محملة الموضوع اكتر من حقه نومي وم تشغلي بالك كتير .

الصباح قعدنا مع امي وفاديه بنشرب في الشاي وامي بتلعب في البيبي شويه كدا جاء غانم وقف برا صبح علينا وناداني قال لي ابوي عاوزك في الصالون .... وقال لناس امي انا طالع الشغل عاوزين حاجه ؟ انا هنا خلاص اتمنيت الأرض تنشق وتبلعني خليتو لمن مشى من قدام المطبخ حتى قمت عاينت لفاديه قالت لي بصوت هامس إسترخي طلعت مشيت لقيت ابوي قاعد في السرير وماسك سبحتو دقيت الباب رفع راسو عاين لي وقال لي خشي يابتي قلت ليهو صباح الخير ياابوي وانا مدنقرة راسي قال لي صباح النور تعالي اقعدي جيت قعدت جنبو قال لي شوفي يابتي الموضوع عادي مافي داعي تخجلي وكل شيء نصيب نحن ح نتكلم مع الشاب ونتعرف عليهو ونسأل عنه وعن اهلو والفيها الخير بتبقى .

بعد اسبوع من الكلام دا بعد شراب الشاي ابوي كان بتكلم مع امي في الموضوع ردة فعلها كانت " غرام متعلمه ودارسه ومتقدم ليها زول متعلم ومغترب كمان تخليهو تعرس ليها واحد م قاري ومستواهو الدراسي لحد الصف التامن دا كلام شنو ياابو غانم "؟ ابوي قال ليها ياروعه اهدئي من متين الناس بتتقاس بمستواها الدراسي الأخلاق اهم حاجه يامرا ونحن سألنا من الشاب دا واتقابلنا بيهو في السوق طلع عندو بوتيك ملابس هنا وماشاء الله عليهو باين عليهو خلوق ،، امي قالت ليهو حتى لو خلوق نحن م بنعرفو وم بنعرف طباع اهله لكن داك بنعرفو من وهو صغير بقرأ مع غانم في المدرسه واهلو زاتهم بنعرفهم غرام انا بقعد معاها

الفصل الثاني عشر من هنا