رواية اوركيدا الفصل الرابع والعشرون 24 - بقلم دانيا

رواية اوركيدا

الفصل الثالث والعشرون23

بقلم دانيا

عاينت لفاديه وقالت ليها البسي وامشي الظلط جيبي ركشه فاديه طلعت مشت وانا عاينت لأمي قبل افتح خشمي معاها مشت على الدولاب طلعت لي غيار قالت لي البسي مسافة الركشه تجي انا ح امشي اتصل لأبوكي اكلمو وطلعت طوالي .

اتنهت بزهج وقلت ياالله المستشفى لزومها شنو هسي انا كويسة الموضوع م مستاهل ،، قمت لبست وطلعت لقيت فاديه جايه داخله قالت لي تمشي مع امي روعه مسكت يدها قلت لا والنبي ورح معاي انتي عارفه امي بتفكر كيف .

قلت لي طيب دقيقه البس الولد وبطلع جات امي مارقه من غرفتها دقيقتين وطلعنا .. امي اتصلت لغيداء قالت ليها انتي الليله مداومه في المستشفى ؟ قالت ليها ااي مالكم في حاجه ؟ قالت ليها خلاص نحن جايين على المستشفى غرام دي ليها كم يوم كدا صحتها م ياها قالت ليها خلاص تمام لمن تصلو تعالو علي طوالي .

وصلنا المستشفى قدام الباب كان في عربات وركشات كتار من بينهم كان ايمن صاحب احمد جاب مشوار للمستشفى بالركشه هو شافنا لكن نحن م انتبهنا ليهو خشينا جوا قابلتنا غيداء جنب الإستقبال سلمت علينا وقالت لي يابت لا حوله ولا قوة إلا باالله بقيت عباره عن قشه انتبهي على نفسك شوية وعاينت لأمي قالت ليها البت دي م تخليها تهمل في روحها كدا مبالغه عديل ..... مسكتني من كتفي وقالت لي اقعدي قعدتني في الكرسي ومشت سجلت إسمي وجات قالت لي ورح مشيت قابلت الدكتورة ومشينا المختبر عملنا الفحوصات وجينا قعدنا في الإستقبال ،، قاعدين كدا فاديه لكزتني في يدي وقالت لي شوفي عاينت ليها وعاينت لمكان هي بتعاين شفت ايمن صاحب احمد .

جاء سلم علينا وقال لينا سلامتكم ياجماعه العيان ليكم منو ؟ فاديه قالت ليهو غرام هي العيانه عاين لي وقال لي الف سلامه يامرت اخوي قلت ليهو الله يسلمك .... قاعدين كدا غيداء جات قالت لينا النتيجه طلعت قلت لأيمن عن إذنك قال لي طيب انا ح انتظركم برا هو طلع ونحن مشينا للدكتورة ،، قالت لي اتفضلي اقعدي وكانت مبتسمه بطريقه كدا من إبتسامتها امي شكت قالت ليها يادكتوره شكلك عندك خبر الدكتوره ضحكت وقالت لينا الف مبروك يربى في عزكم !! .

من سمعت كلامها افكاري اتلخبطت ومشاعري اختلطت بين الحزن والفرح للحظه حسيت نفسي فرحانه وللحظه حسيت بالحزن على الوضع الأنا فيهو جمدت في محلي لا عرفت اضحك ولا ابكي سرحت بعيد قاطع تفكيري صوت فاديه وهي ختت يدها في كتفي وقالت لي الف مبروووك حبيبتي افرحي وم تشغلي بالك باي شيء تاني .... دي نعمه من ربنا وتستحق الفرح بيها م تشيلي هم شيء وخلي الأمور لله قمت من الكرسي امي جات حضنتني وقالت لي ياريت الظروف كانت غير كدا ،، غيداء قالت ليها امي قولو ليها الف مبروك وافرحو عشان تحس بالإطمئنان م ممكن وبعدين انا شايفه إنو الموضوع م خطير واحمد م الزول البنخاف منو بالعكس احمد مستحيل يبدل غرام لكن محتاج فرصه عشان يثبت صحة كلامو !! الدكتوره وصفت لي ادويه وقالت لي ابعدي من التوتر لأنو مضر بالنسبه لحالتك .

طلعنا برا لقينا ايمن في الباب من شافنا جاء علينا قلت ليهو منتظر زول ؟ قال لي منتظركم قلت ليهو منتظرنا نحن معليش اخدنا من زمنك يااخوي قال لي ولو يامرت اخوي معقولة عيب الكلام دا .... اتفضلوا ركبنا الركشه وخلال كم دقيقه وصلنا البيت قلت ليهو اتفضل جوا اشرب حاجه قال لي لالا والله اعذروني المره الجايه .... فاديه ادتو القروش حلف م يشيلها هو دور مشى ونحن خشينا جوا .

نمت صحيت بعد العصر على صوت زول بسلم على ناس امي قمت لقيتو دا احمد قبل انزل من السرير جاني في الغرفه .... قبل يسلم علي شبكني سلامتك يازوله ووقت عيانه ليه م بتكلميني إلا اعرف من ايمن وعلى تلفونك م بتردي عارفك آخده موقف لكن ياغرام الأمور م بتتحل كدا ،، سكت منو وم رديت عليهو وعيني دي م رفعتها ليهو جاء قعد جنبي في السرير وقال لي بصوت متعب " عليك الله ياغرام ما تعملي كدا " قلت ليهو انت بتعمل الداير تعملو وانا م اعترضت على شيء خليني اعمل الدايراهو واتزكر إنو بيني وبينك انت الورقه بس تاني واصلاً انت السمح ليك تجي غرفتي منو ؟ إذا م بتطلع خليك فيها انا بطلع قمت عاوزة امش مسك يدي وهز لي راوسو وقال ليك خليكي قاعده انا بمش وقام على حيلو وطلع .

هو طلع جاتني فاديه داخله قالت لي كلمتيهو ؟ قلت ليها بشنو ؟ عاينت ليها مسافه وقلت ليها اهااا لا م ضروري اكلمو قالت لي ليه ياغرام كان توريهو اصلاً كدا كدا لو انتي م وريتيهو ابوكي وغانم جو لو قعد معاهم هم ح يوروهو ..... احمد مشى الصالون لقى ابوي جاء سلم عليهو وقعد معاهو جاء غانم سلم على احمد بالكتف وقال ليهو الف مبروك لكن م عارف اقول ليك يربى في عزك كيف ؟ احمد بقى واقف وبعاين لغانم بإستغراب شديد غانم انتبه على نظرات احمد وقال ليهو م تكون م عارف ؟ .

اخدو كم دقيقه في الكلام هم وابوي وبعدها جاني غانم في الغرفه قعد معاي وفتح لي محاضرة طويله عريضه وبعدها قلت ليهو تمام انا برجع لكن بشروطي قال لي واحمد م عندو مانع قلت ليهم " اول شيء انا عاوزة بيت منفصل تاني م برجع البيت داك "، احمد سكت مسافه وبعدها قال خير م عندي مانع غانم قال لي وتاني عاوزه شنو؟ قلت ليهم عاوزة انزل شغل في الصيدليه .... احمد رفع راسو عاين لي عاوز يعترض لكن تاني قال تمام مافي مشكله تاني في حاجه ؟ قلت ليهو لا لكن شروطي تتنفذ قبل عرسك ،، قال بس انا لو سافرت البلد الفتره دي ح تقعدي براكي هناك وفي حاجه مهمه اعرفيها البيت ح يكون في حينا ويمكن إذا لقيت أاجر ليك جنب بيتنا عشان انتي عارفه ناس امي مسؤليه م بقدر ابعد منهم .... قلت ليهو خير مامشكله وبالنسبه لإني اقعد براي او لا عادي اقفلو واجي اقعد مع ناس امي .

عدت يومين واتصلت لي اختو بعد الظهر كنت نايمه قالت لي قالوا لينا تاني م جايه عشان كدا قلت اكلمك تجي تشلي عفشك عشان نجهز الغرفه للعروس الجديده ..... وصحي قبل انسى الف مبروك يربى في عزك ... قصدي عزكم قلت ليها تسلمي وبالنسبه لوضوع العفش كدي اتكلمي مع اخوكي في الموضوع وهو بتصرف ،، سمعت صوت امها بتقول إجار شنو ؟ هو وينو الحال البسمح بإجار البيوت

الفصل الرابع والعشرون من هنا