رواية اوركيدا الفصل السادس عشر 16 - بقلم دانيا

رواية اوركيدا

الفصل الخامس عشر 15

بقلم دانيا

بعد طلع من الحمام جاء داخل الغرفه شال المويه شربها وقعد يطبز في تلفونو جاهو إتصال انا قمت مشيت المطبخ اخت الغداء الإتصل عليهو ايمن صاحبه بعد الغداء طوالي قام طلع قال لينا ماشي الاقي ايمن بجي هسي م بتأخر ..... مضت يومين واحمد بقى يرجع البيت متأخر اسألو بقول لي مضغوط شويه بسبب الخسائر الحصلت بسبب الحرق ،، ولا حظت لأنو بكون شارد الوقت كله قعدت جنبو وختيت يدي في يدو وقلت ليهو م تشيل هم يااحمد ربنا كريم بتتسهل عاين لي وشال نفس عميق ومسك يدي وقال لي إن شاء الله ياغرام ونعم باالله ... قلت اسألو عن موضوع الشغل قلت ليهو اها يااحمد م رديت لي خبر بالنسبه لموضوع شغلي في الصيدليه سكت مسافه وبعدها قال لي كدي ياغرام شويه كدا نأجل الموضوع دا شويه ،، انا فهمت قصدو قلت ليهو طيب م مشكله قال لي يلا انا طالع بعدا عاوزة حاجه قلت ليهو سلامتك .

طلع مشى الشغل ومرقت لميت عدة الشاي وديتها المطبخ ضايرت وبقيت بجهز في الفطور وام احمد كانت في غرفتها كانت بتتكلم بالتلفون مع بتها اماني ..... بعد خلصت جاتني في المطبخ قالت لي يابتي انا طالعه على بيت حاجه ربيعه كدي وجايه م بتأخر قلت ليها طيب ياامي ،، طلعت من المطبخ خشت البرندا وقفت مسافه في الباب عاوزة تشوفني طالعه من المطبخ او لا وبعدها طوالي مشت على غرفتي تلفوني كان قاعد في السرير شالتو دستو وطلعت مشت .... وصلت بيت حاجه ربيعه سلمت عليها وونست معاها حبه جات ميناس بت حاجه ربيعه جابت ليها شاي قالت ليها ليه يابتي متعبه روحك كدي ،، قالت لي العفو ياخالتي زينب مافي تعب ولا شيء ،، مسكتها من يدها وقالت ليها تعالي اقعدي جنبي هني من هناك جيت ليكي البت عاينت ليها بإستغراب وقعدت جنبها قالت ليها اتفضلي ياخالتي .

همست ليها براحه عشان حاجه ربيعه م تسمع اصلها هي اضانها تقيله شويه همست للبت قالت ليها انتي يا ميناس بتعرفي تستخدمي الواصطاب؟ البت قالت ليها ااي بعرف مبروك ياخالتي اشتريتي ليكي تلفون ولشنو ؟ لكزتها في يدها وقالت ليها براحه مايسمعوك عاد تلفون كبير انا بدور بي شنو بعرف استخدمو ..... قالت ليها المهم هاكي التلفون دا خشي الواصطاب تلقي رقم غانم ،، البت شالت التلفون وبتعاين فيها مستنيه باقي الكلام .. عاينت ليها كدا قالت ليها خشي يابت سريع البت فتحت الواتساب قالت ليها ياخالتي ما راجيه منك تقولي لي اعمل شنو تاني قال ليها عاد يابتي اكب ليكي الكلام كله دفعه واحدة ؟ بعد تلقي الرقم بوريكي تكتبي شنو .

بقت تفتش في الأرقام قالت ليها لقيتو ياخالتي قلت ليها بس يلا اكتبي " السلام عليكم يااخوي كيف حالكم ، والله عاد يااخوي م عارفه اقول لي شنو ول اجيبها ليك كيف لكن احمد بعد الحريق ظروفو بقت كعبه كعبه ، وهو م بقدر يطلب من زول لكن انا بتكم في النهايه دايرة لي مصارف حبه امشي بيها امورنا لمن وضعنا يتصلح ، وكمان لو فضيت يوم عليك الله بالعربيه حقتك تعال شيل الغساله دي ويها لينا الصلاح لأنها خربانه طولت والقروش م ترسلها لي في حساب احمد هاك دا رقم سيد الدكان الفي حلتنا رسلها لي عندو عشان احمد لو عرف بتبقى ليهو صعبه " البت وقفت الكتابه وبقت تعاين ليها بعد خلصت كلامها قالت ليها كتبتي كلامي دا؟ البت استغربت قالت ليها لا ياخالتو م كتبتو كلو هاجت فيها قالت ليها مالك م كتبتي قالت ليها لكن ياخالتي احمد لو عرف بعمل لمرتو دي مشكله .... عاينت ليها بزهج وقالت ليها إنتي مالك ومالهم البت دي من احمد عرسها شفتو حجم الخسارة الخسرها واهلها العاملين نفسهم طيبين قدام الناس ومعتبرين احمد ولدهم ليه م حاولو يساعدوهو ولو بالبسيط مالو ماعندهم المال يابتي كان م دايرة تكتبي لي وريني اشوف زول تاني .

خصلت من الطبخ اخيراً قلت لا مافي راحه احسن الم الملابس مسافة امي تجي وبعد الفطور اغسلهم ،، مشيت لميت الملابس قلت كدي اتصل لغيداء اوريها إني حالياً م بقدر انزل شغل عشان لو مضغوطين يشوفو زول تاني لمن ربنا يفرجها علينا .... وقفت عاينت للملابس وعاينت للغساله قلت ليها ماتحني شوية وتشتغلي اتعطلتي في الزمن الغلط ،، ميناس قالت لماما زينب قرأ الرساله ياداب وقاعد يكتب قالت ليها اها قال شنو ؟ قالت ليها رد السلام وقال هم كويسين وبسأل عن عافيتكم ،، قالت ليها ردي يابتي قالت ليها رسل صورة شكلو دا إشعار انتظري يفتح ...... قالت ليها فتح رسل 200 الف وقال لبكره كدا برسل ليكي تاني وقال الغساله برسل ليها واحد يصلحها ليكم في البيت ،، قالت ليها يلا اشكريه واقفلي خليني انمش عشان م تفقد تلفونها تسوي لي نصيبه .

دخلت الغرفه شفت في السرير م لقيت التلفون ، التربيزه م فيها الكمودينات م فيهن ، التسريحه مشيت عليها سمعت صوت ماما زينب جات بتنادي فيني ..... طلعت برا قالت لي سويتي الفطور يابتي ؟ قلت ليها ااي جاهز كنت منتظراك قالت لي ختي خلاص م اكون اتأخرت عليكي ؟ قلت ليها لالا م اتأخرتي ،، بعد الفطور مشيت عملت الجبنه سمعت الباب دق قالت لي انا بفتح الباب قلت ليها تمام " انا جوا المطبخ وهي في البرندا " مشت فتحت الباب سمعتها بتقول اتفضل اتفضل لفحت توبي وطلعت برا لقيت زول واقف قدام الحمام قالت لي دا جاء يصلح الغساله قلت ليها الحمد لله واخيراً .

دخلت المطبخ حسيت واخيراً الله فرجها علينا بقيت بتبسم براي قلت معناها احمد الليله شغله كويس لمن جاب زول للغساله ..... مشيت وديت ليهو المويه وخشينا جوا جبت الجبنه ماما مشت ودت ليهو ومسافة شربنا الجبنه جاء دق الباب حق البرندا قال لينا صلحتها خلاص ويلا انا مشيت ،، بعد مشى مشيت دورتها وقعدت اغسل لبعد الظهر بعد خلصت صليت الظهر كنت منهكه من التعب قلت لماما زينب ح اخش انوم حبه واقوم اسوي الغداء قالت لي كويس يابتي ارتاحي تعبتي الليله ،، نمت صحيت بعد العصر صليت والغداء جاهز طلعتو من التلاجه ختيتو يسخن جات ام احمد قالت لي يابتي عندي قروش عند بتاع الدكان كان تقدري امشي جيبيها لي خلي الملاح دا لو سخن انا بطفي الغاز قلت ليها حاضر .

مشيت لبست توبي وجيت قلت ليها كم ياماما زينب ؟ قالت لي 200 الف .

الفصل السادس عشر من هنا