رواية اوركيدا الفصل الثاني والعشرون 22 - بقلم دانيا

رواية اوركيدا

الفصل الحادي والعشرون21

بقلم دانيا

وقت قالت ليها بس الحمد لله احمد م نسى وعدو ليكي ولكن كله بفضل مجهوداتك انا بقيت حاسه راسي تقيل للحظه مخي بقى جايط وم قادرة افهم قلت في نفسي لحظه البت دي قصدها شنو ياتو وعد وياتو مجهودات؟! بتكلمو عن شنو ؟ وبعدين هم ليه اتقلبوا علي فجأة واتغيرو !! ولا كأنو ديل م نفس الناس الجو مع ولدهم وطلبوا يدي لولدهم وبعدين انا من جيت هنا ما شفت شيء سيء من زول .... شبكت يديني في راسي ومررتهم على وشي وقلت ياربي الحاصل شنو حسبي الله ونعم الوكيل من تغير الأحوال المفاجأ دا ،، سمعت اماني بتقول لأمها ح اخش اسلم عليها عشان م تقول ليه م جيت سلمت عليها هي اصلاً لسه قاعده بتعمل شنو لو كنت مكانها كان مشيت بيت اهلي في ليلي .

اتصدمت من كلامها السمعتو قلت لا حوله ولا قوة إلا باالله م اتوقعتكم كدا والله ،، للحظه عيوني دمعو وقبل تصل باب الغرفه جريت التوب واتغطيت وعملت نفسي في سابع نومه ... جات فتحت الباب وقفت عاينت لي مسافه وبعدها رجعت بعدةمشت فتحت عيوني ومسحت دموعي قلت انا ذنبي شنو معاكم من البدايه جايبني ليه وقت م متقبلني بيناتكم ،، حسبي الله ونعم الوكيل فيكم لو كنت بعرف من البدايه إنكم م راضيين م كان اتزوجت ولدكم زول اهلو م عاوزني بعمل بيهو شنو انا .

قاعده كدا لمن سمعت العصر اذن قمت طلعت برا لقيتهن مافي في البرندا مشن المطبخ مشيت الحمام اتوضيت وجيت صليت ... وطلعت سلمت على اماني عاينت لي كدا وقالت لي عارفه الموضوع صعب عليكي يابت امي لكن نسوي شنو سنة الحياه الراجل محلل ليهو اربعه !! وبعدين م تخافي لأنو احمد اخوي عادل واكيد م ح يقصر في واجبو لا تجاهك ولا تجاه العروس ح يعدل بينكم ختي ايديكي ورجليكي في مويه بارده ،، انا كنت طالعه من المطبه وقفت انتظرتها خلصت كلامها وبعدين قبلت عليها وقلت ليها " انا واثقه م تشغلي بالك " وعقبال ارد ليكي بنفس طريقتك ... ومشيت منها انفجرت من الغضب ورفعت صوتها وقالت لي " الله م يقدر ياحاقده قايله كل الرجال احمد او كل الحريم انتي عشان يعرسو فيهن " .

م رديت ليها ولا اشتغلت بيها خشيت الغرفه وفرشت المصلايه صليت كدا احمد جاء خاشي سلم على رديت ليهو وطلع مشى لناس امو في المطبخ قعد معاهم قريب نص ساعه وجاء راجع لقاني جاهزه ... بقى يعاين لي قال انتي مصره تطلعي ؟ مافكرتي في كلامي القلتو ليكي ؟ ياغرام عليك الله ماتمشي اطلبي واتأمري وانا بنفذ ليكي لكن م تمشي ،، رفعت راسي عاينت ليهو واتزكرت كلام ناس امو وونستهن القبيل .. قلت ليهو شوف يااحمد انا انتظرتك بناءً على طلبك إذا م عاوز توديني بمشي براي .

جريت شنطتي وقمت طالعه مسكها مني قال لي طيب ورح طلعنا برا عاين لي كأنو بقول لي م ح تكلمي ناس البيت إنك ماشه لكن م قالها من نظراتو فهمت قصدو ،، قال لي دقيقه وراجع خشى جوا وانا بقيت واقفه برا منتظراهو م طول جاني طالع وجات وراهو امو قالت لي اجي يابتي ياغرام دا كلام شنو ؟ تمشي بيت اهلك لشنو الموضوع م مستاهل دا كله ماك اول مره يعرسو فوقها انتي بس ماعليكي بشروطك ورضويتك واطمني مكانتك محفوظه بيناتنا ومافي واحده فيكن بتأخد مكان اختها وكان اتفقتن بتعيشن اخوات .

عيني دي م رفعتها ليها قلت لأحمد مشينا ؟ قال لي طيب وقال لأمو خشي ياامي وبإذن الله بتتسهل .. مشينا على الظلط ركبنا ركشه وخلال كم دقيقه وصلنا بيت اهلي نزلنا من الركشه احمد حاسب ووقف مسافه قبل نخش حسيت بيهو متوتر بس قلت يلا م عندي بيهو شغله ،، دقيت الباب جاء غانم فتح الباب لقاني دي انا سلم لي وقال لي نورتي واخيراً شرفتينا جاتك من وين الليله ؟ شاف احمد كان واقف على طرف الباب قال ليهو اوووو السيد احمد اخبارك دي شنو المفاجأة الحلوه دي ؟ احمد سلم عليهو بالكتف وانا خشيت جوا غانم شاف الشنطه ورا احمد عاين ليها وعاين لأحمد بإستغراب للحظه ملامح وشو اتغيرت لكن م سأل اي سؤال بس قال لينا اتفضلوا .

خشيت سلمت على امي كانت في الصاله وفاديه لمن سمعت صوتي طلعت من غرفتها جات سلمت علي وقالت لي احلى مفاجأة والله ابتسمت ليها إبتسامه خفيفه كدا ومن جواي حزينه وخايفه من ردة فعلهم ... احمد خلى الشنطه في الحوش ودخل الصالون مع غانم سلم على ابوي وقعد في الكنبه الجنب الباب وبقى يطقطق في اصابعينو ،، ابوي سألو عن ناس البيت قال ليهو كويسين ح امشي بهناك اسلم على ناس امي روعه ابوي قال ليهو اتفضل .

امي قالت لي وين احمد م جاء معاكي ؟ قبل ارد ليها دق الباب وقال السلام عليكم امي قالت ليهو وعليكم السلام حبابك ياولدي مرحب بيك اتفضل جاء سلم عليهم وسألها من صحتها ورجع بهناك لناس ابوي ... غانم جاء شال مويه وداها لأحمد وعاين لي بإستغراب حسيتو في كومة اسئله في راسو لكن م اتكلم قال لفاديه ختي الغداء ومشى ودى المويه ،، فاديه قامت مشت المطبخ تخت الغداء بقينا قاعدين انا وامي بقت تعاين لي قالت لي يابتي عيونك م طبيعيات خير حاصله حاجه؟ انتي من جيتي ساكنه م من عوايدك !! للحظه اتوترت وم عرفت اقول ليها شنو عاينت ليها وابتسمت إبتسامه خفيفه وقلت ليها مافي حاجه ياامي طمني بالك .... غانم جاء شال الغداء ومشى الصالون وفاديه جابت الصونيه حسيت نفسي قافله من حاجه إسمها اكل وبطني طامه شديد .. قلت لا ياغرام إذا م رضيتي تاكلي ح يستلموكي بالاسئله مشيت غسلت يدي وجيت اكلت كم لقمه حسيتهم وقفوا لي في حلقي وحسيت بطني طمت زياده قمت جري الحمام استفرقت كل الأكلتو .

امي وفاديه بقن يعاينن لي وعاينن لبعض امي قالت لفاديه حتى انتي بتفكري زيي ؟ فاديه حركت راسها بمعنى نعم ... قامن من الأكل وجن وقفن لي في باب الحمام اول ما طلعت طلعت حيلي كله مهدود لقيتهن في وشي فاديه سندتني ودخلنا الغرفه ،، غانم جاء دق الباب لمن شافني تعبانه قال ليهم مالها غرام الحاصل شنو ؟ امي قالت ليهو مافي شيء ياولدي مرض العافيه عاين لي بإستغراب وقال ليها كيف يعني هسي مش جات كويسة ؟ قمت قلت ليهو انا كويسة مافي حاجه قال لي ابوي عاوزك في الصالون ... امي اتلفت عليهو وقالت ليهو عاوزها في شنو ؟ ورجعت عاينت لي قالت لي في شنو يابت ؟

الفصل الثاني والعشرون من هنا