رواية اسألي عني الليالي الفصل الثالث عشر 13 - بقلم رقية جاسم

قناة التليگرام

حساب الانستگرام

الـبـارت الـثـانـي عـشـر................

ابتسملي ووكف على صفحة.. تمشيت للغرفة .. سديت الباب مامصدكة بروحي طبيت هنا..احس خطواتي ثگيلة.. گلبي فرحان وجفوني من عطره حسيتهه ثگلت بعد مااشوف بس هو..مااشتم بس عطره.. تمددت مبتسمة وسرحانة بعيونه وكلماته وهدوئه..

ثاني يوم كعدت اناغي روحي بالقصيدة مالته.. كمت غسلت وجهي ورجعت شغلت الراديو..طالع استوديو عشرة.. والعالم تخابر وضحك ويفتحون مواضيع..انه بس اريد ألهي روحي بي وبالي يم رائد..مدااتخيل الصار حقيقة..صرت يمه بهلقرب.. شميت عطره وذبلت روحي بي .. ياربي شكد احبه.. هو حباب وهادئ..اي كلش هادئ حتى بوكت عصبيته.. ابتسمت وكمت طلعت بره اساعدهم بشغل البيت.. مشى اليوم عادي..للعصر واندگت الباب..طلعت افتحهه صارت ام رائد واخلاص بوجهي..سلمت عليهم وفاتوا جوه..انه شفت امه واحس شفته اله..ولو يشبه عمي كلش..بس روحه بيهه.. نظراتهه هادئة وبريئة..هو نظراته نار وانه روحي حطب..

احبهه لأمه..ودائما من تجي احب اكعد يمهه واسمع سوالفهه..جدي يكيف عليهه يگللهه مرته ماگطعت وهو گطع.. عسى الخلفة تطلع عليج ..وصدك رائد طلع عليهه..

ضلت كاعدة يمنا لليل..رائد طالع وي سالم للشغل مالته.. وهو يداوم خفر بالسيطرات علمود الترجمة .. ماتركهه للآن.. بالليل رادت تروح ..كامت تعدل العباية مالتهه هي وتحاچيني..جديتي جانت كاعدة..
ام رائد : يمة هاي انه چي اجيتكم لبستهه..الا انه ويني وين العباية..
دنوة : اي خالة كلشي يلوگلج..
ام رائد : ههههه..عابتلج يخالة..شوفيلي اخلاص خاف يم مرة عمج ابتسام..خلتجي رائد حيجي يرجعنا..
دنوة : اي هسه..

كمت ودنجت ع الصينية انه واعدل الشال.. شلتهه وتمشيت للباب..صار بوجهي.. رفعت راسي عاينتله.. مرجع شعره ليوره وشواربه محددة سود.. نظراته ماكو شي يوصفهه..ابتسملي وعيونه صارت على امه.. تقربت منه دااطلع.. عطره تخلل لروحي كبل انفاسي.. انثولت .. عبرته ورحت للمطبخ بالعجل..لكيت اخلاص كاعدة وي البنات..هي تستثقلني حيل..بس مع ذلك .. لخاطر خالة اسوي روحي ماحسيت عليهه..
دنوة : اخلاص حترحون..خالة كالت خلتجي..
اخلاص : اي.. كامت تعدل بالشال ..يله عيني اشوفكم غير وكت..

كامو يباوسوهه..اجت يمي ودعتني بالكلام وراحت.. انتي هم اخته عود..شو هو مرن وي الكل..يله مو مهم عادي.. عفتهم ورحت للغرفة .. شغلت الراديو وتذكرت گبل جنت انتظر الليل خاطر اسمع برنامج طائر الليل.. شكد حلو..اكعد اتخيل روحي حدخل حالة حب واحب بالشعور الوصفته لروحي..بس من جربته البارحة جان اكثر من كلشي..اكثر من مجرد كلمة .. شي يخلي كل الجوارح تريد تصير لهذا الشخص..شخص واحد من بين هواي مثله..جنت اسمع خالة ابتسام تكول اليشوف شي هواي يتعود علي لحدما يحبه.. ماكو شي شفته بحياتي هواي اكثر من سالم..بس ماحسيت تجاهه بيوم ذرة من الحسيته لرائد..

مشى الليل شلون ماجان..وي البنات ..لحد التنعش راحن لغرفتهن..كمت طفيت الأضوية وتمددت.. بين نايمة وبين كاعدة..فزيت على دگة الجامة.. ذبيت الغطى والمفروض ابرد..بس شي بداخلي بقاني دفيانة.. شعور ماحاسته گبل..كمت قفلت الباب..لبست شال ورحت ع الشباچ فتحته..اول ما شافني نزل الشماغ من حلگه وابتسملي..
رائد : شلونج باباتي..
ابتسمت : زينة وانت..
رائد : بخير وعافية من شفت هلعيون..
ماعرفت اجاوبه..اكتفيت بالابتسامة..حاولت افتح موضوع : اممم..صار هواي ماشايفتك منا..
رائد : من الشباچ يعني..
دنوة : اي..

رائد : انه همات فاگد مستحاج من اشوفج هنا..
سكتت ماجاوبت..لابس بلوز بس الفتحة واسعة من يم الرگبة..هو جان مغطيهه بالشماغ..لمن شافني نزله.. انتبهت عنده شامتين بنحره..بشرته خمرية..لا اسمر ولا ابيض..والشامتين هذول ضايفاتله نكهة خاصة..
بحركة نزل الشماغ لف بي رگبته وسحب القمصلة رفعت راسي شفت عيونه محتدة وتلمع مثل الليل بهيچ جو صافي..
حچه بنبرة صوت دافية : صفناتج هاي تحجيلي.. انتي ماتحجين..
دنوة : ها..شنو..شنو يعني مافهمت..
رائد : يعني صدگني احبك حب غريب الطور.. والحليم تكفيه الإشارة..

ابتسمت : اي هو يعني صح..بس مااقصد من اصفن.. فلا تفهمني غلط..
رائد : هههه..لاتخافين فاهمج..يله فوتي نامي حروح للشغل..ردت اشوفج..
دنوة : الله يسهلك..
رائد : يله بالج على روحج..
جان كاعد بالگع خاطر يصير بمستواي.. كام هو وينكت هدومه..قرب إديناته من حلگه وينفخ چي باردة.. كام يتمشى لحدما صار بعيد..سديت الشباچ واحس روحي منتعشة..

وره يومين كاعدة بالمطبخ اثرم زلاطة..اجت سرور علي..
سرور : كومي ابوج يريدج..ع التلفون الأرضي..
دنوة : يله هسه اشوفه..
غسلت ايدي ورحت حاچيته..
محيي : حتجي خالتج تاخذج يمهه..روحي وياهه عود.. وتريد تروح لبيت خالج عمار..
دنوة : اروح يعني..
محيي : اي روحي..كالت اربع ايام وارجع..اربعة لا غير.. اذا رادت تبقى اكثر خابريني اجي اخذج..ترحين لبيت خالج وتكرصين يم خالتج..مااريد تبصبصين..
حچيت وخنگتني العبرة : ليش هيج تحاجيني بابا.. حتخليني اروح وانت تحجي علي بدون ماتشوف تصرفاتي..
محيي : روحي وانجبي لاتضوجيني..وانه لو بيدي اخليج بالغرفة حتى مدرسة ماكو..
دنوة : ماشي..
محيي : يله مع السلامة..

رجعت السماعة ورحت للمطبخ كملت شغلي ولا چن اكو شي.. عادي متعودة علي..يحاچيني الف مرة كبل لا ينطيني كلمة وحدة حلوة.. الظهر وره الغدة كملنا كلشي وراحو ياخذولهم غفوة..انه غسلت مواعين وتمشيت للحمام اغسل رجليه وإديه.. لكيت باب الغرفة مال رائد مردودة..صدك اجه لو لا.. ماشفته ع الغدة..مااعرف ليش صابني فضول..فتحتهه على كيفي ومديت راسي..لكيته متمدد بس بالفانيلة وبنطرون..نايم على بطنه ورافع إدي ع المخدة..شعره هلكد ما سرح ماخذ شكل وضعيته لمن مخلي راسه ع المخدة.. ابتسمت وطلعت بالعجل خاف يجي احد يشوفني..

همزين شفته..محكدر اشوفه لحدما ارجع.. خلص اليوم عادي.. ثاني يوم الصبح اخذت هدوم بيت وطلعة وتريگت.. بعدين اجت خالتي اخذتني يمهه..شكد ارتاح من اشوفهه.. انسى ابوي وكلشي يخص بيت جدي..من مشاكل وفصول وگعدات وخطاطير وو..الخ ..
رحت لهناك ..سوتلي احلى اكل ودللتني..هي دائما من اروحلهه هيج تتعامل وياي..بالليل حضرنا تعليلة وگعدنا نتفرج على فلم..هي كعدت ويانا..
حلا : ماما همزين كعدنا كلنا..اريد احچي وياج بشغلة..
خالتي : كولي امي..
حلا : اكو واحد ولد بالكلية وياي..بس هو ديدرس دراسات.. يعني ماجستير..فكلما اروح للنادي اشوفه.. لحد گبل اسبوعين هيج كال اريد اخطبج..كتله مااكدر هسه امي ماتقبل..

خلاخلص هلسنة وعود الوراهه تفضل اخطبني ماتكول شي.. شتكولين انتي..اذا خطبني تقبلين..وعمامي شلون.. مو يردوني لهذا وسام ابن عمي الجبير..
خالتي عاينتلهه بنظرة..چن دتكللهه من اسبوعين مووو.. يعني ماصدگتهه بهلفقرة.. : اي شكو بيهه..خليجي يخطب ماكول شي..بس مايصير شي رسمي لحدما تخلصين السنة هاي.. بس گوليلي ماتعرفينه انتي مو..

تارة : لا ماما چذابة تعرفه..بس ماعدهم شي هيج بس نظرات.. وهو الولد مؤدب ..
حلا : انچبي شكو حجيتي من يمج..
خالتي : سولفي ماما خلافتهم..
حلا : اي ماما هو هيج الصاير..يعني اعرفه ويعرفني بس مامسوين شي..والولد اجه يريد يخطبني بس خفت من وسام..
خالتي : معليج بي..خليجي يخطبج ع الاقل يصير كلام بيناتنا منا لحدما تخلصين وراهه تلبسون حلقات..
حلا : يعني اگله يجي..
خالتي : اي ..
شفتهه ابتسمت وتچت ظهرهه ع القنفة..جانت متوترة هي وتحجي..

مبين تحبه..يله الله يتمملهم على خير.. ضلينا كاعدين لحدما خلص الفلم..گضيناهه ضحك وتحشيش..نسيت ابوي رزلني ونسيت كلشي ثاني..لحدما طفينا كلشي وصعدنا فوك.. بس فتت للفراش ودفيت تذكرت رائد..تذكرته اولت البارحة من اجاني بالليل..جان بردان وينفخ على ايده .. ابتسمت.. حسيت على تارة گرصتني على كيف من زندي..
دنوة : ولج شنو هاي..ليش تگرصين..
تارة : انتي شعندج تتبسمين..شاركينا..
تربعت وجريت المخدة خليتهه بحضني.. : ااممم.. تردون تعرفون شغلة..او لا اصبرو..تذكرون من كتلكم على رائد ابن عمي شلون اشوفه وهو مايدري..
دنيا : اي اي هذا الحلو..يعني اني تخيلته حلو..هو هيج اكيد..

عاينت عليهم بطرف عيني وخليت ايدي على حلگي : انزوول عليچن..غير يجنن هو..
ضحكت وهن همات ضحكن..
دنيا : اي كملي شصار..اعترفلج..بس شبسرعة حباج..
دنوة : اي..هو شايف صورتي يم امه وحابني..خو تدرين ابوي اذا كال شي مااكدر اعارض..فهو من جان يجي مايقبل اطلع باب الغرفة..فماشايفني بس بالصورة..وشنو.. انطاني قصيدة لعريان..ادور خطه يجنن..اصبرن لحظة..
جنت جايبتهه وياي بجطنتي..جريتهه من التعلاگة اخذت الورقة انطيتهه الهن..اشكال التعابير والضحك والخجل من يمهم ع القصيدة..
حلا : عيني شنو هلخط الحلو..انه عجبني خطه..هذا اكيد يسراوي..هم اليسراويين خطهم يجنن..

دنوة : ماادري مامنتبهة..بس هو يدخن بإيده اليسرى..
حلا : دهاج عيني..هم حلو وهم ذواق وهم شنو بعد.. طلعي خلنعرف..
دنوة : ههههه..انجبي بعد شكو يله كافي..
تارة : اوووي خجلت..يله لاتخجلين سكتنا حبي..
ضحكت وكمت اخذت الورقة ضميتهه وضلينا نسولف لحدما نمنا..ثاني يوم خالة كعدتنا من الصبح.. كمت غسلت ولبست بنطرون وبلوز..فوكاه قمصلة جوه كمر البنطرون بشوي.. لبست شال وكعدت انتظرهم..اخذت الجنطة نفسهه بعدين طلعنا لبغداد..صار شكد ماشايفتهه..من الألفين.. اربع سنين.. بوفاة جدو رحت وبعد مارحت.. وصلنا وطلع خالو استقبلنا..سلمت علي وعلى سيف ابنه..بعدين طبينا..

مرة خالي مو هلكد وياي..بس وي خالتي زينة..وانه همات مااجيهم هواي فعادي مااهتم.. انه بس تغديت رحت نمت.. نعسانة ..كعدت المغرب غسلت ونزلت كعدت وياهم بالهول.. خالو جايب كرزات وزنود الست ..شافني كاعدة بدون مااسوي شي..
عمار : حبيبتي دنو اكلي شي..
دنوة : اي خالو..
عمار : بابا شلونه..شعجب مااجه..
دنوة : زين الحمدلله..عنده شغل مايكدر يعوف المحل..
عمار : ها..الله يسهله ان شاء الله..

ابتسمت بدون مااجاوب.. مر اليوم الاول والثاني ماكو شي.. نسيت شوي وارتاحيت عليهم وع الكعدة وياهم..لحدما بيوم جنت كاعدة بالهول دااتفرج تلفزيون..اجت دنيا تتمخطر وكامشة تلفونهه بيدهه..كعدت يمي لزك..
دنيا : احم..شلونج عيني..
عاينتلهه بإستغراب : شنو هلسؤال..
دنيا : دااسأل عن حالج كبل لا تعرفين شحيصير..
دنوة : زينة..شحيصير ياستار..
دنيا : رائد جان يحاچيني..
كمزت من مكاني : عزززه..شنو يحاچيج تخبلتي.. عزه شلون اقصد ليش اوف دنيا شنو هلحچي عفية..
دنيا : ههههههه..ولج طاح حظج اذا صدك..تعاي خلاسولفلج ..

كعدت يمهه اسمعهه..
دنيا : يريد يحجي وياج..ماخذ رقمي من تلفون مرة عمج ابتسام..شوفي تره صدك لوتي ويخاف عليج..لو واحد غيره جان خابر على رقم ماما وانفضحنا..
دنوة : اوف طيحتي گلبي شكد حقيرة..ديله وين اكدر احاچي اخاف احد يسمعني..
دنيا : انجبي هو كلام عادي..سولفوا وسدي..تره الحب حلو واحلى اذا جان رجال الدتحبي..وهو ماشاء الله علي.. كلماته معدودة..سلام السلام عليكم..
عاينتلهه وبعيوني نظرات فخر : اي شعبالج..
دنيا : هههههه..كبر راسهه الآنسة..

بالليل صعدنا انه والبنات فوك..خالة نامت يم بيبي واحنا بغرفة خالو القديمة..دنيا نزلت جوة وهذني نزلن وراهه وحدة وحدة.. عفتهن وفرشت تمددت انام..توني غفيت وكمزت على صيحة دنيا..
دنيا : كومي..الرجال يريد يحاچيج..
دنوة : عززه ولج لا استحي عفية گليله نامت صخمت..
دنيا : ديله ولج خطية..حنزل انه والبنات..كملي وصيحنا عود..
اخذته منهه بس مترددة..راحت بالعجل..اول ما خليته على إذاني سمعت صوته يگح..
همست : الله الله..
جله صوته وحچه : الله يسلمج..شلونج ابوية..
دنوة : زينة وانت ..

رائد : بهلدنيا..وزين..بس ليش ماتردين تحاچيني..
دنوة : ها..مو..مو يعني استحي..
رائد : ههههه..ردت احجي وياج هنا خاطر ماتتوترين اشو بالزايد خجلانة..
دنوة : عفية لاتحاجيني هيج..احجي شي بعيد عن هلمواضيع..
رائد : احبج..
دنوة : شنووو..ماكلت هيج..
رائد : هسه انه شحچيت ابوية.. لاتصيرين طفلة بنيتي.. تدرين وين انه..
: وين..
رائد : يم الشباچ..وباردة ثلج..

دنوة : مال غرفتي..
رائد : اي..چا مال جدي..
دنوة : هههه..لا مااقصد بس دااسأل..
رائد : سوي واحجي اليعجبج..كلي آذان صاغية..
ابتسمت بس ماحجيت..هو بلحظات كام يقرالي القصيدة بصوته.. كلمات حسيت رجولته طاغية بيهن..كلمات حسيت حنيته هي العنصر الأساسي بلفظهه..انسان شايل احاسيس الدنيا بصوته..حب وحنية ورجولة وخوف..تذكرت خوفه علي لمن تمرضت..تذكرت ريحة عطره..
صحيت على روحي لمن گال : دناوي..
: ها..
رائد : اريد اسمعهه من حلگج..
دنوة : شنو هي..
رائد : كلمة احبك..
دنوة : انت مو تكول عرفتج شتفكرين..ليش دتسألني او تطلب مني..

رائد : اشو لسانج يطلع بهيج سوالف..بس يله اجاوبج.. شحسيتي من گتلج احبج..
دنوة : ها..ماادري شعور غريب..
رائد : وحلو لو لا..
دنوة : اي..
رائد : عادي اصبر بعد شهر وسنة وسنتين..مثل ما صبرت خمس سنين..وانتي شوكت ماتحسين روحج تكدرين كولي.. هي واصلتني بعيونج..

هو يحجي وانه احس الحرارة صعدت لراسي.. صخنت من كلامه وهو يحجي بكل هدوء ولا چني انه كاعدة على نار ومتوترة ..حاولت اغير الموضوع : شنو مايخلص الرصيد.. صار شكد نحجي..
ضحك ضحكة طويلة هو ويستغفر.. : ههههههه..صدك تحجين يولي.. شديت ابو العشرة بس اسمع صوتج..لأن ادري تصفنين هواي..
دنوة : شقصدك..
رائد : مااقصد باباتي مااقصد.. يله روحي نامي .. حروح للشغل انه..
دنوة : ماشي..

ودعته وسديته..مديت ايدي جدامي..ترجف.. هو يحجي وانه مغمضة عيوني ساعة بهدوء وساعة بقوة..اوف شبيه ثولة وفكاكة.. يله اتعود بعدين ..المهم انه فرحت ..ادور هو يعاملني چن بنته..حسيت بحنان عنده اكثر من ابوي.. بعمره ماكال بابا وباباتي..كله حقيرة كلبة..بت القندرة بت ال.. ال... كمت نزلت جوة صحت البنات وصعدنا ننام..انطيت التلفون لدنيا وتمددت..بس گلبي بعده يدك سريع..

حلا : ولج كبل لاتنامين احچيلنا شسولفتو..
دنوة : انچبو..ماحجينا شي..انه استحي ..
تارة : وهو هم يستحي..
دنيا : لا لاتخافين..ياخذهه من زياگهه..بس عايفهه على راحتهه.. مو لو مومووو..
ضحكت وگتلهه : اي صحيح..يله خلانام..
عفتهم يحون ونمت..مرن يومين وراهه رجعنا للبصرة.. خالتي وصلتني لبيتنا وراحت..نزلت ميتة تعب من الطريق.. شفت زلم ديفوتون للبيت من باب الديوانية..فلتت ورحت طبيت من الباب الورانية..خليت الجنطة بالغرفة ورحت للمطبخ.. بوست خالة وحضنتهه..هي وجديتي وكل الموجودات..

دنوة : ابوي هنا خالة..
ابتسام : اي اجه من الصبح..مدري شعنده..
دنوة : ها خوش..يمكن خلص من وكت واجه..
ابتسام : يمكن خالة..تاكلين اصبلج.. تره احنا تغدينا..
دنوة : لا شبعانة..اكلت بالطريق..حروح انام تعبت من الدرب..
بست جديتي وتمشيت للغرفة..فززني صوت ابوي..
صاح : تعاي..
بلعت ريگي ورحت يمه..من الخوف كمت اتخيل شغلات ماموجودة وانطي احتمال لكلشي..
اول ما فتت لغرفته كمشني من قراصتي..
دنوة : ااخ بابا شبيك شمسوية ليش هيج تسوي..
محيي : ليش متأخرة..كلت اجي الگاهه بالبيت..بقيتي ببيت خالتج لو جابتج رأسا..

دنوة : لا لا رأسا اجينا..انه ماقبلت ابقى اكثر..وبيبي ماقبلت نطلع الفجر..كالت الصبح وطلعنا بثمانية..
عاينلي بطرف عينه ورخه ايده..دار وجهه عني.. كعد ع الجرباية وايده ع الكومدي علي اوراق وحاسبة وقلم جاف.. يحسب ..رفع راسه وخزرني..
محيي : امشي ولي..
عفته وطلعت..لكيت ولد عمامي كاعدين بالصالة الجبيرة.. ماحجيت ولا سلمت..طبيت للغرفة بدلت ونمت..

مرت ايام صافية..بيت وشغل وكرف من الصبح لليل.. رائد ماشفته وجياته قلت..كام يبات ببيت اهله بس دورات كل يومين تلاثة يمر علينا..بجياته ابوي يكون موجود..فاكرص واكعد بالمطبخ لحدما يطلع يله اطلع..

كمت اشتاقله واحس بفراغ وجوده.. بالليل ماانام اذا ما اقره القصيدة واتذكر صوته لمن قرالياهه ع التلفون..اهجس صوته اغنية.. ضحكته شي نادر يصيرلي الي بشكل خصوصي.. يمكن خمس او ست مرات سامعته يضحك..بس وياي على طول هو مبتسم ويضحك..

اليوم يصادف سنة وشهر على اول شوفة شفته بيهه.. احب الشتا چي شفته بي..احب هواي تفاصيل لأن هو مسلطن بيهه ..

شعوري ماانولد بلحظة..ايام وشهور..ماجنت اعرف شنو شعوره تجاهي..بس شي فطري بداخلي انجذبله.. احساس بهيئة طفل يتودد لشخص منطي ظهره جهلا منه إن هذا الطفل بحاجة لمساعدة..وفعلا إندارله واحتواه..هيج شعوري واكثر تعقيد من كال احبج وحبي مو ابو يوم وليلة..

بس كله بداخلي..اخاف احجي حتى لسرور ونوارة.. هيج على كد رؤوس اقلام ودورات افلت من اسئلتهم..

كضيت الايام شغل بالنهار وبالليل ألهي روحي بالراديو والبرامج والاغاتي التطلع جديدة بفترات مو قريبة.. وراهه بيوم خلصت العطلة اليوم اخر يوم..حضرت الجنطة بملل.. شلون يعني اريد اشوفه ضجت..

تمددت ألهي روحي بفكرة بلكت يمرني النوم.. على لحظة وكمزت من مكاني على صوته هو وسالم وقصي ويونس.. گمت لطشت بالجامة اسمعهم..وانه قاصدته إله..
قصي : لك باردة بالقرآن..خلنفوت جوة..
رائد : دصبر شوي شبيك..اجيبلك بطانية..
قصي : ههههه..لا عمي ادور اتفشل جدام الوادم مايصير.. مايكولون شماله هذا شايل بطانيته ويركض..
يونس : هو انه نفسي فديوم اسأل رائد بردان لو لا ويگلي اي.. تدفئة مركزية..
ضحكوا كلهم..بس ماسمعت ضحكته..
رائد : يابة متعود..لابد بالشارع والمقر نص الشهر ودورات اكثر.. مايأثر..

يونس نعّم صوته بشقة : اوووي حبيبي إديشك أوي..
طگهه بضحكة هو ويتأتئ : يول چنك مرة..لاتحجي هيج يالأغم فضحتنا..
يونس : هاي شبيك حبيبي غير اشاقيك..
رائد : يله مقبولة منك..

ضلوا يحجون وهو أقل واحد حچه..عفية شكد بخيل بالكلام والضحكة.. فتحت البردة على كيف وفتحة كلش صغيرة.. شفته كاعد ع الكرسي والجگارة بحلگه..لاف الشماغ على رگبته واطرافه صايرة على بلوزه زيتوني طوخ..كاعد رجل على رجل وحذاءه جلد يلمع..شوكت ما اشوفه كاشخ..غمضت عيوني وتخيلت عطره قريب علي ويتخلل أنفاسي..مااعرف شكد ضليت مغمضة بس فتحت عيوني لكيته صافن علي ورافع حاجبه بحدة..متچي ايده اليسرى ع اليدة مالت الكرسي والجگارة بين اصبعين.. گلبي كام يرجف وعرگت بالعجل.. صخام..شافني..عزه شلون حبچي.. سديتهه وكمت اريد انام..ضل منظره ببالي.. شلون موقف يفشل المايتفشل.. شكد مطفية..اوف ياربي ..يله اكبر وانسى..مو .. اي اكبر وانسى..

اخر شي ماتحملت..كمت للحمام غسلت وجهي ..حسيت نار گبت بوجهي..رجعت نشفت وتمددت شوي ارتاحيت وراهه غفيت..

ثاني يوم داومت وسالم اخذني.. مرت ساعات الدوام بملل وكلام متكرر..ضحكت وكعدت سولفت بعدين حلينا..اول يوم وره نص السنة همات هوسة شوي علمود الجدول والتضارب وو .. الخ..طلعت انتظر سالم..اجت صديقتي بغير شبعة تحاچيني وانه دايرة وجهي عليهه اسولف..تصلبت لمن سمعت صوته وكل سالفة وحرف نزل من لساني..
رائد : يله امشي..
ترخصت منهه ومشيت وياه..ابتعدنا عن المدرسة شوي وفتنا بالبستان الأفوته كل يوم..قليل يفوتوه فصنطة كلش.. مااعرف شنو الصار بداخلي خلاني ارفع راسي اشوفه..
رافع راسه ويمشي بظهر عدل وصوت السويچ وي مفاتيح ثانية يرن بإذاني..

بلحظة وكف ودار راسه هو وخازرني..
خفت.. : شنو..شكو شبيك..
رائد : انتي ليش هيج عرمة..
دنوة : منو..
رائد : انتي..
دنوة : عزززه..انه عرمة..لا عفية ليش هيج تحجي علي.. شمسوية وتكول هشكل..
تقرب مني ودنج بمستوى قليل عيونه تطاير شرار : مغمضة ومنسمة والبردة مفتوحة جدام الولد..ادري شايفيج وعايشين وياج بس عيب هشكل..كلت هسه تنتبه وتروح..ماكو .. هاي اخر كعدة هنا..بعد مااكعد عمي شلون بلوة تايهة هاي..
شهگت وانه اتذكر البارحة شسويت.. اوف حتى ماانتبهت للبردة شكد مطفية..

دنوة : لا لا..خلص والله محشوفك بعد..هو انه..يعني ماجنت اقصد وروح امي..
ابتعد هو ويطلع جگارة وجداحة : اي ادري ماتقصدين.. بس اليشوفج مايكول هشكل..دااحچي لمصلحتج..ولوما تهميني مااحجي..
ركزت بعيونه المليانة هدوء ورزانة..شبيه اصافگ اذا سمعت اسمه..گلبي رهيف ..
زفر الدخان وعيونه علي من فوك ليجوه..احترگت من نظراته والمكان بگد برودته هجسته حار واكثر..
رائد : لاتخلين تصرفاتج تعم عليج..مؤدبة وعاقلة بس نصي حسج وهاي تصرفات الطيش خليهه بيني وبينج.. مو بهلشكل.. فهمتيني..

حركت راسي يعني اي ..
رائد : مااريد تنوخذ عنج نظرة غلط فاحچي هيج.. لاتاخذين غير فكرة عني..
دنوة : لا مااخذ..
ابتسم : يله ابوية..اريد انام ميت تعب وماعندي مكان احاچيج بي بس الدرب هذا..
بادلته بإبتسامة خفيفة ومشينا للبيت..بس شافني طبيت راح من باب الديوانية..

مرت ايام طبيعية..دراسة وشغل شوي..رائد شفته بس مرتين يمكن..برجعتي من المدرسة اشوفه بالباب توه نازل من السيارة وكله هيبة ورزانة..سالم لاشيء مقارنة بي.. انه اهجس روحي مفضوحة..هو رزن وشخصيته قوية جدام الكل.. اذا شافني جدام احد مايعاينلي حتى..لحدما ندخل ويبتعدون يبتسملي.. انه مااكدر اصير مثله..مشاعري واضحة وگلبي رهيف ..

وراهه بفترة صادف جمعة وبالشهر الثالث بدايته.. يعني كسر الجو وبدت تصير حارة الصبح..كهرباء تگطع لعبت روحنا.. فزيت من وكت ع الحرارة..لبست شال وغسلت ورحت وياهم اخبز واحضر الريوك..ورة الريوك الظهر اندكت الباب واسمع صوت طلقات..خلست وطفيت النار.. كلنا فزينا ماندري شكو.. طلع جدي وعمامي كلهم موجودين چي جمعة.. ضلينا واكفات ورة باب الكليدور نسمع..

- : اليوم اذا ماطلعتوا ابنكم احمد احرگ الدنيا.. ابنكم كلب حشا ابوه خوش رجال..
قاسم : خير شمسوي احمد..
- : شمسوي..كول شني المامسوي..مسوي كلاو على ابني وماخذه لمعارض مالت اثاث عودك شني..عود هو متفق وي ابو المحل يشتري نص البضاعة والوارد يصير اله اذا الأثاث الباقي انباع..انه شمعرفني السالفة هيج..كال مضمونة وماكو غلط دفع قسط اول والباقي كتله وليدي اسحب فلوسك وعوف الشغلة هاي..ماتفيدك المحل تعبان ماعلي رجل.. رحناله گال انه متفق وي احمد هشكل..تخربهه ع الاخير بهيج حجج لا ماارجع ولا فلس..وابنك اذبه بالسجن..هسه وليدي بالسجن رافعين علي دعوة ابنكم وابو المعرض.. عمي نطلبكم ثار تسوولنا هيج ..ماصارت ولا حتصير.. يابة دنعل ابو الفلوس لابو.. مااريدهن..اريد ابني يطلع.. حيروح بداهية من وره احمد ..هذا طوله شبر هيج يضحك علينا.. بوية چا ازين شاربي احسنلي ..

شامخ : افا عليك ابو جاسم..زلمة ونعم الزلمة.. اليوم اطلع ابنك بيا توقيف هو هسه..
- : مايطلع شيخنا..مايطلع..
شامخ : وحگ الحگ اطلعه..وفلوسك واصلات لعتبة بابك .. بس انطيني عنوان ابو المعرض والمركز نروحله هسه..

هم وديحجون صار صوت زلم ثنين اول مرة اسمعهم.. مو هذا الجان ديحجي..دقايق وگبت صياح وغلط وفشار.. خالة فاطمة وابتسام انداروا علينا..
فاطمة : فوتن جوه كافي..شعدچن تسمعن فشار..
سكتنا..توني دااروح وسمعت عمي فيصل صاح : هسه تردون الحگ من عدنا وضربتوا ابنا سچينة..
قاسم : تعال يول قصي اخذه للمستشفى..هسه نجيك..
گمنا وحدة تعاين للخ بخوف..ماندري منو انضرب سچينة.. كرصنا بالمطبخ نتاني واحد منهم يفوت..شواي ودخل عمي لواء .. راحت تحاچي..
ابتسام : ابو قصي منو انضرب سچينة..خوما ولدي عليهم شي دخيلك يالله..
لواء : لا لاتخافين..هذا رائد..ضربوه بزنده..

جنت مدنجة ع التختة اثرم زلاطة..رفعت راسي وگلبي يدك بقوة..حرارتي فولت..صخام يربي صخام.. شلون هسه بس احچي يبين علي چني ثولة..سكتت بس ايدي ترجف وانفاسي وكلشي بيه..هو ماجان موجود شجابه..شفت الساعة بالوحدة الظهر..هو يرجع بهيج وكت..شلون طلابة..بقيت انتظر على نار وعمامي كاظم وفيصل يخابرون على احمد مايجاوبهم.. شكد ادبسز وشگد اكرهه ومااطيقه.. مصيبتين بنفس الوكت ..

مشى الوكت ابطئ مايكون..لحد الثنتين ونص سمعت صوتهم فاتوا للبيت من باب الكليدور..وياهم عمي حامد.. شجابه .. عزه حيسوي مصيبة..شكو اليوم.. مديت راسي من باب المطبخ اشوفهم..عمي واكف ليغاد وإدي بجيوبه ياهو اليعاينله يخزره ولا راغب الوگفة هنا ابد..رائد كاعد ع الكرسي وچتفه مشدود ببلاستر بس طالع دم..حتى نازل من مكان البلاستر بشوي.. لابس تشيرت فاتح بحيث الدم مبين..
حامد : گوم نرجع للبيت..شحصلنا منكم انتو غضب الله.. نعلعلا..
رائد : يابة عيب هشكل جدامهم وتحچي..شيرجعني هسه مااكدر..بس انطيني مجال اقدم ع الجيش وارجع.. شغلي خطر عليك انت ومحمد..مامستعد اخاطر بيكم..
حامد : عاجبك كل يوم طايح ببلوة..عليمن.. على هذول.. نعلة الله ع الشيطان..

كاظم : لاتمصخهه عيب..كاعد ببيتنا لاتنسى..
حامد : ماناسي..وهم ماناسي شسويتو برائد.. ليش هو احمد يسواله فلس..حاله حال ابوه..كلكم خرنگعية..
كلهم تعصبوا ورادوا يحجون ..كام رائد بوگفته كمش چتفه وغمض بقوة..راح يمه وحاچاهم..
رائد : مسحوهه بيه..يابة بلا مشاكل والله متوجع مابيه انطق هاي علمودك واگف..
هم وديحجون طلع جدة من المطبخ..راحتلهم هي وتعدل شيلتهه .. باست رائد وعمي..
الحجية غادة : سلامتك يروحي..شون صرت..
رائد : الله يسلمج جدة..احسن..
سلمت على عمي..حسيته رخه..هو يحبهه ويحترمهه.. مخليلهه مقام دائما لمن يجي رائد يسلم يگللهه ابوي يوصلج سلام..

ضلوا يحجون وراهه راح..بقى بس رائد وعمي كاظم والولد .. يخابرون على احمد ماكو..اخر شي جاوب..نوارة جانت واكفة قريب عليهم تسمع..شواي واجت..
دنوة : ها شصار..وينه هذا..
نوارة : هذا حيموت ابوي يله يرتاح..هسه يجي الادبسز.. يكول تلفوني مغلق مابي شحن.. عمو خابره رزله..گال الولد حيفوت للسجن من وراك..هو خايف الظاهر..كال حروح للمركز بدربي اشوفك هناك..
خالة شهگت هي وتفتر رايحة راجعة : يمة منك حميدان بطيت گلبي الله يسامحك..
الحجية غادة : هذا ماتصيرله چارة..زوجونه خيحير بعايلته ونفتك..اليسمع يكول مراهق..
ابتسام : لا عمة..ادور يورط بت الوادم وياه..خلي بس احنا احسن..

ضلينا كاعدين ننتظر..ماتغدينا محد اله نفس.. بس صبيت لجدة علمود دواهه.. للعصر ودخلو كلهم.. كعدوا يحجون ..
شامخ : شوف يول..اذا ورطت أبيك بشغلة لخ انعل سلفة سلفاتك.. لك انت صغيرون خزيتنا الله يخزيك..
احمد : جدي كافي تره فهمت..
شامخ : ماعوزك ماتفهم..اشگ حلگك..لاتشوف ابوك متفهم وعايفك على راحتك..أي مصيبة لخ انه اتصرف.. الزلمة چا راح بالسجون..ماعندك احساس انت..
الحجية غادة : على كيفك ابو كاظم..شصار يمة احجي..
قاسم : جبنا الولد ابو المعرض تنازل عن القضية هو واحمد .. والعمال شهود على برائته..طلع هسه..رحت للمصرف سحبت اربع ملايين انطيته وفضيتهه..روح لا انت ابني ولا انه ابوك.. حرام بيك اللگمة انت بلوة..شويت على إذاني بصل.. بعد شعندك بلاوي طلعهن وخلصني..

كام يتوسل بعمي خاطر يسامحه..هو صاد عنه ماجاوبه.. شكد يسحل روحه وماعنده كرامة ابد..شكد يرزله ويرجع يسوي نفس الشي..عفتهم وطبيت للمطبخ صبينا غدة.. خالة ابتسام صبت لرائد وحد..كعد بالصالة والباقين بالديوان.. احنا تغدينا بالمطبخ..لأن ولد عم ابوي جانو هناك.. انه اكل وبالي يمه..شلون صار..اكيد متوجع..حتى مااكلت زين هيج لگطت وكمت.. تمشيت للحمام اغسل.. لكيت كاعد ويدخن.. ابتسم وأشرلي ..يعني تقربي..
ضليت اتلفت وتقربت منه.. همست : الحمدلله ع السلامة..
طفى الجگارة ورفع راسه : الله يسلمج حبيبي..
خزرته : شنو هلحچي..مايصير..
رائد : ليش يابة..حرام..
دنوة : ماادري..يمكن ..

رائد : هههههه..ماكمشتج خاطر تصير حرام..هسه شيلي الصينية فضلا وليس أمرا..
گالهه وضحك.. : شو تضحك..شكو..
رائد : مااريد تسويلي شي وعبالج خدمة..ايدي كلهه خدرانة وانه مااعرف اشيل حاجة باليمنى..
دنوة : ليش..
رائد : يسراوي..حتى الشغل باليسرى..
همست بيني وبين روحي : من هاي خطه حلو..
رائد : اي من هاي.. غمزلي..
دنوة : عززه استغفرالله شنو هاي..شلون سمعتني..
تقربت شلت الصينية واحس عيونه وراي..لحدما طبيت للمطبخ يله ارتاحيت..سرور شافتني جان تبتسم بخباثة.. انزوول عليج والله..

مرن يومين عاديات..بلش الدوام ورحت اداوم..بس الجو بي حرارة الظهر..ارجع ميتة عطش وحر..رأسا افوت اسبح.. بيوم الاربعاء رجعت ماعندي شي بالخميس..كلت مااداوم.. واصلا سوينا غياب جماعي..بس طبيت لكيت زوليتين بالطرمة..
دنوة : هاي شكو شدسوون..
ابتسام : خالة روحي بدلي وجيبيلنا الماسحات بالحمام.. اذا ماتعبانة تعاي غسلي وي البنيات..
دنوة : اي ماعندي شي..
عفتهم ورحت جوة..البيت صنطة..طالعين كلهم للشغل.. وجدي معزوم..فتت للغرفة بدلت ولبست شال..تمشيت للحمام انه واغني حاسبينك..فتحت الباب رأسا..حتى ماانتبهت اذا اكو احد لو لا.. لأن شفته مامقفول..

كمزت من مكاني وايدي على عيوني : اسفة اسفة.. اعتذر ماادري يعني مااعرف بس شفت الباب مامقفولة..
ضحك ضحكة طويلة : ماصار شي يولي..شكو قابل.. بس الحمدلله ماصيحتي..اويلي الله چا فضحتينا..
وخرت ايدي وتخوصرت : اليسمعك يكول عياطة.. تره هاي بالصدفة هيج..مو دائما..
ابتسم هو وداير وجهه على چتفه اليسرى يعني على جهتي .. واكف ع المراية ديغير الضمادة مالته..لابس فانيلة بدون قميص.. ضليت اعاين ع الجرح شلون مخيط..كزبر جلدي اشوفه يفتح الشاش ويعقمه.. عض على طرف شفته..
همست : توجعك..
رائد : حيل..الظاهر لاچمهه ماادري..
دنوة : وشلون..
رائد : انطيني الكبسول هذا..مااكدر اشيل ايدي هسه يطيح الشاش..

تقربت منه..صار بيني وبينه اصبعين لو تلاثة..جريته من الصيدلية انطيتهيا..عطره الطيب ترسني من فوك ليجوه.. ابتسمت بطرف شفتي..رحت اخذت الماسحات وطلعت..
بالباب گال : لاتصيرين جبانة وعلى كلشي فزيتي..
دنوة : ماشي..
عفته ورحت اغسل وياهن.. خلصنا العصر..بين ما رجعوا الولد شروهن بالسطح..رائد بس كاعد ويدخن ويخابر مدري عليمن يحاچي علمود الجيش.. بنفس اليوم ابوي رجع.. سلمت علي وفتت للمطبخ ماطلعت بعد..اخاف لايشوفني يمه .. الصبح بالمطبخ وبالليل اطفر للغرفة..

بيوم اخذني سالم للمدرسة..بالدرس الثالث اجت الفراشة كالت دنوة محيي يطلبوهه الإدارة..فزيت من مكاني وگلبي يدك سريع.. خفت يكون اكو شي ..رحت لكيت ابوي كاعد على قنفة ام النفرين..والمديرة كاعدة جدامه..
وكفت يمه..ابتسملي بس ادري بي ديجاملني..
محيي : اي ست..فاريد انقلهه ضروري..مااكدر أأجلهه.. ياريت تشوفيلي طريقة اكدر انقلهه بيهه..
- : بس دنوة شاطرة حرامات اخسر هيج طالبة..
محيي : ان شاء الله بس هلسنة..الوراهه بنص السنة ارجعهه.. ظروف طارئة..
- : وين تنقلهه ع الخير..
محيي : مدرسة ببغداد..
- : ان شاء الله..بس تجيبلي ورقة قبول نقل من المدرسة وانه امشيلكياهه ..اقاربي بالتربية يشتغل..
محيي : مشكورة ست..

گام هو ويعدل بقميصه.. : اذا ماعدهه شي اگدر اخذهه..
- : شعندج درس حبيبتي..اذا مهم كملي لايضيع عليج..
دنوة : لا ست دنراجع للامتحان ماعدنا شي..
- : تكدر تاخذهه عيني..
محيي : يله بابا جيبي جنطتج..انتظرج بالسيارة..
سكتت ماجاوبته..رحت للصف مصدومة.. اخذت الجنطة وترخصت من المدرسة وطلعت..صعدت بالسيارة ..
دنوة : شنو بابا ليش تنقلني..شوكت هلحچي..
محيي : بيبيتج مريضة ومرة خالج همات..مرة خالج راحت لبيت أهلهه منو يداري بيبيتج..روحي يمهه داريهه ..
دنوة : شبيهه مريضة..
محيي : صايرتلهه جلطة..بس خفيفة..فهسه تعبانة.. وخالج من الصبح لليل بالشغل..
دنوة : وسيف..
محيي : مسافر للأردن..مايرجع بعد سنتين..بس بالشهر السادس حيرجع مثل العطلة..

عاينت علي وعيوني غورگت : بس مااريد بابا..ليش تشمرني ع الناس..شمسويتلك..
محيي : تسوين الاگوله احسنلج..شفتلج مدرسة زينة بالكرادة .. بس اشتريلج زي جديد يختلف عن مالتج.. المدرسة قريبة على بيت خالج..خاطر ترحين وترجعين مشي..
حاچيته بهضيمة : فوگاهه مشي..
سطرني براشدي هو ويصيح : لج بت القنادر..موزين دخلتج مدرسة..المفروض تبقين بالبيت..
كمت ابچي واتوسل مااريد انقل..مااعرف اتأقلم بالعجل.. شلون اووف ياربي..
محيي : كافي تبچين سطرتي راسي..وجع حتى وجع..

سكتت بس دموعي تجري بدون صوت..مااستنكف من بيبي بس مااعرفهم زين..مااروح هواي..والمدرسة جديدة.. هسه اكيد بغداديات ولبسهم يختلف وكلشي مو مثلنا.. فزيت ع البريك مالته..

محيي : نزلي..
دنوة : بابا عفية ليش....
قاطعني : امشي لاتضوجيني..كلمة زايدة ابطلج وانعل ابو اليطلع وراج..
شكد يفشلني..ومااجوز منه.. اخذت الجنطة ونزلت.. طبيت من الباب الحديقة الورانية..لكيت رائد كاعد ع المرجوحة يخابر.. ماانتبهت شديحجي راسي يوجعني من البچي..
عفته وطبيت جوه..ذبيت الجنطة وبدلت.. يابة شكد تكرهني.. ليش يعني ليش..اووف تعبت وياك..بله لو عنده بنات غيري يسوي وياهن هيج..لا بس انه..بس حظي..

نمت بدون غدة..خلصت اليوم بالغرفة..اجت خالة ابتسام بالليل تحاجيني وجايبتلي اكل وياهه..
ابتسام : تعاي اكلي خالة..مايصير هيج من الصبح ماماكلة.. ادور ابوج يكوم يحجي..
دنوة : هو ضل شي ماحچه علي..هسه اكل..
ابتسام : يله حبيبتي ميخالف..لاتضوجين..وانتي بس تصير بيبيتج زينة ترجعين خوما تبقين هناك..
عاينت بعيونهه ودنجت : اي خالة..
باستني من راسي : عمي ماقبل نصيحج ع الاكل.. كال عوفوهه براحتهه .. تره يحبج شوفي شگال..
دنوة : اي ادري..بس مايكدر يسوي شي من وره ابوي..

ضلت تحاچيني..حسيت روحي هدأت شوي..عافتني وطلعت .. عاينت ع الساعة..بالدعش ونص بالليل.. هيج وكت كلهم نايمين.. خطية كاعدة علمودي.. اكلت وكمت للمطبخ وديت الصينية وغسلت المواعين..تمشيت للغرفة سمعت صوت بالهول.. تقربت من الباب لگيت رائد كاعد..
رائد : اي رحم الله والديك..يول طگت روحي ويني وين الگعدة.. يله هليومين واجي..بين ما يلم الجرح..لا خليهه بتكريت.. بعدين عود اسوي نقل..حبيبي ممنونك ماقصرت..الله وياك..
رفع راسه تلاگت عيوننا..رأسا اجه ببالي بعد مااشوف گعدته هاي..بعد مااشوفه بالصدفة وجياته لمن يجي ياخذني.. هو ماطول حيقدم ع الجيش يعني حيروح لبيت أهله.. وانه بعيدة اصلا..بعد مااعرف شوكت وكت جيته..

عاينت بعيونه وسكتت..جان اكو كاسة مال چكليت ع الطبلة بين القنفتين..رحت أخذت ..هو يعاينلي من فوك ليجوه..
رائد : دناوي..شبيج..
دنوة : مابيه شي..
رائد : كعدي احاچيج..شصاير..
دنوة : كتلك ماكو شي..
گام وگف وحط إدي بجيوبه..هو وگف وانه كعدت لا اراديا.. صار جدامي وبعيونه ألف سؤال..
همس : رفعي راسج ..
سويت مثل ماگال..
رائد : سولفي اسمعج..
دنوة : ابوي حينقلني لبغداد..ويمكن اطول للسنة الجاية.. كال بنص السنة ارجعج ع السادس..
رائد : شنو السبب..
دنوة : بيبيتي مريضة..كال داريهه ..

كام يستغفر ويزفر أنفاسه بقلة صبر : ميخالف ابوية.. روحي شوفي الدنيا هناك تختلف.. ليش ضايجة ..
حچيت بلا ما اراجع كلامي : مو حشتاقلك ومحشوفك..
صفن علي وابتسم ابتسامة..لاحظت عنده رصعة خفيفة كلش بحنچه ..كمت اتأتئ ومااعرف شحچي..حسيت الكلمات ضاعت .. اريد ابرر موقفي مااعرف..
دنوة : رائد..يعني شوف ..يعني مو بس هيج..هو انه مااتأقلم بالعجل و..
رائد : وشنو حبيبي..احجي براحتج..
دنوة : ليش تاخذني على گد عقلي..

رائد : حشا والله..مامسوي هيج..بالعكس ..
دنوة : ديله زين..
ابتسم وكعد يمي بمسافة قريبة..عطره صار بخشمي .. دنجت وغمضت عيوني..مااريد يشوفني..
همست : عفية عطرك يدوخ..
رائد : يعني..
دنوة : يعني طيب كلش..
رائد : اجيبلج النسائي مالته..
دنوة : ها..لا شكرا مااريد.. كلت بيني وبين روحي .. شوكت ابطل امسلت جدام الرجال..

مد ايده ع الباكيت وطلع جگارة بلش يدخن..
دنوة : ااا..شلون صار چتفك..
رائد : زين الحمدلله..
گمت كلت شعندي باقية بعد عيب..
جلى صوته وهمس : لاتبچين يبعدي..انه اجي اشوفج وعد ..
ابتسمت ورحت ماجاوبته..مااهتميت شلون .. المهم اشوفه.. وهو متأكدة مايريد أذيتي..طبيت للغرفة تمددت وغفيت..

ورة يومين كعدت الصبح..اول ما فتحت الباب صار رائد بوجهي لابس عسكري..طبيت بالعجل بس مطلعة عيوني شوي .. اووي شكد حلو طالع.. بسطاله خطواته تفر الگع.. طوله وقيافته..البيرية لابسهه وتاج الرتبة على چتفه.. يجنن .. ابتسمت علي ..ودعهم كلهم وبعيونه نظرات واحد يدور على شي ضايع.. شواي وطلع..سديت الباب وبچيت.. ليش ماطلعت شفته..يمكن مااشوفه مرة اللخ.. بقيت دقايق بعدين گمت غسلت وطلعت يمهم تريگت..الظهر اجه ابوي.. راح للاستقبال گعد يم جدي..جان ديصلي..شواي وصاحني.. رحت يمه..

خله فايل بيدي : هاج كمشي..
دنوة : شنو هاي بابا..
محيي : نقلتج لمدرسة ببغداد..خالتج هناك ببيت خالج.. باجر اخذج الصبح ترحين هناك وهي تطلع وياج تشتريلج.. الفلوس مني وحخليلج يم خالج..
دنوة : يعني هاهي..
محيي : اي..تره تعبت ومابيه حيل ارجع أفهم..
دنوة : فهمت..شكرا..
محيي : يله روحي..حضري هدومج نطلع من الصبح..

حركت راسي بالموافقة وطلعت..رديت الباب بطلعتي.. سمعت جدي يحجي وياه..
شامخ : ليش هيج تحاچي البت..دمرت حياتهه.. هسه تشوف أخيك قاسم شون يعامل بنياته وانت تجيب وتقسي عليهه.. تراهه خطية وترفة مايصير هشكل..
محيي : يابة مااكدر..دااشوف شهلاء بيهه..لعبانة روحي والله.. كلما افكر اعاملهه عدل وافصلهه عن أمهه.. اشوفهه شون تمشي وتتمخطر چنهه امهه..حتى سوالفهه وطريقة كلامهه.. بس خلتخلص سادس ازوجهه رأسا..مااريد تبقى .. مابيه حيل طيحة راس..
شامخ : خاب ماتنچب..صدك ماتستحي..اكو واحد يحجي على بته هيج..شمالك تسودنت..
محيي : دااگلك مااكدر..هاي لخاطرك دخلتهه المدرسة.. خلتخلص وازوجهه لعقيل..
شامخ : الرجال متزوج شون تزوجهه..انت حتسودني تخليني اطلع عن طوري..
محيي : مرته ماتخلف هسه بس يريد يخلف..

صاح : شو دتحچي چنك حتبيعهه..اذا انت رضيت انه ماارضا.. خلصت النسوان تزوجه بتك..
محيي : مااريد اقلل من شانك..بس البت بتي وانه ازوجهه بكيفي.. الا هلشغلة لاتدخل بيهه..
لحظات وانفتحت الباب طلع ابوي..خزرني ورفع حاجبه .. : شعندج تتصنطين..
جاوبته وانه مهضومة : لا..بس دااگلك حنصب تتغدة..
محيي : لا مااريد..اروح انام..

عافني وراح..شگد حقير..اكرهك..تريد تبيعني ليش.. الا عقيل اموت منه..مااحبه ابد..مكروه ومخبل..تنهدت وخليت الفايل بغرفتي..قفلت الباب مااريد اطلع..كمت ابچي .. فرفحت .. فزيت ع الباب تندك..
صحت بضوجة : منووو..
- : انه سرور.. فتحي الباب شبيج..
دنوة : مااريد..روحي الله يخليج خليني وحدي..
سرور : مو...
دتحجي وصاح ابوي : فتحي الباب قندرة..
دنوة : مااريد بابا عوفني ابوس ايدك.
محيي : فتحيهه لا اكسرهه واكسر راسج.
اضطريت اطاوعه..مسحت دموعي ورحت فتحتهه..

عافني وراح..رحت وياهم صبيت غدة..كعدت شلون ماجان مالي واهس..هم كاعدين وكل واحد يحچي اليريده.. انه بس اريدهم يسكتون..گبل لايخلصون كمت.. اريد احاجي ابوي.. مااريده يكمل اليريده..دگيت الباب وطبيت..
شمر التشيرت وگعد عدل : خير شرايدة..
دنوة : بابا تريد تزوجني لعقيل..ليش..
محيي : انه مو كلت بطلي تصنطين..اي ازوجج واكسر راسج همات..الرجال فاتحني بموضوعج وقبلت..ليش عندج اعتراض..
دنوة : اي..ليش مو حرام..ترضاهه اصير يم رجال متزوج وانه بنية بت بيت..
محيي : دعترضي..خاطر اگص لسانج..الرجال شاغول ويعيشج عيشة زينة..شتردين بعد..لو تردين تتمعشگين .. رائد اذا اجه يخطبج احش رجلي..خوش لو لا.. يله ولي ولاتحاچيني بهلموضوع بعد..الاگوله يصير..

ردت احچي..عاط بيه..بلعتهه وسكتت..رحت للمطبخ غسلت المواعين وابچي..شنو هذا اللعبان نفس..يقرر مصيري وانه حتى ماادري..زواجتي تصير لواحد متزوج.. ادور من زمان..انه بنته..چبير واخاف منه..اكيد ماتصير.. اي ماتصير.. هسه اكيد يغير رأيه..لو هيج ديخوفني لو شوف شنو.. بس كال انطيته مواففتي..اووف مليت وزهگت.. ليش دااحب رائد ومعلگة روحي بي..انه مصيري متقرر من يوم ولادتي.. ليش دااسوي شغلات ماتلوگلي..
گلبي عصرني حيل .. ايدي رجفت وانفاسي ثگلت.. خفت افكر بعد..سكتت بس دموعي تجري..لحدما خلصت غسلت وجهي ورحت كرصت بالغرفة..بلكت باجر من اروح انسى..

بالليل حضرت الجنطة ورحت اسبح.. بباب الحمام تذكرت من شفته..هو انه گتله ابوي مااكدر اناقشه بس مارضا يسمعني.. تنهدت وطبيت سبحت..كملت ولفيت شعري.. رجعت للغرفة بالعجل..خاف يجي واحد من ولد عمي.. لكيت سرور بالغرفة كاعدة يم الجنطة..بيدهه علاگة حلوة..
عاينتلهه بتساؤل : شدسوين..وشنو بيدج..
سرور : قفلي الباب وتعاي..
قفلتهه واجيت يمهه..طلعتلي عطر افشان نسائي .. عاينت عليهه متفاجئة وفاكة حلگي : عزززه سرور..شنو هاي..
سرور : رائد جابه..
دنوة : صخام..صخااام..شكو اخذتي منه..وشوكت جابه اصلا عفية هذا الرجال شكد غامض..
سرور : لمن رحتي تسبحين هو جان موجود.. راد يطلع وصاحني انطانياه..كال انطي لدنوة.. كتله واصل.. تعاي ولج شعندج بهذا العطر..

دنوة : هو انه حبيت عطره..گتله ريحتك طيبة.. كال اجيبلك النسائي مالته..كتله لا شكرا..سكت..شمدريني عبالي جان ديسايرني..اوف استغفرالله..
سرور : ههههههه..ولج عيب هيج تحجين..ادور ياخذ نظرة غلط عنج..
دنوة : لا انجبي..رائد خوش رجال وحباب..هو يگلي لاتحجين وي احد هيج بس وياي لاياخذ فكرة عنج..
سرور : اممم..اي عيني ليش لا..
ابتسمت وسكتت وراهه بلحظات لمن تذكرت كلام ابوي اليوم.. اخذته منهه ضميته بين الهدوم.. حضنتني وباستني.. ضلت گاعدة يمي..ضحكنا وسولفنا بعدين راحت.. نشفت شعري ونمت..

كعدتني جديتي الفجر..بدلت واخذت جنطة الهدوم والمدرسة.. ودعتهم بس بگلبي ضايجة..
الحجية غادة : انتبهي لروحج جدة..وسلميلي على بيبيتج..
دنوة : واصل جدة..
بستهه وطلعت..نص الطريق ونمت.. كعدت ع الشمس تفوت من الشباچ..عدلت گعدتي لكيت اكل ع الدشبول..
محيي : اكلي..جبتلج وياي..
دنوة : شكرا..
مديت ايدي اخذته اكل..جايب لفة گص وببسي.. بين ما خلصتهن طبينا لبغداد الظهر..اتفرج ع البنات.. لبس فاضح وياه شال..احنا ونمشي قريت مكتوب ع الحيطان .. الحركة الاسلامية ..

هاي طلعت والكل خاف..بحيث النسوان السافرات لبسن حجاب.. خصوصا المناطق الشعبية والعرب..عرب جبور والبوحمدان وغيرهم..شوهوا صورة الاسلام بهلتصرفات التافهة ونسوا إن لا إكراه في الدين..

فزيت على صوت ابوي..
محيي : جيبي جنطتج وتعاي يله..
: اي..
نزلتهن وانداريت..لكيت خالو بالباب..ابتسملي واجه باسني.. اخذ الجنط من ايدي وطببهن جوه..ابوي دخل وياي كعد.. يسولف ويحچي عادي..مايكره اهل مرته بس يكره بنته.. واخر شي نقلهه من محافطة لمحافظة علمود بيبيتهه.. شكد غريب.. بقى كاعد اقل الساعة بعدين طلع..اجه خالو يحاچيني..
عمار : اخذي راحتج حبيبتي..خالتج هنا..
دنوة : ماشي خالو..
عمار : يله اروح للشغل اني..سدي الباب ورايه..
دنوة : يله..
رحت وراه سديت الباب ورجعت كعدت يم خالة وبيبي.. سولفت وياهم ع الصار وشلون اجيت وحچي عادي.. سوالف مادري منين تطلع..

اخر شي حچت خالتي : ماطول اجيتي انتي انه ارجع بعد.. البنات وحدهن اخاف عليهن..
دنوة : انه گلت حلگاهن وياج..
خالتي : لا عدهن امتحانات وانطيتهن نسخة من المفاتيح ويمي نسخة .. حبيبتي انتي اليوم بس ترتاحين نطلع اشتريلج هدوم..
دنوة : مااعرف الزي شنو..
خالتي : انه اعرفه..گومي بدلي وناميلج شوي..

كمت بدلت واجيت تمددت يمهم..من التعب رجعت غفيت ولا چن نايمة نص الدرب.. كعدتني خالتي العصر..لبست هدوم جدد وطلعت وياهه للمحلات اشترتلي..تفاجئت ابوي مخليلي مبلغ اكثر من كل مرة..هنا انصدمت بالموديلات ونوع اللبس المسموح.. هي خالتي اشترتلي..قمصان بيض تلاثة.. صدريتين كابوي ام التعلاگة رصاصية ومو طويلة..فوك الحجل بأربع اصابع لو خمسة.. اخذتلي وحدة قماش همات رصاصية بيهه دگمتين من يم الصدر متباعدات وينفتحن عادي.. تلاثتهن بيهن چاكات.. بس مفتوحات اكثر من المشتريتهه گبل.. شالات واحذية..كلشي يعني..بالليل كملنا كلشي واجه خالو رجعنا..

صادف جمعة همزين..مابيه حيل اداوم باجر..كعدت يم بيبي ساعدتهه تاكل واخذتهه للحمام..نفسهه عزيزة ماقبلت ادخل وياهه..وهي همات بعدهه بحيلهه تكدر تسوي هواي شغلات.. بس بصعوبة اكيد.. بالليل تونست وياهه..كعدت اسولفلهه وانكت لحدما تعبت ونمت..

وره يومين كعدتني الصبح للمدرسة..كمت بس كلي خمول وخوف .. مااعرف شلون حعيش وياهم.. رحت غسلت واجيت بدلت..لبست الكابوي والقميص.. حبيتهه علي ..طلعت مخصرة علي..ومن الصفاح بيهه فتحة مو كلش چبيرة.. خليت قراصة مو كلش چبيرة يعني معقولة ولبست الشال..
الجواريب ماتبين من حافة الحذاء..فطلعت كلش مرتبة.. اخذت الجنطة ورحت حضرت الريوك..نزل خالو باسني وصبح علي.. كملت وصبيته..گعدو يتريكون واخذت لبيبي خليته يمهه.. مابيهه حيل تمشي..الدكتور گايل تتحسن وتكوم تكدر تمشي بس يحتاجلهه وكت.. المهم العلي اسوي..
ساعدتهه تاكل وغسلت..اجه خالو يحاچيني..
عمار : يله خالو امشي اوصلج للمدرسة..شوفيهه تره قريبة بس ادليج هسه..مو دائما ألحگ..
دنوة : يله ماعندي شي..

اخذني وتمشينا للمدرسة..صدك قريبة .. نفس المسافة مال مدرستي القديمة..لمن طبيت وشفت هدومي وي هدومهم همزين ماكو فرق..يعني طبيعي..ضليت كاعدة على مصطبة انتظر يدگ الجرس..وره ربع ساعة دگ وطبينا جوه..سألت المدرسة وين صايرة الشبعة باء ورحت..البنات كلهن طوال وضخام .. انه شگدوتني طالعة يمهن..ولو طولي ١٦٠ مو قليل بس بعد هن اطول..رحت كعدت اخر رحلة وبالگوة اشوف.. ضجت .. واستحيت احچي..لكيتهم سابقينا بكومة دروس.. خاصة تاريخ ورياضيات..عدنا تلث فرص والدوام يخلص بالوحدة ونص.. محد اجت تحجي وياي..وانه اردد بداخلي..حتعود عليهن..

خلص الدوام وحلينا..رجعت تمشيت للبيت.. لكيت خالتي طالعة.. رجعت للبصرة ..بس محضرة الغدة الحمدلله.. شكد عدهه ذوق..انه صبيت الي ولبيبي وتغدينا..

كعدت اقره واشوف النقوصات..كملت نصهن حسب الجدول وباجر النص الباقي..انه بالعجل احفظ..بس اشوف الجملة ماانساهه بعد..فرحت أدبي لأن العلمي مايفيدني..
بالليل اجه خالو وسويت عشة تعشينا..لملمت البيت ورحت نمت..

مرت ايام ع الروتين هذا..العطر الجابليا رائد كلما اروح للمدرسة أخلي منه..حتى فديوم سمعت بنات ثنين يگولن شكد طيب عطرهه لهاي البنية..كمت اقره وياهم واستعدلت بعد راح الضغط.. استمر كلشي طبيعي..الى أن فديوم طلعت زهگانة للدوام..توني داافوت للفرع ويبست بمكاني....

يتبــــــــــــــــــــع..................