رواية اوركيدا الفصل السابع عشر 17 - بقلم دانيا

رواية اوركيدا

الفصل السادس عشر 16

بقلم دانيا

طلعت برا اتزكرت إني م سألتها كم رجعت ليها سألتها القروش كم قالت لي 200 الف قلت ليها تمام مشيت لبتاع الدكان قلت ليهو عمتي زينب ام احمد مرسلين ليها قروش عندك مرسلاني ليهم طلعهم اداني ليهم وطوالي رجعت البيت اديتهم ليها سمعت صوت تلفوني اتصل مشيت الغرفه لقيتها دي فاديه قعدت اتونس معاها وسألتها عن احوال ناس البيت قالت لي كلهم بخير انتوا خبركم شنو والأمور ماشه معاكم كيف ؟ قلت ليها بسط الحمد لله قالت لي قبل كم يوم عمي عرض على احمد إنو يساعده لكن احمد رفض قال ليهو طيب اعتبرهم دين ولمن الشغل يشمي معاك كويس رجعهم لكن مهما حاول معاهو م قبل "احمد نفسه عزيزة " قلت ليها ابوي م قصرك ربنا يزيد خيره يارب لكن احمد زول زكي وح يقدر يتخطاها بإذن الله قالت لي انتي م ناوية تنزلي الشغل ؟ سكت مسافه وبعدين قلت ليها لسه بدري شويه وماما زينب براها في البيت ولسه م لقت العافيه .

احمد جاء من الشغل لقى امو قاعده في البرندا سلم عليها وقعد معاها يتونس معاها قال ليها الليله ماشاء الله مغسلين الملابس كلها شكله قالت ليهو ااي والله الغساله اتصلحت ياولدي الحمد لله عاين بإستغراب قال ليها سبحان الله الغساله دي عندها نفسيات ولشنو ؟ انا كل الأيام الفاتت دي بحاول فيها م اشتغلت .... قالت ليهو هيي ياولدي تشتغل براها شنو الزول الرسلتو لينا جاء وصلحها لينا ماشاء الله .... عاين ليها بإستغراب اكتر ورفع حاجبه قال ليها زول؟ الزول منو الجاكم انا م رسلت ليكم زول ،، بقت تعاين ليهو قالت ليهو اجي ياولدي يكون فاعل خير؟ حتى كان فاعل خير عرف كيف الغساله خربانه ؟ قال ليها والله ياامي انا م رسلت اي زول هو انا فاضي اتزكر الغساله ،، بكون رسلو صاحبي ايمن ولشنو؟ .

قالت ليهو والله دي حاجه تحير قال ليها انتوا م سألتوه رسلك منو ؟ قالت لي ياولدي انا الدخلتو م سألتو لانو مافي غيرك ممكن يعمل كدا والزول حالتو م سأل من قروش زاتو كدي اضرب لصاحبك ايمن دا اسألو م يطلع زول حرامي وداير يكتشف البيت عشان يرجع يسرق خوفتني ..... سكت مسافه وقال ليها تلفونك وين ياامي انا تلفوني بعتو ،، عاينت ليهو بخلعه قالت ليهو بعتو ؟ ااخ ياولدي الجاتك م هينه ربنا يفرجها عليك م كان تبيع تلفونك قال ليها روقي ياامي التلفون يتعوض قريب بإذن الله م تشغلي بالك قالت ليهو ونعمه باالله ياولدي ... تلفوني جوا الغرفه لكن م فيهو رصيد قال ليها م مشكله بتصل ليهو من تلفون غرام .

خلصت المكالمه وقمت طالعه لقيت احمد جاي خاشي سلم علي وخشى جوا مشيت جبت ليهو مويه وجيت لقيتو راقد في السرير وخاتي يدو تحت راسو قلت ليهو شكلك تعبت الليله قام شال مني المويه وقال لي اصلو التعب مقسوم قعدت جنبو قلت ليهو ربنا يهون يارب .... مسك يدي وقال لي تعبي انا م مشكله لكن انتي وامي م عاوزكم تتعبو ولا تشغلوا بالكم بشيء كله بتسهل ومبروك غسالتكم اتصلحت لكن م كان تجتهدو تغسلو الملابس كلها غسلو حبه حبه لمن الأمور تظبط بإذن الله ح اجيب ليكم واحده تغسل ليكم انا م برضى لأوركيدتي التعب ولا امي انا لو علي انتوا تنومو ويخدموكم لكن ندعي بس الوضع يتصلح .

ماما زينب نادتني قلت ليهو صوت ماما بتناديني ح امشي نخت الغداء مسافة انت تستحم قمت ماشه قال لي دقيقه تلفونك فيهو رصيد ؟ عاوز اتصل لأيمن قلت ليهو ااي بكون فيهو تلقاهو في التربيزة وطلعت مشيت .... شال التلفون اتصل لأيمن سألو قال ليهو والله يااحمد انا لي يومين برا المنطقه طلعت على البلد عندي عمي عيان قال ليهو الف سلامه ليهو ،، بعد خلص المكالمه قعد خاتي يدو في دقنو محتار في الموضوع فكر فيهو كتير م قدر يستوعبو فتح الدولاب شال ليهو غيار ومشى الحمام بعد طلع واتغدينا ومشى صلى المغرب وجاء نحن كنا قاعدين في الحوش قال لي تلفونك وينو عاوز افتح صفحتي عندي زبون عاوزو يرسل لي صور للبضاعه الطلبتها جديدة ،، قلت ليهو صحي انت وين تلفونك ؟ قال لي اترحم عاينت ليهو بإستغراب امو قالت لي باعو يابتي .

قلت ليهو ياالله م كان تبيعو لكن الحال غالب م مشكله شيل تلفوني دا اشتغل بيهو لمن الوضع يظبط اصلاً قاعد ساي قال لي لالا هسي عاوز افتح صفحتي بس اشوفو رسل ول لا .... شال التلفون وخشى الغرفه قعد في السرير وفتح الشبكه جات رسائل في الواتساب من ضمنهم رسائل من اخوي غانم " يا غرام الزول البصلح وريتو وقال جاي عليكم حقه مدفوع ولو احتجتي اي حاجه تاني م تترددي كلميني تمام وسلمي على الكل " احمد عاين للرساله بإستغراب شديد قراها مرتين وتلاته وبعدها دخل الواتساب لقى الرسائل حقت الصباح والإشعار ،، احمد بقى يعاين للتلفون بتفاجئ للحظه حسى بالإنكسار والغضب في نفس الوقت .... مسك التلفون بشدة وبقى يعاين ليهو لمن عيونو حمرو م فضل ليهو غير يضرب بيهو الحيطه افكارو اتلخبطت بقى يتزكر في زمن كان في البدايات بجي يراغبني من بعيد وانا ماشه على المدرسه مع فاديه وزمن اتكلم معاي اول مره واتزكر كلام امو عن البنات الدارسات ،، واتزكر لمن جاء من الشغل لقى امو رابطه راسها وواقفه في المطبخ .

ختى التلفون في السرير ومرق جاء برا امو قالت ليهو ماشي وين ياولدي ؟ قال ليها قريب وجاي ياامي قلت ليهو متين خلصت بالسرعه شيلو معاك هو اصلاً قاعد مجدوع ساي التلفون دا م عاين لي زاتو قال لي لا قضيت غرضي وطوالي طلع

دخلت الغرفه رقدت في السرير وشلت التلفون قلت اشوف الجديد شنو لي زمن م اتصفحت فتحت الواتساب شفت اول دردشه حقت اخوي غانم قلت من متين الرسائل دي فتحتها ولمن قريتها عدتها قريب عشرة مرات عشان اقدر استوعب انا متين متين اتكلمت مع غانم ؟ لا والحاجه الصدمتني اكتر الكلام المكتوب قلبت التلفون بإتجاهو الخلفي عاوزة اشوفو دا تلفوني او لا ... اياهو دا تلفوني حسيت نفسي محوصه عيوني م بشوفن سمح تاني رجعت قريت الرسائل اتزكرت إنو احمد قال عاوز التلفون تاني اتزكرت كلام فاديه إنو ابوي عرض عليهو إنو يساعدو وهو رفض ،، بس كمان انا م اتكلمت مع غانم للحظه حسيت راسي شطب عاينت للرسائل تاني لفت إنتباهي الزمن حقهن إنو مرسلات الصباح قلت في نفسي انا الوقت داك بعمل في الفطور وكمان احمد كان مافي واصلاً احمد مستحيل يعمل كدا بس كمان م جانا زول من برا نهائي الليله الحاصل شنو ياالله والله انا راسي حاساهو ح يضرب من الموضوع دا إن شاء الله بس احمد م يكون شافهم يقول عني شنو ؟ لا بس دقيقه قمت على حيلي وختيت يدي في راسي معقوله دي ماما زينب ؟ لالا هوي ياغرام حرام عليكي إن بعض الظن إثم طق جات في راسي إنو هي رسلتني الدكان ودا نفس المبلغ المحول انا دي عيوني بقن يشوفن طشاش .

احمد مشى في قهوة فاتحه جنب الظلط مشى شال كرسي ختاهو بعيد وقال للمرا اعملي جبنه ختى الكرسي وقعد فيهو وخلف رجلينو وخت يدو على دقنو وفي الف حوار في راسو .. فكر معقولة ياغرام معقولة يطلع منك انتي كدا ؟ معقولة م قدرتي تتحملي الوضع الصعب دا الفترة البسيطه دي ؟ خيبتي ظني فيكي ،، شرد بعيد والأفكار تودي وتجيب في راسه عمل مقارنات كتيرة في راسه وبعدين قال لنفسه بنبرة إنكسار " لا يااحمد م من حقك تلوم بت الناس على تصرفاتها الحق عليك انت لأنك عاينت فوق شديد المفروض تفكر في وضعك المتقلب دا مره الحظ معاك ومره ضدك كان تفكر في الإمور دي قبل تجيبها وتعرف إنك م قادر تعيشها زي ما كانت عايشه في بيت ابوها .. عاين ليها اتزكر وقت جبتها كانت كيف وحالياً بقت كيف ؟ جبتها اوركيدا منورة وهسي بقت دابله ماتلوم غيرك واعترف بغلطتك " بقى قاعد في الكرسي ومدنقر راسو وشابك يدينو في وشو .

بقيت قاعده على اعصابي وم عارفه اتصرف كيف قعدت للساعه عشرة صاحيه احمد جاء داخل الغرفه غمضت عيوني عملت نفسي نايمه لمن شالتني نومه صحيت الصباح عاينت لقيت احمد مافي إستغربت قلت المصحيهو بدري شنو ،، قمت مشيت اتوضيت صليت هو جاء من الحمام البرا بعد خلصت من الصلاه هو كان قاعد في طرف السرير وساكت بالعادة بقول لي ربنا يتقبل .. عاينت ليهو وقلت ليهو صباح الخير قال لي صباح النور قلت ليهو قايم بدري الليله عندك شغل بدري ولشنو ؟ ح امشي اعمل الشاي مشيت على الباب قال لي غرام اتلفت وقلت ليهو نعم قال لي تعالي اقعدي ،، للحظه ضربات قلبي زادت قلت هسي كان سألني اقول ليهو شنو ؟ جيت قعدت جنبو سكت مسافه وبعدين مسك يدي وقال لي شوفي ياغرام انا عارف إنو انتي بيئتك الجيتي منها مختلفه عن وضعنا نحن وصديقيني لو ما القدر الحصل دا انا كنت ساعي اعيشك احسن عيشه م تخليكي تفتقدي لأيامك في بيتكم لكن نحن بنقول شيء والقدر بكتب شيء تاني .

وانا م لايمك على شيء ولا شايل عليكي وعارف إنك صعب تتأقلمي بالسرعه دي وانا آسف على اي تقصير حصل في الفترة دي وبتمنى من الله إنو يوفقني ويساعدني في الفترة الجايه دي عشان اقدر البي كل احتياجاتكم في البيت وم تحتاجو لشيء تاني .. سمعت كلامو دا كله وانا بيني وبين نفسي حسيت بالخيبه شديد اتمنيت اقول ليهو لا يااحمد والله انا م كدا لكن قلت بدال تحصل خلافات في البيت بينو وبين امو وتطلع بالخيبه قدامو احسن يقولو اخت طلبت من اخوها عادي بدال ما يحصل خلاف ااااخ ياماما زينب اريتك حذفتي الرسائل على الأقل ،، عاينت لأحمد وشفت في ملامحو هو قدر شنو حاسي بالضعف والإنكسار اتمنيت يكون دا حلم .. قلت ليهو يااحمد انت ليه بتقول كدا ؟ انا م متضايقه من الوضع بالعكس انا مؤمنه إنها فترة وبتعدي م تشغل بالك

الفصل السابع عشر من هنا