رواية اوركيدا الفصل الرابع عشر 14 - بقلم دانيا

رواية اوركيدا

الفصل الثالث عشر 13

بقلم دانيا

بعد صحى ورد على التلفون اتوتر وقام سريع قلت ليهو خير ناس البيت كويسين ؟ طلع ليهو غيار من الدولاب وقال لي امي مرضت واماني ودتها المستشفى ح استحم سريع سريع وطلع عليهم قلت ليهو ياستار مالها كمان ربنا يديها العافيه قال لي آمين م عارف والله كدي ح استحم سريع كدا واطلع ،، هو دخل الحمام وانا قمت طلعت لي عبايه وطرحه من الدولاب طوالي هو طلع من الحمام قال لي مافي داعي نمشي كلنا انتي خليكي هنا م تخافي اول ما اصل بديكي تلفون اطمنك م حبيت اصر عليهو لأنو كان مستعجل قلت ليهو طيب اشرب الشاي على الأقل قال لي بعدين هسي لازم اطلع انتبهي على نفسك ياروحي واقفلي الباب كويس ،، قلت ليهو تمام .

طلع مشى ليهم في المستشفى لقاهم قاعدين منتظرين نتيجة الفحوصات جاء سلم على امو وباسها في راسها وقال ليها ما على قلبك شر ياامي حاسه بشنو الدكتور قال شنو ؟ ردت اماني قالت ليهو منتظرين نتيجة الفصل تطلع لكن على الأقلم ضغطها ارتفع قال ليها كيف الكلام دا م منتظمه في ادويتك ولشنو ياامي ؟ ندهو إسمها نتيجة الفحص طلعت احمد شالها وساق امو وخشى للدكتور .... قال ليها عندك ملاريا يا امنا عليكي العافيه والضغط شكلك م منتظمه في علاجاتك عاين لأحمد وقال ليهو اهتمو فيها ياابو الشباب تفويت الجرعات دا مشكله كبيرة م صاح ،، احمد قال ليهو ابشر الدكتور كتب ليها علاجات احمد ساقها وطلع برا قال ليها ياامي ليه بتفوتي الجرعات قاطعت كلامو وقالت ليهو الأيام الفاتن مع لخمة العرس والجوطه ديك بنسى الداء احياناً .

قال لأماني خليكم هنا انا ح امشي اجيب الدواء من الصيدليه واوقف ركشه ... اشترى العلاجات وجاء ساقهم ومشي البيت ،، اتأخر م اتصل لي قمت اتصلت ليهو قال لي معليش ياغرام والله مع اللخمه نسيت اتصل عليكي عديل قلت ليهو اها ماما زينب بقت كيف وطلع عندها شنو ؟ قال لي عندها ملاريا والله والضغط حقها كمان هي الأيام الفاتت دي فوتت الجرعات ... قلت ليهو ربنا يواليها بالعافيه عاوزة اقول ليهو اديني ليها اكفر ليها سمعتها قالت لأماني تعالي وديني الغرفه والله جسمي كله واجعني دايرة انوم حبه ارتاح احمد قال ليها انا بساعدك ياامي قالت ليهو لالا انت كمل مكالمتك وسلم عليها ،، اماني جات ساقتها مشت معاها الغرفه .

قالت ليها شفتي ياامي هي ليه بتتصل إتصال لو خايفه عليكي صاح كان جات مع احمد لكن مسيطرة عاوزة تشغل بال احمد بس عشان يرجع ليها سريع شفتي امور البنات دي كيف وولدك زاتو شكله ماشي ليها على كسر حبلها بعدا لو م نضمتي معاها كتير موضوع هاله دا ح يطرشق وبكره بتقولي اماني قالت ..... قالت ليها يطرشق شنو والله يابتي انتي اصبري لي خليها لمن تجي البيت هسي انتي اعملي الإتفقنا عليهو قالت ليها خلاص ياامي بتكلمن كدا احمد جاء دق باب الغرفه امو قالت ليهو ادخل ياولدي جاء قعد جنبها واماني طلعت مشت المطبخ قال لأمو حاسه نفسك احسن ياامي ؟ قالت ليهو احسن ياولدي م تشغل بالك بي انا اماني ما قاعده معاي لكن بت الناس دي م صاح تخليها براها ارجع ليها الناس لو شافوك هنا يقولو شنو ؟ قال ليها عافيتك اهم من اي شيء ياامي م تفكري في شيء تاني انا وصيت ايمن يجيب ليكم حاجات من السوق وانا لبعد العصر كدا اشوفك اتحسنتي وبعدها بطلع بمش غرام زاتها كانت جايه معاي لكن انا قلت ليها تقعد .

قالت ليهو خير ما فعلت ياولدي بتكلمو كدا سمعو صوت بوري ركشه في الباب قال ليها دا ايمن جاء ح اطلع عليهو انتي ارتاحي حاولي تنومي شوية مسافة اماني تعمل ليكي الشوربه .... مشى دخل الحاجات مع ايمن وقال ليهو اخش اطمن عليها احمد قال ليهو نايمه والله قال ليهو م مشكله خليها ترتاح ربنا يعجل شفائها ،، قعدو في الصالون واماني جابت ليهم العصير بعد ايمن طلع جات اماني لأحمد قالت ليهو والله كنت بتمنى اتم ليكم العشرة يوم دي هنا اعتني بأمي مسافة انتوا تجو من الشقه لكن اتصل لي عبدالرحيم وقال لي عمتي وقعت في الحمام ورجلها اتكسرت وبقت م قادرة تتحرك بيها وانت عارف هي م عندها بنات قال لي ضروري ارجع البيت ،، احمد قال ليها الف سلامه ليها طيب ح تمشي عليهم تاني إلا بكره صاح عشان الزمن دا مافي عربيه بتطلع .... قالت ليهو بكره ااي بكره قال ليها تمام انا ح امشي الشقه نرتب امورنا والصباح نسلمها ونجي البيت .

الصباح بعد شربنا الشاي طوالي ستفنا شنطنا وطلعنا جينا البيت بعد قعدنا شوية اماني جهزت وقالت طالعه جاتني مرام بتها الصغيره ومعاها اخوها مهاب حضنوني وقالوا لي مرت خالو ح نشتاق ليكي قلت ليهم وانا كمان ياحلوين م تطولو الغيبه علينا .... بتكلم معاهم كدا امهم نادتهم طلعت معاهم برا للباب جاء ايمن بالرقشه حقتو ساقهم ح يوصلهم السوق ومن السوق ح يركبو العربات البتمشي البلد ،، بقينا قاعدين انا واحمد وامو مشيت الغرفه غيرت هدومي ولبست لي توب هزاز قلت انمشي المطبخ اعمل الفطور .

مشيت وقفت محتاره اعمل شنو جاني احمد قال لي م تفكري ارتاحي انا بعمل ليكم الفطور الليله ياعروس عاينت ليهو وابتسمت قلت ليهو شكلك خايف إني م اكون بعرف اطبخ انا بعرف اطبخ لكن م عرفت اعمل شنو كدي انت قول لي عاوزين تفطرو بشنو وانا بعمل .... جاء وقف قدامي ومسك يديني قال لي معقولة نشغلك في المطبخ من سادس يوم ليك مالنا نحن لقيناك واقعه عاينت ليهو وقلت ليهو م بشتغل مالي انا زاتي مليت من القعاد ساي قال لي خلاص إذا مصرة بساعدك عملنا الفطور وشلناهو مشينا بيهو لأمي زينب .

بعد مضى شهر على زواجنا اليوم دا كان جوني غيداء وفاديه من بعد الفطور قيلو معانا وشربو معانا الجبنه واثناء الونسه غيداء جابت لي سيرة الشغل في الصيدليه قلت ليها كدي الموضوع دا لسه شوية عليهو وبعد اتكلم فيهو مع احمد ونشوف البحصل شنو ..... المساء اتكلمت مع احمد قال لي مافي مشكله لكن اديني وقت حبه قلت ليهو تمام انا اصلاً م مستعجله ،، الصباح عملت الشاي وشلتو عاوزة اجيبو ليهم مع امو كانو قاعدين في البرندا من غير ما اقصد لفت إنتباهي كلام امو كانت بتقول نحن م عندنا مرا بتشتغل برا البيت المرا مكانها بيتها .

الفصل الرابع عشر من هنا