رواية اوركيدا الفصل الخامس عشر 15 - بقلم دانيا

رواية اوركيدا

الفصل الرابع عشر 14

بقلم دانيا

كانوا بتكلموا مع بعض اول ماجيت احمد سكت وامو عاينت لي وقالت ليهو دي حاجه معروفه في الأسرة وسكتت تاني م اتكلمت احمد حسيتو منزعج كأنو بقول في نفسه إن شاء الله م تكون سمعت بعد شراب الشاي احمد تلفون اتصل رد على المكالمه وطلع مستعجل من البيت امو قالت ليهو اجي ياولدي في شنو الحاصل شنو ؟ رد عليها وهو ماشي على باب الحوش قال ليها حصل حريق قالوا في السوق لكن م تخافو بشوف الحاصل شنو وبضرب ليكم ..... انا من سمعت كلمة حريق دي اتزكرت ابوي بكون مشى السوق جريت غرفتي سريع شلت التلفون اتصلت لأبوي رد لي بعد كم جرس سلمت عليهو وسألتو عن الحريق قال لي ااي والله حصل حريق كبير في السوق على إتجاه بوتيكات الملابس جوا السوق احمد وين يابتي ؟ قلت ليهو هسي طلع من البيت ماشي على السوق قال لي الله يستر يابتي إن شاء الله م يكون في ضرر كتير .

من كلامه فهمت إنو الحريق على إتجاه محل احمد حسيت بالخوف شديد على احمد قلت إن شاء الله م يحصل شيء ......بقينا قاعدين مع امو على اعصابنا للظهر حتى اتصل لي احمد امو قالت لي دا منو ؟ قلت ليها احمد طوالي شالت مني التلفون اتكلمت معاهو قال ليها إنو المحل حقه من ضمن المحلات الحرقت ،، بقت تتحسبن وتقول عين وصابتنا النحس شنو الجانا ربنا يعوضك ياولدي .....بعد الحريق بأسبوع احمد وضعو المادي اتدهور شديد وعشان يصين المحل من جديد محتاج راس مالي وتاني يبدأ من الصفر كنت دائماً لمن اصحى بالليل بلقى احمد صاحي وخاتي يدو تحت راسو وشارد في افكارو ،، قلت ليهو خليها على الله يااحمد وربنا كريم بتتعوض بإذن الله .

الصباح بعد شرب الشاي اتصل ليهو ابوي قال لي لو جيت السوق اغشاني في المحل قال ليهو حاضر قال لينا يلا يا جماعه انا طالع قلت ليهو ربنا يوفقك ..... طلع مشى قمت جهزت الفطور وبعد الفطور لميت الملابس للغسيل طلعتهم برا وجيت لماما زينب قلت ليها عاوزة الم الملابس الوسخانه للغسيل قالت لي خلاص انتي امشي وانا بجيبهم ليكي ،، مشيت دورت الغساله م اشتغلت معاي حاولت معاها كتير م اشتغلت معاي جاتني ماما زينب ختت الملابس وقالت لي الغساله دي اخيانا عندها امور كدا بتقوم عليها م بتشتغل بتقيف براها ،، وقفت وختيت يدي في راسي قلت ليها والله دي مشكله دي معناها إلا ارجع الملابس جوا اغسلهم في وقت اوسع ..... قالت لي م بتعرفي تغسلي بيدك ؟ ول انتي البت المدللة عند اهلك ؟ قلت ليها م كدا لكن الزمن م بسعني اغسلهم كلهم عاينت لتوبها الابساهو وقالت لي دا آخر غيار لابساهو من امس .

سكت مسافه بعاين للملابس قلت ليها طيب م مشكله بغسل ملابسك بباقي الزمن دا وملابسنا بخليها لوقت تاني ،، عاينت لي وقالت لي تكوني عملتي فايده ... مشيت صليت الظهر وربط طرحتي في راسي وقعدت اغسل للعصر حتى خلصت حسيت نفسي هلكت ،، دخلت جوا عاوزة ارتاح شوية اتزكرت الغداء راجيني مشيت المطبخ قعدت اطبخ قربت اخلص ام احمد جاتني قالت لي كفاك يابتي تعبتي الليله اعفي لي قلت ليهو ولو ياامي مافيها اي تعب قالت لي خلي الباقي دا انا بهتم فيهو احمد قرب يجي انتي امي ظبط نفسك عيب المرا الوحيد الراجل يجي من الشغل يلقاها مبشتنه ضحكت وقلت ليها طيب ح امشي اصلاً م فضل شيء كتير .

مشيت استحميت وزي ما قالت هي اتظبطت قعدت في السرير حاسه ضهري ح يتكسر من الوقفه الوقفتها في المطبخ والقعدة في الغسيل ..... احمد جاء داخل جاب معاهو حاجات للبيت وداها المطبخ لقى امو واقفه جنب البتوغاز وبتلخبط في الحله ورابطه راسها ،، سلم عليها وقال ليها مالو راسك م يكون واجعك ياامي قالت لي اااخ ياولدي واجعني والله لكن اعمل شنو الشغله الكتيرة م بتخلي الزول يأخد راحتو قال ليها شغله ؟ وين غرام ؟ قالت ليهو غرام من بعد الفطور قالت لي داخله ترتاح خشت غرفتها وتاني م شفتها قال ليها طيب ياامي امشي ارتاحي وم تتعبي نفسك مع الشغله .

طلع من المطبخ عاين على الملابس المعلقه في الحبل امو قالت ليهو الغساله وقفت ياولدي كان اغسل ليك معاي إن شاء الله غيار .... البت المسكينه دي م متعوده على غسيل الأيد قال ليها لالا ياامي غسيل شنو صحتك اهم ديل زاتهن م كان تغسليهن كنتي استنيني اجي اشوف الغساله مالها ،، ارتاحي ياامي صحتك اهم حاجه قالت ليهو بتي ياحليلها كانت مساعداني ..... قمت طالعه من الغرفه تلفوني اتصل شلتو لقيتها دي فاديه بقيت بتكلم معاها كدا احمد جاء قال لي مساء الخير رديت عليهو وقلت لفاديه برجع ليكي بعدين ،، شال ليهو غيار ومشى الحمام البرا اول ما فتح الباب الملابس كانت مختوته فوق الغساله جن واقعات عاين ليهن بإشمئزاز ورفعهن ،، انا ياداب إتزكرت إني مع اللخمه نسيت الملابس في الحمام الطلعتهن للغسيل مشيت لقيتو بستحمى طوالي مشيت المطبخ جبت ليهو مويه جاء من الحمام شرب المويه وهو ساكت وبطبز في تلفونو

الفصل الخامس عشر من هنا