رواية اسألي عني الليالي الفصل التاسع وثلاثون 39 - بقلم رقية جاسم

    لا يدنيا شجاج مالج وي المحبين جودة ..
       ولا محنه ..
ضيوف چنا ومحرب اعلينا الوكت ..
    وبطارف ديارچ گعدنا گاطعين گلوب ..
ودروب العشگ عثرات وما واحد نتلنا ..

قناة التليگرام

حساب الانستگرام

الـبـارت الثامن والثلاثون.............

جنوب البصرة الحدودية مع الكويت .. سنة ١٩٤٨م ..

جنت طالع وي ابوي وعمامي نشوف الزرع ..عمري ١٨ بذاك الزمن..بنص الخضار والريحة الطيبة ترد الروح..احس روحي من هلكاع وهي من روحي..كثر ما متعلك بيهه.. ما يمر يوم الا اذا جيت وتمشيت بيهه.. صح ١٨ عمري بس ضخم وطويل مشورب ولحيه.. هو المعروف دائما اهل الريف يكبرون بالعجل وتبرز تفاصيلهم نثيه ورجال..ابوي فاتحني بسالفة..
ابوي : بوية وليدي..انه اريدنك تزوج..تدري ماعندي بس انت والحلال هذا بيدمن يصير من بعدك..وانه كبرت بعد ابوك.. احس كرب يومي..
قاطعته : لا يابة الك طولت العمر..لا تكول هشكل.. شتريد انه حاضر ..اذا هلشي يريحك قابل..

ابوي جان مريض بوكتهه وطايح بالفراش اسبوعين.. هليوم كام وراد يشوف الحلال.. كام يتشهالنه اكل وكعدات ..انه كلي اريدن ازوجك..ماعارضت جي صحتة مو بصالحي.. تخرجت من الخامس الادبي وضليت اشتغل وياه..اخذت ايدي ع الشغل وطبيعتة ..اروح وياه اشوفه شلون يحاجي العمال ويعلهم ع الشغل.. يعني صدك جان ابوي هو قدوتي بكلشي .. امي مره فقيرة من اهل كبل..

جابت بنات اربعه بعدين اجيت انه وتوفت وره سنه من ولادتي.. موتة الله مو لسبب..خواتي كلهن اكبر مني ومتزوجات..فبقيت بس انه وعمتي اخت ابوي وابوي وهي تساعده بشغلات البيت فماتزوج ابره امي..شكد لحوا علي يتزوج مارضا..هو هم جان جبير من توفت فضل على قراره.. يعني انه وعيت حسبالي عمتي هي امي..هي جانت اداريني وتصيحلي يمه ابني تعودت عليهه ولحدما كبرت اكللهه يمه ماغيرت طبعي.. كتلة لابوي المن خطبتلي..
ابوي : بت خال امك الله يرحمهه..خوش بنية وحليوه الله يستر عليهه..هي اجت ببالي اولهن..وانطيت كلمة لابوهه..

شامخ : ها على هلحجي يعني شوكت حتصير المشية..
ابوي : دزيت اختي ام احمد هي وبناتهه ثنين كالت اهلهه موافقين بس تجون انتو..
شامخ : شتفصل انه البس.. صدك وراهه صارت المشية ولمحتهه للبنية من طلعت.. حلوه وبيضة كطن وانه اسمر غادي من الشمس والشغل.. جنت اشوف راحتي من اشتغل ..ما احب اكعد واشوف العمال يشتغلون وانه بحجة ابن ابو المال ما اساعدهم..عادي ماعندي مانع..وابوي هم جان يكيف من يشوفني اشتغل واعتمد على روحي..خطبتهه ووراهه باسبوع تزوجنه حالنه حال أي ثنين..عمتي جانت تحبهه متأذيهه يعني من اشوفهن اكول ام وبتهه..غادة اصغر مني بسنة.. نازكة وضحكتهه احلى شي بيهه.. ضفيرتهه تطلع من جوه الشال من تشر الهندام ..شكره ذهب..

كمت ارجع من الشغل تتلكاني هي بالضحكة والابتسامة تاخذ سترتي ونفوت جوه.. خاتونة وماكصرت يوم وياي لو وي امي (عمتي) لو وي ابوي.. ما انكر كمت اتعلق بيهه يوم عن يوم.. خواتي بين فترة وفترة يترددون علينه.. غادة صارت حامل وكبل ماكو سونار مثل هسة..هو شيجي نعمه من الله..اجاني ولد سميته كاظم البچر..حسيت روحي كبرت وصارت عندي مسؤوليتين بدال الوحدة..ابن ومره.. وماريد اشتغل وي ابوي بعد..اريد افتح مشروع وحدي بس احتاج فليسات..رجعت العصر من وكت للبيت كلت اليوم افاتح ابوي بالموضوع اكيد محيعارض..جان يوم جمعة فما طلع هو بس انه والباقين غسلت وكملت ورحتله.. يابة ارد احاجيك بسالفة..
ابوي : تامر انت..شعندك..

شامخ : والله اريدن افتح مشروع ببغداد..
ابوي : هااه..اي شكو بيهه..شكد تحتاج..
شامخ : عندي ست دنانير..انطيني التكدر علي وانه من يصير عندي ارجعلك..بالبداية ماقبل..بعدين قنعته إنه لازم اعتمد على روحي حتلو وي ابوي..ثاني يوم طلعت وي عمي الجبير لبغداد هو يشتغل هناك فطلعت وياه..كال اكو محل جبير يردون يبيعونه .. والله شفت موقع المحل زين وفلوس جوه ايدي كلت احاجي صاحبة ونشوف..عمي انطاه خبر اكو شخص يريد يشتري المحل..ساعه ..ساعه ونص اجة..تفاهمنه ع المبلغ كال مشروع المحل هذا يرجعلك..اني ابيعة واستلم فلوس.. وراهه رجعت للبصرة حاجيت ابوي.. جنت مخلي ببالي فكرة كصابة ومخضر شغلة خير من الله والمحل كلش جبير يعني يكفي .. ساندني كال توكل..

اسبوع واشتريت المحل..واخذت رخصة من الصحة.. مشت الايام وبلش المحل يشتغل..شغلت عمال اربعة وانه وياهم عفت شغل البصرة والحلال..غادة صارت حامل وهم انتظرت تجيب واشوف ولد بنية..اجة ولد هي سمته محيي.. جنه متفقين الثاني هي تسمي .. بس عبر الخمس شهور صار مريض.. ضليت اروكض بي من طبيب لطبيب.. محد يطيح على علتة.. واحد يكلي حساسية بالصدر الثاني يكلي التهاب بالقصبات..وهو يكعد بالليل يكح ويبجي ميسكت للفجر..بالاخير جنت بالمحل كاعد جان يفوت رجال هو وبنته يطلع عمرها ١٨ شايلة بيدهه كتب واقلام .. راد يشتري لحم.. انه ودااگصب باللحن اجه العامل محمد..

سألني على محيي.. هو يدري بي مريض وماكو طبيب انطاني علاج يشافي.. كتلة والله بعده مديتحسن..الرجال سمعني فسألني عنه..كتلة كيت وكيت سالفتة..كال لا تحير انطيك عنوان دكتور كلش زين هنا ببغداد..والله وانطاني العنوان كلي اليوم احجزلك يمه وباجر تعال .. بنفس اليوم رجعت للبصرة كلي امل بلكت يطيح على علتة ويصير زين.. تعلقت بي وخفت اخسرة..دائما العليل يصير غالي ع الام والاب وهو جان غالي..

براهه الصبح تقريبا اخذته واخذت غادة وطلعنه لبغداد.. وصلت جان اكو واحد جدامي..بس طلع دخلنه احنه فحصه وكتبله علاج..كال مشكلته بسيطه بس الادوية الاخذهه اذتة وراهه بفترة بلشت تتحسن صحته.. ردت اشوف الرجال واتشكر منة..ماعرف بيش اجازي..وهج فديوم اجيت من البصرة وكاعد بالمحل داحاجي العمال جان تدخل البنية .. بس شفتهه عرفتهه..مادري گلبي لعب..وهي لابسة تنوره جوه الركبة بشوي وقميص مخصر وشعرهه نازل على جتوفهه وكامشة بيدهه فلوس..ضليت احجي وياهم واخطف نظره منهه.. رحت عليهه كتلهه انتي مو ابوج انطاني عنوان الطبيب.. كالت اي بابتسامة.. كتلهه سلميلي علي ..

راحت بس ضل شكلهه ببالي مادري حبيتهه مادري حبيت شكلهه وفطاريتهه..ابوهه صار معميلي ويجي عندي دائما..دورات وحده دورات وياهه.. من تجي هي اضيع علومي.. ماحبيت ولا حسيت بشعور الحب والنظرات .. كبل تزوجت وصار عندي اطفال..التهيت بيهم وبحياتي وياهم كلة لخاطر ابوي..ماريد اكسرله كلمة وهو مريض ادور يصير بي شي وتضل برگبتي..احبهه لغادة كأم لاطفالي واداريني وممقصره بشي..بس هاي تعلقت بيهه..فديوم ابوهه صاحهه وعرفت اسمهه ..ازهار.. ضلت كل يوم تفوت من يم المحل طلعت كليتهه ابره المحل.. ضليت صابر..ارد اشوفهه هي تحبني لو بس انه..عليش افشل روحي واروح اخطبهه بعدين متقبل.. كامت كل ما تمر تبتسم ..

جانت اكو دچة على حافة المحل .. تكعد عليهه تعدل بربطة الحذاء لو تكعد تنتظر صديقاتهه .. فديوم فاتت هي وصديقاتهه سمعتهن يكللنهه هذا هو.. والله حليو شبي قابل.. انه داير ظهري واسمعهن حسبالهه ما اسمع.. كالت تريدن تخلن عينجن علي..صاحني واحد انداريت علي هي خجلت وخزرتهن..راحت بالعجل.. ثاني يوم رجعت للبصرة كلت لابوي..كتلة اريد اخطب وحده بغداديه واحبهه ..بالبداية ماقبل..كلي جا شلون ومرتك وولدك.. كتله يابة خليتني اتزوج وانه بعدني ماشفت الدنيا شبيهه مابيهه خليني اعيش وانه اكيد مراح افرق بيناتهن وولدي يبقون ولدي قابل حكرههم مثلا..قنعتة ووافق..دزيت عمتي امي وعمتي اللخ يمشون عليهه..كل هذا وغادة متدري..جانت ببيت اهلهه..

انه رجعت لبغداد وشفتهه..اجت حاجتني..كلتلي خاف ابوي مايقبل هسه هو مسافر ويتأخر يله يرجع .. كتلهه انتي بس كولي موافقة الباقي انه اسوي.. حاولت اطمنهه إنه حتصير الي.. ابوي كال نسأل عنهم كتلة لا مايحتاج وهي خوش بنية واهلهه خوش ناس..وراهه بفترة صغيره ابوي طلبني ..طلع داز جماعة سألين عليهم بالمنطقة بدون ما يكلي..
ابوي : تره البنية جاييهه خطابة كبل وابوهه مامنطيهه .. ومتعاركين وياه ومطردي..
شامخ : مايهمني..انه ردتهه بعد..
ابوي : يول الولد لاح عليهم اكثر من مره..يعني يحبهه..
شامخ : يابة احبهه وتحبني الا اكول هج..
ابوي : حتتندم على سالفتك هاي..بس هاهية ماريد اكسر بخاطرك..ننتظر موافقة ابوهه..

مهتميت اذا حتندم لو لا..مهتميت شحيصير من غادة تعرف بالموضوع..كل همي اخذهه جي احبهه..رجع ابوهه من السفر ثاني يوم اجت للمحل ودمعتهه بعينهه..كالت ابوي ما وافق .. يكول مانطي لمتزوج وفوكاهه محافظات.. عاد انه كلت مابيهه مجال لازم اجيب ابوي واجي..ثاني يوم رجعت للبصرة حجيتله لابوي شصار..كال اخذ عمامك وانه وانت ونروح..وره يومين اجينه لبغداد..ابوهه من شاف ابوي شيخ ولابس غتره ووياه عمامي ماكدر يحجي شي..فتنه للبيت وبعد كلمة وسالفة يله قبل..بس شرط شروط..كال تكمل دراسة وتطلعهه حوش وحدهه مو وي مرتك الاولى..والمهر كذا والمؤخر كذا..شيكول اكلة موافق كل ظنه راح ارفض وتخرب الخطبه..

هي جانت سنة اخيره كلية..ومن شروط ابوهه لازم تخلص يله تصير الزواجة..فبس خطبتهه..هذا الحجي غادة ما تدري.. كله صار سكته..لحدما فديوم كرب يوم زواجي رجعت للبيت وره ما جنت طالع للحلال وي ابوي..استلمتني غادة.. تبجي وتنوح..حتى مفهمت شبيهه..حسبالي محيي بي شي ورجع تمرض.. شبيج يابنت الحلال..
غادة ودموعهه عشره عشره : تزوج علي..ليش بشنو قصرت وياك..جبتلك ثنين ولد وكايمة بواجبك وواجب اهلك..

اخذتهه للمزرعة الكريبة ع البيت وانه محاوط جتفهه..هي تبجي ماسكتت..فهمتهه وضعي..كتلهه هي ما تجي يمج ولا تتكربلج..وانه تعودت اعليج..ومافرق بيناتكم..الشرع حلل اربعة بس بالعدل..والايام تثبتلج..هي فقيرة فد دور..قنعت بس اكيد ضلت بگلبهه شلون رجلهه يزوج وحده ثانية..بس حبيتهه وسكنت گلبي ولو الكل جان ما راضي بس ردتهه.. بالفترة الي هي دتكمل دراستهه انه بنيت بيت مو حيل بعيد عن بيت ابوي وجبت بي احلى اثاث .. جهزته بس خاطر ماياخذهه ابوهه حجة وماينطيهه..غادة راحت لبيت اهلهه بيوم زواجي وصارت الزواجة..الفرحة ماساعتني بساعتهه..

صدك حسيت گلبي يدك بحب لبنية شفتهه وفصلتهه بنظراتي غادة احبهه جي ام اولادي ومامكصره بشي..بس الگلب شيفهمة بعد.. مشت الايام وصار عندي ولد من ازهار..سميته حامد.. واذا صار عدنه طفل ثاني هي تسمي ولد لو بنية غادة بلشت تتقبل الموضوع بس انه مامكصر وياهه..وكلشي تريده يصير جدامهه بنفس اليوم.. جي الطريق بعيد وازهار وحدهه محد يجيهه يشوفهه لو يكعد يمهه..محد راضي اصلا..فنقلت شغلي للبصرة.. خاطر اروح وارجع بنفس اليوم.. ولدي من غادة نفس معزة حامد واكثر بعد..

غادة راضية بكلشي اجيبلهيا ماتردني من اكللهه اريد فلان شغلة منج..وتتلكاني بابتسامة وضحكة..ازهار بس تتزعل على كلشي..ها شفتك تروح لغادة وعايفني انه وابني وحدنه..وهاي كل شهر لازم مرتين تروح لبيت اهلهه.. وانه احبهه فما ارفضلهه طلب..مشت السنين ابوي توفى بجلطة .. حزنت علي والدنيا كلهه طاحت من عيني.. هو جان ابوي وامي واخوي .. ما فديوم كصر وياي بشي..ولا خلة شي بخاطري .. حتى ازهار ولو جان ما راضي بس لخاطري قبل واجه وياي من البصرة لبغداد خاطر يخطبلياهه.. دورات عمتي تحجي على ازهار تكلي اخذتك من مرتك وعيالك..انه ما اجاوبهه اكول خطية گلبهه محترك على غادة بس ابوي يكللهه هذا الواقع شيريد يسوي مثلا..

كلشي علمني وترباتة تربات مراجل وزلم حوك..من زمان هو متفق وي عمامي اذا صارله شي انه استلم الشيوخية من بعده.. جنت احس الموضوع صعب ويحتاجلة شخص گوي ويفوت بعين المقابيلة اذا هو صح ويفكر الف مره كبل لا يخطي خطوة وحده.. بس خاطر تضل سمعته طيبه ومحد يعيبه ويجيب طاري بالشينة .. جان دائما يخزرهه لازهار.. لو يرزلهه من يجي يمنه بس بالمعقول .. انه ما اجاوب..بس يدري تحز بخاطري..فمن يطلع يكلي بعدين تكوم تترحم لهاي الضبات.. مجنت افهم شيقصد ..لا هو حاجيلي بالوجه عدل ولا هو العايفهه.. كبل لا يموت سجل كيعان باسم غادة..

حجاهه بوجهي.. كال ما ضامن مستقبلهه وياك وهي فقيرة وماتحجي.. وعدك منهه كومة جهال..وهاي ازهار ما مرتاحلهه واحسهه ملعبه.. بوكتهه جان عندي كاظم ومحيي وقاسم ولواء .. بس ولد..شكد جان يحذرني منهه بس ما اسمع يابة احبهه شنو.. هي المحبة من الله مو بالغصب..بس توفى ابوي كامت تتسلط.. تريد تجي بالبيت الجبير ..بيت ابوي يعني كتلهه بيتج وحدج بعد شكو..وانه ماريد اكسر بخاطر غادة تبقى ام ولدي وعزيزة علي..انه كتلهه هج كومي اخذي حامد وملابسج وروحي لبغداد..انه جنت طالع وي الزلم اشوف الحلال..صرت بمكان ابوي..رجعت للبيت ملكيتهه..تخبلت

وين راحت هاي..ادور طلعت من البيت رحت لبيتنه شافتني عمتي..كلتلي مرتك وين..كتلهه اجيت لكيتهه ماكو..كالت طلعت هي وابنهه لبغداد..والله وبنفس اليوم هلكد ما صرت عصبي ودمي فاير فشلتني جدامهم..طلعت بالليل ماتحملت انتظرك للصبح..وصلت لبيتهم الفجر..ابوهه تعارك وياي..
ابو ازهار : شلون تخليهه تطلع بهلليل..عود رجال..
شامخ : رجال ونص..هي طلعت بحدهه..ابوهه من سمع طالعه وحدهه فشل..اخذتهه ورجعنه للبيت..كمت اعاتبهه بالدرب .. ليش تطلعين من البيت وانه بشنو مكصر وياج..مو بيتج وحدج ومسجلة نصه باسمج والنص الثاني باسم حامد.. سكتت هي وراهه كمت مالحك اشوف ولدي من الشغل والتعب..

اروح لاخر الديرة اشوف الزرع والحلال ..اكو عمال اجورهم يوميه واكو اسبوعية..هذوله اهل الاسبوعية علي واليومي على عمي الجبير كمت اكعد بالكعدات والكل عرفني..وبكل يوم ازيد خبرة وثكل ورزانة ..اعرف شوكت يجذب علي المقابل وشوكت يصدك.. من كلمة افصله تفصال..وهو المطلوب بكل شيخ..ابوي من صار شيخ جان جبير..بالاربعين..انه بعدني ٣٣.. وره فترة صار عندي ولد من غادة..فيصل الاخير..ازهار من عرفت زعلت رادت تعوف البيت..كتلهه لا تضلين تتزعلين كل فترة تعبت من المشاكل كولي شمحتاجة..مو عندج حامد..كالت اريد البيت كله يتسجل باسمي..كتلهه تكفين عن المشاكل واسجلة

فترة شهر هي مامسوية مشكله وكله عيني واغاتي..رحت للطابو سجلت البيت البنيته باسمهه..وضل بيت ابوي باسمة .. مشت السنين ..ازهار ضلت تتزعل كل فترة.. لحدما صارت حامل كلتلي اذا ولد اريد هدية زينه..كتلهه شيجي خل يجي هديتج موجوده..ابوهه توفى بالفترة الحبلت هي بيهه.. وضعهه تخربط وتأذت ..فاضطريت ابقهه يمهه اداريهه .. عفت بيت ابوي لمدة شهر ماروح ..بس اوصي العمال يشوفوه خاف محتاجين شي .. ولدي جانو كلهم يدرسون.. ماردتهم يبطلون اريد تصير عدهم شهادة ترفعهم وتنفعهم بزمنهم..

بس كاظم جان مايحب الدراسة..خليته يخلص خامس وزوجتة.. كعدته عندي بالبيت وكام يشتغل وياي بالحلال.. مثل العلمنياه ابوي علمتة لكاظم صار يعرف شلون يشتغل.. جنت احسهم صحباني لو خواني ما بيناتنه مسافة جبيره..بيني وبين كاظم ١٨ سنه.. اعتبره اخوي اكثر من ابني ..حامد من شب جان كلش مختلف عن الباقين .. مو مغرور بس صعب الواحد يتعامل وياه .. حتى مجان يجي وياي للكيعان.. فبس اخذ كاظم لو واحد من الولد .. ازهار جابت بنية ..سمتهه سناء..حامد وسناء دللتهم احلى دلال..خصوصا سناء..اول بنية تجيني وكل ممنوع مرغوب ..

ازهار ولو جنت احبهه بس مادية هوواي.. بكل مره اتجنب افكر هج تفكير..اكول هي تشوفني متمكن ومن حگهه تطلب وتدلل هذا الاكولة بس خاطر ما تجيني فكرة ان هي مادية..سجلت البيت البنيتة باسمهه يالله رضت ترجع وسجلتة رادت تاخذ امهه للعمرة واخذتهه هي وامهه ..ماخليت شي بنفسهه.. متطلبة وتتشكى ع الصغيرة كبل الجبيرة.. كل هذا اعوفة على صفحة جي احبهه.. غادة ماتركتهه ومنصف بيناتهم بس هي ما تتطلب على كد حاجتهه وحاجة ولدي.. فديوم اجيت من الشغل لكيت ازهار بالبيت الجبير.. دتتعارك وي غادة.. وتصيح ومنفعلة.. زمخت بيهه جان تخلس..غادة واكفه على صفحة متدري على شنو جايه تتعارك..

وره كلام وكلام طلعت جاية تريد تكعد هنا .. وكاظم متعارك وياهه هو ومحيي .. فشلة ولدي يتعاركون وي مرتي..هديت الوضع واخذتهه ورجعنه للبيت..كامت تبجي..يبنت الناس هذا بيتج وهذوله ابنج وبنتج وهذا انه..اي ليش رايحة عليهم مكصر وياج بشي .. حركت راسهه بـ لا..كتلهه جا شنو بعد..قنعتهه ومرت الايام والسنين ولدي كبرو كلهم..كمت اسلمهم اغلب الشغل واليبقى علي.. المشاكل ماخلصت وروحات ازهار لبيت اهلهه همات ماخلصت بيوم جنت مخلي فلوس بالكنتور.. عشر دنانير.. بوكت هسة تسوى جثير..رجعت من الشغل بالليل متأخر لكيتهن بس خمسة..انه متأكد حاط عشرة وطالع

ازهار جانت ماكو.. شوي واجت..كبل كتلهه وين الفلوس
ازهار : يافلوس..
شامخ : خليت عشر دنانير بالخانة..وينهن شو بس خمسة
ازهار : عيني انت حاط بس خمسة اني شنو..
شامخ : بابا خليت عشرة..شنو اعمى ماعرف شكد مخلي.. كالت شمعرفني وراحت..كمت اشك بيهه بس ما خليتهه تحس .. اذا هي ماخذة ليش ما تحجي قابل شحسويلهه.. وره فترة هم اجيت لكيت الفلوس ماكو كلهن..جنت مخلي ست دنانير وعشر فلوس..البيت محد يطبة بس انه ومرتي وحامد .. حامد جان طالع بره..بعدة صغير عمره ١٢ بوكتهه.. صحته وكعدنا بالصالة..كتله بابا انت ماخذ فلوس من الكنتور

حامد : لا ليش حتى اخذ..
شامخ : زين اكو احد فات للبيت غيرنه..
حامد : لا محد يابة..ليش شكو..
شامخ : ماكو شي..روح كمل لعبك..عافني وراح.. ضليت حاير وين تروح الفلوس..انه مو ع الفلس بس ارد اعرف منو ياخذهن انه ما مكصر بالبيت بـ ولا حاجة..كلشي يطلبو اجيبه واجيب زايد بعد..مشت الايام وصار الكلب حياتي كلهه.. خربط الموازين وكل ذرة حب واحساس بگلبي شلتهه لازهار.. جنت مسافر لبغداد علمود الشغل..رجعت بالليل وصلت الفجر.. بالباب شفت واحد واكف..كامش بيده ماعرف شنو وراح يمشي على كيفة ..

كون الله مخربط ويطلع البيت البسدنه تقربت لكيتة طالع يتمشى من بيتي..رحت وراه بالعجل حاولت احاجي بهدوء..ماريد يشك..كتله منين جاي..
- : اجيت من بغداد..
شامخ : هاه حياك الله..وشعندك هنا..
- : والله محتاج فلوس واخذتهن من اختي..
شامخ : واختك وين بيتهه..هذاك الجبير..واشرت علي.. جاوبني وهو يتلفت مادري شبي..كال اي وراح بالعجل.. اخته .. ارد اشوف منو اختة..الباب جانت مفتوحة .. دفعتهه وطبيت..ازهار جانت واكفة بباب المطبخ..كمشتهه من دشداشتهه وانه غادي نار كبره..

شعدهه الفجر طالعة والرجال أشرلي ع البيت مالتنه..دخلتهه جوه وهاي اول مره امد ايدي على مره..لا ضارب اخت ولا مره..صدك احترك دمي حسيت العشرة كلهه صارت جوه رجلي بهذا موقفهه.. ماحجت شي ولا بجت..بس تكلي كافي وخر..استحقرتهه وكرهتهه بكد ما حبيتهه..حامد كعد على صوتي انه واصيح.. عفتهه وكمت رحت اخذته وحاجيتة..كتله الصار سوء تفاهم ويصير بين اي ثنين مو تحسب غير حساب..وانه احبهه لامك واحبكم انت واختك..زين بابا..ارجع نام حبيبي..ما انطاني ردة فعل سكت وراح..خفت يضل شايل بگلبة..وهو اذا كره احد يضل كارهه ويحقد..

مره واحد من اليلعب وياهم ضربه وفشر علي.. ضل كل يوم يعيل بي ..يابة جوز منه..ميفيد.. اجتني وره ما راح حامد ماعرف شلون كمشت روحي..
ازهار : اكلك اذا تشك بيه طلكني..
شامخ : شوفي داكلج..ماريد تحجين شي..بس اريد اعرف الولد هذا منين ..    ماقبلت تحجي.. حاولت وياها مره .. مرتين وبعدها متقبل..اعصابي تلفت..موقفهه يثبت الدافكر بي.. ليش هشكل.. مو احبهه وسويتلهه كلشي تريدة.. كتلتهه يالله انطتني عنوانة..وهي تحلفني ما اسويلة شي..يابة ريتني ميت ولا سامع حجيهه..كل العشته وياهه وهم وجذب.. البيت محد قبل اسجله باسمهه..

بس انه خاطر ما اخسرهه سويت التريدة مشيت وره گلبي مثل الاعمى..ابوي حذرني مليون مره بس صدك الحب اعمى..والله بنفس اليوم حتى هندامي ماغيرتة رجعت لبغداد والف دعاء واية قرآنية على لساني.. كون يطلع كلشي حلم والسمعتة جذب وانه بطريقي للبصرة بس خاطر اشوف ولدي واشوفهه..١٢ سنة راحن بالشط.. وصلت لبغداد ورحت على العنوان الانطتنيا..نفس الشخص طلعلي.. الشفتة يم بيتنه.. تخبل من شافني..كبل سد الباب.. دفرتهه وطبيت خلصت علي..بوكسات ودفرات..جنت بحيلي حبايه ما اشرب .. اهلة طلعو على حسة محد يعرف انه منو وليش داضرب ابنهم ماعرف شلون بلحظة انشاليت من فوكاه..

صار صياح وهوسة كلهه راحت لمكانهه..بقينه انه وياه وهذاك الرجال الشالني من فوكاه..طبينه جوه وانه على اعصابي.. كمت اصيح ودمي متحرك..شعندك ببيتي الفجرية .. جسمي ضل يرجف من العصبية..انه بطبعي مو عصبي ابد واتفاهم بس هنا الموضوع يختلف..حجالي السالفة..
- : اني الخطبتهه قبلك وما انطوهه..شكد ردت وحاولت .. جبت شيوخ وسادة ماقبل..لأن فقير..رادو ينطونهه لزنكين واجيت انت خطبتهه وصارت زواجتكم..الشاهد الله وعسى تطلع بية اذا جذبت..بس هي بقت علاقتنه سطحية..اسمع اخبارهه من بعيد وهي هم..لحدما فتحت مشروع اني وابن عمي .. بعدنه يالله وانطاك عمره..بقت علي ديون..

اخذت دين من عمي ومن خالي سددت ابو المحل..بقى عمي وخالي منين اجيبلهم هم لازم اداين .. دزيت خبر بيد اخت ازهار بلكت تكدر تساعدني بالدين..لأن ضاكت بيه الوسعية والشاهد الله..دربت وكت الاكيهه وشفتهه..هلحجي قديم صار سنة ضلت تنطيني كل فترة.. تكلي اريد اطلك بس ماعرف شلون.. كمت اشوفهه بس من تجي لبغداد لحدما اليوم الفجر جنت جاي للبصرة عند اختي ..ومريت شفتهه وهذا الصار
طيحة الراس الصرت بيهه من الله يعرف بيهه..الرجال الثاني حجة وأكد كلامة..كلي اجو جماعة سألو عليهه بيوم خطوبتهه واني كتلهم تره جان واحد يريدهه وما انطونهه..

انه كبل تذكرت كلام ابوي..اااخ عضيت اصابعي ندم اكلني اكل..عفتهم وطلعت ضليت افتر بالمحلات والشوراع..احتاجيت اروح لابوي اكلة حجيك صحيح يابة..ياريت يرجع ذاك الوكت وامشي بشوره .. بس ماكو ميفيد بعد.. نزلت راسي بالكع خواتهه يعرفن بيهه ويجي يشوفهه والمنطقة يعرفون..وانه شنو.. انه اطلع من الصبح لليل للشغل واتعب تعب مصاير بس خاطر ما اخليهه تحس بنقص فديوم.. شامخ وديني لبيت اهلي اوديهه بدون مااعارض..وانه اكو ليش دايما تروح لاهلهه.. كلش ظني تريد تشوفهم وتشتاكلهم وانه مانعهه منهم.. بس اااخ طلعت خركة جدامهه وتمشيني على حبل الحب الجذاب.. كمت امشي واحاجي روحي..

انه الگوي الاعرف البشر من نظرة هيج ينلعب علي .. ادور منين ..من مرتي الحبيتهه..الگلبي دكلهه بس شافهه.. ليش مامكتوبتلي.. ضليت امشي للعصر وكعدت عند صاحبي عنده محل هندام عسكري..ضليت عنده لليل تقريب الثمانية وطلعت للبصرة..عرفت شسوي.. ناري ما تطفى .. وفرخ البط عوام..وانه عندي منهه بنية..مو بعيدة تطلع على امهه..كل الحب صار كره وضعفه همات..وصلت للبصرة بالثنتين بالليل الديرة صنطة فد دور..طبيت لبيتنه الاولاني محيي جان كاعد..تفاجئ من شافني..
محيي : ها يابة خيرك..
شامخ : جيب المسدس فوك جوه الكومدي..انه بالباب انتظرك.. عفته ورحت للبيت دفرت الباب ورحت عليهه..

اخذتهه سحل للشط..محيي وراي ما يدري شنو السالفة.. ضلت تتوسل وتبجي..انه گلبي صار حجارة..
ازهار : لا الله عليكم لتكتلوني ..
يا شيخ فدوه اروحلك ليش تسوي هيج والله بريئة
مرتك متصدكني ..والله مامسويه شي صدگني انا بريئة يا شيخ حرام عليك ..
الشيخ : لج الج عين تحجين..
جابولي دليل و تريدين اجذبهم و اصدك اجذبج.. بس گولي بشنو قصرت وياج .. احجييي .. شبيج ساكته يا محمد..اي طبعا متحجين.. عمري ما قصرت وياج اجيبلج الزين كدامج اخلي و فضلتج ع الكل ..

بس يا حسره المجازات هيج تصير.. لج انهههه رحت بنفسي للولد وحجالي كلشي.. ناري ما تطفى منج..تبوكينيييي.. وتتواعدين من ورايييي..لج سمعتي صارت جوه القندرة..وانه البعت الدنيا كلهه لخاطرج وعاندت الكل مثل الاعمى..اخذت المسدس من محيي وضربتهه..طاحت من طولهه ..شمرت المسدس بالشط واخذتهه للمستشفى.. سويتلهه شهادة وفاة كتلهم راجعين من بغداد وصارت مداهمة بالطريق بالليل وبنفس الليلة دفنتهه..دمعة ما طاحت مني عليهه.. محيي مافك حلكة..اخذتة وره ما دفنتهه ورجعت للبيت.. مارحت للبيت الثاني بعد..رجعت لبيتنه الاولاني..جريت حسرة بكبر الدنيا كلهه بس طبيت لغرفة غادة..نايمة وشعرهه مفتوح اشكر شكد هادئة..ولا حسيت بقيمتهه واذيتهه بزواجتي الفاشلة هاي

سديت الباب وغيرت هندامي..كعدت على حافة الجرباية ضليت صافن بملامحهه ودموعي تكت ما احس بيهه هاي ثاني مرة ابجي بحياتي..مره على ابوي وهاي مره.. ما ادري على ازهار لو ع العشته وياهه..لو السويته بيهه هسة .. لو على غادة شسويت بيهه وشكد قهرتهه.. ولو هي ما تحجي بس كلة بين عليهه..حضنتهه جان تفز..شافت دموعي بعيوني ماحجت شي بس احتوتني وتهدي بيه ما تدري شصاير وليش هشكل حالتي..هاي اللحظات بعمري ما نسيتهه ولا حنساهه نمت من التعب بعد ماحسيت برجلية..

كعدت الصبح خابرت على عمي الصغير..كتلهه مرتي توفت البارحة ورحت دفنتهه اليوم اريد اسوي الفاتحة..سناء وحامد جبتهم عندي بالبيت الجبير..حامد شارد بغير عالم ماشفته فك حلكة.. اهلهه اجو وخواتهه..كلهن تعاركت وياهن..صيحت وتعبت كتلهن كل الصار بذمتكم انتو الى يوم الدين..مو غيركم مافهمن قصدي لحد وره الفاتحة حامد حجى..كعدنه الفجر يصيح ويبجي ويملخ بروحه..يكلي انت كتلتهه..محد يدري بالسالفة بس انه ومحيي وغادة..بالاخير فهمت منه..عرفتة فاز من النوم من شافني اجيت للبيت اخذتهه..فهو حاجيلهم

اجو علي بليلة ظلمة خوانهه..كتلهم خواتهه موجودات روحو عليهن عاقبوهن الهن..جانن يريدنهه تصير مو خوش..وسوت الرادو..صارت كعدة شكبرهه شكدهه..خوانهه قاطعو خواتهه وره ما عرفو شجانن يكللنهه..بس واحد منهم جان بغير ديرة..هي جانت عزيزته ويحبهه ..فمن اجه وحجولة ما صدكهم وضل يكول انه ظلمتهه .. الولد طفر ومحد درى عنة.. جان مجذب علي بهواي شغلات..سمعت من خواتهه..لو خوانهه سامعين المسويتة مايرحمونهه..الصار اكبر من السمعتة من خواتهه .. انه لو السامعة بس بوگ جان يختلف الحجي.. جانت حامل من سويت شهادة الوفاة..ضليت عايش بندم اكول كتلت ابني.. بس اختهه حجتلي ..

الراح راح ..راحت وراحت وياهه ذكرياتهه وايامهه وكلشي يخصهه.. بس حامد وسناء بقوا.. حامد يموت مني ومن ولدي..ما يحب بس غادة وسناء..كل هذا واسكت..اكول حگة شاف الموقف جدامة وهو بعده صغير..اكيد ما تروح من بالة بعد..سناء بلشت تكبر وتشوف مشاكل حامد متعرف على شنو..اكوم اخذهه من نص الهوسة واطلعهه امشيهه ع الشط..اكللهه خالة غادة هي ماما وتحبج وتقدملج كلشي تريدي مو..هي تكلي اي.. اكللهه هاهية هي هاي الام هج تصير تهتم ببنتهه وتحبهه مثل ماما غادة ..

مجانت تكول شي..تشوفني الاب اليحبهه ويداريهه ومايريدلهه بس الخير..وانه صدك اريدلهه الخير..بنتي الوحيدة اجت وره ست ولد..من حگي ادللهه..البيت درت اسمة لكاظم وهو سكن بي..وي مرته..مشت السنين حامد كام يشد بالطالع وي محيي والكل..يطلع الصبح ماشوفة بس من يريد ينام.. ما ادري بي وين اكل ويامن طلع..مايحجي كلشي..صامت.. بس واحد يسألة يتعارك وياه وينكلب البيت گلاب..للفجر ما انام.. امي بهاي الاحداث توفت..انكسرت كسرة بس الله يعرف بيهه.. وتأذيت حسيت روحي رجعت طفل عمره سنوات يلعب بحضن امة..يروح يلعب وي صحبانه بعدين يكتلونه ويريد امه تجي تفزعله بس ما يلكاهه..

شكد ما يكبر البشر بس من امة تتوفى يحس روحه صغير وبعده محتاجهه..صدك الام جنه ومن غيرهه ما تسوى الدنيا فلس..بقيت على الحالة هاي شهور.. نسيت روحي وحلالي كله مسلمة بيد كاظم ومحيي وقاسم.. بهاي الفترة كعدت الصبح مالكيت لا سناء ولا حامد..تخبلت.. وينهه وينه هو..وين اخذهه وراح..بعدها صغيرة جان عمرها ١٢.. ماخليت مكان مادورت بي..شبر شبر بالديرة كلهه دورتهم.. ورحت لبغداد وانه مريض وحال الضيم حالي..صار عندي التهاب بالكبد..بياض عيوني غده اصفر كركم..مادري احير بالطبيب والعلاج لو احير بولدي وين راحو..رحت لخوالهم وحلفتهم بالله اذا شايفيهم..بس كالو ما اجو عندنه..

وره اشهر حالتي بالنازل وكل يوم انام مستشفى..لحدما فديوم بالمستشفى شفت واحد..شبهت بي..منو هذا ..ماريد تخوني ذاكرتي..بس هذا اخو ازهار..الوحيد الي مارحتله.. كمت بيه ما بيه حاجيته..تعارك وياي وانكلبت المستشفى.. عرفتهم عنده ليش هج جانت ردة فعله..اكيد اكو شي وره السالفة.. بس المشكلة بيته ما اندلع..واهلة كلهم مقاطعي شلون اوصلة ماعرف.. مرت سنتين لخ..گلبي غدى نار عليهم..مادري شسوي وين اروح..شلون اشوفهم..زين ع الاقل ارد اشوف سناء..لحدما اجة اليوم الرجعتلي بي عافيتي..وره شهور من المرض..

بسبب التهاب الكبد صار عندي سكر.. ما عدت انه الگوي الضخم..ضعفت هواي والكل لاحظ..

مشت ايام وانه بعدني مصر الاگيهم.. لحدما سمعت بحامد حينسجن ورحتله للتوقيف.. سألته على سناء كال ببيت خالي لأن هو چان جاي علي..اخذت السيارة وطرت لبيت خالها لكيتها عنده..حسيت روحي ردتلي..كامت تبجي وتحضن بيه تكلي اشتاقيتلك ليش ما اجيت علينا..شجي وانه كل الدروب سدوها علي..اخذتهه ورجعت للبصرة..جانت فرحتي الوحيدة بهاي السنة..عشتهه بصعوبة..

حامد تحاكم سنة وچم شهر.. ماانكر اكثر شغلة كسرتني هاي.. لأن اعرفنه كفو وعقله براسه.. بس الشيطان قوي.. وراها خلصت السنة وطلع.. اجاني للمحل ورحت وياه خطبتله البت الرادها.. صار عنده أولاد بس ماوصلتله الا چم مرة علمود الدوانم ومرة بعركته هو ومحيي.. مايريدني بس يريد غادة ومامنعتها منه..

ولو ولدي تزوجو قاسم ولواء بس مافرحت بيهم بكثر ما فرحت بسناء..مرت أيام وبنتي كبرت زوجتها.. ولدي كلهم تزوجوا الى أن وراها محيي تزوج وره ما جان شالع گلبي..حاول مره مرتين والثالثة يالله انطوهيا..سناء همات انخطبت..وصلتهم لبر الامان وماكصرت وياهم بكد النملة..

حرب ايران كلهم خليتهم يدرسون ماجستير ودكتوراه بس خاطر ما يرحون للحرب..بس قاسم ولواء جانو يرحون مخلصين دراسة فماعدهم شي..قاسم جان بالاسعافات يعني شوي الوضع عنده احسن هو ولاء....بس كاظم بالساتر .. بين ما يرجعون انه محسب الف حساب..كل يوم يزفون شهيد بتابوته واكولن كون مايطلع هو..وبكل مره وبكل يوم يرجعون ومابيهم شي..هاي اعظم نعمة ممكن تحصلهه بفترة الثمانينات بعدهه اجة الحصار..العالم تريد لكمة تاكل ماعدهه كلهه عايشة ع الطحين مال حصة..كلة بي وصاخة .. انه جان الله منطيني والديرة كلهه الي..فمن واجبي اساعدهم من معجون وطحين وتمن..المهم لكمة ياكلوهه..

عاد الهندام هذا يرجع للام..شوف هي شلون ترتب عيشتهه انه ماعندي صغار بوكتهه كلهم كبار ومتزوجين..بهاي الفترة صار حادث لشهلاء مرة محيي وتوفت..بيومهه السايق حجالنة..كال انه ماخذهه لغير مكان وهي هج وصتني..هو طفر وراهه بعد ما شفناه ومحيي كرهه..حتى بالفاتحة ما وكف ويانه..اعتكف شهور ما يحاجي احد..ولا احد يحاجي..بنته هملهه فد دور.. ابتسام جانت تعتني بيهه وحسبة بتهه..مثل سرور ونوارة..بس هي اصغر منهن..وضل هج يكومهه برزاله ويكعدهه برزاله.. ما يقبل احد يكلة لا تسوي هشكل..وليش تسوي هج..حتى ما دور ع السايق بلكت جان حجية جذب..ماقبل وماقبل..

بس البنية كبرت وصارت تحس على تصرفات محيي..محد حجالهه ماقبل يدخلهه مدرسة..كتلة اذا مادخلتهه تطلع من البيت.. ابراهه يالله قبل..وهم كلمة والثانية يكللهه ابطلج..حامد سمعت صار عنده ثنين بعد..مرته كامت تجينا للبيت..ابوها جانت عنده كاع بالديرة..منهه تجي تشوفنت ومنها تشوف الكاع..

رائد عاقل ورزن يحسب الف حساب لكلشي.. مثل تصرفات حامد وبعد أرزن..  بيوم وفاته حسيت قطعة مني انبترت.. سويتلة فاتحة شهدولها اهل الديرة كلهم..وماكصرت بشي.. يبقى ولدي وطالع من ضلعي.. هم اجة يوم شلته بايدي ولعبته واخذته وياي..مات هو وظالمني والحركة بگلبه..ما خلاني احاجي وافهمه..ضل على موقفة لحدما سكن التراب..

ضلت ازهار تطري اعلى بالي بصفناتي..كرهتهه بس ما نسيت ايامهه والنظرات من جنت ببغداد..من اجيت خطبتهه وماقبل ابوهه..بعدين اجتني للمحل دموعهه بعيونهه..شكد جانت بريئة وكل جلمة منهه احسهه طالعة من الگلب.. بس تغيرت وسبحانه الما يتغير..راحت وما بقى منهه بس سناء....

يتبـــــــــــــع....................

*البارت محد متوقعه اكيد ، الهدف منه تعرفون شنو سبب كره ابو صگر لابوه ولابو دنوة ، تبقى هاي الشيوخ وهاي العادات عدهم ، الصار ناس حتشوفه صح لأن هوَ شيخ ومرته حامل من شخص تعرفه من زمان ، وناس حتشوفه غلط ، الصار صار وميتغير بعد ..