رواية اسألي عني الليالي الفصل الرابع عشر 14 - بقلم رقية جاسم

قناة التليگرام

حساب الانستگرام

الـبـارت الـثـالـث عـشـر................

مرت ايام ع الروتين هذا..العطر الجابليا رائد كلما اروح للمدرسة أخلي منه..حتى فديوم سمعت بنات ثنين يگولن شكد طيب عطرهه لهاي البنية..كمت اقره وياهم واستعدلت بعد راح الضغط.. استمر كلشي طبيعي..الى أن فديوم طلعت زهگانة للدوام..توني داافوت للفرع ويبست بمكاني..

شفت سيارة سودة مظللة وگفت جدام بيت قريب ع المدرسة ونزل منهه اربع زلم ضخام بشكل مقرف.. كامشين سلاح بيدهم.. رأسا ختلت وره الشجرة ..واحد منهم دگ الباب ع البيت..طلع رجال لابس هدوم بيت وفانيلة بيضة.. لحظات وتعالت الأصوات والرجال طاح من طوله..رأسا ركبوا السيارة وطلعوا.. طلعت المديرة متهسترة وتدخل بالطالبات.. الرجال سبح بدمه..الفانيلة صارت بلون احمر قرمزي.. جسمي نحل من المنظر وهول الموقف..خفت اروح للمدرسة والدم تسرسح من باب الحوش للگع..مستحيل افوت اليوم.. لا حرجع للبيت .. اي لازم ارجع..اخاف من الدم عندي فوبيا..اذا ذبحوا ذبيحة اتخبل اضل جوة..حتى الحصص نوارة وخالة يسونهه.. لأن اللحم علي دم..هيج اموت اذا شفته..وهسه هذا الموقف كزبر جسمي..كمت استغفر واسبح اريد رجليه تعيني ارجع..

تنهدت ودرت وجهي..بلحظة انسحبت الجنطة من ظهري.. لوما الشجرة قريبة جان طحت بنص الطين..
صحت : وجع ماتشوف..
ضحك هو ويعض بشفته بشكل يلعب الروح : روحي لمدرستج ولج..مرة اللخ اوگعج بحضني..
شهگت بخوف ومشيت سريع للمدرسة..دربهه أقرب من البيت وهذا خوفني.. لكيت الحارس هستوه يريد يسد الباب..
- : ليش متأخرة..
دنوة : اسفة عمو..
- : يله فوتي..

جريت نفس براحة وطبيت..المدرسات گامن يحبني.. برزت بأول فترة وحفظوا اسمي.. اغلب البنات يگضن الدرس ضحك وسوالف حتى ياكلن.. قليل اليهتمن للمادة .. بالدرس الثاني عدنا امتحان..انه من الهبطة نسيت المادة.. راجعت ع السريع واجت المدرسة..غيرت أماكننا..كعدت ثاني رجلة وراي بنات ثنين المدرسة كلساع ترزل بيهن..تكللهه عينج بورقج.. لحدما دك الجرس وسلمناهن.. رجعت لمكاني اكل شي راسي گام يدك بقوة أذاني.. شواي واجن خمس بنات گعدن جدامي والعلچ يلعب بالحلگ..صوته مقرف مال طگطگة..
حچت وحدة بيهن هي وتمد ايدهه : اني هدى..
ابتسمت وبادلتهه : دنوة..
هدى : اممم تشرفنا..

الباقيات عرفني على نفسهن..أمنية..غزل..سهاد وعلا..
علا : امشو خلنتمشى بالساحة..خنگة هنا..ومنهه نتعرف عليج شكد حلوة انتي..هاي عينج شلون لونهه هيج وانتي سمرة..
دنوة : هو ابوي هيج عيونه بس امي سمرة..يعني خبط..
كمت وياهن نتمشى..انتبهت البنات مايقتربون منهن.. بس على گد السلام..وهن مثل العصابة ماادري شلونهن.. ماارتاحيتلهن..كلت بس تخلص الفرصة بعد اضل بالصف .. اخر درسين صار عدنا شاغر..فگعدن يمي .. حسيت حچيهن بي فدشي مامفهوم..بسامير..مااعرف فدشغلة.. ماانكر هن فرفوشات ويونسن بس تضايقت.. خلص الدوام وحلينا .. رجعت للبيت..بالطريق لگيت عمالة وتريلتين مالت حصو ورمل.. رجعت كلت افوت من الفرع الثاني..شفته أمان اكثر وكله بيوت راقية ..بعد ادخل منا احسن..

انه وامشي جان تنفتح باب وحدة من البيوت وطلعن علا وغزل بلبس فاضح..برمودات ويضحكن..دنجت ماردت يشوفوني.. سرعت ووصلت للبيت..اوف هذا اليوم شگد مقلق.. بدلت ووكفت ع الطباخ اسوي غدة..كملته وصبيت النا انه وبيبي.. كامت تسألني شلونه مستواي واذا مرتاحة لو لا..گتلهه اي مابيه شي.. ساعدتهه تروح للحمام ورجعت انطيتهه دواهه ونامت.. غسلت المواعين وقفلت البيبان ونمت..
كعدت العصر قريت وحضرت الواجبات لباچر.. بالليل اجه خالو جايب وياه عشة..
دنوة : ليش جبت مو سويت انه..
عمار : ارتاح حبيبة خالو..خاف متلحگين اني اجيب..
دنوة : يله براحتك..
شكد عنده اسلوب..حباب وراعاني هواي..

مشت أيام على هلنمط..البيت هدوء كلش..مامتعودة على هيج اجواء..بيت جدي مايمر يوم اذا مااجه خطار.. اذا ماصارت بلوة وفصل .. هنا ماكو شي گاعدين وساكتين .. بالمدرسة مرتاحة وصار تشدد أمني اكثر..فكمت اطلع من وكت علمود اوصل..اذا تأخرت دقيقتين ماافوت بعد..

رائد ماشفته من يوم طلعت مناك..صار شهر وشوي.. كلت هسه انساه ماطول هلكد بعدت عنه..بس بكل يوم اصفن ع السگف اتذكر مواقفنا ولمن يجي ياخذني من المدرسة.. اتذكر ريحته وصوت السويچ مالته..كلشي بي مميز وراقي..

احاسيسي وافكاري تضاربت..مااعرف امشي وره ابوي لو وره گلبي..وادري ابوي هو القوي والسلطان بيده.. اذا گال شي يصير..حتلو مو اليوم..فباچر.. او بأي وقت ثاني .. بس انه احب رائد..اي احبه واحس روحي انثى كاملة من اصير يمه.. من اشم عطره..انوثتي الماحسيت بيهه من كثر الشغل والصخرات والعالم المغلق العشته.. جنت اشوفه وأوهم نفسي إن هذا اعجاب..شي وقتي ويروح.. مؤقت .. بس الشفته والحسيته من سمعت صوته وتقربت منه أكثر جان يختلف عن البالي.. حبيت شخصيته اكثر ..كمت اتمنى اتفرج علي وعلى حركاته..هو هادئ ورزن بشكل يجذب أي بنية مو بس انه.. والشي الزادني تعلق من گال شايفج من زمان .. صابر على شوفتي وجه لوجه لمدة خمس سنين..شكثر هلفترة.. لايوم ولا ثنين.. شگد زاد قدره بداخلي .. بكل يوم اگول هاهيه اطاوع قرار ابوي بعدين اتذكر كلام رائد بذيچ الليلة وانسى كلشي ..

وبيوم بنص الشهر الرابع..حارة موت.. حلينا وتمشيت للبيت.. ماصدكت طبيت الفرع واشوف سيارتين جيش واگفة براس الفرع من جهة بيت خالي..بيبان البيوت مفتحة والزلم واگفة بالباب.. شفت واحد فاتح باب السيارة ومنزل رجله .. بس مامبين شكله..تمشيت اكثر وصلت لبيتنا بس متت خوف من المنظر.. كلهه زلم وانه وحدي بنية واگفة..
اجه واحد جندي يحچي وياي وكامش ورقة بيده..

- : بيت ابو منو..
دنوة : ليش هلسؤال..
- : عدنا جرد..صار ساعة ندك بالباب محد يطلع..
دنوة : اي خالي طالع لشغله ومحد بالبيت بس بيبيتي..
- : فتحلينا الباب نريد نفتش البيت..
دنوة : لا..
فتح عيونه بعصبية : لا شنو..فتحيهه اگلج..
دنوة : لا مااگدر..اخابر خالو اول..
- : يول اني بالجيش .. يعني تسوين الاگوله..يله فتحي الباب لا ندفرهه ونفوت..شمدرينا ماخالين عدكم ناس قتلة..

كام يصيح..خلست منه..بدقايق جان ينزل الضابط الكاعد بالسيارة.. گلبي كام يدك سريع وانفاسي ترجف حييل .. نزع مناظره وقلص عيونه مثل واحد يريد يتأكد.. رائد .. يبو شجابه هذا ياربي..شديصير..تقرب من عدنا صار بيناتنا..
رائد : عوفهه ليش تصيح ع النسوان..
- : سيدي ماشفتهه شلون ترادد..اگللهه فتحي الباب تكلي لا اخابر خالووو..
رائد : روح ع البيت الثاني..هسه انه ادخل افتش..
دگله تحية وراح..اجه تقرب مني هو ويعاين ع الباب ماچن واكفة يمه..مافهمت ليش سوه هيج..
رائد : فتحي الباب بنيتي..عيب هيج تحاچين الجندي..

ماعرفت اجاوبه..ايدي كامت ترجف..هذا هو.. يمي اي هاي ريحته..افشان نفسهه.. وكفت يم الباب وفتحتهه..
رفعت راسي عاينتله : فوت..
فات وصوت بسطاله يدگ بإذني..شكد حلو طالع.. هيبة وشخصية ووقار..بس دخل باب المطبخ اندارلي..
ابتسم : شلونج حبيبي..
عاينت بعيونه ودمعت لأن تذكرت كلام ابوي : زينة..
عگد حاجبه : ليش الدموع ابوية..
دنوة : هيج مابيه شي..يله فوت فتش بيبي هنا استحي منهه..
عاينلي وراح يفتش..سمعت صوت بيبي..رحتلهه بالغرفة..
بيبي : هاي وينج يمة..مو تدرين رجليه مااكدر ادوس عليهه وحيدي..وانتي تأخرتي..منو هنا..
دنوة : فات الضابط ديفتش بيبي..هسه حيطلع..
شواي ونزل من فوگ وصوت المفاتيح حسيته اغنية.. ياربي ليش كلشي منه مميز بطبيعته..

وكف بباب الغرفة وسلم على بيبي..
بيبي : يمة انت مو اسمك رائد..ابن حامد..
رائد : اي حجية..
بيبي : يدادة..شكد كبران..شفتك اخر مرة بعرس بنيتي ام دنوة.. جان عمرك ١٥ هيج..ماشاء الله..الله يحفظك..
هو ابتسم وعرفهه..هسه بيبي وكتج تحجين هيج.. اريده بس يروح صخنت من وجوده..ضل دقايق بعدين راح..
بيبي : گومي قفلي الباب وراه..غير تگليلي ابن عمي.. عابتلج..
دنوة : ههههه..بيبي شبيج عبالي ماتعرفي..
بيبي : لا لا اتذكره زين..

ابتسمتلهه وگمت وراه..لكيته واكف بباب المطبخ ديدخن.. وصلت يمه..مدلي ايده بيهه ورقة صغيرة..
دنوة : شنو هاي..
رائد : مشتاك لحسج..مااعرف ارقامكم فانتي خابريني..
دنوة : مااگدر..خلي يمك..
حچه بصوت حنين وجر الحچاية : يولييي..
اخذته منه.. ابتسملي ولبس المناظر وطلع.. سديت الباب وركضت فوك اشوفه من الجامة..هو وكف والجنود اجو يمه ماادري شحچه وياهم بعدين كلهم صعدو بالسيارات وراحو.. ابتسمت ودرت وجهي على ايدي البيهه ورقة.. اخابره لو لا.. لا مااخابر.. بس شلون ..انه همات مشتاقتله واحس بفراغ بغيبته.. مااعرف افكر منا لليل ..

نزلت جوه بدلت وحضرت الغدة..كعدت يم بيبي..
بيبي : بيبي تدرين شكد حسيت نفسي كبرت من شفت رائد..
دنوة : ليش..
بيبي : هسه عمره بالتلاثين..ومن شفته جان بعده مراهق.. شلون الدنيا تركض بينا ركض..ولا حسينا..هاي نعمة من رب العالمين بحيث تلتهين بالدنيا واطفالج والزوج.. برمشة عين تشوفين نفسج وصلتي بناتج لبر الأمان وولدج تزوجوا وعدهم عوائل..انتي تضلين تتفطنين نوبات هيج تمرچ مواقف حلوة قديمة..
عاينت عليهه شفت حسرة بعيونهه..بستهه وحاولت أغير موضوع.. اخذتهه وياي للمطبخ غسلت مواعين واسولف وياهه اريد أنسيهه وانه بالي يم رائد اذا اخابره لو لا..

كملت شغل ورحت انام..مشى اليوم عادي..بالليل تأكدت الكل نام..رحت ع الدفتر اخذت الورقة واخذت تلفون بيبي.. كعدت بالهول كتبته ضليت صافنة علي..اخابر لو عيب.. خلاخابر احسن.. اي هيج افضل ..دگيت علي وجسمي كله يرجف.. دااحس روحي اسوي شي چبير.. شواي وجاوبني..
جان ديضحك مدري ويامن..جلى صوته وگال : اهلا..منو..
- انه..
رائد : اويلي فدوه للـ انه بهلحلگ..شلونج حبيبي..
دنوة : الحمدلله وانت شلونك..
رائد : بخير بنيتي..
دنوة : ااممم..شعجب چنت هنا..مو دوامك بتكريت..
رائد : سويت نقل..هنا بيت خالتي ابات عدهم بعدين ارجع للبصرة..
دنوة : هاا..خوش..

سكتنا ثنيناتنا..بس اسمع صوت خطواته وانفاسه مال واحد ديمشي..لحظات وگال : هسه ارجع..
دنوة : وياي..
رائد : لا مو يمج..غنيلي..غرديلي..مرتاحة.. شمسوية..
دنوة : مامسوية شي..اي مرتاحة يعني عادي..
رائد : دناوي..
: ها..
رائد : شبيج بنيتي..گلبي عليج..
حسيت روحي اذا جاوبته اكوم ابچي..فغيرت الموضوع : حروح انام..عندي دوام..بيباي..

سديته ومسحت الرقم..خليته يم بيبي ونمت.. ثاني يوم انعاد نفس نظام كل يوم..لمن رجعت للبيت لگيت بيبي تخابر .. أشرتلي بيدهه..
بيبي : اي هياتهه رجعت هستوهه..
انطتنيا..قريت الاسم..ابوي ..جاوبته ببرود..مااريد اسمع صوته اصلا..
دنوة : هلو بابا..
محيي : هلا بيج..شلونج..
دنوة : زينة ..انت شلونك..
محيي : زين الحمدلله..مرتاحة بالمدرسة..محتاجة فلوس..
دنوة : شكرا..مامحتاجة شي..
محيي : يله خوش..سلميلي على خالج..مع السلامة..
دنوة : مع السلامة..

سديته وانطيتهيا..تمددت يمهه نمت على فخذهه بهدومي حتى الشال مانزعته.. هي فتحته ونزعتنياه على كيفهه..
بيبي : شبيج حبيبتي..
دنوة : بيبي خليني يمج شوي..تعبانة..
بيبي : براحتج يمة..خوفتيني عليج..خاف مريضة..
دنوة : لا لامابيه شي..بيبي گلبي يوجعني..
بيبي : اسم الله على گلبج..ليش حبيبة..
دنوة : ابوي.. ابوي يأذيني..يريد يزوجني لعقيل.. ابن عمي .. هذا متزوج صارله هواي..
شهگت وخلت ايدهه صدرهه : صدك چذب..شبي محيي تخبل.. اكو واحد هيج يسوي..
دنوة : اي بيبي ماادري شسوي..بس لاتگولين لأحد حبابة .. حضنيني اريد انام.. بس گبلهه..جوعانة احميلج الأكل.. البارحة سويت زايد..
بيبي : لا نامي يمة مااشتهي..

حضنتني هي وتقره على راسي..غفيت على صوتهه.. فزيت العصر على صوت خالو يمي..
عمار : شبيهه خاف مريضة..اجيبلهه دوة..
بيبي : لا يمة مابيهه شي..
عمار : يله هو ابوهه حيجي بالاربعاء كال..
بيبي : شعنده..
عمار : غير يشوف بته..شبيج يمة هو هذا سؤال..
بيبي : عندي وياه حچي بس يجي..

خفت بيبي تحچيله شكو..سويت روحي دااتململ بالفراش يعني كعدت..سلمت علي وكمت للحمام بدلت..صبيتلنا غدة وكعدت اقره..

وره يومين رجعت للبيت لكيت سيارة ابوي بالباب.. تذكرت بيبي تريد تحاچي..بلكت تقنعه..خفت منه بنفس الوكت.. طبيت جوه ذبيت الجنطة ورحتله كاعد بالهول وحده.. ابتسمتله ورحت حضنته..بادلني من وره خشمه رأسا وخر ايده.. حتى ماحسسني بوجوده..كعدت يمه ..
دنوة : خالو وين..
محيي : طلع يجيب غدة من بره..
ضليت ساكتة بس كاعدة يمه.. دقايق واجت بيبي سلمت علي وكعدت وياه..عفتهم ورحت غسلت وبدلت.. اريد انسى شوي.. گلبي يوجعني من كلشي..حتى من المدرسة..البنات ديضايقوني.. ادري اذا كلت لابوي حيگلي خلصي السنة ماضل منهه شي..فسكتت..اهجس روحي شي ماله قيمة وينشمر على هذا وهذا..

مشى الوكت طبيعي..بس الفرق ابوي هنا..يعني خايفة.. لحد العصر راد يطلع وصاحني بالهول..طبيت محد اكو بس انه وياه..اول ما تقربت منه جر إذني..
محيي : تتشكين علي يم بيبيتج..ولج اذا سمعتج فاكة حلگج مرة اللخ اگص اللسان هذا..اطول منج.. وبالعناد خلصي السنة ونص سنة السادس يله ارجعج..
گمت ابچي ماتحملت : ليش هيج تسوي بيه.. مااريد يتزوجني واحد متزوج..حرام عليك..
محيي : بعد بس انتي تعلميني الحلال والحرام.. جنت اريدج تخلصين السنة وارجعج..انقهرت عليج..بعدين طلعتي ماتستاهلين..يله ولي من خلقتي وراي درب..
بچيت بحرگة انه وكامشة إذني كامت تون..هو خازرني ويرزل بيه بعصبية بس صوته ناصي..عافني وطلع..

ماگتلهه لبيبي شصار..عرفت مالهه كلمة ولا خاطر يم ابوي فليش اتعبهه وهي خطية مابيهه حيل..سديت الموضوع ظاهريا وباطنيا مؤقتا..بين ما اخلص واشوف وين اولي..

خلص الاسبوع وبلشنا بالاسبوع الثاني..بنصه كعدت الصبح مثل كل مرة..لبست وسويت ريوگ بعدين طلعت للمدرسة.. لكيت الشلة واگفات بالباب يتمضكن..
لمن وصلتلهن علا حچت : حبي شو منشوفج..
دنوة : اي راسي ديوجعني الصبح..
عفتهن ورحت للصف..حضنت راسي بين إديه وغمضت.. اكرههن .. تصرفاتهن مو مال بنات .. لعبان روح.. ابتليت مشيت وياهن مرة..لطشن..وماادري شلون اخليهن يروحن.. بلش الدوام طبيعي بس متوترة من قربهن..

لحد اخر درسين وصار اجتماع مدرسات..فطلعنا بالساحة.. محد بقى بالصف..شفت الجو حار كلت خلافوت للصف احسن.. لو اشرب مي وارجع .. صفنا بالطابق الثاني وبالأخير صاير.. اول ما طبيت شفتهن كاعدات بمنظر مقرف.. وحدة بحضن اللخ وكامشة شعر الثانية تشم بي چنهه سكرانة.. صفنت ع الديصير..رأسا دنجت ودرت وجهي دااطلع جان تنكمش ايدي من المعصم وانجريت للصف.. بي قفل .. قفلته هدى ودفعتني جوة..
حاولت أبين مابيه شي وماانتبهت : شو هنا ليش..مو اجتماع..
هدى : اي هيج گلنا نتونس..
دنوة : ها خوش..
تمشيت للرحلة اشرب مي..مااحس غير غزل كمشتني من خصري..انه لابسة الصدرية الكابوي مفتوحة من الصفاح.. فوتت ايدهه حسيت بحرارتهه..

لعبت روحي..ذبيت المي عليهه وگمزت ع الرحلة..
دنوة : اذا تكمشوني املخكم والله.. وخري شنو هللعبان نفس هذا ماتستحن..
هدى : ههههه..ولج تستحي خطية..
سهاد : تعالي هسه تتعودين..اصلا شعور حلو..
بطني مغصتني من كلامهن..شنو هذني..حيوانات.. حتى الحيوان عنده فطرة الذكر وي الأنثى..هذا التصرف شنو.. سويت روحي داابچي وحطيح بالگع من وجع بطني..
هدى : لاحبي متقنعنا هيج سوالف..
ضليت واكفة بمكاني..اذا اضرب وحدة منهن متأكدة حصير وصل وصل..هواي هن وانه شنو يمهن..شكد كشت روحي منهن ومن الصف والمدرسة كلهه..

تذكرت اول ايام لمن علا گلتلي شكد حلوة.. عبالي مدح بنات .. شمعرفني هيج يفكرن..

مرت دقايق وچن الله راد ينقذني من هلشكول الوصخة.. اندگ الجرس والباب اندفعت بس چي مقفولة ماانفتحت.. نزلت من الرحلة..حصرت روحي بالزاوية ومخلية الجنطة من الجهة الثانية..اجت مدرسة وكفت علينا لحدما خلص الدوام.. من الهبطة طاح ماي وجهي كله..اخذت الجنطة ورحت ورة المدرسة أغسل.. فتحت الشال اريد اتنفس..

حسيت اكو شخص وراي..درت وجهي لگيتهن واكفات.. يبو على حظي .. لفيت الشال شلون ماجان..
رادن يتقربن وعطت : كافي الله يخليكم..والله تلعب روحي.. انه مو من هلنوع..
هدى : اي عادي احنا نسويج من هلنوع..
ضحكن كلهن وياهه..اقشعريت.. عفتهن وطلعت امشي سريع.. اريد اوصل للباب مااكدر..المسافة شطولهه صارت.. فتت بالساحة محد اكو..كلهن طالعات.. شكد مر وكت.. هسه بيبي ضل بالهه.. طلعت لكيت الباب مقفولة.. استغفرالله ياربي هسه وكتهه.. كعدت جوة الشجرة انتظر الحارس يطلع.. ضل تقريب الربع ساعة وطلع..فتح الباب الصغيرة وطلعت.. الجو حار نار .. ماانتبهت لروحي شلون طالعة..بس اريد اوصل للبيت..

انه وامشي فاتت سيارة سريعة بنص المي..صار كله على هدومي.. جنت محتاجة شغلة بسيطة بس علمود ابچي.. كمت ابچي وانكت بالصدرية..ولو تبهذلت تبهذل..شنو هليوم النحس..

گعدت ع الدچة ..ثواني..دقايق..مااعرف..مااحس غير الشمس انحجبت عني..انتبهت الحذاء جلد اسود.. دنج صار بمستواي .. رائد .. شجابه وشلون.. ماادري .. عاينلي بقهر وسؤال ..
رائد : ليش گاعدة هنا بنيتي..
ماجاوبته بس ابچي..كام يتلفت ووگف..
رائد : تعاي صعدي اوصلج..خلافتهم شبيج..
مشيت وياه وصعدت بالصدر..اخذ الجنطة مني خلاهه ليوره وحرك السيارة..

رائد : فهميني شبيج..شصاير..ليش هدومج هشكل.. احد معترضلج مسويلج شي..
دنوة : لا لا..محد..بس بالمدرسة...
سكتت ماحجيت..خفت ياخذ نظرة غلط عني..عباله انه من هلنوع بس دااچذب..
رائد : لاتگصين الحچي..احجي خلاعرف شكو..
دنوة : ماكو شي..
عاينلي وخزرني : انتي تدرين بروحج شلون طالعة..
دنوة : شلون..
مد ايده لهاي التصير جدام الكرسي الأمامي ليفوگ.. يخلون بيهه فايلات وشغلات مالت السيارة..بيهه جامة.. لمن وخر ايده طخ بخدي..حسيته عود شخاط وانه بانزين واحترگت.. راسي صخن حتى نسيت شريد احچي..

عاينت لروحي بالمراية شفت الشال مترب ورگبتي طالع منهه شوي..وجهي صاير كركم.. رفعتهه وغطيت وجهي .. كمت ابچي واشهگ..
دنوة : وديني لبيت خالو..اكره المدرسة هاي..لعبت روحي..
كام يستغفر ويزفر أنفاسه بقلة صبر..طلعني ع الشارع العام .. گتله : هاي وين رحنا رائد..گتلك رجعني..
رائد : الشارع مسدود..لازم افوت من غير درب..
سكتت ماجاوبته..نزل على محل ثواني ورجع.. مدلي ايده : كمشي شربي..
اخذته منه..مي بارد ثلج..اجه كعد يمي ويسوق..
رائد : احجيلي گبل لانوصل..تره من الاسبوع الراح لايب عليج.. لا اكدر اخابر ولا اجي..خاف تصيرلج مشكلة من وراي.. سولفي بنيتي خلافتهم شگدر اسوي..

تنهدت وحچيتله ع البنات من اول ماشفتهم لحد اليوم..
دنوة : بس عفية لاتفهمني غلط..انه مو هيج ابد..ولعبت روحي منهن اصلا..وروح امي..
رائد : شبيج يولي يالله شكد فاهية..مرة اللخ رگعيهن بأي شي تشوفي جدامج..اذا اشتكيتي تصير عليج محد يصدك.. انه جنت طالب واعرف..جانوا وياي ولد هيج.. ابتعدي وحاچي خالج يجي ينقلج لغير شعبة..برزي شخصيتج لاتتفطرين..
دنوة : مو اخاااف..اخاف منهن.. گلتهه بشكل اندفاعي..
ابتسم : لاتخافين..خليهن يخافن منج..
جريت نفس وسكتت.. حسيت براحة من حچيتله.. شگد احبه.. بس ليش اتهرب من الحچي وياه..ولا مرة حچينا عدل.. اووف مني ومن لساني المايبين لا بالزين ولا بالشين..

وصلني لباب البيت..مد ايده انطاني الجنطة..
رائد : انتبهي لروحج واكلي زين..ضعفانة..
حركت راسي بمعنى اي ونزلت..

ضل واگف لحدما طبيت يله راح..اول ما طبيت لگيت بيبي بالمطبخ لابسة صايتهه ودتلبس بالشال..بس شافتني ذبت الشال..
دنوة : شدسوين بيبي..
بيبي : ولج هاي وينج..يمة گلبي خلص هلكد ما تانيتج.. شبيج ييمة تعاي سولفيلي..ضل بالي..
دنوة : مابيه شي بيبي حبيبتي..بس صار عدنا اضافي والمدرسة ماقبلت نطلع..گالت نكمل يله..
رحت يمهه بستهه وطمنتهه..بدلت ووگفت ع الطباخ اسوي الغدة.. خلص اليوم طبيعي ..مثل كل يوم..

بالليل ردت انام..ماگدرت.. اخذت تلفون بيبي ورحت بالهول.. صفنت على روحي..شدااسوي..اخابره.. خاف زحمة بالليل وادري بروحي حگوم اعلس ومااحچي عدل..بس لازم احاچي.. احس روحي متضايقة ومخنوگة..مااعرف ويامن احچي.. خلأخابره حتلو بس اسمع صوته.. كتبت رقمه ودگيت ..دگ لحدما فصل.. غميت روحي.. اي طبعا الرجال نايم.. شكد اتصرف تصرفات غبية..فتحت التلفزيون اگلب بالقنوات.. دقايق ودگ التلفون..گلبي دگ سريع.. شلته بالعجل ..
دنوة : اا..الو..
جاوبني بصوت ثگيل : هلا حبيبي..
دنوة : چنت نايم..
رائد : كاعد ع القنفة وغافي..
دنوة : شكد عيب..اسفة..ارجع نام مااقصد افززك..بس...
رائد : بس شنو ابوية..احچي ماعندي شي..بعد وكت..
دنوة : هيج ردت اسولف وياك..
رائد : سولفي اميرتي..
دنوة : ليش هيج تحاچيني..وانه چني ثلج..
رائد : هو انه مصدك اسمع حسچ..ادور اكعد اتطلب .. ادري بيج تحبيني..مو مهم الحچي..
دنوة : شلون..

رائد : مبين..اذا بنيتي مااعرفهه شتحس چا بيمن احس..

ابتسمت وهمهمت بس ماجاوبت..
سكت شوي وحچه : باباتي ليش ماتخلين خط مو احسلج..
دنوة : ابوي مايقبل..كال المدرسة قريبة..
رائد : استغفرالله..دخلصي هلسنة بالعجل..
دنوة : ليش شحيصير..حيبطلني..
رائد : لا..اجي اخطبج..
دنوة : مايفيد..ليش تسوي وتتعب روحك..
رائد : شلون تحچين هيج يولي..اذا عليج مااتعب چا عليمن بعد.. ابوج گالي بسالفة عقيل..
شهگت وفتحت عيوني متفاجئة : عزززه..صدك شلون..

رائد : جنت ببيت جدج مااذكر على شنو اجيت..شفتهم كلهم كاعدين گلت هاي احسن فرصة احچي بيهه..ماجنت ادري صاير حچي عنج..جدي ماكال شي..بس ابوج رفض.. كال ماانطيهه وعقيل رايدهه وانت اذا بيك خير اخذهه.. صار حچي وتعاركت وياه..كتله جنت منتظرهه تكمل بعدين اخطبهه بس ع السالفة هاي خلتخلص السنة واجيهه..عفته وطلعت .. حتى ماطبيت البيت بعد من ذاك اليوم..
جاوبته بهضيمة : شحيصير يعني..ابوي قافل..
رائد : لاتخافين..قافل شنو..لعبة هي.. شهلحچي الماصخ هذا..
دنوة : شدعوة هلكد واثق حينطيني..
رائد : أزين شاربي اذا مااخذتج..

ضحكت بهدوء مااعرف ليش : ااممم..
رائد : على هاي بچيتي بيوم الشفتج علمود التفتيش..
دنوة : الصراحة..اي علمودهه..وماعرفت شلون احچيلك.. بيبي حاچته لابوي بهلموضوع...
سكتت ماكملت..اختنگت لمن تذكرت شلون جر إذني بقوة..
گال بنبرة تساؤل : اي ...
دنوة : اي ماسمع كلامهه وجر إذني..گال ترضين بعقيل وتسكتين..
رائد : وانتي سكتي..
دنوة : اي..

رائد : باباتي ليش هيج شخصيتج..مايصير..بعدج بعمر الورد المفروض من هسه تبدي تنزرع الشخصية القوية بداخلج.. من واحد يحاچيج جاوبي حسب عمره..مو ابوج تنتري بي.. جاوبي بهدوء وبطريقة تخلي يعرف انتي كبرتي.. شفتي البنات هذني شلون رادن يتگربن عليج..چي شافنچ فطيرة.. ليش ماراحن ع البنات الباقيات.. فرضي روحي عليهن .. دتفهميني..

دنوة : ليش تحاچيني هيج..احسك دتستصغرني..
رائد : دناوي شنو هلحچي..داانصحج مااستصغرج.. لوما احبج مااكول هيج..سمعتي هيج حچي من أحد غيري..
دنوة : ها..لا محد..
رائد : اريد مصلحتج ودااحچي هيج..

حسيت روحي ضوجته..كلماتي طايشة ماانتبه عليهه لمن احچيهه.. خصوصا وياه ماادري ليش ماخذة راحتي ..
دنوة : اسفة..
رائد : ماصار شي بنيتي..روحي نامي ولاتبچين بعد..
دنوة : ماشي..
رائد : احبج..
دنوة : اا..انه همات..يله حروح يمكن بيبي كعدت..
ضحك وگال : روحي باباتي..نوم الهنا..

سديته ومسحت اسمه..طفيت التلفزيون ورحت تمددت مرتاحة اكثر من الأيام الراحت..شكد چنت متضايقة وصدري ضايگ علي..حتى الهوى مايدخل ريتي ويترسني..ضليت اتگلب لحدما غفيت ونمت..

مشت الأيام هادئة وصافية..ابوي يخابرني كل اسبوع مرة.. بس مااجه من ذاك اليوم..سرور همات تخابرني دورات.. رائد كمت اشوفه لمن اطلع من المدرسة..طابگ سيارته براس الفرع ينتظرني افوت للمدرسة ويروح..بس ماصار حچي بيناتنا.. مجرد اشوفه.. مشاعري بين الاطمئنان وبين الخوف .. مامستقرة على شي وخايفة من ردة فعل ابوي اذا شاف رائد يريد يخطب..

البنات هذن بقن نفس ما هن..وحدتهن تحاول تكمشني لو تريدني انزع الشال..بمدرستي القديمة جنت انزعه چي كلنا بنات..هسه هذني احسهن ولد..مقرفات..
وراهه بفترة قربت الامتحانات الشفهية..فگعدنا بالبيت.. نراجع وهيج خلصنا المواد..كمت احاول ألهي روحي بالدراسة.. اريد انسى هذني البنات..لأن تصرفاتهن تقلقني..نظراتهن .. التهامس بيناتهن..من ذاك اليوم بعد ماخليتهن يتقربلي.. بس ادري بيهن يريدن اطاوعهن..مجرد التفكير بالموضوع راسي يگوم يفتر وادوخ.. بس محد يدري بيهن..ماحچيت بس لرائد.. كمت اسوي مثل ما گال وشوي ابتعدن عني..

خلصت الفترة وبالليل كعدت اراجع .. كمت وگمت للمطبخ اشرب مي..سمعت التلفون الأرضي يدك.. شعجب هسه .. عفت الگلاص ورحت شلته..
جليت صوتي وحچيت : تفضل..
سمعت صوت مرة تگول هاك اكمش.. ماركزت بصوتهه .. ثواني واجه صوت رائد ترس إذني..
دنوة : رائد ..
رائد : اي يابة..شلونج ابوية..
هجست گلبي حيطير من الفرح..صار شكد ماسامعه صوته.. ابتسمت وهمست : زينة انت شلونك..
رائد : زين يروح روحي..مشتاگلج..
دنوة : ااممم..انه هماتين..
رائد : انتي هماتين شنووو.. حچاهه وجرهه مثل واحد ديسأل ويريد يجر لسان الثاني علمود يجاوب..

دنوة : هسه ليش تحرجني..
رائد : لا يابة براحتج..لاتحچين..
دنوة : منو جانت ع التلفون..
رائد : هاي امي..
دنوة : هاا..وليش هي حچت وياي..
رائد : خاف خالج يجاوب لو بيبيتج..قابل اگللهم اريد دنوة.. فخليتهه تحچي هي..
ابتسمت وگلبي رجف..مااعرف ليش.. گتله بهدوء ويمكن انه نفسي ماسمعت صوتي : تخاف علي..

گال بحنية : اخ يابة..غير قطعة بروحي..شلون مااخاف..
سكتت بس اسمع صوت انفاسه..گمت اتململ واجيب السماعة منا ومنا..حاولت افتح موضوع..
دنوة : رجعت للبصرة..
رائد : اي..صار اسبوع هيج..
دنوة : وشوكت يبلش دوامك..
رائد : عگبة انزل..
: ااممم..يله..اروح انام..
رائد : على راحتج بنيتي..تصبحين على خير..
: وانت من اهله..
سديته وزفرت انفاسي براحة..انتبهت لروحي شلون مبتسمة بمجرد ما اسمع صوته..لو صرت يمه شلون..

غسلت وجهي ورحت نمت.. ثاني يوم گعدتني بيبي لبست وحضرت الريوگ وطلعت للمدرسة..امتحنا اول امتحان بعدين المدرسات گالن التريد تمتحن الباقيات تجي.. المدرسة نصهه ماكو..اعدادية واغلبهه سادس فقليلين عددنا.. انه گاعدة ع الرحلة انتظر اسمي وحسيت بدوخة قوية..گمت اشوف الواحد اربعة..المدرسة انتبهت علي..اجت يمي..
خلت ايدهه على چتفي : شبيج امي..
دنوة : ماادري ست دخت..
صاحت على غزل گلتلهه اخذيهه للإدارة.. انه لوما عيب جان عطت..هسه الا هاي الكلبة..اووف .. اول ما وگفت رجليه خدرت..حسيت اذا بقيت واگفة حتنكسر.. كمشتني المدرسة واجت غزل ..وخرت ايدهه وطلعتني من الصف..

كمت ارجف منهه وخفت..احسهه ولد..اي ولد ديكمشني ويريد جسمي..هي ملامحهه انوثية وحلوة ماقاصرة..بس مويلهه يلعب الروح..

الممر فارغ بس صوت المدرسات بالصفوف.. جانت كامشتني من چتفي مدت ايدهه لخصري..ضربتهه ودفرتهه ليغاد..
دنوة : قندرة لاتكمشيني هيج..تلعب روحي..
غزل : هاي شبيج حبيبتي..اصلا مشتاقتلج صار شكد ماشايفتج بعدين تحرميني منج..
شهگت وكمت اتلفت منا ومنا خاف تطلعلنا مدرسة وتصخمنا وتعزينا : لج انجبي طايحة الحظ..ششايفتني شوكت قبلت بحركاتج الوصخة انتي وهذنيج..حيوانة..
عفتهه وتمشيت شلون ماجان..هي بقت وراي تريد تتلمس ظهري ورگبتي ماخليتهه كلساع ادفعهه..ادري بشر مايجوز شنو هللعبان نفس.. نزلت للإدارة روحي فغرت من الحر .. راسي صار طبل يمكن ضغطي صعد..اجت المرشدة التربوية اخذتني لغرفة الإستراحة وهاي غزل فوگ راسي دتخليني اصير اسوأ مدااتحسن..

- : حبيبتي نزعي الشال خاف متضايقة..
دنوة : لا ست..بس اريد حباية راسي يوجعني..
- : اي هسه..
راحت دقايق واجت..انطتني حباية وبرتقالة..اكلت منهه نص وعفتهه.. ضليت كاعدة تقريب النص ساعة ودگ الجرس.. شوي تحسنت..تشكرت منهه وصعدت للصف..امتحنت ولبدت بالرحلة الأخيرة..

خلصت الامتحانات بقى عندي واحد كلت باجر عليش أوازي روحي.. طلعونا بـ١٢ فرجعت بالعجل..مااريد اشوفهن..

ثاني يوم داومت والمدرسة بيهه أقل من البارحة.. هذني گاعدات ونظراتهن تخوف..ياربي والله احسهن ولد ابد مااجه بداخلي شعور إن هذني بنات مثلي..

طبيت للصف يمكن كلنا تلث شعب انجمعنا يله صرنا ٢٥.. امتحنت وطلعت اتمشى بالساحة..اتاني يخلص الدوام مليت .. انه واتمشى مريت من يم مكان ابد مانفوتله..كلنا نخاف.. يعني هو متروك وبي حشيش عالي.. لمن فتت سمعت صوت بنات يضحكن..ماركزت صوتمن..فضولي دفعني اشوف منو.. تمشيت ونظراتي تتفحص گبلي.. شفت البنات واكفات وأمنية بيدهه جگارة بس ماادري شلونهه..مو مثل مال رائد.. ضليت واكفة محد انتبه علي.. ثواني جان يگمز ولد من السياج يمهن.. شهگت وخليت ايدي على حلگي.. صخام عزه بعيني شنو هذني.. شنو هلمدرسة التايهة ..هسه لو باقية بالبيت وراسبة احسنلي من هاي الشوفة الكسيفة..

هو انتبه علي..بعده مراهق..حتى ماطالعتله لحية بس شوارب.. رجفت بخوف من شفته..هو توتر من شافني كام يعاين عليهن وهن يعاينن علي چن ماكو شي وچن ماشفتهن اصلا.. رأسا درت وجهي اريد اروح..جان يجي كمشني من زندي حيل وجرني يمه..
كمت ادفع بي واصيح : وخررر..لاتكمشني..
حط ايده على حلگي بقوة..شفايفي طبگت على اسناني .. كمت ابجي واتوسله بعيوني بس يوخر ايده..حسيت بطعم الدم مثل الزنجار..ماادري من شفايفي لو لثتي لو من شنو بالضبط.. بس اريده يوخر..
علا كمشت إيده ويحچي بمياعة : عوفهه حبيبي..
- : شلون متخافين تشتكي عليج..
علا : حبيبتي حنعوفج..واذا فكرتي تشتكين علينا يصيرلج شي ماصاير ابد..وعبودي حبيبي هو يتصرف وياج..
سهاد : عيني هدهه..وهاچ هاي دخنيهه..

وخر ايده..رأسا تفلت الدم ودموعي تصب..هو واگف وراي وهن جدامي.. والمكان وصخ الى درجة..ماادري وين اروح ضليت واگفة..
اجت أمنية تريد تحضني وادري بيهه قاصدة اطخني لو تلمس جسمي عود بالغلط..گبل دفعتهه ..
دنوة : عوفوني الله يخليكم..شتردون مني..والله ماانطيكم التردوه انه مو هيج..افهموني..
ماادري علا شحچت وي هذا الولد كام يعاينلي بنظرات تخوف يريد يلزگ بيه وكل شوي ابتعد عنه..لحدما صار قريب مني حيل وانه ع الحايط..راد يجر الحجاب وبچيت.. اجت هدى يمي وبيدهه جگارة جوزية طوخ ومااعرف يعني شكلهه غريب..

هدى : دخني منهه ووعد عبودي حيبتعد عنج..
دنوة : لا عفية والله انه ماادخن ولا يم الجگاير..ليش دتسوون هيج وياي..شمسويتلكم..
غزل : لا هيج..بس انتي حلوة يعني وفطيرة زيادة.. هسه ديله ياعيني ددخني من هاي لو تردين يصيرلج شي..

شفت هذا قريب علي وهذني اذا دخلن ولد للمدرسة كلشي يگدرن يسون..خفت وسلمت أمري..اخذت الجگارة من ايدهه وايدي ترجف ميتة خوف..شدعي عليك يابة..هيج ذبيتني هنا.. عدوك التعرفه احسن من صاحبك الماتعرفه..ع الاقل هناك أعرف ياهي الزينة والموزينة..هنا شمدريني وهيج شمرني حظي هنا..

اخذتهه وحتى مااعرف اكمشهه شلون..اجت سهاد كمشتلياهه وأنفاسهه على ايدي..لعبت روحي..لو الانتحار حلال جان بهللحظة انتحرت من بشاعة الموقف الصرت بي.. كمت أدخن وبس اگح..ريحتهه قوية والدخان يدخل لزردومي وريتي يخدش بيه.. بس ماكدرت اوگف..هذا كل شوي يقترب اكثر.. لحدما خلصت نصهه وأخذتهه مني.. گمت اگح بشكل هستيري .. طحت بالگع اريد هوى يجيني..اختنگت حتى الكلام طار من لساني اذا رحت اشتكي شحچي وشگول..منو يصدگني وانه هسه ريحة الجگاير ترستني.. بقيت دقايق اگح لحدما سمعت الجرس دگ.. كمت وطلعت ركض .. رحت للمغاسل غسلت وجهي ..كفيت الردانات غسلت ايدي وأردد بداخلي : لعبان نفس.. غسلي زين توصختي..

حسيت اكو بنات اجن..نزلت الردان وصعدت فوك للصف اخذت الجنطة ونزلت..ضليت اتمشى بالشارع اريده مايخلص.. خالو لوتي..دئما ينتبهلي اذا ضايجة لو صافنة.. هسه اذا رحت حيشم ريحة بيه ويگول لأبوي.. مديت ايدي على جيب الجنطة..عندي فلوس..مشيت للفرع الثاني بي دكان طالع من بيت..مرة چبيرة كاعدة بي.. طبيت اشتريت علچ بالنعناع شوي ريحته قوية.. بس مايفيد..هسه صار بإيدي وهدومي.. يله ع الاقل حلگي تروح منه الريحة.. انطيتهه فلوس ورجعت للبيت..

بهاي الفترة الاجيت بيهه لبيت خالو أول ما ارجع ابوس بيبي واشوفهه خاف محتاجة شي..بس بهليوم طبيت رأسا بدلت ورحت سبحت.. بقيت هواي جوة المي..لحدما سمعت صوتهه يم الباب..

بيبي : دنوة خلصتي بيبي..تأخرتي خاف بيج شي..
گلت بگلبي : كلشي بيه بيبي..كلشي..

مسحت دموعي وجليت صوتي : لا بيبي هسه اكمل.. بس ابدل..
سديت المي بالعجل بدلت وطلعت اسوي غدة.. كملته وصبيتلنا .. ساعدت بيبي تاكل وكمت خليت من العطر الجابليا رائد..ريحته قوية بلكت مايبين علي شي..
مشى اليوم بطلاع الروح..استرخصت روحي.. ابوي حقدت علي من السما للگع..بعيدا عن شخصيتي المهزوزة.. بس هنا البيئة تختلف وكلشي يختلف..نفسيتي مدتتقبل المكان.. تعبت منه..اريد تخلص السنة وارجع لبيتنا.. ومرة خالو احس سالفتهه مو خالية..خالو ابد ماجاب طاريهه ولا بيبي.. غير اذا مريضة يسأل عنهه يخابرهه..بس كلشي ماكو.. واستحي اسأل بس اكيد الموضوع مو مثل الحچالياه ابوي.. خلاخلص امتحانات واسأل بيبي..خلاعرف مصيري شنو..

وراهه بفترة يومين بلشت الأمتحانات التحريرية.. التهيت كلش فگمت اسوي غدة بالليل علمود الظهر بس ارجع أحمي.. البنات مااعترضلي بعد..

مرت الأيام وبقالي خمس امتحانات..دسمات.. كعدت الصبح بدلت وسويت ريوگ لبيبي وطلعت..اول ما طبيت الفرع شفت الولد نفسه واگف بعتبة باب مقابيل المدرسة.. جسمي رعش بخوفة..شبي هذا .. شعنده..خاف هن دازاته..شيردن مني حموت من الخوف.. تركته سويت روحي ماشفته وطبيت جوه.. شواي ودگ الجرس..دخلت أمتحن.. ضليت هواي .. هذا الولد نساني كل كلمة قريتهه..فتأخرت..

لمن طلعت شفت البنات قليلات..دورت ع الجنطة وين حطيتهه مالكيتهه..بيهه فلوس واقلام..افتريت الساحة بلكت الگاهه هنا هناك..مااحس غير انسحبت ايدي بقوة لنفس المكان القديم.. والولد واكف يمهن.. عفية شنو ماكو رقيب ماكو حسيب.. شلون هيج يسون مداافتهم..شعر راسي وگف..
بعدني مافكيت حلگي كمشني من فچي.. كمت ادفع بي وادفر.. حط ايده على حلگي قوي چن دينتقم مني..
هدى : ولج اني اضل اعلم بيج..من اجيبج هنا يعني لازم ادخنين..وهي جگارة عادية تره..مو عبالج مخدرات ..
علا : عبودي وخر عنهه حبيبي..
وخر ايده..تفلت بوجهه : انت خيخة يمشنك البنات.. وانتن مو شريفات ابد..
هدى : عيني الشرف الج..كمشي دخني..
دنوة : لا ماادخن..واشتكي عليكم..انعل ابوكم لابو حتى الجابكم علي..

دقايق حسيتهه دهر..انضربت على فچي وفخذي.. ضرب بنات .. تأذيت واريد اصيح وهذا حاط ايده على حلگي.. اخر شي وخر ايده وانطتني الجگارة..الموقف شكد مااحچي عنه ماانطي حقه من هوله وصعوبته .. خصوصا بالنسبة لإنسانة مثلي..انسانة ماعدهه أحد ينصحهه.. فقيدة الأم وهي المدرسة الاولى..محرومة الأب على قيد الحياة.. بعيدة كل البعد عن أقرب الناس إلهه..المن احچي وشلون اشرح حالتي.. رائد مامسجل بإسمي خاطر اشكيله كلساع..وشيگول علي.. مايكول هاي بس مشاكل ودوخة راس.. لو بيبي مرة چبيرة صايبتهه جلطة قلبية..فوك ما أخفف عنهه ادور اجي ازيد الطين بله..

أخذتهه منهه دخنتهه مسيرة لا مخيرة..الريحة ترستني ضعف وكرهت روحي أضعاف.. انه لمن شربتهه دخت..جسمي كام يرجف حتى مااحس اذا احد كمشني..ضليت هواي كاعدة ودايخة.. مااعرف شكد وصحيت..نكتت هدومي وطلعت.. لگيت الجنطة ع المصطبة..اخذتهه وطلعت للبيت..

جسمي كله يوجعني من الضرب..وراسي احسه يريد ينفجر.. شوكت اخلص ياربي شوكت..گلبي خلص..

ضليت اليوم كله اتهرب من بيبي..مااحچي الا ابتعد عنهه.. خاف تشم ريحة من حلگي..بس رجعت سبحت وخليت عطر من خالو..رجالي فاكيد ريحته اقوى وتبقى اكثر.. مانمت ضليت اقره.. فبالليل سويت عشة من وكت ونمت گبل رجعة خالو.. مااريد يشتم بيه شي ..
خلصت امتحانين بنفس الشكل..كمت اخاف انكتل وانه الريحة ترستني..فاخذهه أدخنهه..مو يم هلسوالف ابد ولا اتقربلهه .. بس انجبرت.. ردت اشتكي عليهم ..گبل لا افوت للإدارة شافتني غزل..كمشتني من زندي..
حچت بنتر : دروحي اشتكي..تشوفين شي ميعجبج..
دنوة : دمشي لج..ماتخوفيني بعد..

تفاجئت من عافتني وراحت بالعجل..طبيت للمرشدة التربوية حچيتلهه كلشي..
- : ماما متأكدة من هلكلام..تره خطر..
دنوة : اي ست والله متأكدة..
- : اول شي نشوف الموضوع اني وياج وهذني البنات.. بعدين أوصله المديرة..
دنوة : ماشي ست..

اخذتني ورحنا لغرفة الاستراحة..دزت طالبة صاحتهن وأجن.. كامت تحچي وياهن وتستفسر عن موضوع الجگاير والولد .. كالت الموضوع الثاني احاچيهن وحد لأن يحتاجلي وقت .. اخذت الجنط تفتشهه..انه طلعت للساحة جبت جنطتي واجيت.. حتى مافتحتهه..اريد اخلص من السالفة طگت روحي.. انه دايرة وجهي مااريد اشوفهن..
مااحس الا اجاني راشدي قوي..
- : متستحين جاية تشتكين بكل صلافة..
دمعت عيوني : ليش ست..
- : الجگاير بجنطتج..
شهگت ومن هول الموقف حتى دموعي جمدت بعيوني : چذب.. لا ست چذب والله..منين اجن بجنطتي..مو الي وروح امي مو الي..هاي هذني خلنهه بجنطتي..

غزل : ست اني وعلا وهدى چنا بالمغاسل..سهاد وأمنية چانن بالقاعة..وتكدرين تسألين المدرسات او أي طالبة..
كمت ابچي ع المصيبة الدخلت روحي بيهه.. فوگ ما غلطانات طلعن بالنظيف وانه الغلط كله مني..المرشدة اخذت الباكيت ذبته وكمشتني من معصم ايدي حيل..
- : هاي عود انتي الشاطرة والقدوة.. طلعتي هيج.. لعد الطالبات ذوات المستوى المتوسط والقليل شنگول عليهن..
سهاد : ست عوفيهه حبابة..
- : لا امي شنو أعوفهه..هاي تفسد طالباتي..

ضلن يحچن وياهه وهي تحچي وانه ابرر موقفي وأتوسل.. خفت الموضوع يوصل لأبوي..خوفي كله من ابوي.. اذا عرف يذبني بالشارع وأقرب سيارة تدعمني..

من كلامهن عرفت ام أمنية مدرسة جانت هنا بس وره نص السنة إنقلت.. أمنية صارت ملاك وتتوسل بالمرشدة تعوفني وإن هن مايردن شي مني..
- : هاي لخاطر ست احلام (ام أمنية) اتركج.. بس هذا لا يعني إنچ غير مذنبة..فلتبرئين نفسج..
دنوة : ست والله مامسوية شي..واعتذر بس حبابة لاتگولين لأبوي..والله يموتني..
- : لعد ماخفتي من اتهمتي البنات بهيج موضوع خطر..
عاينت عليهه ودنجت : اسفة..جنت ضايجة منهن.. بس الجگاير مو الي والله وروح امي مو الي..

ضلت تحجي وياي وتنصحني..اووف ياريت النصيحة توصل للشخص المطلوب مو الي..انه طاهرة ونظيفة مامسوية غلط والله.. ضليت كاعدة وياهم تقريب الساعة بعدين دگ الجرس وطلعنا للبيت..

خلصت الامتحانين الاخيرات..هن يتشمتن بيه چي صارت التهمة براسي..الشغلة الخلتني اخضعلهن بالزايد.. خفت يسون الأسوأ من هذا..خفت يتهموني بشرفي.. هواي احتمالات إجت ببالي..وبكلهن اعرف ابوي مايوكف وياي اذا حچيتله..اي مايوكف وياي..حيذبهه براسي مثل المرشدة.. فاختصر كلشي واسوي مثل مايردن..بعدني من ادخنهه ادوخ وراسي يكوم يوجعني..

بالامتحان الاخير رحت للمكان هذاك بعد ما تأكدت طلعن.. اخذت الگطوف والباكيت.. اريد اشوفه لأبو محل يگلي شنو هذا النوع.. اخذتهن وطلعت..البنات متونسات چي اخر يوم.. وانه اريد اخلص وارجع للبصرة..طلعت روحي.. رحت للمغاسل اعدل شالي..حسيت عليهن قريبات..شجابهن يحظي شجابهن.. انه تأكدت طلعن ..لو حظي المعثور..
غزل : ها ياحلوة..عطلة سعيدة مقدما..
ماجاوبتهه سكتت..
هدى : اوف..صدك تونسنا وياج..حرامات حنفتقدج.. وشيسمو.. تره ريحة جگاير قوية بيج..
علا : ههههه..اي اني هم همين اشتميت..ديري بالج..
جريت الصدرية من يم صدري شميتهه..صدك بيهه ريحة قوية..

انداريت عليهن : الله يموتچن كولن امين..اشوف بيچن يوم.. عساچن بالموت يارب..
عفتهن وطلعت.. گمت اخاف من خيالي..اتجنب خالو شكد ما اگدر.. وبيبي همات..

تمشيت لدكان الحجية..وكفت بالباب.. عيب شگللهه اريد من هاي الجگاير..لا موخوش شغلة.. عفتهه وطلعت ع الشارع العام.. ع الاقل محد يعرفني ..فتت لمحل سوبرماركت ضخمة.. رحت على خانة الجگاير ومطلعة الباكيت شوي .. لكيت منهه.. اي هي هاي نفسهه..تأكدت من الاسم والصناعة ورجعته.. طلعت بالعجل وتمشيت للشوارع الداخلية.. طلعت الباكيت اقراه.. بي نسبة نيكوتين فضيعة..ومايصير يدخنوه الأقل من ١٨ سنة .. يسوي نوبات إرهاق وضيق بالتنفس..

انه اقره ومصدومة..نفس الديصيرلي لمن أدخنهه.. كمت ابجي وشمرته بالطريق.. مااريد ارجع للبيت ..ابوي حيجي ياخذني هلأيام..الريحة شلون..الموقف من اتذكره اموت الف موتة.. لمن كمش فچي..وخليت الجگارة بحلگي .. سمعت حچي يقشعر البدن لسماعه..انه المااحل رجل دجاجة.. شكد صعبة الدنيا..

انقهرت وروحي صايرة بخشمي..مشاعري تلخبطت .. مااعرف شريد..اريد واخاف .. افكر واتراجع .. دوامة لامتناهية انه بيهه.. اريدهه تخلص دوختني..

فزيت من تفكيري على هورن سيارة..نزل رجال يصيح ويغلط.. يطلع عمره بالأربعين..
- : انتي متشوفين..عمى حتين عمى..جان دعمتج وتعال انطي فصل وصخام..انتن بلاوي مو بنات..بله منو دازچ تذبين نفسج ع السيارات..
دنوة : اعتذر عمو مااقصد ماشفتك..
- : اي مو دااگلج عمية..
ضل يعيط لحدما رفعت راسي على صوت رائد قريب علي كلش.. وگف يمي ..

رائد : شبيك تصيح عليهه..ماتشوفهه صغيرة .. بگد ابوهه انت.. وين العقل ..
- : وانت منو..الگوا... مالتهه..
مااحس غير رائد كمشه من ياخته ودفره.. صارت مشاجرة بيناتهم ..هو يحاول يكمش روحه ومايضربه.. وهذاك لسانه مال دلالة ويصيح.. اخر شي طلعو زلم ثنين من بيتين فاككوهم والرجال اعتذرلي وراح..انه هلوكت كله ابچي وأجر برائد من قميصه اريد يعوفه خاف يكتله ونروح بداهية.. اندار علي هو ويعدل بقميصه..
رائد : صعدي بالسيارة..
دنوة : رائد ..لا هيات...
خزرني : صعدي اگلج..
سكتت وصعدت..اجه يمي وحرك السيارة ع البطيئ..

طبگ السيارة بدربونة وطفاهه..
دنوة : هاي ليش عفية..
رائد : انطيني ايدج..
عاينتله بإستغراب : شنو..
: ايدج..
دنوة : لا ليش فهمني..
جرهه من حضني..كمشني من چف ايدي وقربه من خشمه يشم بي ورافع حاجبه بقوة..توترت من حركته وخفت اسأله شدسوي.. وخر ايدي عنه..وگام بشكل خفيف تقرب من شالي شمه بس مبتعد عني..
حجيت لا اراديا : رائدددد..شدسوي..
ضغط على ايدي : ريحة جگاير ترس بيج..انه واكف يمج بالشارع واشتميتج..ماتخافين انتي..

هو كال هيج وطگيت بچي : والله مو انه..اخاف..
رائد : من شنو تخافين..
سكتت ماجاوبت..هد ايدي وصعد الجام..
دنوة : عفية شدتسوي..نزلني خلاروح للبيت حموت .. هسه يشوفونا الناس..
رائد : مظللة محد يشوف..احجي شصاير..خلافتهم..
عاينت بعيونه وسكتت..
رائد : البنات هذنيچ سون شي..
عطت : اي سون..سوون كلشي..اكره المدرسة واكره بغداد.. اريد ارجع للبصرة..بعد مااطلع..مااريد ادرس مااريد.. عفية حاچي ابوي يرجعني..

كمت ابچي بشكل هستيري..حجيتله كلشي..من يوم الشفتهم وي هذاك الولد وشلون جبروني ع الجگاير.. حچيتله شلون كمت اتختل واخلي عطور بس علمود ماتبين الريحة.. موقف الإدارة وكلشي بالتفصيل.. ابچي وي كل كلمة اكولهه واتذكر الصار بذاك اليوم..شي فوك طاقتي..مااتحمل هيج انه.. حسيت بالقرف والرغبة القوية بفقدان ذاكرتي او احساسي لفترة مؤقتة..بس كلشي ماصار وعشت الموقف بدقايقه ولحظاته..

عاينت علي شفته عاگد حواجبه ومندار علي يسمعني بكل ما عنده..
كتله بهضيمة : لاتفهمني غلط..والله هو كمشني غصب.. ماكدرت اسوي شي..
فرك وجهه وتقرب مني : طز بي ابن الكلب..فاهمج .. انه مو گتلج لاتشتكين..
دنوة : شمدريني ماجان جدامي شي اسوي وخفت منهن..
رائد : خرب عدو الله..والله طلعت من المقر اليوم اجازتي.. كلت أمر اشوفهه اليوم اخر امتحان إلهه..ماحسبت حشوفج بهيج وضع..

عاينت بعيونه هو ويحچي ومنفعل..تقربت منه حضنته.. كمت ابچي بحرگة واعصر بقميصه..
همس : دناوي..
دنوة : خليني حباب..گلبي يوجعني والله يوجعني.. مااعرف شسوي..مااعرف..
ضليت ابجي هو ساكت ماكال شي..بس مابادلني.. بچيت هواي الى أن دخت وابتعدت..
دنوة : اسفة..ماادري تصرف غلط مني..اعتذر..
عاينلي هو ويفرك بوجهه وعيونه حمر..

شغل السيارة ومشى بيهه ع البطيئ بالشوارع ..
رائد : ليش هيج شخصيتج..مو حاچيتج وفهمتج شلون لازم تتصرفين..ليش ماتاخذين بالحچي..
دنوة : اخذت..بس ماشفت الموقف الصرت بي.. هن هذني مااحسهن بنات..والله ولد..وهذا الولد خوفني اكثر.. شگدر اسوي اخاف انه اخاف..
رائد : بنيتي ..ابوية.. رقمي يمج خابريني اجي اخلي رجلي بحلگه اشگه بالنص..انه علمودج مااخابر..اگول خاف تصيرلهه مشكلة..چا عليش انطيتج الرقم..
دنوة : مو..مو كلت هو ملتهي بشغله وتعبان..ادور ازيدله تعب وتفكير زايد..
رائد : لاتفكرين هشكل بعد..بمكان ما تشغليني بفترة معينة هسه شغلتيني اكثر..حيضل بالي يمج وخايف عليج..

عوفينا ..انعل ابو لابو.. اريد تنطيني عنوان وحدة من هذني الگح... وانه اجيبه من إذانه اكعده ع الحديدة..
شهگت وانداريتله : لا لا..عفية لاتسويلي مشكلة..
رائد : لج انه لو اصل عليج كلشي مااسوي..يله دليني على بيت وحدة منهن وانه اعرف شسوي..مااجيب اسمج لاتخافين..
دليته على بيت غزل وانه اترجاه مايسوي شي يفشل.. لحدما حفظ الطريق..
رائد : اسويلج شي يفشل..استغفرالله..يولي لاتخلين ضغطي يصعد.. اريد اجيبلج حگج..خاطر يعرفون وراج ظهر مو هيلگية مثلهن..

عاينت بعيونه وسكتت..ضل يحاچيني ومحروگ دمه علي.. انه كلساع ابچي لمن اتذكر المواقف..
گبل لا نوصل البيت ندهته : رائد..
رائد : كولي ابوية..
دنوة : شلون اوخر الريحة..خايفة..
رائد : هسه انزل اشتريلج ..

فر السيارة وطلعنا ع الشارع العام..نزل لمحل شواي واجه.. خله علاگة بحضني..
رائد : فرچي اسنانج وره كل وجبة بهلمعجون.. وعلچي علچ نعناع.. هسه رشي من هذا العطر جبته ..ترجعين للبيت تغسلين هدومج كلهن ولاتخافين..
فتحتهه اشوفهن واتعب كلامه..خليت من العطر صدك ريحته قوية حيل..وعلچت ..وصلني للبيت.. ردت انزل..
كال : گبل لاترحين اريد تعرفين انه اريد اكمشج بالحلال.. لمن مابادلتج مو مااحبج..احبج واخاف عليج من الحرام حتى مني.. انه رجال اول وتالي وإلي غريزتي.. فهمتيني ..
صفنت بعيونه وشفايفه شلون يحچي بذبول ..
همست : شكرا على كلشي..
رائد : تدللين بنيتي..وبالليل خابريني طمنيني عنج..
دنوة : ماشي..
ابتسملي : يله روحي وانتبهي لروحج..

بادلته ونزلت ..ضميت العلاگة بالجنطة وسويت مثل ما كال.. خالو مالاحظ علي..كمت اتجنبه وألف دعاء على لساني.. رائد خابرته بالليل طمنته عني دقايق وسديته..وره عشر ايام بلشت تروح الريحة من حلگي وايدي ..لأن الفترة الدخنت بيهه گصيرة.. والحمدلله ..بس نفسيتي مكسورة ع الصار..
وره هلعشر ايام جنت كاعدة بالغرفة يم بيبي صبيتلهه چاي وكعك..جان تندك الباب.....

يتبــــــــــــــــــــع.................