رواية اوركيدا الفصل السادس 6 - بقلم دانيا

رواية اوركيدا

الفصل الخامس5

بقلم دانيا

بعد الظهر كدا اتكلمت مع ابوي وقال لي امشي لبست عبايتي وشلت غياري في الشنطه وقلت لأمي يلا انا طالعه ..... مرقت جنب الباب لقيت اخوي جاي خاشي قال لي على وين يابت ؟ قلت ليهو ماشه بيت ناس فاديه بكره جايين يتقدمو ليها سكت مسافه وسرح بعيد وبعدين خشى جوا لا قال لي امشي ولا قال لي م تمشي ،، عاينت ليهو قلت دا مالو كمان وكملت طريقي .... وصلت سلمت على امها ولقيت معاهم خالتها ومرت جيرانهم سلمت ليهم وامها قالت لي فاديه في الغرفه جوا مشيت عليها .

قلت ليها لقيتك جادة لكن ربنا يتم ليكي على خير لكن اها والقرايه ؟ قالت لي ح نكمل قرايتنا عادي اصلاً م ح نتزوج هسي إلا بعد التخريج يمكن نعمل عقد ساي .... بقينا نتونس قامت قالت لي ورح السطح قلت ليها السطح؟قالت لي ااي قومي مسكتني من يدي قلت ليها يابت السطح قيهو شنو ؟ قالت لي عاوزة اوريكي حاجه ،، طوالي امها جات داخله جابت لي المويه قلت ليها خالتو علويه ليه معذبه نفسك انا ضيفه قالت لي م ضيفه لكن ما انا عارفه صاحبتك دي ح تستلمك بالونسه ضحكنا وقلت ليها اتاري م براي بقول فادية مجنونه .

بعد امها طلعت قلت ليها يابت الشمس برا تلفح وانا ياداب جيت على الأقل خليني ارتاح حبه ورانا شغل قالت لي طيب نطلع بعدين لمن الشمس تقرب للمغيب قلت ليها اوكي .....بعد ارتحت شويه قمنا بقينا نرتب في البيت ونضاير لمن المغرب قرب ،، جات مسكتني قالت لي ورح طلعنا السطح بقينا نعاين للحله من فوق ومع لحظة القروب ديك الله المنظر حلو شديد قامت وصفت لي قالت لي شايفه البيت الهناك دا على الناحيه الغربيه الفيهو خزان ذهبي فوق دا ؟ قلت ليها ااي شايفاهو مالو ؟ قالت لي دا بيت ناس روميو .

قلت ليها روميو ؟ ياداب اتزكرت قلت ليها ما تقولي لي الود داك ؟ هزت راسها بنعم قلت ليها والله انتي لسه سارحه في موضوعو بعد نسينا الموضوع ،، قالت لي وهي بتعاين لي قالتها بحماس اها طيب اتعرفتي على زول تاني؟ زحيت منها وبقيت بعاين ليها بإستغراب قلت ليها يابت قولي بسم الله اتعرفت على واحد شنو دا وقت تعرف انا شايفه إنو لو ركزنا في دراستنا بكون احسن لينا وانتي زاتك انا متفاجأة فيكي ليه اخدي القرار دا بدري كدا .

بكره بعد الناس طلعوا من صلاة الجمعه بعد صلينا بدينا نجهز على اساس الضيوف جايين العصر انا وخالتو علويه كنا في المطبخ وفاديه في غرفتها الساعه جات 2:30 مشيت عليها في الغرفه لقيتها بتتكلم بالتلفون وملامحها متغيرة شديد وكانت جايطه .... جيت خشيت وقفلت الباب احترت فيها قلت دي مالها وبتتكلم مع منو آخر شيء قالت ما تقول لي نصيب انت وقت م شاورت اهلك بتتكلم ساي هسي انا اواجه الناس بياتو عين وقفلت الخط ،، عاينت لي وبقت تبكي جيت قعدت جنبها حضنتها وقلت ليها يابت بسم الله الحاصل شنو وحسن قال ليك شنو .

وهي من البكى م قادرة تتكلم معاي بس تبكي قلت ليها في شنو يابت م تخوفيني اكتر من كدا بقيت ارجف .... بعد مسافه هدت شوية ورفعت راسها قالت لي محسن اتصل لي هسي وقال لي امو م موافقه ،، اتخيلي ياغرام يتصل لي في اللحظه الأخيرة ويقول لي م بقدر اجي لأنو امي رافضه وم قدرت اقنعها ، للحظه انا زاتي حسيت بالإحباط والخيبه م عرفت اواسيها قاعدين كدا خالتو علويه جات خاشه لقتنا وجوهنا م بتتفسر قالت ل فاديه ابوكي قال ليكي اها الجماعه ديل بصلوا متين ؟ عاينت لينا تقول حست طوالي جات قعدت جنب فاديه وقالت ليها مالهم م جايين ؟ وفادية بس دموعها في خديها ابت تقيف .

مسحت ليها دموعها وقالت ليها بسم الله يابتي اجي بت الرجال م بتبكي على راجل عنهم م جو .... الله صرفو عنك لخير ليكي اوعك تزرفي دمعك الغالي وحضنتها وبقت تواسي فيها ،، قلت ليها كلام خالتو صاح وبعدين هم الخسرانين وين يلقو جوهرة زي فاديه بقت تضحك ودموعها جاريه .... سمعنا صوت ناس بسلمو قلت ليهم ديل ناس امي قمت طلعت برا