رواية اسألي عني الليالي الفصل السادس عشر 16 - بقلم رقية جاسم

قناة التليگرام

حساب الانستگرام

الـبـارت الـخـامـس عـشـر................

وره نص ساعة او اكثر..صبن النسوان بالاستقبال.. اجت سرور وياي تمشيني علمود اكل.. يالله بلشنا جان يصير صوت صياح بالديوانية..وصوت ابوي بارز هو ورائد.. كمت مفزوعة ..وكفت وره باب الديوانية اريد اعرف شكو..

محيي : شجابك انت..دمشي اطلع بره لا اطيح حظك..
رائد : انه مخليلك مقام واگول عمي واكبر مني زحمة ارادده.. محيي : غصب عنك تحاچيني بإحترام..ولو اذا طلعت ناقص مانكول لا..حالك حال ابوك..
رائد : لاتستغل طولة خلگي وصبري..انه صابر وساكت لخاطر هلوجوه..وإلي يمك حاجة ارد اخذهه ماطول كلكم كاعدين..
محيي : مالك يمي فلس احمر..شرايد بالضبط..
رائد : تخسى فلوس الدنيا كلهه..جوه قندرتي حشاكم.. اداين الوادم مااتداين منهه.. بس انه جدامكم كلكم نهيت على دنوة بت عمي..سالفة عقيل شيلوهه..صارت جوه جناحي واليفتح موضوعهه بزواجة لو خطوبة أرشه دم..
محيي : يول انت مخبل..انعل ابوك لابو اليطلع وراك.. شني تنهي عليهه..چا احنا شني..

رائد : انه شدااگول چا..جدامكم نهيت عليهه.. طلبتهه منك مرتين عيني واغاتي..عمي حزام ظهري..بس ماكو.. جنت بالواجب حتى ماعندي اتصال بأهلي..طبعا محعرف بالصار.. كلت هو ماقبل باليسر انه اجيبه بالغصب وتعذرني.. عقيل مو احسن مني..رجال متزوج ماتنودخله بت بيت.. وفهمك كفاية عمي..

ثواني واسمع صوت بوكس ماادري دفرة..تعالت اصواتهم ماگمت افرز صوت عن صوت..بس سمعت صوت باب الديوانية انفتح..اليطلع ع الحديقة الچبيرة..تمشيت وگلبي يدك سريع انفاسي حارة اهجسهه تحرگ ريتي.. النسوان طلعت من الاستقبال يردون يعرفون شكو..انه رحت يم باب الكليدور تچيت روحي علي ..جسمي نحلان كله من المرض.. ادور سمعت هيج كلام..مدااصدك..يعني هو هذا الرائد كال يسوي.. اي ماكو غيرهه ..نهى علي.. فتحت البردة شوي اعاين من الشباچ..

رائد واكف على صفحة وعمامي مطشرين بالطرمة..بس جدي قريب علي ..خشمه يكت دم چن مي جاري..لابس تشيرت حبري بس الدم مبين لونه اطوخ من لون التشيرت..دمعت عيوني على وضعيته.. حيتأذى بسببي..لو ادري هيج حيسوي جان ماقبلت.. ادري بأبوي يدروش اذا عرف.. جدي ضل يغسله وهو بعده يكت.. اخر شي اجه سالم انطاه وصلة خلاهه على خشمه وركب السيارة هو وعصام واحمد..كمت ابچي علي.. شكد يتحمل ومايحچي ابد.. شواي وطلعوا وراه بقى بس ابوي وعمي لواء .. طبيت للغرفة بالعجل..هسه يجي ويضربني.. قفلت الباب وسندت روحي عليهه..يارب عدي هليوم على خير.. مابيه حيل..هو انه تعبانة من المرض..ادور يصير شي لرائد..

فزيت ع الباب تندك بقوة وتندفر..كمت من مكاني ارجف بخوف..هذا ابوي..
محيي : بت الكلب فتحي الباب لا اكسر راسج.. تكليله تعال انهي علي..لج انتي الذبح گليل بحگج..
من الخوف حتى دموع ماضلت بعيوني..اسمعه يصيح اليوم اقتلهه..اليوم اطلعلهه جلد جديد..اعرفه يحچي هيج دائما بس هلمرة التوقع شي والواقع شي ثاني جدا..وره نص ساعة او اكثر مااعرف .. بس الاعرفه لو انذبح ماتطلع مني قطرة دم.. مااحس غير اندفرت الباب حتى القفل انكسر.. كمزت من مكاني رحت كرصت بالركن.. فات هو ويسحب أقسام.. رفع مسدسه بوجهي..
محيي : كومي..كومييي رعنة ادبسز..
لساني تربط..كمت ارجف بلا وعي وگلبي يدك بكل جسمي.. ادور اريد اكوم مااكدر..

جرني من ايدي حيل..وعيت ع الديصير وبچيت من وجع الجرة.. كمت اتوسله : بابا الله يخليك..شدسوي عفية.. والله ماادري شديصير مااعرف..
عاط بيه : ماتعرفين موووو..لا تعرفين..انتي راس البلة.. ماتموتين وتخلصيني عار علي عااار..
بلحظة غضب..لحظة إنتزاع كل ذرة رحمة بداخل أي اب تجاه بنته.. ضرب طلقة بالگع بين رجليه..كمزت بفزة وهلع.. تهسترت كمت ابچي بشكل جنوني ..هو كامشني من ايدي الحسيته انخلعت من وره قوة ايده..اجه عمي لواء وعامر ويونس .. يردون يوخروه مني ماكو..چلّب بيه..انه اتوسل يوخر عني.. روحي فرفحت من الصدمة ومن الألم بإيدي..

لواء : البت حتسودن من وراك..محيي اتركهه خاف ربك..
محيي : لاااا..اليوم اقتلهه خلاص..ماعندي هيج بنات.. اذبحهه ولا أخلي ابن حامد الگرن ياخذهه..

بهللدقايق فصلت..روحي تروح يمنى وتجي يسرى.. بعدني مريضة وأدوخ من اوكف..إذاني بيهه طنين خفيف.. هسه زاد كام يدبي بكل جسمي.. دقايق تصعب على إنسانة مثلي.. شفافة.. هشة وضعيفة.. الرجعني لواقعي صوت رائد.. ماادري شلون اجه وشوكت..بس حسيت علي كمش ايد ابوي وايدي فصلهن..كمشته إلي قوية وأذتني..بس نسيت الوجع من شفت خشمه مشدود ومخلين علي لزگة.. عمامي كمشوا ابوي ورائد سحب المسدس من ايده..دنج يم رجلي شال الطلقة..

رائد : تحچي بالمراجل وترفع سلاح عليهه..دنعل ابو المرجلة اذا جانت هشكل..
محيي : شوف لك..اذا ماتركتهه والله ثم والله..اخلي طلقة براسهه وبراسك وادخل سجن مرتاح..
شامخ : يول لاتمسلت..الزلمة نهى عليهه وانتهت.. مو من شيمنا نسقط النهوة والحگ ينگال رائد احگ بيهه من عقيل.. وانت شون ترفع سلاحك عليهه..لا بوية..شني شفتني رافع سلاح فديوم عليكم..

ضلوا يحچون وانه ليهسه منظر الطلقة والموقف جدامي.. حتى ماانتبهت عليهم ولا ركزت بكلامهم.. دقايق والكل انسحب للديوانية.. شفت الغرفة هدأت طحت من طولي ..حتى راسي مااكدر ارفعه..جسمي كله خدر وإنشل..كمت ابچي بحرگة ومغمضة عيوني بقوة..مااريد اتذكر.. اسمع صوت خالة يمي تريد تگومني وانه متيبسة من هلع الموقف.. اجت جديتي كعدت يمي تقره على راسي..سحبته بحضنهه وشبگتني بشيلتهه.. ريحتهه هادئة ماتشبه عطورنا..مال اهل گبل.. شبگتهه واحشر راسي بحضنهه..ضليت ابچي واهجس بكد البچي البچيته بداخلي اكثر..تناسيت كل مواقف ابوي القديمة من صار هلموقف المرعب جدامي..
الحجية غادة : يبنيات..طلعن حبيبات..لمن تصبن الغدة جيبلي الي ولدنيوة هنا..
اجت سرور باستني وراحت هي والبنات ونسوان عمامي.. البيت ضج بالبشر خاصة لمن ابوي ضرب رائد..

طلعت مرة عمي وسدت الباب وراهه.. جديتي رفعت راسي وعاينتلي هي وتمسح دموعي..
الحجية غادة : كافي حبيبة لاتبچين يبعد جديتج..
دنوة : جدة شفتي ابوي شسوه..حموت انه اخاف منه.. جدة راد يخلي الطلقة بيه بس ربج ستر علي..شنو ذنبي انه شمعرفني..
مسحت على راسي هي وتعدل خصلات شعري بإيدهه الغلبت عليهه تجاعيد الكبر..
الحجية غادة : انه اليوم احاچي واعرف شسويله.. الصار مو هين حبيبة..بس هو هسه يحس بالعمله ويتعذر..
دنوة : مااريد يعتذر جدة..اريد مايكتلني بعد..ليش سرور والبنات مايتقربون عليهن عمامي..ليش انه انكتل عادي وجدام الكل..

غصيت بالكلام وبچيت حتى ماكملت..باستني بحنية من خدودي وراسي..
الحجية غادة : بكيفج يمة لاتردين..جدج يتصرف .. ماادري شجاريله الزلمة تسودن..بس هاهيه جدة..انتي صرتي لرائد..
حركت راسي بمعنى اي وسكتت..خطية هو همات توجع من وراي.. ضلت جديتي تحچي وياي تريد تنسيني ..شكد خافت علي وكلساع تسألني شلوني..اخر شي خشمي كام يرشح وطنين إذاني زاد..كمشتهه من دشداشتهه حيل..
شهگت بخوفة : شبيج حبيبة..شصابج..
دنوة : جدة إذاني عفية دتوجعني..
الحجية غادة : مااخذتي دواج جدة ..
همهمت بالرفض..صاحت على ورود جابتلي العلاگة مال ادوية وياهه ماعون فواكه وأكل..

كله مااشتهيته..ضعفت ع المرضة هاي هواي.. اريد الوجع يروح ..تلث دكاترة رحت..شكد اروح بعد.. كلهم يگلولي التهاب بالإذن وادوية كومة بدون نتيجة.. اكلت شوي واخذت الدوة.. من اخذه أهست وادوخ..نمت بحضن جديتي ماادري شصار بعدين..بس كعدت المغرب شفت روحي بفراشي ومتغطاية.. الباب مردودة وصوت الجامع بإذني..انرهبت من الصوت.. كمت على كيفي تمشيت بره الغرفة..لكيتهم ديتوضون ع الصلاة.. كعدت ع الدرج واتفرج عليهم..ماكو واحد من الولد وعمامي همات..

ضليت كاعدة ومسطورة مو وياهم.. اجت خالة ابتسام باستني وخلت ايدهه على گصتي..
ابتسام : شتحسين روحج حبيبتي..
دنوة : زينة خالة..بس دايخة..
ابتسام : اندري وين ناخذج بعد..كومي كعدي بالاستقبال موزينة عليج البرودة..
عاينت بعيونهه وگوة مفتحة عيوني : وين ابوي..
ابتسام : طلع لبغداد من الظهر..
شكد قاسي..عافني مريضة وراح.. عفت التفكير ورحت وي خالة للاستقبال..البنات كاعدات ماادري وين الكبار..كعدت يم سرور..عندي هواي اسئلة اريد اعرف شصار..

حچت وياي عن صحتي بعدين سألتهه..
دنوة : شصار على رائد..شلونه..
سرور : هاهيه نهى عليج..صرتي اله..بس ماقبل يسوي خطوبة وعرس..گال انه بس اريد اروح لواجبي واجي متطمن هي الي..مو مثل هلمرة..سأل عنج راد يشوفج كتله نايمة ..
دنوة : وخشمه..
سرور : ابوج ضاربه على خشمه وصاير انحراف بي.. هو منا ضغطه صاعد وصاير عنده هيج..
دنوة : اووف شكد مشاكل صارت من وراي..شلون عفية..
سرور : مو ذنبج حبيبتي..هاهيه صارت بعد..شوفي شلون دافعلج ورادج رغم كل الرفض الصار..
همست : سرور احبه..مدااصدك الصار حقيقة.. يعني راح عقيل خلص..
گرصتني كمزت وعطت : ادبسززز..

سرور : ههههه..مو تردين تتأكدين حقيقة يا لا..هسه تأكدتي..
دنوة : دولي كبر.. كعدت ع القنفة اللخ.. خلص الليل نفس كل يوم.. ماسويت شي ..بس تعشيت واخذت الدوة.. ضليت كاعدة يمهم لحد الدعش وطشوا بالغرف..اجه جدي اطمن علي وراح.. سديت الباب وتمددت ..مااجاني نوم مانعسانة.. بس الطنين يدوخني..فاجبر روحي ع النوم خاطر مااسمعه..

ضليت اتمشى بالبيت..بلكت اتعب وانعس.. اجت سرور تحاچيني وتتلفت هنا وهنا..
عاينتلهه مستغربة : شبيج..
سرور : رائد حيجي يشوفج..
دنوة : عزززه..وين شلون..
سرور : هنا من الشباچ..فخاف يندك فتحي حاچي خوش.. مايكدر يفوت للبيت حتصير قال وقيل وزحمة هماتين.. فهمتيني..
دنوة : ديله روحي فهمت..

خلت وراحت..رجعت للغرفة سديتهه ماتنقفل بعد.. ضليت اجرب لحدما قفلتهه..الا قفلتين اذا وحدة بحساب ماقفلت اصلا.. ضليت ألوب بالغرفة..الى أن صارت بالوحدة وشوي جان تندك الجامة..تمشت وساندة ايدي ع الحايط..فتحت الشباچ على كيفي..اول ما شافني ابتسم وكعد بالگع.. نزلت كعدت صرت بمستواه.. لحظات صمت بيناتنا ..تقرب مني وعيونه بعيوني..
رائد : شلون صحتج بنيتي..
ركزت بعيونه..اهجس روحي ذابت بنظراته..عصفورة صغيرة وتفركش عش امهه وطارت ماتدري وين تروح.. تريد أمان وبيت تدفى بي.. هيج اريده ..اريد شبگته الدافية بيوم شبگته بالسيارة..غلطة مني بس شعوري مايتكرر وي غيره..

الدموع هلهلت بعيوني..بچيت رأسا : موزينة..موزينة..
همسلي : اشش يروح روحي..شبيج باباتي مريضة..
دنوة : كلشي بيه.. انه خايفة من الصبح ..من موقف ابوي.. وإذاني توجعني مدااصير زينة..شلون شسوي..عبالك بيهه نملة دتمشي..خاف امو...
قاطعني : اسم الله عليج بنيتي لاتگولين هيج.. باجر اجي انطي عمج قاسم عنوان دكتور مضبوط روحيله..هسه ناسي اسمه مديحضرني..من عمري على عمرج غاليتي..
دنوة : انت شلون صرت..
رائد : احسن الحمدلله..بس يصل علي..
دنوة : اسفة..
رائد : ليش الأسف گلبي..
دنوة : يعني اعتذر بمكان ابوي..هو انه ضل بالي عليك خفت صارلك شي..
ابتسملي بتعب : انه يم بنيتي مابيه شي..اعتذارج واصل عمري مايحتاج..

ابتسمتله ومسحت دموعي..انتبهت لإيدي ترجف چن واحد بردان ويطگطگ من البرد..نزلتهه بالعجل..
رفع حاجبه : شبيهه ايدج..
دنوة : ها..ماادري والله..
رائد : بردانة..الجو حار تره..
دنوة : لا لا..مابردانة..بس مااعرف شبيهه..

رائد : حبيبي..بنيتي لاتخافين..صرتي الي جدام الكل.. وأي شي يصير ترجعيلي..انه وياج گبل لايكون خيالج بسدج.. لمن طلعت من عدكم حاولت انام ماكدرت..منظرج جدام عيوني وانتي مرعوبة وشالج نازل من شعرج..عيونج ذبلانة وجواهه مطعن.. ادور ضعفانة خلصانة..عگل ماضل براسي لمن شفت الطلقة جوه رجليج..كلت هذا اليوم سوى هيج باجر شيسوي.. بنيتي الحبيتهه من هي وطفلة ماشفتهه الا لمن هي مرة كاملة مكملة والكمال لله..بس بهلموقف شفتج طفلة..طفلة تعبانة تريد تغفى بحضن أمهه..أبوهه..شلون هيج خايفة ومدروشة.. خفت يصيبج شي چي الطلقة مو هينة لمن تنضرب جدام أحد.. خاصة هلموقف..بطلعتي حاچيت سرور سألتهه عنج.. كالت تخربطت بس طلعتوا وجدة بقت يمهه ماقبلت نضل عدهه..
: ..اي صح ماقبلت..

رائد : انه من البارحة كاعد وداعة عيونج الشهل ماكدرت انام.. انتي على بالي ومشغول بيج .. ادور سرور قلقتي اكثر.. كلت لازم اجي اشوفهه..ماترهم احاچيهه بالتلفون..

ابتسمت وعيوني مدمعة من كلامه ونبرة صوته الحنينة.. ياربي ليش اريد اشبگه..اريد عطره يرسم نقوشه بروحي وأنفاسي.. همستله : احبك..ومااعرف يعني شلون اتشكرك شكد مهتم بيه وبالك علي..
الابتسامة انرسمت على شفايفه بشكل يجذب.. : اووف يولي غير اموت عليج..لاتتشكريني غاليتي..كلشي يروحلج فدوه.. بس اريد اگلج شي..
دنوة : شنو هو..
رائد : اميرتي البشر ياخذ قوته من أكله.. اكلي علمود تصيرين زينة..اذا تبقين هيج ماطيبين..
دنوة : مو مااشتهي شلون يعني بالغصب..
رائد : اكلي اكلات تريح معدتج وتدفيهه..تحتاجين دفو خوش.. مو تشتغلين ومطربسة بالمايات..

دنوة : ااممم..اي ان شاء الله..
رائد : يله حبيبي..اروح انه..روحي نامي وارتاحي.. ماصار الا اللازم يصير.. وانه وعد بس تخلصين امتحانات نص السنة اسوي الخطوبة وكلشي على أتم وجه ومثل ماتحبين..
ابتسمت وفرحت بگلبي وبروحي وبكل جوارحي : ماشي..

گام هو وينكت هدومه..ودعني وراح يتمشى ليغاد.. ضليت اراقب حركاته ومشيته لحدما راح..كمت على كيفي سديت الشباچ وصعدت فوك نمت يم البنات ..هنا حارة والكهرباء طفت.. تمددت وغفيت..

ثاني يوم كعدت الصبح من وكت على وجع إذاني.. عمي قاسم التهى وياي.. لحد العصر اجه علي بغرفتي..
قاسم : گومي بدلي عمو..
دنوة : وين نروح..
قاسم : رائد خابرني انطاني اسم دكتور زين.. لبسي بين ما اكمل واجي اخذج..هذا ابوج الله يسامحه.. استغفرالله.. يله عمو حبيبتي بالعجل..
عافني وطلع..بالباب صادفه عمي كاظم..
كاظم : وين ماخذهه..
قاسم : طبيب..
كاظم : من شوكت نودي نسوانا اطباء..اخذهه لطبيبة..
قاسم : خوية البت حتروح لربهه اذا مااخذتهه.. عود بتك لاتاخذهه لطبيب..هو محيي راضي لاتحچي انت..

عمي كاظم راد يحچي وقفل الموضوع..راح يبدل.. تمشيت سديت الباب وبدلت..لبست شلون ماجان..مابيه حيل روحي .. كعدت انتظره بالاستقبال..عمامي رغم كلهم مخلصين مدارس وحتى كليات بالقليل معهد بس طابع الديرة غالب عليهم.. حتى ابوي..بس هو چي اكثر شغله ببغداد فعنده عادي اذا ماالبس عباية او اروح لدكتور.. بس الباقين متشددين حيل .. حتى الصدرية الاشتريتهه لو يدرون بيهه چاكة جان انشگت جدامي.. انه ابقى بنية وتعجبني شغلات هواي ..تلث ارباعهه متنازلة عنهه بس چم شغلة تعجبني واخذهه ..

شواي واجه عمي..اخذني ورحنا للدكتور.. فحصني وشاف الراچيتات القديمة..هم ادوية ونفس القوانة..نوعين عادلياهن وثنين جدد..تعليمات وچم شغلة بعدين طلعنا.. اشترالي الأدوية ورجعنا..بس تمددت نمت..ماانتبهت ليل مغرب.. بس راسي يوجعني وجع موطبيعي وإذاني هماتين.. خالة ابتسام كعدتني بالليل جابتلي اكل..اكلت وانطتني الدوة.. ضليت ألوب بالفراش بعدين غفيت..

مرت ايام على هلنمط..صخونة ووجع راسي يزيد.. قبق راسي احسه يريد يطك من الألم..اكعد بالليل ابچي من كل گلبي اريد يروح..اهدى..هم نفس الشي..لحدما اتعب وانام وحدي.. ابوي ماشفته من يوم الراح لبغداد..بس خابرني مرة كال جبت شهادتج ناجحة..حتى ماسألني شلون صرتي.. رائد على طول يسأل عني من امه لو يخابرني بالليل على تلفون خالة ابتسام لمن تنام.. نفسيتي تلفت من المرض..اشوفهم يتمشون وواكفين على رجليهم وانه حسرة علي الوگفة..رأسا ادوخ واطيح..عمي التهى بيه من دكتور لدكتور بدون فايدة.. بيوم كعدت بالليل اريد اغسل محترة..سندت ايدي ع الحايط وتمشيت للحمام.. سمعت صوت جدي بغرفته يخابر وعصبي.. شعجب كاعد هسه والدنيا ليل ..وكفت اسمعه..

شامخ : باجر اذا ماتجي تاخذ بنيتك لطبيب زين اسوي الماسواه أحد.. مااعرف ..تطلع الفجر بنصاص الليالي .. تجي يعني تجي..البت حتموت حرام عليك..وكلتك حرام لو شني.. دمشي انگلع باجر الگاك بالبيت زين لو لا.. يله روح لاخلف الله عليك..

الا يعتب علي يله يجي..هسه يجي يحملني منية بجيته.. عفته ورحت غسلت.. رجعت للغرفة ضليت ألوب من الوجع.. الكل نايم هسه.. بعدين تذكرت جدي كاعد يعني جديتي هماتين.. رحت لغرفتهم..فتحت الباب وطبيت.. جدة كاعدة تلم ضفيرتهه.. جدي كاعد يمهه يحاچيهه..تفاجئوا من جيتي..
شامخ : ياهله..شبيج بنتي..
ماجاوبته..بس تمشيت لعنده كعدت بالگع..حضنته ..كام يمسح على شعري ويبوس راسي..ماادري ليش جدي اهجس روحي اميرة يمه..ارتاح اكثر من جديتي.. هو جان يگودني من ايدي يمشيني على حافة الشط..يگلي هيج جنت اخذ عمتج سناء..اتخايلج بيهه..يعني عودني علي وعلى طبعه الحنين.. وبحكم ابوي انسان ماحسيت بحنانه فديوم فهو جان المعوض عن النقص الحاصل منه..

شامخ : شبيج يبعد جدج..متوجعة..
دنوة : اي جدو..راسي ديوجعني حيل..شوفلي حل الله يخليك..
شامخ : اخذتي دواج..
دنوة : اي اخذت..مديفيد شي..انه چنت نايمة وكعدت مصخنة وراسي يوجعني..
ضليت يمه ومغمضة عيوني اريد يروح الوجع..كام يقره على راسي بصوت ناصي..شوي ارتاحيت ..من الألم غفيت.. عبالك جنت اركض مسافة طويلة وهسه استراحيت..

فزيت الفجر على صوت ابوي يمي..لگيتني كامشة جدو من دشداشته وراسي على رجله..مامتحرك خطية .. شلت راسي سلمت علي..تقرب مني خلى ايده على رگبتي وگصتي..
محيي : مصخنة..وين اخذج بعد..
شامخ : ليش انت اخذتهه اصلا..البت صارت عدهه خرعة من الطلقة..انت الا تسودنهه يله تفوخ..
محيي : لا ماعليهه الطلقة..هي مريضة من گبلهه..
شامخ : هسه ماعلينا..تاخذهه تسويلهه تحاليل وأشعة وكلشي كامل..
محيي : يابة تعبان تره جاي من سفر..
شامخ : چا مافكرت بيهه من تاركهه على أخوتك ياخذونهه للدكاترة.. گم لاتغثني من صبحيات الله ..

ضل يحاچي وانه ساكتة..راسي زين..دائما من اكعد الصبح زين بس وره نص ساعة يگب علي..بلكت تحسن هسه..

مشى الوكت للعصر ورجعلي الوجع..گمت أون ودموعي تصب بدون صوت..جدي التهى عنده فصل هو وعمامي .. والبيت هوسة صار..تمشيت لغرفة ابوي..مااحس غير تمزلگت وطحت على ساعد ايدي..لو اگول وجع راسي أهون من هاي الطيحة مااچذب.. كمت اصيح وابچي ..طلع ابوي من الغرفة مخترع.. نزل يمي بس كمش ايدي عطت بوجهه..
دنوة : لااااا..دتوجعني بابا حموت مدااتحمل..
محيي : شكو فهميني شصار..
دنوة : ماادري هو انه طحت هنا ماانتبهت ع المي..
ضل يستغفر وگومني..صاح على خالة فاطمة خلت عباية على راسي واخذني للمستشفى..الطريق كله ابچي ألم فضيع موطبيعي ابد..ادور الطريق موخالي وكله امريكان.. ياهو العجبوه ينزلوه..والقوة العراقية الطلعت بهاي الفترة ...... يستهدفون المذهب المغاير..خفت على ابوي لأن نزل يحاچيهم..

شواي ورجع..ركب بالعجل وطلعنا..دخلني جوه واجه الدكتور علينا.. دخلوني طوارئ لأن خبصتهم بچي وعياط.. وجع موطبيعي مااتحمل.. اجه الدكتور يشوفني..كمش ايدي .. روحي شاغت..
دنوة : لا دكتور فدوه لاتكمشهه..
دكتور : الظاهر كسر صايرلج..
سوالي أشعة..بعدين كال كسر ولازم تچبس هسه.. بالاول لازم تنطگ.. اجه يطگهه .. ولو مامجربة احساس الولادة والطلوگة.. بس احس هذا الوجع اكثر منه بقاطات.. عود خلالي مسكن بالكانيولة بس ماكو ولا چن.. ساعد ايدي وچفي مفصولات.. فهو من طگهه رجعت لمكانهه.. چبسلياهه وشدهه.. طلع بره يحاچي ابوي وعمامي اجوي .. صوته بعيد ماسمعته.. بس سمعت صوت ابوي يصيح..

محيي : مخبل انت..وين شهادتك..شسويتلهه وعرفت بيهه هذا المرض..لاتشخيص لاصخام..
- : اخي اني كلت جائز ما أكدت.. اكو تحاليل انسجة سويلهه وتأكد بنفسك..بس مستحيل الصداع المستمر يكون سببه شي بسيط..وانت حسب كلامك كلت ماعدهه جيوب أنفية..
محيي : لا اسويلهه تحليل ولا هم يحزنون.. وينهه اريد اطلعهه .. انتم هم حاسبين روحكم ع المستشفيات..

فات عمي فيصل گومني وطلعنا..رجعني للبيت أون من الألم.. فوك ما راسي يوجعني ادور ايدي هماتين..رحت لغرفتي تمددت.. اجه ابوي يحاچيني..كعد يمي.. باسني من خدودي ومسح دموعي..
محيي : شونهه..توجعج..
دنوة : موت..
محيي : المفروض تنتبهين بعد..هسه صارت وراحت .. باجر اخذج لمستشفى اهلية اسويلج تحاليل وفحوصات كاملة..
دنوة : بابا شگال الدكتور..ليش صيحت علي..
محيي : هيج ماكال شي..مايفتهم هذا ..
دنوة : چا ليش راسي ديوجعني..
محيي : باجر نشوف كلشي ونعرف ليش.. هسه اطلع اجيبلج دوايات واجي..

حركت راسي بالموافقة..كام وطلع.. مشى اليوم بوجع موطبيعي.. ابوي جابلي مسكنات وڤيتامينات علمود يلتئم بالعجل.. ثاني يوم اخذني ابوي لمستشفى سوالي تحاليل وأشعة جديدة.. العصر طلعت النتائج راح اخذهن ورحنا لدكتور أنف وأذن وحنجرة..فحصني كال جيوب انفية.. اعاين لأبوي كاعد على اعصابه..مامصدك..وهي صدك ابدا مو يمي ولاشي.. اخذ الراچيته وبس نزلنا شمرهه ..
دنوة : ليش بابا..
محيي : چذاب هذا..مايفتهم..العنده جيوب انفية حتى صوته يتغير ويختنگ لمن يحجي..انتي بيج هيج..
دنوة : لا..
محيي : چا خلص..امشي نرجع للبيت..اذا تطلب الأمر اخذج لبغداد..بس خلإيدج تصير زينة..

اكتفيت بالسكوت..ماجاوبت..رجعنا للبيت بنفس كل مرة.. تحاليلي مابيهه شي..نظيفة..بس عندي فقر دم خفيف..

مرت خمس ايام نفس الحالة..اخذ الحباية المسكنة مال راسي يصير زين..ساعتين بالزايد ويرجع يوجعني.. اكعد بنص الليل ابچي من الوجع..ومنا ايدي اهجس روحي مشلولة.. حتى السبح صعب علي..ادور اليمنى..خالة ابتسام لو جديتي توكلني..وهماتين أكلي كلش قل..ماتهنيت باللگمة ولا حسيت بطعمهه من الوجع..

وره هلفترة كعدت بنص الليل بحدود الثنتين.. هلحچي انه نايمة من الثمانية بالليل..كضيتهه نوم بنوم.. تچيت ايدي ع الحايط وتمشيت للمطبخ.. اول ما طبيت شهگت وكمزت.. ايدي طخت بالباب..صل علي الكسر..كمت ابچي .. رائد هنا .. لابس عسكري وكاعد يدخن..النفاضة متروسة لعينهه..كام من مكانه اجه يمي..

همس : هسس اسم الله شبيج..مااقصد وداعتج..
عاينت بعيونه : شجابك هنا..
رائد : من المغرب انه جاي..
دنوة : صدك..شعجب ..
رائد : جنت راجع من بغداد وخابرت عمي قاسم بشغلة جاوبتني سرور فسألتهه عليج..كالت ايدهه مكسورة وتعبانة صحتهه..كلت خلأجي اشوفهه مايهلي اروح واعوفهه..
صغرت عيوني بإستفهام : وشگتلهم..اجيت اشوف دنوة..
رائد : لا گتلهم اهلي طالعين لبغداد..مايدرون اليوم انزل.. حتى مامبدل بس غسلت وكعدت..

ابتسمت.. رحت ع الدوايات فوك الثلاجة.. سحبته شربت الحباية مال وجع الراس ومسكن..كعدت جدامه ع الميز .. هو طلع جگارة ورثهه وابتسملي..
رائد : متوجعة بنيتي..
دنوة : اي والله كلش..انت مو دارس معهد طبي مدري شنو.. يعني عندك اطلاع..ليش راسي يوجعني هلكد..
رائد : يولي ناسي وحگج..صار شكد من تخرجت.. بعد اكو طنين بإذانج..
دنوة : لا راح..
رائد : صار شكد..
دنوة : صار هواي..من گبل لا تنكسر ايدي..
زفر الدخان..صار بوجهي..كمت اگح : شبيييك..خنگتني..
رائد : هشش يولي فضحتينا ..حگج علي اعتذر..
مدلي ايده كامش گلاص مي ..اخذته منه..

رائد : انه لازم اطلع من الصبح..بس بين ما يكعدون.. المهم شفتج.. شلون وكت اغبر.. طفى الجگارة ورفع راسه يعاين بعيوني .. باباتي حاچي ابوج وروحي لدكتور اعصاب.. هو يطيح على علتج..لاترحين لانف واذن.. مايفيدج ..
دنوة : ماشي..
ضل كاعد ويعاينلي هو وساكت..انه وره فترة قصيرة انسطرت من الدوة.. چي قوي.. كمت اشوفه اربعة..مديت ايدي اليسرى وخليت راسي عليهه.. صرت اغمض وافتح على كيفي واشوفه على وضعيته.. دقايق .. مااعرف شكثر.. جان تطفى الكهرباء ..
همست : رائدد..
رائد : ماتجي مو..

همهمت بمعنى لا.. شغل الضوة مالت الجداحة وورث جگارته.. صار الضوة بعيوني ..مديت ايدي اريد اسحب الجداحة اطفي الضوة..كمشت ايده..ايدي ضاعت بيهه.. شعور رجفة بدفو وحنان..عاينت بعيونه وابتسمت..

شعور مكبوت بداخلي.. دائما هو يبادر.. هو يحچي .. ولو كلامه قليل وينعد ع الاصابع بس لهفة الحب مبينة عنده بشكل مفضوح.. العجيبة بس جدامي تنكسر الحواجز.. تنرفع الخمائر.. وتنرسم ملامح المحبة بعيونه..جدام الناس هو شخصية لخ تختلف..ساكت مايحچي..واذا حچه كلمتين ويسكت.. ملامحه قاسية مايگصهه الطبر ..الفضل لحواجبه شكد ما سود وطوال شگد ما منطيته قساوة اكثر.. صدى بگلبي يكلي احچيله شتحسين.. جريت ايده ودخلت ايدي بداخلهه وبدفوهه..
سحبهه مني بهدوء : دناوي مايصير..گومي نامي..
دنوة : مشتاقتلك..
تقرب مني وعگد حواجبه.. : انه هماتين يابة..

ضليت دقايق شفته ارتبك وبالگوة صامد..هديت ايده.. رأسا كام يغسل .. استحيت منه..شسويت..شكد ثولة ..ثولة اووف.. رجع كعد كام يدخن بشكل جنوني..تركته وغمضت.. بين كاعدة وبين نايمة سمعت صوته..
رائد : بنيتي..حبيبي .. كومي نامي يولي حتوديني بداهية..
كمت على كيف..وكفت جدامه : انت دائما تفشلني.. شكد ضوجتني.. استغفرالله منك ..لاتجي تشوفني بعد خوش..
درت وجهي اريد اروح..
نتر بيه : تعاي اشو جدامي..شهلحچي الماصخ..
درت وجهي علي وخزرته : ليش ماصخ..لا صدك..
رائد : استغفرالله.. باباتي انه رجال..چم مرة گايل هلحچي .. موصعبة أنثار حتى من حسج..بس خال قلة معرفتج ببالي.. ماتعرفين..تنسين.. ميخالف انه ماانسى وأنبهج بهلمرة وكل مرة.. خمس سنين ميت على شوفتج وهسه تصيرين جدامي بهيج منظر وكامشة ايدي چن كلشي ماكو..المفروض حتى مااكعد يمج.. بس بالي عليج ومشتاگلج ..

كلت هسه عبالهه مامهتم لمرضهه ومااجيت.. افهمي يولي .. صيري زينة وانه جايج من الحلال وداعة عيونج الشهل..

هو سكت وانه طگيت بچي.. : فشلتني بالزايد..
عفته دااريد اروح وانطخ چفي بالحايط..طخة قوية.. كمت اگمز من الوجع وابچي بحرگة..عبالك الوجع من طگلياهه انعاد مرة اللخ..رائد حار شلون يسكتني..وعيت على روحي اذا بقيت ابچي بهلصوت افضحنا..شواي وسكتت..
جر نفس وطفى الجگارة : روحي نامي باباتي.. وانتبهي عليهه لاتضلين كلساع طاختهه..

جاوبته بدون مااعاينله : ليش يهمك عود..
همس : يهمني اكثر من روحي..وشوفي الروح شكثر عزيزة.. انتي أعز منهه..

ابتسمت وانداريتله..
رائد : زعلانة.. انه لوما تهميني مااحچي..
دنوة : لا خلص مازعلانة..اسفة..
ترخصت منه وتمشيت للغرفة.. گلبي ينبض بقوة.. احساسي يورّد من اسمع كلماته ..شلون حاچيته هيج.. اكيد ضاج بس هو مايحچي ..لا مو اعتذرت منه.. اهو يله هاهيه اعتذرت وهو مايشيل علي.. طبيت وسديت الباب..بس تمددت غفيت چي شربت الدوة..

بعد اسبوع العصرية كاعدة بالمطبخ اكل علمود الدوة.. اجت ورود تحاچيني هي وتعلچ..
ورود : ها عيني..كومي اجتي خالتج وبناتهه..
دنوة : صدك..دقدمولهن شي انه وين بيه حيل..
ورود : اي هسه تجي ابتسام تقدم..
دنوة : انجبي ابتسام شنو..بگدج هي..روحي لاخلف الله عليج..
عفتهه وتمشيت للاستقبال..سلمت عليهم وبوستهم.. كعدت يم خالة..

خالتي : شونج حبيبتي..شون صرتي..
دنوة : يعني..موهلكد..
دنيا : شنو يوجعج هسه..وره العلاج يعني..
دنوة : ماكو تحسن..بس ايدي يالله دتتحسن..بعده راسي يوجعني بس اذا اخذ الحباية يصير زين..وراهه بساعة بالزايد يرجع يوجع..ماكو شي ثابت يعني..
خالتي : ماترحين لبغداد امي شمنتظرة..
دنوة : هسه ابوي مسافر..خليرجع وهو هماتين كال اخذج.. احچولي انتو شكو ماكو..

عاينت على ايد حلا..لگيتهه لابسة حلقة..
عاينت عليهه فاكة عيوني بتفاجؤ : هاي شنو عيني..
حلا : سكتي عيني..كله بالعجل صار..
دنوة : شكو سولفيلي.. بس لا ابن عمج هذا ..

حلا : لا وين.. غير سالفة طويلة عريضة ..
دنوة : چا دسولفي شبيج..

.... الموقف على لسان حلا ....
بامتحانات الفاينل كاعدة بالنادي مالت الكلية وي گروبي.. سامي ..احمد.. يقين واسراء.. بالي كله منشده يم كرم ابن عمي.. اخر يوم اجه گال اذا شفت قيس جاي يخطبج اخلي طلقة براسه.. قيس الولد الأحبه ويحبني..هو خجول ومؤدب الى درجة ومسالم.. فماعنده سوالف دم وطلق وتهديدات.. كال اجي اخطبج عادي.. مع العلم نبهته على ابن عمي بس مااهتم.. مايعترف بهيج اشياء.. قلقي كله لأن الامتحانات بلشت تنتهي وبأول ايام العطلة تصير المشية.. فزيت على صوت سامي ..
سامي : وين شاردة..شبيج..
اسراء : اي صدك اني هماتين منتبهة عليهه هواي تصفن..
خليت إديه ع الميز وتقربت منهم : اريد احچيلكم ماطول انتم گروبي فساعدوني..
احمد : ادللي..
حچيتلهم على كرم وموقف قيس وبروده.. ادري بي بارد بسبب خجله مو نقصا بحبه او شي ثاني.. : فشتگولون.. يعني كرم يسوي شي موزين لقيس لو شنو..دخت..
سامي : ختصير المشية سكتاوي..وتسوون عقد سيد حتى يصير أمام أمر الواقع..
حلا : يله اشوف شسوي..

خلصت امتحانات متوترة..بآخر يوم بقينا كاعدين برة نسولف لأن بعد هواي نلقتي مرة اللخ..انه وكاعدة جان تنسد الشمس عني..رفعت راسي لكيته كرم..
كرم : عن إذنكم ..عندي حچاية وي بت عمي..
حلا : تفضل ..ماعندي مكان احچي بي بس هنا..
شفته يريد يسوي مصيبة وادور يرحون بيهه الولد.. مشيت وياه جوه الشجرة : گول شكو..
كرم : ابوي جايكم بعد اسبوع وانه وياه..
حلا : خير ان شاء الله..على شنو..
: اخطبج..
حلا : اخي انت ليش هيج مدتستوعب..انه مااريدك افهمني.. ومستحيل ارضا بيك لو چنت ماادري منو.. رجاءً ابتعد عن طريقي ..

عفته ورجعت للبيت..ثاني يوم ام قيس خابرت امي انطتهه علم بجيتهم..وراهه اجه هو وامه وابوه ..خوانه ثنين ومرة اخوه واخته.. رحبنا بيهم وصارت المشية ..ع الجية اللخ نتفق ع المهر والنيشان وغيرهه..طبعا قيس يعرف بحالتي وهذا كرم شلون مشكلچي فهو كال شتريدين اسوي ماعندي مانع.. لذلك صارت المشية بهدوء.. بالمشية الثانية اجه خالو عمار وبيبي .. كاعدين بالصالة جان تندك الباب دگة قوية..كامت دنيا تفتحهه.. گلت امريكان يمكن..هيج دگتهم همجية وسريعة.. بس انصدمت لمن فات عمي ابو كرم وي كرم..
صاح : ماتصير الزواجة هاي..
وكف خالو عصبي.. : ليش يابة متصير..اكو غلط ومندري بي..
عمي : ابني اولى بيهه من الغريب..

صار صياح بيناتهم..قيس إدخل واول مرة اشوفه عصبي وهيج جريئ بكلامه.. كرم تخبل راد يكتله ..عاد خالو دفعه وطلعهم من الاستقبال : انتو من توفى المرحوم ابو دنيا لحد هللحظة ولا واحد بيكم سأل عن اختي وبناتهه.. خلف الله على ابوك الله يرحمه رجال كفو ومن ظهر رجال.. الحق ينگال وانت اذا حقاني وتخاف ربك ببناتك وولدك احچي الحق.. فديوم دكيت بابهم سألت عنهم..محتاجين شي..كلت بنات اخوية مثل بناتي واكثر..بس لا.. عموما هذا مو وكت حچي ..حرام توگف بقسمة بنية وخصوصا موقفكم كلش يفشل..اطلعوا منهه وخلوهه تتهنى بحياتهه..مو لمن يوگع الفاس بالراس يله تحچون وتسوون الأولوية لأبن العم..ابن العم العمره ماسأل عليهن..

عاينت لعمي شفت وجهه صار احمر..قبل وفاة والدي بشهر تقريبا صارت مشكلة قوية بين ثنين..واحد منهم ابن عمتي.. صار بيهه ظالم ومظلوم .. عمي ابو كرم صفاهه بيناتهم.. ابن عمتي الغلطان فتصرف وياه على هلأساس وجابه تنازل واعتذر منهم وانطاهم فلوس..فهو حقاني.. فشل من خالو واعتذر منه ..خاصة وره ما شاف اخلاق قيس : انه لو ادري بالرجال هيج مااجي..بس السمعته غير عن الشفته..
رأسا اخذ كرم وطلع.. خالو تعذر من قيس وأهله وكملت المشية واتفقنا وره اسبوع تصير الخطوبة..تلبيس حلقات .. سويتهه بسيطة وسريعة خفت لا كرم يرجع يغير رأي عمي.. قررنا ع العقد نسوي حفلة اكبر نعوض العجلة الصارت بالخطوبة..

حلا : فهذا كل الصار..ادور سمعت بيج مريضة.. والله ولا واصلني عليج شي..لحد ذاك اليوم امي خابرت ابوج وگاللهه..
دنوة : حبيبتي خطية..انه اتذكر چنتي متوترة من ابن عمج.. الحمدلله عدت على خير..
حلا : الحمدلله عمري..

ضلو ساعة تقريبا وراحو..خالتي حلفتني اخابرهه كل يوم اطمنهه عني.. گتلهه ماشي..وهي همات كالت اخابر مرة عمج ابتسام واسأل عليج.. فرحت چي مهتمتلي ..انه من الوجع حتى ماانتبهت منو زارني ومنو نساني..بس الأعرفه الكل متعاطف وياي.. لأن كلشي ممكن ينحمل بس وجع الراس هذا يسطر .. يخلي الواحد بس يريد ينام..

مرت خمس ايام بهلحدود..حالتي ساءت..ابوي راد يرجع ورتل امريكي معترضله هو وبعد سيارتين..صاير حادث للسيارة اللخ وهو متضرر بس بشكل طفيف..جدي وعمي فيصل وسالم راحوله .. فعذرته وضليت منتظرة يصير زين وياخذني لبغداد.. لأن عمامي قاسم وكاظم ابد مايرغبون بغداد ولا يحبونهه..

باليوم السادس جنت كاعدة وره البيت وي النسوان ديخبزون المغربية للعشا ..تلفون بيبي دگ..
شالته : ها يمة بشر.. يعني شكثر بحيل الله .. خير ان شاء الله حبوبي.. يله درب السلامة..
سدته وسألتهه مرة عمي فيصل : ها عمة منو..
الحجية غادة : اليوم يطلعون الفجر..محيي صاير زين وفاكين راسه.. جان مضروب ..
ابتسام : يله الحمدلله المهم طلع منهه..
الحجية غادة : اي والله يعمة..الحچي بيناتنا.. شو وليدي هجسته شاب صغيرون ولا چن اطول مني.. گلب والدة بعد ..
نوارة : جدة انتي ماكو مثل حنانج..فديتج..
الحجية غادة : ياااه..اسم الله عيون جدة ..انه اروحلج فدوة يبعد روحي..

ابتسمت عليهم..وتمشيت للغرفة اريد امدد..ايدي توجعني.. شوكت يفكولي الچبس..ضجت..

مشى اليوم عادي..مثل الگبله..انجمعنا ع الاكل.. انه كعدت ع الميز مااكدر بالگع..بس اگوم ادوخ..

نمت بالعجل بس اخذت الحباية.. كعدت بنص الليل مرعوبة وگلبي يدك سريع بشكل جنوني..تخبلت.. راسي يوجعني ضعف وجع كل يوم..كمت ابچي وايدي على راسي.. هسه منو كاعد بالثنتين..كلهم نايمين چي باجر يرجعون من بغداد من وكت.. تمشيت لغرفة عمو قاسم..خطية خاف اجفلهه بهلوكت.. رحت ع العلاگة مال دوايتي.. وبتصرف ناجم عن سوء الفهم وعدم السيطرة.. نسيت روحي من وجع راسي..اريد بس اتخلص من الألم الفضيع هذا..كلشي بيه يرجف.. شريط المسكن بي اربعة اخذتهن والشريط الثاني مالت راسي بي ثنين ونص.. اخذ نصاصة چي قوي ويأثر ع القلب.. نسيت التعليمات واخذتهن بلا وعي.. دقايق ..نص ساعة .. اكثر يمكن .. انه كاعدة ع الكرويتة بالمطبخ.. حسيت الدنيا دتظلم وعيوني تنسد وتنفتح بشكل ثگيييل..

لمست ايدي بعد مااحس بيهه..جسمي كله خدر.. راسي سكن .. بس گلبي صار يدگ بقوة وحرارة..صخنت من الوضعية الصرت بيهه.. ردت انقذ روحي ادور ماادري وين طبيت.. صرت ألهث وأجر النفس بالگوة..مع العلم كاعدة مدااسوي شي.. صار ضغط قوي على صدري چن ضلوعي دتحتضن گلبي بقوة وقسوة.. صوتي نصى ..چن ماكو اصلا.. گمت على كيفي تمشيت للحمام حتى ماسديت الباب.. وكفت جوه الدوش وفتحت المي البارد.. ضليت ارجف واختض من البرد ورجفان القلب الصارلي.. كمشت البوري .. اجت افكار براسي..هاي انفاسي الأخيرة.. حموت ظالمة نفسي.. ماادري ماچنت اعرف..تهورت.. حياتي حتنتهي .. ماتخيلتهه هشكل تخلص.. هسه ابوي اذا عرف حسباله داانتحر.. غمضت عيوني بقوة.. هي غمضة وطحت من طولي.. بعد ماادري شلون وشوكت وشصار..

كعدت مااعرف شوكت مسطورة..إذاني بيهه وشة وراسي ثگيل حيل.. ريحة منظفات وديتول..الغرفة كلهه ابيض واكو لوكر بالركن..معقولة هاي مستشفى حكومية.. كلش مرتبة وريحة بين طيبة وبين الديتول المغطي عنهه..انتبهت على روحي بهدوم مستشفى.. لبس ازرگ بي تچة من المعصم.. مثل الاوڤر.. مفتوح من ظهري ومن يم الصدر همات بس بي طباگتين.. منو ملبسني.. شصار.. نزلت رجلية من السدية دايخة.. انتبهت كانيولة بإيدي ..دقيقتين اذا مو اقل وانفتحت الباب.. اجت الممرضة.. قاستلي الضغط والسكر ..نبضات القلب..
حچيت بصوت ناصي : وين انه..
- : بالمستشفى حبي..انتي رايدة تنتحرين ..
عاينت عليهه متفاجئة : انتحر شنو..

- : اي هذا الوصلني من الدكتورة المشرفة عليج.. خلينالج مغذي ومهدأ للأعصاب لأن اعصابج مشدودة.. اضافة الى ان نبضات القلب عندج مستواهه عالي..
دنوة : بس ماردت انتحر..راسي جان يوجعني وماعرفت شسوي.. مو معناتهه انتحار.. هسه شوكت اطلع..
- : بعد اسبوعين..لازم تضلين تحت المراقبة.. لأن احتمال ترجع عندج النبضات السريعة..واذا هملتيهه يصير رجفان بالأذين الأيسر..
دنوة : دتخوفيني..ابوي وين..اهلي..
- : لا عيوني مااخوفج..اريد تعرفين حالتج علمود تاخذين احتياطاتج.. دقايق وتتيحلهم الزيارة..

رفعت المخدة شوي وساعدتني أمدد ..چيكتني وطلعت.. شواي ودخل ابوي .. جر كرسي وكعد..عيونه عصبية ومكور قبصة ايده.. حچه بصوت طبيعي : شلون صرتي..شدتحسين..
دنوة : زينة..بابا ماحاولت انتحر والله..
كام وگف متعصب تقرب مني : چا شنو..شمسوية.. اكو واحد عاقل يشرب هلكثر ادوية..مخبلة..
دمعت عيوني : ماادري..راسي جان يوجعني ومااعرف شسوي.. اسفة بابا..گلبي يدك بقوة دااحس بي..
محيي : لاتحچين موزين عليج..بس ماطول هيج حالتج هاهيه.. راحت بعد..وان جان ببالج الانتحار فهسه عرفتي شيصير بيج..
دنوة : مو گتلك ماببالي وروح امي..
خزرني : اي فهمنا..دااگول اذا.. همزين عمج سامع صوت الماي وجاي عليج..انه جنت بعد ساعة بهلحدود واطلع.. بعدين بنص الطريق خابرني عمج..گال يرادلهه عناية ولازم نومة مستشفى .. گتله اخذهه لوحدة اهلية..اعرف الحكوميات وشلاع الگلب..الدكتورة تجيج كل شوي تشوف حالتج وهي بعد عليهه..
عاينت علي ودنجت..غيرت الموضوع : بيش الساعة هسه..
محيي : بالستة العصر..

صفنت على روحي..هاي صار شكد نايمة.. ليش هلكد شو الوكت كلش هواي..
فززني من أفكاري صوته : مرة عمج حتجي تشوفج خاف تحتاجين شي..وبالليل انه ابات يمج..نشوف وراهه شيصير..
حركت راسي بالموافقة.. تحمدلي ع السلامة وباسني وراح.. دقايق وفاتت خالة ابتسام..باستني هي وتعدل الهدوم من يم صدري..
ابتسام : الحمدلله ع السلامة خالة حبيبتي.. شلون صرتي يمة.. تره ماكدرت اشتغل كلشي بالي عليج..

ابتسمت : الله يسلمج ويحفظج يارب ماانحرم من حنانج..
باست راسي وكعدت ع الكرسي : يمة رائد اجه..
عاينتلهه مستغربة..گلبي كام يدك سريع ..خفت لاتچلب الدگات ادور يصيرلي شي..هديت روحي وجاوبتهه : شوكت.. ابوي خوما كال شي..
ابتسام : لا كلشي ماحچه..كام يحچي كال ليش مااخذوتهه لبغداد دتشوفون مايفيدهه طبيب هنا..
دنوة : وينه هسه..
ابتسام : اجه أخيه محمد رجعه..كال باچر عنده دوام من الفجر .. ادري يخالة انتي مالگيتي الا العسكري..
دنوة : ليش خالة شبي..
ابتسام : دتشوفين اكثر من نص الشهر بالدوام.. باچر عگبة ماطول هو نهى عليج يعني حيتزوجج ..شون بهلحالة.. تضلين بعازته..

دنوة : خالة مااعرف .. بس اعرف احبه..
ضحكت وخزرتني : ولج طولان لسانج..استچني لايهيس حسج محيي ادور يتدروش علينا بالمستشفى وين نولي..
ابتسمت بدون مااجاوب.. اجت الدكتورة چيكت وضعي ووصت على چم أكله اكلهه مو كلشي مسموح..

عمي جاب من الگالته وخالة ساعدتني اكل.. جوعانة بس اخاف اكل مااعرف ليش..للعشرة بالليل دخل عمي قاسم..
ابتسملي : الحمدلله ع السلامة عمو..غير تنتبهين لدواياتج..
باسني وكعد شوي..بعدين گام هو وخالة : هسه يجي ابوج.. ارتاحي انتي..
حركت راسي بالموافقة..اخذهه وراح..ضليت صافنة ع الحايط لحدما انفتحت الباب مااهتميت منو..كلت ابوي اكيد.. تفاجئت لمن شفت رائد فات.. شهگت وخليت ايدي على حلگي..
همست : شجابك عفية اطلع اخاف ابوي حيجي بالطريق روح..
سكت ماكال شي..تمشى بإتجاه اللوكر اخذ الشال خلاه بحضني ودار وجهه..
رائد : لبسي وغطي صدرج..

وجهي مثل النار الأشتعلت بي..شكد فشلت..بس متأكدة مابيهه شي هدومي..لبست الشال ونزلته على صدري ورگبتي.. كعد ع السدية يمي..
رائد : شلون صرتي..
دنوة : زينة هسه..شو كلش عادي عندك الجية هنا..

رائد : عود انتي مريضة..باباتي دسكتي شكد تحچين.. هاي الممرضة انطيتهه فلوس گتلهه ادخل اشوفهه گليلهم دتغير هدومهه مايصير يفوت احد..
دنوة : فوگاهه تحچي علي..شعندك تعاين هشكل..
رائد : يولي تره من عرفت بيج شاربة هلكثر ادوية حتى ضغطي علگ والدم يكت.. گبل شوي يالله استعدل..بعدين انه من اگلج لبسي شال لو تغطي من باب الحرص ومخافة الله بيج.. فهمتي.. چم مرة كلت هلحچي..

عاينت بعيونه وسكتت..
شفت الغرفة كلش هدوء.. حچيت : رائد شبيه انه.. ليش مدااصير زينة..
رائد : لا منا وجاي حتصيرين زينة..
دنوة : وگلبي..يعني شلون اقصد..
رائد : لاتخافين..هاي ردة فعل للأدوية الاخذتيهه.. بس لازم تبقين تحت المراقبة هلفترة خاف يرتفع النبض علمود ينظموه بالأدوية..
دنوة : وراسي..
رائد : بالبداية جان عندج التهاب بالإذن..وتعالجتي منه.. بس بقى صداع مستمر چي كثرتي بأدوية الصداع.. فصارت نتيجة لهلكثرة.. من شوكت تاخذين دوة لراسج..
دنوة : صار هواي..شهر اكثر..
رائد : اي شفتي..لو انه ادري چا نبهتج شتسوين.. شلون تاخذين بكيفج هلكد..

زفر انفاسه بعصبية ومد ايده على جيبه.. كام يستغفر ورجعهه لحضنه.. : انسي هسه..بهلاسبوعين تصيرين زينة ان شاء الله..
دنوة : عفية ليش ترزلني..چنك ابوي..

رائد : اعتذر يروح روحي..بس گلبي عليج والله .. اگول ايدهه مچبسة وراسهه منا..ادور يصيرلهه شي ثاني وتنام مستشفى.. تدريني مو عصبي بس چي مقهور عليج..
ابتسمتله..وحچيت بفرة : رائددد..
كام من مكانه وعگد حواجبه : شكو شبيج..
دنوة : هيج ماكو شي..
زفر انفاسه براحة ورجع گعد..كلساع يمد ايده على جيبه.. اخر شي ضجت.. : شكو بجيبك..
رائد : جگاير..
دنوة : وتريد ادخن هنا..
رائد : لا مايصير يولي..ماتشوفيني الوب عليهه..
دنوة : دااحسك تحبهه اكثر مني..
رائد : لا يابة ماكو مقارنة بيناتكم.. اغاتهه انتي ..بس مدمن عليهه..

ضليت صافنة علي ومبتسمة على سوالفه..ماطول نص او ثلث ساعة وگام ..
عاينت علي وكمشت ايده.. : حتروح..
رائد : اي تأخرت..لازم اكعد من الفجر.. انتبهي لروحج.. فترة زمان وتصيرين زينة..
هديت ايده وودعته..طلع يتلفت بعدين راح.. دقايق واجه ابوي.. ساعدني أمدد وراح كعد ع الكرسي..

هيج خلصت الايام بالمستشفى..خالتي عرفت بيه داخلة مستشفى فگامت هي تجي تبات يمي بالليل.. والصبح تجيني خالة ابتسام..بس اخر فترة شفتهه تعبت خطية وبالگوة شايلة روحهه فگتلهه لاتجين بعد..خالتي موجودة وابوي همات.. ماقبلت بالبداية بعدين قنعتهه.. رائد من اليوم الاول شفته وبعد ماادري عنه..بس الاعرفه بالدوام وهلفترة چي البلد وضعه متأزم فيطول اكثر من الأيام العادية..

كمت احس بالملل والضوجة بهلمكان..كله ابيض بأبيض والغرفة هي اصلا مملة..كعدت احسب يوم يوم علمود اطلع.. تحسنت وراسي راح الوجع من عنده..بس هيج اول ما اكعد الصبح يوجعني بحدود النص ساعة ويهدأ وحده.. الدكتورة ماقبلت اخذ أي مسكن بعد.. دورات اكول هسه مابيه شي خلاطلع.. بعدين گلبي يصير يدك سريع وتجي الدكتورة تنطيني مهدأ للنبضات .. كالت لو بالبيت وتصيرلج هاي الحالة احتمال تصيبج جلطة شبابية.. كتلهه لخالتي شنو هاي.. مارادت تخوفني من لمحتلي ومن خلال كلامهه عرفت أخطر من الجلطة التصير بالكبار بالعمر..فسكتت وانتظرت يخلصن الاسبوعين واطلع..

خلصن الاسبوعين والدكتورة كتبتلي ورقة بالخروج.. كعدت الصبح كلش فرحانة..واخيرا.. لعبت روحي ..اجت خالتي لمتلي الهدوم وساعدتني البس..اجه ابوي باسني من خدي وابتسملي.. اخذني من ايدي وطلعنا للبيت..تشكرت من خالتي على وگفتهه صدك لو ضالة خالة ابتسام جان مالحگت بيت ومستشفى وعمي هماتين مايقبل تطلع هواي.. وصلنا خالتي ورحنا للبيت..

اخذت نفس طويل..اووف شكد احب بيتنا..ماادري شلون حتزوج وافارگه بيوم من الايام..

مشى اليوم بالخطاطير والعزايم..جدو يمكن فرحان اكثر مني بشفائي.. انطاني فلوس..
دنوة : لا جدو شسوي بيهه..
شامخ : اخذينهه بعد جدج..انه مامصدك رجعتي حتى.. ابوج چريم جدام الكل عاد يمج يصير عص..
كالهه وضحك..بسته واخذتهه منه..

گلت لروحي : واخيرا رجعتي لحياتج الطبيعية.. ولو ايدي بعدهه مچبسة بس ع الاقل امشي واتحرك براحتي..
خلص اليوم واليوم الوراه براحة..شوي فكيت عن المستشفى وريحة الديتولات..اجيت على ريحة الطبخ والتنور.. ابوي ثاني يوم طلع لبغداد لأن طول هلفترة هو وياي..شكد حسيته أب بمعنى الكلمة..ولو نظراته حادة وبيهه كلمات ممكن اذا نطق بيهه اللسان حتجرحني..بس يكفي اگعد الصبح اشوفه غافي ومتچي ايده ع الكرسي..وهو گضى عمره ماينام الا على فراشه ويريد يشوفه مرتب مايحب حي الله..

وره اسبوع كاعدة بالغرفة انه والبنات .. الباقين راحوا ينامون بقينا نتعلل..سرور جابت كرزات وحب وببسي..
دنوة : اگول.. شو قصي ماشفته..
سرور : اي راح لمرته بالحلة..يمكن حيجيبهه ويجي..
دنوة : حييل..صار شكد ماشايفتهه..بس بيوم الزفة..
سرور : اي ولج حتى احنا..هي جايبة ولد گبل لا تتمرضين.. فهسه حيجيبه ويجيبهه ويجون..
دنوة : ها خوش..

ثاني يوم كعدت من وكت علمود الخطار..هو قصي متزوج بالحلة علمود مرته هيج شرطوا اهلهه..بس هسه هي دتعاني من بُعده فطلبت منه ياخذهه وجابهه.. سلمت عليهه وبوست الطفل.. كالت عمر اسمه ..هي حبابة بس احسهه جاية وخايفة لا نخليهه تشتغل..فانه ولو ايدي بيهه وجع خفيف بس ساعدتهم بالشغل ماخليناهه تسوي شي..

وهيج مرت ايام هادئة..استغربت ليش رائد مااجه .. يعني هو بالمستشفى وتعنالي..هسه ليش.. يله اكيد تعبان من الدوام وشغله خطر..حسب السمعته من جدي فهسه هو يداوم بالمناطق الساخنة..ضليت عايشة بقلق واحشر روحي بين النسوان بلكت اسمع عنه شي..اخاف اسأل.. لحدما العصرية كاعدة بالهول جان تجي ام رائد.. كمت واحس روحي حطير من الفرح..واخيرا شي من ريحته..

اجت بوستني وتعتذرلي چي مااجت للمستشفى.. كتلهه : حبيبتي كلشي منج واصل والله بلا ما تتعبين روحج..
أشرت ع المكان البسدهه بيدهه : دتعاي گعدي يمة شكد احب سواليفج..
كلت بگلبي.. انه همات احبج خالة..واحب ابنج ..اجيت كعدت يمهه..فتحت ايدي خلت بيهه خمسين..
رجعتلهيا : لا خالة ليش متعبة روحج..
ام رائد : لا حبيبة حقج..كلت هسه اشكال جابولهه.. انطيهه فلوس وهي تتصرف بيهن على كيفهه..
حضنتهه وتشكرت منهه..خالة ابتسام كامت هي وجديتي للمطبخ مدري شعدهن..

شاورتني : رائد گرع راسي عليج..
دنوة : هههههه..صدك خالة..شگال..
ام رائد : وج اكو شي ماگاله..هسه هو بالدوام بس استلم راتبه ودزلي منه كال اخذي شكد تحتاجين أشتريلهه شي لسلامتهه .. ماقبل اگلج بس بعد انتي هماتين مثل بنيتي واحجيلج..
ابتسمت وبستهه : خالة شگد كيفت من اجيتي..عبالك هو اجه..
ام رائد : اووي يداده فدوه لهلحلك..غير تدللين.. اكوم اروح انه بطيت..
ودعتني وراحت..طبيت للغرفة اسولف وي روحي بي..

وره يومين واكفين وره البيت دنخبز للغدة.. مااسمع غير صوت صياح مال زلم وغلط قوي..عدلنا شالاتنا وطلعنا مخروعات ماندري شكو.. اجه عمي لواء وسالم العصبية تارستهم..
سالم : فوتن جوه ..روحن..
ابتسام : يمة شكو فهمني..ابوك وين..احمد..
سالم : مابيهم شي يمة..
عمي عافنا وراح لغرفته..طلع مغير هدومه وبخطوات سريعة راح للديوانية..بابهه مفتوح طلاگتين.. شفت رائد واكف وبعد كومة زلم يمه..لابس عسكري وكامش المسدس بإيده اليسرى ويصيح.....

يتبــــــــــــــــــــــــــــع...................