رواية اسألي عني الليالي الفصل الرابع 4 - بقلم رقية جاسم

" انه المنسي الوحيد الذابل المتعوب ،
انه الضامي الغريب المايحبني احد. "

قناة التليگرام

الــــبــــارت الــــثــــالــــث...................

عفته وطلعت.. ضليت افتر بالحلال ..رحت يم الولد ..حتى محد يدري اكو بت فايته البارحة.. مر اسبوعين كاملات ماكو شي.. وماعرفنا منو فوته..ابوي ماخله شي يعتب علي..اخر شي جزع.. چي السالفة مر عليهه هواي بعد ماتسوى..
وره هلفترة المغرب كاعدين بالديوانية واندگت الباب ..

بس دگة قوية وصوت بچي وصياح بره.. كمت بالعجل جان تنفتح الباب وطبت بنية لابسة صاية سودة ومتبهذلة .. شعرهه طالع من الشال واطراف الصاية متربة ..كل الكاعدين بالديوانية فزينا عليهه.. ابوي راد يحچي وسبقته..
- : شيخنا فدوة اروحلك والله ابوس ايدك انه دخيلتك..
دنجت يم ايد ابوي كمشتها تريد تبوسها جرها منها بالعجل.. هو احنا مايقبل نبوس ايده .. ادور الغريب..

شامخ : استغفرالله..كومي بوية احجي شني سالفتج..
- : شيخ انه اخوي يريد يكتلني..يكلي عار .. وانه بريئة والله وحگ علي..حتى جابني هنا ذاك اليوم ودفع فلوس للحراس برة كال اذا سأل الشيخ منو جاي هنا لاتحجي.. اليوم سحب اقسام يريد يكتلني..ليش يعني شيخنا انت ترضاها.. انه مغلوب على أمري وحگ الامام العباس شريفة والصار مارايدته والقرآن..
شامخ : انتي نفسج لاگيج الويلاد بالحلال الگريب علينا..
- : اي والله شيخنا..وانه من الظهاري طالعة الشاهد الله اريد بس اخلص منه ومحد يقبل يستقبلني..يكلولي وصخة وانه شريفة والله مامسوية شي ..يعني اليغتصبوها تصير عار وتنكتل..

شامخ : هسسس يابت..لاتكولين هشكل جدام الزلم.. ماطول طبيتي مضيفي وطلبتي الحماية لاتخافين..
كاظم : بوية شمدريك ماتجذب..شعندك مدخلهه .. اكو وحدة أخيهه يريد يكتلهه وه مامسوية شي عساس..
شامخ : يول تعلمني..انه طير الطاير اعرفه..مااعرف اذا جانت بريئة يا لا..
- : شيخ والله مستعدة تاخذني للعباس تحلفني..عسى يصيبني بعزيز گلبي اذا چذبت..
شامخ : لا مايحتاج نحلفج بوية.. أخيج شسمه هذا الأغم..
- : شيخنا تريد تكتله..لا فدوة اروحلك..
شامخ : لا حشا..ماانجس روحي.. شسمه خاطر اعرف شتصرف اذا اجاني..
- : مرعي حميد..
شامخ : چا خوش..غده الشر..محيي گوم انده الحجية تاخذها يم البنيات..حالها حالهن ..

ضليت اعاين لكاظم..عبالك يريد ياكلها..هي خطية مبينة فقيرة وابوي بعد أعرف..عمامه محد حچه..يدري بي شنو ومايكول شي اذا مايطلع صح.. فمايفشلون روحهم وياه ..

عفت الديوان وطبيت للبيت من جهة الباب الاولانية.. استقبلتني امي مفرفحة تريد تعرف شكو..
الحجية غادة : ها يمة شكو..ضل بالي والله..
محيي : لاتخافين..هاي البنية حچيتلكم عليها لكيناها بحلالنا هسه جاية..اخوها رايد يكتلها ..
حطت ايدها على گلبها : اسم الله..لويش يمة..
محيي : يوم غير مغتصبيها شبيج..
الحجية غادة : يمة استر ياستار..استغفرك ربي استغفرك..

لا اعتراض على حكمك ربي..خطية..وهسه شني ..شسوي انه..
محيي : ضلي هنا..هسه اجيبها واجي..ابوي گال خلوها بالبيت بين ما الاگي اخوها..وانتي تعرفين بعد..
الحجية غادة : يله يمة شبيدنا قابل..جيبها اتانيك..

عفتهه وطلعت لگيتها واكفة على صفحة وابوي ديحاچي عمامه عليها وشحيسويلها وعلى اخوها..ندهتها وترخصت منه وطلعت.. كامت تمشي وانه وراها.. مسافة الباب بين الديوانية والباب الاولانية طويلة اذا طبينا من برة..
انه وراها واشوفها شون تبچي وچتافها تتحرك من الشهگات .. سكتت ماحجيت شي..هي على غفلة اندارتلي..
- : خوما تسلموني لاخوي فدوة والله يكتلني وانه مامسوية شي..
محيي : لا اله الا الله..لج شكد تلحين انتي..گنالج لا.. هاهيه طبيتي هنا بعد ماتطلعين الا اذا انتي ردتي.. واذا اجه اخوج ماياخذج الا نأمن عليج يله..

ضلت تعاينلي ودموعها بعينها..بعدين دنجت : اسفة..بس خايفة شسوي..
عاينتلها وخليت إديه بجيوبي : يله امشي باردة..
وصلتها ورجعت .. لكيت ابوي هستوه ديطلع من الديوانية.. رايح ع الجهة اليباتون بيهه الفلاليح..اكو بيوت بالديرة للفلاليح وعوايلهم فمايباتون هنا..بس اليجون من غير محافظة..
صحته : بوية اجي وياك..
شامخ : تعال رايدك بشغيلة..
رحت يمه..أشر للزلم تروح وهو يجي وراهم..

محيي : تأمر..بيش رايدني..
شامخ : فد يومين وادزك لبغداد انت وعمك ازهر وأخيك قاسم.. كاظم مااكدر ادزه علمود الشغل..
محيي : شعندي هناك..
شامخ : سمعت اخبار عن حامد..
بتعجب : چذب..وينه وشون..
شامخ : احمد تعرفه..
محيي : يشتغل بالگصابة غير..بمحلاتنا..
شامخ : اي هو.. شايف حامد بمطعم ..وواحد من الولد اليشتغلون هناك حاچيله علي..سائله شسمه.. كايل رائد .. بس مامنطي شي عن حياته.. فماندري هو يا لا..
محيي : انه همات شفت واحد صاحوله رائد وشبهته بحامد .. چا هذا هو بس مغير اسمه لو شنو السالفة..

شامخ : چا انه شدااگول..ادزك وشوفلي شكو.. مااكدر اترك البيت خاصة هلفترة..
محيي : مايكون خاطرك الا طيب..لمن تريدني اروح خبرني..
شامخ : يله ..شوف شغلك بوية.. خاف امك محتاجة شي.. انه اتأخر ماارجع هسه..
محيي : بوية والبت..
شامخ : شمالها..
محيي : حتضل هنا..
شامخ : لادير بال..اعتبرها أخيتك..انه اعرف شون اوصل لأهلها وهذا الأغم أخيها..الحارس اذا ماطلعته اطلع معتب.. الينرشي بـ چم فلس باجر عگبة كلشي يسوي..
محيي : عاش لسانك بوية..بالك على سكرك..

ابتسملي وطبطب على ظهري..عدل سترته وراح..انه خليت ورجعت للبيت..مريت من الاستقبال لكيت بنيات عمام ابوي كاعدات يم البت..رفعت راسها بالصدفة عاينتلي.. عفتها وصعدت فوك..بدلت واخذت لفاف لفيته على رگبتي ورحت لصحباني اخذتهم وطلعنا ع الشارع العام..مارجعت لليل.. طبيت البيت هندس..

تمشيت للمطبخ اكلت فاكهة وصعدت فوك انام..
مرن يومين البت لاحس ولا خبر عن أهلها .. ابوي قرر يزوجها ماكو غير هالحل.. أأمن الها والنا.. اهلها ماكو ومانعرف عنهم شي.. فهذا احسن شي.. بهاليومين جنت كاعد بالغرفة المغربية.. استوحشت ماكو كهرباء وصنطة فنزلت
سمعت ابوي يحاجيها..
شامخ : بوية أخيج مداالگاله أثر.. رحت لداركم الوادم ماترضا تجاوبني وين راحوا..
- : بس شيخنا هم بالمنطقة الكتلك عليها ..
شامخ : هو هذا العرفته بوية.. أخيج ماكايل اسمه الصدگي لمن شغلته وياي..
عاينتله متفاجئة : شون..
شامخ : اي يبوي..لأن لمن انطيت خبر للعمال عن شخص هيج اسمه هو شارد كايل حروح لوالدتي مريضة مابيها حيل وشارد.. هو هذا الوحيد بيته وبيت عياله مانه بالدرية مالي .. فطالع مالاگينه.. انه انطيت خبر لمرية جارتكم اشوفنها حوك كالت اسمها ام كرار .. تعرفينها..
- : اي شيخنا اعرفها.. هي كلش تحبنا انه وامي..

شامخ : چا خوش.. هاي اجت لعد عيناج.. كتلها البت عدي وبحمايتي.. أخيها اذا اجه مااسلمنها .. امها تجي على عيني وراسي والمضيف مضيفها دام البت بريئة.. كالت والله هي بريئة وانه شفته للولد شون جرها من إديناتها بس ماگادرة تدخل..

انه لمن سمعته كال هيج رحت يمه بالعجل.. مااريد تصير شغلة غلط وتنكلب ضدنا : بوية شمعلمك (شمدريك) حچي المرة صحيح وهي عساس شايفتها للبت..
شامخ :چا شمالك انت جاي تعلمني.. بالأول ماكتلها انه من طرف فلانة.. بس سألتها عنكم .. كالت البت فاعلين بيها بس محد يصدك.. هي أمها كالتلي هشكل بس أخيها لمن درى راد يكتلها وشردت ماندري وين.. عاد انطيتها خبر عني بس خاطر امها توصلني واحنا صيتنا يلالي بس تنطي أسم تجينا مانتّيه..

- : شيخ مااعرف شون اجازيك.. الله يخليلك ولدك وانه شتكول اسوي بس اخوي مايكتلني..
شامخ : هاهيه بوية سدچ امين لاتخافين.. أمج حسبيلها چم يوم وتصير جدامج..
- : شيخنا ولا صغرا بيك.. بس شون يعني أمي ماندري وينها شون تجيني بهالوكت..
شامخ : هسه تشوفين .. لاتتعجلين يبوي وأخذينها من هالشارب..
- : ان شاء الله يارب.. اشكرك شيخ انت كلّك فضل علي..
شامخ : الفضل لله بوية.. اخذي راحتج هسه..

ترخصت وراحت..
محيي : بوية قاسم ولواء وين حيداومون هالسنة..
شامخ : شمالك غير اعدادية تمريض .. بس قاسم حيتخرج بس هاي السنة.. يريد يروح هندسة.. گلي انت شوكت ناوي تكمل .. يبوي الدراسة مهمة مو هينة.. بس أشر ويصيرلك..
محيي : انت تعبان هالسنة.. خلاكمل وياك والسنة التجي أقدم هندسة وي قاسم احسن..
شامخ : بس اكيد ها..
محيي : اكيد وغلاتك..
شامخ : هاهيه چا .. يمتى عندك وكت.. اريد ادزنك لبغداد تشوفلي سالفة خويك حميد..
محيي : براحتك.. هالفترة ماعندي شي..
شامخ : چا خوش.. باجر ان شاء الله تطلع الصبح وي عمي ازهر ونبيل.. ماادزنك وحيدك..
محيي : التريده يصيرلك بوية..
طبطب على چتفي وراح ..

ثاني يوم الصبح بدلت واجوي عمام ابوي وطلعنا بسيارة عمي ازهر.. وصلنا وره الظهر..
ازهر : هسه وين نروح.. تندل المطعم..
محيي : اي أندله.. مو رحناله ذاك اليوم تغدينا يمه..
نبيل : يله چا ماتحجي..
دليتهم علي وطبگنا شوي ليغاد.. نزلت تمشيت لعنده.. ماطلبنا شي بس ماي جابولنا.. وره شوي گمت دااغسل عساس فحچيت وي اليحاسب ع المبلغ..
محيي : خوية اريدنك بشغلة..
- : تفضل.. اذا اگدر اساعدك..
محيي : اريد توصلني لمديركم..موجود..
- : ليش استاذي..اكو مشكلة بخدماتنا..
محيي : لا لا..مو هنا كلامي بوية..بالعكس خوش مطعم وعاشت ايدكم..
طلع من مكانه وگال : يله تفضل ويايه..
مشيت وياه لحدما دخل لغرفة بيها مكتب وكراسي ثنين.. كعدت وطلع..حچينا بشكل عام بعدين دخلت بالموضوع..
محيي : خوية اجيت اسألك على واحد من عمالك..
- : بشنو..
محيي : يصير اخوي..اسمه رائد..

تفاجئ وسألني : اخوك..بس هو گال ماعندي بس اخت وحدة..
محيي : اي شوي صايرة مشاكل بيناتنا فمايحچي بيه..
- : طيب..شنو المطلوب مني اخوية..
محيي : اريد احاچي ضروري..ابوي بحالة صحية مامستقرة ويريد يشوفه..
- : بس هو ماموجود هسه..صارله اسبوع ماكو.. صدقانه هنا ميدرون عنه شي ليش اچذب عليك..
محيي : انه متأكد هنا يشتغل..خوية لاتخاف وحگ ربك هو اخوي لاتحسب جايك بشغلة شينة..
- : لا حشاك ماكلت هشكل..بس هو ماموجود وداعتك.. وإن كان هنا فلازم اخذ موافقته يله..

ضلينا نحچي ردت اجر لسانه ماكو مايفيد شي.. قفل ماكو يعني ماكو..وين راح هذا المسودن.. اكيد الي وصل خبر لأبوي عنه يعرفه.. طلعت حچيت لعمامي ورجعنا ماطولنا..

اول ماطبيت للبيت اجاني ابوي متلهف يريد يسمع شي عنه..
شامخ : بشر..شصار..
محيي : ماكو شي عنه يابة..يگولون ماموجود صارله اسبوع..
شامخ : شني..اسبوع ماكو..چا وينه هذ المسودن الملعون وين ولى واخذ أخيته..
محيي : بوية بس گلي منو الجابلك خبر عنه..اكيد يعرفه خوما يحچي على كيفه..
شامخ : يبوي مو دزيته گبلكم انه..كال موجود هيانه واذا تردون ترحوله روحوله..شنهي قابل يچذب علي..
محيي : والله مااعرف بعد..

عفتهم كاعدين وصعدت فوك تمددت ونمت..
كعدت المغربية ميت عطش.. لكيت امي واكفة يم راسي دتنظف الغرفة..
الحجية غادة : ها يوم كعدت.. اجيبلك شي شياتين..
محيي : والله فحطان عطش.. بلكت ماي..
الحجية غادة : تأمر وتدلل..
راحت صاحت ع اللبنية الدخلت عدنا.. ومن ندهتها عرفت اسمها زهرة.. جابتلها ماي وراحت.. انطتنيا وكعدت جدامي..
الحجية غادة : يمة شني ماكو خبر على حميد..
محيي : والله كلشي ماكو.. أندري وين راح هالرجال..
الحجية غادة : أبيك حيصيرله شي.. وين نروح بلياه.. وعلي يموت واموتن ابراه..

محيي : يمة شهالحچي هذا.. لاتكولين هيج.. وربج ساعة على ساعة فرج.. ماطول وصلنا لهنا اكيد حنوصل أبعد منها.. والدنيا گصیرة وداعتج..
الحجية غادة : الله كريم ييمة.. شعدنا غير هالكلمة.. كوم صبيت عشة تعال اكل..
محيي : يله هسه جاي بس اغسل..
خلت وراحت.. كمت غسلت وبدلت.. نزلت تعشيت وكعدت وي ابوي بالديوان جايين جماعة يردون يشاورونه بشغلة..

- : اي شيخنا .. نريد نفوت بغمج السالفة مثل مانكول..
شامخ : على راحتك بوية.. عد عيناك..
- : ابنا بالسجن شيخ.. بعد اسبوعين المحكمة مالته.. ماطولها ماوصلت محاكم نريده منكم..
شامخ : ابشر.. شمسوي الزلمة.. تعرفني حگاني وماارضا بالشينة..
- : شيخ والله بريئ هو بس تعال ويامن تحچي..
حچه واحد ثاني : سالفتنا چبيرة.. ابنا اسمه عبد شايف بت صغيرونة يطلع عمرها بالعشر سنين ديتحرشون بيها بعيد الشر عن بنياتك وبنيات الوادم.. هو بعد زلمة حوك واخو خيته كال شفت خيتي بيها شون اسكت.. گام تعارك وياهم هم ثنين وكبار بالعشرينات.. واحد منهم بي سكر طايح ع الحديدة وراسه مشگوك هسه هو مات.. مانريد نتشفى بي بعد هو مات بس راح بحگ مو بالظلم.. ابني حينسجن ظلم شيخنا..
شامخ : الميت ماتجوز علي الا الرحمة.. فالله يرحمه .. عدنا وكت بوية.. باجر انه جاي لعشيرة الولد هذا.. شنهي عشيرته .. خاطر اكون على علم..
- : عشيرة ال..... هم يعرفونك.. انه انطيت خبر للچبير مالهم كال نكعد بكعدة عشائرية بشرط يجي الشيخ شامخ مانريد شيخ فخذ مع احترامي الهم..

شامخ : اجي ومايكون خاطرك الا طيب.. اطلعه من حلگ السبع..
- : يعني اكو أمل شيخنا.. بعده طالب كلية مااريد مستقبله يروح بالسجون وانت أعرف بعد..
شامخ : اجيت لمضيفي أردنك.. لا بوية لاتخاف .. وليدك يجي ليمك..
- : زين شحتسوي شيخ.. حتى ناخذ احتياطاتنا..
شامخ : كلشي بوكته حلو.. بوكتها تشوفها وتاخذ الصافي..
- : الله يخليك شيخنا.. ماتقصر..

ضليت كاعد واسمعلهم.. ابوي شايل عقل يشل الحال.. الله اعلم شحيسوي باچر.. بس طلعوا وكف على حيله راح توضى وصلى.. انه اجاني صاحبي عبدالغني وطلعنا.. مريت من يم الشط ولاحتني نسمة هوى باردة.. ماادري شون وهيج تفطنت حامد.. جان هنا يكعد دائما.. يحب الشط والبرودة.. اشوف كاظم كاعد يمه يگله ماتبرد انت.. يجاوبه لا.. محتر اصلا .. كلش كتوم هو محد يعرف شني بگليبه بس والدتي.. هو قريب عليها فد دور..

بالدعش وشوي رجعت للبيت.. لكيتهم نايمين .. خليت وصعدت فوك خاف اشوفلي وحدة من البنيات.. ثاني يوم الصبح بين ما تريكنا وطلعنا لعشيرة الولد المات.. كعدنا وياهم بالبداية يصيحون ومحترك دمهم على موتة ابنهم..

ابوي لصمهم : يواشكم بوية.. شو اشوفنكم محترگین على ابنكم المات.. چا ماعلمتونه مايتگرب لحريم الوادم..
- : شيخ انت جاي ادافع لطرف واحد وغلط هيج..
شامخ : لا خو اعوفنلك الكعدة واطلع.. لمن اجيت اعرف المن جاي والحگ ويامن.. ابنكم مات والله يرحمه مانكول غيرها.. بس موتته ماجانت متعمدة..
صاح الشيخ مالهم : لا هنا مامرجية منك ابد.. والكعدة باطلة..
شامخ : لا بالله مانها باطلة وحگ هو ربك.. الولد بي سكر وكتله بمچانه .. عبد شني دخله بالسالفة هاي.. الزلمة جاي فازوع وحامي عرض.. الغيرة والموقف الصح عنده مانه صوبكم بوية انت شيخ المفروض تعرف..
- : بس هذا مايعني ان ابنا مات بسبب عبد.. نريد حگنا..
شامخ : شرايد حگك شون يصير عودك..
- : ناخذ فصلية وعبد ينسجن..
ابو عبد حچه : بناتي مايتحركن خطوة من بيتي..
- : چا خلي عبد ياخذ جزاته مربع همات..
شامخ : والله عينكم گویة.. البنيات مايطلعن من دار ابوهن.. دام ابنكم مات ظالم ومتحارش ببنيات العالم فاحنا همات ماننطي بنية.. الحگ دربه واحد مايندارله من دربونة..

ليش الوليد الوياه مامات.. ليش ابنكم مات.. چي مريض.. يعني الصوچ منكم بوية.. چا هسه انه اذبن رويحتي على واحد وانه غلطان ومريض وتريد مايكتلوني.. اليوم مااطلع وانه انطيت چلمة للوادم الحگ اجيبلهميا چي مااظلمن أحد انه وانتم أعرف بيه.. القضية تتحول لحگها وهو قتل غير متعمد.. مو تردون الوليد يضل عمره كله مسجون..مايصير..

كلهم سكتوا على كلام ابوي.. مايعرفون يجاوبون.. هو شيخهم الجبير كام يبلعم يحچي ويسكت.. بالأخير اتفقوا ماياخذون فصلية ويتنازلون عن قضية القتل المتعمد.. بس انفضت بفصل لاكلش ضخم ولا مايعترف بي.. يعني زين.. هي العشاير خاليها لهالسبب.. خاطر ماتصير كاتل ومكتول وتوصل سجون.. بس چي بيها قتل بعد لازم توصل محاكم.. بس القضية صارت قتل غير متعمد وبعد منتظرين الحكم شكد يصير..

طلعنا منهم وره الظهر.. رجعنا للبيت لكيت امي مفرفحة علينا عبالها شوف شصار.. هي متعودة على ابوي وكعداته بس چي انه وياه هالفترة وانه عصبي فعبالها اسوي شي غلط.. وحگها .. طمنتها ماكو شي ومشت الكعدة بشكل صحيح..

مرت ايام طبيعية ماكو شي.. أم زهرة ماسمعنا عنها شي.. ابن عم ابوي عمره بكدي بهالحدود كال انه ازوجها بس تحضر امها وإن ماحضرت فانه اريد استر عليها.. ابوي وافق ماكال لا.. دز جماعة لبيتها بلكت يلكونهم جايين ومنها يسأل عليهم يم جوارينهم.. وراها بفترة اسبوعين ابوي راح للمحكمة وي الولد علمود يصدر الحكم مالته.. لمن رجع كال تحاكم سنة بس واحتمال بهاي السنة تجي تخفيف عقوبات.. اطمنت لأن الولد مظلوم..
وره هالأسبوعين الصبح دنتريك واجه هاني العامل.. مصري هو..
هاني : يشيخ في بت كبيرة كده تستناك فالمضيف..
كام على حيله.. كمت وياه انه وكاظم.. اول ماطبينا صارت وحدة اربعينية جدامنا لابسة عباية مرتبة بس وجهها مورم بچي واحمر دم..
شامخ : اهلا بيج خوية.. تفضلي..
- شيخنا انه أم زهرة واريد اشوفن بنيتي..
شامخ : هسه تجيج.. بالحفظ والصون لاتخافين..
صاح على زهرة واجت مدنجة راسها وتفرك بإديها..
شامخ : تعاي بوية هاي المرة أمج.. شوفينها ولاتخافين احچي..

هي رفعت راسها وشافتها واشتغل البچي.. ركضتلها وشبگتها تبچي بحرگة وتندبها ليش مااجت تاخذها من زمان.. ابوي ضيفها وطلب من الكل يطلع بس انه وكاظم بقينا وهي وامها..
شامخ : هاي بتج خوية أم زهرة.. الشاهد الله ماخطيت خطوة وحدة.. كلت الا اشوفن رضاها واشوفن امها اذا مالگيتها ازوجها..
- : وعلي انه لو إلي سلطة وكلمة چا زوجتها من زمان.. بس اخوها ماينكدرله وعمامها واكفين وياه.. هي بريئة شيخنا والله..
شامخ : اي دريان بيها.. انتم وين رحتوا.. اجيت كذا مرة اشوفنكم مالكيتكم..
- : احنا شلنا شيخ.. لمن زهرة طلعت من البيت عمها الجبير كال اذا بقيتوا بالبيت حتصير عليكم سمعة.. فطلعنا لغير منطقة هيج بعيدة كلش.. محد يدري بسالفة زهرة بس ام كرار جيرانا..

شامخ : هي انه من عدها كدرت اعرف چم شغلة.. خوية البت اذا اسلمها الكم وين يصير مصيرها.. انه شيخ وچلمتي سيف على رگبتي.. البت اذا طلعت منا وصار عليها شي الشينة حتتسجل علي..
- : شيخنا انت شتفصل احنا نلبس.. انه اجيت سكتة محد يدري بيه والله.. كلت ماكو غير بيت الشيخ.. لأن لو مرعي كاتلها لاگالها الله چا عرفت..
شامخ : يله چا خوش خوية.. ابن عمي يريد يزوجها على سنة الله ورسوله.. انه فهمته وضعها وماكال شي.. فانتي شتكولين..
- : اذا تنستر هاهيه حجي توكل.. بس اريد اعرف وين عايش هو..
شامخ : بالحلة.. اليوم اجيب الشيخ يعقدلهم وياخذها ويروح..
- : اشكرك شيخنا ماادري شون اجازي فضلك علينا.. ماقصرت الله يخليلك ويلادك.. ادعيلكم بكل مغربية..
شامخ : كل الهلا.. چا عليمن سموني شيخ..

شواي وطلعت المرة هي وزهرة راحن يم النسوان.. ابوي انطى خبر لمقداد ابن عمه اجه وجاب مبلغ مالي بسيط علمود يصير المهر.. العصر اجه الشيخ عقدلهم واخذها وامها راحت وياها..

وره ما راحوا انداريت على ابوي سمعت تنهيدته.. : ها بوية شو تتنهد.. شني چنك تعودت عليها..
شامخ : گلبي على سناء.. وينها هسه ..عسى تكون زهرة دفعة بلة وربك يرجعلي سناء لحضني..
محيي : بعدك ما أيست..
اندارلي وعاينلي بنظرة مليانة حزن واعياء من الفراق : انه أب.. صرتلها أم همات.. بس مااريدها تحس بنقص ازهار.. كل فترة أدز جماعة يسألون عنهم يشوفون الحلة مالت المدارس بلكت يشوفونها بوحدة منهم.. بس ماكو.. چن فص ملح وذاب..
محيي : الله كريم.. اكيد زيناتك مايروحن هدر بوية..
سكت ماجاوبني ..

خليته على راحته وطلعت يم قاسم.. هذا بعالم ثاني.. عاجبته روحه ومايدخل هلكد بسوالف الشيوخية والفصول.. لكيته ديسوي بهدومه وكتبه.. باجر يبلش دوام هو ولواء.. فيصل دخل اعدادية عادية مو تمريض..
قاسم : ابوي شونه محيي..
محيي : على الله.. شتعرفه يحچي قابل..
قاسم : لا والله مايحجي.. باجر نروح لبغداد علمود الدوام.. وخايف مااريد اروح..
محيي : لا يبوي.. شعندك خايف.. انه وكاظم وفيصل موجودين.. بس انت بين فترة وفترة اخذلك فرة ع المدارس بلچن تشوف سناء.. هو مفرفحة روحه عليها..
قاسم : اي عمت عيني لو بيدي اجيبنها من الهوى واجي.. بس ربك .. الله يحفظها وين ماجانت لابد تجي فديوم..
محيي : الله كريم.. يله اخذ راحتك خوية.. اجيت اشوفك..
قاسم : هله بيك..

خليت وطلعت بره.. اتمشى بالحلال والهوى بارد.. شون فترة صعبة ..دتاخذ من روحنا أيام أيام.. انه روحي يم ابوي.. خايف علي.. اذا صارله شي امي ماتتحمل.. بس ماناخذ احتمالات موزينة.. خنشوف شيصير ساعة على ساعة فرج..

مرت عشر ايام صافية.. كعدات ومشاكل .. ابوي تعب مايكدر يروح لبغداد دائما.. فجمعنا انه وكاظم..
شامخ : بوية انه مااحمل هالفترة اروح واجي لبغداد.. اريدن واحد منكم يروح لبغداد يكمش شغل المحلات بين ما تستعدل صحتي وأردكم لمچانکم..
كاظم : براحتك بوية.. شتريد انه لو محيي.. ثنيناتنا ماعدنا دراسة..
شامخ : لا بوية انه اريدن كاظم يروح.. انت ضل وياي.. ومنها عينك على خوانك.. اكعد وياهم بالشقة..
كاظم : هذا هو يابة.. شتفصل البس..
شامخ : الله يحفظك لشبابك..

ضجت ليش يدز كاظم وانه لا.. فطلعت تمشيت ليغاد.. اجاني عبدالغني يضحك ..
عبدالغني : شمالك ضايج بوية..
محيي : برأيك انه ليش مايدزني ابوي لبغداد اكمش شغل المحلات.. دز كاظم..
عبدالغني : شمالك.. موزين خلاك هنا يمه.. انه اشوفك حوك اكثر من كاظم بالكعدات والفصول..
محيي : ها هيج تكول..
عبدالغني : اي والله .. اخذها مني..
محيي : هو انه طاح حظي هلكد ما اخذها منك.. دگوم خلنتمشى غادي..
اخذته ورحنا تمشينا..

مرت ايام عادية لاتخلو من المشاكل.. كاظم يروح ويرجع وي عطلة قاسم ولواء.. حامد كل فترة نوصل لراس الخيط وينجر من عدنا.. وبكل جرة ابوي يطيح وتتأزم حالته.. لحدما خلصت السنة ودخلنا الـ٦٨ .. ابوي ساكت.. خوفني سكوته.. بس اشوفه يحاچي عمه ازهر.. طول الوكت وياه.. هو معلمنا ماندخل بسوالفه ونسأله.. بس اذا راد يحچي فمن كيفه مانجبره.. اجت امي كعدتني الصبح خايفة..
الحجية غادة : يمة محيي گوم يمة..
كمت مرعوب : شكو حجية شبيج خوفتيني..
الحجية غادة : يمة ابوك ماكو ماهو.. كعدت بوكت الأذان شفته يصلي.. صليت ورديت نمت.. هسه كعدت دااكعد البنيات نخبز ومااشوفنه لا بفراشه ولا بالديوان..
محيي : خاف طالع للحلال ديشوف الشغل..
الحجية غادة : لا لا ماموجود يوم..دزيت فيصل يسأل العمال كالوا مااجانا..
كمت من مكاني مرعوب.. هو آخر فترة كام ينطيني خبر عن كلشي يسوي.. هسه وين راح.. طلعت بالحلال اسأل عنه .. ماكو محد شايفه.. طلعت للمدينة والسيطرة ماكو..

مر اليوم بتعب وخوف.. ماكو تلفونات نخابر ولا نعرف وين راح خاطر ندز أحد يشوف مكانه.. ضلينا مشدوهين.. كلت خلتمر اربعة وعشرين ساعة بعدين اروح للمركز اخبر عنه.. وهيج الظهر كاعد يم امي دتصلي.. واسمع صوت باب الگراج انفتحت.. طلعت بالعجل وامي وياي.. لنّه ابوي نازل وياه سناء.. شون وليش وشوكت .. مااعرف...

حامد : كال امشي لبيتنا..محد موجود مسافرين.. بلحظة تعب وهلك من شغل اكثر من ١٢ ساعة فاكيد بس اريد ارتاح وامدد رجليه ورمت.. كتله يله هم اني محد بالشقة اليوم.. مشيت وياه لبيته لگيت الشرب محطوط ع الطبلة..
انداريتله : هاي شنو حيدر..
حيدر : شبيك يول دجرب..مرة وحدة متأثر..
حامد : لا مااشرب اني عمي وين تريد تخليني..
حيدر : والله ماتخسر شي..جرب وشوف..

ضل يحاول ويايه واني أصده..مامتعلم ع الشرب ولا فكرت بيوم اتقربله.. ريحته موطيبة ويلعب الروح .. بلحظة صار الشيطان اكبر مني ومن تفكيري الغلفت بي روحي من زمان..اخذت گلاص صغير مصبوب بي.. شربته ردت اتقيء هلگد ما ماينجرع..مااحس بروحي غير گمت اتجاوب وياه وشربت اكثر من گلاصين..مااذكر شصار وشلون..بس گعدت الصبح من وكت شفت الريحة تارسة هدومي والولد نايمين ليغاد..البطالة خلصانة.. گمت مرعوب.. نفضت هدومي واحاول اتذكر شصار البارحة.. لفيت الشماغ على خشمي وطلعت للبيت طگيتها بركضة.. خفت لاتكون سناء راجعة ادور تشوفني بهالحالة شتگول عني.. فتحت القفل وطبيت مالگيتها.. بعدها ماجاية..

سبحت وبدلت..غسلت هدومي..شريتهن برة مااريد توصلهن گبل لا ينشفن.. قفلت البيبان وطلعت لبيت خالي.. اول ماطبيت لگيت سناء تحوم علي.. اجت شبگتني وعيونها مدمعة..
سناء : حامد وين رحت..ليش طولت علي..
حامد : رجعت تعبان ونمت..تعذريني..
سكتت.. ضليت گاعد يمهم شواي ورجعنا للشقة .. لشتي كلها ترجف..شلون سويت هيج..مااشرب اني شجابني ع الشرب..شسويت بنفسي..

بقيت عايش بتأنيب ضمير وخوفة..خليتها بالشقة وجبتلها شغلات تسويهن غده بعدين طلعت للشغل.. شفت حيدر وطالب مايتذكرون شصار البارحة.. اني هم غلست مابديت اهتمام.. مشى اليوم عادي بس روحي عطشانة لشي ماادري شنوه..اهجس اكو شغلة لازم اسويها.. بالليل خلص الدوام داارجع للبيت وشفت حيدر وطالب.. ماكدرت الزم روحي ..رحت عليهم وطلبت گعدة مثل البارحة..
حيدر ضحك : تحچي صدك..شنو عجبك..
حامد : مو شغلة عجبني..بس لشتي ترجف من الصبح ليهسه..شسوي برأيك..
طالب : لتخاف..هاي اني من بلشت اشرب هيج چنت اول ايام بعدين تتعود..وبمناسبة هالخبر امشي عازمك على گعدة مرتبة..
مشيت وياهم مسير البال..مقفل الخطوة.. مااگدر .. انجذبتله..خصوصا هالفترة متجرد من كلشي بالدنيا.. بس الشغل والتعب مذبوب على راسي..

رحت لنفس البيت وشربت بنفس الگلاص والليلة انعادت نفسها.. گعدت الصبح مغبش ..اخذت هدوم من طالب وسبحت بعدين طلعت.. هذا الشرب نساني حتى سناء.. اختي الطلعتها على مسؤوليتي وحرمتها من امها وابوها ودراستها..بعدين هيج أهملها.. لا ميصير ..لازم اشوف صرفة لموضوعي هذا..

طبيت للشقة لگيتها ماكو.. تخبلت ..
صحت : سناء.. سنااا..وينج يابة..
طلعت بره..ويا طلعتي انفتحت باب شقة ام خالد وطلعت هي وياها..اول ماشافتني بچت واجت يمي.. ماحچت شي.. رأسا فاتت جوه..
ام خالد : يمة ليش عايف البنية وحيدها بالليل.. تستوحش ميصير..
حامد : اي خالة شسوي غير بالشغل..دااشتغل شفت مسائي.. بس ديري بالج عليها ..
ام خالد : تدلل..بعيوني هي..

تشكرت منها وطبيت.. اول ماسديت الباب اندارتلي وحچت بعتاب ودموعا تصب : حامد وين دتروح.. تره انه عفت اهلي وناسي وكل الدنيا علمودك..چي ادري بيك ماتحب ابوي ولاتريد تبقى هناك..شون بحالي..
حامد : سناوي حبيبي..شغلي تحول بالليل وماعندي مجال احچيلج صدگيني..
سناء : بس انت دتطلع من الصبح ماترجع لثاني صباح.. شنو معناتها هاي ..احچيلي اذا ضام علي شي حباب..والله اخاف عليك وبدونك..
ضلت تبچي وتحچي..كمت عليها شبگتها وشميت ريحة شعرها..تذكرت امي..اويلي گلبي شكد صاير حجار حتى على امه مايبچي.. طمنتها ان دوامي تغير وكمت اشتغل من العصر لليل..صرت بين نارين.. الشرب ديجذبني اله بشكل لا ارادي..وسناء من الجهة الثانية تجذبني.. شصارت هالروح ..

بالنهار اشوف روحي مااحتاجه ولا اريد اتقربله.. يجي الليل ومن النمل يدبي بدمي..عبالك مرض واحتاج علاجه وماكو علاج بس الشرب..مرض مااعرف شلون اداري روحي منه وشلون اتعالج..

مرت ايام بهالشكل..كل يوم ادمر اكثر لمن اگعد الصبح والاگي روحي شارب..كمت ماانسى واتذكر شصار بالليل.. اول مرتين چنت انسى احس دماغي يتغلف بعد مايتذكر كلشي..
بيوم رحت للدوام بعد ماغيرته..گمت اداوم من العصر لحد الليل وره الثنعش.. حيدر وطالب ثنينهم ماموجودين .. منين اشتري شرب..مااعرف محل.. چنت منهم اخذ..فتوترت اليوم كله اريد اشوفهم ماكو.. زحمة اروحلهم على يابو بشنو جاي علينا..جاي على شرب.. فماسويت هيج..خلص الدوام بالليل كلش.. طلعت ضايج اريد شي أفش غلي بي.. وهيج بالطريق اني وامشي بالدربونة مااحس غير سچينة تخلت على رگبتي.. تجمدت بمكاني..اخاف اتحرك يمنى ويسرى..
- : شگد عندك فلوس انطينياهن..

حامد : ماعندي فلوس اخوية..شتريد مني..
ضب السچينة اكثر..العرگ كام يصب مثل الماي عليه.. جنت شايل بجيبي دينارين واربع دراهم.. بإعتبار هواي وجايب اسبوعيتي..هو ويهدد بيه طلعوا ثنين جدامي فتشوا جيوبي اخذوا الفلوس..دفرت واحد منهم وعطت بي : اسبوعيتي الله لايرضا عليك..
اني گلت هيج وهذا شخط فخذي بالسچينة.. خليت ايدي عليها ونصيت راسي.. الدم گام يكت و هم طفروا ماادري وين راحوا.. حتى مابيه حيل اركض وراهم.. تمشيت ليغاد بس عبرت الدربونة لكيت رجال چبير بالعمر گايد حفيده وديمشون..

ندهته : عمي.. حجي ..
اندارلي وطبطب على چتف حفيده دخل لواحد من البيوت.. اجاني خايف ..
- : شبيك ابني ليش هيج حالتك..
حامد : حجي واحد سلّاب شافني واخذ اسبوعيتي..
- : شگد مايخاف ربه..امشي اني اخذك للمستشفى ميصير تبقى هيج دتنزف..
مشيت وياه اخذني للمستشفى..بين ما اجه الدكتور شافني گال خياطين.. خيطلياها وكتبلي مسكن ومضاد التهاب..ماشايل فلوس فبس اخذت الراچيته مااشتريتها..بقيت گاعد شوية بعدين شفت نفسي اگدر امشي فطلعت..الحجي بقى ويايه خطية خوش رجال..
- : ابني وين بيتك انت..خاف بعيد حتى تاخذ تكسي..
حامد : بالسعدون گاعد بشقة..
- : اي بعيد لعد..هسه اخذلك تكسي متگدر تمشي هيج مسافة..
هو وديحچي فاتت سيارة من يمنا..نزل الجامة رجال يشبهه..هو راح علي يحاچي ومن كلامه عرفته ابنه.. فاخذني وياه وصلني للسعدون.. تشكرت منه گتله الدنيا صغيرة واردلكياها بالأحسن..ارتاحيتله حسيته شخص قريب عليه..

هو شافني صعدت وراح..اول مادگيت الباب أذن الفجر..دقايق وطلعتلي سناء.. شافت البنطرون مشگوك وبلاستر جواه..
شهگت ولزمتني من ايدي : شبيك حامد..
حامد : مابيه شي فوتي بس اريد اگعد..
طبت وطبيت وراها..گعدت وراحت جابتلي ماي ووصلة رطبة مسحت وجهي علي دم من ايدي.. سولفتلها شصار هي بس تبچي..سكتتها وطمنتها الصار راح واني بخير هسه..بس مقهور ع الفلوس خصوصا هالفترة شبه معوز ومنتظر نهاية الاسبوع علمود الاسبوعية..بس ماگتلها..ماردت اثقل عليها.. راحت تصلي واجت نامت..شفتها نايمة بهدوء وشعرها ظفيرة ليوره.. ابتسمت بتعب وتمددت..ضليت اباوعلها لحدما مرني النوم وغفيت..

ضليت بالبيت فترة اسبوع..ابو خالد راح اخذلي اجازة من ابو المطعم..گايل مايحتاج تجون هو عامل كفوء وعذره وياه.. بالليل اصفن بيني وبين روحي.. يمكن هاي الوگعة رسالة من رب العالمين علمود اترك الشرب والتهي بأختي وبنفسي.. صار بحدود الشهرين اشرب.. مو بسهولة اترك هسه ..بس عسى ولعل ولكل بداية اكو نهاية..

بعد چم يوم وندخل السنة الجديدة ويصير سنة كاملة ماشايف الديرة ولا امي غادة..كل هذا مخلي ضمن ثانوياتي.. الأولوية اريد اترك الشرب بس.. خالي سمع بيه مخيط فخذي فإجاني وجابلي فلوس..
حامد : ليش تعبت روحك خالو..
خليل : لا يابة غير لسلامتك هاي..شلونك هسه احسن..
حامد : اي الحمدلله..هالأيام ارجع للشغل..
خليل : يله بس لتضغط على روحك خالو.. من تشوف نفسك صرت مثل قبل ارجع..مو بكيفك..
حامد : ان شاء الله لاتخاف..
وره اسبوع ثاني تحسنت گمت اكدر اوگف فترة طويلة على رجلي فكعدت الصبح بدلت ورحت للشغل.. حيدر وطالب موجودين..تحمدولي ع السلامة والكل بالمطعم..

مرت أيامي على هالنمط..شكد ماكدرت حاولت ماالتقي بحيدر وطالب بس علمود مايتعولي اروح وياهم لأن ادري بنفسي اذا رحت حشرب بدون نقاش.. الموضوع صعب.. اصعب من أن نگول هو شرب وينترك.. بس هذا كله يعتبر جهاد بحق ذاتي وحق سناء هم لأن مسؤول عنها..

دخلنا سنة الـ٦٨..رجعت من وكت ردت هاللحظات تكون وياها.. بستها وشبگتها ..
حامد : حبيبتي بدلي نطلع نتمشى بالمنصور..
سناء : ها صدك..
حامد : اي والله..خلنتونس شوية ماضايجة من الشقة..
سناء : اي كلش ضايجة..همزين گلت هيج..
حامد : يله كملي بالعجل..
شفتها كيفت وفرحانة..راحت تبدل واني همات بدلت.. الجو مايگصه الطبر من البرد بس هي ساعة زمان ونرجع.. اخذتها وطلعنا تمشينا ..اشتريتلها لبلبي حار وواگف اباوعلها شلون تاكل.. بين ما خلصت ورجعنا بعد ظلمت الدنيا..

بفترة عشرة ايام رجعت ع الدوام المسائي لأن واحد من العمال بطل فاني صرت بمكانه..طالب وحيدر شافوني مااريد شرب ومبتعد عنهم رجعوا چلبولي.. يتوددولي يردوني اجي وياهم.. ماطاوعتهم وشلت الفكرة من بالي.. حاولت شكد مااگدر مااتقربله..بس الشيطان استقوى عليه بهاليوم.. يوم مشؤوم ذكرني بكل لحظاتي القديمة الي شفت ابوية بيها..دورة السنة التاسعة لأمي.. ماحاچيت احد طول اليوم ساكت اريد شي يريحني..طاوعت الأفكار الشرانية المؤذية ورحت للولد برجليه وطلبت نفس مطلب ذيچ الليلة.. بس هلمرة چان اكو اختلاف.. طبيت للبيت لگيت رجال مااعرفه اول مرة اشوفه.. مااهتميت لكونه منو وشلون اجه بس سلمت وگعدت.. شربت لحدما انتخمت ودخت.. گمت مااسيطر عبالك اول مرة اشرب..لأن صار هواي تارك..

هذا الرجال اني وكاعد شمر عليه ماي وضربني بوكس.. تخبلت.. شبي هذا شمسويله..گمت علي بيه مابيه شبعته كتل..انتبهت على ايدي صار بيها دم من حلگه.. ابتعدت منه واشوفه يلهث بتعب ويكفر ويفشر..
گال : نعلعلا شرف امك اذا عدها شرف..
هنا الدنيا اسودت بوجهي.. من بعد الموقف الأخير الصارلي ويا هذا الي سلبني گمت اشيل سچينة صغيرة.. فلافها بالشماغ وحاطها على صفحة.. رحت عليها طلعتها وضليت اضرب بي ببطنه بس مامنتبه للمكان اذا بكليته لو وين وافشر..الى أن شفته ثگل وانتچى على چتفي.. باوعت لإيدي شفت الدم ماليها حتى واصل للردان وينگط بالگاع.. اباوع محد اكو بس اني وهذا الرجال.. هديته رأسا وكع ..كعدت يم راسه ومخلي إذني قريب من خشمه..ماحسيت بأنفاسه.. بكدما سكران والدنيا مغوشة بعيوني بكدما وعيت والخوف تملكني..شسويت بروحي.. دخيلك يالله.. كمت بالعجل غسلت ايدي والردان..شسوي هسه.. أسلم روحي..لا شلون..زين الولد وين راحوا..

ضليت گاعد بالغرفة واباوعله..مات من ورايه.. بس ماچنت احس بنفسي..شلون هسه منو يصدگني.. سناء.. سناء اي سناء صارت جدام عيوني.. حتضيع من ورايه.. يشهد الله عليه لو واعي حتى ماالزمه.. الشرب عماني..اني مااتعارك ولا اتقرب للمشاكل..

كمت من مكاني اريد اطلع واسمع صوت سيارة الشرطة.. ضعت حامد بعد منو الك.. لا أب لا أخ.. طفرت من الحايط ولأن فخذي بعده مو هلگد رجلي انلوت.. وگعت رأسا .. حاولت اگوم واركض برجل تكزل وبخطوات مامنتظمة..اسمع صوت الشرطي ورايه يصيح وصوت چلب ينبح..جمدت بمكاني .. صار جدامي كمشني من چتفي..
حامد : سيدي بريء وروح امي چنت سكران..
- : والله من دنعل ابو الشرب لابو..هي الناس شلون تموت من وراكم انتو السكارى.. امشي يله..
اكبر صدمة بحياتي..مستقبلي صار من عداد المجهول من هاللحظة.. كلبچ إديه بالكلبچات وصعدني بالسيارة..

اكو سيارة اسعاف همات جاية..شفتهم صعدوا واحد متلفلف..هذا نفسه الكتلته..شسويت اني شسويت.. الشغلة المااعرفها منو خبّر عليه..شمدريهم هذا مات واني بعدني ماطالع.. وصلنا للمركز ودخلت بالتوقيف بس هلمرة الغلط لابسني من فوك ليجوه.. مو مثل هذيچ المرة.. كعدت بالگاع واندب حظي العمره ماصار عدل.. سناء شحيصير بيها من تسمع هيج..

ضليت كاعد بقلق وتفكير اكل راسي..هذوله ويايه بالتوقيف يضحكون ويسولفون ولا چن اكو شي.. بحدود الساعتين وطلبوني..گعدت بغرفة اصغر وگعد جدامي واحد نقيب..سألني على عمري واسمي ووين ساكن بعد چم شغلة..
- : انت قتلت نفس..تعرف شنو يعني..
حامد : سيدي ماچنت واعي والله..
- : هو همين ماچان واعي..وهالشي لصالحك..
باوعتله مصدوم..مااتذكر شفته يشرب : شلون سيدي.. شمدريك..
- : الأطباء فحصوه وتأكدوا چان تحت تأثير الكحول.. انت همين حيتم فحصك حتى نتأكد ولو مبين عليك شارب چنت..بس لازم علمود اوراقك تصعد للمحكمة..
حامد : سيدي اختي وحدها وخايف عليها.. سجنوني بس اريد اشوفها واطمن عليها..
- : اهلك وين انت..شنو سالفتك فهمني..
حچيتله شصاير وشلون اجيت.. : محد يدري بيه هنا.. بس خالي..
- : انطيني اسمه الثلاثي واحنا نوصل اله معليك بعد.. هسه تضل بالتوقيف الى أن تنتهي الاجراءات وتصعد محكمة..بعد هو القاضي يحكم كم سنة تنسجن..

انطيته اسمه وعنوان السكن.. عافني وراح..اجه جندي رجعني للغرفة ذيچ.. اويلي عليج يمة.. شصار بيه اني شسويت بروحي .. شبي حظي هيج معثر وميرضا يستعدل.. مشى اليوم ماوصلوا لخالي ..ماگال شي الضابط.. بالليل گاعد وضوة من الفانوس خفيف يجيني.. راسي حيطگ اريد اشوف سناء حبيبتي هسه شصاير بيها.. مشيت وره رغبتي و وسوسة شيطاني.. شجاني اني موهيج..

ثاني يوم اجه الجندي گال خالك يريد يشوفك.. گمت على حيلي ومستحي منه شلون حشوفه.. تمشيت ليغاد وشفته من وره الحدايد..
باوعلي بعتاب : شسويت بنفسك حامد..
تمنيت اشبگه واتنهد تنهيدة تشگ صدري.. بس مااكدر محبوس : خالو متندم..ماچنت بوعيي صدگني..
حامد : ادري بيك..شگد كتلك تعال اكعد ويايه.. يابة الگعدة وحدك متفيدك..ع الاقل عيني عليك.. الله يسامحك..
سكتت ماجاوبته بس الندم مثل المخدر يمشي بدمي من وريد ايدي لحد زندي وگلبي وكل جزء بيه..
حامد : شحيصيرلي هسه خالو..

خليل : حتجي لجنة طبية تفحصك..سلمتهم جنسيتك والمستمسكات.. الولد مات وحتصير گعدة بيناتنا ادفعلهم فلوس وانت حتنسجن بعد..
حامد : وسناء شلونها..بالي عليها..
خليل : جابتها جوارينكم ..ماچنت ادري بيك بالتوقيف وماموجود.. بعدني ماگتلها حامد حيصيرله هيج..
حامد : گللها..هي خلصت واني الله اعلم شگد حبقى هنا.. لشوكت اضم عليها..
خليل : هاهيه مثل متريد..
مد ايده طبطب على چتفي وراح..رجعت گعدت واحسب ايامي شوكت تخلص ويجي يوم المحاكمة..

سناء .....
طلع حامد.. وبطلعته من الشقة للشغل يبدا يومي المتواضع.. شلت مواعين الريوك وبديت انظف واسوي اكل هالموجود.. اكلي طيب.. تعلمت الطبخ من ماما غادة وصار ونستي.. خلصت وجبت الخيط والابرة مال تطريز.. جنت ببيت ابوي كلما اطرز غُرز بشكل جديد اروح لماما غادة اشوفلهيا چي هي العلمتني.. فمن حامد گلي لمي هدومج هي الشغلة الوحيدة من طرف حياتي السابقة الكدرت اخذها وياي.. الظهر اصبلي واكعد اكل ومرات اعاين من الشباچ ع الشارع.. بغداد مختلفة عن ديرتنا.. شوارعها هوسة وناسها منفتحين.. اعاين عالبنات يرجعن من دوامهن واذكر ايام دراستي واكول ليش هيج سويت حامد وخربت حياتنا.. بعدين اصفن اكول هو هم ديتعب ويسوي اليكدرله اكيد اكو شي بباله مااعرفه...

صار الليل وتأخر الوكت وحامد بعده مجاي.. هو مرات يتاخر چي يطلع وي صحبانه بس هالمرة هواي تأخر.. خفت بس كلت اكيد صاحب الشغل زاد ساعات العمل او صارتله شغلة مهمة.. صارت بثنعش ونص وبعده ماكو... بديت اسمع صوت زلم بره من صوتهم عرفت سكرانين.. خفت و كلبي كام يرجف.. وينك حامد مالي غيرك بهالمكان.. بديت ابچي بصوت وحاطة ايدي على وجهي.. ليش هيج يتأخر ويخلي كلبي ينبط عليه.. اول شخص اجه ببالي ام خالد الي بالشقة الجدامنا.. اي اكيد هي حتساعدني ماكو غيرها.. لبست صاية وشال وفتحت باب الشقة ورحت دكيت بابها..

دكيت مرة وثنين بالثالثة انفتحت الباب... طلعلي ابو خالد رجال جبير بنهاية الخمسينات.. النوم باين على عيونه اكيد كعدتهم بنص الليالي..
ابو خالد : خير بنتي خوماكو شي بالليل..
سناء : اخوي حامد عمو.. ليهسه مجاي واني وحدي بالشقة وكلش خايفة.. ماادري شسوي ساعدني..
ابو خالد : هو دائما يتأخر هيج لو هاي اول مرة..
سناء : اول مرة عمو واذا عنده شي ينطيني خبر قبل لا يروح..
ابو خالد : ان شاءالله خير.. زين ماعندج كرايب هنا اوديج عليهم ميصير تبقين وحيدج بالشقة..
سناء : اي بيت خالي هنا ببغداد.. قريبين واندلهم...
ابو خالد : هاهية لعد.. انتظريني بنتي بالشقة ابدل واجي اخذج نروحلهم.. بلكت نلكاله خبر..

تشكرت منه هواي ورجعت للشقة.. ربك ميعوف عبده وحيد.. اخذت وياية شوي هدوم لان ماادري شكد حبقى يمهم... حوالي ثلث ساعة وسمعت الباب تندك.. فتحت لكيت ام خالد واكفة وتعاينلي..
ام خالد : شكو حبيبتي طمنيني شبي حامد..
اول ماشفتها عيوني دمعت وشمرت روحي عليها.. خالة ماادري ليش تاخر هو ميتأخر هيج.. كلش خايفة علي ومالي غيره..
كعدت تهدي بيه وتصبرني.. اخذتني للسيارة الجان ابو خالد كاعد بيها ينتظرنا.. بيت خالي مو بعيد بالصالحية.. دليتهم لحدما وصلنا وكفت السيارة ونزلت اني وام خالد..
دكينا الباب طلع خالي مخروع.. عاينلنا بنظرة تفاجئ وگال.. : سناء.. شجابج بهالليل حبيبتي.. ومنو حضرة الست الوياج..
سناء : خالو هاي جيراننا بالعمارة ام خالد.. حامد تأخر وليهسة مجاي.. فرحتلهم وهم جابوني لهنا..
تشكر منها خالي واني هم.. راحت بعد ما تطمنت علي ودخلت وي خالي جوه..

سناء : خالو حامد ليهسة ماكو وحموت من الخوف علي.. كلت بلكت عدكم خبر عنه..
خليل : لا والله يخالي علمي علمج.. وين صار هالوليد بالليالي.. هسه ادز احمد وفلاح لمكان شغلة ونشوف..
والله وصدك.. طلعوا ولد خالي واحنا كاعدين ننتظر على جمر.. بحدود الساعه وشوي رجعوا..
خليل : بشروا شسويتوا..
احمد : ماكو خبر عنه يابة... رحنا لكينا المطعم معزل ومابي احد.. الشارع يصوفر.. خلي يصير الصبح واروح اسال عنه مرة لخ بلكت العمال يدرون عنه شي..
عاينلي خالي وگال : ان شاءالله خير بنتي فوتي نامي جوه ويه البنات والصباح رباح..

تنهدت ورحت وياهم.. جسمي نحلان من الخوف والتوتر بس الخوف ماكلني... اذا مو بالشغل چا وينه.. الخوف البگلبي مايبرده الا رجعة حامد.. ضليت افكر لحدما دخت ونمت..
فزيت الصبح على هوسة بالبيت.. كمت سريع لبست الشال ورحت اشوف شكو.. لكيت خالي ولد خالي واكفين يحجون اول مشافوني سكتوا.. تقربت منهم وعلى وجوههم نظرات معرفت افسرها...
سناء : بشر خالو ماكو خبر عن حامد..
خليل : اكو بنتي اكو... روحي غسلي وجهج واكليلج لكمة وتعالي عندي حجاية وياج..
رحت للمطبخ لكيت مرت خالي وبناتها ديتهامسن.. البارحة مچان بيهم شي شمعنى اليوم كالبين وجههم عليه.. مااهتميت لكيت اكل عالميز بعدهم ديتريكون.. كعدت اكل لحدما خلصت وشلته..محد حچه ويايه حجاية وحدة بس نظرات غريبة تعاينلي من كل مكان..

بيا حال اني هسه... كلبي ديوجعني على حامد مو بحالهم بس اريد اعرف شصارلة.. اجتي سرى بت خالي الصغيرة كلتلي بابا يصيحج.. انه ماعولت كمت ركض وكلبي يمشي گبل رجلي.. دكيت الباب كلي دخلي دخلت وكعدت بسده ومسامعي كلها موجهتهن اله...
خليل : شوفي بنتي.. لازم تعرفين موقف اخوج والصار.. لان انتي مو صغيرة ولا صحيح نضم عليج..
حركت راسي بالموافقة وافرك بإيدي من التوتر...
خليل : سناء خالو... اليوم من الصبح طلعوا الولد يسألون علي بالمطعم اليشتغل بي.. العمال مايعرفون عنه شي.. كالوا طلع من شغله بالليل مثل كل يوم وماسامعين شي ثاني.. واحنا بالطريق طبگت سيارة شرطة نزل منها ضابط..گال انت تصير خال حامد.. گتله نعم تفضل.. گال تعال ويايه للمركز..

كالها وسكت.. كلبي كام يرجف.. : اي خالو شرادوا منك.. شلون عرفوك..
خليل : مطلعين اسمي من العقد مالت السيارة.. حامد متورط بقضية قال.. لگوا يشرب ويا صحبانه وكاتل واحد منهم.. هسه هو بالتوقيف والقضية صعدت محاكم.. اول جلسة اله بعد اسبوعين ..

هو كال هيج واني احس الدنيا صغرت بعيوني.. حرارة صعدت لراسي ولساني انعگد.. معقولة... حامد الي عاف الاكو الماكو خاطر مايطلب شي من ابوي الي هو من لحمه ودمه.. ابو نفس العزيزة الي مستعد يبيع الهدوم الفوگاه بس اگله محتاجة فلان شي خاطر مايعتاز بشر هيج يسوي... هلك نفسه ليل نهار شغل يرجع ايدي مورمة ورجله متعينة من الوكفة وبالاخير تناسى كل هالتعب.. مدااصدك اكيد غلطان..
مااعرفت شسوي بلحظتها.. الصدمة سيطرت علي دموعي تنزل بلا صوت..

لحدما صوت من خالي رجعني للواقع..
خليل : بنتي خومابيج شي.. اصيح البنات يجيبولج مي..
لحظتها بس استوعبت.. يعني الصار حقيقة وحامد هسه بالسجن.. حطيت ايدي على وجهي وبديت ابجي بحركة..

الف كلمة والف عتاب والف سؤال ببالي...ليش وشلون وشوكت يحامد.. شلون تفرط باخيتك مافكرت بيه.. انه العفت كلشي لخاطرك.. تحملت وصبرت هواي وماتشكيت يوم.. خسرت اهلي وصديقاتي وسنة من عمري راحت هدر وبالاخير هيج تفرط بكل ذني...
بعدين صحيت.. لا حامد مايسويها انه اعرفه زين... مسحت دموعي وعاينت لخالي وحجيت..
سناء : هسه شلون خالو اكيد هو بريئ وراح يثبتون هذا بجلسة محاكمته مو...
خليل : الله كريم يبنتي... هذا بيتج وانط بحسبة ابوج تبقين هنا لحدما يصدر الحكم ونشوف شنسوي وكتها..
سلمت امري لله وقررت انتظر فرج ربي...

بديت احاول اتأقلم على العيشة ببيت خالي.. همزين عملت حساب وجبت وياي هدوم.. بالليل افرش وانام وي البنات بغرفتهم... وبالنهار اساعدهم بالطبخ والتنظيف.. بس مرة خالي لهجتها حادة وياي والبنات مايحتكن بيها بس للضروريات.. اكيد خالة منبهتهن.. طبعا تخاف على بناتها من وحدة اخوها قاتل... الدعاء ما نزل عن لساني.. ماانام بالليل الا دموعي على خدي.. اصلي وادعي ربي يثبت برائته مالي من بعدن احد بهالمكان..
بيوم العصرية اجت جيران مرت خالي.. استقبلتها خالة و دخلتها للاستقبال وكلتلي سوي گهوة وتعالي قدميها..
سويت الكهوة وصبيتها بفناجين ودااوديها.. وصلت قريب الباب وبلا قصد سمعتهم يحجون...
- : اي عيوني مكلتيلي منية هاي البنية اليمكم.. مشايفتها قبل اشو..
ام احمد : حبيبتي هاي من طرف كرايب ابو احمد.. خطيه يتيمة وجايبيها نعطف عليها مالها احد.. بس اخوها وهسه دخل سجون..
- : صخام يدادة.. ديربالكم عيني الخير حلو بس هاي ينخاف منها.. مرات العرگ دساس مثل ميگولون.. ديربالج على بيتج وبناتج خية الدنيا مو امان
ام احمد : شنسوي بعد ياعيني غير ابو احمد گلبه طيب ومايهله يشمرها بالشارع..

انه سمعتهم هيج والدمعة صارت بعيوني.. انه بت شوارع صرت.. انه بت احسن البيوت والچان مينجاب طاريي بالشين بالديرة كلها تالي متالي هيج ينحچي علي.. حيل انهضمت من حجيها واستصغرت نفسي.. لمت حامد عالسواه بيه وبنفسه.. لمت ابوي لان مااجه دور عليه ولمت الدنيا على ظلمها...
من بعد هالموقف صرت مااتقرب من البنات ابد.. على كد الشغل واصعد للغرفة اكعد اصلي وادعي ربي يفرجها...
لحدما كعدت بيوم الصبح سمعت صوت خلاني افتح عيوني على وسعهن... صوت ابوي.. اي هو ابوي متاكدة... كمت ركض نزلت جوا شفته واكف اول مشافني عاينلي وابتسم بحزن..

ياااابة شگد مشتاقتلك.. ركضت وشمرت روحي بحضنه وابجي... وينك يابة وينك لو تدري شصار بيه من بعدك... وهو حاضني چن ممصدك شاف بنته الوحيدة..
شبگني ويبوس براسي : بوية انتي سنا.. رفعي راسج خلاشوفج مااصدگن انتي صدگية..
رفعت راسي وبسته من خده : اي انه سناء بابا..
عيونه دمعت ورجع شبگني..احلى لحظات حياتي لمن شفت الأمان رجعلي بكامل شخصيته..

گعدنا ع القنفة وخالو گاعد جدامنا..ابوي محاوطني من چتفي چنه كامش طير وخايف يطير منه.. ضلوا يحچون لحدما انفتح موضوع حامد..
خليل : ابو حامد ماادري شلون افاتحك بموضوع حامد.. بس السالفة طويلة ..
شامخ : ادري بي..ماتشوفني ليش اجيت..
عاينتله مصدومة وفاكة حلگي.. : تدري.. شوكت عرفت....

يتبــــــــــــــــــــع....................