رواية اوركيدا الفصل الثامن 8 - بقلم دانيا

رواية اوركيدا

الفصل السابع7

بقلم دانيا

مشينا مع امي وغيداء والمرة دي نظام عاوزين نشرب الجبنه وكدا قعدنا معاها ومع امها واتونسنا وشربنا الجبنه بعدين امي فتحت الموضوع مع امها .... خالتو علويه قالت ليها لينا الشرف والله لكن طبعاً الراي الأخير عندها هي ونشوف ابوها طبعاً بقول شنو وربنا يكتب الفيهو الخير ،، بعد عرس فاديه واخوي بخمسه شهور طبعاً كنت اكتر واحدة مبسوطه من بيناتهم لأنو فاديه جات سكنت معانا .... طلعنا الصباح ركبنا ركشه من الشارع ماشين على الجامعه هي كانت بتعاين في الشارع وانا بطبز في تلفوني فجأة مسكتني من يدي وشغاله لي غرام عايني عايني عاينت ليها قلت ليها في شنو ؟ قالت لي روميو والله شفت روميو هسي كان واقف في الشارع ورا شكله منتظر مواصلات قلت ليها بعدم مبالاة يعني شنو مش هم ساكنين هنا طبيعي يظهر قالت لي ياربي وين كان ليهو اربعه سنين مختفي ؟ عاينت ليها عين حارة قلت ليها نلف نرجع عشان نسألو ،، قالت لي غياظه خلاص انسي .

روميو مشى بيتهم كان مشى السوق جاب حاجات للبيت وجاء دخل لأمو في المطبخ كانن قاعدات مع بتها بعملن في الفطور .... قال ليها اها ياامي م اديتيني ردك في الموضوع ، قالت ليهو موضوع شنو ياولدي ؟ قال ليها الموضوع الإتكلمت معاكي فيهو قبل ارجع من السفر ،، قالت ليهو تعال اقعد ياولدي جاء قعد جنبها قالت ليهو شوف انا م مابيه ليك بالعرس لكن بقيت على العرس مافي غير بت خالك سعيد " هاله " قام على حيلو قال ليها رجعتي تاني ياامي انا بت اخوكي ماقلت ليكي م دايرها شوفو ليها زول غيري ... قالت لي هيي ياولدي نحن حاجزنها من بدري كلامك دا خلي .

قال ليها ياامي انا م اتغربت اربعه سنه عشان اجي اتزوج بت خالي ولو على كدا والله انا من مكاني م كان اتحركت انا موضوع حجز دا م بنفع معاي مع احترامي ليكي ياامي .... قالت ليهو اسمع هنا يااحمد انا العندي قلتو ليك والبت الدايرها دي لو بدوك ليها من غير حضور امك امشي عرسها ،، سكت مسافه وطلع مشى زهجان اماني قالت لأمها بنات الزمن ديل م فيهن ثقه اكيد لقى واحدة لعبت بعقلو لكن م تشتغلي بيهو بكره برجع لعقلو بلا حب معاهو ماهندا نحن عرسنا من غير حب جانا شنو .

قضى اسبوعين بقنع في امو وابا الأكل والشراب وبقى زي المتوحد لمن شافت كدا م جايه وافقت ليهو لكن بشرط قالت ليهو بعدها طوالي تجيب بت خالك فوقها كان ترضى وكان تابا .... قال ليها ياامي مصرة تلصقيها فيني ؟ قالت ليهو ياولد هوي انا اديت كلمتي والبت راجنك بيها من زمان لو م انت كان ابوها عرس ليها من زمان ،، قال ليها خلاص ياامي نشوف البحصل شنو قالت ليهو م نشوف سنه سنه واحده بس م اكتر طلع م رد ليها .

بس كان مبسوط شديد لأنها وافقت واخيرا طوالي اتصل لصاحبه ايمن وراهو الشمار قال ليهو لكن سنه طوالي تاني عرس ... قال ليهو يازول انت صدقت خلال السنه دي يمكن اوركيدا تعجب امي وتنسى موضوع بت اخوها دا زاتو ،، قال ليهو تمام يازول لكن في حاجه انت م فكرت فيها قال ليهو اللهي ؟ قال ليهو لو م وافقت اوركيد او اهلها الحل شنو ؟ قال ليهو ياخ مالك زول مهبط كدا اتفائل خير ياخ ... قال ليهو والله إن شاء الله يحصل خير لكن برضو انت خت الإحتمال السيء والحلو الإتنين عشان م تتصدم .

طلعنا من الجامعه ماشين على الظلط عشان نركب ركشه نرجع البيت فجأة الزول ظهر في وشنا لمن اتهجمت مسكت فاديه من يدها وقلت بسم الله .... جاء علينا وقال " السلام عليكم "