رواية اسألي عني الليالي الفصل الخامس عشر 15 - بقلم رقية جاسم

قناة التليگرام

حساب الانستگرام

الـبـارت الـرابـع عـشـر................

بادلته ونزلت ..ضميت العلاگة بالجنطة وسويت مثل ما كال.. خالو مالاحظ علي..كمت اتجنبه وألف دعاء على لساني.. رائد خابرته بالليل طمنته عني دقايق وسديته..وره عشر ايام بلشت تروح الريحة من حلگي وايدي ..لأن الفترة الدخنت بيهه گصيرة.. والحمدلله ..بس نفسيتي مكسورة ع الصار..
وره هلعشر ايام جنت كاعدة بالغرفة يم بيبي صبيتلهه چاي وكعك..جان تندك الباب..

خليت شال وطلعت افتحهه..صارت بوجهي مرة ثلاثينية وياهه بنات ثنين بعمر العشر سنين..هدومهه مرتبة لابسة شال ومطلعة گذلة منه..
ابتسمتلهه بتساؤل : اهلا..منو..
- : عيني وين ابو سيف..
دنوة : طالع..منو اگله..
- : اي خوش..لا حبيبتي اني زوجته وهذني بناته.. هو گال روحي للبيت واني جاي بس مسافة الطريق..فعبالي اجه..
ضليت صافنة عليهه متفاجئة..ماادري اذا تچذب لو لا.. بس من ملامح البنات صابني الشك..ثواني جان تجي بيبي..
بيبي : منو ع الباب بيبي..
دنوة : ها..ماادري تعاي شوفيهه انتي..

اجت بيبي سلمت عليهه ودخلتهه جوه..انه واكفة مثل الصنم ماادري شكو..زين مرة خالو مريضة..وهاي مرته.. وهذني بناته.. وسيف.. شديصير .. متزوج..اي متزوج ماكو غيرهه.. ومن زمان همات..لأن هذني البنات كبار..ووحدة منهن تشبهه كلش.. سديت الباب وطبيت وراهم ..

كعدو بالهول وانه طبيت للمطبخ صبيتلهم عصير وقدمتلهم.. گعدت اشوف شصاير..
بيبي : اي انطاني علم عمار..بس خالة حتبقين هنا.. هي هذيج همين مرته وبيناتهم عشرة وسنين..
- : اي عمة ادري..بس هاي كم يوم بين ما يشوفلنا بيت نكعد بي..بعد اني اطلع..والله وداعتج لو عليه ابد مااسوي مشاكل.. بس بعد هي تبقى سوالف ضراير..واني اريد المأوى لبناتي.. كلشي يصير مو لو لا..
بيبي : اي والله صحيح..لا عاب حلگج..
طبطبت على ظهر البنات وأشرتلهم على بيبي : روحو بوسوا بيبيتكم..بعد نشوفهه دائما..
راحن عليهه بخجل بوسنهه وگعدن يمهه..

اندارتلي هي ومبتسمة : ماعرفتج..لايكون انتي بت اخت عمار..
دنوة : اي خالة..
- : ااممم..اي حچالي عنج كال وردة ..كملتي امتحاناتج..
ابتسمتلهه..حتى خالو يمدح بيه وابوي لا..هم حظي هذا.. : اي كملت صار اسبوع تقريبا..
- : يله يوم نجاحج..ياصف صرتي..
دنوة : سادس ادبي..
- : شدي حيلج عمري..
ابتسمت : اي ان شاء الله..

ضلينا كاعدين الى أن اندكت الباب..كمت فتحتهه.. صار خالو بوجهي ويمه جنط..
عمار : حبيبة خالو فوتي الجنطة الصغير اذا متصيرلج زحمة..
دنوة : اي هسه..
اخذ الجنطة الچبيرة وفات..مر من يمي .. گال : البنات هنا..
دنوة : اي اجني..
عمار : يله خوش..سرگي الباب عود..
دنوة : ماشي..
دخلتهه وسديت الباب..اجت البنية ام عشر سنين اخذتهه مني هو ومبتسمة وخجلانة..كعد خالو يمهه والبنات يمه يبوس بيهن .. الظاهر صار هواي مشايفهن.. ابتسمت عليهم .. دائما من تمرني هيج مواقف يصير ابوي جدام عيوني.. لحظاتي تقهرني من ناحية شنو ذنبي خاطر اتعامل بهشكل.. ومن ناحية تفرحني لأن مااحب الشر لأحد وخصوصا الاحبهم.. خالو حباب ومامأذيني فاكيد اريدله الزين..

بقوا كاعدين شواي بعدين اخذهن وصعد فوك.. بيبي راحت للغرفة وانه گمت وراهه..
نزعت الشال علگته واحاچيهه : بيبي شنو السالفة..
بيبي : هاي مرة خالج يمة..
دنوة : هاي شوكت متزوجهه..
بيبي : صار هواي..عشر سنين هيج..بهلحدود..
دنوة : چا مرته هذيج شنو..يعني هي مو مريضة..
بيبي : لا بيبي بعد عينج مريضتيش..مابيهه شي.. بس درت بي متزوج وطلعت..اليسمع يكول بعدهه مراهقة.. هو وليدي رجال واكيد يريدله الخلفة..خوما يضل يتحسر وبعده شاب شكو بيهه اذا جابتله خوان أو خوات يواسوه بكبرته ويصيرون عزوة لسيف..وهي ماكو جابت هلسيف وكعدت.. ماتخلف بعد.. الطبيبة گايلة عجيب شلون صار تلقيح وهي مبايضهه حجمهن صغير.. بس ربج وحكمته بعد ..

دنوة : بس خطية..يعني هي تبقى مرته وعاشت وياه.. صعبة عليهه تشوف رجلهه متزوج عليهه علمود الخلفة..وهو شلون نفسه تتقبل وحدة لخ..
بيبي : لعد ليش الشرع حلل اربعة..لأن الرجال عنده قابلية يتقبل اكثر من وحدة..بس احنا النسوان نختلف.. والحچي بيناتنا يبيبي..هيج احسللنا..نعيش الدنيا ويا شخص لحدما نروح لدار حقنا..اصلا ماادري هلزلم شلون تتحمل مسؤوليتين.. يله شعلينا ..برد الچاي..
دنوة : اي على گولتج..هسه اصبلج مرة اللخ..

اخذته للمطبخ..صبيتلهه غيره وجبتلهيا.. مشى اليوم عادي .. خالو متونس ويسولف وياهن..من كلامه عرفت ديدورلهم على بيت بين ما يلگالهم ويشيلون..بعدين تجي مرته الأولانية.. شلون دوخة.. صفنت على روحي ..بس لا يصير وياي هيج من وره عقيل..لا لا مستحيل يصير..رائد يحبني ويخطبني.. هو گال اسوي كلشي بس اخلي ابوج يقبل..وانه واثقة منه ثقة تامة..هواي شغلات انحرمت منهه شفتهه بس عنده.. وانه انسانة عاطفية الى درجة موطبيعية..بالعجل ألين واتسامح حتى وي عدوي..شحال لو بشر شهور اشوفه ورسمته ببالي كشخص مميز ماكو مثله..

وره يومين كاعدة بالهول جان يدك التلفون..اجت بيبي انطتنيا كالت ابوج..همزين تفطن يخابرني..
جاوبته : الو..هلو بابا..
محيي : هلو بيج..شلونج ..
دنوة : زينة وانت..
محيي : زين زين.. مرة خالج شوكت ترجع..
دنوة : مااعرف..هلأيام كال خالو..
محيي : بس ترجع خلبيبيتج تخابرني اجي اخذج..
تمشيت بعيد عن بيبي : بابا رجعني بأقرب وقت..
محيي : ليش..
دنوة : ضايجة وحدي ومشتاقة لبيتنا..هاي مرة خالو اللخ هنا وهو حيجيب مرته الاولى رأسا..بيبي صارت زينة..
زفر انفاسه بتململ : تحملي هلچم يوم واجي اخذج.. انه ماشايف بشر مايريد بغداد..دروحي هسه بعدين احاچيج..

ودعته وسديته..لازم يضوجني..هسه شطلبت انه..شحال لوما شغلك كله هنا ..هو مفكر بفعلته هاي يبعدني عن رائد.. لو يريد ينطيني لعقيل وانه بعيدة..هيج يفكر ادري بي.. بس الصارلي بهلفترة قربني لرائد اكثر..ياعقيل ياخبره.. وانه متأكدة من حبي وصفاءه من ناحيتي وحتى من ناحيته..

مامرن يومين تقريبا واجه خالو اخذ مرته وبناته..طلعت بيبي تحاچي..
بيبي : ها يوم وين..
عمار : لگيت بيت ايجار بغير منطقة..يعني مناسب والمنطقة زينة وحلوة..
بيبي : وام سيف شحيصير عليهه..
عمار : بين ما اكمل البيت وأثث وارجعهه..بس ترجع.. امهه ماقابلة تبقى بهلوضع..واني مامقصر شكو بعد..
بيبي : يله براحتك يمة..تبات يم بنياتك..
عمار : اي يمة..هاج لزمي.. مدلهه ايده بيهه فلوس ..خاف تحتاجين شي واني بعيد..انتي زينة هسه الحمدلله تكدرين تتمشين للسوك ودنوة وياج..مااطول ان شاء الله..

اجه باسهه وأكدلهه على چم شغلة وراح..طلعت وراه سديت الباب وطبيت..ضلينا كاعدين بالليل انه وبيبي على فلم عربي قديم..هي تسولفلي الأحداث كبل لا تصير..حرگته علي.. بس تونست وياهه..خلص وطفيته..كمت وياهه للغرفة فرشتلي وهي راحت مددت ونامت بالعجل..دواهه ينعس فتنام..

ضليت اعاين لتلفونهه..اريد احاچي رائد..مشتاقة لصوته.. من يوم العطلة ماصار بيناتنا اتصال.. اخذته من الكومدي ورحت للهول.. حفظت رقمه فبس كتبته ..اخابر.. اهو اي خلأخابر مشتاقتله وبعد وكت هسه بالدعش.. دكيت علي..دگ لحد اخر دگة وشاله..گلبي رجف وارتعشت من سمعته يگح..
همست : اسم الله..
: دناوي..
دنوة : اي..
رائد : شلونج ابوية..ماانتبهت ع الرقم..
دنوة : ماصار شي..اممم..الحمدلله وانت شلونك..
رائد : والله بهلدنيا..شعجب تفطنتي بيه..گلتي واحد يحبني متانيني اخابره..
خدي صخن من كلامه : ها..مو .. مو يعني ..
رائد : اي يعني شنو..
دنوة : يعني استحي..خاف عندك شغل لو شي..
رائد : هذيج الفترة اي مشغول صحيح..بس عادي.. انه بس اشوف الرقم اعوف كلشي واجيج..

ابتسمت وهمست : يله مرة اللخ..
رائد : اويلي الله..هذا حسج ليش هيج چنه جمر..
دنوة : شلون مافهمت..
رائد : مثل جمرة الجگارة..من تتورث تنسيني..حسچ ينسيني مثلهه..
دنوة : ليش انت شبيك..
رائد : شبيه.. مابيه الا الخير يروح روحي..سولفيلي اميرتي مشتاك لسوالفج..
دنوة : اا..رائد..يعني مشتاقتلك كومة..وهسه هيج صفنت ع التلفون كلت اخابره لو عيب..بعدين خابرت..خوما ضوجتك..
رائد : هههههه..يولي اغدي فدوه لهلحليگ ..لا ابوية ماضوجتيني بالعكس..لاتفكرين هشكل..حتلو الفجر خابرتيني ماعندي مشكلة..

يولي اريد اشوفج..شوكت ترجعين للبصرة..
دنوة : ماادري يعني يمكن أطول..ابوي ماانطاني وكت محدد..
رائد : يله سهلة..انه اجيج..
دنوة : عززه..شلون..
رائد : هسه انه نازل اجازتي..عگبة تلخص والتحق.. عود أمرلج اشوفج..
دنوة : شمدريني حتجي انت واطلعلك بله..

رائد : اي بله شلون..معضلة.. اگول لاتسودنيني .. انتظريني يم الباب واشوفج..
دنوة : مووو..مو اخاف..
رائد : انه همات اخاف عليج..خالج موجود..
دنوة : لا..يعني يتأخر يله يرجع هيج..
رائد : اي چا خوش بنيتي.. هسه عوفيهه لوكتهه انه ادبرهه.. انتي شلونج مرتاحة..
دنوة : اي زينة..
ضلينا نحچي ..شواي وصار صوت يعني الرصيد حيخلص.. ودعته وسديته منه فرحانة..اووف شكد حلو يحاچيني.. احسه ابوي.. شي چبير ..اكبر من مقام الحب.. انجذبله واحب تفاصيله..حتى حركة ايده من يدخن وعيونه شلون يقلصهه من الدخان.. ضليت اتخايل شكله لحدما غفيت..

ثاني يوم نظفت الهول وشلت الزولية..البيت كلش بارد خصوصا الهول فبيبي ماقبلت اشيلهه وي الباقيات.. مسحت مكانهه وعطرته..طلعت بالطرمة اغسلهه وبيبي كاعدة يمي تسولفلي على امي..مااذكرهه زين..لأن صغيرة وتوفت.. بس اذكر مواقف صغيرة..جدي يحبهه كلش..يگول شهلاء بتي مو چنتي..ماكو هيج چنة..جان يوصي ابوي بيهه ..
بيبي : بس تدرين يمة..
دنوة : شنو بيبي..

بيبي : محيي ماحب بنيتي..ولو هو الشاهد الله كتل روحه عليهه وكل يوم يودي ناس ويجيب علمود جدج الله يرحمه يقبل.. بعدين ربج رادهه تصير وصارت وراحت لبيت جدج.. هي صارت كبل لاتصير حامل بيج هملهه..متتشكى من عنده ابد.. بس اني أم بعد واعرف بزري شيحسون..اشوفهه تذبل يوم عن يوم.. من اسألهه شبيج يمة حبيبتي..تگلي الحمل متعبني مابيه شي.. لو تعبانة من الشغل.. متجيب طاري محيي.. لحدما فديوم هو جاي لشغله ببغداد وجايبهه.. جانت حامل بيج بالشهر الخامس..بالليل سمعتهه تخابره ع التلفون الأرضي وتبجي..تشكي منه وتعاتبه..ليهسه اتذكر گلتله بس تصير ولادتي شوفلي صرفة ورجعني لأهلي..هيج احسن الي والك..
دنوة : وانتي شسويتي لمن سمعتي هيج حچي..
بيبي : حاچيتهه..گتلهه التردي يصيرلج..بس لتتسرعين.. والطلاق هجمان بيوت وانتي حامل الله اعلم ولد بنية.. هي بيومهه حچتلي..كالت محيي هاملني والشغل كله شامره علي.. جان عمج قاسم متزوج ولواء وكاظم..كلهم.. كاظم عازل وحد بس مثل العايش وياهم..على گد النومة يروح لبيته.. كالت الواكف بعيني عمي..جدج يعني..هو يحبهه خطية خوش رجال..

بيوم زعلت واجت عدنا..محيي خابرهه گللهه اذا تردين اطلگج فاحلمي لأن طلاك مااطلك وانتي ترجعين وحدج..مااجي ارجعج شنو كلساع..جانت جايبتج صارلج بحدود الست شهور مو اكثر..جدج رجلي يعني كال بكيفهه هي منضغط عليهه.. اني من البداية ماردت انطيهه بس خوما نكعد نتحسر ونلوم فلان وعلان..عاد وره اسبوع جدج عرف بالسالفة وهو اجه خطية..هو وولد عمامه وعمامه ثنين اعتذرولنا..گال هي چنهه بنيتي وخاطرهه بروحي چبير..شتريد انه حاضر .. محيي ادزه يعتذرلكم وياخذهه وهو الممنون..چي هيج مرية حريمة ينذكرلهه الشين..هيج يحجي..
ابتسمت : اي صدك هشكل يحچي..

تنهدت ومسحت دمعتهه من طرف عينهه : الحب چذابي بيبي.. هاي عود قبل واحنا نكول حب اهل قبل ماكو منه وينبت بالروح..بس بكلشي اكو واحد شاذ ويختلف عن الباقين.. محيي مو اول واحد يبهت حبه ويصير شي مومهم.. بس بنتي الضلت تحبه لحدما راحت لدار حقهه..جانت تجيني بالحلم تگلي يوم اسألي على محيي شوفي شلونه.. متدري هو حتى مازار قبرهه بس بليلة دفنتهه وبالأربعين..

انه اسمعهه وابچي..بس درت وجهي مااريدهه تشوفني.. شكد گلبه قاسي حتى على امي..وانه سامعة اذا الأب يكره الأم يكره خلفتهه..والعكس صحيح..هو يكرهني چي يكرهه.. دائما يغلط عليهه ولو هي راحت بعد..بس مااعرف ليش.. معقولة چي كام مايحبهه هيج يفشر عليهه..مستحيل.. اكو شي ثاني.. بس بيبي ماگالته ومحد ديقبل يگوله..
مسحت دموعي وغسلت وجهي..انداريت عليهه بستهه ولفيت الزولية وگفتهه ع الحايط علمود ينزل الماي منهه.. عود أشوفلهه صرفة بعدين..

طبيت جوه سويت الغدة ومشى اليوم طبيعي..خالو خابرنا خاف محتاجين شي..گتله عدنا كلشي.. بالليل بيبي صاحت على ابن جواريهم اجه شر الزولية وراح..كلش ثگيلة عبالي أشر نصهه والنص الثاني أمده ع الكرسي بس ماكو..

ثاني يوم مر نفس الحالة..لحدما بالليل سبحت وكملت شغلي وكعدت اتابع مسلسلة ع التلفزيون..الحقيقة والسراب جنت اشوفهه.. بيبي اخذت دواهه وراحت تنام.. بين ما خلصت لگيت الماعون متروس گشور چي دااكرز..درته على فلم ونصيته.. كمت ذبيتهن ورجعت للهول جان يدگ التلفون مال بيبي ع الطبلات ليغاد.. صوته عالي جفلني..ركضت شلته بالعجل..
- : حبيبي فتحي الباب ولاتطلعين صوت..
دنوة : صخام..رائد..
رائد : شبيج بنيتي..تره جاي علمودج..حتى مامريت لبيت خالي.. يله اريد اروح للدوام..
دنوة : اخاف..خاف احد يشوفنا ويعرفون خالو هنا كلهم.. وين انت..
رائد : لاتخافين..محد اكو الشارع هندس..طلعي هسه تشوفيني وين..
جريت نفس بقلة حيلة : يله هسه بس البس شال..
رائد : يله حبيبي..

سديته ورحت للغرفة ايدي ترجف ورجليه ولا عبالك جنت اشوفه ويشوفني..لبست شال وتأكدت بيبي نايمة..ندهتهه ماجاوبتني يعني رايحة بسابع نومة..اخذت المفاتيح فتحت الباب وسديته وراي على كيفي..باب الحوش نقفله بقفل..فتحته وشمرته بالحديقة.. مديت راسي من الباب لگيته براس الفرع .. كاعد على دچة جوه شجرة وساند إدي على فخاذه والجگارة بحلگه .. جسمب كام يرجف..ابتسمت وألف احساس حسيته.. اي احبه واموت علي..مااتخيل يجي يوم اصير لغيره.. ابوي مامعاملني هيج..لگيته حنان وأمان..حب واحترام.. لگيت حب الأخ والأم والأب ..واخير شي الحبيب..

ماعرفت شلون اگله انه هنا..دقايق وگام طفى الجگارة ويتلفت يمنى ويسرى..كلت بس لا حيروح..نزلت الشال على ايدي ومشيت خطوتين عن الباب..جان داير وجهه ع الجهة اللخ ومن اندارلي ثبت نظراته..شفته دايجي بإتجاهي رأسا طبيت.. وكفت وره الباب انتظره..شواي واجه..رفعت راسي عاينتله وابتسمت.. بادلني بنظراته الحادة وفات..سديتهه ووكفت گباله..
همست : هسه اجي بس اشوف بيبي خاف گعدت..
رائد : براحتج ابوية..
عفته ورحت تفقدت بيبي..اوف الحمدلله ماحاسة اكو شي.. طلعت بالحديقة لگيته كاعد ع الصبة.. وكفت وراه.. حس علي واندارلي..
دنوة : ليش كاعد هنا..اكعد ع الكرسي..

رائد : لا مايحتاج..تعاي كعدي..
كعدت جدامه بالحديقة وهو كاعد ع الصبة..
ابتسم : شلونج يبعدي..
دنوة : زينة يعني..وانت..
رائد : بخير من شفت هلطول..مشتاگلج..
عاينت بعيونه بخجل : اي انه هماتين..وهواي ..
ضحك بصوت ناصي : شلون ملاك كاعد جدامي هسه.. ادور مخلي من العطر الجبتلهيا..
دنوة : شنو شنو..شمدريك..
رائد : غير انه جبته..
ابتسمت وعيوني على تفاصيل وجهه..احس اكلته بنظراتي شكد عيب بس ماكدرت امنع روحي : اا..اي صحيح.. شكرا..
رائد : العفو غاليتي..هسه يجي يوم اجيج براحتي.. لا انتي تخافين ولا انه اخاف عليج..
گتله چن واحد مستعجل : شوكت..
رائد : هسه بس ارجعي بخير وسلامة..وانه اعرف شسوي..

ضلينا نحچي حتى ماانتبهت ع الوكت..وره مااعرف شكد حچيت مرعوبة : رائددد بيش الساعة..
مد ايده جدامه يقره الساعة : ماصار هواي من اجيت لاتخترعين.. ١٢ الا عشرة..
دنوة : شوكت اجت انت..
رائد : دعش وثلث..
دنوة : ها..اي يعني..

رائد : ماتگومين تجيبلي مي يرحم امج ريجي ناشف.. ناسي اشرب مي من الصبح ليهسه..
دنوة : يااا..اسفة حقك علي المفروض اجيب..
ابتسم ومد ايده على جيبه الوراني طلع الباكيت يدخن.. ورثهه وعاينلي : كلشي منج مقبول..
ابتسمت وخزرته : لاتخجلني..
ضحك ودنج عيونه ع الحشيش والجگارة بحلگه.. عفته وطبيت هم شفت بيبي واخذتله مي..انطيتهيا انه واسولف ماحسيت غير بإيده كمشت اصابيعي..دافية ورجولية..ارتعد گلبي وانفاسي ثگلت..

هو رأسا اخذ الگلاص ..ضليت واكفة اشوفه.. شبيه صافنة علي حتى من يشرب مي..شواربه محددة تسحر..
فزيت لمن گال : كمشي دناوي..مشكورة..
دنوة : العفو..
طبيت خضيته ورجعت لگيته واكف دينكت بهدومه..رحت يمه : حتروح..
رائد : اي حبيبي..هاهيه تأخرت..
هو ديحجي وياي جان يدك تلفونه..وكفت وراه شفت مكتوب امي.. شاله يحاچيهه..

رائد : هلا بيج يمة..اي مو كتلج وصلت..يله ابوي انتي ماكو فرق.. لا مو بالمقر..طالع بشغلة.. حجية يمكن صارتلي جلطة شبابية..
شهگت وخليت ايدي على حلگي بالعجل..خفت تسمعني..
رائد : اي شو گلبي يدك سريع..لا مايحتاج ادوية.. هو الدكتور گال اذا تشبگ دنوة تصير زين..اي شبيج چا غير من وراهه انجلطت..

اندارلي وغمزلي هو ومبتسم.. فتح حاكية ونزل ايده قريب علي وهو هم تقرب مني..
ام رائد : يمة شدتحجي..ولك خاف مريض ودتهذي..
حط ايده على گلبه ويحچي بصوت ناصي : يمة گلبي يوجعني من الحب..
ام رائد : اسم الله على گلبك حبوبي شمالك ماتگلي رجفت گلبي عليك..
رائد : هاي بت حماچ حتى ماتكلي احبك ترضيهه..
ام رائد : ولك انت بيا حال..دعوفهه هسه.. اخابر خالك ياخذك للمستشفى..
رائد : صبري يمة..

خله ايده ع السماعة وتقرب مني.. : تگليلي احبك لو..
دنوة : عزززه رائد شدتحجي عفية خوفتني شبيك..لو شنو..
رائد : مو كتلج يمكن صارتلي جلطة..گليلي احبك واصير رب الزين..
اسمع امه تحاچي وهو يعاين بعيوني ومبتسم بطرف شفافه..
همست : احبك..
رائد : مرة اللخ..
دنوة : احبك والله..يله خطية خالة ضل بالهه..

ضحك وجلى صوته : ها يمة..
ام رائد : انت ماتحجي وياي..هسه اخلي حامد يحاچيك..
رائد : لا يمة ماگلنا هيج..هسه قابل صغيرون انه..لاتخافين مابيه شي اشاقيج..
ام رائد : عابت لهيج شقة..يمة احجي الصدك لاتخوفني ..
رائد : مابيه شي يمة..شنو اچذب عليج قابل..
ام رائد : يله چا خلاروح انام خرعتني عليك..
رائد : هههههه..يله مع السلامة..

سده وضمه بجيبه..عاينلي وابتسم بخباثة..
رائد : هاي الا اسويلج افلام يله تحچين..
خزرته وابتسمت : لا بس استحي..
رائد : اويلي اميرتي حتسويلي جلطة بمستحاهه.. تعاي اروح بعد..سدي الباب وراي بنيتي..
دنوة : ها يله ماشي..
رحت وراه للباب..ودعته واراقبه شلون يمشي لحدما لاف للفرع الثاني وراح..الابتسامة شاگة حلگي.. ياربي حموت من الفرح شكد احبه..سديت الباب وقفلتهه..لكيت گطف جگارته بالگع.. شلته ذبيته وطبيت غسلت ..طفيت التلفزيون ورحت نمت..

نمت نومة طويلة ومرتاحة كلش..ومنهه حلمت حلم حلو.. ماردت اكعد..بس بيبي كعدتني هي وتفتح البردة.. فات الضوة بعيني رأسا..
بيبي : ولج دگومي..صار ساعة اگعد بيج..
جاوبتهه بملل : بيش الساعة بيبي..
بيبي : بالوحدة عيون بيبي..حتى الصبح خلص الواحد شيگلج.. صباح الخير يمة..
ضحكت وجريت الغطى لچتافي..الغرفة باردة..خليت ايدي على خدي وشعري نازل عليهه وانه متمددة بعدني ماگايمة.. تذكرت البارحة..ماكدرت اسكت.. : بيبي..
بيبي : ها عيني..
دنوة : بيبي اريد واحد مثل رائد يتزوجني..هم هيج حلو وشخصيته قوية ونعيش قصة حب ونتحمل.. انتي تشوفي حلو بله..

بيبي : يااا..شجاريلج حبيبتي شذكرج بالرجال..
دنوة : لا مو هو..دااگول مثله..
بيبي : اي خوش رجال والله وحليو..علواه ياخذج واحد مثله..
ابتسمت وغطيت وجهي من شفايفي وجوه بالغطى : بيبي حموت من الفرح..كمشي گلبي ديدك سريع..
بيبي : تخبلت البنية..ولج كومي يله..
دنوة : اي بيبي دصبري شبيج وياي هسه اگوم..

طلعت مني تتمشى للمطبخ.. غمضت عيوني وهمست بيني وبين روحي : فضلك ع الحِسن انت آخر العنگود.. وبستان الورد لولاك ماورّد..

ذبيت الغطى وگمت غسلت ورحت وي بيبي..خلص اليوم وتلث ايام وراه..لحدما العصر اندكت الباب طلعت افتحهه.. صار خالو بوجهي ووجهه تعبان خطية..هو فات وفاتت وياه مرته الاولانية..سلمت من وره خشمهه وراحت..طبيت كعدت وياهم.. كال أثثت البيت وكملت كلشي.. انه بنفس اليوم خابرت ابوي.. اريد ارجع طگت روحي..كال باجر اجيج الصبح من وكت.. بالليل حضرت هدومي وكعدت وي بيبي كعدة اخيرة.. نمت من وكت..

الصبح كعدتني..بين ما بدلت جان يجي ابوي..خالو كاعد ديروح لشغله فهو استقبله.. كملت وودعتهم..بيبي بچت علي..
مسحت دموعهه وحاچيتهه : اجيج ببداية الدوام ماعايفتج..
بيبي : تعودت عليج حبيبتي..عود خابريني دائما.. تروحلج فدوة بيبي..
دنوة : يمة يمة فدوه لبيبي اروح..
بستهه وبست خالو..اخذني ابوي وطلعنا..مرينا من المدرسة.. روحي انقبضت..مااريد ارجعلهه بيوم..كلهه تلعب روحي منهه كلش..شوي ابتعدنا ارتاحيت..

بالطريق حاچاني..
محيي : استلمتي شهادتج..
دنوة : لا نسيتهه..بس ناجحة اكيد..شوفلياهه انت..
محيي : من يصيرلي مجال عود..
دنوة : على راحتك.. جدة شلونهه..
محيي : زينة تسأل عليج..
دنوة : ااممم..تسأل عنهه العافية..مشتاقتلهم كلهم..
عاينلي وخزرني..جاوبني من وره خشمه : هم هماتين..

شعجب ماصاح بيه..يله هسه اكعد اتبطر قابل.. ضلينا بالطريق لحدما وصلنا..نزلت واخذت جنطتي وياي.. بس دگيت الباب فتحلياهه عصام..ابتسملي وسلم علي..اخذ الجنطة فوتهه جوه وطبيت الوراه..اخذت نفس طويل رجعت بي ذكرياتي.. نزعت الحذاء وفتت لگيتهم كاعدين بالصالة البنص البيت..سرور ونوارة محد يدري بيه حرجع لأن تفاجئوا لمن شافوني.. سرور ركضت بإتجاهي..حضنتهه وبچيت على چتفهه.. : اشتاقيتلج بكد الدنيا..
سرور : عمررري انه هماتين وداعة عيونج..
حضنتهم كلهم وبوستهم..صار كومة ماشايفتهم.. كعدت وياهم تقريب الساعة ضحك وسوالف..بعدين نعست ورحت للغرفة لگيتهه ممسوحة وبيهه ريحة معطر مال مسح..اكيد خالة.. شكد حبابة وماتنساني..

بدلت ونمت رأسا..تعبت من الطريق.. كعدت المغرب على صوت سرور ونوارة يمي..
نوارة : عيني دگومي خنشوفج..طاير النوم قابل..
سرور : اي صدك تعاي سولفيلنا شكو ماكو..المن شفتي شسويتي..
هي كالت هيج وحضرتني مواقف المدرسة..هي راحت بس بعده صدري يغص لمن اتذكرهن.. ذبيت الغطى وكمت غسلت ورجعت سولفتلهن ع الصار من يوم الرحت لحد اخر امتحان.. شلون شفت رائد وساعدني واشترالي شغلات علمود تروح الريحة..
سرور تسمعني ومبتسمة على مواقف رائد.. خلت ايدهه على ركبة رجلي ودفعتني ع الخفيف : لج عيني هذا زلمة..واحد غيره مايصدكج اصلا..

دنوة : ليش يمة مايصدكني..شعندي قابل..
سرور : هم هيج هذول الولد..بس رائد صدك حباب خطية ويحبج هماتين..
عاينتلهن وابتسمت : انه هماتين احبه..واموت علي.. ياربي ولج كل ما اخلي من العطر الجابليا اهجسه يمي يقرالي القصيدة مال عريان..احبه..
نوارة : ههههههه..ولج الحب خلى عيونه تطلع..كعدي وسكتي لايسمعج ابوج..اليوم هنا هو..
دنوة : يله اوي سكتنا..گليلي منو حيجي..
سرور : كلهم موجودين قابل شنو..بس عقيل حيجي بالليل ابوج عازمه..
لساني انعگد وگلبي دك سريع : ابوي..ليش شعنده..يريد يخطبني مو..احجي الصدك..

سرور : والله مامسمعت هيج حچي..بس ادري بي حيجي.. ليش مااعرف..هسه لمن يجي نشوف شكو..
دنوة : عفية هذا شعنده وياي..مو متزوج..شكد اكرهه..
نوارة : الحچي بيناتنا..انه همات اكرهه..خية ماينجرع عوع..
ضحكت وكمت وياهن للمطبخ سوينا العجين علمود الخبز.. انه اعجنه زين فعايفي علي..كملته وغطيته..بين ما اختمر جهزنا التنور..شكد مفتقدة هلأجواء..بصعوبتهه بس احلى من بيت بيبي كلش هدوء ونفس الحدث ينعاد يومية..

اخذت الجدر ورحت وره البيت اشنگه..
الحجية غادة : ولچن يولن اخذن منهه خلتجي بسدي مشتاگة لسواليفهه حبوبتي..
موعت صوتي متقصدة : اووي بيبي انزوول خجلتيني..
الكل ضحك..
الحجية غادة : ادور تگلي انزوول..تبغددت البت اعلينا..
دنوة : لا حبي بصراوية معربة الجدين لاتخافين..بعدين شبيج تره اهل بغداد حبابين..
الحجية غادة : اي مو جدج يحچي بيهم..يله كمشوا بدالهه خطية همات جاية من سفر وهم تخبز..
ورود : اي بيبي اي..دافعيلهه بعد..
الحجية غادة : چا ليش ماادافعلهه..بنيتي السميرة هاي..
ابتسمت ونفضت ايدي..بستهه وجريت البلوكة كعدت يمهه ونسولف بين ما خلصوا وطبينا..

بلشنا نحضر بالعشه..اجو الولد ..محد مفتقدني بس سالم.. اول ما دخل سمعت صوته..
سالم : هاي اجت السميرة..وينهه..
ضحكت وعدلت الشال..اجه وكف بباب المطبخ..رحت يمه سلمت علي..
دنوة : بله ليش تصيحلي سميرة..استغفرالله..عبالك بس انه سمرة..
سالم : اي بس انتي سمرة بوية شني دشوفي البنات..
دنوة : دتقلل من مقامي مو...وسفة بس..
سالم : لا لج مااقصد هاي شبيج..بالعكس دااميزج.. وبمناسبة التميز..شفت زنود الست وتذكرتج..
دنوة : جبتلييي..
سالم : اي..چا اشوفهه جدامي واعوفهه..
شال العلاگة انطانياهه..ابتسمت وتشكرت منه.. ابتسملي وراح يغسل ويبدل..

بين ما كملنا اجو بيت عمي كاظم ..مريت من باب الكليدور اكو شبابيچ يمه كلش هواي على عرض البيت..فتحت البردة على كيف لكيتهم واكفين كلهم بالطرمة..جدي وعمامي وابوي.. ولد عمامي وعقيل ..گلبي انقبض من شفته.. شكد مااحبه.. بعد سلام وكلام فاتوا واندكت الباب..فتحتهه بالعجل صار ام عقيل وحنين اخته بوجهي..سلمت عليهم ودخلوا جوه.. صبينا للزلم وحد واحنا كعدنا بالاستقبال..مشى الوكت ابطئ من البطؤ.. خايفة يفتحون موضوع عقيل واتصخم..

وره العشه كمت وي البنات اشيل الاكل..احس ام عقيل تتفرج علي بس سويت روحي مو يمهه..اخر شي دنجت بالعجل اشيل المواعين من الگع جان تحچي..
ام عقيل : يولي حنين ماتصيرين مثل دنوة..شوفيهه شون حتى بحركتهه خفيفة..
حنين : يمة انتي شوكت مدحتيني..ديله بله..

عفتهم يحجون ورحت للمطبخ راسي صار حار..دااخلي المواعين بالسنك وشطحت من ايدي..
عاط بيه ابوي : وجع ماتشوفين..
عاينتله متفاجئة..هاي شجابه.. : اسفة ماانتبهت..
محيي : هو انتي شوكت تنتبهين..
دنوة : بابا عقيل ليش اجه..
اندارلي بخزرة هو وديغسل : شعليج..
خفت منه : لا بس دااسأل..

عافني وراح..مااعتقد صار شي هسه..ضليت اغسل مواعين واكول ماصار شي..لحدما كملت وصبيت چايات.. حنين جانت كاعدة يمي..اجه عامر ..
عامر : ها كملن الچايات..
دنوة : اي ..هياتهن..
عاينلي بطرف عينه واخذهن وراح..شبي هذا ادور.. استغفرالله شكد يضوجون..اخذت النا ورحت للاستقبال قدمتلهم..
ام عقيل اخذته وحچت هي وتخوطه : هسه فديوم تسويلنا چاي العروس من ايدج..
ابتسمت وگلبي عصرني..شدتحچي هاي..تخبلت وتريد تخبلني وياهه.. حتى مااشتهيت اشرب..خليت الصينية ع الطبلة وكعدت بنهاية الاستقبال يم سرور لبدت..

همست : سرور عفية شديحچون هذول بطني كامت توجعني..
سرور : والله ماادري خية..هسه نفتهم..بس جايين على سالفة عقيل ماكو غيرهه..لأن حتى عمي كاظم جاي..
دنوة : اووف شلون هسه ياربي..الا انه..خرب حظي..

ضليت كاعدة بس على اعصابي..وكل ما يفتحون موضوع اريده يكون الاخير خاطر يرحون ونخلص..اخر شي خابت ظنوني من حچت ام عقيل..
ام عقيل : عمة احنا اهل مابيناتنا رسميات..بس ولو يعني خوما نسويهه مو حلوة..
الحجية غادة : اي يبعد عمتج قابل شكو..بس شني السالفة..
ام عقيل : والله اريد اخطب دنوة لوليدي عقيل..تدرين مريته ماتخلف وحتخش بالتلاثين بعد مابيهه حيل.. دنوة كبرت وانه عاجبتني..ماكو غيرهه ترهم لعقيل..حبابة ولهلوبة وهم منهه بعدهه بحيلهه..تدرين بس عقيل عندي واريد اشوف وليداته..
خالة ابتسام توترت وجاوبتهه چن تريد تغير الموضوع : بس عقيل متزوج عيني ام غدير..ماتنوخذله بنية بت بيت مامدخول عليهه..لو وحدة چبيرة لو مطلگة شكو بيهه.. دشوفي هو جان حاضر بزواجة امهه..
ام عقيل : اي وشكو بيهه حبيبة..ليش هو عقيل يتعاب..
ابتسام : لا ماگلت هشكل..بس مااهجسهه ترهم..

اندارت على جديتي : انتي شتكولين عمة..
الحجية غادة : على راحتكم..بس شوفن ابتسام..هي ربتهه وإلهه حگ عليهه..وانه برايي عمة مايصير نكسر البت بزلمة متزوج صارله ست سنين..
ام عقيل : عمة اشوفج تنقصين من مقامي ليش.. اجينا من الباب مارايدين شي..
ابتسام : حشاج مامقللين منج..القرار الاول والاخير يرجع لأبوهه..احنا مجرد ننطي راينا والباقي عليهم..
ام عقيل : مامنكم گصور خية..ان شاء الله واصلة ونشوف الزلم شتگول ..

عاينت عليهه وعيوني غرغرت..شدتحچي هاي..گلبي كام يوجعني.. مستحيل والله تخبلت اكيد.. ضليت كاعدة وابچي مارفعت راسي..اريدهم بس يرحون..لطشوا..اخر شي ماتحملت حسيت حگوم اشهك وافضح روحي.. طلعت بالعجل للمطبخ غسلت وجهي..فزيت على ايد تخلت على چتفي.. انداريت شفتهه سرور..اخذت نفس براحة..
سرور : فضحتي روحج..اكو واحد هيج يطلع..
دنوة : شلون يعني عفية..سرور مدااصدك..ابوي وافق هسه.. وماحيهتم لرأيي وانه شريد..
سرور : دصبري ياعيني..ساعة على ساعة فرج..وامي هسه تحاچي بلكت تقنعه..هسه رجعي للاستقبال عيب مايصير.. ادور يگولون عدهه شي وماتريد عقيل..
دنوة : اي مااريده شنو گوة..حتلو مااحب رائد مااقبل بعقيل.. لعبت روحي..طبهم مرض..
نترت بيه : دنوة لاتحچين هيج لج لايسمعونا..تدرين ماكو بنية تاخذ التحبه اذا واحد عرف بيهم..كعدي واسكتي..

ضليت احاچيهه لحدما طلعوا ومارحت سلمت..ماادري وين جان عقلي من فكرت هيج وعادنت وانه ابد مو عنودية ولا يم العناد خلاص..مافكرت ابوي اليحاسبني ع الصغيرة كبل الچبيرة اذا عرف شحيسويلي..طبيت للاستقبال ارتب الكوشات بعد ما تأكدت الكل طلع..دقايق وسمعت صوت ابوي يرعد يم الباب..تشاهدت على روحي بداخلي.. رأسا طفيت الضوة وطلعت..دااريد افوت للمطبخ جان يكمشني من معصم ايدي ضربني راشدي فر وجهي..بچيت بدون صوت.. اخذني للغرفة وشمرني هو ويغلط ويعيط..هسه انه شمسوية..

جرني من إذني ومقرب وجهه بوجهي : سمعت عايفة النسوان وگايمة..ليش بت الگح...
بچيت بصوت وعطت : لاتفشر على امي مو حرام..

هو انه گتله هيج جان يدروش..هلكد ما ضربني راشديات ماكمت افرزن اذا ع اليمنى لو اليسرى..بس ابچي وادفع بإيده.. اخر شي اجه جدي سحبه من ظهره..
شامخ : انعل شرفك اذا عندك شرف..هلكت البت.. خاطرمن .. خاطر عقيل..مااقبل تنطيهه لواحد متزوج.. حفيدتي وبحسبة بنيتي..انت ماسألت عليهه وداريتهه كثري..
محيي : لا اشو انطيهه وانعل سلفة سلفاتهه..ماعندي بنات يبقن هلكثر..هاي لخاطرك انه دخلتهه مدرسة..
شامخ : احنا مو همج..ندخل بنياتنا مدارس وغصبا على اكبر راس..دنطيهه..الا اگلب الديرة على راسك..
محيي : ابوي وعلى راسي..بس تعذرني اسوي الأريده يعني اسوي..تزوج عقيل وتولي غير هلحچي ماعندي لو تنطبك السما ع الگع..

اعاين لعمامي كلهم ساكتين..يرضون ينطون بتهم لواحد متزوج.. عاد ياريت بالجديد.. صارله سنين..بس افكر بالموضوع تلعب روحي..اصير بحضن رجال حيسوي وياي نفس السواه وي الأولانية.. كمت ابچي وارجف ..اجت خالة ابتسام شبگتني وباستني من راسي هي وتهديني..
ابوي اندار شافني..صاح بيه : اششش لج اذا هجست حسج يمي أشلع إذاناتج..هاهيه انه انطيته كلمة مااتراجع بيهه خاطر هلچم حچاية اسمعهه منا ومنا..

هو وديحچي اجت جديتي..هي گوية وبحيلهه.. لمن سمعت كلامه تخبلت..
الحجية غادة : ها يمسودن تريد تبلي البت بواحد مثل عقيل.. شمالك يمة مو خطية تكسر رگيبتهه بهيج زواجة..

محيي : اكسر راسهه وانعل ابوهه لابو اليطلع وراهه من سابع ظهر.. يمة لاتدخلين..لا انتي ولا ابوي..بنتي هاي تعرفين شني يعني..انه أبوهه مو احسن مني انتم..انطيتهه وخلص.. بس خلتخلص السنة هاي وتصير زواجتهه..
لواء : حجية هاهيه اتركوه..هو ابوهه واكثر واحد إله حگ عليهه.. عقيل اول وتالي ابن عمهه وأولى بيهه من الغريب..
شامخ : يول شو ماتعرف تسولف..چا رائد ابن الغريب.. اجه خطبهه والزلمة ماتعيبه العيبة..لامتزوج ولاعنده مكسورات..
محيي : لاااااع..الا هذا الگوا...ماانطيهه اله..ابن حامد المخبل تريده يناسبني..لا چا طاحت العگل فد دور..
هو وديحچي جان يصيح نفسي ضاق..طاح بالگع.. كمت ابجي بالزايد..رحت بالعجل يمه ..جدي ذب على وجهه مي حدود الربع ساعة بلش يصحصح بس يكول دايخ.. قاسوله الضغط طلع هابط..

عمي فيصل اندارلي خزرني : ابوج حيموت من وراج..
دنوة : عمو...
قاطعني : افهمي انتي مو صغيرة..هو يريد مصلحتج.. اقبلي واسكتي..

عاينت علي ودنجت..انهضمت من الموقف..لو هو يقبل ينطي بنته لعقيل..ليش مو عمي قاسم..لو لواء..ثنينهم عدهم بنات واكبر مني..لو هو نفسه عمي فيصل همات عنده ثنين.. بس شافوا ابوي طايحلي دگ حتى جدامهم استصغروني.. مااعرف شگول بس الله يسامحك يابة..

بهللحظات الكل سكت ماجبنا طاري موضوع عقيل.. جدي گال بين ما تتحسن صحته ويصحصح نشوف شنسوي.. ضليت كاعدة وياهم بالصالة لابدة يم خالة..بس هي تكدر تخفف عني.. الولد كاعدين من الجهة اللخ وحايرين بأبوي.. چا انه محد يحير بيه..شبيه مو بشر..حسيت بهضيمة اكلتني.. بس بلعتهه وسكتت..اريد رائد يجي يشوف شديصير..

مشى الوكت لحد الـ١٢ كلمن راح لغرفته..عفتهم وطبيت للحمام غسلت وجهي بمي بارد..اهجس نار گابة بي وبكل جسمي.. كملت وطلعت..طبيت للغرفة انقبضت روحي مااعرف ليش.. عفتهه وصعدت فوك يم البنات ماطول اكو كهرباء يعني المكيف مشتغل.. فتحتهه وطبيت..ماحجيت شي ولا هن حچن.. بس نظراتهن تحچي هواي..فرشت الي ودرت وجهي.. بچيت بيني وبين روحي الى أن تعبت وغفيت..

كعدت الصبح مالگيت البنات..عاينت ع الساعة..بالدعش ونص.. شعجب عايفيني ليهسه..بس گمت اذني عبالك صارت بيهه وشة ..چن نملة تمشي بيهه..خفت بعدين گلت لا عادي تصير يمكن چي نايمة صارلي هواي.. لميت الفراش ورحت للحمام الفوگ غسلت ونزلت..ع الدرج صادفتني خالة ابتسام.. صبحت علي..جاوبتهه..
دنوة : شعجب ماگعدتوني..
ابتسام : جدج ماقبل..كال عوفوهه..هسه اجيت اشوفج لأن طلب يشوفج..نزلي شوفي..
دنوة : يله رايحة..

عفتهه ونزلت..فتت للديوانية محد اكو..بس مرتبة ومعطرة.. يمكن حيجون خطار..عفتهه ورحت للاستقبال لگيته كاعد ع المصلاية يسبح..رحت كعدت يمه انتظره يخلص..دقايق ودخل ابوي..تضايقت من وجوده لأن اعرف شحيگلي.. درت وجهي عاينتله..وجهه مصوفر وكامش بيده گلاص مي وحباية.. كعد ع الكرسي بسد جدي..
خلص واندارلي..باسني من راسي : هلا ببنيتي.. شونج حبيبة جدو..
بعدني مامجاوبته سبقني ابوي : والله يابة ماكو غيرك الطلع عينهه..ختولي..

شامخ : لاتدخل انت..اليعجبني احاچيهه بي.. اي بنتي.. شوفي ابوج شون تعبان..بالليل اخذناه للمستوصف..

عاينت علي متفاجئة : صدك..ليش شبيك بابا..
شامخ : اختنك ماگدر يتنفس..بتلاثة رجعنا..انه خبرت البنات مايگعدنج.. بوية مصيرج لعقيل..
جاوبته بإندفاع : لا جدو ابوس ايدك لاتسوي هيج.. شلون عفية مو حرام..
محيي : لا موحرام..ابن عمج شكو بيهه..
شامخ : خلصي هلسنة وتصير خطوبتكم..هسه بس حچينا بيكم.. هو قبل تخلصين ماعنده مشكلة..
دنوة : وانه جدو..انه عندي مشكلة.. زوجوني بكيفكم بس لعقيل لا..اخاف منه..
مااحس غير ابوي كام من مكانه كمشني من قراصتي.. جر شعري وعاط بيه : بكيفنا نزوج النسوان..وانتي مرة هسه مو زعطوطة..ازوجج واكسر راسج..تقبلين ماتقبلين مايهمني.. ماامشي بشورچ..

جدي جر ايده من شعري : لاطگهه جدامي..هاهيه اقبلي هو ابوج سوه كلشي..انه ابقى جدج..مالي سلطة بكثر سلطته عليج..ويبعد جدج تره الرجال شاغول ومتمكن..شني اليضر.. ولو متزوج..چثير هيج..بالعكس حيدللج اكثر..

عاينتله بقرف ودموعي تصب..عبالك سلعة وديرغب العالم بيه.. اكثر من هيج مواجهة ومحاصرة ماكو..ادري بروحي شخصيتي ضعيفة..بسبب ابوي والسواه وياي من صغري لحد هللحظة والبعده يسوي.. سكتت ماگلت شي ..من الكلام المحزن كله لفتتني كلمة جدي لمن گال يقبل تكملين السنة.. بلكت يغير رأيه بيه..لو رائد يعرف ويسوي شي..اكيد اذا عرف حيتخبل ويسوي كلشي..هو يحبني..ويمكن اكثر مما احبه انه..

ترخصت منهم وطلعت..رتبت غرفتي ورحت بالمطبخ وياهم.. اول ما طبيت استلمتني خال فاطمة..
فاطمة : عيني اشو گاطة الشغل كليته علينا..ماتجين تسويلج شغلة..ديله قابل اول وحدة آخر وحدة تزوج..لو عندج واوي..
ابتسام : فاطمة لاتحاچيهه هشكل..شمسويتلج.. عيب دتتهميهه وهي ماعدهه شي ادري بيهه..
دنوة : اي ماعندي شي..اذا ع التنظيف والشغل هسه انظف لاتمدين ايدج..
عاينتلي بطرف عينهه وشمرت الماعون بالسنك.. : يله كملي تعبت انه..
ابتسام : ماتشغلين بتج ورود..مو بنية حالهه حال بنياتي..
فاطمة : ورود عليهه العادة وتعبانة عيوني..ماتكدر تشتغل.. شوي قدروا المقابل..
الحجية غادة : هاااه..ولج شوكت ما نسألج تكولين هشكل.. اليسمع يكول نفسة ..مو چنا نهورف مانكول صخامة وعادة..

ضلوا يحچون..عفتهم والتهيت بالطبخ والغسل.. شواي واجن نسوان ولد عم جدي..هن وبناتهن..الولد راحو للديوان.. صارت هوسة دخت اهجس الگع تفتر بيه..انتچيت ع الحايط واطبخ.. إذني بعدهه الطنطنة بيهه..دخت اريد تروح مدااركز.. هن ملتهيات سوالف وكل وحدة تسويلهه شغلة وانه كارصة بالمطبخ الحار يعني مال طبخ ..طفيت النار وسندت ايدي ع الحايط.. تمشيت للمطبخ الچبير ..خالة ابتسام انتبهتلي واجت علي بالعجل..عاينتلي بخوف..
ابتسام : شبيج ماماتي ..
دنوة : خالة ماادري شبيه دخت عفية كمشيني مااكدر اوكف..
صاحت على وحدة من البنات اسمهه نضال..مشتني لغرفة جديتي چي باردة..
مددتني وگالت هي وتقيس حرارتي : شني اليوجعج حبيبة..
دنوة : إذاني احس بيهه نملة..

ضلت تعاينلي مستغربة..اي هيج دااحس وماكو غير هلتعبير اكدر أعبر بي.. عافتني وراحت..هو انه تمددت وزادت الطنة.. كمت ابچي ومخلية ايدي على إذاني..شواي واجت خالة وجدة انطتني كبسول ومي دافي..
الحجية غادة : شبيج جدة..خاف سبحانة ومتسبردة..
دنوة : لالا..ماسبحت..ماادري شبيه جدة..
اجت كعدت يم راسي شبگتني وتمسح دموعي..

خلص اليوم وماخليت شي بحلگي..مااستسيغ الأكل لعبانة روحي منه..سمعي ثگل عبالك مااسمع زين..ادور هذول لطشوا لليل يله راحوا..ابوي مايدري شبيه حتى جدي..بقوا بالديوانية محد طلع..بس بوكت الصلاة وهماتين يتوضون بالمغاسل البرانية..

بالليل تمشيت لغرفتي واهجس روحي تميل يمين ويسار.. چن ماواكفة بالگع اصلا..بس دخلت وره شوي اجه ابوي.. متت خوف منه بس الوجع البيه نساني..
وگف بالباب يحاچيني : شبيج ادور..كلساع متمرضة.. لعبتي روحي شني سالفتج..
سكتت ماجاوبته..
كام يستغفر ويتأفأف : وين اوديج..جمعة باجر محد مفتح..
جاوبته بصوت مكسور : ماادري..
تقرب مني وگز اسنانه بوجهي : خاف مسوية روحج مريضة خاطر اگلج على راحتج ..لا انسي..
كمت ابچي بصوت ناصي : لا مو هيج..ليش ماتصدكني..

خله ايده على رگبتي وگصتي..عكد حاجبه وراح.. اجت خالة ابتسام تستغفر وتعاين للمكان الچان واكف بي.. مددتني وتسويلي كمادات..
كمشت ايدهه : خالة روحي خاف عندج شغل..
ابتسام : لا حبيبتي البنيات ديسون عشة..والولد طالعين محد اكو بس عمامج واحنا..
همهمت بدون جواب..ضلت تسويلي بس چن مامسوية.. حرارتي فولت والطنين بإذاني يزيد..شلت هم شلون حنام.. هو انه انتظر الليل خاطر انام وانسى.. نص ساعة واجه ابوي بيده علاگة بيهه ادوية..انطتني من الشراب وكبسولين.. اشو دوخني بالزايد..كمت اشوف الواحد اربعة..ماادري شلون غفيت..

مر اليوم واليوم الوراه والوجع بعده..اكعد بالليل افحط بچي.. كلش يوجع..حتى نسيت شصارلي هلفترة..اريد بس يروح الوجع.. من غير الحرارة العالية..حتى مااشتهي اكل..كلشي ماريد .. اريد بس انام وارتاح بالنومة..بحدود الخمس ايام مانايمة بس عشر ساعات..ابوي اخذني لدكتور وراچيتة شطولهه كلشي مافاد.. الكل توتر وياي..لأن اذا وجعتني مااسكت بچي..

بهاي الفترة كعدت بنص الليل بطني تقرقر ماماكلة شي من الظهر.. تمشيت للمطبخ اريد اكل.. سمعت صوت ابوي يخابر.. ماعرفت منو بس سمعته يگول : شونهن البنات..مشتاقلهن.. بنتي مريضة شذى مااكدر اجي تعرفين وضعي.. ماادري وين اخذهه كاسرة خاطري..لاطلعيني عن طوري..تبقى بنتي حتلو قسيت عليهه..چا اشوفهه تتوجع واسكت..طبعا مقهور عليهه.. دروحي شكد قنقينة..

شديحچي..مرته..اي يمكن مرته..الا شعنده يروحلهه.. والبنات منو اصلا.. ماردته يشوفني..درت وجهي ارجع للغرفة وادري بي ديمشي وراي..بس طبيت هو فات وراي..سويت روحي متفاجئة من جيته السريعة..
دنوة : ها بابا..
محيي : شون صرتي..
دنوة : زينة بس دايخة..
محيي : ليش گايمة..رجعي نامي موزينة عليج الوگفة..
دنوة : اي بس جوعانة اريد شي ينوكل..
محيي : هسه اجيبلج..لاتاكلين حي الله..

حركت راسي بالموافقة..عافني وراح..ولو سأل عني بس نبرة صوته حادة وتقهر..من كلامه وي هاي المرة عرفته مقهور علي.. بس يشوف امي بيه ويتغير كل كلامه البراسه.. هسه هذا كله مايهمني..إذاني توجعني اريد بس تصير زينة.. هو شواي واجه جايبلي شوربة وصمونة كهربائية..خلاهه جدامي ع الكومدي..
محيي : اكلي واذا دختي عوفيهه لاتاخذيهه للمطبخ ادور اطيحين وتتعورين..
تقربت علي..شبگته مغمضة عيوني احسه حلم هيج يحاچيني بهلإهتمام : شكرا بابا..
باسني من راسي : العفو..باجر اخذج لدكتور ثاني..
وخرت عنه وراح..اكلت الشوربة نصهه ..ولو جوعانة بس مااستسغيتهه..

صدك ثاني يوم اخذني لغير دكتور..كتبلي ادوية جدد .. اشترالياهن ورجعنا..انه بهلفترك تركت كلشي .. حتى المطبخ ماافوتله..بس بالغرفة والهوسة بره كلساع ناس طابة وطالعة مشاكل وعزايم واشكال..

بمرور اسبوع بقيت على حالتي..لا اتحسن ولا اصير اسوأ.. جنت بالغرفة واجتني سرور للغرفة..
سرور : وينج شنو حتنامين..
دنوة : لا وين مانعسانة..
سرور : ام رائد هنا تريد تسأل عليج..سامعة مريضة..

اويلي گلبي كام يدك سريع..ام رائد..يعني رائد بشحمه ولحمه.. ولو دايخة بس من سمعت بيهه جاية تمشيت على كيفي وسرور وياي لحدما طبيت للاستقبال لكيتهه كاعدة.. كعدت يمهه بوستني وتسألني عن صحتي..انه اريدهه ماتسكت.. شكد احبهه على محبة رائد..بلحظة تذكرت يوم الحچي بيه انه وعقيل.. رائد وين..مايدري بيه مريضة..مايدري بالصار..معقولة .. اي اكيد مايدري..لأن لو يدري جان سوى كلشي علمودي.. استحيت اسألهه علي والنسوان والبنات كلهن گاعدات يمنا.. انتبهت اخلاص ماكو.. گتلهه : خالة اخلاص وين..
ام رائد : بالبيت حبيبتي..
دنوة : شعجب مااجت..
ام رائد : مو اليوم رائد نزل من الواجب فهي بقت يمه..
ابتسام : هاي صارله شكد بالدوام..اذكر گتيلي گبل اسبوع نزل..
ام رائد : فدواتج خية يااسبوع..صار عشرين يوم ماشايفي.. تلفونه مغلق ادور خفنا علي..بعدين كال مابي شحن ومشغول بالشغل.. اليوم اجه رأسا نام بس سلم وراح..
ابتسام : الله يساعده ويحفظه ..

ابتسمت بگلبي.. الله يحفظك يارب ..شكد مشتاقة اشوفه.. اكيد تعبان هسه خطية.. بقيت كاعدة يمهم شواي ورجعت للغرفة..

وره يومين بالليل جنت كاعدة دااسوي كمادات لروحي.. خالة تعبت وياي خطية..گتلهه روحي نامي انه اسوي.. الكل راح حتى الولد رجعوا تعبانين شغل وطلايب.. اجتني سرور للغرفة تتلفت وبيدهه التلفون..سدت الباب وقفلتهه..
دنوة : شدسوين بابا..
مدتلي التلفون : هاج احچي..
دنوة : ويامن شبيج فهميني..
همست : هذا رائد يريد يحاچيج..عيب صار يومين اگله باجر.. خلصي وخلي ع الكاونتر هو جان هناك..

اخذته منهه متفاجئة ..انفاسي سرعت ورعشة بگلبي من سمعت صوته.. عافتني وطلعت..كمت وراهه قفلت الباب..

دنوة : اا..الو..
رائد : هلا ببنيتي..شلونج يروح روحي..سمعت مريضة..
دنوة : زينة هلفترة احسن من الگبلهه..انت شلونك..
رائد : الحمدلله..گلبي نار عليج وداعة عيونج.. اجيت اخذت امي من يمكم ذاك اليوم وحچتلي..
ابتسمت ..يمكن المرض والصخونة مأثرة علي.. همست : فدوه لگلبك..هسه احسن..
رائد : هههههه..اويلي فدوه اغدي لعيون لبنيتي.. مشتاگلج باباتي..
دنوة : حتى انه والله..بس ... سكتت..
رائد : بس شنو ابوية..
دنوة : عرفت بسالفة عقيل..
رائد : اي عرفت..واريدج ماتخلين السالفة هاي ببالج.. ادري هنا شيفكرون..واذا عرفوا احبج وتحبيني ماينطيج ابوج.. اذا شافوني ألح عليج انتي تتضررين..
دنوة : يعني شنو شحيصير..
رائد : باجر جايكم الصبح اصفي كلشي..ابوج مايجيبهه باليسر.. اخذهه بالغصب..

دنوة : عفية ليش تحچي بالالغاز..شحتسوي..
رائد : خليهه يمي..انتي يجيج الصافي.. باجر عمامج كلهم يمكم..
دنوة : اي يمكن..چي جمعة..
رائد : اي هاهيه..لاتخافين.. ولو مااعترف بهاي العادات بس هلمرة مجبور..
كمت اتأفأف..ضجت من كلامه مداافهم شي : فهمني..تره ضجت..
رائد : لالا..كلشي ولا اميرتي تضوج.. احبج يروحي الساكنة بيه.. نامي وارتاحي..
دنوة : محتسوي شي يضرني..
رائد : ابد..مايضر أحد..لأن انه حاچيت ابوج بيج مرتين وماقبل.. مو اول مرة..

جريت نفس طويل وزفرته بقلة حيلة : ماشي..
رائد : يله حبيبي اخذي راحتج..ردت اطمن عليج..

ودعته وسديته..تمشيت للمطبخ خليته ع الكاونتر ورجعت .. تأكدت محد كاعد..همزين مالي خلك ابد.. تمددت وخليت الكمادة على گصتي..شحيسوي رائد..خاف يريد يأذي ابوي.. لالا هو كال مااسوي شي يضر أحد..ويحبني اكيد مايأذي الناس القريبين علي.. من التفكير غفيت وحدي ماادري ..

ثاني يوم كعدت من وكت عكس الأيام هذيج..غسلت ورحت للمطبخ بس كاعدة مااسوي شي..بعدهه إذاني بيهه طنين.. بس احسن من گبل.. ضليت صافنة واتفرج عليهن يصبن اكل ويسولفن.. سمعي مو هلكثر من وره هلمرضة فمامركزة وياهم..

وره نص ساعة او اكثر..صبن النسوان بالاستقبال.. اجت سرور وياي تمشيني علمود اكل.. يالله بلشنا جان يصير صوت صياح بالديوانية..وصوت ابوي بارز هو ورائد.. كمت مفزوعة ..وكفت وره باب الديوانية اريد اعرف شكو....

يتبــــــــــــــــــــع.....................