رواية اسألي عني الليالي الفصل الأربعون 40 - بقلم رقية جاسم

قناة التليگرام

حساب الانستگرام

الـبـارت التاسع والثلاثون...............

كملت وكمت اغسل..اجه رائد..
رائد : اليوم اتخبل اذا مانام وحيحرموني منج..
دنوة : هههههه..لا عيني متتخبل ماعليك شي.. راد يحجي عفته ورجعت للصالة..ضل يعاينلي ويخزرني..عود اذا صارلي مجال اجيك.. بقى وياهم بالصالة واحنا كعدنا بالمطبخ ضحك وسالفة تجر سالفة..البنية اسمهه ايثار..
ايثار : الا صدك..هذا رويد جبير..وانتي بعدج صغيرونه.. شنو اخذج بالغصب..
ابتسمت بداخلي : لا ليش بالغصب..عادي..
ايثار : ها يعني تحبينو موو..
دنوة : ههههه..اي..كلت بگلبي شوف انه شلون صغيرة جدامة وهو هم خطية الشيب مكبره..شعرة مشيب..

والله خوش سالفة هاي..ضلينا نسولف وراهه نعست وتعبانه من الطريق.. كتلهه وين انام..
ايثار : نامي بغرفتي عيني..انه كاعدة ما انام..
تمشيت للغرفة..طبيت وسديت الباب وراي..طفيت الضوه .. نزعت الشال وتمددت..رجلية مكسره من الطريق..بعد ولا اسافر.. ابقى بالبيت احسلي..ضليت اتكلب بعدين انفتحت الباب على كيف..فزيت بالعجل وجريت الشال البسة.. حسبالي احد غريب..خزرتة..فززتني..اجة وكف جدامي.. كومني وحضني..همس باذاني..
رائد : يابة ما اكدر انام بدونج..تعاي خلانام..
بعدني عنه : وين تنام..هنا؟.. وأشرت ع الجرباية.. لان ام نفر وين تكفينه..

ابتسم وراح تمدد..فتح اديناته..رحت بحضنه .. جر نفس طويل وحضني..
دنوة : ليش تتنهد..
رائد : ماكو شي حبيبي..
دنوة : صدك تدري اليوم شكلولي عيني..
رائد : شكالولج..
دنوة : يكلولي انتي صغيرة وحلوه..شعجب متزوجج رائد اشو جبير ..اخذي واحد صغير مثلج.. شفت شلون..
رائد : اكول يابة لا تتكبرين براسي..تره اروح لجلنار..
دنوة : ها هيج الحجي..روح وانه حروح للمطبخ..حتى النومة طارت من طاري هاي الحية..كمت من كل عقلي.. كمشني من ايدي خزرته..كام يضحك وجرني بحضنه..
رائد : اشاقة بنيتي انتي..تعاي ارد اهجع تعبان..

حضني ويمسد بشعري..دقايق ونمت بعد ماحسيت بشي.. كعدت بالليل الغرفة ظلمه.. بس راسه ع المخده.. رجلي بالكع ونومته مدري شلونهه..كعدته ..حبيبي ..كوم ..نام عدل بعدني ماكلت شي فز وطاح من الجرباية.. شغلت الضوه بالعجل واجيت كومته.. الله الله..خوما تأذيت..كمشني من ايدي ووجهه مرعوب..
رائد : حلمت حلم..همزين كعدتيني..
كومته..كعد ع الجرباية وايده ترجف..كعدت يمة بالكع.. كمشت ايده..انتبه عليهه شلون ترجف : شحلمت..
رائد : حلمت بابوي..انه ببيت ماشايفة كبل..بس بالحلم جن اعرفة واعرف ناسة..بس ظلمة والضوه يجي من غرفة وحده ماعرف وينهه..بس امشي اريد اوصلهه..كبل لا اوصل سمعت صوت ابوي ديبجي ويصيح ويضرب ع الباب..

كل ما اتقرب للباب يريد بالبجي وصياحة يعلى..يبجي بحركة صوته يرن باذاني..طلع رجال من الغرفة بسد الغرفة الجان بيهه ابوي .. كتلة وين المفتاح..ابوي هنا..كلي محد هنا..كتلة انه داسمع الصوت شبيك متسمع..رحت ع الباب اريد اكسرهه متنكسر جتفي اذاني بالحلم..حتى هسة ديوجعني.. وراهه فزيت .. سكت شوي بعدين حجه ..ابوي متعذب..هو كبل هم حلمان نفس الحلم بامه..وره فترة حجالي تفسير الحلم

نزل من الجربايه ..حط راسه بحضني وادية حاوطتني..كام يبجي ويشهك.. يريد يحجي مايكدر..حضنته واهدي بي ماكو..ميفيد.. جسمه كام يرجف واديه..صار شكدوته بحضني بعدته شوي ومسحت دموعه..ادور عيونه غدت دم..بسته وامسح بشعره.. ماحجيت شي.. انصدمت من الموقف ..مشايفته بهلضعف..
رائد : من الصبح ما مرتاح..احس شي واكف بزردومي يجرح بيه..بس محجيت..
صدك الحجية من كلتلي مايحجي..گلبي انمرد علي.. شكد يقهر ودموعه بعينه متسكت..حضنته وهمست : لا تشيل بگلبك وحدك..احجيلي لتقهر بروحك..صليله وادعيله الله يرحمه.. ماقصر وياكم فديوم..كلهه بميزانه..

يكفي انت ابنه ورافع راسة بحياته واسمه بمماته..عيوني الك بس لا تقهر بروحك.. انمرد گلبي عليك وداعتك.. ضل بحضني لحدما كام يعفي.. كومته تمدد ع الجرباية ..غطيته وهو مكرفص روحه.. كعدت يمه وامسح على شعره..لحدما غفى بسته من خده.. لبست الشال وطلعت.. الحجية صادفتني بالباب..
الحجية : توني جايتة اشوفكم كاعدين لا..
دنوة : انه كعدت بس رائد يكول تعبان..خليبقى نايم.. كالت يله براحته..كعدنه بالمطبخ..يحجون بس بالي يمه.. كامو يحضرون بالعشه ماخلوني اسوي شي..بس كاعدة يمهم.. ايثار تصير بنت الرجال الاربعيني..والرجال الجبير كلش جدهه وهاي امهه..بس ماعدهم احد صغير..

زين عيشتهم احسن من عدنه بالديرة..تدرس وتكمل..شكد حلو.. انه مالحكت ارجع للدوام جان يبطلني..بيهه صالح..لوما مبطلني جان ما صرت يم حبيبي..والله وجوده يسوى عندي الدنيا.. وكفته وياي على سالفة علي ومن تمرضت ومن تزوجني عقيل..ومن ومن...كومة هن..صدك عيب اكول ما يحبني لو يريد جلنار..فزيت على صوت ايثار
ايثار هي وتضحك : شبيج صافنة عيني...شوفي رائد يتعشه احنه بالصالة..
ابتسمت بس فشلت ..هيج جنت شارده يعني : اي هسة اكوم اشوفة..رحت للغرفة..طبيت وسديت الباب..كعدت يمه بسته من خده وايدي على ايده..كعد..ابتسمت : تكوم تتعشه..

بنعاس : اي هسه..
عدل كعدته وذب الغطى..كمت اروح صاحني..وكفت جدامة سحبني من ايدي كعدني على رجله..وايده يدخلهه بهدوء بالشال حتى يوصل لشعري..تقرب من شفايفي هو ويحاجيني بهمس..
رائد : ماحسيت بيج حنينه هلكثر الا من ساع..يعني شسوي احطج بصدري واقفل عليج..
باسني وانفاسه احس بيهن..ضيعت..مادري من كلماته لو انفاسه..سحبت روحي بهدوء واعدل بالشال : عيب هنا ميصير يله كوم .. ينتظرونا ..ابتسم وكام..دورات ينرفزني من ما يجاوب بس يبتسم..احسه ياخذني على كد عقلي..عفته ورحت للصالة..شوي واجه هو..كعد يمي..

كل ما يشوفهم ملتهين يهمس احبج..شلون كام يعاينلي من غير جهة.. جي ضليت يمه من كام يبجي..شسويت قابل..هو سوالي الاكثر وماكتله شكرا..عاد هاي شتجي بالنسبه للمسوي هو..خلصنه وكمت وياهم للمطبخ..هو ضل وياهم بالصالة..ضلينه كاعدين وره الوحدة..كمت اسمعهم واغفي..ولا تكول كاعدة بالليل.. من الطريق شكد يتعب..ترخصت منهم ورحت للغرفة..نزعت الشال ونمت..فزيت الفجر على رائد..كمزت من الجرباية.. همست .. هاي شجابك خوفتني..
رائد : شبيج يولي..تعاي نامي ماكو شي..
درت وجهي للجرباية اللخ..ماهي ايثار : وايثار شلون..
رائد : ماعليج منهه..نامت يم امهه..
اخذني من ايدي ورحنا ع الجرباية..حضني وراسي ع صدره يمسد بشعري : ليش مانمت..
رائد : الحلم يجي على بالي كل ما اغفى..
رفعت راسي عاينتله : وشلون..

رائد : يمج ارتاح..ماعليج مني..عكبة نرجع..هم يالله الحك اروح للواجب..
حضنته وبسته من خده : قهرتني عليك..كاعدة يمهم بس تفكيري يمك.. ضحك بهدوء ..
رائد : يولي شكد گلبج رهيف..متشوفين ليش تبجين بالعجل .. اكلج بنيتي متصدكين..انه لو متزوج بكد جدي جان بنتي بكدج..شوي اصغر بسنه ..سنتين..
ابتسمت وخليت راسي بحضنه : احبك..
رائد : اعشكج..شعندي غيرج يبعد العشيرة كلهه..
حاوطني ونام..نمت وراه..كعدت الصبح مالكيتة.. طلعت غسلت ورحت للمطبخ..خلص اليوم مثل البارحة..رائد مشفته بس بالليل..لأن اجو كرابتهم زلم وكعدو يمهم فمتغدينا سوه .. ايثار كالت حتنام يم امهه .. والحجيه وياهم ..

بالليل جنت داحضر الجنط ومتربعه جان يجي..سد الباب وتمدد يمي.. خلة راسه ع رجلي وايده على عيونه..
رائد : شوكت تكملين..
دنوة : بعد شويه..شسويت ماسويت اليوم..
رائد : ماسويت والله..خابرتني اخلاص..
دنوة : ها..شبيهه..
رائد : رايحة تشتري ملابس وما مكفية الفلوس.. كتلهه اكو نسخة من مفتاح الغرفة فتحي واخذي..
دنوة : ها..جا حضر نفسك تنطيني فلوس..اشتري ملابس حمل..دار وجهه علي مصدوم..
رائد : حمل؟..حامل يولي..
دنوة : يمكن..بعد جم يوم اتأكد اكثر..
رائد : يله ارجع من الواجب اخذ التازة..

سحبت الجنط وخليتهم على صفحة..عدلت كعدتي ورائد جدامي..حاوطته من ركبته وبسته..كومني وراح طفى الضوه سد الباب..اجه حضني ورحنه ع الجرباية..انتجى ع التاج ومخليني بحضنه..يعدل بشعري..
دنوة : حبيبي اريد اشوف ابوي..اشو مشتاقتله..
رائد : من هاي العين كبل هاي..تدللين بس نرجع.. اكو اغنية اريد انطيجياهه تسمعيهه..بس مو هسة..
دنوة : ها..جا شوكت..
رائد : مادري..اشوف بعدين..هسة تحبيهه..سمعتهه صدفة من جنت بالواجب..ضلت ببالي..وانه جنت متولع بيج.. بدون ماشوفج..هي هلاغنية توصف احساسي..جنت اكول اذا كتلهه حتقبل بيه لو ارجع فشلان..صدفة بس عبالك مفصله تفصال لعلاقتنا..

دنوة : صار عندي فضول..شسمهه..
رائد : اسمعجياهه من نرجع..تعاي بحضني خلانام.. لازم اكعد من وكت..يولي بعد ما اسافر والله..
دنوة : اييي..انه هم كلت..الطريق يتعب..
رائد : انتي زين..بس اليسوق يتكسر ويضل مركز..
بسته من رگبته : فدوه لليضل مركز..كام يضحك واخذني بحضنه..حضنته ونمت..كعدني كبل الفجر..بدلت واخذت الجنط..ودعناهم وطلعنه..هم نمت مدري جم مره يله وصلنه .. بس رائد خطية كل ساعتين ساعة ينزل يغسل ويجيب اكل .. بس خاطر ما ينام..والحجية ما نامت..ضلت كاعدة وياه لحدما وصلنه..رائد دخل الجنط..كعدنه بالصالة..
وائل : الحمد لله ع سلامتكم..شلونه الحجي..
الحجية : والله تعبان..كوه يمشي..بس كال حيجي لبغداد يسوي قسطرة..بعد الله كريم..

رائد : علي وين..
وائل : طالع..
رائد : شعنده..مو ع اساس متهدد وميكدر يطلع..
ام علي : راح لصديقة يسويله لجوء للخارج..
رائد هو وواكف يم الباب يريد يصعد : عسى درب الصد مارد الله ومحمد وعلي وياه..
ام علي : شوفي ابنج شلون يحاجيني..وانه خالتة.. شنو ماعرفتي تربينه..لو كل ضابط ماعنده اخلاق..
رائد : لا تحاجين امي هشكل..هي مادخلهه.. بس ابنج تهمني بشرفي وببيتي..شتردين اسويله..اشيله بالصلوات مثلا يكفي انه مغركة بزيناتي..ماريد احجي..
ام علي بصياح : اهوو عاد..لا تضل كلمة والثانية تكول زيناتي وزيناتي..شمسويلنا قابل..موكلنا مشربنا..
رائد : هههههه..لا والله ذابكم بالشارع..خلي الله بين عيونج من تحجين..

عافهم وصعد..ضلت تحجي علي..شلون حجي يسم البدن وهو خطية ممسويلهه شي.. متحملت جان اكب عليهه : ليش تحجين علي..شسويلكم..موزين مبقيكم بالبيت..واحد غيره يذبكم بره والله..متخافون الله انتو..
ام علي بصياح : تعال شوف مرتتتتك..شلون تراددني وتتهمني..انه كلشي ما حجيت..
الحجية : ماكو داعي تصيحين..انه كاعدة وسمعتج شحجيتي هي مرتة يعني شترديهه..تسمعج تحجين على رجلهه وتسكت .. بالله عليج انه اختج جايه من سفر هج تستقبليني اذا ما تحترمين ابني وچنتي..ع الاقل احترميني..اكوم انام احسنلي من هاي الهوسة..عن اذنج..
عفتهم وصعدت فوك..طبيت للغرفة وسديت الباب..هو واكف يم الكنتور يحسب بالفلوس..اندار علي..

رائد : هذني مليون..
دنوة : ليش شكد جانن..
رائد : مليونين ونص..وين الباقي..
حطهن بمكانهن وراح لغرفة اخلاص..طلعت تحاجي..
رائد : شكد اخذتي فلوس من كلتي حاخذ..
اخلاص : مية..ليش..
رائد : شو الفلوس بس مليون..بعد مليون ونص وين..
اخلاص : ماعرف والله..بس انه رجعتهن لمكانهن وقفلت الباب حتى المفتاح ضل عندي..
عافهه واجه للغرفة..كام يحجي بعصبية : هذا علي الجلب.. ليش من الفلوس ماكو هو طالع..وين يطلع هذا الجبان.. خليرجع وانه اعرف شسوي..والله اذا طلع هو..اطلعه بالچلاليق هو ومرته وغراضه..
دنوة : اصبر يمكن انت غلطان..

رائد : لا صح..ما اغلط بالحساب ابد.. انه كتلهه لامي هذول مو ثقة..تكلي لا قابل هم حرامية..شكد فطيرة..
سديت الباب واحاجي انه وانزع الشال : هسة يجي علي ونتفهم..لا تحرك اعصابك..خوب انت تموت ع العصبية.. هدي شويه شبيك..
رائد : اكول يابة لا تحجين بتنعوص..
دنوة : ها صرت اتنعوص..داحجي عادي بس انت عصبي عيني..يله سكتنه ها اها..رحت ع الكنتور طلعت ملابس.. نزعت اللابستهن..بدلت وانداريت ع رائد..ايده وره راسه ومتجي ع التاج مالت الجرباية..بس مبين عصبي وضايج.. كعدت يمه : فدوه تروحلك الفلوس..بس لا تضوج..
رائد : يولي انه مو ع الفلوس..بس ارد اعرف منو ماخذهن .. خوب اذا محتاج جان كلي..مراح ارفض..
دنوة : ماعرف بعد..اسويلك شي تاكله..
رائد : اي سوي وصيحيني..

نزلت جوه للمطبخ.. جلنار توهه كاعده وشايله طه بيدهه..طه بس شافني يريد يذب روحه من حضنهه..اجيت اخذته واحضن بي وابوس..شكد حبيته.. تعودت علي ..
جلنار : شوكت رجعتو..
دنوة : كبل نص ساعة..البنات وين..
جلنار : يمكن بالكلية..البارحه كالن بلش الدوام..
دنوة : ها زين..عافتني وراحت..خليت طه بالكع وانه طلعت اكل من الثلاجة اسوي اكل..سمعت صوت بالصالة..نصيت النار وشلت طه ورحت..علي كاعد بالصالة..يبو اليوم رائد يكلب البيت على راسنه..شافني جان يبتسم..كبر ولا يجوز..
ام علي : ها يمه شسوه صاحبك..
علي : انطيته الفلوس..كال جم يوم واخابرك..كتلة الي ولعائلتي حطلع لسوريا يمه..لا لجوء ولا المانيا..امان وشغل

وائل : ومنيلك فلوس سفر انت وعائلتك..
علي : عندي..خوما اطلع من بيتي فارغ..
عفتهم يحجون ورحت للمطبخ..يعني علي ما ماخذ فلوس رائد چا وين راحن..مليون و٤٠٠ هواي..مو مال ناسيهن.. طفيت النار وخليت الاكل بالماعون..سمعت صوت هوسة بالصالة بس لا رائد اجه..اخذت طه لغرفة امه..خليته عدهه ورحت للصالة رائد واكف بالصاله ويصيح وعلي جدامه..
رائد : طلع الفلوس وينهاااا..ياحرامي..امنت بيتي يمكم اجي الكى ايدي والكع..
علي بهدوء : ما ماخذ فلوس..
رائد : مليون ونص وينهنننن..انه خليت مليونين ونص.. اجيت لكيت بس واحد..كلي اذا محتاج انطيك والله ما اردك

علي : يمه هذا شديحجي..شنو ابوكك..بحالك انه..
رائد : يول لا اتعبني..مالي خلك..يابه حلال عليك الفلوس وروح ابوي..بس كول احجي..حتى اذا مو انت ماخذهن اعرف اتصرف واديور على غيرك..
ام علي : ديكلك مو انه..شتريد يسويلك بعد..
رائد : حجية انه داحجي وي علي..هو جبير ويجاوب.. شو انه اكلتوني وشربتوني ماخليت امي تدخل..هو رجال ويحجي ما يحتاج تجاوبين بمكانه..
علي : اي انه اخذتهن..ما بكتهن..لأن اخلاص تدري..
رائد ضل صافن..ويعاين لاخلاص مصدوم..
رائد : صدك..وانه سألتج تكليلي ما ادري..
اخلاص : اي جان محتاجهن ويريد يسوي الجوازات..
رائد : لم ملابسك واطلع بره..انت ومرتك وبنتك..يله بالعجل اروح ابدل واجي..اذا مالكيتك طالع اهجم البيت على راسك.. وانتي حسابج بعدين..

عافهم وطلع..الاوردة بايده ورگبته كلهه بينت..صعدت وراه لكيته يحاجي روحه ويركع بباب الكنتور..سديت الباب ووكفت وراهه..ماحجيت شي..ميدري انه هنا..
رائد : انعللل عشيرة رائد كلهااا..من جبيرها لصغيرها .. الينغبن من الكل..دمي فاير اريد اموته..هاي اخلاص هم اخت ومحمد العاااار..كلهه براسي..اي كلهه.. ماخذ وراثة الخلفوهم ومذبوبين براسي..يمتى ما صارت مشكلة تعال رائد حلهه .. وين ماكو واحد مسحول بالكع لازم اوكفلة جي كرابتي.. هذا علي السرسري..مرتين وكتفلة بتهمة بوك..وهسة جايني بكل عين صلفة يكلي مو انه بكتك..بس مو صوجك..صوچ اخلاص الجلبة..خنشوف من منو تاخذ فلوس بعد..الا ما خليتج تلگين بصيخ..اطلع كلب ابن كلب..
اندار شافني واكفة..يحجي ومنفعل خطية.. ماحجيت شي خاف يرزلني..بس هو حجه..

رائد : ما راح هذا الجلب..
دنوة : مادري..انه صعدت وياك..نزع التشيرت لبس غيره وراح نزل..هاي حضل اركض وراه فوك وجوه..نزلت وراه.. علي كاعد بكل صلافة ع القنفه بالصالة التطلع للدرج وامه يمه والحجي هذا من كل عقله عود..چا ليش رائد يصيح واعصابه تلفت من العصبيه..والله حيصير بي شي..
رائد : شو ماطلعت..
علي : تكمل جوازات عائلتي واطلع..
رائد : خنشوف منو ميطلع اليوم..لو انه لو انت..
راح للغرفة اليكعد بيهه علي..ثواني وطلع هو ومرته وبنته.. بيدهه جنطة..علي ضل صافن..
علي : ليش تمد ايدك على مرتي..
رائد : منو هي خاطر امد ايدي عليهه..يله بره..
كام علي اخذ الجنطه ويصيح..الحجي يكله لرائد مسوي نفسك رجال من طردتهم..هو مجاوبه..

طلعهم وركع الباب ركعة..كلت طاحت هسه..طب للبيت..
رائد : اليفك حلكة بكلمة اطلعه بره..كافي يابه كافيييي.. لعبتو روحي الله يطلعهه بيكم..سممتوا عيشتي.. بكتوني وطعنتو بشرفي وشرف مرتي..بعد اكو شي ماسويتو..
ام علي هي وتبجي : هسة يكتلون ابني..كله بركبتك انت يانذل الله شيسوي بيك بعد..كل يوم شايط للستار
رائد : اي هو الله بلاني بهالچهر التسد النفس.. ابنج عاااار ماعلي شي..انه الحنجلط من وراكم..مو تكليلي ما مسويلنه شي..هاجياهن وحده وحده..ابنج واكفله مرتين بتهمة بوك.. ومره بتحرش..ومره متورط وي واحد مغتصب بنيه.. من عدا جياته شهور وشهور بالبيت القديم..ومسوي نفسه صاحبي بعدين بس يعدي عتبة الباب يحجي علي..رائد هيج وهيج..

يابة انعل شرف رائد اذا عنده شرف من يخليكم بالبيت تردين تبقين انتي وبناتج..هله بيج.. بس والله وهاي امي جدامكم كلكم..اي واحد يسوي مشكلة يطلع بره..الحجي الج ولجلنار وللكل..وحتى لبناتج من يرجعن تكليلهن هيج.. مو ما تكدرون علي ترحون تأذون دنوة..اذيتهه من اذيتي.. ولو صارلهه شي كلكم تتحملون شحسوي..
وائل : شو اكلتنا وشربتنا انت..صدك ماعندك اخلاق..
رائد : لا يابة..خليت الاخلاق الكم من مسويلكم لمة بعوره وتتهمون هاي المسكينه وانه ما موجود..
ام علي : يمه من لسانك..الله لا يطيحنه بيدك..
رائد : شوفي ابنج طلع وفلوسي ببطنه..جعلهه سم كولي امين .. تعبي هذا..تعب شهور..
ام علي : هن خلك مليون ونص..
كعد ع القنفة وايده على عيونه : يمه جاوبيهه انتي.. بعد مابيه حيل مناكر .. عفتهم يحجون ورحت كعدت يمه..

ايده ترجف من العصبية..همست : اعصابك تلفت..هسة زين هج.. منو يستاهل تحرك دمك علي..ماحچه شي بس صوت انفاسة عاليه..شسوو بي الله لا ينطيهم..شلون يحجون حجي يغث الماينغث..شناطينا.. انه عشت يمهم شهر والناطيهميا هواي .. ماكو ابن اخت هيج يسوي..هي الاخت نفسهه ماتسوي هشكل بس كبل شصاير وشمسويلهم ما ادري..اكيد مسوي الاكثر.. ما يستاهل كل هذا : كوم اصعد فوك ارتاح.. عاين علي وصعد هذوله بعدهم يحجون..شنو هلقابلية..عفتهم ورحت للمطبخ.. عصرت ليمونه وياهه مي بكلاص وصعدت فوك..طبيت للغرفة وسديت الباب..كعدت يمه ع الجرباية .. انطيته الكلاص.. شرب منه شويه وخلاه ع الكومدي
رائد : نفسيتي مسدوده للدنيا كلهه مو بس للاكل..

اندار علي ويحجي بحذر.. باجر انزل للواجب..مو اجي الكى مصيبه لخ .. صيري گوية مو فاهيه..ولو راح هذا العار بس هم ديري بالج..خوش..
حركت راسي يعني اي..كمت طفيت الضوه وتمددت من الجهة اللخ..فتحت ايدي : تعال نام..كافي تحرك باعصابك..مو كافي عليك الطريق شطوله وما نايم زين.. خله راسه بحضني وايده محاوطتني من خصري..
رائد : بعد ماخلي فلس احمر بالبيت..
دنوة : لا تخلي بكيفك..هسة انت صغير بس تصيح..
رائد : اي والله..كبل جم يوم صرت ٣٧..عبالك ذاك اليوم جنت سبعه وعشرين واكول بعد مو هسة اتزوج..والله العمر لحظة صدك..كضيته ركض هنا وهنا..
دنوة : ليش ماكلت..جان سويتلك عيدميلاد..
رائد : يولي بحال عيدميلاد يرحم امج..اكو واحد يكيف يكبر سنه ..عاد انه شكبرني صاير..

دنوة : لا بعدك عيني..قابل خاش بالعمرين.. ابتسم وتنهد بتعب.. كمت امسح على شعره..لحدما غفى..وانه ما راضية بحياتي وي ابوي..شوف رائد شلون يكعد بعيطه وينام بعيطه بسته وغفيت وياه..كعدت ماعرف شوكت..لكيته دينشف بشعره ولاف الخاولي من بطنه وجوه..صدره مبلل..
دنوة : ما بردان.. عاين علي وابتسم..
رائد : لا..كومي اكلي..
وخرت الغطى وكمت..كام يضحك.. شكو ..
رائد : عدلي شعرج ونزلي..
عاينت لشعري بالمرايه..هاي شصاير..هو اصلا مو سرح.. معكش..ادور متخربط..عدلته شلون مجان..تذكرت سالفة اخلاص ..انداريت علي : شسويت على اخلاص..
رائد : اجت تعتذر..ما نطيتهه وجه..

تكرهج اي ماشي.. بس انه اخوها..ايدي هطولهه بحلكهه كلشي تريد اسويلهه.. وسكتتلهه هواي..بس ماكو بعد
دنوة : يله ختولي..هيجاحسن مما تكتلهه..
رائد : لا ماضرب مره..
تقربت يمه..رفعت نفسي وحاوطته من ركبته..همست باذنه : لو هج الرجال لو بلاهه..عاينت علي لكيته مبتسم..بسته ووخرت ايدي ..انت ليش هشكل طويل..شدعوه..
هو ويلبس بالفانيلة : انتي الكصيره يابة..
دنوة : لو محاجية احسن..
رائد : مسمعت..شكلتي..
دنوة : هيج معليك..انداريت ع الكنتور البس شال..اجة شالني خلاني ع الجربايه..عود زعلت فمحجيت شي..كل شويه يبوسني ويعدل بشعري : شنو هسة اضل هيج..
رائد : شتردين..

دنوة : اكل اصخم..شمدريني..
رائد : هسة تاكلين زين.. تقرب باسني من شفتي..يطول بيهه بعدين يبتعد شوي..ويرجع ادور..انه نسيت على شنو ضجت حتى..بادلته كلشي بلهفة وحب..ماحس بس بلمساته وانفاسه كلشي هادئ وحنين منه..وووو.. باسني وحضني..
رائد : اخذج لبيت ابوج..
دنوة : تدري نسيت..اذا ماعندك شي اخذني..
رائد : يله خوش..شوكت اجي اخذج..
دنوة : بكيفك..ليش متضل وياي..هم تشوف ابوي..
رائد : كله يصير لخاطرج..
بسته وحضنته..ضلينا نحجي شوي بعدين كمت لبست واخذت ملابس ورحت للحمام اسبح..كملت وطلعت..صارت زينب واخلاص بوجهي..كمشتني من زندي وتعت بيه..
زينب : انتي ورجلج الخبل خليتو اخوي يتهجول..الله شيسوي بيكم بعد..حتى ما مرتاحين بحياتكم..

دنوة : كبر.. شكو تغلطين على رجلي وفوكاهه ببيته..اشو وخري ايدج صدك متستحين..عتيت ايدهه ورحت.. هي شافتني رحت ما نطيتهه مجال تحجي..جان تسكت ما جاوبت.. طبيت للغرفة ادردم بيني وبين نفسي..
رائد : شبيج تحاجين روحج..
دنوة : مابيه شي..يله كوم بدل دنطلع..بس اكلك اصبر.. اريد اكل شي بطني توجعني..ضحك وكام لبس البرنص..
رائد : اكلي براحتج حبيبي..
اجه يمي..باسني وراح..نشفت شعري..لبست الشال .. اخذت الجنطه ونزلت .. كعدت يم الحجية بالمطبخ.. دتاخذ دواهه
الحجية : ها يمه اشو مبدلة..
انه واصب اكل بماعون جاوبتهه : اي حياخذني صگر لبيت ابوي..بالليل نجي..
الحجية : اي شكو بيهه..انتي هم ماطلعتي من يوم الاجيتي
دنوة : على كولتج..كعدت اكل..

الحجية راحت.. شوي وطبت جلنار واخلاص
جلنار : سمعت جنت متزوجة قبل..صدك..شوكت طلكج..
دنوة : اي..كبل أشتر طلكت..
جلنار وهي متقصدة : بس بعدج صغيرة..شوف شوف.. صغيرة ومتزوجة مرتين..من تكبرين شتسوين..تاخذين عشره ضحكت هي واخلاص..شكد ضوجتني..متحملت حجيت : ليش اخذ عشره..
اخلاص : انتي عندج گلب لو فندق..شو كبل تحبين عقيل واخذتي..وهسة تحبين رائد..ارسي على مرسى..
دنوة : ما مجبوره اجاوبج..المهم رائد يعرفني..مو مهم انتي وهاي ..واشرت على جلنار باستخفاف.. عفتهن وطلعت.. بالباب جان تعيط جلنار..
جلنار : ام الرجوله..اخذتي عقيل من مرته وهسة اخذتي رائد مني..بس وداعتج جايبته جايبته وكدامج..

دنوة : ديله لج..شكد سخيفة..عود جايه تطبق سوالف الضراير براسي..تره حبيبي يعطف عليج ومخليج هنا..لا تنسين حدودج ادور ما علي بس انتي..اخذت الماعون ورحت للصالة.. الحجي كاعد ديكلب بالاخبار..مهتميتلة..سويت روحي ماشفته.. هو هم ما كال شي..سكت..شوي وكملت..وديت الماعون للمطبخ جان ينزل..كامش السويج بيده..والعطر نزل كبله..
رائد : يله نروح..
ابتسمت انه واعاينله من فوك ليجوه : اي يله.. طبيت للمطبخ اخذت الجنطة ورحت وراه..صعدت بالسيارة : رائد..
رائد : عيوني..كولي..
دنوة : شعجب متخليني البس عباية لو صاية..
رائد : براحتج حبيبي..اذا متعجبج لتلبسيهه..
انداريت علي : زين يصير متروح باجر..تره مشفتك شنو هاي .. هو اليوم اجينه مناك..
رائد : هاي شسوي..اخابرج عود لتخافين..

دنوة : لا كلفت روحك..مشكور.. ضحك وكرص خدي..
رائد : يولي لا تسويهه زعلة..قابل اول مره اروح..لووو خايفة اروح وما ارجع..
دنوة : فال الله ولا فالك..اكول سديت نفسيتي..روح وخلص .. هاي فوك ما اكله مشتاقتلك لا تروح..ادور يكلي اروح وما ارجع .. خوش والله..
رائد : يمة يمة من لسانج..يله نزلي وصلنا..
دنوة : خوش..بعدين نتفاهم..كام يضحك ويحرك براسه.. شلون ياخذني على كد عقلي..نزلت وهو واكف يمي.. دكيت الباب طلعلي ابوي..بوسته ورائد سلم علي وطبينه جوه.. كعدنه بالصالة..راح صاح البنات يجون يسلمون.. شوي وفاتت شذى..بيدهه صينية وكلاصات عصير وكليجة..
محيي : شلونكم..شلونج بوية..مرتاحه..

ابتسمت : الحمدلله..اشتاقيتلك وكلت اجي اشوفك..
محيي : هله بيج بكل وكت..ليش ماجيتوا ع الغده..
رائد : والله بالعشره ونص طبينا للبيت..جنت ببيت خال امي بالانبار..والطريق يتعب تدري..فديوم اجيبهه تدلل..
محيي : ها الله يساعدكم..
اجت سما ورزان سلمو علي..متغيرات كلش..بالاسلوب يعني ويتعاملون وياي بخوف..يمكن عبالهم بعدني مريضة..صدك حالتي جانت تقهر..احس واعرف كلشي بس ماكدر اتحرك لو احجي..همزين راحت هالايام..الله لا يعودهه ولا يشوفهه لاحد حتى عدوي..البنات راحن وبقينه احنه..انه شوي وكمت صعدت فوك يمهن..هنا ابوي ديحجي وي رائد مدري شنو.. يعني ماحبيت السالفة..اول ما صعدت شفت باب غرفتي مفتوح.. ويطلع صوت البنات من عنده..

سما : شفتيهه شلون صارت زينة..الحمدلله..الله ستر على امي جان راحت بداهية..واحنه وياهه..
رزان : لو بابا يدري هي مسوية السحر يطلكهه..
سما : سكتي الله لا يكولهه..مو حجيت وياهه..كتلهه شمسويتلج هي وتسويلهه هج..تكلي معليج..اذا الواحد يجيب الاذية لروحه احنا شعلينا..
رزان : شعليج يمعوده..انوب تزعل عليج..يله هسة هي زينه بعد شكو..بس تدرين..هذا رائد خوش رجال..
سما : شلون..
رزان : لو واحد غيره وخطيبته تتمرض وهج تستفرغ دم وحالتهه حاله..جان عافهه ولا بحالهه..بس يحبهه صدك..
سما : يحبهه على كولتج..همزين..امشي نطلع..اخذت الغراض شعدنه باقين بعد..

طلعو من الغرفة شافوني واكفة..انصدمو وفشلو بنفس الوكت انه من سمعتهم لعبت روحي من البيت كله ومن شذى.. يعني ادري بيهه تكرهني بس مو لهلدرجة..انه شمسويتلهه.. اشو جنت اكعد من الصبح انظف واطبخ وكلشي اسوي.. حتى حمام اغسل ..عبالك جايبتني خدامة..كل هذا واسكت.. اكول ما احجي خاف تتعارك وي ابوي ويصيرله شي..لو يطلكهه والبنات يتبهذلن خطية..بعدين هي اجازيني هيج..ماريد تحمد بيه لو تشكرني..بس ع الاقل ما تأذيني..والله حتى لساني صار ثكيل بعد ماعرف شحجي..حتى مالي حيل اعاتبهه لو احاجيهه..اكيد حتنكر..
رزان : ها انتي هنا..شعجب..
دنوة : لا ردت نحجي شوي كبل لا اروح..

رزان : اي يله ماعدنا شي اليوم..امشي نكعد بالغرفة..
جانت شايله بيدهه جاكوج وبسامير..يمكن مسوين الغرفة مخزن..مدري هي جانت مخزن وسووهه غرفة..غلست..حاولت ما ابين..كعدت يمهم..فتحو التلفزيون على فلم عربي وجابو حب..كعدو يحجولي ع الدراسة وهاي..
سما : ماصرتي حامل..
دنوة : لا بعد..شكو مستعجلين..
رزان : هو انتي شوكت تزوجتي صدك..
دنوة : شهر يمكن..اي شهر..
سما : اكلج شوفي شلون حليانة وسمنانه..ترس جسمج.. وللصدك..حتى رائد حليان..مبينين مبينين..
دنوة : شتقصدين ولج..
سما هي وتضحك : لا عيني منقصد..قصدي لايكين لبعض

ابتسمت..بس كل ما اعاين عليهن اتذكر شذى..كلش يشبهوهه ما يشبهون ابوي..بقيت يمهم شوي بس تفكيري مو وياهم.. كمت اخاف افوت للبيت بعد..ادور بطني عصرتني عصر.. كامت تأذيني..اريد ارجع لبيتنا احسن..كمت اروح جوه..
رزان : وين رايحة..ماشفناج..
دنوة : اي غير اكعد يم ابوي..جا عليمن جاية..
رزان : يله هسه شويه ونجي وراج..
ابتسمت وسديت الباب..نزلت كعدت يم رائد..ابوي مجان موجود..عاينتلة : ابوي وين..
رائد : طلع يجيب اكل من بره..
دنوة : ليش خليته..كبل شوي اكلنه ما مشتهين..
رائد : كتله..ماقبل..يكول جم مره تجوني انتو..
خليت راسي على جتفة..هو كاعد ويكلب بالتلفزيون..

رائد : شبيج ضايجة..
دنوة : لا مابيه شي..داحجي وياه جان تجي شذى.. شلت راسي منه..كعدت تحجي وياه علي..
شذى : شلون صارت دنوة..
رائد : زينه..احسن بهواي من اول مره..
شذى : ها وماصرتي حامل..
دنوة : لا بعد..كلت بگلبي.. هاي ليش كلهه تسألني على حملي مصارلي هواي مزوجة..وهو هم ماشفته هلكد ..صفنت شوي .. شو متغيره وياي..وتحجي عدل وتتبسم..بعد وكت همزين تذكرت تصير ادمية وياي..وره ما عفتلهه البيت وطلعت شكد اكرهه..ولا اطيق اعاين بوجهه..هيج كاعده على اعصابي .. ادور سمعت بسالفتهه من البنات..

يعني مادري شحجي شكول..اذا ابوي يدري يشرشحهه بالشارع هي وبناتهه ويكرههن مثل ما كرهني بسبب امي بالله امي جانت غلطانه والحق واضح بس عمو خطية.. الا هاي شنو تاليتهه حتصير .. شكد ما احاول اوصل شعوري بذيج الايام ما يوصل صح.. صدك تأذيت..حسيت روحي بشر ثاني مو انه من غير الاحلام والكوابيس..والخنكة المغربيه والفجريه..هاي موضوع ثاني.. ما ادري شكول..اذا انتي ما ترديني احجي وي ابوي يرجعني لبيت جدي..غرفتي موجودة وجدي ما يعارض..بس كلشي بي صالح.. ضلينا كاعدين بعدين اجه ابوي ..شكد جايب.. شكو قابل منو جاي : ليش تعبت نفسك..
محيي : جم بنيه عندي..تدللين انتي..
ابتسمت..عاينت على رائد لكيته مبتسم..احسه يفرح على فرحي ويزعل على زعلي..

كعدنا ع الاكل..ولو جنت ماكله بس ميصير يعني هو متعب نفسه وجايب من بره..بقينا كاعدين.. البنات كعدو يمنا ع الاكل وبقو شوي بعدين راحو ينامون..كالو دوام .. تأخرنا عدهم.. للـ١١ يالله طلعنه..صعدت بالسيارة وهو هم بس طلعنا من غير طريق : وين حنروح
رائد : اريد اجيب كرزات وهسوالف..باجر انزل للواجب.. اريد اشبع منج اليوم..
دنوة : ووين حتلكى محل مفتح هسه..
رائد : كحط يولي..مطشرات..اكول بس لا زعلانة..
دنوة : ذكرتني بزعلتي حتى اكملهه..
رائد : اعقلي يابة..المكتوب يصير لو اضل بالبيت..

عاينت علي : عود جاي تراضيني..انت مو يم هسوالف اصلا كبرت بعد..
رائد : وشنو اليكبر ميعرف يراضي بعد..دصبري بس نرجع للبيت..هسه كوليلي مشتهية شي اجيبلج..
درت وجهي للجامه : ماريد شي..اريد انام.. سكت ما جاوبني طلعنا للشارع العام..جم محل مفتح مو كلهم..طبك يم واحد وراح..ضليت اعاينله شلون يمشي ويحجي وي الرجال.. اخذ منه علاكه بس ممبين شنو بيهه..وراح عبر ع الجهة اللخ.. جاب هم مدري شنو واجه..دار وجهه ع السيارة..درت وجهي عود مدا اشوفه..اجه صعد..خله علاكه بحضني..درت وجهي علي : شنو هاي..
رائد : حلويات وچباسة..
ابتسمت وخليتهن بصفي..وصلنه للبيت..

طبيت جوه ورائد قفل البيبان وفات وراي..كلهم نايمين..بس جلنار كاعده هي وزينب بالصالة الثانيه..مسويات فواكه ومدري شنو..ما عاينت عليهم ..رحت اصعد فوك..صاحتني
جلنار : هاي شجايبين..انطينه شويه..
نزلت انطيهه..اجه رائد ذب علاكه بحضنهه..
جلنار : ماليش..
رائد : لتاخذين منهه..هاي الج.. طه وين..
جلنار بصوت ناصي : نايم عيوني..
عمى بعينج..شكد غثتني..ماردت انطيهه مجال..رحت يمه كمشت ايده : يله حبيبي نصعد.. حچيتها متقصده.. اريدهه تسمع..خلست من شافتني حاجيته هيج..اخذت العلاكه وراحت هي وزينب لغرفتهه..عاين علي وابتسم..
رائد بهمس : زين تسوين يولي..فدوه لهلحلك..
ابتسمت : تدلل..اخذ العلاكه من ايدي وصعد..

رحت للمطبخ جبت ماعون وصعدت فوك..سديت الباب وقفلتهه..طبيت نزعت الشال والبلوز..ضليت بالتشيرت ربع ردان والبنطرون.. اخذ الماعون خله بي حب وكرزات..كام ع الكنتور جاب اقراص مال افلام..طلع واحد اجنبي..شغله وطفى الضوه..نزع التشيرت وكعد يمي..
رائد : ليش مابدلتي..
دنوة : مابيه حيل.. باسني وكملنا الفلم ..ادور مطلع رعب وكله دم وهسوالف..انه عندي عقدة من الدم..بعد الشفته.. فبس يطلع دم لو شي ادير وجهي واحضنه..هو يضحك..مثل المكيف اي ليش ميكيف.. وره ساعه ومدري شكد..انداريت ع العلاكه .. شكد باقي..كتله : شكد جايب..
رائد : شكو عليهن..تاكليهن تضميهن..براحتج..

خليت راسي على جتفه وحضنته : نعست.. شال الماعون خلاه ع الكومدي وطفى التلفزيون..الغرفة صارت ظلمه فد دور.. واحنه جنه نشوف فلم رعب..صار المنظر جدامي.. حاوطته من رگبته وتقربت علي..كتله : اخاف..ظلمة..
بهمس : تخسى الظلمة تخوفج..تعاي يابة تعاي..
باسني وحضني..صرت كلي بحضنه..ما اسمع بس انفاسه .. سكتنا ثنيناتنا..بعدين حجيت : احبك..
رائد : اعشكهه لبنيتي كلهه..من شعرهه لعيونهه لطولهه..
ضحكت بهدوء وبسته..من الهدوء نمت..كعدت الصبح على صوت اخلاص..ونور واكفة يمهه تعاين بالغرفة..
اخلاص : كومي..رجلج حيروح للواجب وانتي نايمة..
كمت لبست الشال ورحت للحمام اغسل..

غسلت وجهي ونزلت جوه..رغىد كاعد ع القنفه طه بحضنه والجنطه من الجهة اللخ تقدمت كعدت يمه..حجه بهمس..
رائد : ماردت اكعدج..كلت تعبانه..هاج كمشي..
انطاني فلوس..كتله : شسوي بيهن..
رائد : ميخالف..بلكت ردتي شي..عليش تاخذين من احد .. انه موجود شتريدين احجي..
ابتسمت : الله يخليك يارب..ضل شوي بعدين صاح على جلنار انطاهه فلوس وخله طه بيدهه..اخذ الجنطة وراح..وره ما ودعوه كلهم..طلعت وياه اسد الباب..دنج باسني من راسي..
رائد : بالج على نفسج زين..
دنوة : ميخالف..ابتسم وراح..سديت الباب وطبيت..عاينت للساعة..بالوحده..ما شاء الله..يوم عن يوم ديزيد الوكت ساعه رحت للمطبخ اكل..طبت الحجية..

الحجية : خالة لا تاكلين..الاكل ع النار..
دنوة : ها..يله خوش..رجعت الماعون وكعدت يمهه ع الميز.. سولفنه..سألتني ع الحمل..كتلهه : ع الاكثر حامل..صار اكثر من خمس ايام..
الحجية : اي بلكت..كسري عينهه لهاي الحية..
دنوة : عليمن..جلنار..
الحجية : اكو غيرهه قابل..شكد تغث البشر..وتحجي بنزاكة وهي اذا صاحت ترج البيت بصياحهه..
دنوة : ههههههه..خالة عليج سوالف..دعوفيهه ختولي.. ادور تجي تتعارك..بحال عركات..
الحجية : على كولتج..البارحة اخلاص اجتني تبجي..
دنوة : يا..ليش شكو..
الحجية : رائد ما يحاجيهه وصاد عنهه..هي متعلمة علي يدللهه وكله عيني واغاتي..
دنوة : اي السوته قليل قابل..

الحجية : هو انه كتلهه هيج..كتلهه ما تستحين تسوين هشكل باخوج..هو منو علي..خلك واحد هتلي..ولو ابن اختي بس الواحد يحجي الحق..شحاله متشرشح من مكان لمكان..
دنوة : اي والله ما ادري شلون فكرت من سوت هيج بحبيبي .. دنحجي جان تفوت زينب ونور..
الحجية : شو مارحتن للدوام..حتى اخلاص..
زينب : ماعدنا شي اليوم..باجر امتحان..حتى نقره يعني
الحجية : اي اشوفجن دتقرن..شو بس تفرفن بالبيت..
زينب : ديله خلنتغده بعدين نبلش..شكو مستعجلين..
الحجية طلعت وهن طلعن وراهه..ضليت كاعدة شوي بعدين صبيت الاكل واجت اخلاص اخذته للصالة..خلصت اليوم يم الحجية..هي الوحيدة تحجي وياي بالبيت..

كلهم عبالك مستثقليني..بالليل وره العشه..كعدنا ع التلفزيون بالصالة .. اجت ام علي كعدت ويانا..
ام علي : اكلج خية..انه گلبي غادي نار ع علي شلون..
الحجية : منو كلة يسوي هيج برائد.. حگ الجزة..
ام علي : هسة انه جايه اشكيلج خاطر تساعديني وتخففين عني لو تذكريني بسواية علي..
الحجية : ماعندي شي وياج..بس شتردين اكلج..باجر خابري عود شوفي وين صار..مرته عدهه تلفون مو..
ام علي : اي..
الحجية : اي هاي هي..باجر خابري عيوني..
بقت كاعده يمنه..كل شويه تعاين علي وتتأفأف..اغلس احاول ابينلهه مدا انتبه..سألت على محمد..
الحجية : هذا وين يركد بالكع..يم اصدقائه ببغداد..اكو واحد توه جاي من سفر بعدين يسافر ادور..انه مشايفه هيج.. مايكول اشوف امي شلونهه شحالهه..كطعي..

ام علي : ماخلصو هالاصدقاء..
الحجية : اندري .. كال يومين هيج ويجي ..الله كريم بعد
خطية..مدري ليش انقهرت عليهه..رائد ينزل للواجب اسابيع ومحمد بس يسافر..ضاله على اخلاص ومشاكلهه.. همزين نامت اليوم من وكت..چي عدهه دوام..حتى البنات..انه ضليت يمهم شوي بعدين صعدت فوك..طفيت الضوه خليت بس ضوه التيبل لامب..اخذت نفس..ريحة رائد مالية الفراش.. حضنت المخدة ونمت..كعدت الصبح لبست الشال وغسلت ونزلت .. لكيتهم صابين الريوك..وطه يم الحجية يطبطب على رجلهه يريد توكله..هي تكله انطيني مجال بس اكعد..اجيت اخذته وصبحت عليهم..كعدته بحضني..هي جلنار حاطتله الاكل مالته بس مادري وينهه..فوكلته من عنده..

اكلت وكمت..شلته وياي اخذته للحمام غسلتله حلكه وطلعنا كعدنا بالصالة العبه واحرك بالخرخاشه جدامه..هو يضحك ويمد ايده يريد ياخذهه وابعدهه عنه..ادور يضل يكركر..الله شكد حلو لو يصير عندي ابن لو بنية ماكو فرق..احسه حلالي الاعبه واحطه بحضني شوكت ما اريد..ابتسمت وشلته.. اجت جلنار..
جلنار : ها اكل..اني عفته جنت اغسل..وصخ ملابسي..
دنوة : اي وكلته..اكلج انتي مو مصلاوية..
جلنار : اي..
دنوة : اشو تكولين عفته..مو عفتو انتو تكولون..
جلنار : غير صارلي سنين بالبصرة..تعودت على حجيهم.. ليش خوما تضوجين لأن احجي مثلكم..
دنوة : لا ليش اضوج..

جلنار : شوفي العصر نطلع للسوك..اريد اشتري ملابس الي ولطهاوي..تعاي وياي..البنات حيجن تعبانات..
دنوة : ماشي اجي..هاج كمشي اروح اغسل المواعين.. اخذت طه وانه رحت للمطبخ..غسلت المواعين..شوي واجت الحجية كامشة بيدهه التلفون..كلتلي هاج هذا رائد يحاجيج.. نشفت ايدي واخذته منهه..هي راحت.. هله..
رائد : هله بيج حبيبي..شلونج..
دنوة : اسأل عنك..انت شلونك.. ضلينا نحجي..كتله حطلع وي جلنار تريد تشتري ملابس..كلي طلعي بدون متكولين.. شويه وراح.. وديت التلفون للحجية وكعدنه نحجي.. بعدين كمت اسوي الغده بين ما كملت اجن البنات..كامو بدلو وجلنار اجت صبت الغده تغدينه وكلمن راح لغرفتة..كمت شلت الاكل وغسلت المواعين.. كملت ورحت فوك..

فتحت التلفزيون اكلب.. للعصر كمت بدلت واخذت فلوس.. اريد اشتري اختبار حمل.. ماريد اتأمل ع الخالي بلاش..اخذت منهن ونزلت..
جلنار : هستوني ردت اصعدلج..يله امشي..
طلعنز للسوك..طه ساعه يمي ساعه يمهه..ادور وكح ويريد يچيت من حضني..وهي هم تضوج..ساعة تختار.. اي هذا لا مو هذا..اخر شي كملت..كتلهه خلي طه يمج..دقايق واجي .. الصيدلية بسد المحل الاشترت منه جلنار..فرحت اخذت اختبار ورجعتلهه : يله نرجع..صار الليل..
جلنار : اي..ششتريتي..

دنوة : هيج..حب وجع راس..عاينتلي جنهه ما مقتنعه.. ماريد اتفشل جدامهه فما حجيت..رجعنا تكسي..رجليه كامت توجعني من الوكفة..طبينا للبيت..بالطرمه واسمع صوت هوسة منو هنا..طبيت للصالة.. هاي شجابهه......

يتبــــــــــــــع......................