رواية اسألي عني الليالي الفصل السادس وستون 66 - بقلم رقية جاسم

انه البارحه هوايه الك مشتاگ ..
طول الليل ابد مانامت العين ..
ارجع مو موتني الفراگ ..
عمر واحد اعيشه وماهو عمرين ..

قناة التليگرام

حساب الانستگرام

الـبـارت الـخامس والـسـتـون...............

دنوة : ليش ماكعدتيني اجي وياج..
روزة : مابيج حيل حبيبتي..اني موجودة شتحتاجين كليلي
دنوة : ماتقصرين الله يسلمج..محمد وين..
روزة : راح هو وارشد وعارف يطلعون السيارة..
دنوة : ها خوش..
كمت على خالة اتفقدهه..لكيتهه تبجي ومفرفحة..بستهه وبجيت وياهه..شواي ومسحت دموعهه اخاف يصير شي بالشبكية مال عينهه ماتستاهل..
بالليل طبو الولد..بس محمد وجهه مصوفر.. هو وعارف.. ضليت منتظرتهم يطلعون واجي اشوف شكو.. كمت سويت حليب لديمة واسمعهم ..

محمد : انت ضابط وتفتهم..السيارة ليش مدتطلع..
ارشد : ماادري ..السالفة فرت راسي فر..هسه المرحوم ليش يدخل روحه بهيج مطبات..
محمد : بعدنا مامتأكدين منو كتله..

عارف : والله كامش اعصابي بالگوة..بس كله بسببك محمد ..
محمد : انه.. انه شكو ليش..
عارف : اي انت دخلت روحك بمعمعة الهه اول مالهه تالي.. غيرت مذهبك وعشيرتك ورحت وي ناس تعرف كلش زين شسوو بالطائفية.. كله ذبح مايتفاهمون بالقتل..مع ذلك جازفت ودخلت وياهم فوكاهه كله غش ودغش..عليش.. بس فهمني عليش .. مو تشتغل وي فؤاد وصگر مامقصر..كل الراتب يصرفه عليكم والله حرام دمه راح بالشط هيج..حراااام..
محمد : ها خير شو تورشعتني..هو خابرني كال فضيت السالفة وراحت بعد محد يسأل عليك حتى..
عارف : ماتدري باخوك مايحجي..خاف عليك اكثر من روحه .. خاف عليكم كلكم..وانت حتى ماجربت تفكر كبل لاتخطي هيج خطوة..اعرف دم اخوك ضاع ..وانت السبب..

لحظات واسمع صوت راشدي..ماادري بوكس.. المهم صوت قوي مال ضرب..ضليت واكفة بمكاني متت خوف.. خفت من كلام عارف ومن الوضع الصار..مااكدر ادخل مايصير.. اجت خالة من الغرفة تعدل بشيلتهه..
الحجية : شكو شصاير..
دنوة : ماادري ..يمكن تعاركو..
الحجية : اليوم العزى عزايين..يريد يجلطني حميدان..

طبت هي وانه وكفت وره الباب اشوفهم..عارف كامش محمد ذبحه كتل..بوكسات وچلاليق..ارشد يريد يگومه هو مچلب بي مايهده..اخر شي عاط بي وشاله من قمصلته..
ارشد : كوم لاتخزيني..يعني ببيته وتضربه..
عارف : لا والله مو بيته..بيت المرحوم..لو ميت انت ولا هو.. ليش يدفع ثمن غلطتك يانذل ياعاااار..مايستاهل يموت بسبب طيشك مايستاهل وحك هذا الله..واكف بالفاتحة ومامصدك اكول هذا العزيز هيج يروح وبسببمن ..بسبب اخوه .. لاتشوفني تساهلت وياك بيوم موتة بالمستشفى.. شفت الوضع مايسمح وانه رجال عگلي براسي مو مثلك ارعن..

محمد : انه ماشايف واحد يحجي وره هلمدة..امشي لك جذاب ..سالفتي راحت وانست شيفتحهه هسه.. هو تعارك وياهم بالفاتحة انه شكووو..
عارف : لا انت السبب..هيانه تلفوني هو يدزلي الرسايل التجي..انت جلب ونذل..كتلت اخوك بيدك..
ارشد : امشي كافي مو وكتهه..
عارف : لا وكتهه..انه محروگ دمي على صگر..والله مايهلي اكول الله يرحمه..
الحجية : شكو يمة فهموني..شصاير..
محمد : يمة هذا جذاب..يريد يلبسهه براسي وانه مالي دخل .. مو صگر كال موضوعك انقفل..هسه يكلي انقتل بسببك..

عارف : حجية تدرين بيه شكد اعز المرحوم..يحجيلي كلشي .. الرجال التعارك وياه بالفاتحة جان وي محمد .. ارشد سأل عنه وعرفه..حتى لمن جان يهدده يگلة مصيرك مصير محمد.. يامتهجول يامكتول..كتلة اترك المنطقة واطلع انت وعائلتك.. ماقبل.. ماقبل.. كال اذبه وره الشمس.. مكاني اكبر من مكانه..حتى نوبة من النوبات كالوله ماكمشنا اخوك انت موجود .. ضل معاند لحدما كبل اربع شهور هيج وكفت التهديدات.. كال قفلت السالفة حتى خابر محمد بوكتهه جان يمي..احجي شگلك
محمد : كال انقفلت السالفة وانست نهائي..
عارف : هاي انت حجيتهه بلسانك..لا عندي مصلحة ولا هم يحزنون..بس انت غبي مدري تستغبي.. يكول ليش ماتطلع السيارة..اكبر راس مايطلعهه ..واخوك مات بسببك .. اي بسببك انت..

خالة لمن سمعت الحجي فحطت بجي..كمشت محمد من بلوزه وتضرب بي..تهسترت..
الحجية : وك شحجي عليك ياحقييير يانذل..كتلت اخيك بديك .. حرام التعب..حرام السهر والترباااات.. والك عين تنكر يول.. ليش انه ماادري شصار من تهددنا بسببك وبسبب مصيبتك السوده..شحجي وشكوول..خسرت رويحتي وعامود بيتي من وراك..سكن الگبور عمت عيني علي..
محمد : يمة شبيج صدكتي كبل لاتخبليني..
الحجية : انه لو ماادري بسالفتك القديمة من ذاب جرش مدري ويامن ومسوي روحك ويامن چا ماصدكت.. بس ادري بيك شمسوي.. لمن اجه من الفاتحة كال اعرفهم وين يشتغلون .. بالليل اجه حاجاني سوده علي.. كال جان محمد يشتغل وياهم.. بس ماراد يخرعني حبوبي فدوة لطوله..

عارف : لك تريد اطلعني جذاب..هاي الحجية جدامك كالت هو اجه كال محمد اشتغل وياهم..
محمد : بس هو كال انفضت السالفة..
ارشد : طببت راسك بشغلة اكبر منك..انت شكو عليك سافرت وتزوجت صرت اب وكاعد يم ابنك..جهالة تيتموا..
الحجية : سوده علي يمة وليدي..ولك ليش هيج سويت.. ليش ماتكلي ليييش..يمة راحت رويحتي وياك..احجي ولك شسويلك هم ابني خوما ادعي عليك..
ارشد : الله يرحمه حجية..هو هذا العراق..فلت صار بيد الاقوى لا سلطة ولا حكومة..همَ حكومة اصلا..
الحجية : اوووف ييمة انه ام شتحاچيني بهيج حجي مايخش لعقلي..خسرت وليدي بعد اعذار الدنيا كلهه ماتقنعني..

انه اسمعهم ودمي يفور بداخلي..كمت ابجي واتذكر صگر .. حسيته واكف بمكان قريب..درت وجهي لكيته كاعد ع الكرسي ويدخن..شفته يحرك شفايفه چن واحد يحجي بهمس بس ماينسمع.. تقربت منه وسمعته..
صگر : لاتأذين روحج يروحي..حاس بيج..
همست ودموعي تصب على خدودي : شلون انت هنا..
ابتسملي : انه وياج بكل مكان..
فرفحت بجي..حسيته هو حقيقي..جسد وروح.. تقربت اكمش ايده واختفى..كمت ادك على خدودي وابجي بحرگة : ليش يروحي ليش عفتني..شسوي بدونك انه..شلون اعيش فهمني ..

بلحظة جان الشيطان بيهه قوي ومن حرگة گلبي على غيابه ومنظر الطلقات بصدره ماتحملت..عدلت الشال وطبيت للهول .. نسيت علي عدة والمفروض ماشوف رجال ولا احاجي.. بس احترگ گلبي على حبيبي..كمت ابجي واضرب بمحمد وادفعه بره بكل حيلي : حقييير..كتلت رجلي الله لاينطيك حرمته من شمة الهوى يانذلللل..وانت عايش مرتاح.. شحجي شكووول .. يتمت جهالي ورملتني ليش..
فقدت ابجي واصيح واضرب بي..وعيت على روحي واكفه بالطرمة ومحمد يريد يفك ايدي مايكدر..اجت خالة جرتني منه هي وروزة..رادت تحضني ودفعتهه..
دنوة : لاتكمشيني..لك حرگت گلبي شدعي عليك.. شلون اعيش بدونه..انت عايش ومتونس وهو سوده علي انحرم من الدنيا..ليش مايستاهل وداعت عيونه مايستاهل..

خالة كمشتني من چتفي تريد ادخلني جوه.. كمت ابجي واعت بروحي عت..
دنوة : اكرهك..اكرهك..حرمتني منه بسبب غبائك..
انداريت على خالة وكامشه وجهه بإديه الاثنين : خالة كولي جذب.. بعدني مامصدكة ليهسه..دااشوفه كل يوميه جدامي يدخن ويضحك..دااشوفه والله..
الحجية : ولج امشي لاتعذبيني..عليج عدة مايصير تشوفين زلمة ييمة..مو رحنا للدفنة يخالة شون مامصدكة..
تذكرت الدفنة مالته..ولمن طبيتله للمغيسل.. مشتاقه لعيونه ونظراته لمن يعاينلي وانه ماادري ..بعدين صدفة ادير وجهي الاگي ماكلني بنظراته ومبتسم.. انقهرت وتندمت على كل لحظة كضيتهه بمكان هو ماموجود بي..تندمت على زعلتي شهرين الا ببيت خالي..

تندمت من طاوعته ورحت لبيت جدي.. لو باقية على رزايله وعصبيته احسن.. لو لو ... كلهن راحن شيرجعهن..

طبيت جوه فرفحت من البجي..كله من وره محمد.. شدعي عليك شحجي ماادري..انه مو جنت اشوف تلفونه.. فارغ ولا يوم شفت رسالة من رقم مابي اسم.. كلهم صدقانه.. شصار ليش ماادري بي.. يمسحهن.. اي ماكو غيرهه.. كمت ابجي بحرگة واجر بالشال مالي..كرهت الدنيا من بعدك.. هي وناسهه وهواهه وكلشي يخصهه كرهته.. اجت ديمة يمي باستني وتمسح دموعي..شكد حنينين ..هي وايمن .. مايعرفون شكو بس لمن يشوفوني ابجي يجون يمسحون دموعي ويبوسوني..ثنينهم طالعين علي..تصرفات وشكل .. شينسيني و هم يمي..ضليت ابجي بالساعة.. لحدما سمعت صوت الباب تنفتح يعني طلعو..شواي وفات محمد هو والحجي .. درت وجهي ماعاينتله..بس حسيته حط التلفون مال صگر بحضني..

اخذته وبست خالة مسحت دموعهه..
دنوة : كومي نامي خالة موزين عليج..
كومتهه بالكوة ماتقبل تنام..اخذتهه لغرفتهه كتلهه : اخلي ايمن ينام يمج..
الحجية : براحتج يمة..بعد احسن..
دنوة : تعال ماما ايمن..تعال نام يم بيبي..
اجه يركض جان واكف بالباب..حضنته وباسته.. كام يسولفلهه قصص يسولفلياهن صگر لمن يعاند ماينام.. شفتهه ابتسمت على سوالفه.. طفيت الضوه وطلعت.. اخذت ديمة وصعدت فوك.. فتحتلهه التلفزيون بالعجل تغفى بس تتفرج.. عفتهه ورحت على تلفون صگر اكلب بي..اعرف الرمز جان مخلي مواليدي كامل ..٨٦/٨/١٦.. طبيت ع الواتس لكيته دازلي بصمات وچم صوره..

الاشتراك مالنا جان خلصان فماواصلات.. هو دائما من يريد ينزل من الواجب يحچيلي بصمات.. مايحب يكتب .. قليل يعني.. فتحتهن وقربت السماعة من اذني..صوت هوى عالي مبين كاعد بره..
صگر : تدرين توني كملت وطبيت اغسل..احس رجلي مورمة حيصير شهر واكف على حيلي وعيوني حتطلع من مكانهه هلكد ما منعس..اويلييي شوكت انام بحضنج.. مشتاكلج يولي والله مشتاكلج..انعل شرف داعش البعدني عنج.. دنيتي وبنيتي.. ماخذتني كلني فرحان هيج..
سكت شوي بعدين بالبصمة اللخ كمل : الهوى مسويلي واهس .. خلاقرالج القصيدة الاحبهه..

توصيني .. اعلىٰ ياذمة توصيني ..
حياتي انت ونبض يسري بشراييني ..
ويضل إسمك علامة توسّم سنيني ..

لونّك مو دمع ماضمتك عيني ..
ولونّك مو كحل ماشالتك عيني ..

جر نفس طوييل وحچى بهمس :
يلوموني .. واحسك تكبر بروحي ويلوموني ..
وانه بلا شوفتك شينفعن عيوني ..

يشوگي ورجوتي ودنياتي ولوني ..
وعذابي ولهفتي وشكواي وظنوني ..

صگر : هي كلهه حلوه..بس انه احب هلمقطع.. واحبج الج هماتين.. بس اوصل البيت اطلبج تغنيلي..يله اروح هسه .. تصبحين على خير بنيتي..

وخرته من اذني مصدومة..عيوني ادور علي بالغرفة وبالبصمات.. مااعرف وين الگاه وشلون.. شيجيبه هنا وانه دفنته بإيدي..قربت التلفون مني وابوس بي وبصوته .. جان دازلي صوره اله وجهه تعبان وعيونه حمر دم.. كمت ابجي وابوس بيهن..
دنوة : وينك..اشو عفتني .. وانه وديمة وايمن شلووون.. ولك شلون.. عشت عمري كله ضيم بقهر بتهجير.. تعبت واعصابي تلفت..ماكو شي ماجربته..بعدين ماعولت حياتي تستعدل ادور اخسر روحي بخسارتك..يروحي انه شسوى بدونك.. شلون اعيش.. شلون ادبر روحي.. ابوي انت..والله ابوي.. الحواني وعلمني..

ضليت ابجي واتذكر كلام ارشد وعارف.. كلب وحقير.. الله ينتقم منك ومن طيشك..منو يفيدني..انت لو منو.. انه وجهالي وحيدنا بسببك.. حتى مايعرفون ابوهم مات.. ابوهم مات بسبب عمهم الشفية..صارلي ذنب بشوفة وجهك الحقير.. رفعت راسي للسكف وابجي بحرگة..دموعي تصب على خدودي : استغفر الله ياربي..بس شسوي..احترگ گلبي على صگر.. طلقات صدره منظرهه مايروح من بالي ..ادور اجه عارف حچه كلشي انه شبيدي على گلبي..صاير نار كبرة وتچوي بضلوعي وصدري..

شواي وحسيت على ديمة كامت طفت التلفزيون وراحت لفراشهه نامت ..كمت غطيتهه وبستهه..لكيتهه غافية.. طفيت الضوه وطلعت شماغه حضنته واشم بي.. مكرفصه روحي بنص الجرباية.. حسيت بحرارة ايد حاوطت خصري.. وانفاس دافية تتخلل رگبتي.. غمضت عيوني وفتحتهه على كيف.. دخت.. حقيقة لو خيال.. شديصير.. درت وجهي بهدوء وخايفه جسمي صار نار وراسي يدك بقوة.. شفته محاوطني من خصري ومغمض عيونه..بلعت ريگي وكصتي تصب مي.. مااعرف شديصير..
همست بخوف وصوت ناصي ويرجف : ص..صگر .. شجابك هنا..
صگر : لاتبجين..انه يمج بس لاتكولين لاحد..

مادرت وجهي..خفت..بس متأكدة هو..نفس نبرة الصوت والعطر والهمسات ..كتله : شلون عفية..
صگر : اجي اشوفج واروح..لاتخافين انه وياج يروحي..
سكتت بس گلبي يدك سريع وانفاسي سريعة بشكل.. شديصير ليش هشكل..لمن رجعنا من المكبرة كل يوم اشوفه بالغرفة لو ع الدرج يدخن ومبتسم..بس بهلقرب مستحيل .. ماانكر شعور الخوف الحسيته..شعور الفقد حسيته ضعف .. شلون تخسر شخص وتروح لدفنته وتبوسه بالمغيسل.. يعني خسرت الامل برجعته نهائيا.. بعدين اشوفه واحس بقربه.. خيال لو حقيقة ماادري..ضيعت وتيهت حتى دگات گلبي .. سلمت أمري وهلكد ما تعبت من گلبي كثر مايدك سريع غفيت وجه الفجر..

اجاني حلم بصگر..چن انه بالمكبرة مال ابو غريب.. الدفناه بيهه.. طبيت وحدي واشوف واحد من الگبور مفتوح والتراب لونه جوزي طوخ يعني بعده توه محفور.. تمشيت لمكانه لكيت بي مثل الدرج ينزل جوه وصوت واحد يرتل قرآن.. نزلت بس خايفة وعرگانة ولو الجو بي برودة..اول ماخلص الدرج لكيت صگر كاعد على جودلية وقرآن محطوط بحضنه.. لابس عسكري ..صوته لمن يقره بخشوع ومبحوح..مثل لمن شذى سوتلي سحر وصارت بيه حالة نفسيه هيج جان يقره على راسي..رحت كعدت يمه وعيوني على حركة شفايفه.. لحدما كمل وسده.. كمت لا اراديا وكتله : امشي وياي لبيتنا.. مامصدكة خسرتك وداعتك..
ابتسملي بتعب هو ويعدل بقميصه : روحي يبعد روحي.. مااكدر اجي..مكاني هنا..
دنوة : وانه شلون..وايمن وديمة..حتى ماشبعت منهم..
صگر : انتي موجوده..لاتعوفيهم وحيدهم..بس لاتبجين.. تره تأذيني..وعدتج مااعوفج بس الدنيا صعبة دنيتي.. انه يمج .. بغرفتنا.. لاتخافين.. شوكت ماتحسين روحج وحيدة تلكيني يمج..
كمت ابجي بالحلم وارجف..فتحلي ايده رحت بحضنه.. كمت اشم بملابسه وايدي على شعره بعدين فزيت..

لكيت المخده منگعة وخدودي مبللة من الدموع..شماغه ملفوف على ايدي ومحطوط يم خشمي وحلكي..اول ما فتحت عيوني درت وجهي مالكيته موجود..كمت امسح بإيدي ع المكان ودموعي تصب : وينك..جنت حتى ماتخليني ابجي.. تمسح دموعي كبل لاتنزل..تكلي روحي اطيح وي دموعج.. هسه وحيدي ابجي وانام والحسرة بگلبي.. الله ينتقم منك محمد .. هم بعد عافونا مايجونا..كتلوا رويحتي وحبيبي بعد شلهم بمحمد.. اااخ والله گلبي صار هلكبره من القهر.. بعد حتى اربعينك ماطلع واحس روحي تطلع مني يوم عن يوم .. شلون اعيش بدونك واكمل بدون همساتك وضحكتك.. شلون اعيش بس فهمني..

ضليت كاعده بمكانه وابجي..لحدما فات ايمن.. اجه يمي باسني ومسح دموعي..
ايمن : ماما بس تبثين (تبجين) ديمة دتبثي وياج..
دنوة : يروحي..انه تعبانة وابجي..ديمة شبيهه..
ايمن : اي ه..هي كالت شفت ماما تبثي..هي و ...
غمض عيونه وحط راسه ع المخدة..يعني هي ونايمة.. ابتسمت وحضنته ..نفسيتهم حتتدمر..كلنا نبجي بالبيت.. حتى الحجي من يصلي يبجي..كل هلدموع والقهر و هم مايدرون على شنو سوده علي..
بسته من راسه وخدوده..دغدغته وحجيتله چم شغلة.. شوي تحسنت نفسيته.. كمت لبست شال وطبيت للحمام غسلت وكملت ونزلنا..لكيت محمد كاعد هو والحجي..درت وجهي عنه وطبيت للمطبخ اسوي ريوك..

الحجي ماداري البارحة..اليوم الصبح حاجين بالموضوع ومتخبل على محمد..رايد يطرده وخالة مچلبه بي.. ماقابلة يطلع.. بس هو كايل باجر الفجر اطلع.. گلعة.. روحه بلا ردة .. كرهتني بعيشتي وحياتي العشتهه وي وحيدي.. روزة فشلانه مني ومن خالة ومن الكل.. شكد كرهته..ودي املخه وماتطفي ناري.. صبيت الريوك وكعدنا..شواي وگبت العيطة بين الحجي ومحمد..
وائل : ماتروح كبل ما يدرون عمامك..
محمد : عمي قاسم اذا عرف يكلب الدنيا..والله متندم وغلطان ادري بروحي..بس شسوي..شمعرفني خالو..هو كال فضيت كلشي وانتهى موضوعك..
وائل : انتهى ماانتهى شي يخصك..تريد تبقى تصول وتجول وعمامك مايدرون..لا اشو ناخذ حگنا مربع.. ابنهم عايش ومرتاح واحنا هنا متگلوطين..لا بوية ماتمشي وياي هاي..

الحجية : خوية بعد شيفيد الفصل ماتكلي..هو وليدي وسكن المگابر..شيرجعه..فلس لو فلسين..
وائل : خيتي اذا تركنا السالفة يحسبون المرحوم ماعنده ظهر وعمام ياخذون حگه..العشاير هسه اقوى من هواي فئات.. اخذيهه مني..مااغشج..وابنج محمد خوما يضل بخطر من وراهم..
الحجية : سوي البخاطرك..انه مالي نفس بالدنيا كلهه بعد .. وليدي راح مني من وره طيش اخيّه.. شحجي عليك يمة شدعي بس فهمني.. حرمته من الهوى ليش.. الله يسامحك مو انه..
حطت الشيلة على عيونهه وتبجي بجي بقهر وتشهگ.. كمت يمهه حضنتهه وحطيت راسي على چتفهه وابجي وياهه.. انسدت نفسي للاكل ولكلشي..شلون اكول لجهالي يتمتوا من وره عمكم..شلون ابقى وياهم واربيهم لحدما يكومون على حيلهم.. وانه امهم جنت امشي بزود صگر..

شلون وشلون..هواي حجي يخنكني ويخليني حايرة لليوم كبل باجر.. فزيت على ايد ديمة توخرني عن خالة.. شمرت روحهه بحضني وتبوسني..مسحت دموعي واخذتهه وكمت للمطبخ .. اسمع الحجي يخابر ماادري منو..بعدين بالاخير كال شغلك يكدر يساعدنا..عرفته ارشد ماكو غيره.. لمن خابروني الطب العدلي ماقبل ينطي أي معلومات..حتى ماكال السيارة هيج نوعهه..بس ارشد باتصال واحد عرف كلشي.. والضابط الوياه بس يسأله يكله كيت كيت..مشى اليوم انه كاعدة بالمطبخ لو اصعد لغرفتي..ماشفت محمد ولا الحجي..بس اشوفهم ع الغده بدون مااحجي..
العصر اجت خالة ابتسام هي وجديتي..بوستهم وكعدنا بالهول.. ديمة تكيف على جديتي..راحت عليهه وتسولفلهه مكسر بعدهه مو هلكد نطقهه..

ايمن حچه بالعجل كل الكلمات ولو مكسر دورات.. بس ديمة عدهه كلمات تعصى بيهن ماتكدر تحجيهن..

خالة ماجابت طاري السالفة مال محمد.. دننتظر ارشد شيسوي يله يحجون بالموضوع.. ضلوا كاعدين للمغرب وراحو.. يواسون خالة بالحچي..بس شيفيد ..
الحلم ماسولفته لاحد..ولا حجيت عن طيفه اليجيني كل يوم .. اريد شخص احجيله ومااعرف منو..لو اضل ساكتة احسن .. ماادري.. بالليل صعدت نيمت الجهال جان يدك تلفوني.. كمت شلته..رزان..
رزان : ها حبيبتي دنو..شلونج..
دنوة : هلا بيج عيني..على الله..انتي شلونج..جهالج..
رزان : زينين كلنا..اسأل عليج..
دنوة : تسأل عنج العافية..امج شلون صارت..
رزان : بعدهه..ع الادوية والمغذي ماكو تغيير..
دنوة : الله يشافيهه خطية قهرتني من شفتهه..
رزان : هاي شسوي بعد..بقت بيد ربج.. خابرتج اريد اطمن عنج.. وضعج قهرني لمن عفتج ورحت.. ماعرفتو منو ..

دنوة : يروحي فدوه الج..بعد ماكو شي للآن..انه بس يصير شي اخابرج اسولفلج..
رزان : ان شاء الله..ديري بالج على روحج..خطية ايموني وديمة وين يرحون..
دنوة : سهل الحچي والفعل صعب..ديشوفوني ابجي وتعبانة حتى مايدرون على شنو..بوكت كلكم عفتوني هو وكف وياي.. اصلا دموعي لاشيء بالنسبة للسوالياه هو.. بس شسوي .. حسبي الله مااكول غيرهه..
الغصة صارت بزردومي..اختنكت .. نهيت الاتصال شلون مجان ورحت للفراش حضنت مخدته وبجيت لحدما تعبت ونمت ..

ارشد : طلعنا من بيت المرحوم نص الليل.. عارف فشلني جدامهم مو هيج..كتله : بعد مانوصللهم..
عارف : عليش..
ارشد : يابة عود انه وصيتك ماتسوي شي يخليك ويخليني اطلع عن طوري
عارف : اكلك لاتدخل..صگر اخوي حاله حالك وبعد اكثر.. اعرفه اكثر من امه والله..شخص مسالم ماعنده اذية على احد .. ينكتل بسببمن..هسه لو مستشهد چا گلنا داعش وهيانهه مبينه مثل عين الشمس..بس هذا محمد الچلب.. نعلعلا شرفه..كايم صاير بغير مذهب وعشيره ويلعب بذيالة.. انه رجال شكبرني ماادخل روحي بهيج سوالف
ارشد : باجر اروح لواجبي بعد مااكدر اتأخر اكثر.. انت أي شي يصير خابرني..

عارف : تذكر من حجيتلك على فاضل..هذا جان يشتغل وي محمد..هم عافهم هسه هو بدهوك..
ارشد : شبي..
عارف : خابره افتهم منه..هسه يوصلك للنقطة التريدهه.. محمد فاهي وزمال..مايعرف يسويله شغلة عدله ويستفاد منهه..
ارشد : ردلي رقمة..
ردليا وسجلته..باجر من الصبح اخابره.. صدك بوكت تهددوه من وره محمد عارف خابرني بالليل جنت بالدوام.. كال محمد مغير عشيرته ومذهبه وصاير وياهم..وهيج هيج السالفة.. بحكم شغلي والمكان الوصلتله دزيت واحد هو فاضل للمقر مالتهم .. جان عارف عنده معرفة قديمة بي بس العلاقات وي مرور الايام صايره سطحية..على كد السلام.. عزمته ببيتي سويتله غده مرتب وفاتحته بالموضوع..

ارشد : اريد منك تروح للمقر مالت الجماعة التشتغل وياهم..
فاضل : هاااه..عليش خوية..
ارشد : حجيتله السالفة مال محمد بالتفصيل.. كتله انطيك مبلغ زين بس تجيبلي شيردون يسوون بالضبط..
فاضل : تدلل خوي..مايصير خاطرك الا طيب.. بس مااريد المعلومات تطلع..
ارشد : تأمر..انت بس سوي الاريده والباقي بالحفظ والصون لاتخاف..كلمة ماتطلع..
فاضل : عكبة بالليل اعتبر كلشي يمك..والفلوس مامختلفين عليهه..
ارشد : يالله..خير ان شاء الله..انتظرك..

وصدك..وراهه بيومين خابرني بالليل ..
ارشد : بشر..شعرفت..
فاضل : والله خوي هذا محمد بس ينكمش ينصك.. خليطفر وبعد لايفكر مجرد تفكير ان يرجع للبصرة..
ارشد : يعني شلون..وضح اكثر..
فاضل : مسوي نفسه من عشيرة ال.... ويهوبز بصگر.. يكول اخوي هيج شغله ويكدر يوديك وره الشمس انت واهلك.. متعارك وي واحد وهيج حاجي..عاد الرجال هذا داز تهديد لمحمد يترك الشغل لو يفضحه..يدري بي شملوص.. عايفهم وضال بالبيت بس ماحاچي لاحد..لحدما داز جماعة لبيتهم مو كتلي جاييهم للبيت..
ارشد : اي اجوهم كبل فترة..هسه هم طالعين اصلا مو بالبصرة..
فاضل : اي احسنله يبقى هناك..محمد واخوه..

ارشد : ماتنسي السالفة يعني..
فاضل : شكلهه ماتنسي..هذا محمد حاجي حچي قوي.. مايصير يهدد بأخوه قابل هم گلال لو شني.. فهو خيحافظ على روحه واهله ويبقى هناك..
ارشد : والله مااعرف شكول..الله كريم خوي.. بس خايف عليك خاف يضلون وراك..
فاضل : لا يابو ..شكو قابل..هو انه صارلي سنين بدهوك بس هاي كل سنة نوبة اجي اشوف الوالدة..لاتخاف ماعلي شي ..
ارشد : ديله چا انتظرك باجر تعال اخذ الفلوس..
فاضل : يله خوش..مع السلامة..
ارشد : الله وياك..

من يومهه خابرت عارف حجيتله..كتله لايرجع صگر للبيت حتلو مر شهر وشهرين..السالفة ماينسكت عليهه.. اذا ماكمشوا محمد يكمشوه اله وينصك..وراهه انقفل الموضوع بعد مادريت عنه..التهيت بشغلي وعائلتي الادفعلهه نفقة.. متزوج ومطلگ .. ست سنين وطلگتهه..ماتراهمنا ..مشاكل وهوسة للستار.. اضل شهور يم صدقاني لو بواجبي ماتشيل تلفون تكول شلونك وين صرت وين اراضيك..قفلت الموضوع من يمي وطلگتهه.. صار عندي منهه ثنين ولد اكرم وفادي ..وبنية.. البنية هي الجبيرة عمرهه عشرة والباقين اصغر منهه..مامقصر وياهم.. ادزلهم فلوس والاكل يوصللهم للباب..اجي اشوفهم كل فترة.. سويتلهم جوازات وسافرو لتركيا مره..ومره للاردن.. هي گوية ومعدلة مو فاهية..فمأمن عليهم ..امهه همات وياهه .. البعد احسن مما اضل وياهه والجهال تدمر نفسيتهم من العرك والمشاكل..

من طلكتهه مافكرت اتزوج بعد..بس بعدني شاب واكيد عندي احتياجاتي..بيوم وصدفة جنت طالع وي صاحبي منتسب هو.. فاخذني لمكان شلون نكول علي بيت ليل.. هناك شفت وحده بنية اسمهه انتصار..ضليت اتردد للمكان كل يومين لحدما أجرتلهه بيت وتزوجتهه عقد سيد بس.. مره صارت حامل وطرحتهه ماخليتهه تكمل حمل..بزعانة روحي من الجهال وهاي اذا خليتهه تسوي الطفل تكوم تجيبلي عشيرتهه وتسويني رجلهه بالقانون واحنا ماكو شي يربطنا بس كلام السيد .. وراهه اخذتهه للدكتورة غصب خليتهه تسوي منع وانتهى موضوعهه..بس ضلت وياي للآن..ماارتاح بس يمهه..

عارف اكبر مني..انه مواليد ٧٣ وهو ٧٠..جان وي صگر بنفس المدرسة..لأن چنا من سكنة بغداد ..بعدين لحد الاعدادية وشالو للبصرة..انه ابوي انقتل بالطائفية..جان طالع يجيب صمون وكتلوا ..وراهه اجانا تهديد للبيت الجيش جان منفك وحالته يرثى لهه وانه ضابط..والدتي السكر مالهه علگ .. بالعجل عرضنا البيت للبيع ورحنا يم خوالي بالبصرة.. شوي شوي بين ما كونت روحي انه وعارف وسويت سلفتين اذا مو اكثر وفلوس البيت مالنا واشترينا بيتنا بالبصرة..بعد مارجعنا لبغداد نهائي.. بس شغلي ضل هناك..

اخر فترة كبل وفاة المرحوم بخمس شهور جنت يم عارف بالليل.. هو يشرب بس انه لا..هو من النوع اذا شرب يخرط الاول والتالي.. كعدت يمه واسمعه..
حچه بصوت خشن وثكيل : شوف اكلك.. هذا صگر شكله حينكتل..
ارشد : ياستار ..شلون..
عارف : تذكر سالفة اخوه محمد..وفاضل..
ارشد : اي شبيهم..
عارف : رجع يهدد بي..گايلة اخوك ماكو انت موجود..
ارشد : وهو شمسوي..
عارف : گايلة اذبك وره الشمس انت وكل الوياك.. انه هيج مكاني انت جايني شنو..
ارشد : تدري بيه ماعندي علاقة قوية بي..ماتحاچي انت..
عارف : حاجيته..مايقبل يترك البصرة..جبتهه بالعيني والاغاتي لحد التواسيل..ماادري بعد شسوي..
ارشد : لا يمعود الله لايكولهه..يمكن غلطانين..
عارف : اندري..بعد ماادري تعبت من الحچي..
ارشد : الله كريم..

هذا اخر كلام صار بيناتنا عن صگر..ماسمعت عنه اي شي لحدما جنت كاعد ببيتنا جان تندك الباب..اجاني عارف يركض ويلهث..كمت من مكاني ادور السويچ واحاجي..
ارشد : شبيك يمعود احجي..
عارف : اكلك لاگين واحد بمدينة الطب مكتول.. ومشتبهين بي صگر..امشي بالعجل..
رحت وياه وبالطريق خابرت صاحبي ضابط شرطة قريب ع الطب العدلي..كتله شجتك اليوم قضايا كول..
- : والله سيدي لكينا سيارة مگلوبة..مسويه حادث والجنسية مايعهه ماكدرنا نقراهه..ومستمسكات السيارة ماموجوده .. وسيارة لخ صاحبهه مكتول بيهه..
هو كال هيج انه قفلت الموضوع من يمي..كلت هو هذا صگر ماكو غيره..بس ماحجيت ضليت متكتم ع الموضوع.. كلت بلكت مو هو..نوصل ونشوف..

وراهه رحنا على بيته..شواي وطلعت بنية شكلهه مصدوم وملامحهه تلفانة..هاي مرته لو اخته.. عفتهه.. وراهه اخذناهم وطلعنا لبغداد.. ضل الضابط كلساع يخابرني.. انطاني خبر عن رقم السيارة الداگي حاسبة..طالع هو بإسم صگر.. والسيارة اللخ بإسم الرجال الثاني..بقى بس يدخلون يشوفوه بالثلاجة ياهو منهم..حسب كلام الدكتور كال واحد منهم متشوه وجهه..وره ساعات وبعد ما اجه اخوه وعمامه.. انه اول ماشفت محمد صديت عنه..ولو علاقتي مو قوية بصگر بس هضيمة ينكتل بسبب طيش اخوه..غلست كلت يمكن مو هو.. اشوف عارف شيكول ووره الفاتحة نفتح الموضوع.. شواي وطلعت وي الضابط اشوف السيارتين.. ام الحادث متفلشة تفليش..والثانية التابعه لصگر بس الجامة الامامية متكسرة والكشن الخلفي صايره بي طلقتين.. بين ما طلعت لكيت هوسة شنو السالفة..
الدكتور : لازم نشرحه..

تخبلت..لأن والدي چنا غافلين عنه وملتهي بوالدتي سكرهه صعد واحتمال يضرب عينهه وتنعمي..لمن سلمونياه واخذناه للمغيسل الرجال كال للأمانة خاف ماتدرون تره الوالد متشرح .. شلون عرف.. مخيطين صدره من الرگبه لحد نهاية البطن.. فالمنظر تخيلته وانطبع ببالي..وانه رجال عقلي براسي خوما اروح ع الدكتور اتعارك وياه..هي صارت بعد.. بس ضليت عايش بندم شلون خليتهم يشرحوه.. فلمن اجيت وشفت العركة ع التشريح..كتله ارميك اذا شرحته..مشيت وياه للثلاجة ودزيت عارف يأجر تابوت من اقرب جامع.. شفته بالثلاجة خاطر اتأكد وشفت الطلقات بصدره..مااجه ببالي شي بس كلت الله يهون على والدته ومرته..اخذته ورحنا للدفنة.. بالسيارة كتلت روحهه ننزله..شكد شفت وعشت وي وادم ماينعاش وياهم.. بس هاي قهرتني..مرته..

وصلنا للمكبرة ودفناه فرفحت علي وتبجي بچي يهد الحيل .. انه واكف غادي عنهم واشوفهه شلون تبوس بي.. شي تبتسم وتبوسه شي تبجي..بس كلهه تقهر ..منظرهه يكسر الگلب اكثر من والدته..بين ما دخلناه الگبر هي ماضلت كلمة ماكالتهه.. ادور ضلت مچلبة بالمرمراية ماقبلت تكوم الا بالتواسيل.. رجعنا للبيت بالطريق نزلت اشتريتلهم مي وشي ياكلوه.. درت وجهي ع السيارة لكيتهه نايمة..

عارف كل شوي يريد يحجي واغمزله يسكت..ابد مو وكتهه .. العالم حايرة بالفاجعه وهذا يريد يگللهم من وره محمد صگر انقتل..لحدما وره الفاتحة والسبعة اخذت عارف ومحمد ورحنا لبغداد نطلع السيارة..بس صدمني الضابط ..
الضابط : مانكدر ننطي السيارة..
ارشد : عليش يابة..سيارة الولد ذاك طلعت..
الضابط : اي..
ارشد : چا شكو بعد..سلم السيارة وراي شغل..
الضابط : مااكدر سيدي..

يريد يحجي ويسكت..چن بلاع الموس..اخذته على صفحه احاجي.. لكيته عرگان وگصته تصب مي..
ارشد : احجي يول ليش ماتطلع السيارة..
الضابط : اجاني اتصال ع التلفون من واحد مااعرفه منو.. كال سيارة صگر حامد شامخ برادو سودة اذا طلعت تنرمي انت وعائلتك..ميضلك اثر..
ارشد : اذا كل ما نسمع حجاية هيج چا كلنا عفنا الشغل.. انطيني الرقم هذا ..
الضابط : انطيك..بس اترك السيارة..اني رجال مسالم ماعندي لا قال ولا قيل..صار ١٣ سنة بالخدمة ..لزمت قضايا وحققت ويا هواي ناس..ولا مره اجاني هيج تهديد..
عكدت حواجبي وتنهدت بقلة حيلة..خوما اجبره : مايكون خاطرك الا طيب..انطيني الرقم والباقي علي.. لاتخاف..

ردلي الرقم كتبته وقفلت الموضوع ماكلت لاحد..اخذت الولد ورجعنا للبصرة..بالطريق محمد ضل ينگر براسي.. راسي صار طبل..كل تفكيري هذول الجماعة نفسهم.. شلون اگللهم وشلون اوصل ماادري..يحتاجلي وكت..بس عارف بطريقنا للسيارة حجيتله..نبهته مايحجي ..
محمد : شحچى وياك الضابط..
ارشد : ماكال شي..
محمد : چا شعدكم طولتو..
ارشد : كال تتأخر يله تطلع..هيج شغلات قانونية..
سكت بس عيونه تكول غير شكل..انه لو بيدي اخنگه.. شلون عين صلفة علي..خلّه اخوه يسكن المگابر وهو كاعد يستفسر شصار وليش..

رجعنا للبيت وصارت الهوسة..اخذت رقم فاضل وباجر اخابره اشوف شسوي.. وصلت عارف لبيته وطلعت لبيتي.. تلكتني انتصار لابسة ومتمكيجه..انه روحي صايره بخشمي وهاي .. استغفر الله..رحت تمددت بهدومي ..اجت كعدت يمي..
انتصار : شبيك حبيبي..شو ضايج..
ارشد : مابيه شي..صبيلي اكل ميت جوع..باجر اطلع للدوام من الصبح..
انتصار : حاضر..
راحت وكمت ع التلفون كتبت الرقم وخابرته.. دك مرتين تلاثة يله جاوبني..
فاضل : الو منوو..
ارشد : انه ارشد..اخو عارف تذكرتني..
فاضل : ولا صغرًا بيك..بس ماعرفتك..
ارشد : مره ردتك بشغلة تخص محمد..جان يشتغل وي ....
فاضل : اي اييي عرفتك..شلونك خوي..

ارشد : زين زين..انت شلونك..
فاضل : على الله..خيرك شو هسه تخابر..
ارشد : والله رايدك بشغلة..
فاضل : ابشر شعندك..
حجيتله سالفة صگر كلهه..التهديدات الاجته بعدين فترة وكطعت ومحمد شلون سافر ..
فاضل : والله هاي سالفة عويصه..يرادلي جية للبصرة.. هسه هو مات الله يرحمه..
ارشد : اي الله يرحمه مايستاهل..اريدك توصلني لنفسك الشخص ذاك الچان يهدد بصگر..
فاضل : منو يكول هو..يجوز الرجال عنده عداوة..
ارشد : لا خوش رجال خطية ماعنده شي.. هي بس هاي سالفة اخوه..وگتلك هو لمن هدده جاب محمد بالطاري .. گالة مالكينا محمد انت موجود..

فاضل : چا هذول هم على هلحچي..
ارشد : اي چا انه ليش طلبتك..
فاضل : شوكت تريدني اجيك ماعندي شي..
ارشد : انه حطلع لواجبي باجر..لمن ارجع اخابرك ..
فاضل : تدلل خوية..
ارشد : الله يسلمك..يله اخذ راحتك خاف ضوجتك..
فاضل : لا هلا بيك بكل وكت ياب..

ترخصت منه وسديته..اذا وصلتله اوصل خبر لعمام المرحوم .. واذا يشتغل هناك..قابل وين يشتغل مثلا..چا المات مكانه مو جبير مثلا لو شنو.. سديته جان تجي انتصار جابت الصينية حاطه بيهه اكل..كعدت يمي وتتفيكلي..
ارشد : مالي خلك تره..
انتصار : يااا..لعد انت تعوفني وتروح بدون مانسهر سوه..
ارشد : يابة توني يالله طالع من عزى شتردين اسوي.. موزين كاعد..راتبي مامستلمة لازم اخذه واودي لجهالي تأخرت عليهم..
انتصار : خو انت كلمة والثانية تكلي جهالي..واني شنو.. عايفني هيج..حتى ماخليتني اسوي طفل يجمعنا سوه..
ارشد : ماعوزج والله اذبحج انتي وياه..

عافتني وكامت تبجي..كلشي ولا اشوف مره دموعهه تنزل.. ام واخت وزوجة..اتخبل..تلعب روحي من الدنيا بعد.. عفت الاكل وكمت صالحتهه..ماببالي اسوي طفل منهه.. علاقتي بيهه محد يدري بيهه بس عارف..
رحت تعشيت وصحتهه تاكل وياي..كملت وكمت اخذتهه لحضني واسولف وياهه..هي الوحيدة ماعدهه احد يوصلة كلامي..بس باجي الجانت يمهه ام حنان.. فاحچيلهه كلشي.. يومي من بدايته لحدما ينتهي بحضنهه..

بعد ليلة طويلة تمددت وهي بسدي تبوس بيه لحدما غفيت..كعدت الصبح مغبش سبحت واجيت لكيتهه نايمة ومتكشفه..الجو بارد يكرص من البرد..غطيتهه وخليتلهه فلوس خاف اتأخر وطلعت للدوام .. استلمت راتبي وحولت منه لجهالي وطبيت للمقر بعد خلصت شغلي بس هاي سالفة محمد وفاضل بقت ببالي.. ماادري المن احجي..وبنفس الوكت مااكدر اتحرك بخطوة وحده بدون ما تجيني اشارة من واحد گرابته..خوما بكيفي.. انه بس وصلت هناك كتبت الرقم الانطانيا الضابط لمن ردنا نطلع السيارة وانطيته لواحد ثقة..
ارشد : اريدك تاخذ هذا الرقم وتروح ع الشركة اطلعلي معلومات كاملة وتحدد الgps (الموقع)
- : حاضر سيدي..
ارشد : كملّي الشغل وفلوسك موجوده..
- : تدلل..
ارشد : يله توكل..

اخذه وراح.. طبيت للمقر انتظره..اذا يبقى يمه بالعجل بس يدگون الرقم حاسبه تطلع كل المعلومات.. وره ساعتين هيج جان يدك علي..
ارشد : ها بشر..
- : اني بطريقي للمقر سيدي..
ارشد : يله..
طلعت بره وره ربع ساعة اجاني يتمشى..
- : الاتصال من البصرة شارع الجزائر..ساعة بالوحدة و٣٥ دقيقة بالليل ..الرقم ماله صاحب مجهول..يعني السيمكارت مبيوگ مو رقم مشتري وبي عقد.. ابو الشركة رجع خابره طلع خارج منطقة التغطية..
ارشد : نعلعلا هلحظ الوصخ..
طلعتله چم فلس انطيته..تشكرني وراح..

هو انه المفروض اعرف هيج ارقام مالهه صاحب.. مو اول مره تصادفني هيج حالة..بس الواحد يسوي اليطلع بيده..

بالليل اجاني اتصال من خال صگر..جاوبته..بعد سلام وكلام فتح الموضوع وياي..
وائل : رايدك بشغلة..
ارشد : كول خالي..شعندك..
وائل : والله ليش افر السالفة واماطل بيهه..بس بلكت شغلك يساعدنا نوصل لذولاك اليشتغل وياهم محمد.. هو مايكدر يوصللهم تدري بوضعه..
ارشد : اي ادري..خالي انه بدوامي هسه..چم يوم وانزل .. اكو واحد اعرفه كبل لمن تهددتوا وطلعتو للحلة هو وصيته يجيبلي معلومات على هذول اليشتغل وياهم محمد..
وائل : ها يعني يسوي شغل..
ارشد : اي لاتخاف خليهه يمي..بس احصل معلومات كاملة واندل بيته الباقي انتو شتفصلون انه البس..
وائل : اي نريد نفض السالفة والحچي يوصل لعمامه بعد مابيهه مجال نتستر ع الموضوع..صارت طك بطك.. ابنا هددهم و هم كتلوا ابنا..اصلا فوك سالفتهم بقاطات..

ارشد : هاهيه..انه همات كلت لازم الحچي يصير بالعشاير خاطر تنفض..احسن منا تضل تهديدات..
وائل : يله..عاد انت شوكت ما تنزل من واجبك انه انتظرك .. بس يكون افضل اذا استعجلت..
ارشد : تدلل خالي ..التريده يصيرلك..
وائل : ماتقصر..يله اخذ راحتك..

ودعته وسديته..صفيت العندي بعد بس اوصل لفاضل اشوفه شيسوي..هو يتخشخش ويحير منين يحصل الاريده.. بس اكمل شغلي وارجع هاهيه..

دنوة : كعدت من النوم لكيت ديمة بحضني نايمة على بطنهه .. بستهه وامسح على شعرهه..شواي وكعد ايمن.. اجه حشر روحه بحضني ..يغار بعده.. حضنته وقربته علي اشم بريحته.. مايقبل اخليله من عطري..لمن يشوف صگر واكف ديمشط شوي يدنج ع الميزتواليت چي اطول من المرايه.. ويخلي عطر..يجي هو يقلده بكلشي..حتى العطر يكلي مال بابا ريحته اطيب..
همست يمه : ولك مخلص عطر ابوك..
عاين علي وابتسم ..خله ايده على حلكه وصغر عيونه هو مبتسم : شوي صغيروووني..
ضحكت وحضنته : يمة يمة من لسانك..

وره شوي كعدو ثنيناتهم ..كمت غسلت ونزلنا.. مشى اليوم وحدي بالمطبخ..روزة تعبانه ماادري شبيهه..هو انه كل ما اصير وحدي يجيني طيف صگر..احسه واكف يمي يثرم زلاطة.. لو منتچي ع الباب يدخن..كل ما اشوفه لو المحه دمعتي تنزل وگلبي ينعصر حييل..وي اشوفك بعد.. وشسوي بدونك ماادري..ماحاسبه حساب لأيام اعيشهه بدونك وبدون مساعدتك ودعمك الي.. فكرت بكلشي بالدنيا وتحملت الصعب والاصعب..بس ماتوقعت فديوم اعيش بدون حسك .. بدون ما تگلي حبيبي ، بنيتي ، ابوية ، باباتي.. شلون اعيش فهمني.. انه واكص الدجاجة جانت بالمجمدة والتفكير براسي.. خيال صگر احسه وراي ودموعي بعيوني ماحسيت غير بشي احمر ترس ايدي ..

صحصحت شوي وفتحت عيوني..لكيت ايدي متروسة دم.. اصبعي مفتوح ماادري شلون كدرت اشوف المنظر.. كمت ابجي بالزايد اخذت ايدي خليتهه جوه المي.. مااكدر اصيح على خالة .. وخرت الشال من رگبتي لفيته علي.. رحت لغرفة خالة ودموعي بعيوني من الوجع..

الحجية : سترك ربي..شبيج يمة شنو هلدماية
دنوة : خالة ماادري بروحي وكصيت اصبعي..
لطمت على خدودهه وكام اجت يمي.. وخرت الشال وعكدت حواجبهه بخوف..
الحجية : يمة وج شمسوية برويحتج ..
سكتت ماجاوبتهه بس ابجي.. اجه ايمن على صوتي هو جان بغرفتهه.. شاف الدم جان يشهك وراح يركض للهول ..شواي واجه الحجي متدروش..
وائل : يمعووده شمنتظره البنية خسرت دمهه..امشي اخذج للمضمد خالو..

عاينت على خالة..ماادري يصير اطلع لو لا..بس من الوجع بعد ماحسيت بروحي.. اريد بس يروح الوجع.. خالة جرت عباتهه لبستنياهه واجت وياي طلعنا للمضمد بسيارة محمد.. شاف الجرح تخبل..
- : مايجور هشكل متأخرين ..خطية
وائل : شنو يعني لازم خياط..
- : شي اكيد ..اصبعهه مشگوك..
سكتت ومدنجة عيوني للكع.. ألم روحي اكثر من هذا الألم .. انه روحي تعبانة ومجروحة مو اصبعي.. كام يخيطليا ودايرة وجهي اخاف اشوف.. من يوم يومي اخاف من الدم عاد هسه .. لجظات وحسيت صگر كاعد يمي وكامش ايدي المابيهه شي يبوسهه .. شهكت اريد اركز عيوني بس مااكدر ماادري شبيه .. همست بصوت يادوب ينسمع : شديصير .. ليش انت هنا..

صگر : بنيتي متوجعة واعوفهه تبجي.. چا مو زلمة انه..

سكتت ودموعي تنزل عشرة عشرة على خدودي .. ماادري ابجي على الم اصبعي لو على صگر الي ماضل منه بس هلطيف يجيني بكل وكت.. احس روحي تعبت واعصابي تلفت .. شسوي ياربي فدواتك ساعدني.. دليني للطريق الصح .. فهمني شديصير.. ليش بس انه دااشوفه من دونهم كلهم .. ضل كاعد يمي وكامش ايدي لحدما كمل
- : يله تكدرين تكومين .. حكتبلج مهدأت ومسكن تستمرين عليهن خاطر مايصير عندج التهاب .. انتبهي مايجيسه ماي اسبوع وتعاي اشيل الخياط ..

الحجي تشكر منه وانطاه فلوس وطلعنا.. اشترالي الدوه ورجعنا للبيت .. لكيت ايمن بالطرمة يبجي ومحمد كاعد يمه يريد يگومه مايقبل معند .. اجيت كعدت يمه بسته..حضني ويبج بحضني .. اخذ ايدي شافهه ملفوفه بباندج واصبعي بشاش وبي احمر..
ايمن : تعورتي..

دنوة : شوي.. بس هسه انت من بستهه صارت زينة كلش.. ابتسملي وعيونه تلمع من الدموع .. حضنته وكمت طبت جوه لكيت روزة مكمله الغده.. چا شكد ضلينا هناك .. تحمدتلي ع السلامة .. انه من الونين الونيته تعبت.. جاوبتهه بهمس وكعدت بالكع اوكل ايمن وديمة .. ايمن ياخذ لحم يخلي جدامي.. مثل صگر ..

ايمن : ماما اكلي حبابة.. حتى بالعثه (العشه) مااكلتي..
دنوة : مااشتهي يروحي.. انه اشبع من اشوفكم تاكلون..

سكت ماكال شي.. كملتلهم وصعدنا فوك ..فتحتلهم تلفزيون يتفرجون .. طبيت للحمام سبحت وايدي حاطتهه بعيد عن الدوش خاطر ماتنچلم .. كمت ابجي على حالي ووضعي.. ولك شلون يروحي انه شلون حعيش.. خايفة وببالي الف حسبة .. ضليت ساعة جوه المي لحدما كملت ولبست وطلعت .. رحت للغرفة حضنت مخدته ودموعي تجري.. فحطت بجي بدون صوت .. اريد اصيح واطلع الضيم البيه.. شلون يربي والله تعبت.. چم يوم تعبت بيهن.. سنين شيكضيهن ماادري.. كمت احاجي ودافنه راسي بالمخدة : ليش دتجيني يومية عفية بس جاوبني.. تعبت شلون بس فهمني شديصير.. انه .. انه ماادري يعمري يعني عاجبك وضعي هيج .. حتى نسيت روحي وبس ابجي .. جهالنا شلون ابقى وياهم..

ضليت ابجي بحرگة ودموعي تصب على خدودي.. لحدما تعبت وكمت توضيت وصليت..

مشن ١٤ يوم نفس الروتين..انام على ريحة شماغه لو دشداشته.. واحضن مخدته..لو اسمع صوته لمن سجلّي صوت يقرالي قصيدة عريان ..اموت بجي..اتمنى ميته وياه ولا هذا العذاب..كل يوميه اشوفه بالغرفة كاعد ع الكرسي يدخن ويضحك.. كل شوفاتي اله اشوفه يضحك..لو مبتسم.. اشوفه بهدوم نظيفه وجديده.. بس باليوم الخيطتت بي اصبعي شفته بهدومه العسكرية وبيهه تراب..ماادري اليشوفني يكول مخبلة.. وين اكو هيج..بس دااشوفه جدامي بعيوني.. اول فترة استغرب واحس شي غريب ديصير.. لحدما شوي شوي تعودت علي..كمت اذا افوت للغرفة ومااشوفه اتضايق.. سرور خابرتني مرتين ورزان على طول وياي هي والبنات .. نوارة وسما وغدير..

وره هلاسبوع كاعدة بالمطبخ العصر اسوي كاستر لايمن مشتهي.. سمعت صوت عارف وارشد فاتوا للبيت.. ضليت اشتغل واسمعهم..

وائل : بشّر خالو..وين وصلت..
ارشد : جبتلك اسمه وعنوانه بالمضبوط..
وائل : يالله..شلون ..

ارشد : بقيت بالدوام عشر ايام ..كاعد على نار.. شكد ما مقهور علي..انقتل ظلم..بسبب ... استغفرالله بس.. وراهه نزلت للبيت..اول ما طبيت البصرة خابرت فاضل انطيته علم بجيتي يعني حضر روحك تجي..
يوم بالثاني لكيته يمي..انطيته معلومات بحكم شغلي كلشي يجيني بالدقيقة بس اطلبه..اكيد فاضل وحده مايكدر يسوي شي..محمد مدخل روحه بمكان اكبر منه ومني.. بفئة جان شغلهه ذبح ع الهوية ..مااعرف شنو هذا الطيش.. العرفته انه اسمه الكامل وعشيرته واذا عنده اتصال بالعشيرة يعني موجود اسمه بالشجرة لو لا..الباقي انتظرت فاضل يجيبليا.. وصيته شيسوي وراح..ثاني يوم اجاني حجالي..

ارشد : ها شعرفت عنه..
فاضل : هنا بيته قريب..بس تكول بيت ابو منتظر يودوك علي بالضبط..معروف..
ارشد : ومحمد جابوا طاري..
فاضل : لا ماكو ماسمعت شي ..بس خوي ..انه اخوك واخلف عليك..اخذهه مني..اذا دخلت روحك اكثر من هيج يذبوك بديرة انت نفسك ماتدري وين..
ارشد : لا يابو..قابل ماادري بيهم شنو..بس انه مغشول بالي ع المرحوم مو حجيتلك..
فاضل : اي خطية الله يرحمه..هسه انت شناوي تسوي بعد..
ارشد : هاهيه بس اخذت السكن والعشيرة..الباقي همَ اهل المرحوم شوف شيسوون..مابيدي شي..
فاضل : يله على راحتك..بس مثل ما وصيتك..
ارشد : ابشر.. كوم عازمك على عشه مرتب..
فاضل : ليش لا..

ارشد : اخذته ورحت..ضل يمي يومين وراهه رجع لأهله بدهوك.. انه ارتاحيت ورحت سألت عنه بالمنطقة.. سيارته سوده مظللة ورقم حكومي..كومتيش هاي التنطي هيج سلطة بيد واحد ظالم.. المهم رتبت وضعي ورجعت لعارف حجيتله السالفة كلهه..عاد هو خابر خالهم ورحنالهم..

ارشد : بس اكلك خالي..خاف زحمة عمامه مايدرون واحنا كل هذا مسوي..
وائل : لا يابو اكرم طبعا انطيتهم علم..عمه الشيخ كال بس تنطيني اسمه الباقي علي..
ارشد : اي هاهيه چا خلص بعد..وصلّه الاسم والعنوان وخلي يتوكل..هذول تطلع عينهم اذا شافوكم سكتوا ع السالفة.. يضل محمد بخطر حتى انت..
وائل : اي چا ليش حجيت هشكل انه ..
ارشد : يله انه سويت العلي..بعد تأمر بشي..
وائل : ماادري شلون اجازيك خالو..
ارشد : تدلل خالي..والله المرحوم ماعندي علاقة قوية بي بس حاله يقهر..حيبين الحق بحيل الله..
وائل : ان شاء الله..ماقصرت..

دنوة : ضلو كاعدين شواي بعدين راحو..بقيت الوب.. شحيسوون.. گوام يعني..هو اكيد ماكو غيرهه.. حبيبي حيصيرله شهر جوه التراب سوده علي وهذول يردون ياخذون فلوس خاطر يبينون روحهم..انه الدنيا كلهه طاحت من عيوني يوم الماسمعت بيهه انفاسك..يوم الشفت بيهه طلقاتك.. ربي ليش مااخذت روحي لحد هسه..تعبت من التفكير والقهر .. جبتهه ضيم بكتل ورزايل من ابوي..حتى شخصية ماعندي من وره اسلوبة الحاد..لحدما گطع اغلى شي تمسكت بي .. حب صگر ..زوجني لعقيل شفت يمه المررر.. صگر عشت وياه كلشي صعب..بس كله تجاوزته چي هو وياي.. يخابرني يطمني مايعوفني وكلهه فترة وتعدي..هسه منو يكلي فترة وتعدي.. ليش انت هم تتعدى وتنتهي .. حشاك والله..

ماحسيت على روحي غير دموعي بحضني وابجي بهدوء.. تعودت ابجي انه وساكتة علمود الجهال نفسيتهم ماتتأذى.. تعودت اسوي كلشي بدون حس..علمودهم.. ادوس على روحي وگلبي ودموعي واضحك وياهم بعز دموعي وقهري.. مااريد احسسهم خسروا ابوهم..اريد اصيرلهم ام واب واخت جبيرة .. بس هم البقولي..حصرف مي عيوني عليهم بس يكبرون واشوفهم كاموا على حيلهم..ابنيلهم شخصية ماتهزهه ظروف .. ماتهزهه كلمة وموقف..تعبت وتأذيت وانهاريت..بس كله ميخالف.. تعلمت الصح وين وبنيت شخصية بفضل صگر جان المفروض من زمان عندي هيج شخصية..بس كلشي بي صالح الله كريم..

مسحت دموعي وعاينت لاصبعي..شكله صار مو طبيعي مثل الباقيات..ولو استخدمتله مرهم وخافي عيوب بس يبقى مو طبيعي.. المهم عدت سلامات.. ايمن كل ما اكعد من النوم اشوفه يبوس بي..يكلي ماما اخاف يوجعج انه ابوسه يصير زين مو تكولين هيج..
جهالي الوحيدين احس روحي سعيدة من صدك يمهم.. بكلامهم ومواساتهم الي ولو مو بالصورة المقصودة..

بالليل كملت شغل وطفيت كلشي..عرفت الكعدة حتصير بعد يومين بس يوصلون خبر لعمام الولد وتصير بالمضيف.. مااهتميت للتفاصيل..روحي صايرة بخشمي شيردون يسوون خيسوون.. اخذت الجهال وصعدت فوك..لكيت خالة ابتسام داكة علي..صارلهه چم يوم ماجايتنا بس جديتي تجي .. مره اجت هي وخالة فاطمة ومره وي غدير.. اجن وره ما شلت الخياط مال ايدي.. مايدرون بالصارلي ..رجعت دكيت عليهه رأسا جاوبتني..
ابتسام : هاي وينج يمة ضل بالي..
دنوة : جنت جوه خالة..خيرج خوفتيني..
ابتسام : تحلمت حلم بالمرحوم..
دنوة : صگر..
ابتسام : اي ييمة..
دنوة : خير يارب..

ابتسام : شفته جاي لبيتنا لابس دشداشة ولاخ شماغ براسه.. كال وين خالة ابتسام..رحت علي اشوفه..لكيته كامش چف ايده اليسرى ويون..كتله ها خالة خيرك شو كامش ايدك.. كال ايدي توجعني..لفيهه بشي بلكت تصير زينة..مشيت واخذته وياي شديتله ايده بعلگ اخضر..كتله هسه تصير زينة.. ابتسملي وكال ديري بالج عليهه..يعني كل ما اجي شوفيلياهه شلون صارت.. كتله تدلل شوكت ما تريد تعال اشوفلكياهه..بعدين فزيت .. عندي كتاب يفسر الاحلام..طلعت تفسيره كال اذا المتوفي يشكي من ايده وهو ماعنده شي موزين مثلا ماضي قديم لو افعال ماترضي الله معناهه شخص قريب علي مريض.. ويخالة انه كعدت من النوم انتي على لساني..صار فترة مامريتلكم.. شلونج خالة خوما تعبانه..سولفيلي..

هي سكتت وانه طكيت بجي..كمت ابجي واشهك.. كامشه التلفون بالكوه ايدي ترجف وانفاسي عاليه..
ابتسام : ولج فهميني شكو..مريضة..
دنوة : خالة ..بعد مااكدر احجي..
ضليت ابجي بحرگة ودموعي حاره..يروحي حاس بيه اكيد.. عرف بيه انشك اصبعي..كتلهه : اي خالة.. ذاك اليوم دااگص الدجاجة وانشك اصبعي..خيطوليا خياطين..
ابتسام : سوده علي..چا ماحجيتي ماكلتي..
دنوة : شحجي خالة..تعبانه حتى من الحچي.. انه ميته قهر على روحي الماتت وياه..على ضحكتي الاندفنت يمه.. شيرجعهن هذني.. هو شيرجعه.. خالة تيتمت من بعده ماترملت..

ضليت ابجي وكامشه التلفون بالگوة..حسرة گلبي اكبر من كل دموعي البجيتهه وتنهيداتي التنهدتهه..بس الله يكدر يجبر خاطري.. انه مابيدي شي ..ولا أي واحد..

شواي وسديته منهه..رحت على شماغه..مكاني الاخير وبيتي الاعيش بي واتنفس هواه..حضنته واشم بي لحدما غفيت..

وره يومين اجو عارف وارشد ..محمد بدل هو والحجي وطلعو.. عرفو مكان الولد ودزو خبر لعمامه علمود تصير الگعدة والفصل.. طلعو الظهر وللمغرب هم ماكو..ضل بالي چي تأخروا .. كمت على خالة حاجيتهه..
دنوة : خالة خابريهم شوفيهم وين صارو..
الحجية : جيبلي المهجوم اخابر بي..
جبته انطيتهيا تخابر.. شواي وسدته..
الحجية : هسه حيجون..بالطريق..
وره ثلث ساعه وصلو..وكفت وره الباب اسمعهم..

محمد : والله من دنعل ابو لابو حتى اليطلعله من سابع ظهر.. جايبلي واحد مدري منين ما منين مسوي شيخ براسنا.. خوش عمي فشله..
وائل : والله عمك زلمة عاد غير الصدك..اخذنا الحگ مربع.. بعد كافي مايصير نسكت..الحگ ويانا..والصار بسببه هو ..
ارشد : المهم فضت وخلصنا..باجر تروح انت وعارف شوف لو محمد على راحتك استلمو فلوس الفصل ..
وائل : اي بحيل الله هاهيه هي انتهت بعد..
ارشد : اي خالي عاش لسانك..بس تاخذ الفلوس اقفل الموضوع نهائي..انتهت السالفة وكلمن راح بديرته..لاتضل تفتح هاي السيرة..ترحمله احسن..
وائل : الف رحمه ونور تنزل على گبره..مايستاهل..
عارف : اي والله مايستاهل..زلمة حوك ..الفخر بإبنه.. اذا طلع علي اعتبره مامات..

عفتهم يحجون ورحت كعدت يم خالة..كاعدة يمهه واسولف واحسه ديراقب حركاتي..تعبت من خياله هذا.. اريد احد ينطيني تفسير للديصير..بس اخاف احجي لأحد.. خاف عبالهم رجعتلي الحالة النفسية ومحد يصدكني.. داانتظر يمكن وي الايام يختفي..ولو دورات احتاجه يمي.. لمن ابجي اشوفه واكف جدامي ويحرك راسي بـ لا .. يعني لاتبجين.. يبقى لحدما اسكت ويختفي تدريجيا..

بالليل وره العشه واكفة اغسل مواعين واسمع الحجي يحاچي خالة على فلوس الفصل..
الحجية : وين حتوديهن..
وائل : حفتح حساب بإسم ايمن وديمة بالبنك واخليهن بي.. خوما الي..هم اولى بيهن..
الحجية : الله كريم..سوده علي حتى مايدرون ابوهم مات .. حبايبي..ماتهنوا چنهم هو..

اسمع صوتهه تبجي وتعاتب بمحمد.. كمت ابجي بحرگة وواكفة بمكاني..احس رجليه صارن ثكال بعد مااكدر اسوي شي.. هي تحجي بنبرة صوت تقهر وتفطر الحجر.. متت يالله كملت المواعين وصعدت فوك..

ثاني يوم راح الحجي هو ومحمد واجه قصي همات وياهم علمود ياخذون الفلوس..فتح حساب بإسم جهالي وخلّه الفلوس بيهه.. اخذو اكثر من خمسة وتلاثين مليون..مبلغ ضخم .. ياهو اليسمع يكول شنو هلمبلغ..كتبوهم تعهد عشائري وقانوني مايعترضولنا ولا نعترضهم بأي شكل من الاشكال..انه كل هلدنيا مو بعيني بعد ابد.. ولا يعجبني البس الوان ولا افكر اصلا.. تجردت من الحياة وانه بعدني بيهه..بعدني اشتم هواهه..بس شسوي بروحي واقنعهه المات صگر مو انه.. چن انه متت وانحرمت من كلشي مثله.. كل ما اصلي ادعي بس الله يجبر گلبي وينطيني الصبر.. لأن تعبت اشوفه خيال وبس اتقرب يختفي.. چان هو يفتحلي ايده علمود اجي بحضنه.. هسه بس اخطي خطوة يختفي..شكد اختلاف .. رحمتك ولطفك بيه ياللهي..

مرت الايام نفس القهر والبجي والدموع..
نفسيتي تعبت واعصابي تلفت..كمت اخربط بالعلاج.. يوم اشرب عشره لا..انسى.. لوما تجي خالة تكلي ها يمة اخذتي دواج يله اتذكر..ايام صعبة ومتعبة ومهلكة لشخص مثلي.. مثل ضعفي وهواني جدام شخص مثل صگر..وكفلي وعلمني وساعدني..وكلني وشربني واخذني بإيده لعدد من الدكاتره أي شخص يمل هلكد ما فرفرني يم دكاتره وشيوخ وسادة.. كل يوم بالليل مواقفه تمر جدامي وتفحط روحي بچي وقهر..

كل هالايام احد روحي عايشة بوهم..بلكت يطلع كلشي حلم .. بلكت افز منه ياربي..فززني..عيشني واقعي.. اريد اشوفه يمي.. اريد احس بوجوده الهي..تعبت وحيدي.. مامتعلمة بس وياه .. لحدما اجه اليوم الفززني من الوهم العيشت روحي بي.. يوم الاربعين مالته.. گرايبنا كلهم اجو..من سرور لحد رزان وسما وشذى.. اكو بيهم أجرو سيارات ..انه رحت بسيارة محمد وي خالة والحجي..سرور اجت وياي ..نوارة راحت وي خالة ابتسام .. من الصبح لحد الليل متت من التعب والشغل.. هلكت.. ولو البنات وياي بس تعب..اكثر من عشرين نفر..

بالليل نظفنا المطبخ انه والبنات وصعدت فوك سبحت ولبست غير هدوم.. طبعا خالة وصت روزة تشتريلي هدوم سود..هي ماقبلت اشتري هلكد بس انه أصريت..لأن قسمت بعد ماالبس أي لون..عسا ما يكون اخر يوم بحياتي انه قسمت بعد..
طبيت للغرفة سويت جنطة لايمن وديمة بيهه قطعة هدوم وحليب خاف نتأخر هناك..نيمتهم ونمت وياهم.. كعدت الفجر لبست صاية فوكاهه عباية..اخذت الجنطة وشلت ديمة.. ايمن شالته سرور ورحت سكتاوي لبيت خالتي خليتهم عدهه ورجعت لبيتنا..ب٣ وشوي طلعنا لبغداد..طول الطريق گلبي يدك سريع وانفاسي ترجف.. حشوفك..اويليييي شكد مشتاقتلك يروحي.. انه بس اشوف اسمك ارتاح..

احجي واقنع بروحي بالگوة..بالحقيقة انه شلون حرتاح وانت جوه التراب سوده علي.. شكد جان قنوع ويحب كلشي جدامه.. مايتأمر ولا يعيب على شي.. مو حرام هيج يروح وتجي فلوس بمكانه.. ظلم.. ظلم والله.. بس الله يعين گلبي المامقتنع لسه بغيبتك..

نص الطريق وغفيت..كعدت على صوت سرور يمي..
سرور : كومي حياتي وصلنا..
دنوة : اي..
كمت وتمشينا لمكان گبره..امشي واكول بيني وبين روحي.. وحيد هنا..مو بين اهلك وناسك يعمري..عساهه بعدوانك .. عساهه بي هذا الحقير النذل..عسا مايشوف الراحة طول عمره.. امشي ومدنجة..لحدما وصلنا لمكانه وانقبضت روحي.. تمشيت لعنده احس روحي فقدت كل حاسة عندياهه..بس عيوني تشوف وتبچي..قريت اسمه وتقدمت.. كعدت يمه وامسح ترابه .. بست اسمه وايدي وشفايفي ترجف..عبالك داابوسه من شفايفه..مو داابوس اسم لايقدم ولايأخر..
صار صوت بجي قوي..رفعت راسي اشوفهم.. خالة تبجي.. جديتي ، سرور ، نوارة ، خالة ابتسام وحتى غدير.. كلهم بدون استثناء..

حضنته واهمس يم اسمه : تعبت بدونك انه والله تعبت.. دتسمعني.. اسمعني وريحني..اريد تخلصني وتاخذني يمك.. مدااتحمل بدونك..الغصة بزردومي وغلاتك.. حبيبي ديمة وايمن مايدرون بيك هنا..كتلهم بابا مسافر يتأخر يله يرجع.. حترجع مو.. جاوبني..

غصيت بالحچي ودموعي تصب..كمت اشهك واگح.. ماتحملت انتهيت..تعبني فراگك..انه ضعيفة مو كد الحمل هذا.. اريدك يمي شلون بيه..شلون انه شلون اقنع حبيبي.. احس الدنيا قفص اظلم بدونك..احسني بدون روح بدونك..
ضليت ابجي يمه واشهك..هملت كل الناس وبقيت لروحي انه وياه.. اخذت قرآن قريتله سورة يس وغسلت گبره بمي ورد .. خليت بخورات ثنين وكعدت يمه صافنة ودموعي تصب.. لهناك والشمس صارت قوية..
قاسم : امشونا يله هم يالله نرجع..
دنوة : عفية عمو خليني بعد شوي ..
قاسم : دااكول نتأخر يله نوصل..كوموهه..
الحجية غادة : خليهه شوي ابو سالم..ماتأثر الربع ساعة..

سكت هو ماكال شي..بقيت يمه ..اريد تطفى ناري.. اشو كل ما اقره اسمه اشتعل من جد وجديد.. والغصة بزردومي تصير ضعف.. وره ربع ساعة كاموا كلهم ..كمت بالسحل والتواسيل ماردت اكوم..لو علي اضل ايام هنا.. ادري بي ديسمعني.. هو مايقبل دموعي تنزل ..ضليت احاجي وامشي انه ودايرة وجهي لمكانه..لحدما ابتعدنا وانداريت..

صعدت بالسيارة وحاضنه رجليه بإيدي انه وابجي.. شلون اعوفك وحيدك حبيبي..اعذرني بس شسوي.. انه ادعيلك دائما واصليلك حتى حقرالك قرآن..انه وروحي وياك لاتخاف..
وصلنا للبيت..راحت سرور جابت الجهال واجت..اخذتهم لحضني وابوس بيهم..اشتاقيتلهم..اربعين صگر صادف عيدميلاد ديمة..اجت تعاتبني..
ديمة : ماننيتولي عيميلاد (ماسويتولي عيدميلاد)
دنوة : ماما تعبانه شوي..بس اصير زينة اجيبلج كيكه تجنن حتحبيهه كلش ..
ابتسمت وباستني..اخذتهم وطبينا جوه..

عاد شوي شوي كامو يرحون..بقت بس رزان هي وسما وشذى.. سرور همات..نوارة رجلهه اجه وياهه فبس رجعنا اخذهه وراحو..بالليل طبيت للمطبخ اسوي عشه..جان اسمع صوت عيطة..غسلت ايدي وطلعت اشوف شكو.....

يتبـــــــــــــــــــــــــــــع......................

اولا وقبل كلشي ، شكرا ع المليون قراءة ، جدًا اشكركم واشكر تفاعلكم مع روايتي ومع ابطالها ، ممنونة وفرحانة بهذا العدد الكبير واني لازلت ببدايتي وحققت هيج رقم .. انجاز وان شاء الله القادم افضل وافضل .

وهسه اطلب منكم ان تشتركون بالقناة الموجود رابطها بالوصف مال حسابي وشكرا😘💙.