رواية اوركيدا الفصل الرابع 4 - بقلم دانيا

رواية اوركيدا

الفصل الثالث3

بقلم دانيا

بقيت قاعده تحت الشجرة وبحاول اهدئ نفسي واسترخي عشان اقدر اخش الإمتحان وانا مركزة جات فادية من بعيد عرفت إنها زعلانه مني لأني مشيت خليتها جات وقفت فوق راسي وهي مكشرة وشها قلت ليها صباح النور .... قالت لي الله يسامحك وقفت منتظراكي في الميدان قريب نص ساعه وانتي طلعتي جيتي هنا انتي من متين بتفوتيني ؟ كنت خاته يديني في راسي عاينت ليها قلت ليها بالضبط انا لي تلاته سنه بدرس معاكي في المدرسه دي م حصل فتك لو سكتي شوية كان شرحت ليكي الحاصل .

قعدت جنبي على رجلينها وختت فيني يدينها وقالت لي صحي الحاصل شنو مالك ختي وخليتيني ؟ شلت نفس عميق وقلت ليها اووف ما بسبب روميو ول بطيخ دا زي ماانتي بتقولي .... ضحكت وقالت لي بحماس يلا يلا احكي بالتفصيل الحصل شنو ؟ قلت ليها الليله من شدة ما متوترة للإمتحان طلعت قبلك لمن وصلت الميدان م لقيتك بقيت بتلفت م شفتك قلت يمكن انا استعجلت في الطلعه لكن م مشكله استناها ،، واقفه منتظراكي الود دا ظهر لي فجأة من وين الله اعلم .... اتزكرت اتفاقنا إنو نوقفو في حدو عشان تاني م يتعرض لينا في الطريق يمكن يسبب لينا مشكله وقبل انضم معاهو واحذرو من البعمل فيهو دا لقيتو جاي علي بكل عين قوية ياانتي انا لمن هبطت قلت هسي لو شافو زول يقول عني شنو والله ابوي إلا يضبحني انا وهو وانا م لي ذنب بيهو .

جاء وقف قدامي وكمان من غير إستحاء قال السلام عليكم ... من لقاكي مافيشا وانا كنت براي انتهز الفرصه انا اصلاً كنت متوترة واعصابي بايظه اتفشيت فيهو طوالي قلت ليهو ياود الناس انت مالك معانا وتاني م تعمل لينا حركاتك دي عشان م تجيب لينا مشاكل وبلاوي فكت خشمو قال لي انا دايرك وجاييك بالدقري .... قلت ليهو دقري شنو البتتكلم عنه دا بالدقري دا انا عندي اهل ،، المهم اتفشيت فيهو ومشيت منو اتخارجت من المكان داك م قدرت انتظرك بسببو .

اختت يدها في خدها وبقت تفكر قالت لي اممم معناها تاني م ح يسألنا وم ح يقعد يراغبنا الحمد لله لكن افترضي طلع جادي وجاء بيتكم موقفك ح يكون شنو .... للحظه سؤالها دا جوط افكاري قلت ليها يابت يجي شنو كذاب ساي انتي صدقتي كلامه دا من هرشتو بكره بشوف ليهو طريق تاني وبنات تانيات ،، اثناء ما بنتكلم الجرس ضرب قمت من الكرسي ومديت ليها يدي قومتها وقلت ليها يلا حان وقت الحصاد خلينا نركز في امتحانا ومستقبلنا ونقول يارب وطوالي مشينا الفصل .

الود كان ماشي في الشارع على السوق طلع تلفونو واتصل لصاحبه قال ليهو الوو يا مكتب الخبر شنو ؟ قال ليهو الخبر تمام والله انت امورك كيف ظابطه ؟ قال ليهو والله يازولي كدي تعالني في الكشك بحكي ليك بالتفصيل .... قال ليهو ابشر يازول انا في الطرمبه بكب بنزين للركشه وخمسه دقائق بكون عندك ،، نهى المكالمه وتاني اتصل في رقم تاني قال ليهو شنو يا زولي الوضع كيف ؟ قال ليهو ميه ميه انت جاي ولشنو ؟ قال ليهو شكلي كدا والله .

وصل الكشك حقو حق الرصيد فتحو كدا صاحبو جاء بالركشه سلم عليهو وقال ليهو قلت لي الخبر شنو ؟ عاين ليهو وابتسم قال ليهو والله انت ياايمن الشمارات دي بقيت فالح ليها اكتر من النسوان تعال خش ضحك وقال ليهو من ملامحك معناها في شيء مبشر اها عرفت إسمها ول شلت رقمها ؟ عاين ليهو وضحك قال ليهو ولا واحد من وين ح اعرف إسم " الأوركيدا "؟ قال ليهو والله ياصاحبي شكلو تأثيرها كبير على دماغك ... انت ليه مسميها " اوركيدا " بتسمي ساي انت معقولة مافي ولااا زول تسألو من الإسم عشان يوريك ليهو ؟ إبتسم وقال ليهو حلو الغناء في خشم يسدو ياصاحبي انا لو عاوز اعرف الإسم من مين ما كان كان عرفتو بدري بس انا عاوز اسمعو منها هي ،، وانا مسميها اوركيدا لأنها اشبه بالورود في رقتها وفي عفتها وفي جمالها وفي مشيتها .... صاحبو لكزو بيدو وقال ليهو عووووك م تعلق لي في مواصفاتها خلاص .

ضحك وقال ليهو مالك انت زول عارض كدا ماتهيني اسرع شوية في وصفها ... نسيتني زاتو انا جايبك لشنو عاين ليهو وختى يدو في كتفو وقال ليهو اسمعني يامان انا الصباح قدرت اتكلم معاها صاحبو نط قال ليهو شنوووو؟ انا مش قلت ليك ابتساماتك دي م ساي قال لي اها قالت شنو الأوركيدا ؟ قال ليهو يعني م قالت شيء بس العرفتو إنها متضايقه من مراقبتي ليها هي م عارفه إنو الهي شايفاهو إزعاج دا ،، وراهو حب قدر شنو .... صاحبو كشر وشو وقال ليهو يعني رفضتك يا صاحبي؟ قال ليهو لا م رفضتني لكن قالت لي انا عندي بيت وعندي اهل زي الزول البقول ليك انا م مقطوع من شجرة او حاجه كدا م عارف المهم الفهمتو إني اجي بالباب .

صاحبو نط قال ليهو انت مجنون دي دايرة توزعك بس عشان كدا قالت الكلام دا انا نصيحتي ليك شيلها من راسك .... عاين ليهو بغضب قال ليهو جنيت انت المهم انا دايرك تلقى لي زول امين يشتغل لي هنا انا مسافر ،، قال ليهو بنبرة إستغراب على وين ؟ قال ليهو وهو خاتي التلفون في دقنو وسارح بعيد قال ليهو ماشي اامن مستقبلي يا مان .... قال ليهو هوي هاا انت جادي ؟ قال ليهو يلا يلا بعدا اتشايلها وفتح ليهو باب الكشك عشان يطلع قال ليهو منتظر ردك الليله دي م تتأخر علي ،، طلع برا وجاهو بالشباك قال ليهو جنيت انت ولبس نظارتو ومشى ركب ركشتو ودور .

طلعنا من الإمتحان حاسه نفسي راضيه شديد عن شغلي الإشتغلتو في الإمتحان للحظه حسيت نفسي انجزت .... قلت لفاديه اها كيف الإمتحان معاكي قالت لي بنبرة فرح حلو شديد وانتي ؟ قلت ليها عسل إن شاء الله كلهن يكونن كدت ،، طلعنا من المدرسه وراجعين على البيت قالت لي غرام ؟ قلت ليها نعم قالت لي تتوقعي البحصل شنو ؟ قلت ليها بالنسبه لشنو ؟ قالت لي الود تاني ح يعترض طريقنا ول لا .... قلت ليها م بتوقع يقدر تاني وبعدين سيبينا منو م ناقصه نعكر جونا بسيرتو ،، قالت لي حرام عليكي الود وسيم وظريف عاينت ليها بزهج قلت ليها يلا وصلنا لمفترق الطرق تصبحي على خير ومشيت منها وهي مشت على بيتهم .

وصلت البيت لقيت ناس امي مدوين الجبنه قلت ليهم نيالكم والله همكم فاضي غيداء وامي الإتنين بصوت واحد " اها الإمتحان كان كيف "؟