رواية اوركيدا الفصل الثالث والعشرون 23 - بقلم دانيا

رواية اوركيدا

الفصل الثاني والعشرون22

بقلم دانيا

غانم جاء وقف جنب الباب وقال لينا مالكم في شنو دي مالها امي قالت ليهو مافي حاجه ياولدي عياء العافيه قال ليها هسي مش جات كويسة ؟ قلت ليهو انا كويسه مافي حاجه قال لي طيب ابوي عاوزك في الصالون .... امي اتلفت عليهو وقالت ليهو عاوزها في شنو ؟واتلفتت عاينت لي وقالت لي في شنو يابت ؟ من جيتي انا حسيت في حاجه من وشك م طبيعيه قمت نزلت من السرير ولبست شبشبي غانم قال لأمي مافي حاجه ياامي روقي طلعت من الغرفه عاينت لغانم الكان بعاين لي وعيونو فيها مية كلمه لكن ساكت مشيت دقيت باب الصالون ابوي كان قاعد في سرير مقابل الباب وماسك سبحتو في يدو رفع راسو عاين لي وقال لي اتفضلي يابتي خشي .

دخلت احمد كان قاعد في كرسي جنب الباب مدنقر راسو وبعاين في الأرض جيت قعدت جنب ابوي بعد هدوء دام لعدة ثواني ابوي عاين لي وعاين لأحمد وبدأ حديثو اول شيء جاب لي مقدمه طويله عريضه عن الزواج وعن المسؤليات والإلتزامات البتلقاها البت في بيت راجلها سواء كانت عايشه في بيت منفصل او مع النسابه وبعدين ختم كلامو بالتعدد وكلام كتير احمد قال ليهو م قطعاً لحديثك ياابوي وايوه صاح زي ماانت قلت المشاكل والخلافات دي موجودة في اي بيت في لكن انا غرام م شفت منها شيء والكلام دا م عشان قدامها هي لا والله ..... لكن اقسم باالله انا منها ماشفت شيء سيء وحتى نقاشاتها مع امي انا م شايف فيها حاجه ماهي حاجات زي دي عادي بتحصل لكن انا قلتها ليها وبرجع بقولها ليها قدامك ،، طوالي غانم جاء خاشي .. قال ليهو قدامك وقدام اخوها دا انا جايب الزولة دي حلل مشكله وم مبدلك بيها ومستحيل تحصل .

لكن انتي ماتستعجلي في الحكم وادي نفسك فرصه للتفكير قلت ليهو قدام ناس ابوي ديل بسألك سؤال وتجاوب بصراحه " انت بت خالك دي وعدت بيها امك قبل كدا ول لا ؟ " اتردد في الإجابه وتاني قال ايوه صاح حصل لكن انا ما كنت ناوي او مفكر حتى في الموضوع دا فكرت امي لمن تتعرف عليكي اكتر ح تغير رايها .... غانم قاطع حديثو وقال لي شوفي ياغرام النضم الكتير في الموضوع م حبابو ومن الآخر كدا هسي احمد كلامو واضح انتي ما عليكي بشروطك ورضويتك مااكتر إما الحاجه الإنتي بتفكري فيها دي احسن تشيليها برا من راسك " نحن يابت طلاق ماعندنا " هو انتوا متين اتزوجتو سنه م تميتوها جابت ليها دور طلاق فكري في ابوكي دا على الأقل لأنو قبيل وقت نحن عارضنا هو الوقف جنبك ووقف في وشنا وقال بتي غرام انا معاها وما بجبرها على شيء .

واتزكري كلامي القبيل قلتو ليكي قبل تتزوجي ، وحاجه عاوز اوضحها ليكي " انتي تجينا في حال احمد القاعد دا مقصر في واجباتو معاكي او هانك ، شتمك ، ضربك .....الخ ، لكن موضوع عرس ما عرس دا دي قرارت شخصيه نحن م بندخل فيها ما دا اختيارك انتي من الأول " ابوي قال ليهو اهدأ ياولد الأمور م بتتحل كدا قام على حيلو وقال عن إذنكم وطلع برا ،، بعد هدوء دام لعدة ثواني احمد قال ياغرام م تضغطي على روحك لكن اتأكدي من حاجه واحده احمد ياهو احمد ماح يتغير عليكي في حاجه وكوني واثقه انا شاريكي وم مبدلك ومستحيل يحصل ولو بعد ميه عام انتي ح تفضلي اختياري الأول والأخير وانا عاوزك تدي نفسك وقت وفكري بينك وبين نفسك قدامك إسبوع كامل فكري واديني قرارك وانا من هنا للوقت داك م ح اعمل اي شيء في موضوع العرس لمن القى جوابك وبعدا انا استأذنكم .... سلم على ابوي وقال ليهو اعفى لي ياابوي ابوي قال ليهو خير ياولدي بإذن الله م بحصل غير الخير .

طلع مشى قلت لأبوي عن إذنك قال لي طيب يابتي انا زاتي اقوم احصل صلاة العشاء في الجامع .... طلعت من الصالون مشيت بهناك لقيت امي وفاديه قاعدات امي من شافتني قلبت يدينها وقالت لي كُر يابتي عاد حسبي الله ونعم الوكيل فيهم عاد بتي عروس لسه م تمت سنه الناس يقولو علينا شنو ،، عرسو فيها في سنتها ولو اتطلقتي يقول بت يونس طلقوها في سنتها !! الله يجيرنا في مصيبتنا كلو من ابوكي انا قبيل قلت ليهو وهو م سمع مني " كلام امي دا حسيتو زي الخناجر في صدري للحظه حسيت الدنيا ضلمت في وشي " بقيت واقفه جنب الباب وحيلي مهدود .

ابوي كان في الوضايه بتوضى اول ما خلص جاء خاشي زحيت ليهو من الباب قال لي خشي يابتي ارتاحي جاء وقف في الباب وقال لأمي ياروعه ياروعه دا كلام شنو ياخ البتقولي فيهو دا اخجلي شوفي لحالة بتك لمن وشها اصفر خليها تخش ترتاح وتقدر تأخد نفس بدال ما تستلميها بالكلام الفارق وطلع مشى الجامع ..... مشيت على غرفتي وقفلت الباب وراي رقدت في السرير وقعدت ابكي والأصوات بتتخابط في راسي لمن عملت لي صداع جاتني فاديه بقت تهدئي فيني عاينت ليها وحضنتها وقعدت ابكي قلت ليها والله انا م علي ذنب براهن فجأة قلبن علي شكلهن من البدايه م رضيانات بي .

قاعدين دا زي ربع ساعه باب الحوش دق فديه قالت لي ح امش افتح الباب واجي مشت فتحت الباب لقتهم ديل رجال اتنين ملزمين ابوي حابوهو تعبان البيت قالوا هبط في الصلاة إلا قعدوهو في كرسي .... دخلوهو في الصالون وطلعو مشو فاديه قالت لي دقيقه اجيب ليك الدواء حقك قال ليها يابتي اوعك توري غرام هزت راسها بنعم ومشت ،، اتصلت لغانم جاء ساقو مشى بيهو المركز وامي مشت معاهم .... قاعدة كدا فاديه جاتني قلت ليها الجاء منو ؟ قلت لي دا صاحب غانم قلت ليها طيب .

مرت تلاته يوم واحمد كل ما يتصل لي م برد ليهو بقيت بس قاعده في غرفتي الوقت كله .... الظهر اذن قمت صليتو وبعد خلصت جات فاديه جابت لي كباية جبنه قبل اشيلها منها حسيت بطني طمت شديد قمت جريت الحمام ،، من الإستفراغ لمن جاني هبوط جات دقت لي الباب قالت لي انتي كويسة ؟ فتحت الباب وطلعت لقيت امي جايه خاشه قالت لي سجمي يابت مالك لالا يابتي انتي م كويسة قومي البسي عبايتك ورح قلت ليها ورح وين ياامي انا كويسه قالت لي ولا كلمه عاينت لفاديه وقالت ليها البسي امشي الظلط جيبي ركشه

الفصل الثالث والعشرون من هنا