رواية اوركيدا الفصل الخامس 5 - بقلم دانيا

رواية اوركيدا

الفصل الرابع4

بقلم دانيا

اول ماشافني هن الإتنين بصوت واحد " اها كيف كان الإمتحان "؟ قلت ليهن كويس الحمد لله حاسه إنو عدى على خير .... خشيت جوا امي قالت لي تعالي اشربي الجبنه قلت ليها بستحمى وبصلي الظهر وبجيكم ،، بعد صليت حسيت نفسي مصدعه نمت طوالي نسيت موضوع الجبنه دا زاتو جات غيداء عاوزة تناديني لقتني نايمه رجعت قالت لأمي شكلها تعبت الليله لقيتها نايمه .... امي قالت ليها حقهم يتعبوا والله الشمس زاتا الأيام دي مولعه ربنا يوفقهم إن شاء الله .

مرت ايام الإمتحانات سريع الإمتحانات كانت يوم بعد يوم الليله آخر امتحان الحمد لله ح نرتاح .... شربت الشاي كالعادة واقفه على حيلي امي قالت لي دائماً مستعجله انتي لكن خلاص م فضل ليكم شيء الحمد لله ترتاحو زاتو من التعب دا قلت ليها بإذن الله ،، حضنتها ودعتها وقلت ليها دعواتك بس وطلعت لقيت ابوي في الباب طالع ماشي الشغل قال لي الليله يابتي انا استعجلت ول انتي اتأخرتي ؟ وضحك قلت ليهو والله ياابوي دا زمني البطلع فيهو لكن انت شكلك مبدر قال لي م مشكله نقدم بتي مالو لأنو الليله عندي بضاعه جايه مع الباصات وهن بصلن بدري عشان كدا عاوز امشي الحقهن اول بأول .... قلت ليهو تلفونات عينه جديده ولشنو ياابوي ؟ قال لي ااي ديل آخر إصدار بجيبهن بالتوصيه ولو جبتي نسبه كويسة بوصي ليكي على واحد ،، فرحت شديد قلت ليهو ياسلام بعدا ح اجتهد شديد .... عاين لي وبقى يضحك لأني اتحمست قال لي انا واثق ح تنجحي يابتي ربنا يوقفك .

وصلنا الميدان للحظه حسيت بتوتر شديد خفت الود الشليق داك يظهر لينا رغم إنو من اليوم داك تاني م اعترض طريقنا نهائي ولاا ظهر لكن البشر ديل م مضمونين ..... وقفت وبقيت اتلفت ابوي قال لي فاديه لسه م جات انا بمشي عشان م اتأخر انتبهن على نفسكن وم تقيفي في الشارع كتير لو م جات طوالي امشي تتلاقن هناك ،، قلت ليهو حاضر مشى مني كدا هي ظهرت جات قالت لي الليله جيتي مع عمو يونس ولشنو ؟ قلت ليها ااي والله كنت ميته من الخوف قالت لي ليه مالك ؟ قلت ليها خفت الود داك يطلع في وشنا .... قالت لي يطلع شنو م اظن الود دا شكله في الحله زاتو م ظاهر هي صحي م وريتك هم طلعو ساكنين جنبنا لكن انتي عارفه من زمان م كنت بشوفو شكلهم جو جدد هنا ،، لكن ياغرام يخسي عليك طفشتي الولد من الحله ليه قلت ليهو شنو كدا .

قلت ليها بنبرة إستهتار " ح اكون قلت ليهو شنو ، وقفتو في حدو واتلقي مشى يشوف ليهو جهه تانيه وبت تانيه يضحك عليها ما ياهم شباب الزمن " يلا ورح سبيك منو .

امو قاعدة في بيتهم وبتتكلم مع بتها مودة قالت ليها انتي يامودة احمد دا لمن قام مسافر قال لينا انا ماشي عشان اكون نفسي وابني مستقبلي ومصاريف اكرم بتاعت الجامعه .... مستقبلو دا اكيد قصدو عاوز يعرس بعدا صاح؟ واخيراً الحمد لله بدأ يفكر في نفسه نتكلم مع اخوي سالم ومرتو اوريهم قريباً ح نجي نزف هاله عروس .

خلصنا الإمتحانات ومرت الشهور والنتيجه طلعت الحمد لله وقدمتا على كم حاجه وشالوني صيدله وفادية تمريض .... بقينا نمشي الجامعه ونجي سوى ،، جيت من الجامعه قريب المغرب لقيت ابوي بتوضى سلمت عليهو ودخلت جوا امي كانت في المطبخ وغيداء دي اصلاً رجعت بيتها سلمت على امي ودخلت الغرفه لقيت كيس قاعد في السرير جيت قعدت وشلتو لقيت فيهو كرتونه فتحت الكرتونه لقيت فيها هديه مغلفه ومكتوب فيها الى بنتي الغاليه ،، فكيت الغلاف لقيتو دا تلفون لمن اتخلعت من الفرحه شلتو وجري لأمي في المطبخ .

وريتها ليهو وقلت ليها دا ابوي جابو انا عندي احلى اب بالدنيا للحظه عيوني دمعن والضحكه لآخر ضرس امي بقت تضحك مبسوطه قالت لي تستاهلي يلا بعدا رجعي لي تلفوني قلت ليها طوالي .... ابوي جاء من الجامع مشيت ليهو وانا شايله التلفون في يدي حضنتو وبقيت بين بضحك وبين ببكي مشاعري ملخبطه ،، قال لي انتي فرحتينا بالنجاح يابتي معقولة مانفرحك تستاهلي كل خير .... شكرتو ودخلت جوا بقيت ماسكه التلفون وبعاين ليهو امي نادتني للغداء اكلت حبه وقمت من شدة الفرح .

السنه الأولى عدت على خير والأمور كويسة قاعدة في الكافي حق الجامعه ومنتظرة فاديه تجيني لأنها اتصلت لي وقالت لي عاوزاك في موضوع .... اتأخرت اتصلت ليها سمعت رنة تلفونها وراي قريب مني اتلفت شفتها قالت لي جنبك ياقمر بقيت اضحك قلت ليها كالعادة م بتبطلي حركات هسي كنت ح اقوم امشي البيت زاتو ،، قالت لي روقي يابت بيت شنو متين كدا جات قعدت جنبي وبقت تطبز في تلفونها بقيت بعاين ليها بإستغراب قلت ليها اها الموضوع شنو ؟ قالت لي اصبري دقيقه بس .

بعد عدة ثواني جاء شاب وقف قدامنا وقال لينا السلام عليكم رفعت راسي عاينت ليهو وقلت ليهو وعليكم السلام .... هي قالت لي اتفضل ياحسن طوالي عاين لي قبل يقعد وانا الكنت محتارة م فاهمه حاجه ،، قعد وقالت ليهو حسن دي غرام صاحبتي شديد واختي عديل .... وعاينت لي وقالت لي غرام دا احمد زميلي وإن شاء الله قريباً ح يبقى خطيبي بقيت بقيت بعاين ليها بإستغراب شديد قاطع كلامها هو وقال اتشرفنا ياغرام ،، تلفوني اتصل قلت ليها عن إذنك وطلعت برا اتكلمت مع امي وجيت راجعه قلت ليها لو متأخرة شوية انا ح امشي امي منتظراني ماشين بيت غيداء ... هي حست إنو لي كلام تاني وقبل تجاوبني الود قال ليها لالا امشي معاها ارجعن سوى مافي داعي كل واحدة ترجع براها وخلو بالكم على روحكم .

طلعنا مشينا وانا م اديت اي ردة فعل كنت ساكته هي طوالي قاطعت صمتنا دا وقالت لي غرام انتي م قلتي لي رايك لحد الآن .... عاينت ليها وقلت ليها انتي معاي ليكي كم سنه المفروض تعرفي راي شنو وبعدين انتي شايفه إنو دا وقتو يافاديه ؟ سكتت مسافه وتاني قالت لي م تكوني متشددة ياغرام وبعدين نحن في الجامعه يعني نحن كبرنا وعرفنا ،، وكمان نحن م عاملين حاجه غلط وهو اصلاً الإسبوع الجاي جاي بيتنا ... قلت ليها تمام .

بعد اسبوع كان يوم خميس اتصلت لأمي قالت ليها بكره الجمعه دي جاي واحد زميلي عاوز يتقدم لي وعاوزة غرام تجي تبيت معاي عشان التجهيزات وكدا وانتي عارفه دي اختي الوحيدة امي قالت ليها جداً يابتي