رواية اوركيدا الفصل الثامن عشر 18 - بقلم دانيا

رواية اوركيدا

الفصل السابع عشر 17

بقلم دانيا

مرت الأيام سريع ونسينا الموضوع انا م سألت ماما زينب وهي نهائي م جابت لي سيرة بتتصرف طبيعي واحمد الحمد لله شغله استقر والأمور طيبه دخلنا على فصل الشتاء اكتر فصل انا م بريدو طبعاً انا من وقت في بيتنا في الشتاء دا لمن اتكرفس بالبطانيه دي تاني م بقوم بدري للمدرسه إلا امي تصحيني مرتين وتلاته لكن هنا الوضع مختلف .. بقيت بحاول جهدي اقوم بدري بس كأنو الشيطان بوسوس لي بقول لي نومي م تقومي اصلاً الجو بارد شديد برا النانوسية ،، احيانا بقلبو وبقوم واحيانا م بصحى لمن اقوم بلقى ماما سيده عملت الشاي لمن بحس بالإحراج وهي عندها رطوبه الوقت كله تشكي من رجلينها .

احياناً بصحى بلقى احمد طلع الشغل والساعه بتكون قريب تسعه قلت لا كدا م بجي انا لازم القى حل بقيت بشغل المنبه وبقول لأحمد حتى لو م سمعت المنبه انت صحيني ،، لكن هو م بصحيني لمن القى نفسي اتأخرت في النومه بسألو بقول ليهو ليه م صحيتني ؟ بحلف لي بقول لي صحيتك لكن انتي نومك تقيل ... نقعد نتقالك .

الليله قمت عاينت للساعه لقيتها سته ونص لمن فرحت قلت الحمد لله صحيت جريت على المطبخ لقيت ماما زينب قامت قبلي قلت ليها صباح الخير حالتي فرحانه قلت صحيت بدري .. قالت لي انا قمت مع الآذان رجولي واجعاتني لكن قلت احمد بطلع بدري اسوي ليهو الشاي يدفي بيه قلبه م يطلع في البرد دا بدون شاي كان تكلتو عليك انتي يابتي بفقدو ،، كلمتها دي إستغربت منها شديد وقفت مسافه بس بعدين قلت في نفسي الله لا يقدر لكن كلامها صاح ياغرام انتي مهمله .... قلت ليها ح اصحى بدري تاني إن شاء الله .

مشيت الغرفه لقيتو قاعد يجهز عشان يطلع قال لي متين كدا عملتيهو ؟ قلت ليهو ياريت عملتو لقيت ماما عملتو خلاص انت امشي اشرب بلم شعري دا وبجي .. هو طلع وانا سرحت سريع سريع ومشيت عليهم بعد شرب الشاي قال لينا يلا انا مارق ،، مشى وبعد شربنا الشاي امو مشت غرفتها وانا ضايرت المطبخ وبديت اجهز في الفطور تلفوني سمعتو رن مشيت لقيها غيداء متصله رديت عليها قالت لي جيت بيت ناس امي هنا من امبارح قلت ليها كويس والله لو كلمتيني كان جيتكم واتونسنا قالت لي جاينك بعد الفطور مع فاديه نشرب معاكي الحبنه قلت ليها خير ما فعلتو والله اشتقت للونسات والقعدات .

بعد فطرنا جهزت حاجات الجبنه ومشيت استحميت كلمت ماما زينب قلت ليها فاديه وغيداء جايات قالت لي مرحب بيهن انخش ننوم حبه والله رجولي ديل ابن القعاد قلت ليها كويس اخدي راحتك .. شوية كدا والبنات جن خشن سلمن عليها وطلعن قعدنا في البرندا نتونس وولعت الكانون وجبت حاجات الحبنه فاديه قالت لي انا بسويها ،، سوتها وقعدنا نشرب ونتونس عاينت لي وقالت لي بمزح يابت إنتي مالك غبشاء كدا ؟ وين الحنه والدخان ؟ ضحكت وقلت ليها هو في وقت لدا كلو غيداء قالت ليها م تشوفيها كدا هي من زمان كسلانه ضربتني في كتفي وقالت لي البسمعك بقول شغاله برا البيت وجوا البيت قومي جيبي حنتك هسي بختها ليكي .

قلت ليها اووووف حنه شنو يابت دي بتأخد معاي وقت وقعاد كتير وتاني اطلعها واختها دا موضوع طويل م ناقصه انا .... غيداء ضحكت قالت ليها م قلت ليكي كسلانه خلاص شوفي ياغرام خليهو كلام فاديه دا لو عندك بيقن جيبيها انا هسي بخت ليكي شكل بسيط وحلو ،، عجبنتي فكرتها لكن اتزكرت إنو م عندي بيقن في البيت قلت ليها ياخ اكسري الحنك انا م عندي اخلاق لدا كله .... قالت لي بنبرة حاده قومي يابت خلي العوارة قلت ليها مصره يعني ؟ طيب دقيقه ورح نشوف الدكان دا لو عندو استني نلبس توبي ونجيب القروش مشيت خشيت جوا فتشت كل الأدراج م لقيت قروش شفت الدولاب م لقيت فيهو رجعت ليهن وقلت ليهن ياخ ليها المره الجايه انا بجيكم وبجيبها معاي .

فاديه عاينت لي وقالت لي م لقيتي قروش ول م لقيتي توبك ؟ وضحكت قلت ليها عادتك م بتخليها قالت لي جد كدا ورح يازوله البسي توبك سريع قلت ليها مالك يابت ما قلنا خليها جات مسكتني من يدي وقالت لي بطلي هبل ورح جابت التوب ختتو لي في راسي لبستو وقلت ليها دقيقه اكلم ماما زينب مشيت وقفت في الباب لقيتها نايمه .. فاديه قالت لي يلا ما ياهو الدكان كلها خطوتين طلعنا مشينا ،، ماما زينب صحت فتحت عيونها وقالت في نفسها اصبري لمن احمد يجي

الفصل الثامن عشر من هنا