رواية اوركيدا الفصل التاسع عشر 19 - بقلم دانيا

رواية اوركيدا

الفصل الثامن عشر 18

بقلم دانيا

مشينا جبنا البيقن من الدكان سريع وجينا اديتها لغيداء رسمت لي شكل بسيط وحلو شديد قالت لي شفتي ياداب كدا بتشبهي المرا المتزوجه وضحكن قلت ليها تسلم يدك حبيبتي دا بفضلك قالت لي ولو العفو .. قاعدين كدا سمعنا العصر اذن فاديه قالت ل غيداء نمشي بعدا ؟ لأنو الشفع في البيت مع امك براها وبكونوا عاملين ليها غلبه قلت ليهن اقعدوا شويه ياخ على الأقل اتغدوا معانا ،، قالن لي هناك برضو الغداء راجينا المره الجايه وعمتك كان صحت سلمي عليها .. مرقن مشن وانا قعدت حارسه الحنه تجف لمن شالتني نومه .

صحيت قريب المغرب قمت مخلوعه لأني نمت كتير ونسيت موضوع الغداء قمت سريع مشيت برا غسلت الحنه ومشيت على المطبخ لقيت ماما زينب قاعده في المطبخ شغاله في الغداء قلت ليها ليه قمتي عملتيهو كان تخلي انا بجي اعملو غفيت من دون مااحس وشالتني نومه !! اتلفتت عاينت لي وقالت لي " لالا خلي شغل البيت دا انا بعملوا انتي اهتمي بنفسك عشان م تتبشتني " قالتها لي بطريقة كدا اتصدمت فيها هي اول مره تنضم معاي كدا عبارتها اترددت في زهني قلت ليها بشتنة شنو ياامي معقولة ؟ قاطعت كلامي وقالت لي احمد جاء امشي ودي ليهو المويه .

بقيت واقفه قلت ليها احمد جاء هو الزمن دا فات للدرجه دي ،، شلت مويه ومشيت لقيتو خشى الحمام ختيتها وقعدت في السرير هو جاء خاشي قال لي مساء الخير لكن كان متغير قلت ليهو مساء النور .. كيف كان يومك ؟ سكت مسافه وهو واقف قدام المرايه بسرح في شعرو وبعدين قال لي تمام وسكت على كدا !! الصباح صحيت بدري لأنو الجو بقى دافي شوية مشيت المطبخ ختيت براد الشاي في النار جات ماما زينب داخله قالت لي صباح الخير قلت ليها صباح النور الليله كيف من وجع رجليكي ؟ قالت لي تمام خليهو الشاي دا انا بعملو وكانت تعابير وشها م بتتفسر حسيتها متضايقه من حاجه .. قلت ليها لالا ياماما انا بعملو انتي ارتاحي بس .

شلت علبة الشاي جات شالتها من يدي قالت لي ماقلت ليكي انا بعملو خلي شغل بيتي دا انا مجبورة اعملو عشان ما يقولو عنك اتبشتنتي بشبب الشغله في بيتي دا .. بقيت بعاين ليها بإستغراب وم مصدقه البسمعو قلت ليها في شنو ياماما زينب انتي زعلانه مني في حاجه ؟ سمعتي مني شنو انتي ؟ جاء احمد خاشي قال لينا مالكم ياجماعه في شنو اصواتكم طالعه؟ مالك ياغرام ؟ عاينت ليهو قبل افتح خشمي امو ردت قالت ليهو ياولدي مافي حاجه لكن مافي داعي مرتك تقول إنو من كترة الشغله في البيت دا م قادره تهتم بنفسها ،، ومعقولة يااحمد انت م مصرف مرتك لدرجة حق الحنه م يكون عندها لمن تحتاج لأختها ومرت اخوها يشترو ليها حنه ويحننوها ليك .

انا بقيت واقفه وبعاين ليها مصدومه من الصدمه حسيت رجلي نملو م قادرين يشيلوني م اتوقعت الموضوع العادي دا والكلام الإتقال في شكل مزح دا يكبر ويتطور للدرجه دي ... قلت ليها ياامي زبنب دا كلام شنو انا ما قلت اتبشتنت بسبب الشغله وكمان قاطعت كلامي وقالت لي انا مرا كبيره في مقام امك عاوزة تطلعيني كذابه انا اكذب فيكي لشنو ؟ من الحسره دموعي نزلو قلت ليها لاوالله ياامي العفو دا م قصدي لكن انتي فهمتي غلط ،، احمد ساكت م قال اي كلمه كان بعاين لينا وهو ساكت .

امو مسكت راسها قالت مصدعه ساقها وداها غرفتها وهدائها وجاء لقاني واقفه في مكان مستغربه من الحصل قلت ليهو يااحمد والله امي زينب فهمت الموضوع غلط انا لي كم فترة معاكم حصل سمعتو مني شيء ؟ عاين لي وقال لي حتى لو هي فهمت غلط مفروض م تجادليها عارفاها عندها ضغط ياغرام وقبل افتح خشمي بحرف طلع من المطبخ ... قعدت ابكي وحسيت بحسره كبيره من الشيء الحصل الشاي فار اتدفق جهزتو ووديتو ختيتو في البرندا ومشيت لأحمد عشان يجي يشرب الشاي لقيتو جهز ماشي الشغل قلت ليهو الشاي ،، قال لي اتأخرت وطلع مشى .

عدت كم يوم المساء كنت قاعده في الغرفه بعد المغرب اصلاً ماما زينب بقت م بتتونس معاي واحمد بطلع الشغل الصباح بجي بعد العصر وتاني بطلع بجي إلا بعد العشاء ... جاء احمد خاشي وصل تلفونو في الشاحن قمت ماشه اجيب ليهو مويه قال لي غرام عاينت ليهو قال لي تعالي اقعدي عاوزك في موضو .. عاينت ليهو بإستغراب وجيت قعدت قعد جنبي في السرير وختى يدو في دقنو وسكت مسافه وبعدها عاين لي وقال لي شوفي ياغرام م عارف ابدأ ليكي كيف ؟ قلت ليهو في شنو يااحمد ؟ احكي قال لي م تفهمي غلط اول شيء والكلام الحأقولو ليكي دا م ليهو علاقه بالأحداث الحصلت ، وكمان م بعني إنو مكانتك عندي اتبدلت او كدا ابداً انا بالنسبه لي انتي اختياري الأول والأخير لو مهما حصل ومكانتك عندي م بتتغير لمن اموت لكن ،، انا بقيت على اعصابي منتظرة الخلاصه ... دنقر مني وقال لي " انا عاوز اتزوج بت خالي " بقيت اعاين ليهو .

الفصل التاسع عشر من هنا