رواية اسألي عني الليالي الفصل الثالث 3 - بقلم رقية جاسم

جرّيت الثجيل والمتعوب ..
بمروَد كِحل ..
جرّة الگايل نبقىٰ ع المكتوب ..
- رُقيّة جَاسم

قناة التليگرام

الــــبــــارت الــــثــــانــــي..................

ورة هلشهر كعدت مصخن وجسمي مكسر..فلاونزا.. بس ماكعدت..كمت بدلت وشربت چاي حار وطلعت لنفس المكان الاشتغل بي..بلكت بعده يحتاج عامل..لمن وصلت شفت واحد داير وجهه..بين عرفته وبين لا..احس شايفه .. فجأة اندارلي..

هذا خالي خليل..الوحيد ماوكف ويا خوالي الباقين بيوم وفاة امي.. ومن يومهه مشفناه بعد..اني بين اتقدم احاجي وبين ارجع ولا كإن شايفني..

هو سبقني واجه بإتجاهي مثل واحد ممصدك..لزمني من چتافي ويباوعلي ..
خليل : حامد..
: اي خالي..
عيونه دمعت وحضني هو ويطبطب على ظهري : والله من يوم العرفت ماموجود لا انت ولا اختك النوم مامر عليه..
من شفته كال هيج حضنته..شميت بي ريحة امي.. اخذني ورحنا تمشينا بشوارع باب الشرجي..

خليل : شلونك خالو..والله مشتاقلك..بس تدري بالصار..
حامد : شلوني..زين الحمدلله الله يسلمك..
خليل : سولفلي وليدي..كبران ولحيتك طولانه..احجيلي..
حامد : شحجيلك خالو..هاي الشهور كبرتني سنين.. ماجنت حاسب حساب لهيج موقف..بس الحمدلله دااشتغل وسناء برگبتي ماعايفهه..
خليل : وين كعدت انت..
حامد : قبل مااجاوبك خالي..وياريت متزعل مني..
خليل : كول حبيبي..
حامد : ابوية يدري بيه..خوما جاي من عنده..
خليل : لا وداعتك مجرد صدفة جمعتنا..اني حتى ماقابلت ابوك الشهادة لله..بس سمعت من خوالك..

بتساؤل : ليش دور عليه يمهم..
خليل : ليش خله مكان مادور عليكم بي..كايل اذا هو ميريد يرجع ع الاقل ينطيني سناء..هاي بنية والدنيا تخوف..
حامد : على گص رگبتي والله..ماانطيهه..هي همات تعودت ع الكعدة هنا واني مامقصر وياهه..
خليل : ادري بيك زلمة وكفو منك..شدتشتغل هسه..
حامد : بعد داادىر شغل لاخ..
خليل : خالو انصحك نصيحة لوجه الله..اكعدة وحيدك متفيدك صدكني..اكبر منك بيوم تفهم منك بسنة..واني لوما اعرف المسؤولية شتسوي مااكلك هيج..هسه تكلي اني جنت اشتغل بالبصرة قابل اول مرة..اي يابوية اول مرة..هنا جنت تشتغل بس كاعد ببيت ملك واذا احتاجيت شي وفلوسك متكفيك ابوك موجود والخير للراس..هسه تحسب حساب الشغلة الف مرة .. صحيح لو لا..

حامد : صحيح خالي..بس اني خطيت هلخطوة صار شهور.. بعد مااكدر ارجع..وتعودت ع الشغل..حتى الشقة .. اني شاغول لتشوفني هيج..غير ميبين عليه..
خليل : ادري بيك..اني اريد خاطرك..واعتبرني بمثابة ابوك.. بيتي مفتوح الك ولسناء..
راد يكمل وقاطعته : مشكور متقصر..بس مااريد اكعد يم احد خالي..واني عمري عشرين..ابوية بكدي عنده اني وكاظم ومحيي..ليش مستهين بعمري..
خليل : مو هيج ابوية..بس زحمة عليه عايش وعندي بيت وابن وبت اختي كاعدين بفنادق السعدون..

ضل يحاجيني يريد يقنعني اروح يمه..ادري بي شنو.. لهلسبب حجيت ومشيت وياه..بس ابوية اذا عرف بينا عنده ياخذ سناء بالغصب مني..اول وتالي هي بنته يعني هو أحن عليهه من كل مخلوق بعد امهه..فرفضت رفض تام..

تعودت ع التعب واللگمة الصعبة..صار خمس شهور ماكاعد بالكاع..مانايم نومة بدون تفكير..كله افكر شصرف باجر وششتري..خاف سناء محتاجة ومتحجي..

بداية كلشي تعب..مثل اساس البناء مال أي بيت.. دائما يتأخر يله يكمل..لو تصير بي اشكالات فيهدموه ويرجعون يبنوه من جديد حتى باقي البيت ينبني عدل بدون اخطاء .. دبل ڤاليوم مثل منكول..

واني هاي الشهور التعبت بيهه بنتني..خوما ارجع اهدم واعيش جوه جناح شخص يصرف عليه..

استصعبتهه عليه..فمقبلت وشرحتله وضعي.. كال براحتك بس دليني على شقتك حتى أمركم دائما اشوف سناء.. اخذته ورحنا للسعدون.. اخذته وصعدت فوك للشقة.. دكيت الباب طلعتلي سناء..اول ما شافته حضنته..

طبيت جوة كعدنا..لحد العصرية هيج طلع ..قبل ليطلع انطى سناء فلوس لأن اني مقبلت اخذ..طلعت وياه وصلته ورجعت.. طار النهار ومالكيت شغل..انوب مصخن وحالتي حالة.. ضليت الليل كله اتراجف..اخر شي سويت كمادات لروحي شوية ارتاحيت ونمت..

ثاني يوم هم رجعت مصخن ومكسر جسمي..هي تروح وحدهه ميفيدهه شي..

نزلت اباوع ع السعدون..هم ادور هنا..حتى اهل المحلات ملوني.. اخذت تكسي ورحت للكرادة..منصور.. بالرواد.. جان اكو مطعم كلش ضخم..اني وامشيله كلت بيني وبين نفسي اكيد هيج مطعم جبير يحتاجله هواي عمال.. بين ما وصلت لكيت لافتة صغيرة كاتب المطعم بحاجة الى عامل.. كلت بگلبي شكد حظي عدل اليوم.. طبيت جوة حاجيته ..

- : شتعرف تسوي..
حامد : اكل..
- : اي..
حامد : مااعرف عمي ليش اجذب عليك..
فرك وجهه واندار صاح على واحد مدري منو بس مبين مصري من كلامه..شوية وراح..
اندارلي : ماعندي شاغر بس غسل المواعين..هاي هم متعرفهه..

حچاهه بضحك..
حامد : لا اعرف..
-: هاهيه باجر تجي الصبح وعرفت شغلك شنو بعد..
تشكرت منه ورجعت للشقة.. الحمدلله بس دبرتهه..

ثاني يوم كعدت الصبح لكيت ابو خالد جوارينا ديطلع لشغلة وعنده سيارة..كال بعد كل ما تريد تروح لشغلك اني اخذك.. كتله زحمة ..كال لا عادي مبين شغلك بعيد خوما تضل ع التكاسي.. اخذني وذبني براس الرواد وراح..

كمت اشتغل بس مااعرف احد..هناك متعود على سوالف مهدي وچفصاته.. اول فترة ماكو شي..بعدين ايدي كامت تطلع بيهه بسامير وبطابيط وتخزن..أذتني بس ماتركت الشغل.. الواحد يجي الحظ مرة مرتين مو كل مرة..واني برگبتي بنية.. لو ولد جان شغلته وهو يصرف على نفسه.. بس المشكلة بنية حتى مامطلعهه خطية..

فديوم عزلنا من وكت ورجعت للشقة العصرية.. اخذت سناء ورحت لبيت خالي خليل..صح جنت متردد شوية..بس هي هم خطية خوما تضل هيج مخنوگة بالغرفة..انوب يصير بيهه شي.. بقينا يمه للستة العصر ورجعت..بيته بالصالحية فمو هلكد بعيد..

بيوم جنت طالع من المطعم الظهر الجو بتموز يسمط.. صار مهدي بوجهي.. وجهه مزورگ وعيونه مورمة..
حامد : يول هاي شصايرلك..خاف لأن حارة مدااشوف عدل..
مهدي : لك صار شهر اروكض وراك اريد الگالك اثر ماكو.. شنو وين غطيت..تعال محتاج فزغتك..
حامد : خير ياستار..امشي نكعد جوة ..
اخذته وطبينا جوة كعدت بالبداية..

حامد : ها شبيك يابة..
مهدي : تعاركت ويا واحد سرسري..ضربته بوكس.. شو هذا كوم ثاني يوم جيبلي جماعة عفطية جنزوني واني هستوني اريد افوت جوة..يايابة اكلك اريد افوت للبيت بعد مااكدر امشي..
حامد : ايا مناعيل..وشعندك تضربه انت هم مو هين..
مهدي : لك يفشر ويحجي حچي اكبر من راسه..تدري بيه مخبل حتلو ابوية اكتله..
حامد : ههههههه..لا يابة على كيفك متفيدك العصبية..
مهدي : شكو عليك انت قالب ثلج تكول مو بشر.. يله خوية هسه اني اريد ازامط بيك ..
حامد : شكدر اسويلك يعني..
مهدي : تعال ويايه انت وجماعتنا وعمامي حيجون.. خليعرف مو مگطم اني..
حامد : يله ماعندي شي..شوكت حتصير الكعدة..
مهدي : باجر اجيك يم المحل القديم اخذك..العصر مو تنسى..
حامد : يله خير ان شاء الله..

ضل كاعد تقريب الساعة وبالگوة يحجي حتى ميباوع عدل.. خطية مجنز..عاد بالاخير استأذنت من ابو المطعم وطلعت وصلته لبيته ورجعت..خفت ليروح يوكع بالدرب..

ثاني يوم العصر بدلت ورحت وياه لبيت الولد الضاربه..لمن شافوني حسبالهم اخوه..هو ضل يكللهم اي اخوية هذا وتخبل من درى بيكم شمسوين..اني كاعد والضحكة بگلبي.. شلون يحجي بدم محروگ ويحجي بيه للزلم الكاعدين.. بالاخير فضت ودفعولهم چم فلس وتعهد ميتعرضوله بعد..

طلعت ورجعت للشقة..بالطريق تذكرت مدرسة سناء.. سمعت من خالي محترگة..بس صارلهه هواي هسه اكيد تعمرت.. باجر اشوف خالي شيكول بلكت يكدر يروح هو يسويهه.. هو عنده أرض بالبصرة بس كاع مابانيهه .. يروح بحجتهه

ويسوي المعاملة..اي ماكو غيرهه.. وره يومين طلعت من المطعم رحتله بدربي حاجيته..

خليل : يعني ناوي تبقى هنا..تره والله مامهون عليه ابقيكم وحدكم واني موجود..
حامد : خالي انت مامقصر..لو اني طالب مساعدتك وممخليني ببيتك جان گلنا اي..بس اني مااريد.. وفهمتك وضعي.. سناء مااريد تفوت عليهه سنة حرامات..
خليل : اووف منك..يله..مالتهه المستمسكات والجنسية يمك..
حامد : اي طبعا..شوكت تروح خبرني علمود انطيكياهن..
خليل : يله اني قبل لا اروح اجيك للمطعم علمود اخذهن..
حامد : خوش حچي..ممنونك..

ترخصت منه وطلعت..وره اسبوع اجاني للمطعم خبرني شوكت حيروح للبصرة..وراهه بفترة اخذتهن ورحت للشغل.. اجه الصبح اخذهن وراح..طبيت وصفنت بيني وبين روحي..

هسه اني من حرجعهه للدوام قابل عندي فلوس..مااندل مدرسة قريبة هنا.. اوف يابة شكد دااحس بالمسؤولية وشكد صعبة.. خليهه ختفوتهه هلسنة بين ما الم روحي عدل..مااريد ادخلهه واوازيهه هناك وبنص الدوام تبطل.. خلانتظره شيكول وراهه اشوف شسوي..

بيوم تأخرت بالشغل للتسعة بالليل يله عزلنا..طلعت ضايج وايدي مبسمرة من المواعين..مريت من شلة تعبانة.. واكفين اربعة مدري خمسة ومبينين سكارى..اني فتت منهم وواحد حچه..
- : ها لك گوا....
ماجاوبته..رجع عادهه مرة اللخ..انداريتله وضاب على ايدي مااريد اتهور..گتله بتساؤل : اني..
- : اي اختك الحلوة..شسمهه نسيت..
حامد : منين تعرفني اصلا..
ماشايفهم ادري ميعرفوني بس هاي حركات المزعطة.. مشيت عنهم بخطوات..مااحس غير انلزمت من ايدي .. انداريت بحركة بديهية ..تفل بوجهي وضربني بوكس فچي كام يغني..

ادحدحت ع الرصيف..بسرعة كمت بعد لعبت نفسي اطلع خيخة اذا سكتت..لزمته من ياخته انشگ قميصه بيدي.. هو سكران منتهي بسرعة اجه بيدي..صرت فوگاهه كسرته.. حتى حلگه طگ دم..اني منا ضايج ومخنوك من الوضعية.. انوب اجه هذا الهيلگي طفر روحي..

فقدت بعد مااشوف..اجتني ضربة بس ماادري من منو.. ماوعيت غير على صوت دورية الشرطة..كمشني الشرطي من چتفي اني والباقين واخذنا للمركز..ضليت بالتوقيف .. وجهي كله يون وبالي يم سناء..هسه شلون خليتهه هيج بدون مااگللهه ليش تأخرت..حيضل بالهه..اخر شي اجاني الشرطي يحاجيني..

- : كوم..شسمك..
: حامد..
- : ماعندك اهل..محد اجه عليك..
حامد : لا عايش هنا وحدي..
- : هاي مشاجرة..لازم تبات الليلة هنا وباجر تطلع.. بس تكتب تعهد متعترضلهم بعد..اني حختصرهه الك..
حامد : مااعترضت لاحد سيدي..سمعتهم يفشرون على عرضي.. رجال رايح وجاي بدربي..هاي شنو من سالفة اسمعهه عني..طبعا ماارضا..
- : اكو شرطة تحل الموضوع مو بهلطريقة ينحل..
حامد : سيدي طلعني..لازم اطلع مااكدر ابقى اكثر.. اختي وحدهه بالبيت واني من الصبح بالشغل الله شاهد..
- : اختك ليش وحدهه..انت شنو سالفتك تره دوختني.. كوم اجيبلك مي تغسل احجيلي خلاعرف شنو تاليتك..

كمت وياه غسلت وجهي وغسلت الدم..فوك حاجبي مضروب ومورم.. هسه شجاني تعاركت ويني وين العركات.. استغفرالله يالله.. رجعت بمكاني اجه العريف جر كرسي كعد جدامي يحاجيني..

- : احجيلي حامد..
حامد : ماعندي شي سيدي..مجرد عايش ويا اختي ..
- : اهلك وين..
حامد : متوفين..
- : لا حول ولا قوة الا بالله..
حامد : ليش تسألني على اهلي..شمبين عليه مراهق..
- : لا يابة منيلك مراهق..مبين بالتلاثين..بس عمرك يختلف وهذا واجبي لازم اسأل..
سكتت مجاوبته.. ضل يحاجيني بالساعة وراح..ضليت كاعد لحدما أذن الفجر مااحس الا اجاني العريف ..
- : كوم اكو واحد حيشوفك..همزين طلعو اهلك..
كمت وياه شفت خالي واكف..

كفلني هو ووقعت تعهد مااعترضلهم واذا صار أي شي خالي يدخل بمكاني لو فلوس..اخذني بسيارته وطلعنا..
خليل : اگلك هي هاي سالفة..واني اكول حامد جبير..
حامد : هسه جاي تحاسبني..خالي تعبان رحمة لجدك لتحاجيني.. بس ارجع للبيت ماشايف الفراش من البارحة..
خليل : والله ماادري..باجر الصبح تحضر هدومك انت وسناء اخذكم يمي..
حامد : خطوة وحدة مااخطي برة الشقة..احجيلي شسويت علمود سناء..
خليل : رحت ورجعت كلشي ماسويت..
حامد : چذب..ليش يالله..
خليل : خوانك موجودين وابوك وعمامه يعني مااكدر اسوي شي گبل يعرفوني..ابوك مريض حامد.. حالته حاله..ميصير هيج حتى متسأل علي..

حامد : وشسويله..مرضني الي وتريد اسأل علي..هاي جزاته مو اكثر..
خليل : يول هذا ابوك لتحجي هيج..صح اكرهه اني..بس حرام وغلط اخلي ابنه يكرهه..ارجع لديرتك واهلك انت بعمرك هذا وتشتغل وتكدر تكمش الفلس بيدك..يعني بس تروح هناك تزوج وتطلع بعد احسن واريح..
حامد : هي سناء وحدهه وراسي صار طبل هلكد ما فكرت بيهه وشحسويلهه باجر وعگبة..انوب اتزوج..
خليل : ادري انت شتريد دوختني تره..منين ما اجيك متقبل .. انت شنو براسك فهميني حتى اعرف شسوي..
حامد : خلاحير بروحي..
خليل : الدتسوي اكبر غلط..
حامد : وين الصح لعد..

خليل : انت واختك تجون يمي..انت تضل تشتغل بس ع الاقل بالك صافي لا فلوس إيجار ولا بطيخ..اسمع كلامي اريد مصلحتك..
سكتت ماجاوبته..
خليل : خالو راجع نفسك..لاعبالك لأن دخلت للمركز هيج دااحجي.. لا ابد..انت بعدك شاب وهواي ممكن تتعرض لهيج حالات حثالة..هذوله طلعت منهم بالنظيف.. يجوز الجايين ولد حرام ويامكثر..فاني دااحجي علمودك انت واختك.. والله جنت هستوني راجع من البصرة وكلت امر على حامد احجيله شصار اكيد رجع من المطعم..لكيت سناء ميتة بچي وقافلة الباب حتى مقبلت تفتحهه..عبالهه متت تصخمت.. استغفرالله شحچي هسه شگول..

حامد : هاهيه خلص..فهمتك..اخلص هذا الشهر واشوف شسوي..
خليل : اي عفية فكر زين..لتخلي كرهك لأبوك يعميك..
حامد : ان شاء الله..

وصلني للشقة وراح..صعدت فوك مكسر..جسمي كله يصيح من الوجع..دكيت الباب بسرعة فتحتهه سناء.. عيونهه مورمة من البچي..حضنتهه وهديتهه..
سناء : وين رحت والله متت خوف عليك..شسوي انه بدونك وين اروح..
حامد : اسم الله عليج يابة..ماكو شي هيج لغوة بسيطة..
وخرت عنهه شافت وجهي مخرط وحاجبي من الطرف مطبور.. هذا حيضل هيج ولو كلش صغير بس نشاز.. كامت تبجي بالزايد.. رحت كعدت وهي جابتلي ثلج خليت ع المكان المورم شوية هدأ وفش.. ارتاحيت ونمت بهدومي..

ثاني يوم بدلت وطلعت ولا كإن صار شي..اذا غبت يوم واحد يبهذلني ومااحب واحد يستقوي عليه حتلو جان ابو الشغل.. مرة واحد من العمال تأخر رزله جدامنا كلنا..اني درت وجهي سويت روحي مااسمع..خطية تفشل الولد..فمااريد أمر بنفس الموقف..

مرت ايام بين الشغل والشقة..حياتي عبالك تلعب وياية مرجوحة.. يوم اصعد فوك ويوم انزل للحضيض..نوبات اسبوعيتي احس مابيهه بركة..اجيبهه منا تخلص منا.. مااعرف يعني شسوي وشلون اقتصد..خالي شكد حاجاني راد بس اروح يمه مقبلت..من اني وصغير ابوية يكلي لتتعلم هلطبع..عبالك الناس تريد تحملك منية..مجنت افهم شيقصد.. بس بهلايام حضرني كلامه وتذكرته..من سمعت بي مريض مثل شي واگف ببلعومي..

سألت خالي عنه كال صاير بي كبد وسكر وهاي كل يوم ينام مستشفى..كل ما احاول انقهر علي اتذكر ذاك اليوم وذيج اللحظة السودة..مثل واحد ديغفي ووراه كومة شغل.. بعدين يفز يشوف الوكت مو مال نومة ابد..هيج اني اشوف مو وكت اسامحه..لا اليوم ولا باجر ولا أي وكت بعد..شكد راد يحاجيني ويفهمني مقبلت اسمع منه حرف..

يمكن بسبب طبعي الشايف بي نفسي ع الكل..يمكن بسبب موقفه الي أي واحد بالدنيا يصير بمكاني ميسامحه لو مدري شيصير.. يمكن هواي شغلات..بس كل الأعرفه مستحيل لساني يطخ لسانه..مو اندفاع مني..لا ابد وبعيد كل البعد عن هلموضوع..لأن من صغري هادئ ومااحب الاشياء اليحبهه الاطفال بگدي..لحدما كبرت وضليت هيج.. فاكيد الفكرته عنه بقيت شهور وحدي..شهور اني مانايم نومة عدلة.. الموقف هذاك يحضرني ويخليني اكره حتى نفسي..اكره اسمه الموجود بظهر جنسيتي..

فكرهي اله مو شي بيوم ليلة..حتى طلعتي منه اني ايام اكعد ع الشط افكر..اذا طلعت شسوي ووين اكعد وششتغل.. حتى عودت روحي ع الشغل بالبصرة حتى من اكوم اشتغل ببغداد متعود وابو صنعة مو خيخة..

رجعت من الشغل لكيت سناء محضرة الاكل.. غسلت واجيت اكل ..كلت احاچيهه ع المدرسة..لأن من ردت ارجعهه اني مافاتحتهه بالموضوع كلت اتأكد يله علمود لتخلي أملهه بي..

حامد : سناء..كعدي اكلي اريد احاجيج بشغلة..
سناء : اي شنو خوية..خوما حنرجع..
حامد : لا..اسمعيني زين..اني مااكرهج..خلي هاي ببالج.. بس هلسنة حتروح عليج..
سناء : شنووو..ليش حامد ليش..مو كتلي انقلج..
حامد : مدرستج محترگة هاي اولا..دزيت خالو يسويلج نقل بس ماكدر ابوج وخوانج موجودين فيخاف..واني سناء مااكدر.. وعدتج مااخليج تخسرين شي من حياتج.. بس هلسنة.. اني خسرت دراستي والنعيم هناك بس علمود ابتعد عنه.. باعي ايدي..

مديتلهه إديه : شوفي البسامير والتخزن..وعد بس هلسنة وراهه ارجعج ع الدوام وادخلج معهد علمود الشهادة تصير بيدج بسرعة..
سكتت ماكالت شي..ورة شوية حچت : هاهيه..مثل متريد..
بستهه من راسهه..حسيت ارتاحيت..

هيج مرت الايام..ابوية دائما توصلني اخباره من خالي.. اخباره تمر على مسامعي مر الكرام..مااهتم..مجرد مااريد افشله لخالي فاخلي يكمل على راحته..وجوابي هو هو..

محيي : ثاني يوم كعدت الصبح مسطور ونحلان.. يمكن مستبرد من الهوى البارد البارحة.. كمت غسلت شوي ارتاحيت بعدين نزلت تريگت وطلعت للشغل بوجهي.. العصر اجاني العامل..
- : عمي..احاجيك..
محيي : ها كول بوية..
- : الحجي متخربط بالمستوصف..الحجية كلتلي اخبرك..
محيي : لا اله الا الله..يله هسه رايح..

رحتله للمستوصف لكيته كاعد ويگح..رحت يمه حاجيته..
محيي : گواك الله..
شامخ : الله يگويك..
محيي : يابة تته مايصير هيج..باجر اتفق وي السايق انه اخذك لبغداد..لازم اشوفلك طبيب زين خوما تضل هيج..
شامخ : مابيه شي هسه بس على غفلة ودخت صحت قاسم كتله اخذني..
محيي : اي حتلو قابل سهلة مثلا..هسه شلون صرت..
شامخ : احسن شوي..
محيي : يله چا اطلعك..
شامخ : بعد احسن بعد ابوك..

اخذته وطلعت..نفسيته تعبت من المستشفيات..يعني صدك كرهت حامد..ابوي شكد يحاول يخلينا مثل الخوان ونتودد لبعض بس بعملته هاي خرب كلشي بناه ابوي..جاهل شسويله وشون اعاتبه..چا عباله سهلة يسوي هيج بأبوه.. الله يطلعهه بيك وين رايح..

مرت ايام بين الشغل بالحلال والبيت والكعدات والفصول.. حياتنا بالديرة ماتصفى ودوم تصير مشاكل من غير الوادم كل يوم فايتيلنا گرابتنا من بعيد علمود ابوي..هو حتى مابي حيل يسوي شي بعد كله علي انه وكاظم وقاسم.. لواء وفيصل بعدهم مو هلكد..حتى ماندخلهم بسوالف الشغل.. خاليهم ع البيت اكثر شي..
امي على مرض ابوي تعبت..شكد ما هو صلب جدام الوادم وشون يحل مصايب تفر الراس بس لمن يشوفهه چن يشمر كلشي يوجعه چي هي طبيبته..

بيوم رجعت من وكت من الشغل..بدلت وطلعت وي صحباني نفتر غادي بالمدينة..جان اكو گهوة مفتحة وحاطين كراسي برة.. رحت كعدت والولد اجوي ..شواي وواحد منهم سألني.. اسمه صاحب..
صاحب : اكول الشيخ شلون صار..
محيي : بعده على حطة ايدك..
صاحب : خايب ماتاخذونه لبغداد شوف وين..
محيي : چا قابل انه ساكت يول..هليومين اخذه بعد شسوي.. المشكلة ماكو واحد يطيح على علته..بعد بقت يم ربك..
صاحب : عنده العافية مايستاهل بالعباس..
كلت بگلبي..صدك ماتستاهل بوية..مو چي انه ابنه.. لا وحگ علي .. بس هو مشهودتله مواقفه وي كل واحد بالديرة عنده موقف ماينسي..

بس الوكت اغبر..مايجي بس ع الزين..وكله بسبب حامد.. لو اكمشه اگطعه نصاصه..كبل جنت اكرهه بس لخاطر ابوي اعوف كلشي واسكت..بس هسه ماكو شي ينسكت عنه..

رجعت للبيت لكيت نسوان دتفوت جوة وزلم اربعة واكفين يم الباب اليطلع ع الديوانية..دخلت سلمت عليهم.. رجولة عماتي جايات كلهن على ابوي..

واحد منهم ماجان موجود..
سألت عنه : چا ذوالفقار وينه..
طه (رجل عمتي) : كال هسه يجي..ماادري وين راح..
ضليت كاعد يمهم والضيافة كلساع شكل..چي جيتهم على وكت عشة وزحمة نقصر بشي..
للدعش واهجس صوت مصايح وعياط قوي كمت بالعجل انه والباقين..اول ما طلعت انشمر ذوالفقار جدامي والدم تارسه من راسه لجدمه..دشداشته صايرة بلون التراب وبيهه دم..

محيي : هاي شصاير..شمسوين بي شكو فهمونا..
- : هذا نسيبكم العار ابن العار اذا ماجاز منا قسما بالله اخلي طلقة براسه ..
محيي : چا هي تايهتلك يول..اذا ماتحجي اطردك خلاشوف منهو يطلع وراك..
على صياحنا طلع ابوي..صار كل واحد يحجي شكل.. ابوي اهجسه ديرجف بس مايكدر يطب فشلة.. كاظم اخذ ذوالفقار وفات جوة..ردنا ندخلهم الديوان بس نفتهم شكو.. الا هذول مايتفاهمون واعصاب..بقوا واكفين برة ماقبلوا يفوتون..

شامخ : شوف اگلك..ياتحجي خاطر نعرف راسنا من جدمنا ياتاخذ چوالاتج وتولي منا..
- : انت شيخ وتخلي هذا ابيتك..والله مايصير شيخنا.. هذا كلب..صارله شهرين ضبط يطورد ورة ابني..يابة مانريد نبيعلك الگع هي غصب لو شني بوية فهمني انه ماافتهم..
شامخ : لا عمي مو غصب..
- : چا خلص.. اجه على وليدي يهدده بيك..انه ماسكتت گتله الشيخ حقاني مايوكفله..ادور اليوم طوخهه وداي بيهه حيل.. اجه يهدد بالسلاح..چا طلع السلاح تايه بيد الكل.. انه مااكول شي انت حلهه وشتفصل البس..
شامخ : بوية حگكم علينا .. والله لو ادري بي فلا اخلي يبقى هيج..
- : عمي احنا وادم ماتحب العرك..لو عراكة چا صار المايصير انت اعرف بعد..

ضلو يحجون لحد اخر شي فاتو للديوانية..نص ساعة وطلعوا.. هم طلعو وابوي گب ع البيت كله..صاح على ذوالفقار وعمتي اجت على اسمه..

شامخ : شوف يول..لا عبالك انه الرگبة السدادة مالك.. تره روحي واصلة لخشمي والمرض اكلني اكل..تريد تجي تمر مر الكرام وتسكت هلا بيك والبيت بيتك..بس مال تجي وتجيبلي بلاويك وياك تعذرني بس بيتي ماينفتح لهيج شغلات..الحگ وياك اوكف بوجه اكبر واحد..اعتبرك دخيلي ومافديوم طلعت دخيل الا راسه مرفوع والحگ بيده..بس رايح تهدد وتزامط .. لا خوية شعدنا فهمني..
عمتي : على كيفك خوية..بس الكع الرادهه ابو جنات (ذوالفقار) جانت اله كبل وهم اشتروهه منه..راد يرجع يشتريهه منهم ومارضوا فسوى هيج..
شامخ : مو ماله..صارت مالهم والحكم بيدهم.. ابوي لاتعبني بس تصير زين كفيني خيرك شرك..

هو وديحجي داخ وانتچى علي..عرفته حيطح..اخذناه للمستوصف.. ضليت نايم وياه الليل كله لحد الصبح استعدل واخذته ورجعنا..

ورة يومين اخذته انه وعمامه ازهر وفضل ورحنا لبغداد.. اخذته لغير طبيب كشف عنه..غيرله العلاجات وشون ياخذهن.. كال اكيد حيصير زين عليهن ماتقبل غلط..ضلينا ببغداد اسبوع.. بايتين يم عمه الثاني هنا بيته..

كبل رجعتنا بيومين جنت طالع لمطعم وي ولد عم ابوي .. شفت واحد من بعيد لابس زي مال دوام العمال بالمطعم وشاد مثل الوصلة من خصره لركباته وكاف رداناته..من هيئته هجسته حامد.. ضليت كاعد واعاينله..هو لو لا.. خاف اروحله وادور حتى انه يشرد مني اذا جانت اله نية يرجع.. شواي وسمعت واحد صاحه..كال رائد .. نفضت راسي .. لا مو هو.. بس كلش يشبهه حسبالك هو.. اووف لو انت يول ..چا ابوي بهللحظة يصير زين..بس ربك بعد..

ورة يومين رجعنا للبصرة ورجع الشغل والتعب..هلكت .. بس ساكت مااحجي..بزر دلال بس رجال..مااتشكى بس اتعب خوما صنم..

ابوي شوي شوي بلشت ترجعله صحته..كام يطلع وياي للشغل .. رجع مثل كبل بحيله وترك الادوية كلهه بس ضل على مالت السكر..سكره انفعالي من أي شغلة يصعد .. بس ع الادوية منتظم والحمدلله..

لمن شاف روحه تحسن كام يروح لبغداد يدور عنهم ويسأل .. ماخله مراكز ومستشفيات..معقولة هاي الوادم كلهه ماتعرف واحد هيج اسمه..من غضب الله على اسمك يحامد..

ورة فترة جان اكو جماعة جايين على ابوي بشغلة من الديوانية.. ترخصت منهم وطلعت .. حتى ماجنت كاعد بس سلمت.. مريت على عبدالغني ورحت لصاحبي الثاني مدعوم ونايم مستشفى.. بالطريق واشوف واحد يتمشى وبيده فايلات وجنطة صغيرة .. بهاي الفترة تعمرت بس بعدهه من برة حيطانهه سود..
محيي : ابقى هنا هسه اجيك..
عبدالغني : وين يمعود..
محيي : تانيني هسه جايك لاتخبصني..
عفته ورحت على هذا الرجال..ندهته : خالي.. خالييي..
اندارلي بالعجل..هو نفسه..خليل خال حامد..

عگد حواجبه : اهلا..
محيي : هلا بيك..شو هنا شعجب..
خليل : لا هيج جاي بشغلة هنا..تدري عندي كاع فاجيت اشوفهه..
محيي : هااا..اي صحيح..
حاجيته شوي..ردت أجر لسانه : ماكو شي عن حامد.. ماتعرف شي شياتين..تره ابوي مايسويله شي اذا رجع..
خليل : خالو اني شمعرفني بيهم وين..لو ادري جان جبتهم يمي..
محيي : صحيح..الله كريم..يله اترخص اخذ راحتك..
خليل : مرخوص يابة..

عفته وطلعت..رحت لصاحبي بس بالي يم هذا خليل.. لازم أخبر ابوي..هو يعرف شيسوي اكيد يمه بس مايحجي قابل يجيبهه لروحه.. بقيت بالمستشفى نص ساعة وخلصت الزيارة طلعت .. رجعت بوجهي للبيت..لكيت الجماعة طالعين وابوي واكف ديحاجي ضرغام وعمه ازهر على سناء وحامد.. لو ناس غيرنا چا انفضحوا وصارت سيرتهم على كل لسان..بس ابوي سراني كلش مايطلع منه شي..ومو شي هين هذا..اذا طلع برة البيت تصير سمعتنا لاشيء..فمتكتمين..بس عمام ابوي وعماتي واحنا.. هم يعتبرون من اهل البيت ..

تانيته يكمل حچي وياهم ..شواي وطلعو.. اجت امي اخذت الغترة منه وتحاجي ..اندارلي هو ويكف ردان الدشداشة..
شامخ : كول بوية شعندك..شكلك يريد يحجي سالفة..
محيي : اي يابة .. شفت خليل خال حامد هنا..
شامخ : هااااه..خير ياطير شجابه..
محيي : يكول جاي ع الگع مالي هنا اريد اتفقد الوضع..
شامخ : چا خوش..بس مامرتاحله هذا..وراه شي..
محيي : عاش لسانك بوية..انه همات كلت هيج .. چا ليش دااگلك شفته..
شامخ : هسه ادز واحد من الويلاد يشوفونه ويجيبونه.. خلاشوف شكو وراه هذ..
محيي : مثل ماتريد..

طلعت تسوگت للبيت ورجعت لكيته بالباب..تبسمت بگلبي .. شنو انت بوية ماتكلي..يكول اسوي هيج ويسوي..خليت المسواگ جوة ورحت كعدت يمه..كاظم وقاسم جانو كاعدين وعمي ازهر.. ابوي راد يحاجي ويجر لسانه ماكو..كله نفس الحچي والكليشة..اخر شي تعشه يمنا وطلع ..ماقبل يبات.. چا ماشايفهم هاهيه..

مرت ايام وگضيتهه شغل.. ماعندي شي اسوي..خلصت اعدادية وشفت ابوي تعبان بالشغل هو وكاظم فماقدمت كلية هلسنة.. خليهه السنة الجاية..بس لواء وفيصل وقاسم يدرسون.. لواء اعدادية تمريض حيروح هلسنة وفيصل بعده ثالث .. قاسم ديدرس بكلية البصرة..بعده اول سنة هاي.. فدمرة كاعد بالمطبخ يم الراديو اگلب بي..اجه ابوي يحاجيني..

شامخ : بوية ماناوي اداوم هلسنة..
محيي : لا يابة باقي وياك بالشغل..
شامخ : انه اريدك تدرس وتحصل شهادة بيدك..مايصير هيج ابوية.. اعرف الشهادة شكد تفيد..مو هذول خوانك.. لاتصير أغم چن كاظم..
محيي : هسه بعد عليش مستعجل..خلاضبط وضعي واقدم عادي تأمر..
شامخ : هاااه..چا براحتك بوية ..

ورة فترة بالشهر التاسع بدايته جان الجو بهلشهر واحنا نازلين يبدي يبرد .. رجعت من الشغل المغرب رأسا نمت..اهجسهم يكعدوني بس تعبان مابيه اتحرك..كعدت بالليل مضيع الساعة.. لكيت الجو يصفر صفر..بالليل كلش.. نزلت جوة اكلت .. ضليت افتر بالبيت..عماتي ثنين چانن هنا.. فولدهن جايين وياهم هم والبنات.. مريت بغرفة لواء وفيصل لكيت بت عمتي حسنة كاعدة والشعر مفكوك.. درت وجهي وطلعت چن ماشفتهه.. كلت اطلع منا احسن هو مايجيني نوم..

طلعت تمشيت بالكيعان القريبة ع البيت.. انه واتمشى هجست حس بت مر على مسامعي.. هاي بنية لو انه دااتوهم..غلست ماكلت شي.. شواي ورجعت سمعته.. صوت ونين چن وحدة تطلب الغوث بس مامفهوم منهه شي.. دقايق وسمعت واحد صاح : گح.... ..هي عاطتت وسكتت.. انه بين الفضول البداخلي يكلي روح شوف من وين جاي هلصوت.. وبين ارجع ..

الحشيش عالي يوصل لركباتي .. كله زرع مامتروك..بين ما وصلت طفرت من مكاني على ايد كمشت رجلي..
صحت : ياستاااار..
انه ابد مااخاف..بس بهاي اللحظة خفت وجفلت.. استغفرت وتهديت شواي ودنجت للكع..نفس صوت البنية اجه على إذني..
- : خوية فدوة اروحلك اخوي حيكتلني..
عگدت حاجبي والخوف زاد بگلبي..هاي نفسهه السمعت واحد يفشر عليهه..استغفرالله هاي شلون طلابة..ادور لا انه رايح ولا انه الباقي واعرف شسوي..
همست : شجابج هنا خوية..كومي مايصير اكمشج حرام..
كمشت ايدي واهجس حرورة دم صارت على معصمي..

-: فدوة ساعدني بس اكوم..
محيي : كومي وحدج مااكدر اكمشج يامرة..شنو سالفتج انتي.. منين جاية..
-: احجيلك كلشي والله وروح ابوي بس اكوم..خلصني من اخوي..
ضليت كاعد والعرگ يصب على گصتي..فركت وجهي وكمت للبيت اخذت مي ورجعت .. المسافة قريبة مو بهلبعد.. الف سؤال صار على بالي..منو يتجرأ يتگرب هلگرب من بيت الشيخ والبت ماادري بس وضعهه ماعجبني..
اجيت انطيتهه المي شربت منه وغسلت وجهها..

محيي : احجي بالعجل شنو سالفتج..تدرين وين انتي..
- : لا والعباس كلشي ماادري..بس اخوي كمشني وجابني.. انه من المعقل..اول مرة اشوف هلمكان..
المعقل عن ديرتنا بعيد..يعني نص ساعة هيج..مو مال بت تجي وحيدهه بهليل..
محيي : چا شجابج هنا..اخيج شيريد منج..وليش عافج وراح.. ادور انتي ماادري شونه وضعج دوختيني..لو واحد غيري شايفج چا وكف وي اخيج..
كامت تبجي وايدهه على حلگهه..الدنيا ظلمة ماشفتهه بس احس بحركاتهه واشوف شي قليل چن خيال..
محيي : استغفرالله..لج مالي خلك احجي فضيني..واذا چذبتي بحرف واحد ارجعج لاخيج ماادري منو..

- : وروح ابوي احجي الحقيقة..اخوي حيرجعلي .. هو يشتغل هنا بالحلال مالكم چا شون طبينا احنا..انه ماجنت ادري بس سمعت من امي...
محيي : ايييي احجي المهم لاتخبصيني..
- : ..جنت طالعة يم صديقتي هي ماعدهه اخوان.. رحت لهناك ولمن رجعت اجه ابن عمهه..اخوي شافه بالبيت من اجه ياخذني عباله عدهه خوان..كام طگني موتني.. حسباله اچذب.. كلش ظالم ونذل.. بعدين هذا ابن عم صديقتي كام يسويلي مشاكل ويحجي بيه چي اخوي طگه.. لحدما اخوي سامع ولد يحجون بإسمي وانه عندي علاقة بهذا الولد.. هو طلع دائما موجود ببيت صديقتي وانه ماادري ..فوك وانه جوة..  لمن اسألهه تكلي محد اكو.. انه شمدريني .. كام يطك بيه أذاني حتى إذني نزفت..ماتحملت وادري غلطت بس طلعت من البيت.. وبالشارع الورانا شفته .. و..

فكيت عيوني مصدوم ودماغي يقره الف تحليل وفكرة.. هاي مصيبة طاحت على راسي..لك شطلعني انه بهلليل لو نايم احسنلي..استغفرالله يالله..
محيي : وشنووو..احجي لج انتي بلوة..
-: لا انه مو هيج والعباس..والله شريفة وروح ابوي شريفة..

هجست واحد وراي..انداريت مصدوم والعرگ يصب على گصتي.. ماخايف ابد بعز الظلمة والليل اطلع غادي يم الشط.. افر الحلال كله بس هاي البت مدري شونهه..اريد اعرف سالفتهه..
محيي : انعل يومك..شبيك خرعتني ..
كاظم : شدسوي هنا انت..هاي منو يول..
محيي : ماادري..دوختني ماعرفت شبيهه..
اجه كعد يمي يحاجيهه..

كاظم : خوية احجي شنو سالفتج..تره انه ورة اخوي من طلع من البيت .. كولي اذا مظلومة اجيتي لبيت الحگ..
-: والله مظلومة خوية مامسوية شي..
سكتت .. ماتحملت زمخت بيهه : لج تحجين لا اكتلج هسه.. احجي نعلعلا ..
كاظم : اصبر انت شمالك فضحتنا.. احجي يابة فضينا..
-: مو..مو والله مايهون علي اكول الصارلي..
كاظم : شسوالج هذا ابن عم صديقتج مدري مني..
-: هو انه لمن طلعت من بيتنا ولاگيته براس الشارع والعباس جان صدفة وماادري يعني وروح ابوي ماادري..انه بنية شكدر اسوي .. دفعته ردته بس يروح..توسلت بي.. بس اعتدى علي .. بعدين ذبني براس الفرع ورجعت للبيت اخوي شافني جاية جان يطگني واخذني للفحص..حسباله جنت شاردة..واليوم بالليل جابني هنا وانه وعلي مااعرف هلمكان..

كاظم : استغفرالله..هسه انتي شطلعج..مايصير بوية مايصير.. هسه حتلو جان الحگ وياج بس بطلعتج هاي گلبتي كلشي عليج..
محيي : منو يكول حچيج صحيح..
-: اخذني للعباس احلفلك ان شاء الله اموت اذا چذبت..
انداريت على كاظم والحيرة واضحة علي .. مبينة دتحجي الحگ.. اذا دخلتهه انه لبيتنا حتصير سمعة عليهه گبلي.. الگطع صفنتي حس كاظم..
كاظم : كوم جيبلهه شي تلف بي رويحتهه والصباح رباح.. بلكت نوصل لاخيهه شوف ابوي اكيد يحلهه..
-: اعتذر ع المقاطعة يخوية بس ابوك منو..
كاظم : الشيخ هنا.. يله كوم بالعجل ..

كمت طبيت جوة ادورلهه شي..خوما اجيبلهه من هدومي.. ادور انه يلبسني ثوبهه وهي تصير عليهه التهمة..جبتلهه چرچف وطلعت.. توني وصلت واشوف اخوي متكوم بمكانه والبت ماكو.. ركضت علي شلته..
محيي : الله الله..شبيك يمعود..البت وينهه..
كاظم : يول هذا اخوهه اجه اخذهه..والله حيرتني يعني شني سالفتهه هاي..هي كالت اخوي حيجيني..
محيي : لا..
كاظم : اشتعلت صفحتهه..يابة تريد تورطنا هلملعونة هاي..
محيي : اخوهه شگال..
كاظم : كتله دخيلة هاي..كال لا دخيلة ولا شي..عرضي واريد اخذهه والحگ ينكال وينحجي..
محيي : چا عرضك هيج تشمره بالشارع..خفت هيج عرض..
كاظم : چا شكتلك انه..امشينا هاي داور چيسة .. كتله لا شايفك انه ولا اعرفك..منين اجيت تشتغل عدنا..

محيي : يعني شنو..
كاظم : واحد من هذول السرسرة مدخلي..الا هلحلال گريب بيتنا مايوصله أي واحد.. باجر انطي علم لابوي هو يتصرف..
محيي : يله چا گوم..
اخذته وطبينا جوة..من الهبطة بعد حتى النعاس والنومة راحت.. ضليت كاعد بالغرفة اتصفن لحدما أذن الفجر.. كمت صليت وغفيت حي الله..

حامد : بيوم اني واكف بالمطبخ بشغلي دااغسل مواعين ومااحس الا راسي كام يفتر ورجلية مو بالكاع..دخت ماادري بروحي.. جنت لازم بيدي گلاصين وماعون..هي لحظات بس كلهن وگعن من ايدي..حسيت جسمي كله خدر وذبل.. غمضت والسواد ملى عيوني.. بس اسمع اصوات يمي مالت الولد يحاجوني ..

ورة ماادري شكد صحيت بغرفة الاستراحة هيج صغيرة بيهه كرويتات ثنين ومبردة صغيرة..الهوى يكفخ عليه .. شوية حسيت روحي ردتلي.. عصام ومحمد جانو هنا..

عصام : سلامتك رئودي..
حامد : الله يسلمك..شصار تره دايخ ومااتذكر..
عصام : يول اشو وكعت من وحدك..ماصار دقايق يعني لتخاف .. يمكن عندك فقر دم لو ضغطك هابط..
حامد : يله عدت سلامات..
كمت ورجعت اكمل..اخر فترة اجوي عمال جدد فابو المطعم قلل الراتب..كمت بس اشتري اكل بيهن..خالي ينطي لسناء بس مااخذ منهه..لعد اني شعندي مكسور ظهري من الصبح لليل بعدين اخذ من اختي..بس ماانكر هي مرات تنطيني من تشوفني احسب الفلوس..اني اگللهه خليهن عندج جمعيهن حتى اشتريلج بيهن ملابس جدد..شمدريني هلدنيا شضامتلي بعد.. الحياة اصعب مما الواحد يتخيلهه..

الواحد بينه وبين نفسه يكول اي شنو يعني..اشتغل واعيش نفسي وعائلني..بس ميحسب حساب هذا الشغل شحياخذ من باله الجان صافي..شحياخذ من صحته النفسية والجسدية.. بس الله كريم..لابد تفرج واني استقر على شغل ..

من خلصت دوامي رحت للمستشفى سويت تحليل فقر دم .. ضليت كاعد لحدما انطانيا كال اقل من النسبة الطبيعية بخمس درجات..كتبلي أبر وچم شغلة .. اشتريتهن من صيدلية المستشفى ع الاقل السعر أقل..بعدين طلعت اشتريت خضورات ورجعت للشقة.. ماكتلهه لسناء ع الصار اليوم.. يضل بالهه ومااريد هيج..خليهه هنا واني برة ..

مرت ايام طبيعية..تذكرت قاسم بس لا يقدم ع الكلية هنا.. اكيد حيلگاني..بس اريد اعرف ياكلية حيروح..وماادري شلون حعرف.. كلت اسأل مهدي هو يداوم بجامعة بغداد لمن يبدي الدوام انطي خبر.. ابوية مرة مريت بالصدفة من يم المحل مالت الگصابة لكيته واكف برة ويحاجي العمال..هو من يجي لبغداد يلبس بنطرون وقميص..شفته داير وجهه عبالك شفت روحي.. شكد متشابهين مبينين خوان..اااخ شكد جنت احبه.. من اتذكر ايامي وياه كبل لتصير هذيج اللحظة نوبات يحب گلبي.. اتمنى نرجع ننجمع مثل ذيج الايام..ارجع ادرس وهو يمي يوصيني على دراستي .. جنت شاطر نار .. شكد تمنيت احاچي واگله شوف شلون كمت اعتمد على نفسي وحتى اختي على مسؤوليتي.. هو يدري بيه شاغول ويعتمد عليه بس جان يكلي مااتخيلك تصير عندك مسؤولية..مدلل..

انتبهت على حركاته هو ويحاجي العمال شيسوون.. بالاخير ضحك .. هو من يضحك يحط ايده على عيونه وايده اللخ يتچي عكسه عليهه.. تخليت عن كل ذرة حب شلتهه اله من شفته يضحك وتذكرت موقف اليوم المشؤوم.. ماتستاهل تفرح.. درت وجهي ورحت للشغل..

خالي طول هلفترة يريد اروحله بس ماقبلت.. هاهيه بعد اذا شفت الدنيا گلبت بيه فدنوب فماعندي وجهة اروحلهه غير بيته.. وهو مفتوحلي بكل وكت..
طبعا التسجيل والنقل بلش ينفتح..خالي كال اذا تريد ارجعلك ع المدرسة مرة اللخ..كتله لا..حاجيتهه بعد وهي قنعت هلسنة حتفوت عليهه..اني ضحيت بالاغلى علمودي وعلمودهه.. هي اقل شي تگدر تسويليا هو متداوم هلسنة..

ورة فترة..جنت هستوني دااطلع للشغل تغير دوامي صار من الظهر لليل..المطعم هم تغير صار يفتح ٢٤ ساعة.. تعب زايد.. فالظهر اجه خالي..سلمت علي وكعدنا.. شافني لابس هدوم تعبانة مو مال طلعات..
خليل : ها حتطلع للشغل..
حامد : اي والله.. محتاج شي..
خليل : كلت اخذ سناء يم البنات تتونس وياهن شوية.. شوكت ترجع انت..
حامد : بالليل كلش..
خليل : يله لعد اخذهه وانت اذا تريد تجي تعال اني كاعد .. عود انت تعال اخذهه خاف اجي وماالگاك..
حامد : يله ..سنااااء ..
اجت مناك تشد الظفيرة بگتر ..

حامد : تروحين ويا خالو لبيتهم..اني اتأخر بالشغل..
سناء : اي بعد احسن..شوكت نروح..
خليل : بدلي وتعالي انتظرج جوة بالسيارة..
سناء : ماشي خالو..
ابتسملهه ونزل..اجت باستني وراحت تلبس..ضليت انتظرهه لحدما طلعت .. قفلت الشقة ورحت للشغل..

اني وبالشغل اكو ولد جدد ماادري شلونهم..شرانيين وكل يوم يترزلون لازم.. ماادري تركت الموضوع ولا حاچيتهم بس على كد السلام..لحد قبل فترة اسبوع هيج اجوي يحاچوني واخذت ميانة وياهم.. يعني تعودت ..حتى نطلع هيج غادي وضحك وسوالف بعدين ارجع للشقة..  اليوم دنحجي وواحد منهم اسمه حيدر فلت لسانه..
حيدر : اگلك مجرب الشرب..
حامد : عوذة..بيش طالبني يمعود..
حيدر : يفوتك وعلي..
حامد : چمالة يحلف بعلي..دنجب يول.. گلتهه بضحك..
حيدر : اليوم اخليك تجربه..
حامد : چا هي سهلة على گولت اهلنا..
حيدر : وداعت اهلك سهلة..

ضل يحجي بس انطيته الاذن الطرشة..حتى مااخذت الموضوع على محمل الجد..شي عابر مر عليه..هم يحجون بهلسوالف دائما فمااهتميت..الولد الثاني اسمه طالب..هذا متزوج وعنده جهال ثنين بس يدور سوالف عتيگة.. بس حيدر بعده عزابي..

كملت دوامي واني بالباب انزل الردانات الجو يگص الخشم.. تذكرت سناء اليوم ماكو..مابيه حيل اجيبهه..باجر اطلع الصبح ارجعهه .. وين قابل يم الغريب هو بس هلبيت ..
لفيت الشماغ على خشمي وحسيت على ايد صارت على چتفي.. انداريت ..حيدر وطالب..
حيدر : تعال ويايه اشوفك المشتمل الداابني..
حامد : هاي من شوكت تبني مشتمل..
حيدر : وداعتك..امشي..
حامد : لا والله تعبان ومابيه حيل اريد امدد..
حيدر : لك دمشي منطول ..هياته قريب اصلا..
حامد : يله امشي..

كمت تمشيت وياهم لحدما وصلنا لمنطقة وصدك شوفني مشتمل جديد دينبني وفتنا جوة شوفني شغلات بي وهاي غرفة هيج وهيج..كال امشي لبيتنا..محد موجود مسافرين.. بلحظة تعب وهلك من شغل اكثر من ١٢ ساعة فاكيد بس اريد ارتاح وامدد رجليه ورمت.. كتله يله هم اني محد بالشقة اليوم ..
محيي : كعدت ثاني يوم مسطور من الموقف..كعدت اتذكر.. يعني حقيقة مو حلم.. كمت نزلت بالعجل على ابوي.. لكيته بالديوانية واكف ديحاچي العمال.. خلص ورحتله صبحت علي..

بوية اريد احاجيك بـ ....
شامخ : ادري حچالي كاظم..
فكيت حلگي متفاجئ : وشنو رايك يابة..تره البنية راحت وكاظم كال اخوهه اجاهه..
شامخ : بوية هي ماطول جانت هنا يعني بحمايتي.. وانتو ماگصرتو.. هي تبقى غريبة ولو جايتني دخيلة فلا اردهه لو على گص رگبتي..ماطول الحگ وياهه.. بس شوفة عينك البت راحت.. وماطول راحت يعني تجردت من حمايتي.. بعد هي وأخيهه..اكيد هم ادرى بمصلحتهه وين..
محيي : زين ودخلة هذا اخوهه شنو سالفتهه..يعني عادي يوصل لهلحد..
شامخ : لا شني قابل هيتة..دزيت هاني يحاچي العمال يجمعهم واجي احاچيهم اشوف منو فات اليوم ..
محيي : انه اكول جيب كاظم همات.. علمود يعرف اخوهه خاف تچذب هاي..

شامخ : اي طبعا بوية..روح ارتاح اليوم لاتطلع للشغل .. البارحة شفتك تعبان..
محيي : لا مرتاح هسه لاديربال..
بسته من راسه وطلعت غسلت..هجست حمل انزاح مني.. يله المهم خلصت من همهه..بعد بس اتاني ابوي يحاچي العمال .. وللعصر طلع يحاچيهم هو وكاظم..
رجعو المغربية هيج..ابوي ماكال شي..جان عنده خطار جايين من بغداد راح يمهم ..اجه كاظم حاجيته..

محيي : ها عرفته..
كاظم : ماكو هيج واحد اصلا..هو ياحلم ياهذا نصاب ماتقبل غلط.. بس الا الاگي..
محيي : وابوي شيكول..
كاظم : خله واحد من العمال يتصنط على حچيهم خاطر يعرف ياهو الدخل الولد البارحة..بعد ماادري شحچه..
محيي : طرگاعة على راسهه وراسه..استغفرالله..

عفته وطلعت.. ضليت افتر بالحلال ..رحت يم الولد ..حتى محد يدري اكو بت فايته البارحة.. مر اسبوعين كاملات ماكو شي.. وماعرفنا منو فوته..ابوي ماخله شي يعتب علي..اخر شي جزع.. چي السالفة مر عليهه هواي بعد ماتسوى..
وره هلفترة المغرب كاعدين بالديوانية واندگت الباب ....

يتبــــــــــــــع.......................